ନନ୍ଦିଘୋଷ ବ୍ୟୁରୋ: ପଦାରେ ପଡିଲା ଡବଲ ଇଞ୍ଜିନ ସରକାରଙ୍କ ବିଫଳତା ! ସାମ୍ନାକୁ ଆସିଲା ସତ ! ଗଞ୍ଜାମ ବନ୍ୟା ପାଇଁ ପରିଚାଳନା ଦାୟୀ । ସରକାରଙ୍କ ତ୍ରୁଟି ଧରିଲେ ପୂର୍ବତନ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର । ପ୍ରଶାସନିକ କାର୍ଯ୍ୟକାଳର ୪୦ ବର୍ଷ ଭିତରେ ଏଭଳି ବିତ୍ପାତ ଦେଖିନଥିଲେ ବୋଲି କହିଛନ୍ତି । ସେ ଆହୁରି କହିଛନ୍ତି, ଗଞ୍ଜାମ ଜିଲ୍ଲାରେ ଅକ୍ଟୋବର ୨୮-୨୯ରେ ଆସିଥିବା ପ୍ରଳୟଙ୍କରୀ ବନ୍ୟା ମନୁଷ୍ୟକୃତ ଥିଲା। ମେକାନିଜମ ଠିକ ଢଙ୍ଗରେ କାମ କରିଥିଲେ ଏତେ ବଡ଼ ବନ୍ୟାକୁ ଏଡାଯାଇପାରିଥାନ୍ତା।
ପାଣିପାଗ ବିଭାଗ ୨୩ ତାରିଖରୁ ରେଡ ଆଲର୍ଟ ସତର୍କ ସୂଚନା ଦେଇଥିଲେ। କହିଥିଲେ ୨୮-୨୯ରେ ପ୍ରବଳ ବର୍ଷା ହେବ। ଏହାର ପ୍ରଭାବରେ ଜଳ ଭଣ୍ଡାର ପୂରଣ ହେବା ଓ ବନ୍ୟା ସ୍ଥିତି ସୃଷ୍ଟି ହେବା ସ୍ବାଭାବିକ ଥିଲା। ହେଲେ ଜଳ ପରିଚାଳନା ଠିକ ଢଙ୍ଗରେ ହୋଇପାରିଲା ନାହିଁ। ଗଂଜାମ ଜିଲ୍ଲାର ଥିବା ଘୋଡାହାଡ଼, ଭଞ୍ଜନଗର,ସୋରଡା, ଧନେଇ, ଡହ ଡ୍ୟାମରୁ ପର୍ଯ୍ୟାପ୍ତ ପରିମାଣର ଜଳ ବର୍ଷା ଜଳ ଆସିବା ପୂର୍ବରୁ ଖାଲି କରାଗଲା ନାହିଁ। ଜଳସମ୍ପଦ ବିଭାଗର ଅଧିକାରୀ ମାନେ ପାଣିପାଗ ବିଭାଗର ସତର୍କ ସୂଚନା ପାଇବା ପରେ ବି କିଛି କଲେ ନାହିଁ। କୌଣସି ଡ୍ୟାମର ଜଳ ସ୍ତର ୫୦ ପ୍ରତିଶତ ତଳକୁ ଖସିଲା ନାହିଁ। ତେଣୁ ପ୍ରବଳ ବର୍ଷା ଆସିବା ଯୋଗୁଁ ଡ୍ୟାମର ଜଳସ୍ତର ଅଚାନକ ବଢିଚାଲିଲା ଏବଂ କର୍ତ୍ତୃପକ୍ଷ ତୁରନ୍ତ ଏକାବେଳେ ସବୁ ପାଣି ଛାଡିଦେଲେ। ଯାହା ଫଳରେ କୃତ୍ରିମ ବନ୍ୟା ସୃଷ୍ଟି ହେଲା। ଡ୍ୟାମ ପାଣି ଛାଡିବା ପୂର୍ବରୁ ଲୋକଙ୍କୁ ଆଗୁଆ ସୂଚନା ଦିଆଗଲା ନାହିଁ ଏବଂ ତଳିଆ ଅଞ୍ଚଳର ଲୋକଙ୍କୁ ନିରାପଦ ସ୍ଥାନ କୁ ସ୍ଥାନାନ୍ତର କରାଗଲା ନାହିଁ। ଏହା ଥିଲା ଗ୍ରାଉଣ୍ଡ ଜିରୋରେ ଲୋକଙ୍କ ଅଭିଯୋଗ। ଆସିକାରୁ ଶେରଗଡ଼, ହିଂଜିଲିରୁ ଦିଗପହଣ୍ଡି ସମସ୍ତଙ୍କ ଅଭିଯୋଗ ଏହା ଥିଲା ମନୁଷ୍ୟକୃତ ବନ୍ୟା। ଲୋକଙ୍କ ପାଖରେ ନନ୍ଦିଘୋଷ ଟିଭି ପହଂଚିବା ପରେ ଲୋକଙ୍କ ପ୍ରତିକ୍ରିୟା ଦେଖାଇଥିଲା। ଏହାକୁ ସରକାର ଖଣ୍ଡନ କରୁଥିବା ବେଳେ ଏବେ ପୂର୍ବତନ ମୁଖ୍ୟ ଶାସନ ସଚିବ ତଥା ପୂର୍ବତନ ଜଳସମ୍ପଦ ସଚିବ ସୁରେଶ ମହାପାତ୍ର ସରକାରୀ ତଥ୍ୟକୁ ନେଇ ରଖିଥିବା ଉପସ୍ଥାପନା ଏବେ ସବୁଠି ଚର୍ଚ୍ଚା। ନନ୍ଦିଘୋଷ ଟିଭି ଗ୍ରାଉଣ୍ଡ ଜିରୋରେ ଯାହା ଆକଳନ କରିଥିଲା ତାହା ହିଁ ବାସ୍ତବତା ବୋଲି ସୁରେଶ ମହାପାତ୍ରଙ୍କ ଉପସ୍ଥାପନା ପରେ ସ୍ପଷ୍ଟ ହୋଇଛି।.. ..
