ପାରଳାଖେମୁଣ୍ଡି: ନିଯୁକ୍ତି ନେଇ କେନ୍ଦ୍ର ସରକାରଙ୍କୁ ଧୋଇଦେଲେ ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ । ପାରାଳାଖେମୁଣ୍ଡି ପ୍ରଚାର ସଭାରେ ଡବଲ ଇଞ୍ଜିନ ସରକାରକୁ ଟାର୍ଗେଟ କରିଛନ୍ତି ପାଣ୍ଡିଆନ। ସେ କହିଛନ୍ତି, ଗୁଡ଼ାଏ ରାଜ୍ଯରେ ଡବଲ ଇଞ୍ଜିନ ଚାଲୁଛି, ଆଉ ବନ୍ଦ ହେଉଛି। ହେଲେ ଓଡ଼ିଶାରେ ୨୪ ବର୍ଷ ହେଲା ନବୀନ ଇଞ୍ଜିନ ଚାଲୁଛି, ଆଗକୁ ବି ଲୋକଙ୍କ ଆଶୀର୍ବାଦରେ ଚାଲିବ। ଡବଲ ଇଞ୍ଜିନ ସରକାର ବର୍ଷକୁ ୨ କୋଟି ଚାକିରି ଦେବାକୁ ପ୍ରତିଶୃତି ଦେଇଥିଲା। ୧୦ ବର୍ଷରେ ୨୦ କୋଟି ରୋଜଗାର ଦେବାକୁ କଥା ଦେଇଥିଲା । ସେହି ଅନୁସାରେ ଓଡ଼ିଶାର ଭାଗ ହେଉଛି ୮୦ ଲକ୍ଷ ରୋଜଗାର। ଓଡ଼ିଶାର ତିନିଟି ପରିବାର ମଧ୍ଯରୁ ଜଣଙ୍କ ପରିବାରକୁ ଡବଲ ଇଞ୍ଜିନ ସରକାର ରୋଜଗାର ଦେବା କଥା । ହେଲେ ତାହା ହେଲାନି। ଡବଲ ଇଞ୍ଜିନ ସରକାରର ଜଣେ କେନ୍ଦ୍ରମନ୍ତ୍ରୀ ରୋଜଗାର ଦେବାରେ ରାଜ୍ଯ ସରକାର ବିଫଳ ହୋଇଥିବା କହିଛନ୍ତି । ନାଁ ନନେଇ ଧର୍ମେନ୍ଦ୍ରଙ୍କୁ ଜବାବ ଦେଇ ପାଣ୍ଡିଆନ କହିଛନ୍ତି, ଓଡ଼ିଶାରେ ୮୦ ଲକ୍ଷ ଚାକିରି କୁଆଡ଼େ ଗଲା ? ୮୦ ଲକ୍ଷ ଛାଡନ୍ତୁ ୮୦ ହଜାର ଚାକିରି ଦେଇଛ କି ବୋଲି ପ୍ରଶ୍ନ କରିଛନ୍ତି ପାଣ୍ଡିଆନ। କେନ୍ଦ୍ରର ତଥ୍ଯ ଅନୁସାରେ ଓଡ଼ିଶାରେ ବେକାରୀ ହାର ସବୁଠୁ କମ । ବିଜେପି ଶାସିତ ରାଜ୍ଯରେ ବେକାରୀ ସଂଖ୍ଯା ଅଧିକ। ଏଣୁ କେନ୍ଦ୍ରମନ୍ତ୍ରୀ ନବୀନ ଓଡ଼ିଶାର ବିକାଶ ଜାଣନ୍ତୁ ବୋଲି ପାଣ୍ଡିଆନ କହିଛନ୍ତି ।
ଖରାରେ ୧୬ ନମ୍ବର ଜାତୀୟ ରାଜପଥ ରସୁଲପୁର ଅଞ୍ଚଳରେ ଜମୁଛି ତରଭୂଜ ବେପାର
ଯାଜପୁର: ବୈଶାଖ ମାସରେ ପ୍ରଚଣ୍ଡ ରୌଦ୍ରତାପ। ଭୀଷଣ ଗୁଳୁଗୁଳିରେ ଅସ୍ତବ୍ଯସ୍ତ ଜନଜୀବନ। ଗରମରୁ ତ୍ରାହି ପାଇବା ପାଇଁ ସମସ୍ତେ ଖୋଜିଥାନ୍ତି ଥଣ୍ଡା ପାନୀୟ। ମାତ୍ର ଯାଜପୁର ଜିଲ୍ଲା ୧୬ ନମ୍ବର ଜାତୀୟ ରାଜପଥରେ ଲୋକଙ୍କ ପ୍ରଥମ ପସନ୍ଦ ପାଲଟିଛି ଲାଲ ଡହ ଡହ ତରଭୁଜ। କିଏ ତରଭୁଜ ଖଣ୍ଡେ ଖାଇ ତୃଷ୍ଣା ମେଣ୍ଟାଉଛି ତ କିଏ ପୁଣି ତରଭୁଜ କିଣି ଘରକୁ ନେଇଯାଉଛି।
