ବାଲେଶ୍ୱର: ଲକ୍ଷ୍ମୀ ବସ ଡ୍ରାଇଭର ମହାସଂଘର ଷ୍ଟିଅରିଂ ଛାଡ଼ ଆନ୍ଦୋଳନ । ୫ ଦଫା ଦାବି ନେଇ ଭୋଗରାଇ ବସଣ୍ଟାଣ୍ଡରେ ଡ୍ରାଇଭରଙ୍କ ଆନ୍ଦୋଳନ ଜାରି । ଦରମା ବୃଦ୍ଧି ସହିତ ବିଭିନ୍ନ ଦାବିକୁ ନେଇ ବସ ଷ୍ଟାଣ୍ଡ ଆଗରେ ଆନ୍ଦାଳନ ଜାରି । ଆନ୍ଦୋଳନ ଯୋଗୁଁ ବିଭିନ୍ନ ସ୍ଥାନରେ ଯାତ୍ରୀମାନେ ଅସୁବିଧାର ସମ୍ମୁଖୀନ ହେଉଛନ୍ତି । ଭୋଗରାଇ ବ୍ଲକର ବିଭିନ୍ନ ଗାଁକୁ ୬ଟି ଲକ୍ଷ୍ମୀ ବସ ଯାତାୟାତ କରୁଥିବା ବେଳେ ଆଜି ଡ୍ରାଇଭର ମାନେ ଷ୍ଟିଅରିଂ ଛାଡ଼ ଆନ୍ଦୋଳନ କରିବାରୁ ଯାତ୍ରୀମାନେ ଯାତାୟତ ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି । ଯେପର୍ଯ୍ୟନ୍ତ ଡ୍ରାଇଭର ମାନଙ୍କ ଦାବି ସରକାର ମାନି ନନେଇଛନ୍ତି ସେ ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଡ୍ରାଇଭର ମହାସଂଘ ଚେତାବନୀ ଦେଇଛି ।
ଅପରେସନ ସିନ୍ଦୂରକୁ ନେଇ ଚାଞ୍ଚଲ୍ୟକର ତଥ୍ୟ: ପାକିସ୍ତାନ ପ୍ରୟୋଗ କରିଥିବା ପିଏଲ-୧୫ ମିସାଇଲକୁ ନେଇ ସସପେନ୍ସ
ନନ୍ଦିଘୋଷ ବ୍ୟୁରୋ : ଅପରେସନ ସିନ୍ଦୂରକୁ ନେଇ ଆସିବାରେ ଲାଗିଛି ଚାଞ୍ଚଲ୍ୟକର ତଥ୍ୟ। ଅପରେସନ ବେଳେ ଚୀନ ନିର୍ମିତ ପିଏଲ-୧୫ ମିସାଇଲକୁ କୌଣସି ତୃତୀୟ ପକ୍ଷ ଦ୍ବାରା ପରିଚାଳିତ କରାଯାଇଥିବା ଆଶଙ୍କା କରିଛି ଭାରତ। କୌଣସି ସାଟେଲାଇଟ ବା ଏୟାରବର୍ନ ଅର୍ଲି ୱାର୍ଣ୍ଣିଂ ଆଣ୍ଡ କମାଣ୍ଡ ସିଷ୍ଟମ ଦ୍ବାରା ଏହା ପରିଚାଳିତ ହୋଇଥିଲା ବୂୋଲି ଭାରତ ସନ୍ଦେହ କରୁଛି। ଏହି ସବୁ ମିସାଇଲଗୁଡିକ ପାକିସ୍ତାନ ଅପରେସନ କେନ୍ଦ୍ରରୁ ନିୟନ୍ତ୍ରିତ ନ ହୋଇ ବାହାରେ ନିୟନ୍ତ୍ରିତ ହୋଇଥିବା କୁହାଯାଇଛି। ଫ୍ଯୁଜନ ଅପରେସନ ଯୋଗୁ ଭାରତୀୟ ରାଡାରରେ ବିଳମ୍ବରେ ପାକ୍ ମିସାଇଲଗୁଡିକ ଦେଖାଦେଇଥିଲା। ଫଳରେ ସେଗୁଡିକୁ ଧ୍ବଂସ କରିବା ଲାଗି ଅଧିକ କଷ୍ଟ କରିବାକୁ ପଡିଥିଲା। ତେବେ ପାକିସ୍ତାନର କେତେକ ମିସାଇଲ ମିସଫାୟାର ହୋଇଥିବା ବେଳେ କେତେକକୁ ଧ୍ବଂସ କରିଥିଲା ଭାରତୀୟ ଏୟାର ଡିଫେନ୍ସ ସିଷ୍ଟମ।
ସେହିପରି ପାକିସ୍ତାନର ଡ୍ରୋନ ହମଲାରେ ତୁର୍କୀ ସହାୟତା କରିଥିବା ଆଶଙ୍କା ସୃଷ୍ଟି ହୋଇଛି। ସେପଟେ ଏବେ ବି ଏଲଓସିରେ ସତର୍କ ସେନା। ପାକିସ୍ତାନ ବା ଆତଙ୍କୀ ସଂଗଠନର ଆକ୍ରମଣକୁ ପ୍ରତିହତ କରିବା ଲାଗି ସମ୍ପୂର୍ଣ୍ଣ ସେନା ପ୍ରସ୍ତୁତ ଥିବା ସୂଚନା ମିଳିଛି ।
ଓବିସି, ଏସଇବିସିଙ୍କୁ ସଂରକ୍ଷଣ ପ୍ରସଙ୍ଗ: କ୍ୟାବିନେଟ ନିଷ୍ପତ୍ତିକୁ ବିଜେଡିର କଡ଼ା ସମାଲୋଚନା
