ଭୁବନେଶ୍ବର : ରାଜ୍ୟରେ ତଳମୁହାଁ ରହିଛି ପାରଦ । ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାରେ ଶୀତର ଲହରୀ ଜାରି ରହିଛି । ଗତ କିଛିଦିନ ହେଲା କନ୍ଧମାଳ କୁ ଛୁଇଁଛି ଶୀତ l ଫୁଲବାଣୀ ରେ ତାପମାତ୍ରା ହ୍ରାସ ପାଇଛି । ସକାଳୁ କୁହୁଡ଼ିର ମାତ୍ରା କମ୍ ଥିଲା ବେଳେ ଶୀତ ଅନୁଭବ ହେଉଛି । ଲୋକେ ଶୀତରୁ ରକ୍ଷା ପାଇବାକୁ ଗ୍ରାମାଞ୍ଚଳର ଲୋକେ ନିଆଁ ପୁଉଁଛନ୍ତି । ଆଗକୁ ଆହୁରି ୨ ରୁ ୩ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ତାପମାତ୍ରା କମିପାରେ ବୋଲି ପାଣିପାଗ କେନ୍ଦ୍ରର ଆକଳନ କରିଛି । ଡିସେମ୍ବର ପ୍ରଥମ ସପ୍ତାହରୁ ରାଜ୍ୟରେ ଶିତ ବଢ଼ିପାରେ । କୁହୁଡ଼ି ପାଇଁ ସତର୍କତା ଜାରି କରାଯାଇଛି ।
ପୋଢୁଆଁ ହେବେ ଶ୍ରୀଜିଉ : ନିଆଳି ମାଧବାନନ୍ଦ ପୀଠରୁ ଯାଉଛି ପୋଢୁଆଁ ଭାର
ପୁରୀ : ଚତୁର୍ଦ୍ଧା ମୂର୍ତ୍ତି ହେବେ ପୋଢୁଆଁ । ତେଣୁ ମାମୁଁ ଘରୁ ପୋଢୁଆଁ ଭାର ଯିବ। ଭଣଜା ପୋଢୁଆଁ ହେବା ପାଇଁ କାହିଁ କେତେ ପ୍ରକାର ସାମଗ୍ରୀ ପଠା ଯାଉଛି । କଟକ ଜିଲ୍ଲା ନିଆଳି ମାଧବାନନ୍ଦଙ୍କ ପୀଠରୁ ଏହି ପୋଢୁଆଁ ଭାର ଯାଉଛି। ପାଟ ମଠା ସାଙ୍ଗକୁ କାହିଁ କେତେ ପ୍ରକାର ସାମଗ୍ରୀର ଭାର ନେଇ ଆଜି ଶ୍ରୀ କ୍ଷେତ୍ର ଅଭିମୁଖେ ଯିବ ପୋଢୁଆଁ ଭାର । ପ୍ରଥମାଷ୍ଟମୀରେ ଚତୁର୍ଦ୍ଧା ମୂର୍ତ୍ତୀଙ୍କୁ ଏହି ସାମଗ୍ରୀ ଲାଗି କରାଯିବ। ଭୋରରୁ ଠାକୁରଙ୍କ ମଙ୍ଗଳ ଆରତୀ ଓ ଅନ୍ୟାନ୍ୟ ନୀତିକାନ୍ତି ଶେଷ ହେବା ପରେ ପୋଢୁଆଁ ଭାର ପ୍ରସ୍ତୁତ ହେଉଛି। ଘଣ୍ଟଘଣ୍ଟା, ଢୋଲ, ମହୁରୀ ଓ ଉତ୍କଳୀୟ ସମର କଳାର ପ୍ରଦର୍ଶନ କରି ଏକ ବିରାଟ ପଟୁଆରରେ ଭାର ନେଇ ଭାରୁଆମାନେ ଶ୍ରୀକ୍ଷେତ୍ର ଯାତ୍ରା କରିବାର ବିଧି ରହିଛି। ଆସନ୍ତା କାଲି ପୋଢୁଆଁ ହେବେ ଶ୍ରୀଜିଉ।
ବିଷପିଇ ଦୁଇ ଭଉଣୀଙ୍କ ଆତ୍ମହତ୍ୟା ଉଦ୍ୟମ, ଚିକିତ୍ସାଧୀନ ଅବସ୍ଥାରେ ବଡ଼ ଭଉଣୀର ମୃତ୍ୟୁ
ବୌଦ୍ଧ : ବୌଦ୍ଧ ଜିଲ୍ଲା ହରଭଙ୍ଗା ଥାନା ମହାଲିକପଡ଼ା ଗାଁରେ ଘଟିଛି ଏକ ଅଭାବନୀୟ ଘଟଣା । ଘରୋଇ କଳହକୁ କେନ୍ଦ୍ର କରି ୨ ଭଉଣୀ ବିଷ ପିଇଥିବାର ଅଭିଯୋଗ । ଚିକିତ୍ସାଧୀନ ଅବସ୍ଥାରେ ବଡ଼ ଭଉଣୀର ମୃତ୍ୟୁ ଘଟିଛି । ଗୁରୁତର ଅବସ୍ଥାରେ ସାନ ଭଉଣୀର ବୌଦ୍ଧ ମୁଖ୍ୟ ମେଡିକାଲରେ ଚିକିତ୍ସା ଜାରି ରହିଛି । ମହାଲିକପଡ଼ା ଗାଁରେ ୨ ବର୍ଷର ପୁଅ ସହିତ ମଣ୍ଟୁ ସାହୁ ଓ ତାଙ୍କ ସ୍ତ୍ରୀ ନଳିନୀ ସାହୁ ରହୁଥିଲେ । ତାଙ୍କ ସହିତ ନଳିନୀ ସାହୁଙ୍କ ସାନଭଉଣୀ ଅର୍ଥାତ ମଣ୍ଟୁ ସାହୁଙ୍କ ଶାଳୀ ମଧ୍ୟ ରହୁଥିଲେ । ଗତକାଲି ସ୍ଵାମୀ ଘରେ ନଥିବା ସମୟ ଦୁଇ ଭଉଣୀଙ୍କ ମଧ୍ୟରେ କଳହ ହୋଇଥିଲା । ଏହାକୁ ନେଇ ଦୁଇ ଭଉଣୀ ବିଷ ପିଇଦେଇଥିଲେ । ଉଭୟଙ୍କୁ ଉଦ୍ଧାର କରି ପୁରୁଣାକଟକ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ ସ୍ଥାନୀୟ ଲୋକେ । ସ୍ଵାସ୍ଥ୍ୟ ଅବସ୍ଥା ସଂକଟାପନ୍ନ ହେବାରୁ ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ବୌଦ୍ଧ ମେଡିକାଲରେ ବଡ଼ ଭଉଣୀ ନଳିନୀ ସାହୁଙ୍କ ମୃତ୍ୟୁ ହୋଇଥିବା ବେଳେ ସାନ ଭଉଣୀ ସାଲିନୀ ଚିକିତ୍ସା ଜାରି ରହିଛି । ମୃତଦେହ ଜବତ କରି ବୌଦ୍ଧ ପୋଲିସ ତଦନ୍ତ ଜାରି ରହିଛି। ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ଜଣାପଡିଛି ।
କୋକେଇରୁ ଉଠି ବସିଲା ମୃତଦେହ ! ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି
ଜୟପୁର : ରାଜସ୍ଥାନର ଝୁଞ୍ଜୁନୁରୁ ଏକ ଅଜବ ମାମଲା ସାମ୍ନାକୁ ଆସିଛି । ଏଠାରେ ଶ୍ମଶାନରେ ଶବଦାହ ସମୟରେ ହଠାତ୍ ଜଣେ ବ୍ୟକ୍ତି ଜୀବନ୍ତ ହୋଇଗଲା । ହଠାତ୍ ସେ ନିଶ୍ୱାସ ନେବା ଆରମ୍ଭ କଲା । ଏହା ପରେ ସେଠାରେ ଉପସ୍ଥିତ ଲୋକମାନେ ଆଶ୍ଚର୍ଯ୍ୟ ହେଲେ । ତା’ପରେ ଆମ୍ବୁଲାନ୍ସକୁ ଡକାଯାଇ ତାଙ୍କୁ ଡାକ୍ତରଖାନା ନିଆଯାଇଥିଲା । ଗୁରୁତ୍ୱପୂର୍ଣ୍ଣ କଥା ହେଉଛି ଡାକ୍ତରଖାନାର ଡାକ୍ତରମାନେ ଉକ୍ତ ବ୍ୟକ୍ତିଙ୍କୁ ମୃତ ଘୋଷଣା କରିଥିଲେ । ଏହା ପରେ ମୃତଦେହକୁ ଶବଗୃହକୁ ସ୍ଥାନାନ୍ତର କରାଯାଇଥିଲା । ଶରୀରକୁ ପ୍ରାୟ ଅଢେଇ ଘଣ୍ଟା ପର୍ଯ୍ୟନ୍ତ ଫ୍ରିଜରେ ରଖାଯାଇଥିଲା । ତା’ପରେ ଯେତେବେଳେ ସେମାନେ ତାଙ୍କର ଶେଷ ରୀତିନୀତି କରିବାକୁ ଗଲେ, ସେ ନିଶ୍ୱାସ ନେବା ଆରମ୍ଭ କଲେ । ମୃତ ଘୋଷଣା ହେବାର ପ୍ରାୟ ଚାରିରୁ ପାଞ୍ଚ ଘଣ୍ଟା ପରେ ଉକ୍ତ ବ୍ୟକ୍ତି ଜୀବନ୍ତ ହୋଇଥିଲେ ।
ବାଗଡରେ ସ୍ଥିତ ମା ସେବା ସନ୍ଥାନଙ୍କ ଆଶ୍ରୟ ଗୃହରେ ରହୁଥିବା ୪୭ ବର୍ଷିୟ ରୋହିତାଶଙ୍କ ସ୍ୱାସ୍ଥ୍ୟ ଗୁରୁବାର ଅପରାହ୍ନରେ ଖରାପ ହୋଇଯାଇଥିଲା । ବଧିର ଏବଂ ମୂକ ରୋହିତାଶ ଜଣେ ଅନାଥ ।ଅସୁସ୍ଥତା ହେତୁ ତାଙ୍କୁ ଝୁଞ୍ଜୁନୁସ୍ଥିତ ବିଡିଏ ହସ୍ପିଟାଲରେ ଭର୍ତ୍ତି କରାଯାଇଥିଲା । ଡାକ୍ତରଖାନାର ଜରୁରୀକାଳୀନ ଚିକିତ୍ସା ସମୟରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ ।