ଜାରି ରହିଛି ଗ୍ରୀଷ୍ମ ପ୍ରବାହ। ଡହଡହ ଖରା ସାଙ୍ଗକୁ ଗୁଳୁଗୁଳିରେ କଲବଲ ହେଉଛନ୍ତି ଲୋକ। ଗରମରୁ ତ୍ରାହି ଦେଉଛି ଲାଲ ଡହ ଡହ ତରଭୁଜ। ଯାଜପୁର ଜିଲ୍ଲା ୧୬ ନମ୍ବର ଜାତୀୟ ରାଜପଥ ରସୁଲପୁର ଅଞ୍ଚଳର। ୧୫ରୁ ଅଧିକ ତରଭୁଜ ଗାଦିର ଲାଗିଛି ପସରା । ଲୋକଙ୍କୁ ଟାଣୁଛି ତରଭୁଜ । ବଜାରରେ ମିଳୁଥିବା କେମିକାଲ ଯୁକ୍ତ କୋଲଡ୍ରିଙ୍ଗସ ଆଇସକ୍ରିମ ବଦଳରେ ଲୋକଙ୍କ ପ୍ରଥମ ପସନ୍ଦ ପାଲଟିଛି ତରଭୁଜ। ଚଳିତ ବର୍ଷ ଖରାର ପ୍ରକୋପ ଅଧିକ ଥିବାରୁ ତରଭୁଜର ଭଲ ବ୍ଯବସାୟ ମଧ୍ଯ ହେଉଛି ।
ରସୁଲପୁର ବ୍ଲକର କୁଆଖିଆ ଓ ବାରବାଟୀ ଅଞ୍ଚଳରେ ତରଭୂଜ ଚାଷ ବ୍ୟାପକ ଭାବେ କରାଯାଇଥାଏ। ଏଠାରୁ ତରଭୂଜ ରାଜ୍ୟ ଓ ରାଜ୍ୟ ବାହାରକୁ ହେଉଛି ଚାଲାଣ। ସ୍ଥାନୀୟ ଲୋକ ବର୍ଷ ତମାମ ଏଠାରେ ତରଭୁଜ ଚାଷ କରି ଗୁଜୁରାଣ ମେଣ୍ଟାଇଥାନ୍ତି ଏବଂ ତରଭୁଜ ବ୍ଯବସାୟ କରି ବେଶ ଦୁଇ ପଇସା ରୋଜଗାର କରିଥାନ୍ତି । ତେବେ ସମୟକ୍ରମେ ଏହି ଅଞ୍ଚଳ ଆଜି ତରଭୂଜ ବ୍ୟବସାୟର ପେଣ୍ଠସ୍ଥଳୀ ପାଲଟି ଯାଇଛି। ଚଳିତବର୍ଷ ତରଭୂଜର ଦର ଗ୍ରାହକଙ୍କୁ ସୁହାଇଲା ପରି ରହିଛି। ତେଣୁ ଏହି ଗ୍ରୀଷ୍ମରେ ଭଲ ବ୍ୟବସାୟ ହେବାନେଇ ଆଶା ରଖିଛନ୍ତି ତରଭୁଜ ବ୍ୟବସାୟୀ।
ଯଶୀପୁର ବିଧାନସଭା ନିର୍ବାଚନ ମଣ୍ଡଳୀରେ ବିଗ୍ ଫାଇଟ୍
ନନ୍ଦିଘୋଷ ବ୍ୟୁରୋ: ସଭା ସମିତି ଓ ଶୋଭାଯାତ୍ରାରେ କମ୍ପୁଛି ମଇଦାନ। ମୟୂରଭଞ୍ଜ ଜିଲ୍ଲା ଯଶୀପୁର ବିଧାନସଭା ନିର୍ବାଚନମଣ୍ଡଳୀରେ ବଢ଼ିବାରେ ଲାଗିଛି ରାଜନୈତିକ ଉଷ୍ମତା । କାହାର ହେବ ଯଶୀପୁର ଆସନ ? କାହାକୁ ବାଛିବେ ଜନତା ? ତାହା ଦେଖିବାକୁ ବାକି ରହିଲା ।
