ଭୁବନେଶ୍ବର : ଶୀତ ଲହରୀରେ ଥରହର ଓଡ଼ିଶା। ଶୁଖିଲା ପାଗ ଯୋଗୁ କମୁଛି ପାରଦ। ଭୋରରୁ ଘରୁ ବାହାରିବା ମୁସକିଲ ହୋଇପଡୁଛି । ସାରା ରାଜ୍ୟରେ ଥଣ୍ଡା ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡୁଛି । ଫୁଲବାଣୀରେ ସବୁଠୁ କମ ତାପମାତ୍ରା ୬ ଡିଗ୍ରୀ ରେକର୍ଡ କରାଯାଇଛି । ଆହୁରି ଶୁଖିଲା ପାଗ ରହିବ । ଫଳରେ ଶୀତ ଲାଗି ରହିବ ବୋଲି କହିଛି ପାଣିପାଗ କେନ୍ଦ୍ର । ଅନ୍ୟପଟେ ସର୍ବନିମ୍ନ ତାପମାତ୍ରା ସାମନ୍ୟ ବୃଦ୍ଧି ଘଟିବ ବୋଲି ସୂଚନା ଦିଆଯାଇଛି । ଗତ ୨୪ ଘଣ୍ଟାରେ ରାଉରକେଲାରେ ସାମାନ୍ୟ କୁହୁଡିର ପ୍ରଭାବ ଦେଖିବାକୁ ମିଳିଥିଲା । ଏଠାରେ ୩ ଶହ ମିଟର ରହିଥିଲା ଦୃଶ୍ୟମାନ କ୍ଷମତା।
ମହମ୍ମଦ ମୋକିମ୍ କଂଗ୍ରେସରୁ ବହିଷ୍କୃତ
ଭୁବନେଶ୍ବର : ବର୍ତ୍ତମାନର ବଡ଼ ଖବର। ମହମ୍ମଦ ମୋକିମ୍ କଂଗ୍ରେସରୁ ବହିଷ୍କୃତ। ଦଳ ବିରୋଧୀ କାମ ଅଭିଯୋଗରେ ତାଙ୍କ ବିରୋଧରେ ନିଆଯାଇଛି କଡ଼ା କାର୍ଯ୍ୟାନୁଷ୍ଠାନ। ତାଙ୍କୁ ପ୍ରାଥମିକ ସଦସ୍ୟ ପଦରୁ ବହିଷ୍କାର କରାଯାଇଛି। ଦଳୀୟ ନେତୃତ୍ଵକୁ ଖୋଲାଖୋଲି ଚ୍ୟାଲେଞ୍ଜ କରିଥିଲେ ମୋକିମ। କିଛି ଦିନ ତଳେ ୫ ପୃଷ୍ଠାର ବିରାଟ ଚିଠି ଲେଖିଥିଲେ କଂଗ୍ରେସ ସାଂସଦ ସୋନିଆ ଗାନ୍ଧିଙ୍କୁ। ଏଥିରେ ସେ ପିସିସି ସଭାପତି ଭକ୍ତ ଦାସଙ୍କ ବିରୋଧରେ ଖୋଲାଖୋଲି ବିଷୋଦଗାର କରିଥିଲେ। ନୂଆପଡ଼ା ପରାଜୟକୁ ନେଇ କହିଥିଲେ ଭକ୍ତ ଦାସଙ୍କ ନିଜ ଅଞ୍ଚଳରେ ବି ଦଳ ୮୦ ହଜାର ଭୋଟରେ ହାରିଛି। ଏଥିପାଇଁ କର୍ମୀ ହତାଶ ହୋଇ ପଡ଼ିଥିବା କହିଥିଲେ। କେବଳ ସେତିକି ନୁହେଁ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧି ଓ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କ ବିରୋଧରେ ବି ମତ ଦେଇଥିଲେ। ଏହାକୁ ନେଇ ଦଳରେ ସୃଷ୍ଟି ହୋଇଥିଲା କମ୍ପନ। ଅନୁମାନ କରାଯାଉଥିଲା ମୋକିମଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ହୋଇପାରେ। ଏପରି ସଂକେତ ବି ଆସିଥିଲା। ଶେଷରେ ତାଙ୍କୁ ଦଳରୁ ବହିଷ୍କାର କରାଯାଇଛି।