ତା’ପରେ ତାଙ୍କ ମୃତଦେହକୁ ଡାକ୍ତରଖାନାର ଶବ ବ୍ୟବଚ୍ଛେଦ ଗୃହରେ ରଖାଯାଇଥିଲା । ଏଠାରେ ମୃତ ଦେହ ପ୍ରାୟ ଅଢେଇ ଘଣ୍ଟା ପର୍ଯ୍ୟନ୍ତ ଫ୍ରିଜରେ ରଖାଯାଇଥିଲା । ପରେ ପୋଲିସ ଆସି ପଞ୍ଚନାମା କରିଥିଲା । ତା’ପରେ ଶବକୁ ମା ସେବା ସଂସ୍ଥାର ଅଧିକାରୀମାନଙ୍କୁ ହସ୍ତାନ୍ତର କରାଯାଇଥିଲା। ତାପରେ ଯେତେବେଳେ ଶବକୁ ପଞ୍ଚ ଦେବ ମନ୍ଦିର ନିକଟରେ ଅବସ୍ଥିତ ଶ୍ମଶାନକୁ ନିଆଯାଇଥିଲା । ସେଠାରେ ହଠାତ୍ କୋକେଇରେ ରୋହିତାଶ ଶ୍ବାସକ୍ରିୟା କରିବା ଆରମ୍ଭ କରି ଦେହ ଚଳପ୍ରଚଳ କରିବାକୁ ଲାଗିଲେ । କେଉଁ ଲୋକମାନେ ଭୟଭୀତ ହେଲେ । ତା’ପରେ ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା । ବର୍ତ୍ତମାନ ସେ ଡାକ୍ତରଖାନାର ଆଇସିୟୁରେ ଚିକିତ୍ସିତ ହେଉଛନ୍ତି ।
ଜିଲ୍ଲା ଏହି ପ୍ରସଙ୍ଗରେ ପଦକ୍ଷେପ ନେଇଛନ୍ତି । ଏହି ଘଟଣାର ତଦନ୍ତ ପାଇଁ ସେ କହିଛନ୍ତି । ଏହି ପ୍ରସଙ୍ଗରେ ପିଏମଓରୁ ଏକ ରିପୋର୍ଟ ମଗାଯାଇଛି। ଏଥିସହ ସ୍ୱାସ୍ଥ୍ୟ ବିଭାଗର ସଚିବଙ୍କୁ ସୂଚନା ଦିଆଯାଇଛି । ବର୍ତ୍ତମାନ ଏହି ମାମଲା ଉତ୍ତେଜନାମୂଳକ ପରିସ୍ଥିତିରେ ରହିଛି ।
ବ୍ରିଟେନ, ଆମେରିକା ନୁହେଁ, ଏହି ଦେଶର ପାସପୋର୍ଟ ସବୁଠାରୁ ମହଙ୍ଗା
ନୂଆଦିଲ୍ଲୀ : ଦୁନିଆରେ ଅନେକ ସୁନ୍ଦର ସ୍ଥାନ ଅଛି, ଯେଉଁଠାରେ ଅନେକ ଲୋକ ଦେଖିବା ସ୍ୱପ୍ନ । କିନ୍ତୁ ଅନ୍ୟ ଦେଶକୁ ଯିବା ପାଇଁ ଆପଣଙ୍କ ପାଇଁ ପାସପୋର୍ଟ ରହିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏହା ବ୍ୟତୀତ ପାସପୋର୍ଟ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ । ଅଧିକାଂଶ ଦେଶର ସରକାର ପାସପୋର୍ଟ ପ୍ରଦାନ କରନ୍ତି ଏବଂ ଲୋକମାନେ ମଧ୍ୟ କିଛି ଦେୟ ଦେଇ ଏହା ପାଇଁ ଆବେଦନ କରିପାରିବେ । ପ୍ରତ୍ୟେକ ଦେଶ ପାସପୋର୍ଟ ପାଇଁ ନିଜର ଆବେଦନ ଶୁଳ୍କ ଆଦାୟ କରନ୍ତି । କେଉଁ ଦେଶରେ ସବୁଠାରୁ ମହଙ୍ଗା ପାସପୋର୍ଟ ଅଛି ତାହା ଆପଣ ଜାଣନ୍ତି କି?
Compare The Market ରିପୋର୍ଟ ଏକ ତଥ୍ୟ ସେୟାର କରିଛି । ଯେଉଁଥିରେ ଦର୍ଶାଯାଇଛି ଯେ ୨୦୨୪ରେ ପାସପୋର୍ଟ ତିଆରି କରିବାର ମୂଲ୍ୟ ୧୯,୦୦୦ ରୁ ୧,୫୦୦ ଟଙ୍କା ମଧ୍ୟରେ ହୋଇପାରେ । ଖବର ଅନୁଯାୟୀ, ମେକ୍ସିକୋ ପାସପୋର୍ଟ ଦୁନିଆର ସବୁଠୁ ଦାମୀ ପାସପୋର୍ଟ ମଧ୍ୟରେ ଗଣାଯାଏ । ଯଦି ଆପଣ ଏହି ପାସପୋର୍ଟକୁ ୧୦ ବର୍ଷର ବୈଧତା ସହିତ ପାଇବାକୁ ଚାହୁଁଛନ୍ତି, ତେବେ ଆପଣଙ୍କୁ ଏଥିପାଇଁ ପ୍ରାୟ ୧୯,୪୮୧.୭୫ ଟଙ୍କା ଦେବାକୁ ପଡିବ । ଯଦି ଆପଣ ଏହାକୁ ୬ବର୍ଷ ପାଇଁ ନିଅନ୍ତି ତେବେ ଏହା ଦୁନିଆର ଚତୁର୍ଥ ମହଙ୍ଗା ପାସପୋର୍ଟ ହେବ ।
ଏହି ତାଲିକାରେ ପରବର୍ତ୍ତୀ ନାମ ଅଷ୍ଟ୍ରେଲିଆରୁ ଆସିଛି, ଯାହାର ୧୦ବର୍ଷର ପାସପୋର୍ଟ ୧୯,୦୪୧ ଟଙ୍କାରେ ଉପଲବ୍ଧ | ଯେତେବେଳେ କି ଯୁକ୍ତରାଷ୍ଟ୍ରର ୧୦ ବର୍ଷର ପାସପୋର୍ଟ ୧୩,୮୬୮ ଟଙ୍କା ପାଇଁ ଉପଲବ୍ଧ |
ୟୁଏଇରେ ବିଶ୍ୱର ସବୁଠାରୁ ଶସ୍ତା ପାସପୋର୍ଟ ଅଛି । ୟୁଏଇ ପାଇଁ ପାସପୋର୍ଟ ପାଇବା ପାଇଁ ୧୪୦୦ ଟଙ୍କା ଖର୍ଚ୍ଚ ହୁଏ ।
ଏହା ପରେ ଆମ ଦେଶରେ ଭାରତର ନାମ ଏହି ତାଲିକାରେ ଅଛି, ଯେଉଁଥିରେ ବିଶ୍ୱର ଦ୍ୱିତୀୟ ଶସ୍ତା ପାସପୋର୍ଟ ଅଛି ।ଭାରତୀୟ ପାସପୋର୍ଟର ମୂଲ୍ୟ ୧,୫୨୪.୯୫ ଟଙ୍କା, ଯାହାର ବୈଧତା ୧୦ ବର୍ଷ ଅଟେ । ଏପରିକି ହଙ୍ଗେରୀ ଏବଂ ସ୍ପେନ୍ ଭଳି କେତେକ ୟୁରୋପୀୟ ଦେଶ ଏବଂ କେନିଆ ଏବଂ ଦକ୍ଷିଣ ଆଫ୍ରିକା ଭଳି ଆଫ୍ରିକୀୟ ଦେଶମାନଙ୍କରେ ବିଶ୍ୱର ସବୁଠାରୁ ଶସ୍ତା ପାସପୋର୍ଟ ଅଛି ।
IIT ପ୍ରଫେସରଙ୍କୁ ଚୂନ ଲଗାଇଲେ ଯୁବକ, ଅଭିଯୁକ୍ତକୁ ଗିରଫ କଲା ପୋଲିସ
ନୂଆଦିଲ୍ଲୀ : ଆଜିକାଲି ଡିଜିଟାଲ ଆରେଷ୍ଟ ମାମଲା ଦ୍ରୁତ ଗତିରେ ବୃଦ୍ଧି ପାଉଛି। ଯେଉଁଥିରେ କିଛି ଲୋକ ନିଜକୁ ପୋଲିସ୍ ବୋଲି ଦର୍ଶାଇ ଲୋକଙ୍କୁ ଭିଡିଓ କଲ କରନ୍ତି ଏବଂ ସେମାନଙ୍କଠାରୁ ଲକ୍ଷ ଲକ୍ଷ ଟଙ୍କା ଲୁଟି ନେଇଥାନ୍ତି । ବୟସ୍କ ବ୍ୟକ୍ତି ଏବଂ ବ୍ୟବସାୟୀମାନେ ସବୁଠାରୁ ଅଧିକ ଶିକାର ହେଉଛନ୍ତି । ଡିଜିଟାଲ ଆରେଷ୍ଟ ମାମଲାରେ ଦିଲ୍ଲୀ ପୋଲିସ ବଡ କାର୍ଯ୍ୟାନୁଷ୍ଠାନ ନେଇଛି । ୭ ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ଦକ୍ଷିଣ-ପଶ୍ଚିମାଞ୍ଚଳ ଡିସିପି ସୁରେନ୍ଦ୍ର ଚୌଧୁରୀ ଏହି ବିଷୟରେ ସୂଚନା ଦେଇଛନ୍ତି। ସେ କହିଛନ୍ତି, ଆମେ ଏହି ବିଷୟରେ କ୍ରମାଗତ ଭାବରେ ଅଭିଯୋଗ ଗ୍ରହଣ କରୁଥିଲୁ। ଦକ୍ଷିଣ-ପଶ୍ଚିମ ସାଇବର ପୋଲିସ ଷ୍ଟେସନରେ ୪ଟି ମାମଲା ଉପରେ ୭ ଜଣଙ୍କୁ ଗିରଫ କରାଯାଇଛି।
ଗୋଟିଏ ମାମଲାରେ, ଜଣେ ୭୮ ବର୍ଷ ବୟସ୍କ ବ୍ୟକ୍ତିଙ୍କୁ ଫେଡେକ୍ସ କୋରିଅର ନାମରେ ଡକାଯାଇଥିଲା | ଯେଉଁଥିରେ ତାଙ୍କୁ କୁହାଯାଇଥିଲା ଯେ ତାଙ୍କ ପାର୍ସଲରେ କ୍ରେଡିଟ୍ କାର୍ଡ, MDMA ଔଷଧ ଏବଂ ଏପରି ଆପତ୍ତିଜନକ ଜିନିଷ ଅଛି, ଯେଉଁଥିପାଇଁ ତାଙ୍କୁ ଯେକୌଣସି ସମୟରେ ଗିରଫ କରାଯାଇପାରେ | ପୀଡିତାମାନେ ଏଥିରେ ଭୟଭୀତ ହୋଇ ଅଭିଯୁକ୍ତଙ୍କ ନିକଟକୁ ୩୨ ଲକ୍ଷ ଟଙ୍କା ଟ୍ରାନ୍ସଫର କରିଛନ୍ତି। ଏହି ମାମଲାରେ ଆମେ ପଶ୍ଚିମବଙ୍ଗର ଅଜୟ କୁମାର ନାମକ ଜଣେ ବ୍ୟକ୍ତିଙ୍କୁ ଗିରଫ କରାଯାଇଛି ।