ନିର୍ବାଚନ ମହାପର୍ବ ପାଇଁ ସରଗରମ ଯଶୀପୁର ନିର୍ବାଚନ ମଣ୍ଡଳୀ । ଯଶୀପୁର ନିର୍ବାଚନମଣ୍ଡଳୀରେ ଅଛି ୪ଟି ବ୍ଲକ- ଶୁକୃଳି, ରରୁଆଁ, ଯଶୀପୁର ଏବଂ କୁସୁମୀ । ଚାରିଟି ବ୍ଲକରେ ରହିଛି ୫୨ଟି ପଞ୍ଚାୟତ । ଯଶୀପୁରରେ ୨ ଲକ୍ଷ ୧୭ ହଜାର ୯୧ ଭୋଟରଙ୍କ ମଧ୍ଯରେ ପୁରୁଷ ୧ ଲକ୍ଷ ୮ ହଜାର ୬୫, ମହିଳା ୧ ଲକ୍ଷ ୯ ହଜାର ୨୬ ଏବଂ ତୃତୀୟ ଲିଙ୍ଗୀ ୪ ଜଣ ଅଛନ୍ତି । ଏଠାରେ ହେଉଛି ତ୍ରିମୁଖୀ ଲଢ଼େଇ । ବିଜେଡିରୁ ମଇଦାନକୁ ଓହ୍ଲାଇଛନ୍ତି ଚକ୍ରଧର ହେମ୍ବ୍ରମ, ବିଜେପିରୁ ଗଣେଶରାମ ସିଂ ଖୁଣ୍ଟିଆ ଓ କଂଗ୍ରେସରୁ ଶ୍ଵେତା ଚାତାର । ତିନି ଦଳ ପକ୍ଷରୁ ଜୋରଦାର ଚାଲିଛି ନିର୍ବାଚନୀ ପ୍ରଚାର ।
୨୦୦୦ ମସିହା ନିର୍ବାଚନରେ ଯଶୀପୁରରେ ବିଜେପି ପ୍ରାର୍ଥୀ ଭାନୁ ଚରଣ ନାଏକ ୨୧ ହଜାର ୯୩୮ ଭୋଟ ପାଇ ଜିତିଥିଲେ । ୨୦୦୪ ନିର୍ବାଚନରେ ଏସୟୁସିଆଇର ଶଂଭୁନାଥ ନାଏକ ୨୨ ହଜାର ୮୯୩ ଭୋଟ ପାଇ ବିଜୟୀ ହୋଇଥିଲେ । ବିଜେପିର ମଙ୍ଗଳ ସିଂ ମୁଦିଙ୍କୁ ୧୭ ହଜାର ୫୨୯ ଓ କଂଗ୍ରେସର ରାଉତୁ ହେଂଶାଙ୍କୁ ୧୪ ହଜାର ୮୯୩ ଭୋଟ ମିଳିଥିଲା । ୨୦୦୯ରେ ବିଜେଡିରୁ କମଳାକାନ୍ତ ନାୟକ ୩୫ ହଜାର ୫୬୯ ଭୋଟ ପାଇ ବିଜେତା ହୋଇଥିଲେ।ଏସୟୁସିଆଇ ପ୍ରାର୍ଥୀ ଶଂଭୁନାଥ ନାଏକଙ୍କୁ ୨୨ ହଜାର ୩୭୯ ଓ ବିଜେପିର ସୁଧୀର ନାଏକଙ୍କୁ ୧୬ ହଜାର ୯୭୪ ଭୋଟ ମିଳିଥିଲା ।
୨୦୧୪ରେ ବିଜେଡିରୁ ଟିକେଟ ପାଇ ମଙ୍ଗଲ ସିଂ ମୁଦି ୩୪ ହଜାର ୪୪୦ ଭୋଟ ପାଇ ବିଜେତା ହୋଇଥିଲେ । ଏସୟୁସିଆଇ ପ୍ରାର୍ଥୀ ଶଂଭୁନାଥ ନାଏକ ୩୩ ହଜାର ୬୪୬ ଓ କଂଗ୍ରେସର ମିନତି ନାଏକ ୯ ହଜାର ୫୧୮ ଭୋଟ ପାଇଥିଲେ । ୨୦୧୯ରେ ବିଜେପିର ଗଣେଶ ରାମ ସିଂ ଖୁଣ୍ଟିଆ ୫୮ ହଜାର ୭୦୮ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ । ତେବେ ଚଳିତ ନିର୍ବାଚନରେ କାହା ମୁଣ୍ଡରେ ହାତୀ ସୁନା କଳସ ଢାଳିବ ତାହା ଦେଖିବାକୁ ବାକି ରହିଲା ।
ରାଜ୍ଯ ସରକାରଙ୍କ ପ୍ରଚେଷ୍ଟାରେ ଯଶୀପୁରରେ ଅନେକ ବିକାଶମୂଳକ କାର୍ଯ୍ଯ ହୋଇଛି । ଶିକ୍ଷାଠାରୁ ଆରମ୍ଭ କରି ସ୍ଵାସ୍ଥ୍ଯ , ଗମନାଗମନ, କ୍ଷେତ୍ରରେ ହୋଇଛି ରୂପାନ୍ତର । ଏବେ ଦେଖିବାକୁ ବାକି ରହିଲା କାହାର ହେଉଛି ଜିତାପଟ।
ପଟ୍ଟାଙ୍ଗୀରେ କାହାକୁ ବାଛିବେ ଜନତା?
