ଖୋର୍ଦ୍ଧା : ଭୁବନେଶ୍ବର ଚନ୍ଦକା ଥାନା ଗୋଠପାଟଣାରେ ଜଳଖିଆ ଦୋକାନୀ ସସ୍ମିତା ବେହେରା ହତ୍ୟା ମାମଲା। ୨୩ ଦିନ ପରେ ହତ୍ୟାକାରୀ ମିଥୁନ ଜେନାକୁ ଗିରଫ କଲା ପୋଲିସ। ଘୁଘୁନି ଖାଇବାକୁ ଦେବାରୁ ପାଟିତୁଣ୍ଡରୁ ଗତ ମାସ ୬ ତାରିଖ ମଧ୍ୟରାତ୍ରୀରେ ହୋଇଥିଲା ହତ୍ୟାକାଣ୍ଡ ।
ସ୍ବାମୀଙ୍କ ଉପସ୍ଥିତିରେ ସସ୍ମିତାଙ୍କୁ ଛୁରି ଭୁସି ହତ୍ୟା କରିଥିଲା ଅଭିଯୁକ୍ତ । ଅଭିଯୁକ୍ତକୁ ଗଙ୍ଗାପାଟଣା ଅଞ୍ଚଳରୁ ପୋଲିସ ଗିରଫ କରିଥିବା ସୂଚନା ମିଳିଛି । ହତ୍ୟା ମାମଲାରେ ପୋଲିସ ୩୦ରୁ ଅଧିକ ବ୍ୟକ୍ତିଙ୍କୁ ପଚରାଉଚରା କରିଥିଲା। ମୃତ ମହିଳାଙ୍କ ସ୍ବାମୀ ବିଶ୍ବନାଥଙ୍କୁ ମଧ୍ୟ ତଦନ୍ତ ପରିସରଭୁକ୍ତ କରିଥିଲା ପୋଲିସ।
ଗାଜା: ହମାସ-ଇସ୍ରାଏଲ ମଧ୍ୟରେ ଯୁଦ୍ଧ ବିରତି ଜାରି ରଖିବାକୁ ହମାସ ସଂଗଠନର ଆଗ୍ରହ ପ୍ରକାଶ। ପଣବନ୍ଦୀଙ୍କୁ ହସ୍ତାନ୍ତର କରି ପାଲେଷ୍ଟାଇନ ବନ୍ଦୀଙ୍କୁ ମୁକ୍ତ କରିବା ପ୍ରକ୍ରିୟା ଜାରି ରଖିବାକୁ ପ୍ରସ୍ତାବ ଦେଇଛି ହମାସ। ଗାଜା-ଇସ୍ରାଏଲ ଯୁଦ୍ଧରେ ବର୍ତ୍ତମାନ ଯାଏ ଗତକାଲି ପର୍ଯ୍ଯନ୍ତ ୭ ଦିନ ଯୁଦ୍ଧ ବନ୍ଦ ରହିଥିଲା। ପ୍ରଥମେ ୪ ଦିନ ଏହାପରେ ଆଉ ଦୁଇ ଦିନ ଏବଂ ଏବେ ଗୋଟିଏ ଦିନ ପାଇଁ ଯୁଦ୍ଧ ବିରତି କରାଯାଇଥିଲା। ଆଜି ପୁଣି ହମାସ ଉପରେ କିଛି ସ୍ଥାନରେ ଇସ୍ରାଏଲ ବୋମାମାଡ଼ କରିଥିବା ସୂଚନା ମିଳିଛି।
ଗୁରୁବାର ଦିନ ମୋଟ ୮ ଜଣଙ୍କୁ ମୁକ୍ତ କରିଛନ୍ତି ହମାସ ଆତଙ୍କୀ । ପ୍ରତି ବଦଳରେ ଇସ୍ରାଏଲ ୩୦ ପାଲେଷ୍ଟିନୀୟ ବନ୍ଦୀଙ୍କୁ ମୁକ୍ତ କରିଛି। ସେମାନଙ୍କ ମଧ୍ୟରେ ୨୩ ନାବାଳକ ଏବଂ ୭ ଜଣ ମହିଳା ଅଛନ୍ତି। ଯୁଦ୍ଧ ବିରତି ଆରମ୍ଭ ହେବା ପରଠାରୁ ବର୍ତ୍ତମାନ ସୁଦ୍ଧା ହମାସ ୮୦ ପଣବନ୍ଦୀଙ୍କୁ ମୁକ୍ତ କରିଛି ହମାସ । ସେମାନଙ୍କ ମଧ୍ୟରେ ୨୦ରୁ ଅଧିକ ବିଦେଶୀ ନାଗରିକ ଅଛନ୍ତି । ପ୍ରତିବଦଳରେ ଇସ୍ରାଏଲ ୨୪୦ ପାଲେଷ୍ଟିନୀୟ ବନ୍ଦୀଙ୍କୁ ଛାଡିଛି। ଗାଜାର ସାଧାରଣ ଜନତାଙ୍କ ସୁରକ୍ଷା ଲାଗି ଆକ୍ରମଣ ନକରିବାକୁ ଆମେରିକା ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ୍ ଆହ୍ବାନ କରିଛନ୍ତି ।
ଇସ୍ରାଏଲର ୱେଷ୍ଟବ୍ୟାଙ୍କ ଅଂଚଳରେ ଇସ୍ରାଏଲ ପ୍ରତିନିଧିଙ୍କ ସହ ଆଲୋଚନା କରିଛନ୍ତି ଆମେରିକା ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ୍। ସେପଟେ ଗାଜାରେ ମାନବୀୟ ସହାୟତା ଜାରି ରଖିବାକୁ ଆହୁରି ଅଧିକ ଦିନ ପର୍ଯ୍ୟନ୍ତ ଯୁଦ୍ଧ ବିରତି ଜାରି ରଖିବାକୁ ବିଭିନ୍ନ ଅନ୍ତର୍ଜାତୀୟ ସଂଗଠନ ଦାବି କରିଛନ୍ତି। ଗାଜା-ଇସ୍ରାଏଲ ଯୁଦ୍ଧ ବନ୍ଦ କରିବାକୁ ବିଶ୍ବର ବିଭିନ୍ନ ଦେଶରୁ ଚାପ ପଡୁଛି। ସେପଟେ ବ୍ଲିଙ୍କେନଙ୍କ ସହ ଆଲୋଚନା ପରେ ଯୁଦ୍ଧ ବିରତି ଅବଧି ଶେଷ ହେବା ପରେ ଇସ୍ରାଏଲ ପୁଣିଥରେ ଆରମ୍ଭ କରିଛି ଯୁଦ୍ଧ। ହମାସକୁ ଗାଜାରୁ ମୂଳପୋଛ ନକରିବା ଯାଏ ଏହି ଯୁଦ୍ଧ ଚାଲିବ ବୋଲି କହିଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଂଜାମିନ ନେତନ୍ୟାହୁ ।
ଭୁବନେଶ୍ୱର : ଘଟଗାଁ ସଡ଼କ ଦୁର୍ଘଟଣାରେ ୮ ଜଣଙ୍କ ମୃତ୍ୟୁ ଘଟଣାରେ ଶୋକପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଶୋକସନ୍ତପ୍ତ ପରିବାରବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି ମୁଖ୍ୟମନ୍ତ୍ରୀ। ମୃତକଙ୍କ ପରିବାରକୁ ତିନି ଲକ୍ଷ ଟଙ୍କା ଲେଖାଏଁ ଅନୁକମ୍ପା ସହାୟତା ରାଶି ଘୋଷଣା କରିଛନ୍ତି। ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଅନୁକମ୍ପା ସହାୟତା ରାଶି ପ୍ରଦାନ କରାଯିବ।