ଭୁବନେଶ୍ୱର: ଉଚ୍ଚଶିକ୍ଷା ବିଭାଗର ଛାତ୍ରଛାତ୍ରୀଙ୍କ ସଂରକ୍ଷଣ ଲାଗି ଗତକାଲି କ୍ଯାବିନେଟ ଯେଉଁ ନିଷ୍ପତ୍ତି ନେଇଛି ତାକୁ କଡ଼ା ସମାଲୋଚନା କରିଛି ବିଜେଡି । କ୍ୟାବିନେଟ ନିଷ୍ପତ୍ତି ଶିକ୍ଷା କ୍ଷେତ୍ରରେ ଏକ ପ୍ରହେଳିକା ବୋଲି କହିଛନ୍ତି ବିଜେଡି ବିଧାୟକ ଅରୁଣ ସାହୁ । କହଛନ୍ତି, ତାହା ଏକ ହାଲୁକା ସଂରକ୍ଷଣ ବା ଆଂଶିକ ସଂରକ୍ଷଣ । ସେଥିପାଇଁ ସରକାରଙ୍କୁ ଆଂଶିକ ଧନ୍ୟବାଦ । କାରଣ ହେଉଛି ଯୁକ୍ତ ଦୁଇ, ଯୁକ୍ତ ତିନି ଓ ପିଜିରେ ସିଟ ଖାଲି ପଡୁଛି । ସେଠି ସରକାର ସଂରକ୍ଷଣ ଦେଇଛନ୍ତି । ମୂଳ ଦାବି ହେଉଛି ଇଞ୍ଜିନିୟରିଂ, ମେଡିକାଲ ଓ ଟେକ୍ନିକାଲରେ ସଂରକ୍ଷଣ ଦିଆଯାଉ। ସେଠି ଏସସି ଓ ଏସଟି ପିଲାଙ୍କୁ ୨୦% ଦେଉଛନ୍ତି। ତାଙ୍କୁ ୩୮.୭୫ % ସଂରକ୍ଷଣ ଦିଅ । ଓବିସି ପିଲାମାନେ ଶୂନ ସଂରକ୍ଷଣ ପାଉଛନ୍ତି। ତାଙ୍କୁ ୨୭ % ଦିଅ । ଯଦି ସଂରକ୍ଷଣ ସେମାନଙ୍କୁ ଦେଇ ନପାରିବ ତେବେ ଏ ପ୍ରହେଳିକା ସୃଷ୍ଟି କରି ବାହାବା ନେବାର କୌଣସି ଆବଶ୍ୟକତା ନାହିଁ ବୋଲି କହିଛନ୍ତି ଅରୁଣ। ସମାଜରେ ଯେଉଁ ତାରତମ୍ୟ ଅଛି ତାକୁ ଭାଙ୍ଗିବା ପାଇଁ କାମ ନକରି ଲୋକଙ୍କୁ ଭୁଆଁ ବୁଲାଉଛନ୍ତି ବୋଲି କଟାକ୍ଷ କରିଛନ୍ତି ବିଜେଡି ବିଧାୟକ ଅରୁଣ ସାହୁ।
ସେହିପରି ଏ ପ୍ରସଙ୍ଗରେ ପ୍ରତିକ୍ରିୟା ଦେଇ ବିଜେଡି ବିଧାୟକ ମନୋହର ରନ୍ଧାରୀ କହିଛନ୍ତି, ବହୁପୂର୍ବରୁ ଓବିସି ଓ ଏସଇବିସିଙ୍କ ପାଇଁ ୨୭ ପ୍ରତିଶତ ସଂରକ୍ଷଣ ଦଳ ଦାବି କରିଆସୁଛି। ବିଶେଷତଃ ମେଡିକାଲ୍, ଇଞ୍ଜିନିୟରିଂ ଓ ବୃତ୍ତିଗତ ଶିକ୍ଷାରେ ଓବିସି ଛାତ୍ରଛାତ୍ରୀଙ୍କ ପାଇଁ ୨୭ ପ୍ରତିଶତ ସଂରକ୍ଷଣ ଲାଗି ଦାବି କରିଆସୁଛି । ଏହାସହ ନିଯୁକ୍ତି କ୍ଷେତ୍ରରେ ଏସଇବିସିଙ୍କ ଲାଗି ୨୭ ପ୍ରତିଶତ ସଂରକ୍ଷଣ କରାଯାଉ ବୋଲି ଦଳ ଦାବି ଜଣାଇଛି । ସରକାର କିନ୍ତୁ କ୍ୟାବିନେଟରେ ତାହା କରିନାହାଁନ୍ତି କହି ସମାଲୋଚନା କରିଛନ୍ତି ବିଜେଡି ବିଧାୟକ ମନୋହର ରନ୍ଧାରୀ। ଗତକାଲି ସାମାଜିକ ଓ ଅର୍ଥନୈତିକ ପଛୁଆ ବର୍ଗର ଛାତ୍ରଛାତ୍ରୀଙ୍କ ପାଇଁ ନାମଲେଖାରେ ୧୧.୨୫ ପ୍ରତିଶତ ସଂରକ୍ଷଣ ଦେବାକୁ ରାଜ୍ୟ କ୍ୟାବିନେଟ ନିଷ୍ପତ୍ତି ନେଇଛି । ଏହି ସଂରକ୍ଷଣ ନୀତି ଚଳିତ ଶିକ୍ଷା ବର୍ଷରୁ ରାଜ୍ୟର ସବୁ ସରକାରୀ ବିଶ୍ବବିଦ୍ୟାଳୟ, ସରକାରୀ ଓ ଅନୁଦାନପ୍ରାପ୍ତ ଉଚ୍ଚ ଶିକ୍ଷାନୁଷ୍ଠାନରେ ଲାଗୁ କରାଯିବ। ଏହା ସହିତ ଉଚ୍ଚଶିକ୍ଷାରେ ଅନୁସୂଚିତ ଜନଜାତି ବର୍ଗର ଛାତ୍ରଛାତ୍ରୀଙ୍କ ଲାଗି ୨୨.୫ ପ୍ରତିଶତ, ଅନୁସୂଚିତ ଜାତି ବର୍ଗର ଛାତ୍ରଛାତ୍ରୀଙ୍କ ପାଇଁ ୧୬.୨୫ ପ୍ରତିଶତ, ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ଲାଗି ୫ ପ୍ରତିଶତ ଓ ପୂର୍ବତନ ସେନାନୀଙ୍କ ପରିବାର ସଦସ୍ୟଙ୍କ ଲାଗି ୧ ପ୍ରତିଶତ ସଂରକ୍ଷଣ ପୂର୍ବ ପରି ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ କହିଥିଲେ ।
PRI ସଦସ୍ୟଙ୍କ ପ୍ରତି ସରକାରଙ୍କ ସମ୍ମାନ ନାହିଁ : ବିଜେଡି
ଭୁବନେଶ୍ବର : ଶଙ୍ଖ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ନିଶ୍ଚିତକୋଇଲି ଅନାସ୍ଥାକୁ ନେଇ ବର୍ଷିଲେ ବିଜେଡି ବରିଷ୍ଠ ସାଧାରଣ ସମ୍ପାଦକ ଲେଖାଶ୍ରୀ ସାମନ୍ତସିଂହାର । ସେ କହିଛନ୍ତି, ୨୦୨୪ ନିର୍ବାଚନ ପରେ କ୍ରମାଗତ ଭାବେ ବିଜେପି ସରକାର ଏବଂ ଅନ୍ୟ କିଛି ଗୋଷ୍ଠୀ ବି ଗଣତନ୍ତ୍ରର ପ୍ରକ୍ରିୟାକୁ ସମ୍ମାନ କରୁନାହାନ୍ତି । ଯେଉଁ ପଂଚାୟତିରାଜ ବ୍ୟବସ୍ଥା ସେମାନଙ୍କୁ ସୁହାଉ ନାହିଁ, ଭାଙ୍ଗିବାକୁ ଚେଷ୍ଟା ସହ ଧମକ ଦିଆଯାଉଛି । ତାକୁ ଭାଙ୍ଗି ବିଜେପି ସମର୍ଥନ ବି ସ୍ୱାଧୀନରେ ଅଧ୍ୟକ୍ଷ ବସାଇବାକୁ ଚାହୁଁଛନ୍ତି । କୁକୁଡାଖଣ୍ଡିରେ କଲେ, ଏବେ ନିଶ୍ଚିନ୍ତକୋଇଲିରେ ସ୍ୱାଧୀନ ବିଧାୟକ ଶାରଦା ପ୍ରଧାନଙ୍କ ସମର୍ଥିତ ପିଆରଆଇ ସଦସ୍ୟ ୧୩ ତାରିଖରେ ଅନାସ୍ଥା ଆଣିଥିଲେ । ହେଲେ ଏହା ଦିନକୁ ପୂର୍ବରୁ ଅନାସ୍ଥା ଆଣିଥିବା ନେତା ଅସୁସ୍ଥ ହୋଇ ହସ୍ପିଟାଲରେ ଭର୍ତ୍ତି ହୋଇଗଲେ । ଏଥିରୁ ସ୍ପଷ୍ଟ ହେଲା ଯେ ଅନାସ୍ଥା କାଟ ଖାଇଥାନ୍ତା । ସେହି ଭୟରେ ଏହା କଲେ । ନିର୍ବାଚନ ଅଧିକାରୀ ବି ଛୁଟିରେ ରହିଲେ । ଶାରଦା ପ୍ରଧାନଙ୍କ ଚାପରେ ସେ ଛୁଟିରେ ରହିଲେ ଯେପରି ଅନାସ୍ଥା ନ ଆସି ପାରିବ । ଏହାର ମଧ୍ୟ ତଦନ୍ତ ହେଉ । ପିଆରଆଇ ସଦସ୍ୟଙ୍କୁ କି ରୋଗ ହୋଇଥିଲା, ମେଡିକାଲ ବୋର୍ଡ ଯାଞ୍ଚ କରୁ । ଯେଉଁମାନେ ଗଣତନ୍ତ୍ର ସହ ଖେଳୁଛନ୍ତି, ସେମାନଙ୍କୁ ଦୃଢ ଶିକ୍ଷା ଦିଆଯାଉ ନିର୍ବାଚନ ଅଧିକାରୀଙ୍କ ଦାୟିତ୍ୱ ନିର୍ବାଚନ କରିବା, ହେଲେ ନିର୍ବାଚନ ପୂର୍ବ ଦିନ କେମିତି ଛୁଟିରେ ଗଲେ? ଅନ୍ୟ ନିର୍ବାଚନ ଅଧିକାରୀ ବି ଛୁଟିରେ ଗଲେ । ଅନାସ୍ଥା ହାରିବା ଭୟରେ ଏହା କରାଗଲା । ଯେଉଁ ବ୍ଲକ ଅଧ୍ୟକ୍ଷଙ୍କ ବିରୋଧରେ ଅନାସ୍ଥା ଆସିଲା, ସେଠି ଶାରଦା ପ୍ରଧାନଙ୍କ ସମର୍ଥକ ଜୀବନରୁ ମାରି ଦେବାକୁ ଧମକ ଦେଇଥିଲେ । ଦୁଇଟି ଏଫଆଇଆର ହୋଇଛି । ତଦନ୍ତ ହେଉ । ଭୋଟିଙ୍ଗ ଯେବେ ହୋଇ ପାରିଲା ନାହିଁ, ଉପଜିଲ୍ଲାପାଳଙ୍କ ପକ୍ଷରୁ ଚିଠି ଆସିଲା ଯେ ଅନିର୍ଦ୍ଧିଷ୍ଟ କାଳ ପାଇଁ ଏହା ସ୍ଥଗିତ ରହିଲା । ହେଲେ ଥରେ ତାରିଖ ମିଳିଲେ, ଆଉ ନୂଆ ତାରିଖ ଦିଆଯାଇ ପାରିବ ନାହିଁ । ଏହା ସରକାରୀ ମାନୁଆଲରେ ଅଛି । କେଉଁ ଆଇନ ବଳରେ ଆଉ ଏକ ତାରିଖ ଦିଆଗଲା । କୁକୁଡାଖଣ୍ଡିରେ ବି ତିନି ଥର ନୁଆ ତାରିଖ କେଉଁ ଆଧାରରେ ଦିଆଯାଉଛି । ମୋହନ ସରକାରରେ ଲୋକ ପ୍ରତିନଧୀଙ୍କ କୌଣସି ସମ୍ମାନ ନାହିଁ । ପୋଲିସ ଦୃଢ କାର୍ଯ୍ୟାନୁଷ୍ଠାନ ନେଉ । ଆଇଆରଆଇ ସଦସ୍ୟଙ୍କୁ ସୁରକ୍ଷା ଦିଆଯାଉ । ଧମକାଇ ଥିବା ଲୋକଙ୍କୁ ଗିରଫ କରାଯାଉ ।
ଭଦ୍ରକ ସହରର ଫଳ ଓ ଡ୍ରାଇଫୁଡ ମାର୍କେଟରେ ବଏକଟ ତୁର୍କୀର ପ୍ରଭାବ
ଭଦ୍ରକ : ଆତଙ୍କବାଦର ପେଣ୍ଠସ୍ଥଳୀ ପାକିସ୍ତାନକୁ ତୁର୍କୀର ଖୋଲା ସମର୍ଥନକୁ ନେଇ ସାରା ଭାରତରେ ବଏକଟ ତୁର୍କୀ ଟ୍ରେଣ୍ଡ କରୁଥିବା ବେଳେ ଏହାର ପ୍ରଭାବ ଭଦ୍ରକରେ ମଧ୍ୟ ଦେଖିବାକୁ ମିଳିଛି । ବିଶେଷ କରି ଭଦ୍ରକ ସହରର ଫଳ ଓ ଡ୍ରାଇଫୁଡ ମାର୍କେଟରେ ବଏକଟ ତୁର୍କୀର ପ୍ରଭାବ ଦେଖିବାକୁ ମିଳିଛି । ସହରରେ ଥିବା ଫଳ ବ୍ୟବସାୟୀମାନେ ତୁର୍କୀରୁ ଆମଦାନୀ ଫଳ ଉପରେ ରୋକ ଲଗାଇଛନ୍ତି । ତୁର୍କୀର ଭୂମିକମ୍ପ ସମୟରେ ଭାରତ ଯେଉଁଭଳି ସାହାଯ୍ୟ କରିଥିଲା ତାହା ସାରା ବିଶ୍ୱକୁ ଜଣାଅଛି । ମାତ୍ର ସେ ସବୁକୁ ଭୁଲି ଭାରତ ପାକିସ୍ତାନ ଯୁଦ୍ଧରେ ପାକିସ୍ତାନକୁ ଖୋଲା ସମର୍ଥନ ଜଣାଇଛି ତୁର୍କୀ । ଯାହାକୁ ଭଦ୍ରକର ବ୍ୟବସାୟୀମାନେ ବିରୋଧ କରିବା ସହିତ ତୁର୍କୀରୁ ଆମଦାନୀ ସେଓ ଓ କେତେକ ଡ୍ରାଇଫୁଡ ଉପରେ ରୋକ ଲଗାଇଛନ୍ତି । କେବଳ ବ୍ୟବସାୟୀ ନୁହଁନ୍ତି ଗ୍ରାହକ ମାନଙ୍କ ମଧ୍ୟରେ ମଧ୍ୟ ତୁର୍କୀ ବିରୋଧ ଆଭାସ ଦେଖିବାକୁ ମିଳିଛି । ବର୍ତ୍ତମାନର ପରିସ୍ଥିତିରେ ସମସ୍ତ ତୁର୍କୀ ସାମଗ୍ରୀ ବଏକଟ କରିବାକୁ ଗ୍ରାହକଙ୍କ ମଧ୍ୟରେ ଆକ୍ରୋଶ ଦେଖିବାକୁ ମିଳିଛି।
ଜଙ୍ଗଲରେ ଯୁବକଙ୍କୁ ହତ୍ୟା ଘଟଣାର ପର୍ଦ୍ଦାଫାସ କଲା ପୋଲିସ
ତାଳଚେର : ଗତ ମେ’ ୫ ତାରିଖରେ ତାଳଚେର ଥାନା ଅନ୍ତର୍ଗତ ଶିବରାମପୁର ରାସ୍ତା ନିକଟ ଜଙ୍ଗଲରେ ଯୁବକଙ୍କୁ ହତ୍ୟା ଘଟଣାର ପର୍ଦ୍ଦାଫାସ କରିଛି ତାଳଚେର ପୋଲିସ । ପ୍ରେମ ବ୍ୟାପାର ସହ ପୂର୍ବ ଶତ୍ରୁତାକୁ କେନ୍ଦ୍ର କରି ଯୁବକଙ୍କୁ ଅପହରଣ ପରେ ହତ୍ୟା କରିଥିଲା । ଅପହରଣ କରି ରଖିଥିବା ଜଙ୍ଗଲ ଓ ହତ୍ୟାକାଣ୍ଡ ସ୍ଥାନରେ ପୋଲିସ ଓ ଡଗ ସ୍ୱାର୍ଡ ସହ ଅଭିଯୁକ୍ତକୁ ନେଇ ସିନ ରିକ୍ରିଏସନ କରିଛି ପୋଲିସ । ହତ୍ୟା ପରେ ଦୁର୍ଘଟଣାର ରୂପ ଦେଇଥିଲେ ହତ୍ୟାକାରୀ । ଏହି ଘଟଣାର ମୁଖ୍ୟ ଅଭିଯୁକ୍ତ ଆନନ୍ଦ ନାୟକଙ୍କୁ ପୋଲିସ ଗିରଫ କରିଥିବା ବେଳେ ଘଟଣାରେ ଆଉ କିଛି ଅଭିଯୁକ୍ତ ସମ୍ପୃକ୍ତ ଥିବା ପୋଲିସ ଜାଣିବାକୁ ପାଇଛି । ତାଳଚେର ଦେଉଳବେଡ଼ା ଅଞ୍ଚଳର ବିଶ୍ୱଜିତ ନାଏକ ଘରୁ ନିଖୋଜ ହୋଇଥିବା ବେଳେ ୯ ଦିନ ପରେ ବିଶ୍ୱଜିତଙ୍କର ଗଳିତ ମୃତଦେହ ସହ ଘଟଣାସ୍ଥଳରୁ ତାର ସ୍କୁଟିକୁ ପୋଲିସ ଉଦ୍ଧାର କରିଥିଲା । ଘଟଣାର ଅଧିକ ତଦନ୍ତ ଜାରି ରଖିଛି ତାଳଚେର ପୋଲିସ ।