ନନ୍ଦିଘୋଷ ବ୍ୟୁରୋ: ବେଶ୍ ଚର୍ଚ୍ଚିତ ପଟ୍ଟାଙ୍ଗୀ ବିଧାନସଭା ନିର୍ବାଚନମଣ୍ଡଳୀ । ଏହି ଆସନ ଅନୁସୂଚିତ ଜନଜାତି ପାଇଁ ସଂରକ୍ଷିତ ରହିଛି। ଚଳିତ ନିର୍ବାଚନରେ ଏଠାରେ ହେଉଛି ତ୍ରିମୁଖୀ ଲଢ଼େଇ। ତେବେ କାହାର ହେବ ପଟ୍ଟାଙ୍ଗୀ ଆସନ ? କାହାକୁ ବାଛିବେ ଜନତା? ତାକୁ ନେଇ ଚାଲିଛି ଅଙ୍କକଷା।
ପଟ୍ଟାଙ୍ଗୀ ବିଧାନସଭା ନିର୍ବାଚନମଣ୍ଡଳୀରେ ବଢ଼ିବାରେ ଲାଗିଛି ରାଜନୈତିକ ଉଷ୍ମତା। ଏହି ନିର୍ବାଚନମଣ୍ଡଳୀ ସେମିଳିଗୁଡ଼, ପଟ୍ଟାଙ୍ଗୀ ଓ ନନ୍ଦପୁର ବ୍ଲକକୁ ନେଇ ଗଠିତ। ଏଠାରେ ଅଛନ୍ତି ୧ ଲକ୍ଷ ୮୭ ହଜାର ୧୫୧ ଭୋଟର । ପୁରୁଷ ଭୋଟର ୯୦ ହଜାର ୬୦୬, ମହିଳା ୯୬ ହଜାର ୫୩୮ ଏବଂ ଅନ୍ଯାନ୍ଯ ଭୋଟର ୭ ଜଣ । ପଟ୍ଟାଙ୍ଗୀରେ ବିଜେଡିରୁ ପ୍ରାର୍ଥୀ ହୋଇଛନ୍ତି ପୂର୍ବତନ ବିଧାୟକ ପ୍ରଫୁଲ୍ଲ ପାଙ୍ଗୀ, ବିଜେପିରୁ ଚୈତନ୍ଯ ନନ୍ଦିବାଲି ଓ କଂଗ୍ରେସରୁ ରାମଚନ୍ଦ୍ର କାଡ଼ାମ । ସବୁ ପ୍ରାର୍ଥୀ ଜୋରଦାର ପ୍ରଚାର ଚଳାଇଛନ୍ତି।
ଆଦିବାସୀଙ୍କ ପାଇଁ ସଂରକ୍ଷିତ ପଟ୍ଟାଙ୍ଗୀ ନିର୍ବାଚନ ମଣ୍ଡଳୀରେ ୨୦୦୦ ମସିହାରୁ ୨୦୧୯ ମଧ୍ଯରେ ଅନୁଷ୍ଠିତ ୫ଟି ନିର୍ବାଚନରୁ ୪ ଥର ବିଜେଡି ବିଜୟ ଲାଭ କରିଛି । ୨୦୧୪ ନିର୍ବାଚନରେ ବିଜେଡି ପ୍ରାର୍ଥୀ ପ୍ରଫୁଲ୍ଲ ପାଙ୍ଗୀ ୧୦ ହଜାର ୬୬୪ ଭୋଟ ବ୍ୟବଧାନରେ କଂଗ୍ରେସର ରାମଚନ୍ଦ୍ର କାଡ଼ାମଙ୍କୁ ପରାଜିତ କରିଥିଲେ । ୨୦୧୯ ନିର୍ବାଚନରେ ବିଜେଡି ପ୍ରାର୍ଥୀ ପୀତମ ପାଢ଼ୀ ବିଜେତା ହୋଇଥିଲେ । ୪ ହଜାର ୨୫୫ ଖଣ୍ଡ ଭୋଟ ବ୍ଯବଧାନରେ ଜିତିଥିଲେ ପୀତମ । କଂଗ୍ରେସର ରାମଚନ୍ଦ୍ର କାଡ଼ାମ ହାରିଥିଲେ। ଚଳିତ ନିର୍ବାଚନରେ ବିକାଶ ହିଁ ପ୍ରମୁଖ ପ୍ରସଙ୍ଗ ହୋଇଛି ।
ପଟ୍ଟାଙ୍ଗୀ ନିର୍ବାଚନମଣ୍ଡଳୀରେ ରାଜ୍ଯ ସରକାରଙ୍କ ପକ୍ଷରୁ ଅନେକ ବିକାଶମୂଳକ କାର୍ଯ୍ଯ ହୋଇଛି । ଶିକ୍ଷା, ସ୍ଵାସ୍ଥ୍ଯ , ଗମନାଗମନଠାରୁ ଆରମ୍ଭ କରି ବିଭିନ୍ନ କ୍ଷେତ୍ରରେ ହୋଇଛି ରୂପାନ୍ତରଣ । ଏହାକୁ ଭୋଟର ଗୁରୁତ୍ବ ଦେଉଛନ୍ତି ।
ଚୋର ପ୍ରାର୍ଥୀଙ୍କୁ ଭୋଟ ଦିଅନ୍ତୁ ନାହିଁ : ନବୀନ ପଟ୍ଟନାୟକ