ଭୁବନେଶ୍ବରସ୍ଥିତ ଡିଜି କ୍ୟାମ୍ପ ଅଫିସ ଘେରାଉକଲା ବିଜେଡି
ନନ୍ଦିଘୋଷ ବ୍ୟୁରୋ: ଭୁବନେଶ୍ବର ସ୍ଥିତ ଡିଜି କ୍ୟାମ୍ପ ଅଫିସ ଘେରାଉକଲା ବିଜେଡି । ପ୍ରଣବ ବଳବନ୍ତରାୟଙ୍କ ଧର୍ମଶାଳା ଫାର୍ମହାଉସରେ ଦୁର୍ବୃତ୍ତଙ୍କ ଲଙ୍କାକାଣ୍ଡ ଘଟଣାରେ ପ୍ରତିବାଦ । ଆକ୍ରମଣକାରୀ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରି ଭୁବନେଶ୍ବର ସ୍ଥିତ ଡିଜି କ୍ୟାମ୍ପ ଅଫିସ ଘେରାଉକରିଛି ବିଜେଡି । ଆଜି ଧର୍ମଶାଳାର ପୂର୍ବତନ ବିଧାୟକ ତଥା ବିଜେଡିର ବରିଷ୍ଠ ସାଧାରଣ ସମ୍ପାଦକ ପ୍ରଣବ ବଳବନ୍ତରାୟଙ୍କ ଧର୍ମଶାଳା ସ୍ଥିତ ଫାର୍ମହାଉସରେ କିଛି ଦୁର୍ବୃତ୍ତ ପଶି ଲଙ୍କାକାଣ୍ଡ ଭିଆଇଥିଲେ । ଜେନାପୁର ଥାନା ଅଧୀନ ପନ୍ତୁରି ଠାରେ ଥିବା ଫାର୍ମହାଉସରେ ପ୍ରଣବଙ୍କ କିଛି ସମର୍ଥକ ଆଜି ରବିବାର ଥିବାରୁ ଭୋଜି ଆୟୋଜନ କରିଥିଲେ। ସେହି ସମୟରେ କିଛି ଦୁର୍ବୃତ୍ତ ସଂଘବଦ୍ଧ ଭାବେ ସେମାନଙ୍କ ଉପରେ ଆକ୍ରମଣ କରିବା ସହ ଫାର୍ମହାଉସରେ ବ୍ଯାପକ ଭଙ୍ଗାରୁଜା କରିଛନ୍ତି । ପ୍ରଣବଙ୍କ ଆହତ ସମର୍ଥକମାନଙ୍କୁ ଚିକିତ୍ସାପାଇଁ ହସପିଟାଲରେ ଭର୍ତ୍ତି କରାଯାଇଛି।ଏଇ ଖବର ଜାଣିବା ପରେ ନିଜେ ପ୍ରଣବ ବଳବନ୍ତରାୟ ଘଟଣାସ୍ଥଳରେ ପହଞ୍ଚି ସମର୍ଥକମାନଙ୍କୁ ଚିକିତ୍ସାପାଇଁ ପଠାଇଥିଲେ। ଘଟଣାସ୍ଥଳରେ ଉତ୍ତେଜନା ଲାଗିରହିଛି । ଜେନାପୁର ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।
ସିଡନୀ ବଣ୍ଡି ବିଚ୍ ପାର୍କରେ ଗୁଳିମାଡ ମାନବିକତା ଉପରେ ଆକ୍ରମଣ, ଅଷ୍ଟ୍ରେଲିଆ ସହ ଭାରତ ଛିଡ଼ା ହୋଇଛି: ମୋଦି
ସିଡନୀ ବଣ୍ଡି ବିଚ୍ ପାର୍କରେ ଗୁଳିମାଡ ମାନବିକତା ଉପରେ ଆକ୍ରମଣ, ଅଷ୍ଟ୍ରେଲିଆ ସହ ଭାରତ ଛିଡ଼ା ହୋଇଛି: ମୋଦି
ନନ୍ଦିଘୋଷ ବ୍ୟୁରୋ: ସିଡନୀର ବଣ୍ଡି ବିଚ୍ ପାର୍କରେ ହୋଇଥିବା ଗୁଳିମାଡ ଘଟଣାରେ ମୃତକଙ୍କ ସଂଖ୍ୟା ବଢ଼ି ୧୨ରେ ପହଞ୍ଚିଛି । ଘଟଣାରେ ବହୁତ ଲୋକ ଆହତ ହୋଇଛନ୍ତି । ସେମାନଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣା ସାରା ବିଶ୍ବରେ ନିନ୍ଦା କରାଯାଇଛି । ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘଟଣାକୁ କଡ଼ଶ ଭାଷାରେ ନିନ୍ଦା କରିଛନ୍ତି । ପ୍ରଧାନମନ୍ତ୍ରୀ ଘଟଣାକୁ ନେଇ ଦୁଃଖ ପ୍ରକାଶ କରିବା ସହ ମୃତାହତଙ୍କ ପରିବାର ବର୍ଗଙ୍କୁ ଭାରତର ଜନତାଙ୍କ ତରଫରୁ ସମବେଦନା ଜଣାଇଛନ୍ତି । ଏମିତି ସମୟରେ ଭାରତ ଅଷ୍ଟ୍ରେଲିଆ ସହ ପୂରା ଦୃଢ଼ତାର ସହ ଛିଡ଼ା ହୋଇଛି ।
ଆଷ୍ଟ୍ରେଲିଆ ପ୍ରଧାନମନ୍ତ୍ରୀ ଘଟଣାକୁ ନେଇ ଦୁଃଖ ପ୍ରକାଶ କରିବା ସହ ଦେଶ ଭିତରେ ଏମିତି ଘଟଣା ଆଶ୍ଚର୍ଯ୍ୟ କରିବା ସହ ବହୁତ ପୀଡ଼ାଦାୟକ । ସେହିପରି ବ୍ରିଟେନର ପୂର୍ବତନ ପ୍ରଧାନମନ୍ତ୍ରୀ ଋଷି ସୁନକ ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି । ଏମିତି ଘଟଣା ବହୁତ ଭୟାନକ ଓ ଚିନ୍ତାରେ ପକାଇବା ଭଳି ସେ କହିଛନ୍ତି ।
ଭାଇରାଲ ହେଉଛି ସାଧାରଣ ନାଗରିକଙ୍କ ବାହାଦୁରୀ
ବଣ୍ଡି ବିଚ୍ ପାର୍କ ଗୁଳିମାଡ଼ ଘଟଣା ଏକ ଭୁଡିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଏଥିରେ ଜଣେ ସାଧାରଣ ନାଗରିକ ଆତତାତୀ ସହ ଲଢୁଥିବା ଦେଖିବାକୁ ମିଳୁଛି । ଭିଡିଓରେ ଆତତାତୀ ଜଣଙ୍କ ଗୁଳିମାଡ଼ କରୁଥିବା ବେଳେ ନାଗରିକ ଜଣଙ୍କ ପଛରୁ ଯାଇ ତାଙ୍କୁ ମାଡି ବସୁଛନ୍ତି । ଏହାପରେ ଉଭୟଙ୍କ ମଧ୍ୟରେ ହାତାହାତି ହେଉଛି । ତେବେ ନାଗରିକ ଜଣଙ୍କ ଆତତାତୀଙ୍କ ପାଖରୁ ତାଙ୍କ ବନ୍ଧୁକ ଛଡ଼ାଇ ଆଣୁଥିବା ଦେଖଇବାକୁ ମିଳୁଛି ।
୧୪ ବର୍ଷୀୟ ପ୍ରଥମ ଖେଳାଳି ଭାବେ ଜାତୀୟ ସ୍ତରୀୟ ହକି ପ୍ରତିଯୋଗିତାରେ ଭାଗ ନେବେ ଛତ୍ରପୁରର ପି.ବିଷ୍ଣୁ ରେଡ୍ଡୀ
ନନ୍ଦିଘୋଷ ବ୍ୟୁରୋ: ଛୋଟବେଳୁ ହକି ପ୍ରତି ଥିଲା ଦୁର୍ବଳତା। କଠିନ ପରିଶ୍ରମ ଦେଲା ସଫଳତା। ଛତ୍ରପୁରର ୧୪ ବର୍ଷୀୟ ପ୍ରଥମ ଖେଳାଳି ଭାବେ ଜାତୀୟ ସ୍ତରୀୟ ହକି ପ୍ରତିଯୋଗିତାରେ ଭାଗ ନେବେ ପି.ବିଷ୍ଣୁ ରେଡ୍ଡୀ। ସ୍ବପ୍ନରେ ଡେଣା ଯୋଡ଼ିଛି ସରକାରୀ ପ୍ରୋତ୍ସାହନ।
