ଭୁବନେଶ୍ବର : ତାରିଖ ପରେ ତାରିଖ ବଦଳୁଛି। ଦୂର ହୋଇପାରୁନି ରାଜ୍ୟ ସଭାପତି ଦ୍ବନ୍ଦ।ସରକାରକୁ ୮ ମାସ ପୁରିଲାଣି। ହୋଇପାରୁନି ନିଗମ ନିଯୁକ୍ତି। ଖାଲି ଥିବା ଅଧ ଡ଼ଜନେ ମନ୍ତ୍ରୀ ପଦ ପୂରଣ କରିପାରୁନାହାନ୍ତି ମୁଖ୍ୟମନ୍ତ୍ରୀ। ସବୁ କଥାରେ କେନ୍ଦ୍ରୀୟ ନେତୃତ୍ବଙ୍କ ଇଙ୍ଗିତକୁ ଅପେକ୍ଷା। ରାଜ୍ୟ ବିଜେପିରେ ଥିବା ଗୋଷ୍ଠୀ ବିବାଦ ମୁଖ୍ୟମନ୍ତ୍ରୀଙ୍କୁ ଯେତିକି ଅଡୁଆରେ ପକାଇନି, ତାଠାରୁ ଅଧିକ ଯନ୍ତ୍ରଣା ଦେଉଛି କେନ୍ଦ୍ର ବିଜେପିର ଗ୍ରୀନ ସିଗ୍ନାଲକୁ ଅପେକ୍ଷା।ମାଳ ମାଳ ନିଗମ ଲଡୁ ଖାଇଥିବା ଆଶାୟୀଙ୍କ ସଂଖ୍ୟା ବଢିଚାଲିଛି।ବିଭିନ୍ନ ଏକାଡ଼େମୀ ମୁଖିଆ ପଦ ବି ଖାଲି ପଡ଼ିଛି। ଜଣେ ଜଣେ ମନ୍ତ୍ରୀ ଏକାଧିକ ବିଭାଗ ମୁଣ୍ଡାଇ ଭାରାକ୍ରାନ୍ତ ହେଲେଣି। ପ୍ରଶାସନ ଚଳଚଞ୍ଚଳ ହେବା ବଦଳରେ ସ୍ଥାଣୁ ପାଲଟିଛି। ବଜେଟ ଅଧିବେଶନରେ ବିରୋଧି ଦଳ ନେତା ନବୀନ ପଟ୍ଟନାୟକ ଦେଇଥିବା ବିବୃତି ବସ୍ତାନୀ ଭାରି ପାଠ ଶୂନ ବାସ୍ତବରେ ପ୍ରତିପାଦିତ ହେଉଛି ବୋଲି ବିଶେଷଜ୍ଞ କହିଛନ୍ତି ।

ସରକାର ଯେପରି ସ୍ଥାଣୁ, ବିଜେପି ସଙ୍ଗଠନ ବି ତାଠାରୁ ତଦ୍ରୁପ। ରାଜ୍ୟ ସଭାପତି ଚୟନରେ ଅହେତୁକ ବିଳମ୍ବ ଦଳ ଭିତରେ ଥିବା ଅସନ୍ତୋଷକୁ ପଦାରେ ପକାଇଛି। ଜାନୁଆରୀ ୧୫ ସୁଦ୍ଧା ରାଜ୍ୟ ସଭାପତି ନିର୍ବାଚନ ସାରିବାକୁ ଟାର୍ଗେଟ ରଖାଯାଇଥିବା ବେଳେ ଫେବୃଆରୀ ସରିବାକୁ ବସିଲାଣି, କିଛି ଚୁଡ଼ାନ୍ତ ହୋଇପାରୁନାହିଁ। ନିଗମ ଅଧ୍ୟକ୍ଷ ପାଇଁ ବି ଅଙ୍କକଷା ଚାଲିଛି। ଖୋଜା ଚାଲିଛି ଉପଯୁକ୍ତ ନେତା। ସାଙ୍ଗଠନିକ ଦକ୍ଷତା, ଅନୁଭବ, ଅଭିଜ୍ଞତାକୁ ଆଧାର କରି ନିଗମ ପଦ ଦିଆଯିବ ବୋଲି ଆଶା