ରାଜ୍ୟପାଳ ଓ ରାଷ୍ଟ୍ରପତିଙ୍କ ପାଇଁ ସମୟସୀମା ସ୍ଥିର କରିବା ପ୍ରସଙ୍ଗ, ସୁପ୍ରିମକୋର୍ଟଙ୍କୁ ୧୪ଟି ପ୍ରଶ୍ନ ପଚାରିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ
ନୂଆଦିଲ୍ଲୀ : ରାଷ୍ଟ୍ରପତି ଓ ରାଜ୍ୟପାଳଙ୍କ କ୍ଷମତା ନେଇ ବିତର୍କର ଅବସାନ ଘଟି ନଥିବାବେଳେ ରାଷ୍ଟ୍ରପତି ଏନେଇ ଉଠାଇଛନ୍ତି ୧୪ ପ୍ରଶ୍ନ। ଜଷ୍ଟିସ ବି.ଆର. ଗବାଇ ସିଜେଆଇ ଭାବେ ଦାୟିତ୍ବ ନେବା ପରେ ଏବେ ଏସବୁ ପ୍ରଶ୍ନ ନେଇ ତାଙ୍କର ଭୂମିକା କ’ଣ ରହିବ ତାହା ଉପରେ ସମସ୍ତଙ୍କ ନଜର ରହିଛି। ବିଭିନ୍ନ ବିଲକୁ ସ୍ବୀକୃତି ପ୍ରସଙ୍ଗରେ ରାଷ୍ଟ୍ରପତି ଓ ରାଜ୍ୟପାଳଙ୍କ ଟାଇମଲାଇନ ସୁପ୍ରିମକୋର୍ଟ ନିର୍ଦ୍ଧାରଣ କରିବା ପ୍ରସଙ୍ଗରେ ସୃଷ୍ଟି ହୋଇଥିଲା ବିବାଦ। ପ୍ରଧାନବିଚାରପତି ଭାବେ ଜଷ୍ଟିସ ଗବାଇ ଦାୟିତ୍ବ ନେବାର ଦିନକ ପୂର୍ବରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୁପ୍ରିମକୋର୍ଟଙ୍କ ପ୍ରସଙ୍ଗରେ ଉଠାଇଥିଲେ ୧୪ଟି ପ୍ରଶ୍ନ। ସେଗୁଡିକ ହେଲା- ସମ୍ବିଧାନର ଧାରା ୨୦୦ ଅନୁସାରେ ଏକ ବିଲ ରାଜ୍ୟପାଳଙ୍କ ନିକଟକୁ ଯିବା ପରେ ତାଙ୍କ ନିକଟରେ କଣ ରହିଛି ସାମ୍ବିଧାନିକ ବିକଳ୍ପ। ବିଲକୁ ମଞ୍ଜୁରୀ କ୍ଷେତ୍ରରେ ଜଣେ ରାଜ୍ୟପାଳ ମନ୍ତ୍ରିମଣ୍ଡଳର ପରାମର୍ଶକୁ ମାନିବା ବାଧ୍ୟତାମୂଳକ କି? ଧାରା ୨୦୦ ଅନୁସାରେ ରାଜ୍ୟପାଳଙ୍କୁ ପ୍ରଦତ୍ତ ସାମ୍ବିଧାନିକ କ୍ଷମତା ଯଥାର୍ଥ କି। ଜଣେ ରାଜ୍ୟପାଳଙ୍କ କାର୍ଯ୍ୟଧାରାର ବିଚାର ବିଭାଗୀୟ ସମୀକ୍ଷା ନ ହେବା ଲାଗି ସମ୍ବିଧାନର ଧାରା ୩୬୧ ଅନୁସାରେ ରହିଥିବା ବ୍ୟବସ୍ଥା ଯଥାର୍ଥ କି। ସମୟ ସୀମା ନେଇ ସାମ୍ବିଧାନିକ ବ୍ୟବସ୍ଥା ନଥିବାବେଳେ ସମୟ ସୀମା ନିର୍ଦ୍ଧାରଣ ବ୍ୟବସ୍ଥା ଲାଗୁ କରାଯାଇପାରିବ କି। ସମ୍ବିଧାନର ଧାରା ୨୦୧ ଅନୁସାରେ ରାଷ୍ଟ୍ରପତିଙ୍କୁ ପ୍ରଦତ୍ତ ସାମ୍ବିଧାନିକ ଅଧିକାର ଯଥାର୍ଥ କି। ବିଚାର ବିଭାଗୀୟ ନିର୍ଦ୍ଦେଶ ଜରିଆରେ ସମୟସୀମା ନିର୍ଦ୍ଧାରଣ କରାଯାଇପାରିବ କି ଇତ୍ୟାଦି। ଗତ ମାସରେ ଉପରାଷ୍ଟ୍ରପତି ଜଗଦୀପ ଧନଖଡ ସୁପ୍ରିମକୋର୍ଟଙ୍କ କ୍ଷମତା ଉପରେ ପ୍ରଶ୍ନ ଉଠାଇଥିବାବେଳେ କିଛି ରାଜନେତା ବି ସୁପ୍ରିମକୋର୍ଟଙ୍କ କ୍ଷମତା ନେଇ ପ୍ରଶ୍ନ ଉଠାଇଥିଲେ। ତାମିଲନାଡୁ ସରକାର ବିନା ରାଜ୍ୟପାଳଙ୍କ ସମ୍ମତିରେ ୧୦ଟି ବିଲ୍ ଗୃହୀତ କରିବା ପରେ ଆରମ୍ଭ ହୋଇଥିଲା ବିତର୍କର ଝଡ। ଗତ ଏପ୍ରିଲ ୧୨ରେ ବିଲ୍ ପ୍ରସଙ୍ଗରେ ସୁପ୍ରିମକୋର୍ଟ କହିଥିଲେ- ରାଜ୍ୟପାଳ ପଠାଇଥିବା ବିଲ୍ ଉପର ରାଷ୍ଟ୍ରପତି ୩ ମାସ ମଧ୍ୟରେ ନିଜର ନିଷ୍ପତ୍ତି ନେବେ। ଏହା ସହ ଖଣ୍ଡପୀଠ କହିଥିଲେ- ଧାରା ୨୦୧ ଅନୁସାରେ ରାଷ୍ଟ୍ରପତିଙ୍କ କ୍ଷମତା ବିଚାର ବିଭାଗୀୟ ସମୀକ୍ଷା ପରିସରଭୁକ୍ତ।
ଓବିସି, ଏସଇବିସିଙ୍କୁ ସଂରକ୍ଷଣ ପ୍ରସଙ୍ଗ, କ୍ୟାବିନେଟର ନିଷ୍ପତ୍ତିକୁ ଶ୍ରୀକାନ୍ତଙ୍କ ସମାଲୋଚନା
ଭୁବନେଶ୍ବର ; ଓବିସି, ଏସଇବିସିଙ୍କ ପାଇଁ କ୍ୟାବିନେଟ୍ ବୈଠକରେ ନିଆଯାଇଥିବା ନିଷ୍ପତ୍ତିକୁ ଘୋର ନିନ୍ଦା କରିଛନ୍ତି କଂଗ୍ରେସର ବରିଷ୍ଠ ନେତା ତଥା ପୂର୍ବତନ ପିସିସି ସଭାପତି ଶ୍ରୀକାନ୍ତ ଜେନା । ଏହି ନିଷ୍ପତ୍ତି ନିଷ୍ଠୁର ଓ ଏକ ପରିହାସ ବୋଲି ସେ କହିଛନ୍ତି । ଏହା କେବଳ ଉଚ୍ଚଶିକ୍ଷା ବିଭାଗରେ ଦିଆଯାଇଛି । ମେଡିକାଲ୍, ଇଞ୍ଜିନିୟର ଓ ଅନ୍ୟାନ୍ୟ ବୃତ୍ତିଗତ ଶିକ୍ଷାନୁଷ୍ଠାନରେ ଏହାକୁ ଲାଗୁ କରିବାକୁ ଦାବି କରାଯାଇଥିଲା । ତେଣୁ ଚଳିତ ଶିକ୍ଷା ବର୍ଷ ଆରମ୍ଭ ପୂର୍ବରୁ ଏହି ନିଷ୍ପତ୍ତି ବଦଳାଯାଉ । କେବଳ ଉଚ୍ଚଶିକ୍ଷା ବିଭାଗରେ ନୁହେଁ ମେଡିକାଲ, ଇଞ୍ଜିନିୟରିଂ ଓ ବୃତ୍ତିଗତ ଶିକ୍ଷାରେ ୨୭% ଓବିସି ଛାତ୍ରଛାତ୍ରୀଙ୍କ ପାଇଁ ସଂରକ୍ଷଣ କରାଯାଉ। ସେହିପରି ନିଯୁକ୍ତି କ୍ଷେତ୍ରରେ ମଧ୍ୟ ୨୭% ସଂରକ୍ଷଣ କରାଯାଉ ବୋଲି ଦାବି କରିଛନ୍ତି ଶ୍ରୀକାନ୍ତ । ଗତକାଲି ସାମାଜିକ ଓ ଅର୍ଥନୈତିକ ପଛୁଆ ବର୍ଗର ଛାତ୍ରଛାତ୍ରୀଙ୍କ ପାଇଁ ନାମଲେଖାରେ ୧୧.୨୫ ପ୍ରତିଶତ ସଂରକ୍ଷଣ ଦେବାକୁ ରାଜ୍ୟ କ୍ୟାବିନେଟ ନିଷ୍ପତ୍ତି ନେଇଛି । ଏହି ସଂରକ୍ଷଣ ନୀତି ଚଳିତ ଶିକ୍ଷା ବର୍ଷରୁ ରାଜ୍ୟର ସବୁ ସରକାରୀ ବିଶ୍ବବିଦ୍ୟାଳୟ, ସରକାରୀ ଓ ଅନୁଦାନପ୍ରାପ୍ତ ଉଚ୍ଚ ଶିକ୍ଷାନୁଷ୍ଠାନରେ ଲାଗୁ କରାଯିବ । ଏହା ସହିତ ଉଚ୍ଚଶିକ୍ଷାରେ ଅନୁସୂଚିତ ଜନଜାତି ବର୍ଗର ଛାତ୍ରଛାତ୍ରୀଙ୍କ ଲାଗି ୨୨.୫ ପ୍ରତିଶତ, ଅନୁସୂଚିତ ଜାତି ବର୍ଗର ଛାତ୍ରଛାତ୍ରୀଙ୍କ ପାଇଁ ୧୬.୨୫ ପ୍ରତିଶତ, ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ଲାଗି ୫ ପ୍ରତିଶତ ଓ ପୂର୍ବତନ ସେନାନୀଙ୍କ ପରିବାର ସଦସ୍ୟଙ୍କ ଲାଗି ୧ ପ୍ରତିଶତ ସଂରକ୍ଷଣ ପୂର୍ବ ପରି ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ କହିଥିଲେ ।
ବିଜେପି ମନ୍ତ୍ରୀ ବିଜୟ ଶାହଙ୍କ ଉପରେ ବର୍ଷିଲେ ସୁପ୍ରିମକୋର୍ଟ