ହକି ପ୍ରେମରେ ପି.ବିଷ୍ଣୁ ରେଡ଼ି । ଛତ୍ରପୁରର ୧୪ ବର୍ଷୀୟ ପ୍ରଥମ ଖେଳାଳି ଭାବେ ଜାତୀୟ ସ୍ତରୀୟ ହକି ପ୍ରତିଯୋଗୀତାରେ ନେବେ ଭାଗ । ସ୍ବପ୍ନରେ ଡେଣା ଯୋଡିଛି ସରକାରୀ ପ୍ରୋତ୍ସାହନ । ଗଞ୍ଜମା ଜିଲ୍ଲାପାଳଙ୍କ ପ୍ରତିଶୃତି ଯୋଗାଇଛି ଲକ୍ଷ୍ୟରେ ଆଗକୁ ବଢିବାକୁ ବଳ । ଗତ ଶନିବାର ସୁନ୍ଦରଗଡ଼ରେ ସରକାରୀ ହାଇସ୍କୁଲ କୋଚିଂ କ୍ୟାମ୍ପରେ ଯୋଗଦେଇଛନ୍ତି ବିଷ୍ଣୁ । ଆସନ୍ତା ୧୮ ତାରିଖ ପର୍ଯ୍ୟନ୍ତ କ୍ୟାମ୍ପରେ ହକି ଖେଳିବେ । ଆସନ୍ତା ୨୨ ତାରିଖରେ ମଧ୍ୟପ୍ରଦେଶର ଟିକମଗଡ ଠାରେ ହେବାକୁ ଥିବା ଜାତୀୟ ବିଦ୍ୟାଳୟ ସ୍ତରୀୟ ହକି ପ୍ରତିଯୋଗୀତାରେ ଓଡ଼ିଶା ପକ୍ଷରୁ ପ୍ରତିନିଧିତ୍ବ କରିବେ । ପୂର୍ବରୁ ଢେଙ୍କାନାଳ, ସୁନ୍ଦରଗଡ଼, ରାଉରକେଲା ଓ ଭୁବନେଶ୍ବରକୁ ଯାଇ ଆଞ୍ଚଳିକ ସ୍ତରରେ ହକି ଖେଳି ଅନେକ ପୁରସ୍କାର ପାଇଛନ୍ତି ବିଷ୍ଣୁ । ଏହାସହ ଚଳିତ ବର୍ଷ ମଧ୍ୟ ଲକ୍ଷ୍ନୌରେ ଜାତୀୟ ସ୍ତରୀୟ ହକି ପ୍ରତିଯୋଗୀତାରେ ଭାଗ ନେଇ ସ୍ବର୍ଣ୍ଣ ପଦକ ହାସଲ କରିଥିଲେ ବିଷ୍ଣୁ ।
ପ୍ରଶିକ୍ଷକ ମନୋଜ କୁମାର ସ୍ବାଇଁଙ୍କ ଠାରୁ ଦୁଇ ବର୍ଷ ହେଲା ପ୍ରଶିକ୍ଷଣ ନେଉଛନ୍ତି ବିଷ୍ଣୁ । ବିଷ୍ଣୁଙ୍କୁ ସରକାରୀ ସହାୟତା ମିଳିଲେ ସେ ଆହୁରି ଛତ୍ରପୁର ତଥା ଗଞ୍ଜାମ ଜିଲ୍ଲା ପାଇଁ ସୁନାମ ଆଣିପାରିବେ ବୋଲି କହିଛନ୍ତି ବିଷ୍ଣୁଙ୍କ ବାପା । ସେପଟେ ବିଷ୍ଣୁ ଜାତୀୟ ସ୍ତରୀୟ ହକି ପ୍ରତିଯୋଗୀତାରେ ଖେଳିବାକୁ ଯାଉଥିବା ଖବର ପାଇବା ପରେ ଗଞ୍ଜାମ ଜିଲ୍ଲାପାଳ ଭି.କୀର୍ତ୍ତି ଭାସନ ତାଙ୍କୁ ସମ୍ବର୍ଦ୍ଧିତ କରିଛନ୍ତି । ବିଷ୍ଣୁଙ୍କୁ ସମସ୍ତ ପ୍ରକାରର ସହଯୋଗ ଜିଲ୍ଲା ପ୍ରଶାସନ ପକ୍ଷରୁ ଯୋଗାଇ ଦିଆଯିବ ବୋଲି ଜିଲ୍ଲାପାଳ ପ୍ରତିଶ୍ରୁତି ଦେଇଛନ୍ତି ।