ଅନ୍ୟ ଏକ ମାମଲାରେ ମଧ୍ୟପ୍ରଦେଶର ଜଣେ ଅବସରପ୍ରାପ୍ତ ସରକାରୀ କର୍ମଚାରୀଙ୍କୁ ଟ୍ରେଜେରୀ ଅଧିକାରୀଙ୍କ ନାମରେ କଲ୍ ଦିଆଯାଇଥିଲା ଏବଂ ତାଙ୍କ ପେନ୍ସନ୍ ଆକାଉଣ୍ଟରେ ପ୍ରାୟ ୧୧ ଲକ୍ଷ ଟଙ୍କା ଜମା କରିବାକୁ ଏକ ଫିସିଂ ଲିଙ୍କ୍ ପଠାଯାଇଥିଲା । ସେ ଏହା ଉପରେ କ୍ଲିକ୍ କରିବା ମାତ୍ରେ ତାଙ୍କ ଆକାଉଣ୍ଟରୁ ଟଙ୍କା ଖାଲି ହୋଇଯାଇଥିଲା। ଏହି ମାମଲାରେ ଦୁଇ ଜଣ ଲୋଚନ ପ୍ରସାଦ ଏବଂ ବିକାଶ କୁମାରଙ୍କୁ ଗିରଫ କରାଯାଇଛି ।
ତୃତୀୟ ମାମଲାରେ ଜଣେ ଆଇଆଇଟି ପ୍ରଫେସରଙ୍କୁ ଠକେଇ କରାଯାଇଥିଲା। ଯେଉଁଥିରେ ଏସବିଆଇ ଗ୍ରାହକ କେୟାର ନାମରେ ନକଲି କଲ କରାଯାଇଥିଲା। ତାଙ୍କୁ କୁହାଯାଇଥିଲା ଯେ କେହି ତାଙ୍କ ଆକାଉଣ୍ଟକୁ ଅପବ୍ୟବହାର କରିଛନ୍ତି। ତା’ପରେ ତାଙ୍କୁ ଧମକ ଦେଇ ତାଙ୍କ ଆକାଉଣ୍ଟରୁ ପ୍ରାୟ ୭ଲକ୍ଷ ଟଙ୍କା ଉଠାଇନେଇଥିଲେ ।
ଏହି ମାମଲାରେ ମଧ୍ୟପ୍ରଦେଶର ଜଣେ ଅଭିଯୁକ୍ତ ମୋହିତଙ୍କୁ ଗିରଫ କରାଯାଇଛି । ତାର ବୟସ ୨୨ ବର୍ଷ | ସେହିଭଳି ଜଣେ ମହିଳାଙ୍କଠାରୁ ଧମକ ଦେଇ ୨ ଲକ୍ଷ ଟଙ୍କା ଲୁଟି ନେଇଥିବା ମାମଲା ମଧ୍ୟ ସାମ୍ନାକୁ ଆସିଛି। ଏଥିରେ ୩ ଅଭିଯୁକ୍ତଙ୍କୁ ଗିରଫ କରାଯାଇଛି। ଏଥିରେ ଜଣେ ଅଭିଯୁକ୍ତଙ୍କୁ ଉତ୍ତରପ୍ରଦେଶର ଶ୍ୟାମଲିରୁ ଜଣେ, ଦିଲ୍ଲୀରୁ ଜଣେ ଗୁଜୁରାଟରୁ ଗିରଫ କରାଯାଇଛି।
ଆଦାନୀ ଗ୍ରୁପକୁ ବଡ଼ ଝଟକା : ଆମେରିକାର ଲାଞ୍ଚ ଅଭିଯୋଗ ପରେ କେନିଆ ପ୍ରକଳ୍ପ ବାତିଲ୍
ନୂଆଦିଲ୍ଲୀ : ଆଦାନୀ ଗ୍ରୁପକୁ ବଡ଼ ଝଟକା। ଆମେରିକାର ଲାଞ୍ଚ ଅଭିଯୋଗ ପରେ କେନିଆ ପ୍ରକଳ୍ପ ବାତିଲ୍। କେନିଆ ସରକାରଙ୍କ ସହ ଡିଲ୍ ବାତିଲ କଲେ ରାଷ୍ଟ୍ରପତି ରୁଟୋ। ୭୦୦ ନିୟୁତ ଡଲାରର ଚୁକ୍ତି ବାତିଲ୍ ହୋଇଥିବା ଜଣାପଡିଛି। ଶକ୍ତି ଟ୍ରାନ୍ସମିସନ୍ ଲାଇନ୍ ପାଇଁ ହୋଇଥିଲା ଏହି ଚୁକ୍ତି । କଂପାନୀର ମୁଖ୍ୟ ବିମାନବନ୍ଦର ସଂପ୍ରସାରଣ ପାଇଁ ହୋଇଥିଲା ଚୁକ୍ତି। ସୌର ଯୋଜନାରେ ନିଜ କମ୍ପାନୀ ପାଇଁ କଣ୍ଟ୍ରାକ୍ଟ ହାସଲ କରିବାକୁ ନେଇ ଆମେରିକାରରେ ଆଦାନୀ ଓ ତାଙ୍କ ପୁତୁରାଙ୍କ ସହ ଅନ୍ୟ ୭ ଜଣ ଲାଞ୍ଚ ଦେଇଥିବା ଅଭିଯୋଗ ହୋଇଛି । ଆମେରିକାର ସିକ୍ୟୁରିଟି ଆଣ୍ଡ ଏକ୍ସଚେଞ୍ଜ କମିଶନ-ଏସଇସି ପକ୍ଷରୁ ଏହି ଅଭିଯୋଗ ଆସିଛି । ତାଙ୍କ ବିରୋଧରେ ଜାରି ହୋଇଛି ଗିରଫ ଓ୍ୱାରେଣ୍ଟ। କେବଳ ସେ ଏକା