ଦୁର୍ଘଟଣାରେ ଆହତଙ୍କୁ ମାଗଣାରେ ଉପଯୁକ୍ତ ଚିକିତ୍ସା ଯୋଗାଇ ଦେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଏହାସହ ସେମାନଙ୍କର ଆଶୁ ଆରୋଗ୍ୟ କାମନା କରିଛନ୍ତି ।
ଭୁବନେଶ୍ବର : ଭୁବନେଶ୍ବର ରସୁଲଗଡ଼ ଶବରସାହିରେ ଧରାହେଲେ ଦୁଇ ସନ୍ଦିଗ୍ଧ ମହିଳା । ଗେଟ ଖୋଲି ଘରେ ପଶୁଥିବା ବେଳେ ଦୁଇ ମହିଳା ଧରାହୋଇଛନ୍ତି । ସେମାନଙ୍କୁ କାବୁ କରି ପୋଲିସକୁ ଦେଇଛନ୍ତି ଲୋକ । ଭିକ୍ଷା ମାଗିବା ଆଳରେ ଦୁଇ ମହିଳା ଘରେ ପଶୁଥିବା ସୂଚନା ମିଳିଛି ।
ଉଭୟଙ୍କୁ ଅଟକ ରଖି ପଚରାଉଚରା କରୁଛି ମଞ୍ଚେଶ୍ବର ଥାନା ପୋଲିସ । ଦୁଇ ମହିଳା ରାଜ୍ୟ ବାହାରର ହୋଇଥିବା ସୂଚନା ମିଳିଛି ।
ବେଙ୍ଗାଲୁରୁ: ବେଙ୍ଗାଲୁରୁରେ ବୋମା ଧମକ। ବୋମା ବିସ୍ଫୋରଣ ନେଇ ଇ-ମେଲରେ ଧମକ ପରେ ୧୩ଟି ସ୍କୁଲକୁ ଖାଲି କରିଦିଆଯାଇଛି। ପୋଲିସ ପକ୍ଷରୁ ତନାଘନା କରାଯାଉଛି। ବିଭିନ୍ନ ସ୍କୁଲ ପରିସରରେ ବୋମା ଖଞ୍ଜାଯାଇଛି ବୋଲି ଇ-ମେଲ ଧମକ ଆସିବା ପରେ ସ୍କୁଲଗୁଡିକରେ ସତର୍କ ବ୍ୟବସ୍ଥା ଜାରି କରାଯାଇଛି ।
ବିଭିନ୍ନ ସ୍କୁଲ ପରିସରରେ ଥିବା ସନ୍ଦିଗ୍ଧ ପଦାର୍ଥ ଗୁଡିକର ଯାଞ୍ଚ କରାଯାଉଥିବା ବେଳେ ଇମେଲ ସମ୍ପର୍କରେ ଛାନବିନ କରାଯାଇଛି । ବିଭିନ୍ନ ସ୍କୁଲରେ ପୋଲିସ ପହଞ୍ଚି ସର୍ଚ୍ଚ ଅପରେସନ କରିଛି । ବୋମା ଧମକକୁ ନେଇ ଏକ ସ୍କୁଲ ପକ୍ଷରୁ ଛାତ୍ରଛାତ୍ରୀଙ୍କ ପିତାମାତାଙ୍କ ଉଦ୍ଦେଶ୍ୟରେ ଆଡଭାଇଜରୀ ଜାରି କରାଯାଇଛି ।