ନନ୍ଦିଘୋଷ ବ୍ୟୁରୋ : ଆର୍ମି ଅଫିସର କର୍ଣ୍ଣେଲ ସୋଫିଆ କ୍ୟୁରେସିଙ୍କ ସମ୍ପର୍କରେ ଅରୁଚିକର ଟିପ୍ପଣୀ ପ୍ରସଙ୍ଗ। ମଧ୍ୟପ୍ରଦେଶ ବିଜେପି ମନ୍ତ୍ରୀ କୁନୱାର ବିଜୟ ଶାହଙ୍କ ଉପରେ ବର୍ଷିଛନ୍ତି ସୁପ୍ରିମକୋର୍ଟ। ଏହାସହ ଏଫଆଇଆର ରୁଜୁ ଲାଗି ମଧ୍ୟପ୍ରଦେଶ ହାଇକୋର୍ଟଙ୍କ ନିଷ୍ପତ୍ତିରେ ହସ୍ତକ୍ଷେପ କରିବେ ନାହିଁ ବୋଲି କହିଛନ୍ତି ସୁପ୍ରିମକୋର୍ଟ। ସିଜେଆଇ ଜଷ୍ଟିସ ବି.ଆର.ଗବାଇଙ୍କ ନେତୃତ୍ବରେ ଗଠିତ ଖଣ୍ଡପୀଠ କହିଛନ୍ତି- ସାମ୍ବିଧାନିକ ପଦବିରେ ଥିବା ଜଣେ ବ୍ୟକ୍ତି ଦାୟିତ୍ବସମ୍ପନ୍ନ ହେବା ଉଚିତ। ଏହି ବିବୃତି ଜଣେ ମନ୍ତ୍ରୀଙ୍କ କ୍ଷେତ୍ରରେ ଉପଯୁକ୍ତ ନୁହେଁ। ଆସନ୍ତା କାଲି ଏହି ମାମଲାର ଶୁଣାଣି ହେବ।
କର୍ଣ୍ଣେଲ ସୋଫିଆ କ୍ୟୁରେସିଙ୍କ ବିରୋଧରେ ଆଦିବାସୀ ବ୍ୟାପାର ମନ୍ତ୍ରୀ କୁନୱାର ବିଜୟ ଦେଇଥିଲେ ବୟାନ। ଅପରେସନ ସିନ୍ଦୂର ସମ୍ପର୍କରେ ପ୍ରେସ ବ୍ରିଫିଂ ସୋଫିଆ କରିଥିବାବେଳେ ତାଙ୍କୁ ଟାର୍ଗେଟ କରିଥିଲେ ମନ୍ତ୍ରୀ। ଏହି ପ୍ରସଙ୍ଗରେ ମଧ୍ୟପ୍ରଦେଶ ହାଇକୋର୍ଟ ନିଜ ଆଡୁ କରିଥିଲେ ମାମଲା ରୁଜୁ। କର୍ଣ୍ଣେଲ ସୋଫିଆ ଜଣେ ଆତଙ୍କୀଙ୍କ ଭଉଣୀ ବୋଲି କହିଥିଲେ ବିଜୟ। ରାମକୁଣ୍ଡ ଗ୍ରାମରେ ଆୟୋଜିତ ଏକ ସଭାରେ ବିଜୟ ଏହି ବିବାଦୀୟ ବୟାନ ଦେଇଥିଲେ। ବିଜୟଙ୍କ ଏହି ବୟାନକୁ ବିଭିନ୍ନ ଦଳ ପକ୍ଷରୁ ସମାଲୋଚନା କରାଯାଇଥିଲା। ସେ ଏହି ବୟାନ ନେଇ କ୍ଷମା ପ୍ରାର୍ଥନା କରିଥିଲେ।
ମହିଳା ଡ୍ୟାନ୍ସରଙ୍କ ସହ ନେତାଙ୍କ ଭିଡିଓ ହେଲା ଭାଇରାଲ
ନନ୍ଦିଘୋଷ ବ୍ୟୁରୋ : ସୋସିଆଲ ମିଡିଆରେ ଭାଇରାଲ ହେଉଥିବା ଏକ ଭିଡିଓକୁ ନେଇ ଉତ୍ତରପ୍ରଦେଶରେ ଚର୍ଚ୍ଚା ଜୋର ଧରିଛି । ଭିଡିଓରେ ଦେଖାଯାଉଥିବା ଜଣେ ବିଜେପି ନେତା ଅର୍କ୍ରେଷ୍ଠା ଗର୍ଲ ସହ ଅଶ୍ଳୀଳ କାର୍ଯ୍ୟ କରୁଥିବାର ନଜର ଆସିଛନ୍ତି । ଭାଇରଲ ଭିଡିଓକୁ ନେଇ ବିଜେପି ନେତା ଜଣଙ୍କ ତାଙ୍କୁ ବଦନାମ କରିବାକୁ ଷଡଯନ୍ତ୍ର କରାଯାଉଥିବା କହିଛନ୍ତି । ଏଥିପାଇଁ ସେ ନିଜ ଦଳର ନେତାଙ୍କୁ ଦାୟୀ କରିଛନ୍ତି । ବିରୋଧୀ ଦଳ ମଧ୍ୟ ଶାସକ ଦଳକୁ ଟାର୍ଗେଟ କରିଛନ୍ତି ।
ସମାଜବାଦୀ ପାର୍ଟି ନେତା ଏବଂ ଏସପି ରାଜ୍ୟ ଉପସଭାପତି ପଙ୍କଜ ରାଜଭରଙ୍କ ଦ୍ୱାରା ସୋସିଆଲ ମିଡିଆରେ ସେୟାର କରାଯାଇଥିବା ଏହି ଭିଡିଓରେ, ଉତ୍ତର ପ୍ରଦେଶର ବାଲିଆ ଜିଲ୍ଲାର ରାସରା ଆସନରୁ ପୂର୍ବତନ ବିଜେପି ବିଧାନସଭା ପ୍ରାର୍ଥୀ ବବର ସିଂହ ରଘୁବଂଶୀ ଜଣେ ମହିଳାଙ୍କ ସହ ଆପତ୍ତିଜନକ ଅବସ୍ଥାରେ ଦେଖାଯାଇଛନ୍ତି। ଭିଡିଓରୁ ଜଣାପଡୁଛି ଏହା ସାର୍ବଜନିନ କାର୍ଯ୍ୟକ୍ରମ ଥିଲା । ଏହି ସମୟରେ ଅନେକ ଲୋକ ଉପସ୍ଥିତ ଥିଲେ ।
