ଭୁବନେଶ୍ବର : ଗନପଏଣ୍ଟରେ ଗଡ଼ସାହିରୁ ଲୁଟ । ବନ୍ଧୁକ ଦେଖାଇ ନୟାପଲ୍ଲୀରୁ ଝାମ୍ପିଲେ ସୁନା ଅଳଙ୍କାର । କ୍ରାଇମ ସ୍ପଟରେ ସିସିଟିଭି ଆଧାରରେ ଛାନଭିନ। ଲୁଟ ପରେ ପିଠି ଆଉଁସି ଚମ୍ପଟ ମାରିଲା ଚୋର ।…….ସମୟ ୫ ଟା ୩୦ । ସ୍ଥାନ ନୟାପଲ୍ଲୀ ଗଡ଼ସାହି ର ପ୍ଲଟ ନମ୍ବର ୧୨ ଶହ ୫୦ । ୬୨ ବର୍ଷୀୟା ଇନ୍ଦୁମତି ବଳବନ୍ତରାୟ ଫୁଲ ତୋଳିବା ବେଳେ ହଠାଥ ମୁଣ୍ଡରେ ଲାଗିଲା ବନ୍ଧୁକ । କିଛି ବୁଝିବା ପୂର୍ବରୁ ଲୁଟେରା ଦେଇଥିଲା ଜୀବନ ନେଇଯିବାର ଧମକ । ସୁନା କାନର, ଚୁଡ଼ି ତୁରନ୍ତ ନଦେଲେ ଫୁଟାଇ ଦେବ ବୋଲି କହିଥିଲା ଚୋର । ଆଉ ଭୟରେ ଥରହର ହୋଇ ସବୁ ଖୋଲି ଦେଇଥିଲେ ବରିଷ୍ଠ ନାଗରିକ ଜଣଙ୍କ। କିନ୍ତୁ ବଡ଼ କଥା ହେଉଛି ଚୋର ସର୍ବସ୍ବନ୍ତ କରିଦେବା ପରେ ମହିଳାଙ୍କ ପିଠି ଆଉଁସି ଚାଲିଯିବା ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ଏ ନେଇ ଖବର ପାଇବା ପରେ ପୋଲିସ କ୍ରାଇମ ସ୍ପଟରେ ସର୍ଜମିନ ଯାଞ୍ଚ କରିଛି। ଘର ଚାରିପଟେ ଥିବା ଗଳି କନ୍ଦି କୁ ଯାଇ ସ୍ଥାନୀୟ ଲୋକଙ୍କୁ ପଚରାଉଚରା କରିଛି। ସିସିଟିଭିକୁ ଛାନଭିନ କରିଛି । ଏପରିକି ସିସିଟିଭି ହାର୍ଡଡିସ୍କ ଜବତ କରି କିଛି ସନ୍ଦିଗ୍ଧଙ୍କୁ ସ୍କାନରକୁ ନେଇଛି ପୋଲିସ। ନୟାପଲ୍ଲୀ ଭଳି ଏକ ଭିଭିଆଇପି ଏରିଆରେ ଏଭଳି ଲୁଟକୁ କେହି ସହଜରେ ହଜମ କରିପାରିନାହାନ୍ତି। ସେପଟେ କିଛି ନିଶାଡୀ ସ୍ଥାନୀୟ ଅଞ୍ଚଳରେ ନୀତିଦିନ ନିଶା ଖାଇ ଏଭଳି କାଣ୍ଡ ଭିଆଉଥିବାରୁ ପାଟ୍ରୋଲିଂ କୁ ବ୍ୟାପକ କରିବାକୁ ଦାବି କରିଛନ୍ତି ପରିବାର ଲୋକେ । ଜନଗହଳିପୂର୍ଣ୍ଣ ଅଞ୍ଚଳ, ସିସିଟିଭି ସର୍ଭେଲାନ୍ସ। ତଥାପି ଲୁଟେରାଙ୍କ ଖାତିର ନାହିଁ। ସେପଟେ ଅପରାଧୀଙ୍କ ହଲ୍ଲାବୋଲ ଏବେ ପୋଲିସ ପାଇଁ ସୃଷ୍ଟି କରିଛି ବଡ଼ ଚ୍ୟଲେଞ୍ଜ ।
ବନ୍ଧୁକ ଦେଖାଇ ନୟାପଲ୍ଲୀରୁ ଝାମ୍ପିଲେ ସୁନା ଅଳଙ୍କାର