ପାରଳାଖେମୁଣ୍ଡି: ଭଲ ପ୍ରାର୍ଥୀଙ୍କୁ ଭୋଟ ଦିଅନ୍ତୁ। ଚୋର ପ୍ରାର୍ଥୀଙ୍କୁ ଭୋଟ ଦିଅନ୍ତୁ ନାହିଁ। ବିଜେଡିର ବିଧାୟକ ଓ ସାଂସଦ ପ୍ରାର୍ଥୀଙ୍କୁ ଶଙ୍ଖ ଚିହ୍ନରେ ଭୋଟ ଦେବା ଲାଗି ଆହ୍ବାନ ଦେଇଛନ୍ତି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ। ପାରଳାଖେମୁଣ୍ଡିରେ ଭରପୂର ନିର୍ବାଚନୀ ସଭାରେ ଯୋଗଦେଇ ମୁଖ୍ଯମନ୍ତ୍ରୀ କହିଛନ୍ତି- ରାଜ୍ଯବାସୀଙ୍କ ଲାଗି ବିଏସକେୱାଇ, ମମତା ଯୋଜନା, ଲକ୍ଷ୍ମୀ ବସ୍ ଯୋଜନା, ମଧୁବାବୁ ପେନସନ ଯୋଜନା, ଚାଷୀଙ୍କ ପାଇଁ କାଳିଆ ଯୋଜନା, ମହିଳାଙ୍କ ପାଇଁ ମିଶନ ଶକ୍ତି, ଶ୍ରୀମନ୍ଦିର ପରିକ୍ରମା ପ୍ରକଳ୍ପ, ସ୍କଲାରସିପ୍ ଯୋଜନା ଆଦି କାର୍ଯ୍ୟକାରୀ କରାଯାଇଛି। ଅଧିକ ବିକାଶ ଲାଗି ଶଙ୍ଖ ଚିହ୍ନକୁ ଭୋଟ ଦିଅନ୍ତୁ। ଏହା ସହ ମୁଖ୍ଯମନ୍ତ୍ରୀ ପାରଳା ମହାରାଜାଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହ ଭଲ ପ୍ରାର୍ଥୀଙ୍କୁ ଜିତାଇବା ଲାଗି ଭୋଟରଙ୍କୁ ଆହ୍ବାନ ଦେଇଥିଲେ ।
ଧର୍ମେନ୍ଦ୍ର ପ୍ରଧାନଙ୍କୁ କାର୍ତ୍ତିକ ପାଣ୍ଡିଆନଙ୍କ ଖୋଲା ଚ୍ୟାଲେଞ୍ଜ, ଦମ ଅଛି ତ ମୁଖ୍ୟମନ୍ତ୍ରୀ ପ୍ରାର୍ଥୀ କରୁ ବିଜେପି
ନନ୍ଦିଘୋଷ ବ୍ୟୁରୋ: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନଙ୍କ ଖୋଲା ଚ୍ୟାଲେଞ୍ଜ। ଦମ ଅଛି ତ ଧର୍ମେନ୍ଦ୍ରଙ୍କୁ ମୁଖ୍ଯମନ୍ତ୍ରୀ ପ୍ରାର୍ଥୀ ଘୋଷଣା କରୁ ବିଜେପି। ଧର୍ମେନ୍ଦ୍ର ମୁଖ୍ଯମନ୍ତ୍ରୀ ପ୍ରାର୍ଥୀ ହେଲେ ବିଜେପି ଓଡ଼ିଶାରେ ୧୦ ପ୍ରତିଶତ ଆସନ ବି ଜିତିବନି। ପାରାଳାଖେମୁଣ୍ଡିରେ ନବୀନଙ୍କ ପ୍ରଚାର ସଭାରେ ଧର୍ମେନ୍ଦ୍ରଙ୍କ ନାଁ ନନେଇ ଆହ୍ବାନ ଦେବା ସହ କଡ଼ା ସମାଲୋଚନା କରିଛନ୍ତି କାର୍ତ୍ତିକ ପାଣ୍ଡିଆନ। ପାଣ୍ଡିଆନ କହିଛନ୍ତି, ବିକାଶର ଯେତେ ଭାଷା କହିଲେ ବି କେନ୍ଦ୍ରମନ୍ତ୍ରୀ ବୁଝିପାରୁନାହାନ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ, ଲକ୍ଷ୍ମୀ, ବିଏସକେୱାଇ କଥା ବୁଝିପାରୁନାହାନ୍ତି। ୧୦ ବର୍ଷ ହେଲା ମୁଖ୍ଯମନ୍ତ୍ରୀ ହେବାକୁ ସ୍ବପ୍ନ ଦେଖୁଛ । ହେଲେ ବିଜେପି ଧର୍ମେନ୍ଦ୍ରଙ୍କୁ ମୁଖ୍ଯମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରୁନି। ଆଗ ନିଜ ଦଳର ବିଶ୍ବାସ ଜିତନ୍ତୁ ତାପରେ ନବୀନଙ୍କ ଆଗରେ ଠିଆ ହୋଇ ପ୍ରଶ୍ନ ପଚାରିବାକୁ ତମର