ପୂର୍ବ ସରକାରଙ୍କ ସମୟରେ ନବୀନଙ୍କ ହକି ପ୍ରତି ପ୍ରୋତ୍ସାହନ ଓ ଆହ୍ବାନ ବିଷ୍ଣୁଙ୍କୁ ହକି ପ୍ରତି ଆକର୍ଷିତ କରିଥିଲା । ପିଲାଟି ବେଳୁ ସେ ବିଚକ୍ଷଣ ଭାବେ ହକି ଖେଳି ଅଞ୍ଚଳପାଇଁ ସୁନାମ ଆଣିପାରିଥିଲେ । ଏବେ ଛତ୍ରପୁରର ୧୪ ବର୍ଷୀୟ ପ୍ରଥମ ଖେଳାଳି ଭାବେ ଜାତୀୟ ସ୍ତରୀୟ ହକି ପ୍ରତିଯୋଗୀତାରେ ଭାଗନେବେ ପି. ବିଷ୍ଣୁ ।
ପରିଚୟ ଦେବ ପଶମ ଗାଲିଚା
ନନ୍ଦିଘୋଷ ବ୍ୟୁରୋ: ଆତ୍ମନିର୍ଭର କରିବ ହସ୍ତକଳା। ଟ୍ରେନିଂ ନେଇ ଉଲରେ କାର୍ପେଟ ତିଆରି କରୁଛନ୍ତି ମହିଳା। ତନ୍ତରେ ଉଲ୍ ଛନ୍ଦି ତିଆରି କରୁଛନ୍ତି ପଶମ ଗାଲିଚା । ବିଶେଷ କରି ଶୀତ ଦିନେ ଏହାର ଭଲ ଚାହିଦା ରହିଛି । କେନ୍ଦ୍ରାପଡ଼ା ଗରଦପୁର ବ୍ଲକ ରାଏସର ଗାଁର ୧୫ରୁ ଅଧିକ ମହିଳା ଦେଖାଇଛନ୍ତି ଉଦାହରଣ।
ଆତ୍ମନିର୍ଭର କରିବ ହସ୍ତକଳା। ପରିଚୟ ଦେବ ପଶମ ଗାଲିଚା। ଉଲ୍ କାର୍ପେଟ ତିଆରି ଲାଗି ତାଲିମ ନେଉଛନ୍ତି କେନ୍ଦ୍ରାପଡ଼ା ଜିଲ୍ଲା ଗରଦପୁର ବ୍ଲକ ରାଏସର ଗାଁର ୧୫ ଜଣ ମହିଳା । ରାଜ୍ୟ ସରକାରଙ୍କ ଦକ୍ଷତା ବିକାଶ କାର୍ଯ୍ୟକ୍ରମ ମାଧ୍ଯମରେ ତାଲିମ ନେଉଛନ୍ତି । ମହିଳାଙ୍କୁ ଟ୍ରେନିଂ ଦେଉଛନ୍ତି ଜିଲ୍ଲା ହସ୍ତକଳା ବିଭାଗ। କାର୍ପେଟ ତିଆରି ପାଇଁ ତାନା, ଠରି, ଲଛି ଓ ଉଲ ବ୍ୟବହାର ହୋଇଥାଏ। ଏଥିରେ କୁଲା,ବାଡ଼ି, ବାଉଁଶ ବ୍ୟବହାର ସହ କମନା ଓ କସର ବାଉଁଶ ମଧ୍ୟ ବ୍ୟବହାର କରାଯାଏ । ଗୋଟିଏ ଗାଲିଚା ବୁଣିବାକୁ ମାସେ ସମୟ ଲାଗୁଥିବାବେଳେ ପଶମ ଗାଲିଚାର ବଜାର ମୂଲ୍ୟ ଅଧିକ ରହିଛି ।
ଗାଲିଚା ମୂଲ୍ୟ ଅଧିକ ଥିବାରୁ ଓଡ଼ିଶାରେ ଏହାର ଏତେ ଚାହିଦା ନାହିଁ। କିନ୍ତୁ ବାହାର ରାଜ୍ୟରେ ଭଲ ବିକ୍ରି ହେଉଛି । ମେସିନ୍ ବୁଣା ଅଢେ଼ଇ ଫୁଟ କାର୍ପେଟ ମୂଲ୍ଯ ୨୫୦ରୁ ୫ଶହ ଟଙ୍କା ମଧ୍ଯରେ ରହୁଛି । ହାତବୁଣା କାର୍ପେଟର ମୂଲ୍ୟ ୨ ହଜାରରୁ ୨୨ଶହ ରହୁଛି । ବିଭିନ୍ନ ମେଳା ମହୋତ୍ସବ, ବାଲିଯାତ୍ରାରେ ଏହି ଗାଲିଚା ଭଲ ବିକ୍ରି ହୁଏ ହୋଇଥାଏ।
ଜୋର ଧରିଲା ତରଭା ବ୍ଲକ ମେଣ୍ଡା ଗାଁକୁ ନୂତନ ବ୍ଲକ ଘୋଷଣା ଦାବି