ବାନ୍ଧିଛନ୍ତି ଆଶାୟୀ। ସେହିପରି ଖାଲି ଥିବା ମନ୍ତ୍ରୀ ପଦ ପାଇଁ ବରିଷ୍ଠ ବିଧାୟକ ମାନେ ଆଶା ରଖିଛନ୍ତି। ହେଲେ କେନ୍ଦ୍ରରୁ କୌଣସି ସିଗ୍ନାଲ ମିଳୁନଥିବାରୁ ନିଷ୍ପତ୍ତି ହୋଇପାରୁନି। ବାହାରକୁ ନେତା ଓ ବିଧାୟକ ସବୁ କିଛି ଠିକ୍ ଚାଲିଛି ବୋଲି କହୁଥିଲେ ମଧ୍ୟ, ବାସ୍ତବ ଚିତ୍ର ଭିନ୍ନ କିଛି ବୟାନ କରୁଛି। ସଙ୍ଗଠନରେ ଦ୍ବନ୍ଦ, ସରକାରରେ ଅସନ୍ତୋଷ। ସବୁ କଥାରେ କେନ୍ଦ୍ରର ଇଙ୍ଗିତକୁ ଅପେକ୍ଷା। ହଠାତ ବିଜେପି ସରକାରକୁ ଆସିବା, ଅସ୍ବାଭାବିକ ଭାବେ ମୁଖ୍ୟମନ୍ତ୍ରୀ ବଛାଯିବା ଯୋଗୁଁ ସରକାର ଏଯାଏଁ ଗତିଶୀଳ ହୋଇପାରିନାହିଁ। ରାଜ୍ୟ ବିଜେପିରେ ଗୋଷ୍ଠୀ କନ୍ଦଳ ସାଙ୍ଗକୁ ନିଜ ଇଚ୍ଛାରେ ମୁଖ୍ୟମନ୍ତ୍ରୀ କାମ କରିପାରୁନଥିବା ଯୋଗୁଁ ସବୁ କିଛି ଅଯଥାରେ ବିଳମ୍ବିତ ହୋଇ ଚାଲୁଛି।

ଭୁବନେଶ୍ବର ; ସରକାରଙ୍କ ଉପରୁ ତୁଟିଲା ଭରସା । ଏବେ ନିଜେ କରିବେ ନିଜ ସମସ୍ୟାର ସମାଧାନ । ଦରଦାମ ବୃଦ୍ଧି ନିୟନ୍ତ୍ରଣ ପାଇଁ ନିଆଯିବ ବଡ଼ ପଦକ୍ଷେପ । ଚାଷୀଙ୍କ ହୀତ ପାଇଁ କରାଯିବ ଆଲୋଚନା । ଏନେଇ ଅଣ୍ଟା ଭିଡ଼ିଛି ବ୍ୟବ୍ୟବସାୟୀ ମହାସଂଘ । ଏପ୍ରିଲ ପ୍ରଥମ ସପ୍ତାହରେ ଭୁବନେଶ୍ୱରରେ କରିବ ବିଶାଳ ବ୍ୟବସାୟୀ ସମାବେଶ । ରାଜ୍ୟ ବ୍ୟବସାୟୀ ମହାସଂଘର ରୌପ୍ୟ ଜୟନ୍ତୀ ପାଳନ ଅବସରରେ କରାଯିବ ଏହି ସମାବେଶ। ଏଥିରେ ସାରା ରାଜ୍ୟର ବହୁ ବ୍ୟବସାୟୀଙ୍କ ସମେତ ଚାଷୀ, ଚାଷୀ ନେତା, ସାଧାରଣ ଲୋକେ ସାମିଲ ହେବେ । ଚାଷୀଙ୍କ ଉତ୍ପାଦିତ ଶସ୍ୟ ଲୋକଙ୍କ ପାଖରେ କିଭଳି ସିଧାସଳଖ ପହଂଚିବ ଓ ଚାଷୀଙ୍କୁ ଉଚିତ ମୂଲ୍ୟ ଦେବା ପାଇଁ ଉଦ୍ୟମ ଆଲୋଚନା କରାଯିବ । ଦରଦାମ ନିୟନ୍ତ୍ରଣକୁ ଆଣିବା ମଧ୍ୟ ଉଦେଶ୍ୟ ରହିଛି । ବଲାଙ୍ଗୀର, ଭବାନୀପାଟଣା, କେସିଙ୍ଗା, ବରଗଡ଼, ବରପାଲି ଓ ଢେଙ୍କାନାଳର ବ୍ୟବସାୟୀ ସଂଘର ସବୁ ବର୍ଗଙ୍କୁ ନେଇ ଆଲୋଚନା ହୋଇଛି । ଚାଷ ସାମଗ୍ରୀର ଅଭାବୀ ବିକ୍ରି କିଭଳି ନରହିବ ଓ ସାମଗ୍ରୀ ସଂରକ୍ଷଣ କରାଯିବ, ବାରମାସୀ ଚାଷ କିଭଳି ଅଧିକ ବଢ଼ିପାରିବ, ରାଜ୍ୟର ଉତ୍ପାଦିତ ସାମଗ୍ରୀ କିଭଳି ଗ୍ରାହକଙ୍କ ପାଖରେ ସୁଲଭ ମୂଲ୍ୟରେ ପହଂଚିବ ସେ ନେଇ ଉଦ୍ୟମ କରାଯିବ । ଏଥିରେ ସରକାରଙ୍କ ସହଯୋଗ ଅବଶ୍ୟକ । ହେଲେ ସରକାର ସହଯୋଗ ପାଇଁ ଆଗଭର ହେଉ ନାହାନ୍ତି। ତେଣୁ ବ୍ୟବସାୟୀ ସଂଘ ଏହି ଦାୟିତ୍ୱ ନିଜେ ନେବ ବୋଲି କହିଛି ।

ବ୍ୟବସାୟୀ ମହାସଂଘର ଏଭଳି ପ୍ରୟାସକୁ ବିଭିନ୍ନ ଚାଷୀ ସଂଗଠନ ସ୍ୱାଗତ କରିଛନ୍ତି। ୯ ମାସ ହେଲା ଶାସନକୁ ଆସିଥିଲେ ମଧ୍ୟ ଏ ଯାଏ ବିଜେପି ସରକାର କେବଳ କଥାରେ ଚାଲିଛି। ଗଣତନ୍ତ୍ରରେ ଗୋଟିଏ ସରକାର ପାଞ୍ଚ ବର୍ଷ ପାଇଁ ପଚାଶ ବର୍ଷ ପାଇଁ ନୁହେଁ । ତେଣୁ କେବେ ଆଉ କାମ ହେବ ବୋଲି ପ୍ରଶ୍ନ କରିଛି କୃଷକ ମଜଦୂର ମହାସଂଘ। ଏହାର ପ୍ରତିବାଦରେ ଆସନ୍ତା ନଭେମ୍ବର ମାସରେ ରାଜ୍ୟବ୍ୟାପି ପଦଯାତ୍ରା କରାଯିବ ବୋଲି କୁହାଯାଇଛି। ସେପଟେ ସିଟିଜେନ୍ସ ଫୋରମ ମଧ୍ୟ ସରକାରଙ୍କ ପାରିବାପଣିଆ ଉପରେ ପ୍ରଶ୍ନ ଉଠାଇଛି। ଲୋକେ ଏବେ ଏକାଠି ହୋଇ ନିଜ ଦାୟିତ୍ବ ନିଜେ ନେବେ ଓ ସରକାରଙ୍କୁ ଜବାବ ଦେବେ ବୋଲି କୁହାଯାଇଛି। ନା ପ୍ରତିଶ୍ରୁତି ପାଳନ ହେଉଛି ନା କୌଣସି ବର୍ଗଙ୍କ ହିତ ପାଇଁ ପଦକ୍ଷେପ ନିଆଯାଉଛି । ଯେଉଁଥିପାଇଁ ରାଜ୍ୟର ବିଭିନ୍ନ ବର୍ଗ ମଧ୍ୟରେ କୁହୁଳୁଥିବା ଅସନ୍ତୋଷ ଏବେ ଉଗ୍ର ରୂପ ନେବାକୁ ଯାଉଛି ।