ଯୋଗ୍ଯତା ହେବ ବୋଲି କହି ଧର୍ମେନ୍ଦ୍ରଙ୍କୁ ତେରଛା ବାଣ ମାରିଛନ୍ତି ପାଣ୍ଡିଆନ। ପାଣ୍ଡିଆନ ଆହୁରି କହିଛନ୍ତି, ଭାରତୀୟ ଜନତା ପାର୍ଟି ଧର୍ମେନ୍ଦ୍ରଙ୍କୁ ମୁଖ୍ଯମନ୍ତ୍ରୀ ପ୍ରାର୍ଥୀ କଲେ ବିଜେପି ଓଡ଼ିଶାରେ ୧୦ ପ୍ରତିଶତ ଆସନ ବି ପାଇବେନି। ଦମ ଥିଲେ ଧର୍ମେନ୍ଦ୍ରଙ୍କୁ ବିଜେପି ମୁଖ୍ଯମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରୁ ବୋଲି ଚ୍ଯାଲେଞ୍ଜ ଦେଇଛନ୍ତି ପାଣ୍ଡିଆନ।
ଆତ୍ମହତ୍ୟା ନୁହେଁ ଗଳାଚିପି କରାଯାଇଛି ହତ୍ୟା
ନନ୍ଦିଘୋଷ ବ୍ୟୁରୋ: ଆସିଲା ଭଜପୁରୀ ଅଭିନେତ୍ରୀ ଅମୃତା ପାଣ୍ଡେଙ୍କ ପୋଷ୍ଟମର୍ଟମ ରିପୋର୍ଟ । ତାଙ୍କ ଗଳା ଚିପି ହତ୍ୟା କରାଯାଇଥିବା ରିପୋର୍ଟରେ ପ୍ରକାଶ ପାଇଛି । ତେବେ କିଏ ଏବଂ କାହିଁକି ହତ୍ୟା କରିଛି ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି । କହି ରଖୁଛୁ କି, ଗତ ୨୭ ତାରିଖରେ ଭାଗଲପୁର ଅଞ୍ଚଳର ଏକ ଆପାର୍ଟମେଣ୍ଟରୁ ତାଙ୍କ ମୃତଦେହ ସନ୍ଦେହଜନକ ଭାବରେ ଉଦ୍ଧାର କରାଯାଇଥିଲା । ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଥିବାବେଳେ ଅମୃତାଙ୍କ ପରିବାର ଲୋକେ କହିଛନ୍ତି କି, ସେ ପୂର୍ବରୁ ଦୁଇ ଦୁଇଥର ଆତ୍ମହତ୍ୟା ଉଦ୍ୟମ କରିଥିଲେ ।
ବରଗଡ଼ ବିଜେପି ବିଧାନସଭା ପ୍ରାର୍ଥୀ ଅଶ୍ଵିନୀ ଷଡ଼ଙ୍ଗୀ ନାମାଙ୍କନ ସତ୍ୟପାଠରେ ତଥ୍ୟ ଲୁଚାଇଥିବା ଅଭିଯୋଗ ଆଣିଲେ କଂଗ୍ରେସ ବିଧାନସଭା ପ୍ରାର୍ଥୀ ନିପନ ଦାସ
ନନ୍ଦିଘୋଷ ବ୍ୟୁରୋ: ବରଗଡ଼ ବିଧାନସଭା ବିଜେପି ପ୍ରାର୍ଥୀଙ୍କ ନାଁରେ ନାମାଙ୍କନବେଳେ ତଥ୍ୟ ଲୁଚାଇବା ଭଳି ସଂଗୀନ ଅଭିଯୋଗ। ବିଜେପି ପ୍ରାର୍ଥୀ ଅଶ୍ଵିନୀ ଷଡ଼ଙ୍ଗୀଙ୍କ ନାଁରେ ନାମାଙ୍କନରେ ତଥ୍ୟ ଲୁଚାଇବା ଭଳି ଗୁରୁତର ଅଭିଯୋଗ କରିଛନ୍ତି କଂଗ୍ରେସ ବିଧାନସଭା ପ୍ରାର୍ଥୀ ନିପନ ଦାସ।ବରଗଡ଼ ବିଧାନସଭା ଆସନ ପାଇଁ ନାମାଙ୍କନ ଦାଖଲ ପ୍ରକ୍ରିୟା ଶେଷ ହୋଇଯାଇଥିବା ବେଳେ ବିଜେପି ବିଧାୟକ ପ୍ରାର୍ଥୀ ଅଶ୍ଵିନୀ ପ୍ରାର୍ଥିପତ୍ର ଦାଖଲ ସମୟରେ ରିଟର୍ଣ୍ଣିଂ ଅଫିସରଙ୍କ ନିକଟରେ ମିଥ୍ୟା ସତ୍ୟପାଠ ଦାଖଲ କରିଥିବା ଅଭିଯୋଗ କରିଛନ୍ତି। ଅଶ୍ଵିନୀ ଷଡଙ୍ଗୀଙ୍କ ନାଁରେ 41 A CRPC ଧାରାରେ ମାମଲା ଥିବାବେଳେ ସେ ଜାମିନରେ ରହିଛନ୍ତି। ତେବେ ଏହି ତଥ୍ୟ ସେ ସତ୍ୟପାଠରେ ଲୁଚାଇଥିବା ଅଭିଯୋଗ କରିଛନ୍ତି କଂଗ୍ରେସ ପ୍ରାର୍ଥୀ ନିପନ ଦାସ। ସତ୍ୟପାଠରେ ତଥ୍ୟ ଲୁଚାଇଥିବାରୁ ଏହା ନିର୍ବାଚନ ନିୟମର ଉଲ୍ଲଂଘନ ବୋଲି ନିପନ କହିଛନ୍ତି। ତଥ୍ୟ ପ୍ରଦାନ କରିନଥିବାରୁ ଏହା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ରିଟର୍ଣ୍ଣିଂ ଅଫିସରଙ୍କ ଠାରେ ଦାବି କରିଛନ୍ତି। ଗତ ୩୦ ତାରିଖରେ ଅଶ୍ଵିନୀ ଷଡ଼ଙ୍ଗୀ ଉପଜିଲ୍ଲାପାଳଙ୍କ କାର୍ଯ୍ୟାଳୟଙ୍କରେ ନାମାଙ୍କନ ଦାଖଲ କରିଥିଲେ। ୨୦୨୧ରେ ଏକ ଅପରାଧିକ ମାମଲା ବିଜେପି ପ୍ରାର୍ଥୀଙ୍କ ନାମରେ ରହିଥିବାବେଳେ କାହିଁକି ସେ ଏହାକୁ ସତ୍ୟପାଠରେ ଉଲ୍ଲେଖ କରିନାହାନ୍ତି ବୋଲି ଅଭିଯୋଗ କରିଛନ୍ତି କଂଗ୍ରେସ ପ୍ରାର୍ଥୀ ନିପନ ଦାସ।
କ୍ରିକେଟରେ ଧୋନୀଙ୍କ ମୋ ବାପାଙ୍କ ଭଳି, ଜାଣନ୍ତୁ କାହିଁକି ଏମିତି କହିଲା ପଥିରାନା
ନନ୍ଦିଘୋଷ ବ୍ୟୁରୋ: ଶ୍ରୀଲଙ୍କାର ଯୁବ ବୋଲର ପଥିରାନା ଚଳିତ ଆଇପିଏଲ ସିଜିନରେ ନିଜର ପ୍ରାଧାନ୍ୟ ବିସ୍ତାର ଜାରି ରଖିଛନ୍ତି । ସେ ପର୍ପଲ କ୍ୟାପ ଦୌଡରେ ମଧ୍ୟ ରହିଛନ୍ତି । ତେବେ ଏହି ସିଂହଳି ବୋଲର ନିଜର ସୋସିଆଲ ମିଡିଆରେ ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ନିଜର ପିତା ବୋଲି ସମ୍ବୋଧନ କରିଛନ୍ତି । ସେ କହିଛନ୍ତି କି, ଅନେକ ସମୟରେ ବହୁ ନିଷ୍ପତ୍ତି ମଧ୍ୟ ମଇଦାନରେ ତାଙ୍କୁ ପଚାରି ନେଇଥାଏ । ସେ ମୋତେ ବହୁ ଉପଦେଶ ମଧ୍ୟ ଦିଅନ୍ତି । ଯାହାକି ମୋ କ୍ୟାରିୟର ଉପରେ ବହୁ ପ୍ରଭାବ ପକାଇଛି ।
କହି ରଖୁଛୁ କି, ଅଣ୍ଡର ୧୯ ଦଳରେ ଦମଦାର ପ୍ରଦର୍ଶନ କରିବା ପରେ ପଥିରାନାଙ୍କୁ ଶ୍ରୀଲଙ୍କା ଆନ୍ତର୍ଜାତୀୟ ଦଳରେ ସାମିଲ କରାଯାଇଥିଲା । ଏହାପରେ ପୁଣିଥରେ ସେ ଆଇପିଏଲ ଖେଳିବାର ସୁଯୋଗ ପାଇଥିଲେ । ତାଙ୍କ ବୋଲିଂ ଷ୍ଟାଇଲ ପାଇଁ ବେବି ମଲିଙ୍ଗାଭାବେ ପରିଚିତ ଥିଲେ । ଚଳିତ ଆଇପିଏଲରେ ସେ ୬ ମ୍ୟାଚରେ ୧୩ ଓ୍ବିକେଟ ଅକ୍ତିଆର କରିଛନ୍ତି । ୨୦୨୨ରୁ ସେ ଚେନ୍ନାଇ ସୁପରକିଙ୍ଗ୍ସ ଦଳରେ ଖେଳୁଛନ୍ତି ।
“In my Cricket life, Dhoni is like my Father.”