ନୁହନ୍ତି ତାଙ୍କ ପୁତୁରା ସାଗର ଆଦାନୀ ବିରୋଧରେ ମଧ୍ୟ ଗିରଫ ଓ୍ୱାରେଣ୍ଟ ଜାରି ହୋଇଛି। ଆମେରିକାର ଏକ କୋର୍ଟ ଏହି ଓ୍ୱାରେଣ୍ଟ ଜାରି କରିଛନ୍ତି । ଏହାକୁ ନେଇ ଦେଶର ରାଜନୀତିରେ ହଇଚଇ ସୃଷ୍ଟି ହୋଇଛି । ଆଦାନୀକୁ ଗତକାଲି ଟାର୍ଗେଟ କରିଥିଲେ କଂଗ୍ରେସ ନେତା ରାହୁଲ ଗାନ୍ଧି। ବିଜେପିକୁ ତୀବ୍ର ଭାବେ ଘେରିବା ପରେ ୨୦୨୦ରୁ ୨୦୨୪ ମଧ୍ୟରେ ଏହି ଲାଞ୍ଚ ଦିଆଯାଇଥିବା ଅଭିଯୋଗରେ ଉଲ୍ଲେଖ କରାଯାଇଛି। କଣ୍ଟ୍ରାକ୍ଟ ଜରିଆରେ ୨୦ ବର୍ଷ ଭିତରେ ଆଦାନୀ ଗୃପକୁ ୨ ନିୟୁତ ଡଲାରର ଲାଭ ହେବ ବୋଲି ଆକଳନ କରାଯାଇଛି । ଲାଞ୍ଚ ଦେବା ଏବଂ ଏହାକୁ ଲୁଚାଇବା ନେଇ ଦୁଇଟି ଅଭିଯୋଗ ଆଣିଛି ଆମେରିକାର ଏସ୍ଇସି। ଏହାକୁ ନେଇ ଆମେରିକାର ଏକ କୋର୍ଟରେ ଶୁଣାଣି ହୋଇଛି। ଏହାପରେ ଉଭୟ ଗୌତମ ଆଦାନୀ ଓ ତାଙ୍କ ପୁତୁରାଙ୍କ ବିରୋଧରେ ଗିରଫ ଓ୍ୱାରେଣ୍ଟ ଜାରି କରାଯାଇଛି। ସେପଟେ ଆଦାନୀ ଗ୍ରୁପକୁ ନେଇ ଆସିଥିବା ଅଭିଯୋଗକୁ ମିଛ ଓ ନିରାଧାର ବୋଲି ଆଦାନୀ କର୍ତ୍ତୃପକ୍ଷ କହିଛନ୍ତି। ପ୍ରେସନୋଟ ଜାରି କରି ଏହି ସୂଚନା ଦେଇଛି ଆଦାନୀ ଗ୍ରୁପ। ପ୍ରେସନୋଟରେ ଆଦାନୀ କର୍ତ୍ତୃପକ୍ଷ ଆମେରିକା ଆଟର୍ଣ୍ଣି କାର୍ଯ୍ୟାଳୟ ପକ୍ଷରୁ ଦିଆଯାଇଥିବା ବୟାନ ବିଷୟରେ ଉଲ୍ଲେଖ କରାଯାଇଛି। ଆସିଥିବା ଅଭିଯୋଗରେ କେବଳ ଆରୋପ ଲଗାଯାଇଛି। ଆଉ ପ୍ରତିପକ୍ଷଙ୍କୁ ଯେପର୍ଯ୍ୟନ୍ତ ଦୋଷୀ ଗ୍ରହଣ କରାଯାଇନି ଯେପର୍ଯ୍ୟନ୍ତ ସେମାନେ ଦୋଷୀ ନୁହନ୍ତି ବୋଲି ଉଲ୍ଲେଖ କରିଛନ୍ତି ଆଟର୍ଣ୍ଣି କାର୍ଯ୍ୟାଳୟ। ଆଦାନୀ ସମୂହ ଏହି ପ୍ରସଙ୍ଗରେ ଆଇନଗତ ପଦକ୍ଷେପ ଗ୍ରହଣ କରିବାକୁ ଯାଉଛି।
ଟ୍ରାନ୍ସଫର୍ମର ଚାର୍ଜ ବେଳେ ଜଳିଗଲା ଗାଁରେ ଥିବା ସମସ୍ତ ଇଲେକ୍ଟ୍ରିକ ଉପକରଣ
ଭୁବନେଶ୍ବର: ଟ୍ରାନ୍ସଫର୍ମର ଚାର୍ଜ ବେଳେ ଅଘଟଣ । ଜଳିଗଲା ଗାଁ ରେ ଥିବା ସମସ୍ତ ଇଲେକ୍ଟ୍ରିକ ଉପକରଣ । ଡବଲ ଭୋଲ୍ଟେଜ ଆସିବାରୁ ସମସ୍ତ ଇଲେକ୍ଟ୍ରୋନିକ ଉପକରଣ ଜଳିଯାଇଛି ।
ରାଜଧାନୀ ଉପକଣ୍ଠ ବାଲିଅନ୍ତା ପାଟଣା ଗାଁରେ ଘଟିଛି ଏଭଳି ଅଘଟଣ । ବିଦ୍ୟୁତ ବିଭାଗର କର୍ମଚାରୀଙ୍କୁ ଅଟକ ରଖିଲେ ଉତ୍ତ୍ୟକ୍ତ ଲୋକେ । ଖବର ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁଝା କରିଛି । ସେପଟେ ବିନା କ୍ଷତିପୂରଣରେ ବିଦ୍ୟୁତ ବିଭାଗ କର୍ମଚାରୀଙ୍କୁ ଛଡ଼ାଯିବ ନାହିଁ ବୋଲି ଜିଦ ଧରିଛନ୍ତି ସ୍ଥାନୀୟ ଲୋକେ ।
ଗନ୍ଧମାର୍ଦ୍ଦନ ପାଦଦେଶରେ ଜମି କିଣା ବିବାଦକୁ ନେଇ ସ୍ପଷ୍ଟିକରଣ ରଖିଲା କମ୍ପାନୀ
