ନନ୍ଦିଘୋଷବ୍ୟୁର: ଦୀପାବଳି ରାତିରେ ଚାରିଆଡ଼େ ଆଲୋକର ପର୍ବ ପାଳନ ଚାଲିଥିବା ବେଳେ ଗୁଳି ଶବ୍ଦରେ ଥରିଉଠିଲା ହାଜିପୁରର ରାଜପୁତ ନଗର କଲୋନୀ। ପାରିବାରିକ ବିବାଦକୁ କେନ୍ଦ୍ର କରି ଜଣେ ସ୍ୱାମୀ ନିଜ ସ୍ତ୍ରୀକୁ ଗୁଳି କରି ହତ୍ୟା କରିଥିବା ଅଭିଯୋଗ ହୋଇଛି। ହତ୍ୟା ପରେ ଅଭିଯୁକ୍ତ ସ୍ୱାମୀ ଘଟଣାସ୍ଥଳରୁ ଫେରାର ହୋଇଯାଇଛି। ସବୁଠୁ ଦୁଃଖଦ ଘଟଣା ହେଉଛି, ନିଜ ଆଖି ଆଗରେ ମାଆଙ୍କୁ ଗୁଳି ମାରିବା ଦେଖିଛି ନାବାଳିକା ଝିଅ। ତାଙ୍କ ବୟାନ ଶୁଣି ସମସ୍ତେ ସ୍ତବ୍ଧ ହୋଇଯାଇଛନ୍ତି।
ମୃତ ମହିଳାଙ୍କ ନାମ ନୀଳୁ ସିଂହ ହୋଇଥିବା ବେଳେ ଅଭିଯୁକ୍ତ ସ୍ୱାମୀଙ୍କ ନାମ ରାକେଶ ଚୌହାନ ବୋଲି ଜଣାପଡ଼ିଛି। ଶିଳ୍ପ ଥାନା ଅଞ୍ଚଳର ରାଜପୁତ ନଗର କଲୋନୀରେ ଏହି ଘଟଣା ଘଟିଛି। ମୃତକଙ୍କ ଝିଅ କୃତିକା ରାଜଙ୍କ କହିବା ଅନୁଯାୟୀ, ଘଟଣା ଦିନ ସନ୍ଧ୍ୟା ପ୍ରାୟ ୭ଟାରେ ତାଙ୍କ ବାପା ଘରକୁ ଆସିଥିଲେ। ଖାଇବା ପରେ ମାଆ ଓ ବାପାଙ୍କ ମଧ୍ୟରେ କୌଣସି କଥାକୁ ନେଇ ଝଗଡ଼ା ଆରମ୍ଭ ହୋଇଥିଲା।
କିଛି ସମୟ ପରେ ଅଭିଯୁକ୍ତ ରାକେଶ ଘରର ତଳ ମହଲାକୁ ଯାଇ ପୁଣି ଫେରିଥିଲେ। ଏହାପରେ ସେ ଝିଅକୁ ଘର ବାହାର ପାଖ ଏକ କୋଠରୀରେ ଶୋଇବାକୁ କହିଥିଲେ। ଝିଅ ସେଠାରେ ଶୋଇଥିବା ବେଳେ ଘର ଭିତରେ ପୁଣିଥରେ ମାଆ ଓ ବାପାଙ୍କ ମଧ୍ୟରେ ଝଗଡ଼ା ଆରମ୍ଭ ହୋଇଥିଲା। ହଠାତ୍ ଏକ ଗୁଳି ଶବ୍ଦ ଶୁଣିବାକୁ ମିଳିଥିଲା।
ଗୁଳି ଶବ୍ଦ ଶୁଣି କୃତିକା ବାହାରକୁ ଆସି ଦେଖିବା ବେଳକୁ ତାଙ୍କ ମାଆ ଗୁଳିମାଡ଼ର ଶିକାର ହୋଇ ତଳେ ପଡ଼ିଥିଲେ । ଏହାପରେ ତାଙ୍କ ବାପା ସେଠାରୁ ଦୌଡ଼ି ପଳାଇବାକୁ ଉଦ୍ୟମ କରିଥିଲେ। ଏପରିକି ଝିଅକୁ ମଧ୍ୟ ସାଙ୍ଗରେ ନେବାକୁ ଚେଷ୍ଟା କରିଥିଲେ। କିନ୍ତୁ କୃତିକା ନିଜ ହାତ ଛଡ଼ାଇ ନେଇ ତାଙ୍କ ସହ ଯାଇନଥିଲେ। ଝିଅ କହିଛନ୍ତି ଯେ, ବାପା ମାଆଙ୍କୁ ଗୁଳି କରି ଫେରାର ହୋଇଗଲେ। ମତେ ମଧ୍ୟ ନେଇ ଯାଉଥିଲେ, କିନ୍ତୁ ମୁଁ ହାତ ଛଡ଼ାଇ ଦେଲି ଏବଂ ତାଙ୍କ ସହ ଗଲି ନାହିଁ।
କୃତିକାଙ୍କ କହିବା ଅନୁଯାୟୀ, ତାଙ୍କ ବାପା ଓ ମାଆଙ୍କ ମଧ୍ୟରେ ଦୀର୍ଘଦିନ ଧରି ବିବାଦ ଲାଗି ରହିଥିଲା। ପ୍ରାଥମିକ ତଦନ୍ତରେ ପାରିବାରିକ କଳହକୁ ହତ୍ୟାର କାରଣ ବୋଲି ସନ୍ଦେହ କରାଯାଉଛି। ତେବେ ହତ୍ୟା ପଛର ପ୍ରକୃତ କାରଣ ପୁଲିସ ତଦନ୍ତ ପରେ ହିଁ ସ୍ପଷ୍ଟ ହେବ। ତେବେ ଘଟଣା ସମ୍ପର୍କରେ ଖବର ପାଇ ଶିଳ୍ପ ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ମାମଲାର ଗମ୍ଭୀରତାକୁ ଦେଖି ଏସଡିପିଓ ସୁବୋଧ କୁମାରଙ୍କ ନେତୃତ୍ୱରେ ଏକ ସ୍ୱତନ୍ତ୍ର ପୁଲିସ ଟିମ୍ ଗଠନ କରାଯାଇଛି। ଅଭିଯୁକ୍ତ ରାକେଶ ଚୌହାନଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ଉ ଜାରି ରହିଛି।
ଦୀପାବଳିର ଖୁସି ଓ ଆଲୋକ ମଧ୍ୟରେ ଘଟିଥିବା ଏହି ହୃଦୟବିଦାରକ ଘଟଣା ଏକ ପରିବାରକୁ ଛାରଖାର କରିଦେଇଛି। ଅନ୍ୟପଟେ ଅଭିଯୁକ୍ତଙ୍କ ଗିରଫଦାରୀ ଏବଂ ଘଟଣାର ପ୍ରକୃତ କାରଣ ଜାଣିବା ପାଇଁ ପୁଲିସର ତଦନ୍ତ ଜାରି ରହିଛି।