ବ୍ୟୁରୋ ରିପୋର୍ଟ : ଆଜିଠୁ ଆରମ୍ଭ ହେଉଛି ବର୍ଷର ଶେଷମାସ ଡିସେମ୍ବର। ତା ସହିତ ବଦଳିଯାଉଛି ଅନେକ ନିୟମ। ଯାହାକି ଆପଣଙ୍କ ଜୀବନକୁ ପ୍ରଭାବିତ କରିବ। ଆଜିଠୁ ସିମ୍ କାର୍ଡ, ୟୁପିଆଇ ଆଇଡି, ବ୍ୟାଙ୍କ କ୍ରେଡିଟ୍ କାର୍ଡ ସହ ଜଡିତ ନୂଆ ନିୟମ ଲାଗୁ ହେଉଛି । ଦେଶରେ ସିମ୍ କାର୍ଡ କିଣିବା ଓ ବିକିବା ନେଇ ନୂଆ ନିୟମ ଆସିଛି।
ପୂର୍ବରୁ ଲୋକମାନେ ଗୋଟିଏ ଆଇଡିରେ ଏକ ସଙ୍ଗେ ବହୁ ସିମ୍ କାର୍ଡ କିଣିପାରୁଥିଲେ। କିନ୍ତୁ ଆଜିଠୁ ଆଉ ଏପରି ହେବନି। ସୀମିତ ସଂଖ୍ୟାରେ ସିମ୍ କାର୍ଡ କିଣିବାକୁ ଅନୁମତି ମିଳିପାରିବ। ଜଣେ ଗ୍ରାହକ ଗୋଟିଏ ଆଧାର ପରିଚୟ ପତ୍ରରେ କେବଳ ୯ଟି ସିମ କାର୍ଡ କିଣିପାରିବେ। ସିମ କିଣିବା ପାଇଁ କ୍ୟୁଆର କୋଡ୍ ସ୍କାନ ସହ ଡେମୋଗ୍ରାଫି ତଥ୍ୟ ଦେବାକୁ ପଡିବ । ଯଦି ବ୍ୟବହାର କରୁଥିବା ସିମ କାର୍ଡ ବନ୍ଦ କରିଦେବେ ତେବେ ୯୦ଦିନ ଭିତରେ ଏହି ସିମ ଅନ୍ୟଜଣେ ଗ୍ରାହକଙ୍କୁ ଦିଆଯିବ। ସେହିପରି ସିମ୍ କାର୍ଡ ବିକ୍ରୀ କରୁଥିବା ବ୍ୟକ୍ତିଙ୍କୁ ରେଜିଷ୍ଟ୍ରେସନ ଓ ସିଷ୍ଟମରେ ସାମିଲ ହେବା ପୂର୍ବରୁ କେୱାଇସି ପ୍ରୋସେସ୍ ପୁରା କରିବାକୁ ହେବ। ସେହିପରି ବ୍ୟାଙ୍କରୁ ଲୋନ୍ ନେବା ଲାଗି ଜମା କରିଥିବା ସମ୍ପତ୍ତିର କାଗଜପତ୍ର ଫେରସ୍ତ ନେବାରେ ଗ୍ରାହକଙ୍କୁ ଆଉ ବିଶେଷ ଅସୁବିଧାର ସମ୍ମୁଖୀନ ହେବାକୁ ପଡିବ ନାହିଁ ।
ନୂଆ ନିୟମ ଅନୁସାରେ ଲୋନ୍ ଶୁଝିବାର ଏକ ମାସ ଭିତରେ ବ୍ୟକ୍ତିକୁ ସଂପତ୍ତିର କାଗଜପତ୍ର ଫେରାଇ ଦିଆଯିବ । ଏପରି ନ କଲେ ବ୍ୟାଙ୍କକୁ ପ୍ରତିଦିନ ୫ ହଜାର ଜୋରମାନା ଦେବାକୁ ପଡିବ । HDFC ବ୍ୟାଙ୍କ ଏହାର କ୍ରେଡିଟ୍ କାର୍ଡକୁ ନେଇ କିଛି