ଭୁବନେଶ୍ବର: ଓଡ଼ିଶାର ଗନ୍ଧମାର୍ଦ୍ଦନ ପାଦଦେଶରେ ଜମି କିଣିବା ପ୍ରସଙ୍ଗରେ ମହାନଦୀ ମାଇନ୍ସ ଆଣ୍ଡ ମିନେରାଲ୍ସ ପ୍ରାଇଭେଟ ଲିମିଟେଡର ସ୍ପଷ୍ଟୀକରଣ ଦିଆଯାଇଛି । କମ୍ପାନୀ ପକ୍ଷରୁ କୁହାଯାଇଛି, ବଲାଙ୍ଗୀର ଓ ବରଗଡ଼ ଜିଲ୍ଲାରେ ବନୀକରଣ ଉଦ୍ଦେଶ୍ୟରେ ଓଡ଼ିଶା ସରକାରଙ୍କ ବନ ବିଭାଗକୁ ହସ୍ତାନ୍ତର କରିବା ପାଇଁ ଇଚ୍ଛୁକ ଜମି ମାଲିକଙ୍କଠାରୁ ଘରୋଇ ଜମି ଅଧିଗ୍ରହଣ କରାଯାଇଛି । ଜମି ଅଧିଗ୍ରହଣର ଉଦ୍ଦେଶ୍ୟ ଜମି ମାଲିକମାନଙ୍କ ସହ ବିକ୍ରୟ ଦସ୍ତାବିଜରେ ସ୍ପଷ୍ଟ ଭାବେ ଉଲ୍ଲେଖ କରାଯାଇଛି ।
କମ୍ପାନୀ ପକ୍ଷରୁ ଆଡୁରି କୁହାଯାଇଛି, ଏହି ଜମି ଅଧିଗ୍ରହଣ କୌଣସି ବାଣିଜ୍ୟିକ ଉଦ୍ଦେଶ୍ୟ ପାଇଁ ଉଦ୍ଦିଷ୍ଟ ନୁହେଁ ଏବଂ କ୍ଷତିପୂରଣ ବନୀକରଣ କାରଣରୁ ସ୍ଥାନୀୟ ପରିବେଶକୁ ଏହା ସମୃଦ୍ଧ କରିବ । ଏହି ଜମି ଅଧିଗ୍ରହଣ ପ୍ରକ୍ରିୟା ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟର ବ୍ୟାପକ ମାର୍ଗଦର୍ଶିକା ଅନୁଯାୟୀ ହୋଇଛି । ଯେଉଁଥିରେ ପ୍ରକଳ୍ପ ପ୍ରସ୍ତାବକ ରାଜ୍ୟ କିମ୍ବା ରାଜ୍ୟ ବାହାରେ ଯେକୌଣସି ସ୍ଥାନରେ ଜମି କିଣି ପାରିବେ । ସମ୍ପୃକ୍ତ କର୍ତ୍ତୃପକ୍ଷଙ୍କ ତତ୍ପରତା ପରେ ବଲାଙ୍ଗୀର ଡିଭିଜନର ଜିଲ୍ଲା ବନ ଅଧିକାରୀ ଏଥିପାଇଁ ଅକ୍ଟୋବର ମାସରେ ଉପଯୁକ୍ତ ପ୍ରମାଣପତ୍ର ପ୍ରଦାନ କରିଥିଲେ ।
୨୦୨୨ ମସିହାରେ ଭାରତ ସରକାରଙ୍କ କୋଇଲା ମନ୍ତ୍ରାଳୟ ଓଡ଼ିଶାର ସୁନ୍ଦରଗଡ଼ ଜିଲ୍ଲାରେ ବାଣିଜ୍ୟିକ ଖଣି ଉଦ୍ଦେଶ୍ୟରେ ପ୍ରତିଯୋଗିତାମୂଳକ ନିଲାମ ମାଧ୍ୟମରେ ବିଜାହାନ କୋଇଲା ଖଣିକୁ ମହାନଦୀ ମାଇନ୍ସ ଆଣ୍ଡ ମିନେରାଲ୍ସକୁ ହସ୍ତାନ୍ତର କରିଥଲେ । ଏହି ପ୍ରକଳ୍ପ ଅଞ୍ଚଳରେ ଉଲ୍ଲେଖନୀୟ ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୃଷ୍ଟି କରିବା ସହ ଜିଲ୍ଲା ଓ ରାଜ୍ୟ ପ୍ରଶାସନର ଟିକସ ରାଜସ୍ୱ ବୃଦ୍ଧି କରିବ । ମହାନଦୀ ମାଇନ୍ସ ଆଣ୍ଡ ମିନେରାଲ୍ସ ଏହି ଅଞ୍ଚଳର ଅଭିବୃଦ୍ଧି ଓ ବିକାଶ, ସକାରାତ୍ମକ ପରିବର୍ତ୍ତନ ଓ ସ୍ଥାନୀୟ ତଥା ଅନ୍ୟ ଅଂଶୀଦାରଙ୍କ ଉଜ୍ଜ୍ୱଳ ଭବିଷ୍ୟତ ପାଇଁ ପ୍ରତିଶ୍ରୁତିବଦ୍ଧ ବୋଲି କମ୍ପାନୀ ପକ୍ଷରୁ କୁହାଯାଇଛି ।
ବୈକୁଣ୍ଠଧାମ ଆଶ୍ରମ ଭଙ୍ଗା ଉପରେ ହାଇକୋର୍ଟଙ୍କ ରହିତାଦେଶ, କାଲି ଭଙ୍ଗାଯିବନି ଆଶ୍ରମ