ନନ୍ଦିଘୋଷ ବ୍ୟୁରୋ: ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ ମେଣ୍ଡାକୁ ନୂତନ ବ୍ଲକ ଘୋଷଣା ଦାବି ଜୋର ଧରିଛି । ବିଭିନ୍ନ ନେତା ମନ୍ତ୍ରୀମାନଙ୍କୁ ଭେଟିବା ସହ ଗାଁ ଗାଁରେ ଚାଲିଛି ସଚେତନତା ସଭା ଓ ଆନ୍ଦୋଳନ। ଦାବି ପୂରଣ ନେହେଲେ ଆନ୍ଦୋଳନକୁ ତୀବ୍ରତର କରାଯିବ ବୋଲି ଗ୍ରାମବାସୀ କହିଛନ୍ତି ।
ଜୋର ଧରିଲା ବ୍ଲକ ଗଠନ ଦାବି । ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ ମେଣ୍ଡା ଗାଁକୁ ନୂତନ ବ୍ଲକ ଘୋଷଣା ଦାବି। ୧୪ଟି ୱାର୍ଡ ବିଶିଷ୍ଟ ଗାଁରେ ବ୍ଲକ ଗଠନ ପାଇଁ ସବୁ ମାନଦଣ୍ଡ ପୂରଣ କରୁଛି । ଆଖପାଖରେ ଥିବା ମେଣ୍ଡା, ରାଣିସାରଡ଼ା, ଦେଉଳପଦର,ପାଇକବାହାଲ, ପୁଆ, ଜାରଜରିଙ୍ଗ ଆଦି ପଂଚାୟତର ୫୦ ହଜାରରୁ ଅଧିକ ଲୋକେ ବର୍ତ୍ତମାନ ଉପେକ୍ଷିତ ହୋଇ ରହିଛନ୍ତି । ଏଣୁ ଏହି ଅଞ୍ଚଳକୁ ନେଇ ନୂତନ ମେଣ୍ଡା ବ୍ଲକ ଗଠନ କରାଯିବାକୁ ଦାବି କରିଛନ୍ତି ଅଂଚଳବାସୀ ।
ପୂର୍ବରୁ ଶତାଧିକ ଲୋକ ଏକ ବିଶାଳ ଶୋଭାଯାତ୍ରାରେ ଯାଇ ଜିଲ୍ଲାପାଳଙ୍କ ଅଫିସ୍ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକ ପତ୍ର ଦେଇଥିଲେ। ସାମାଜିକ ଓ ଭୌଗଳିକ ସ୍ଥିତିକୁ ବିଚାର କଲେ ମେଣ୍ଡା ବ୍ଲକ ପାଇଁ ସମସ୍ତ ଯୋଗ୍ୟତା ରହିଛି । ଦୀର୍ଘ ୩୦ ବର୍ଷ ହେବ ମେଣ୍ତାକୁ ବ୍ଲକ ଘୋଷଣା ଦାବି ହୋଇ ଆସୁଛି । ସେପଟେ ଏନେଇ ପଦକ୍ଷେପ ନିଆଯିବ ବୋଲି କହିଛନ୍ତି ଜିଲ୍ଲାପାଳ ।
ନୀତିନ ନବୀନ ହେଲେ ବିଜେପିର ନୂଆ କାର୍ଯ୍ୟକାରୀ ସଭାପତି
ନନ୍ଦିଘୋଷ ବ୍ୟୁରୋ: ନୂଆ କାର୍ଯ୍ୟକାରୀ ସଭାପତିଙ୍କ ନାଁ ଘୋଷଣା କଲା ବିଜେପି । ନୀତିନ ନବୀନଙ୍କ ନାଁରେ ମୋହର ମାରିଛି ବିଜେପି । ସରକାରୀ ଏବଂ ସାଂଗଠନିକ ଦକ୍ଷତା ନୀତିନ ନବୀନଙ୍କ ପାଖରେ ରହିଛି । ସେ ବିଜେପି ନେତା ନବୀନ କିଶୋର ସିହ୍ନାଙ୍କ ପୁଅ। ସେ ବର୍ତ୍ତମାନ ବିହାର ସରକାରରେ ମନ୍ତ୍ରୀ ରହିଛନ୍ତି ।
Bihar Minister Nitin Nabin appointed as the National Working President of the Bharatiya Janata Party pic.twitter.com/zvo7aUNvX9