ଭାଇରାଲ ଭିଡିଓରେ, ଜଣେ ମହିଳା ବବନ ସିଂହ ରଘୁବଂଶୀଙ୍କ କୋଳରେ ବସିଥିବାର ଦେଖାଯାଉଛି, ଯେଉଁ ସମୟରେ ସେ ତାଙ୍କୁ ସ୍ପର୍ଶ କରିବା ସହ ଚୁମ୍ବନ ମଧ୍ୟ ଦେଉଛନ୍ତି। ସେଠାରେ ଉପସ୍ଥିତ ଲୋକମାନେ ମଧ୍ୟ ସେମାନଙ୍କୁ ଦେଖୁଛନ୍ତି। ବବନ ସିଂହ ତାଙ୍କ ଅଞ୍ଚଳର ଜଣେ ଧନୀ ବ୍ୟକ୍ତି ଓ ସେ ରାସରା ଚିନି କଳର ଅଧ୍ୟକ୍ଷ ମଧ୍ୟ।
ଭିଡିଓକୁ ନେଇ ବିରୋଧୀ ନେତାମାନଙ୍କ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ପଙ୍କଜ ରାଜଭର ସୋସିଆଲ ମିଡିଆ ପ୍ଲାଟଫର୍ମରେ ଭିଡିଓ କ୍ଲିପ୍ ପୋଷ୍ଟ କରି ବିଜେପି ନେତାଙ୍କ ଉପରେ ଅଭିଯୋଗ ଆଣିଛନ୍ତି । ସେ କହିଛନ୍ତି, ଖୋଲାଖୋଲି ଭାବରେ ଜଣେ ମହିଳାଙ୍କୁ ସେ ତାଙ୍କ ଉପରେ ବସାଇ ନାଚାଉଛନ୍ତି। ବିଜେପି ନେତାଙ୍କ ଚରିତ୍ର ଦେଖନ୍ତୁ। ଯେଉଁମାନେ ଦିନରାତି ନୀତି ଓ ସଂସ୍କୃତି ଉପରେ ବକ୍ତୃତା ଦିଅନ୍ତି, ବାସ୍ତବରେ ଏହା ସେମାନଙ୍କର ପ୍ରକୃତ ଚେହେରା। ସମାଜ ଏପରି କପଟୀ ଓ ଦୁଇମୁଖୀ ଲୋକଙ୍କ ଠାରୁ ସତର୍କ ରହିବା ଉଚିତ।
କଂଗ୍ରେସ ନେତା ସୁରେନ୍ଦ୍ର ରାଜପୁତ ମଧ୍ୟ ଏହି ଘଟଣାକୁ ନିନ୍ଦା କରିଛନ୍ତି ଓ ଏହାକୁ ଅତ୍ୟନ୍ତ ଲଜ୍ଜାଜନକ ବୋଲି କହିଛନ୍ତି। ସେ ଏହି କାର୍ଯ୍ୟକୁ ମହିଳାଙ୍କ ସମ୍ମାନ ଉପରେ ବିଜେପିର ସାର୍ବଜନୀନ ଦୃଷ୍ଟିକୋଣଠାରୁ ଭିନ୍ନ ବୋଲି ବର୍ଣ୍ଣନା କରିଥିଲେ। କିନ୍ତୁ ପରେ ସେ ଏହି ପୋଷ୍ଟକୁ ଡିଲିଟ କରିଦେଇଥିଲେ।
ଅନ୍ୟପକ୍ଷରେ, ଭିଡିଓଟି ଭାଇରାଲ ହେବା ପରେ, ୧୯୯୩ ମସିହାର ୟୁପି ବିଧାନସଭା ନିର୍ବାଚନ ଲଢ଼ିଥିବା ଓ ବର୍ତ୍ତମାନ ରାସରା ଚିନି କଳର ଅଧ୍ୟକ୍ଷ ଥିବା ବବନ ସିଂହ ଗଣମାଧ୍ୟମକୁ କହିଛନ୍ତି, ଭାଇରାଲ ଭିଡିଓଟି ବିହାରର ଏକ ବିବାହ ଉତ୍ସବ ସମୟରେ ରେକର୍ଡ କରାଯାଇଥିଲା। ସେ ୨୦୨୨ ମସିହାରେ ମଧ୍ୟ ବିଧାନସଭା ନିର୍ବାଚନ ଲଢ଼ିଥିଲେ।
ସେ ଏହା ମଧ୍ୟ ଅଭିଯୋଗ କରିଛନ୍ତି ଯେ ସ୍ଥାନୀୟ ବିଧାୟକ କେତକି ସିଂହ ଓ ତାଙ୍କ ସ୍ୱାମୀ ତାଙ୍କୁ ବଦନାମ କରିବା ପାଇଁ ଭିଡିଓଟି ଭାଇରାଲ କରିଛନ୍ତି। ସେ ହିଁ ଏହି ଭିଡିଓଟି ତିଆରି କରିଛନ୍ତି। କେତକି ସିଂହ ବିଜେପିର ଜଣେ ବିଧାୟକ। ସେ ଏହା ମଧ୍ୟ କହିଛନ୍ତି ଯେ ଜିଲ୍ଲା ସଭାପତି ନିର୍ବାଚନକୁ ନେଇ ବିବାଦ ରହିଛି। ବବନ ସିଂହ ନିଜର ପକ୍ଷ ରଖି କହିଥିଲେ ଯେ ତାଙ୍କର ବୟସ ୭୦ ବର୍ଷ ଓ ସେ ଏପରି କାମ କରିବାକୁ ଅକ୍ଷମ। ସେ ଏହି ଭିଡିଓକୁ ନକଲି ବୋଲି କହିଛନ୍ତି। ସେ କହିଛନ୍ତି ଯେ ଏପରି ଭିଡିଓ କିଏ ତିଆରି କରିଛି ସେ ଜାଣିନାହାଁନ୍ତି।