ପରିବର୍ତ୍ତନ କରିଛି । ଏଥିରେ ଲାଉଞ୍ଜ ଆକ୍ସେସ ଲାଗି ଖର୍ଚ୍ଚର ସୀମା ବୃଦ୍ଧି କରାଯାଇଛି । ସେହିପରେ ଯେଉଁ ୟୁପିଆଇ ଆଇଡିରେ ବର୍ଷେ ଧରି କୌଣସି ଟ୍ରାଞ୍ଜାକ୍ସନ ହୋଇନଥିବ ସେହି ୟୁପିଆଇ ଆଇଡି ବନ୍ଦ ହୋଇଯିବ।
ଭଦ୍ରକ : ଭଦ୍ରକ ୧୬ ନମ୍ବର ଜାତୀୟ ରାଜପଥ ଗେଲପୁର ଛକ ନିକଟରେ ମର୍ମନ୍ତୁଦ ଦୁର୍ଘଟଣା। ରାସ୍ତାରେ ଠିଆ ହୋଇଥିବା ହାଇୱାକୁ ପଛପଟୁ ଧକ୍କା ଦେଲା କାର୍। ଦୁର୍ଘଟଣାରେ ଜଣେ ମୃତ, ୪ ଗୁରୁତର। ଭଦ୍ରକ ପୁରୁଣାବଜାର ଅଞ୍ଚଳରୁ କେତେକ ଯୁବକ ଦୋବଲ ଅଞ୍ଚଳକୁ ଏକ ପର୍ବରେ ଯୋଗଦେବା ପାଇଁ ଯାଉଥିବା ବେଳେ ଗେଲପୁର ନିକଟରେ ଦୁର୍ଘଟଣା ଘଟିଥିଲା ।
ଦୁର୍ଘଟଣା ପରେ ସମସ୍ତଙ୍କୁ ବିଳମ୍ବିତ ରାତିରେ ଭଦ୍ରକ ମେଡିକାଲରେ ଭର୍ତ୍ତି କରାଯାଇଥିଲା । ପରେ ୨ ଜଣଙ୍କର ଅବସ୍ଥା ଗୁରୁତର ହେବାରୁ ସେମାନଙ୍କୁ କଟକ ମେଡିକାଲକୁ ସ୍ଥାନାନ୍ତର କରାଯାଇଥିଲା। ମୃତକ ଜଣକ ପୁରୁଣାବଜାର ଅଞ୍ଚଳର ଏସ କେ.ସନୱର ବୋଲି ପ୍ରାଥମିକ ତଦନ୍ତରୁ ଜଣାପଡିଛି ।
ଭୁବନେଶ୍ୱର : ଆଜିଠୁ ରାଜ୍ୟର ଆଉ ଦୁଇଟି ସ୍ଥାନରେ ଆରମ୍ଭ ହେଉଛି ପ୍ରକୃତିର ଉତ୍ସବ ଇକୋ-ରିଟ୍ରିଟ୍। ସୋନପୁର ଓ ଭିତରକନିକାରେ ଇକୋ-ରିଟ୍ରିଟର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଭିତରକନିକାରେ ପର୍ଯ୍ୟଟକମାନେ ରାତି ବିତାଇବା ସହ ପରିଭ୍ରମଣ କରିବାର ମଜାପାଇବେ। ଏହି ସମୟରେ କୁମ୍ଭୀର, ଦେଶୀ ବିଦେଶୀ ପକ୍ଷୀ ଓ ହରିଣ, ବାରାହା ଦେଖିବା ସହ ଡାଙ୍ଗମାଳ କୁମ୍ଭୀର ପ୍ରଜନନ କେନ୍ଦ୍ର ବୁଲିବା, ଧଳା କୁମ୍ଭୀରକୁ ଦେଖିବା ସହ ମିୟୁଜିୟମ ଦେଖିବାର ମଜା ନେବେ ପର୍ଯ୍ୟଟକ। କୃତ୍ରିମ ଝରଣା ସହ କଇଁଛ, ହରିଣ, ଦେଶ ବିଦେଶରେ ପକ୍ଷୀ ବଉଳା କୁମ୍ଭୀର ଦେଖିବାକୁ ମିଳିବ।