— ANI (@ANI) December 14, 2025
ଧାନ ଅମଳ କରି ବିଲରେ ଚାତକ ପରି ଜଗିଛି ଚାଷୀ
ନନ୍ଦିଘୋଷ ବ୍ୟୁରୋ: ଟିଟିଲାଗଡ଼ ଅଞ୍ଚଳରେ ଧାନ ଅମଳ କରି ଚାତକ ପରି ଚାହିଁବସିଛି ଚାଷୀ। ଏଯାଏଁ ଖୋଲିନି ମଣ୍ଡି। କରଜ କରି ଚାଷ କରିଥିବା ଚାଷୀ ଏବେ ଚିନ୍ତାରେ। ଋଣ ଶୁଝିବା ପାଇଁ କମ ଦାମରେ ଦଲାଲ ହାତକୁ ଟେକି ଦେଇ ଅଭାବୀ ବିକ୍ରୀର ଶିକାର ହେଉଥିବା ଅଭିଯୋଗ ହୋଇଛି।
କେବେ ଖୋଲିବ ମଣ୍ଡି? କେବେ ଧାନ କିଣିବେ ସରକାର? ଧାନ ଅମଳ କରି ବିଲରେ ଚାତକ ପରି ଜଗିଛି ଚାଷୀ । ନା ଖୋଲୁଛି ମଣ୍ଡି ନା ବିକ୍ରି ହେଉଛି ଧାନ। କରଜ କରି ଚାଷ କରିଥିବା ଚଷା ପୁଅ କିଭଳି ଋଣ ଶୁଝିବ ଓ କିଭଳି ପରିବାର ଚଳାଇବ ସେ ନେଇ ରହିଛି ଚିନ୍ତାରେ। ଚଳିତ ବର୍ଷ ଟିଟିଲାଗଡ ଅଞ୍ଚଳରେ ଭଲ ବର୍ଷା ହୋଇଥିବାରୁ ଭଲ ଚାଷ ହୋଇଛି । ବର୍ତ୍ତମାନ ଅଧାରୁ ଅଧିକ ଜମିରୁ ଅମଳ ସରିବାରେ ଲାଗିଲାଣି। ହେଲେ ବର୍ତ୍ତମାନ ସୁଦ୍ଧା ମଣ୍ଡି ଆରମ୍ଭ ହୋଇ ପାରିନାହିଁ । ଅମଳ ଧାନ ଖଳାରେ ପଡିଥିବା ବେଳେ କିଛି ଧାନ ଜମିରେ ପଡି ରହିଛି । ଧାନ ନଷ୍ଟ ଆଶଙ୍କାରେ କମ ଦାମରେ ଦଲାଲ ହାତରେ ଟେକିଦେଇ ଅଭାବୀ ବିକ୍ରିର ଶିକାର ହେଉଛି ଚାଷୀ। ୯୦୦ରୁ ୧୦୦୦ ଟଙ୍କା ପ୍ରତି କ୍ଵିଣ୍ଟାଲ ଦରରେ ଧାନ କିଣି ଦଲାଲ ମାଲେମାଲ ।
ବର୍ତ୍ତମାନ ସୁଦ୍ଧା ମଣ୍ଡି ଖୋଲିନଥିବାରୁ ଶୋଷଣର ଶିକାର ହେଉଛନ୍ତି ଚାଷୀ । ମଣ୍ଡି ସମସ୍ୟା ଓ ଅନ୍ୟପଟେ ବର୍ଷା ଭୟରେ କଷ୍ଟ ଉପାର୍ଜିତ ଧାନକୁ କମ ଦରରେ ବିକ୍ରି କରୁଛନ୍ତି ।। ଚାଷୀଙ୍କ ସ୍ଵାର୍ଥକୁ ଦୃଷ୍ଟିରେ ଉପଯୁକ୍ତ ବ୍ୟବସ୍ଥା କରିବାକୁ କୃଷକ ସଂଗଠନ ଦାବି କରିବା ସହ ଦାବି ପୂରଣ ନହେଲେ ଆନ୍ଦୋଳନ ଚେତାବନୀ ଦେଇଛି। ଅନ୍ୟପଟେ ଟାର୍ଗେଟ ଆସିନଥିବାରୁ ମଣ୍ଡି ଆରମ୍ଭ ହୋଇପାରିନାହିଁ ବୋଲି ଉପଜିଲ୍ଲାପାଳ କହିଛନ୍ତି।
ଶ୍ରୀକ୍ଷେତ୍ର ସାମନ୍ତସିଂହାର ଗିରଫ