ଭୁବନେଶ୍ବର: ରାଜଧାନୀ ଭୁବନେଶ୍ବରର ଖଣ୍ଡଗିରି ଅଞ୍ଚଳରେ ଥିବା ବିବାଦୀୟ ବୈକୁଣ୍ଠଧାମ ଆଶ୍ରମକୁ ନେଇ ବଡ଼ ଖବର । ଆସନ୍ତାକାଲି ଭଙ୍ଗାଯିବନି ବୈକୁଣ୍ଠଧାମ ଆଶ୍ରମ । ଆଶ୍ରମ ଭଙ୍ଗାଯିବା ଉପରେ ରହିତାଦେଶ ଲଗାଇଲେ ହାଇକୋର୍ଟ । ଆସନ୍ତା ଡିସେମ୍ବର ୧୨ ତାରିଖ ପର୍ଯ୍ୟନ୍ତ ଆଶ୍ରମ ଭଙ୍ଗାଯିବା ଉପରେ ହାଇକୋର୍ଟ ରହିତାଦେଶ ଲଗାଇଛନ୍ତି ।
ଆସନ୍ତାକାଲି ବୈକୁଣ୍ଠଧାମ ଆଶ୍ରମ ଭଙ୍ଗାଯିବା ନେଇ ବିଡିଏ ପକ୍ଷରୁ ଘୋଷଣା କରାଯାଇଥିଲା । ଡାକବାଜି ଯନ୍ତ୍ର ସାହାଯ୍ୟରେ ଆଶ୍ରମ ଖାଲି କରିବାକୁ ପ୍ରଚାର କରାଯାଇଥିଲା । ଏହାସହ ବିଡିଏ ପକ୍ଷରୁ ଆଶ୍ରମ ଭାଙ୍ଗିବାକୁ ପୋଲିସର ସହାୟତା ମଗାଯାଇଥିଲା ।
ସୂଚନାଯୋଗ୍ୟ, ଜଣେ ପିଲାକୁ କୁନି ସାରଥୀ ଭାବେ ବସାଇ ଆଶ୍ରମରେ ତାଙ୍କୁ କଳକୀ ଅବତାର ବୋଲି ଦର୍ଶାଯାଇଥିଲା । ପିଲାର ଗୋଡ଼ରେ ତୁଳସୀ ଦିଆଯିବା ଫଟୋ ଭାଇରାଲ ହେବା ପରେ ଘଟଣା ପଦାକୁ ଆସିଥିଲା । ଯାହାକୁ ନେଇ ବିବାଦୀୟ ସ୍ଥିତି ସୃଷ୍ଟି ହୋଇଥିଲା । ବିଭିନ୍ନ ମହିଳା ସଙ୍ଗଠନ ସହ ସ୍ଥାନୀୟ ଲୋକେ ଏହାକୁ ନେଇ ପ୍ରତିବାଦ କରିବା ସହ ଟ୍ରଷ୍ଟି ଓ କୁନି ସାରଥୀଙ୍କୁ ଗିରଫ କରିବାକୁ ଦାବି କରିଥିଲେ । ଏହାପରେ କୁନି ସାରଥୀ ସମେତ ତାଙ୍କ ପରିବାର ଓ ଟ୍ରଷ୍ଟି ଫେରାର ହୋଇଯାଇଛନ୍ତି ।
ବିବାଦ ଆରମ୍ଭ ପରେ କୁନି ସାରଥୀ ଓ ଆଶ୍ରମକୁ ନେଇ ନୂଆ ନୂଆ ବିବାଦ ପଦାକୁ ଆସିବାରେ ଲାଗିଛି । କୁନି ସାରଥୀ କେଟିଏମ ବାଇକରେ ବୁଲିବା, ଝିଅଙ୍କୁ ବୁଲାଇବାର ଫଟୋ ବି ଭାଇରାଲ ହୋଇଥିଲା ।
ଏପରିକି ଆଶ୍ରମରୁ ମିଳିଥିବା ଏକ ଡାଏରୀରେ ଭଣ୍ଡ ବାବାର ସକାଳରୁ ରାତି ପର୍ଯ୍ୟନ୍ତ କାର୍ଯ୍ୟକ୍ରମ ସମ୍ପର୍କରେ ଉଲ୍ଲେଖ ରହିଛି । ଏଥିରେ ଭଜନ ଲେଖାଯିବା ସହ ସନ୍ତାନ ପ୍ରାପ୍ତି ପାଇଁ ଯଜ୍ଞ କରାଯିବା ନେଇ ମଧ୍ୟ ଉଲ୍ଲେଖ ରହିଛି । ସବୁଠାରୁ ବଡ଼କଥା ହେଲା ଭକ୍ତ ଭାବେ ଆସୁଥିବା ଲୋକଙ୍କୁ କେମିତି ଠକାଯାଉଥିଲା ତାହାର ଗୁମର ରହିଛି ଏହି ଡାଏରୀରେ । ଭଣ୍ଡ ବାବାଙ୍କ ପୂଜା କରିବା ପାଇଁ କେବଳ ୩୫ ହଜାର ଟଙ୍କାର ଫୁଲ ଲାଗୁଥିଲା । ଯାହା ବି କେଉଁ ଫୁଲ, କେତେ ପରିମାଣର ତାହା ଚିଠା ରହିଛି । ଯାହାକୁ ପୂଜା ପାଇଁ ଆସୁଥିବା ଭକ୍ତଙ୍କୁ ଦିଆଯାଇ ଲୁଟାଯାଉଥିଲା ।
ବିବାଦ ଦେଖାଯିବା ପରେ ଆଶ୍ରମଟି ସରକାରୀ ଜାଗାରେ ଅଛି କି ନାହିଁ ଜାଣିବାକୁ ମାପଚୁପ କରାଯାଇଥିଏେ । ବିଡିଏ. ଜିଏ ଓ ତହସିଲ ବିଭାଗର ୮ ଜଣିଆ ଷ୍ଟାଫ ଆଶ୍ରମର ସରଜମିନ ଯାଞ୍ଚ କରିଥିଲେ । ଶେଷରେ ଆଶ୍ରମଟି ସରକାରୀ ଜମିରେ ଥିବା ଜଣାପଡିଥିଲା ।