ସେହିପରି ସୋନପୁରରେ ମଧ୍ୟ ପ୍ରକୃତିର ମଜାନେବେ ପର୍ଯ୍ୟଟକ। ପ୍ରଥମ ପର୍ଯ୍ୟାୟରେ ହୀରାକୁଦ, ଦାରିଙ୍ଗବାଡ଼ି, କୋରାପୁଟର ପୁଟସିଲ ଓ ସାତକୋଶିଆ ସହିତ ୪ଟି ସ୍ଥାନରେ ଇକୋ-ରିଟ୍ରିଟ୍ ଆରମ୍ଭ ହୋଇଥିବାବେଳେ ଆଜି ଦ୍ବିତୀୟ ପର୍ଯ୍ୟାରେ ସୋନପୁର ଓ ଭିତରକନିକାରେ ଆରମ୍ଭ ହେବ। ସେହିପରି ତୃତୀୟ ପର୍ଯ୍ୟାୟ ଅର୍ଥାତ ଆସନ୍ତା ୧୫ତାରିଖରେ କୋଣାର୍କ ଇକୋ-ରିଟ୍ରିଟର ଶୁଭାରମ୍ଭ ହେବ। ଇକୋ ରିଟ୍ରିଟରେ ପର୍ଯ୍ୟଟକମାନଙ୍କୁ ସବୁ ପ୍ରକାରର ସୁବିଧା ମିଳୁଛି । ସ୍ବତନ୍ତ୍ରଭାବେ ପ୍ରସ୍ତୁତ ହୋଇଥିବା ବିଳାସପୂର୍ଣ୍ଣ କଟେଜରେ ଆରାମଦାୟକ ରହଣୀ ସାଙ୍ଗକୁ ସୁସ୍ବାଦୁ ଖାଦ୍ୟ ଓ ସାଂସ୍କୃତିକ କାର୍ଯ୍ୟକ୍ରମ ଏବଂ ରୋମାଞ୍ଚକର କାର୍ଯ୍ୟର ମଜା ନେଉଛନ୍ତି ପର୍ଯ୍ୟଟନ। ଦେଶ ବିଦେଶର ପର୍ଯ୍ୟଟକମାନେ ଓଡ଼ିଶାର କଳା, ସଂସ୍କୃତି ଓ ପରମ୍ପରା ବିଷୟରେ ଜାଣୁଛନ୍ତି ।
ଭୁବନେଶ୍ୱର : ସାବଧାନ ଅମାନିଆ ଗାଡ଼ି ଚାଳକ । ଆଜିଠୁ ଜୋରଦାର ହେବ ଟ୍ରାଫିକ ଚେକିଂ। ନିୟମ ଭାଙ୍ଗିଲେ ଗଣିବେ ମୋଟାଅଙ୍କର ଫାଇନ୍। ଆଜିଠୁ ସପ୍ତାହେବ୍ୟାପୀ ସାରା ରାଜ୍ୟରେ ପାଳନ ହେଉଛି ଦୁର୍ଘଟଣା ଜନିତ ଶୂନ୍ୟ ମୃତ୍ୟ ସପ୍ତାହ। ବିଶେଷକରି ଡ୍ରଙ୍କ ଆଣ୍ଡ ଡ୍ରାଇଭ୍, ନାବାଳକ ଡ୍ରାଇଭିଂ, ବେଆଇନ ପାର୍କିଂ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ନାବାଳକ ଗାଡ଼ିଚଳାକ ଧରାପଡିଲେ ଅଭିଭାବକଙ୍କ ନାଁରେ କଟିବ ଚାଲାଣ। ମଦ୍ୟପାନ, ରଙ୍ଗରୁଟ, ବିନା ହେଲମେଟ, ବିନା ସିଟବେଲ୍ଟରେ ଗାଡ଼ି ଚଳାଇଲେ ଜବତ ହୋଇପାରେ ଗାଡ଼ି । ଗଳିକନ୍ଦିରେ ଚେକିଂ କରି ଅମାନିଆକୁ ସାବାଡ଼ କରିବ ପୋଲିସ। ଗତ ଏପ୍ରିଲ ମାସରେ ଶୂନ୍ୟ ମୃତ୍ୟୁ ସପ୍ତାହ ପାଳନ ବେଳେ ବୌଦ୍ଧ, ରାୟଗଡ଼ା, ସୋନପୁର, ଭଦ୍ରକ, ମାଲକାନଗିରି, ନୟାଗଡ଼ ଏବଂ ସମ୍ବଲପୁର ଜିଲ୍ଲା ଗୁଡିକରେ କୌଣସି ଜଣେ ବ୍ୟକ୍ତିଙ୍କ ଜୀବନ ଯାଇନାହିଁ । ତେବେ ଅନ୍ୟାନ୍ୟ ଜିଲ୍ଲା ଗୁଡିକରେ ୭୦ ଜଣଙ୍କ ଜୀବନହାନୀ ହୋଇଛି। ବେପରୁଆ ଗାଡ଼ି ଚାଳନା ଯୋଗୁ ପ୍ରତିଦିନ ସଡକ ଦୁର୍ଘଟଣା ଘଟୁଥିବାରୁ କେବଳ ସପ୍ତାହେ ନୁହଁ ବରଂ ବର୍ଷବ୍ୟାପୀ ଏଭଳି କାର୍ଯ୍ୟକ୍ରମ କରାଯିବା ଆବଶ୍ୟକ ବୋଲି କହିଛନ୍ତି ବିଶେଷଜ୍ଞ ।
କେନ୍ଦୁଝର : ତାରିଣୀ ଦର୍ଶନ ପାଇଁ ଯିବା ବେଳେ ଚାଲିଗଲା ୮ ଜୀବନ । କେନ୍ଦୁଝର ବାଲିଯୋଡ଼ି ଏନଏଚ ୨୦ରେ ଘଟିଛି ଏହି ଭୟଙ୍କର ଦୁର୍ଘଟଣା । ସମସ୍ତ ମୃତକ ଗଂଜାମ ଦିଗପହଣ୍ଡି ପୋଡ଼ାମାରି ଗାଁର ବୋଲି ଜଣାପଡିଛି । ଦୁର୍ଘଟଣାରେ ଦୁଇଟି ପରିବାରର ୮ ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ଗୋଟିଏ ପରିବାରର ବାପା,ପୁଅ ଓ ଝିଅ ଜ୍ବାଇଁ ରହିଥିବାବେଳେ ଅନ୍ୟ ଗୋଟିଏ ପରିବାରର ମାଆ,ପୁଅ ଝିଅ ରହିଛନ୍ତି ।
ବାୟାଘନ ଗୌଡ଼ ଓ ତାଙ୍କର ପୁଅ ମଦନ ଗୌଡ଼ଙ୍କର ମୃତ୍ୟୁ ହୋଇଥିବାବେଳେ ବାୟାଘନଙ୍କ ଝିଅ କାମିନି ଗୌଡ଼ ଓ ଜ୍ବାଇଁ ବାବୁଲା ଗୌଡ଼ଙ୍କର ମୃତ୍ୟୁ ହୋଇଛି । ସେହିପରି ମାଆ ମିତା ପ୍ରଧାନ ଓ ତାଙ୍କ ପୁଅ ଆକାଶ ପ୍ରଧାନ ଏବଂ ବୋହୂ ଲିଜା ପ୍ରଧାନଙ୍କର ମଧ୍ୟ ମୃତ୍ୟୁ ହୋଇଛି। ମୃତକ ପ୍ରଧାନ ପରିବାରର ସଦସ୍ୟ ପୂର୍ବତନ ସାଂସଦ ରେଣୁବାଳା ପ୍ରଧାନଙ୍କ ଯାଆ, ପୁତୁରା ଓ ପୁତୁରା ବୋହୂ ହୋଇଥିବା ସୂଚନା ମିଳିଛି।