🥹💛– Matheesha Pathirana 🎙️ pic.twitter.com/wvrLborwP2
— 🜲 (@balltamperrer) May 3, 2024
ତାତିରୁ ମିଳିବ ତ୍ରାହି, କମିବ ଦିନ ତାପମାତ୍ରା
ଭୁବନେଶ୍ବର: ତାତିରୁ ମିଳିବ ଆଶ୍ୱସ୍ତି। ବଦଳିବ ପାଣିପାଗ । ୨ ଦିନ ପରେ ତାତି କମିବା ସହିତ ଦିନ ତାପମାତ୍ରା ବି ୩ ରୁ ୫ ଡିଗ୍ରୀ କମିବ ବୋଲି ସୂଚନା ଦେଲା ପାଣିପାଗ କେନ୍ଦ୍ର। ଆଗାମୀ ୫ ଦିନ ଧରି ରାଜ୍ୟର ବିଭିନ୍ନ ସ୍ଥାନରେ ବର୍ଷା ହେବ। ରାଜ୍ୟର ବିଭିନ୍ନ ଜିଲ୍ଲାରେ ବିଜୁଳି ଘଡଘଡି ସହ ବର୍ଷା ହେବାର ସମ୍ଭାବନା ରହିଛି। ୭ ତାରିଖ ପରେ ବର୍ଷା ବଢିବାର ସମ୍ଭାବନା ଅଛି । କିଛି କିଛି ଜାଗାରେ ପ୍ରବଳ ବର୍ଷା ବି ହୋଇପାରେ। ଆଗାମୀ ୫ ଦିନ ଭିତରେ ରାଜ୍ୟରେ ଝଡ଼ ତୋଫାନ ସହିତ ବର୍ଷା ହେବ ବୋଲି କହିଛି କେନ୍ଦ୍ର। ସେପଟେ ହଟାତ ତାପମାତ୍ରା କମିବାର କାରଣ ହେଉଛି ଉତ୍ତର ପଶ୍ଚିମ ଦିଗରୁ ରାଜ୍ୟରେ ପ୍ରବେଶ ହେଉଥିବା ବାୟୁ ଧୀରେ ଧୀରେ ଦୁର୍ବଳ ହେଉଛି। ଏବଂ ବଙ୍ଗୋପସାଗରରୁ ଆସୁଥିବା ପବନ ଧୀରେ ଧୀରେ ସବଲ ହେଉଛି। ଯାହା କାରଣରୁ ରାଜ୍ୟରେ ବିଭିନ୍ନ ସ୍ଥାନରେ ବର୍ଷା ହେବାର ସମ୍ଭାବନା ରହିଛି। ବର୍ଷା ପରେ ରାଜ୍ୟରେ ଗୁଳୁଗୁଳି କମିବାର ମଧ୍ୟ ସମ୍ଭାବନା ରହିଛି। ରାଜ୍ୟରେ ୨ ଟି ପର୍ଯ୍ୟୟାରେ ପ୍ରାୟ ୨୦ ଦିନ ଧରି ଗ୍ରୀଷ୍ମ ପ୍ରବାହ ଜାରି ରହିଛି। ଆଗରୁ ମଧ୍ୟ ୧,୨ ଥର ଏଭଳି ସ୍ଥିତି ଦେଖିବାକୁ ମିଳିଥିଲା। ଆଜି ଉପକୂଳ ଓଡ଼ିଶା ସହ ଆଭ୍ୟନ୍ତରୀଣ ଓଡ଼ିଶାରେ ଅପରାହ୍ନରେ ବର୍ଷା ହୋଇପାରେ ବୋଲି ପୂର୍ବାନୁମାନ କରିଛି କେନ୍ଦ୍ର।