ନନ୍ଦିଘୋଷ ବ୍ୟୁରୋ: ପକ୍ସୋ କେସ ଅଭିଯୋଗରେ ଶ୍ରୀକ୍ଷେତ୍ର ସାମନ୍ତସିଂହାର ଗିରଫ । ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଳକ୍ ଅନ୍ତର୍ଗତ ଖଟିସାହି ଗାଁର ଶ୍ରୀକ୍ଷେତ୍ର ସାମନ୍ତସିଂହାରଙ୍କୁ ଭୁବନେଶ୍ୱର ଫରେଷ୍ଟ ପାର୍କ ନିକଟରୁ ଗିରଫ କରାଯାଇଛି । ସେପଟେ ପୁଅ ନିର୍ଦ୍ଦୋଶ ବୋଲି କହିଛନ୍ତି ବାପା ଦିଲୀପ ଦଳେଇ । ଶ୍ରୀକ୍ଷେତ୍ରକୁ ଫସେଇ ଦିଆଯାଇଛି । ପୁଅ ସମ୍ପୂର୍ଣ୍ଣ ନିର୍ଦ୍ଦୋଷ । ଶ୍ରୀକ୍ଷେତ୍ର ବିବାହର ୧୯ ମାସ ପରେ କାଗଜି ପଲେଇ ଓରଫ୍ ସୋନାଲି ପଣ୍ଡା ପୁତ୍ର ସନ୍ତାନ ଜନ୍ମ ଦେଇଥିଲେ । ମେଡ଼ିକାଲରେ ମମତା ଯୋଜନା ଖାତାରେ ଡାକ୍ତର ଉଲ୍ଲେଖ କରିଛନ୍ତି ଯେ ସୋନାଲି ପଣ୍ଡାଙ୍କୁ ୨୨ ବର୍ଷ । ବିବାହ ସମୟରେ ଶ୍ରୀକ୍ଷେତ୍ରକୁ 20 ବର୍ଷ ହୋଇଥିଲା । ଏହି ପ୍ରମାଣ ଆଧାରରେ ଶ୍ରୀକ୍ଷେତ୍ରକୁ ନ୍ୟାୟ ପ୍ରଦାନ ପାଇଁ ସରକାରଙ୍କୁ ଦାବି ଜଣାଇଛନ୍ତି ବାପା ଦିଲ୍ଲୀପ ।
ଘଟଣା ଅନୁଯାଇ ଶ୍ରୀକ୍ଷେତ୍ର ନିଜକୁ ସୋନାଲୀଙ୍କ ସ୍ବାମୀ ବୋଲି ଦାବି କରୁଥିଲେ । ପୂର୍ବରୁ ସୋନାଲି ତୁଳସୀ ଗଣନାଟ୍ୟ ମାଲିକ ନାଣ୍ଡୁ ବାବୁଙ୍କ ଦ୍ବାରା ପ୍ରଭାବିତ ହୋଇ ଘର ଛାଡି ଚାଲିଯାଇଛନ୍ତି ବୋଲି ଶ୍ରୀକ୍ଷେତ୍ର ଅଭିଯୋଗ କରିଥିଲେ । ଏହି ଘଟଣାରେ ସୋନାଲୀ ମଧ୍ୟ ପ୍ରତିକ୍ରିୟା ରଖିଥିଲେ । ପ୍ରଶ୍ନ କରିଥିଲେ ଏତେ ଦିନ ପରେ କାହିଁକି ସ୍ବାମୀଙ୍କର ମୋତେ ମନେ ପଡିଲା । ସୋନାଲିଙ୍କ ଓକିଲ ବ୍ୟୋମକେଶ ତ୍ରିପାଠୀ କହିଥିଲେ ଯେ ସୋନାଲୀ ନାବାଳିକା ଥିବା ସମୟରେ ସ୍ବାମୀ ବୋଲି ଦାବି କରୁଥିବା ଶ୍ରୀକ୍ଷେତ୍ର ସେନାଲୀଙ୍କୁ ଦୁଷ୍କର୍ମ କରିଥିଲେ । ଏପରିକି ସୋନାଲୀଙ୍କୁ ଯେତେବେଳେ ୧୪ ବର୍ଷ ହୋଇଥିଲା ସେତେବେଳେ ବଳପୂର୍ବକ ବ୍ଲାକମେଲ କରି ଶ୍ରୀକ୍ଷେତ୍ର ସୋନାଲୀଙ୍କୁ ବିବାହ କରିଥିଲେ। ଏବେ ସୋସିଆଲ ମିଡିଆରେ ସୋନାଲିଙ୍କୁ ବଦନାମ କରୁଛନ୍ତି ଶ୍ରୀକ୍ଷେତ୍ର । ତେଣୁ ଶ୍ଙ୍କରୀକ୍ଷେତ୍ରଙ୍କ ବିରୋଧରେ ହାଇକୋର୍ଟରେ ଅପିଲ କରିଥିଲେ ସୋନାଲୀ ।