ନନ୍ଦିଘୋଷବ୍ୟୁର: ଗଞ୍ଜାମ ବନ୍ୟାକୁ ନେଇ ସରକାରଙ୍କ ଜଳ ପରିଚାଳନା ବ୍ୟବସ୍ଥା ଉପରେ ବଡ଼ ପ୍ରଶ୍ନ ଉଠାଇଛନ୍ତି ପୂର୍ବତନ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର। ତାଙ୍କ ମତରେ, ଅକ୍ଟୋବର ୨୮ ଓ ୨୯ ତାରିଖରେ ଗଞ୍ଜାମ ଜିଲ୍ଲାରେ ଆସିଥିବା ପ୍ରଳୟଙ୍କରୀ ବନ୍ୟା ମନୁଷ୍ୟକୃତ ଥିଲା। ଠିକ୍ ଭାବେ ଜଳ ପରିଚାଳନା କରାଯାଇଥିଲେ ଏତେ ବଡ଼ ବନ୍ୟାକୁ ଏଡ଼ାଇ ଦିଆଯାଇପାରିଥାନ୍ତା ବୋଲି ସେ କହିଛନ୍ତି।
ତେବେ ନିଜର ୪୦ ବର୍ଷର ପ୍ରଶାସନିକ କାର୍ଯ୍ୟକାଳ ମଧ୍ୟରେ ସେ ଏଭଳି ବିପର୍ଯ୍ୟୟ ଦେଖିନଥିବା କହିଛନ୍ତି। ତାଙ୍କ କହିବା ଅନୁଯାୟୀ, ପାଣିପାଗ ବିଭାଗ ଅକ୍ଟୋବର ୨୩ ତାରିଖରୁ ରେଡ୍ ଆଲର୍ଟ ଜାରି କରିଥିଲା। ଏହାସହ ୨୮ ଓ ୨୯ ତାରିଖରେ ପ୍ରବଳ ବର୍ଷା ହେବା ନେଇ ଆଗୁଆ ସତର୍କ କରାଯାଇଥିଲା। ତେଣୁ ଜଳଭଣ୍ଡାରଗୁଡ଼ିକରେ ଜଳସ୍ତର ବଢ଼ିବା ଏବଂ ବନ୍ୟା ସ୍ଥିତି ସୃଷ୍ଟି ହେବାର ଆଶଙ୍କା ପୂର୍ବରୁ ରହିଥିଲା।
କିନ୍ତୁ ଜଳସମ୍ପଦ ବିଭାଗ ପକ୍ଷରୁ ଠିକ୍ ଭାବେ ଜଳ ପରିଚାଳନା କରାଯାଇନଥିବା ସେ ଅଭିଯୋଗ କରିଛନ୍ତି। ଗଞ୍ଜାମ ଜିଲ୍ଲାର ଘୋଡ଼ାହାଡ଼, ଭଞ୍ଜନଗର, ସୋରଡ଼ା, ଧନେଇ ଓ ଡହ ଡ୍ୟାମ୍ରୁ ବର୍ଷା ପୂର୍ବରୁ ପର୍ଯ୍ୟାପ୍ତ ପରିମାଣର ପାଣି ଖାଲି କରାଯାଇନଥିଲା। ପାଣିପାଗ ବିଭାଗର ସତର୍କ ସୂଚନା ସତ୍ତ୍ୱେ ଜଳସମ୍ପଦ ବିଭାଗର ଅଧିକାରୀମାନେ ଆବଶ୍ୟକ ପଦକ୍ଷେପ ନେଇନଥିଲେ। ଏପରିକି କୌଣସି ଡ୍ୟାମ୍ର ଜଳସ୍ତର ୫୦ ପ୍ରତିଶତ ତଳକୁ ଖସାଯାଇନଥିବା ସେ ଦର୍ଶାଇଛନ୍ତି। ଯାହା ଫଳରେ ପ୍ରବଳ ବର୍ଷା ହେବା ପରେ ଡ୍ୟାମ୍ଗୁଡ଼ିକର ଜଳସ୍ତର ହଠାତ୍ ବଢ଼ିଯାଇଥିଲା। ପରିସ୍ଥିତି ସମ୍ଭାଳିବାକୁ ଯାଇ କର୍ତ୍ତୃପକ୍ଷ ଏକାସାଙ୍ଗରେ ବିପୁଳ ପରିମାଣର ଜଳ ନିଷ୍କାସନ କରିଥିଲେ। ଏହା ଫଳରେ ତଳିଆ ଅଞ୍ଚଳରେ କୃତ୍ରିମ ବନ୍ୟା ସ୍ଥିତି ସୃଷ୍ଟି ହୋଇଥିଲା ବୋଲି ସୁରେଶ ମହାପାତ୍ର ମତ ରଖିଛନ୍ତି।
ଏହାସହ ଡ୍ୟାମ୍ରୁ ପାଣି ଛାଡ଼ିବା ପୂର୍ବରୁ ତଳିଆ ଅଞ୍ଚଳର ଲୋକଙ୍କୁ ଆଗୁଆ ସୂଚନା ଦିଆଯାଇନଥିବା ଏବଂ ସେମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇନଥିବା ଅଭିଯୋଗ ହୋଇଛି। ଗ୍ରାଉଣ୍ଡ ଜିରୋରେ ମଧ୍ୟ ସମାନ ଅଭିଯୋଗ ଶୁଣିବାକୁ ମିଳିଥିଲା। ଆସିକାରୁ ଶେରଗଡ଼, ହିଞ୍ଜିଳିରୁ ଦିଗପହଣ୍ଡି ପର୍ଯ୍ୟନ୍ତ ବିଭିନ୍ନ ଅଞ୍ଚଳର ଲୋକେ ଏହି ବନ୍ୟାକୁ ମନୁଷ୍ୟକୃତ ବୋଲି ଅଭିଯୋଗ କରିଥିଲେ। ନନ୍ଦିଘୋଷ ଟିଭି ଗ୍ରାଉଣ୍ଡ ଜିରୋରେ ପହଞ୍ଚି ଲୋକଙ୍କ ପ୍ରତିକ୍ରିୟା ସାମ୍ନାକୁ ଆଣିଥିଲା।
ଯଦିଓ ସରକାରଙ୍କ ପକ୍ଷରୁ ଏହି ଅଭିଯୋଗକୁ ଖଣ୍ଡନ କରାଯାଉଥିଲା, ଏବେ ପୂର୍ବତନ ମୁଖ୍ୟ ଶାସନ ସଚିବ ତଥା ପୂର୍ବତନ ଜଳସମ୍ପଦ ସଚିବ ସୁରେଶ ଚନ୍ଦ୍ର ମହାପାତ୍ର ସରକାରୀ ତଥ୍ୟ ଆଧାରରେ ନିଜର ମତ ରଖିବା ପରେ ଏହି ପ୍ରସଙ୍ଗ ପୁଣି ଚର୍ଚ୍ଚାକୁ ଆସିଛି। ନନ୍ଦିଘୋଷ ଟିଭି ଗ୍ରାଉଣ୍ଡ ଜିରୋରେ ଯାହା ଅଭିଯୋଗ ଓ ଆକଳନ କରିଥିଲା, ତାହା ସୁରେଶ ମହାପାତ୍ରଙ୍କ ଉପସ୍ଥାପନା ସହ ମେଳ ଖାଉଥିବା ଚର୍ଚ୍ଚା ହେଉଛି।
