ନନ୍ଦିଘୋଷ ବ୍ୟୁରୋ: ରବିବାର ଆଇପିଏଲର ଚଳିତ ସିଜିନର ଚତୁର୍ଥ ମ୍ୟାଚରେ ବିଜୟୀ ହୋଇଛି ରାଜସ୍ଥାନ ରୟାଲ୍ସ । ଲକ୍ଷ୍ନୌ ସୁପର ଜାଏଣ୍ଟ୍ସକୁ ୨୦ ରନରେ ପରାସ୍ତ କରିଛି ରାଜସ୍ଥାନ । ନିକୋଲାସ ପୁରନ ଲଢ଼ୁଆ ଅର୍ଦ୍ଧଶତକୀୟ ପାଳି ଖେଳିଥିଲେ ସୁଦ୍ଧା ପରାଜୟ ବରଣ କରିଛି । ପ୍ରଥମେ ବ୍ୟାଟିଂ କରି ରାଜସ୍ଥାନ ୨୦ ଓଭରରେ ୭ ଓ୍ବିକେଟ ବିନିମୟରେ ୧୯୩ ରନ ସଂଗ୍ରହ କରିଥିଲା । ସଞ୍ଜୁ ସାମସନ ୫୨ ବଲରୁ ୮୨ ରନ ସଂଗ୍ରହ କରିଥିଲେ । ୧୯୪ ରନର ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ଲକ୍ଷ୍ନୌ ୨୦ ଓଭର ମଧ୍ୟରେ ମାତ୍ର ୧୭୩ ରନ କରିବାରେ ସକ୍ଷମ ହୋଇଥିଲା । ଅନ୍ତିମ ଓଭରରେ ଆଭେଶ ଖାନ ଚମତ୍କାର ବୋଲିଂ କରିଥିଲେ ।
୧୬୮ ଏକର ଏହି ସାଗର ଚାଷୀଙ୍କ ଜଳର ଉତ୍ସ ଜଗନ୍ନାଥ ସାଗର
ଜୟପୁର: ସାରା ଦେଶରେ ଭୂତଳ ଜଳ କମିବା ଏବେ ପାଲଟିଛି ମୁଖ୍ଯ ସମସ୍ଯା । ସେଥିପାଇଁ ଆଗାମୀ ଦିନରେ ଦେଶରେ ଉତ୍କଟ ଜଳ ସମସ୍ଯା ସୃଷ୍ଟି ହେବା ଆଶଙ୍କା ଦେଖାଦେଇଛି । ଏପରି ସ୍ଥଳେ ରାଜ୍ୟରେ ସମସ୍ତ ଜଳ ଉତ୍ସ ମାନଙ୍କ ସୁରକ୍ଷା ପାଇଁ ପ୍ରୟାସ କରିଛନ୍ତି ରାଜ୍ୟ ସରକାର । ବୃହତ୍ତ ଜଳାଶୟ ଗୁଡିକର ସୁରକ୍ଷିତ କରି ସେଠାରେ ସୌନ୍ଦର୍ଯ୍ୟକରଣ କରାଯାଉଛି । ଏହି କ୍ରମରେ ଜୟପୁରର ଐତିହାସିକ ଜଗନ୍ନାଥ ସାଗରର ପୁନଃଉଦ୍ଧାର ପାଇଁ ଆରମ୍ଭ ହୋଇଛି କାର୍ଯ୍ୟ । ଦିର୍ଘ ଦିନର ସପ୍ନ ସାକାର ହେବାକୁ ଯାଉଥିବାରୁ କୃତଜ୍ଞତା ଜଣାଇଛନ୍ତି ଜୟପୁରବାସୀ ।
ଜୟପୁରର ଐତିହ୍ଯ ଜଗନ୍ନାଥ ସାଗର । ୪ ଶହ ବର୍ଷ ପୁରୁଣା ସାଗର ସହରର ପରିଚୟ । ୧୬୮ ଏକର ଏହି ସାଗର ଚାଷୀଙ୍କ ଜଳର ଉତ୍ସ । ହେଲେ ରକ୍ଷଣାବେକ୍ଷଣ ଅଭାବରୁ ଏହା ଇତିହାସ ହେବାକୁ ବସିଛି । ଜୟପୁରବାସୀଙ୍କ ଭାବାବେଗ ସହ ଜଡ଼ିତ ଏହି ସାଗରର ପୂନଃଉଦ୍ଧାର କାମ ଆରମ୍ଭ କରିଛନ୍ତି ରାଜ୍ଯ ସରକାର । ଜୟପୁର ପୌର ପରିଷଦକୁ ଏଥିପାଇଁ ୧୪ କୋଟି ଟଙ୍କା ଅନୁଦାନ ଯୋଗାଇ ଦେଇଛନ୍ତି ରାଜ୍ୟ ସରକାର । ହିନ୍ଦୁସ୍ଥାନ ଏରୋନେଟିକ୍ ଲିମିଟେଡ୍ ପକ୍ଷରୁ ୭ ଲକ୍ଷ ଟଙ୍କା ଜଗନ୍ନାଥ ସାଗରର ଉନ୍ନଟି କରଣ ପାଇଁ ଦିଆଯାଇଛି । ଅର୍ଥ ଆସିବା ପରେ ଆରମ୍ଭ ହୋଇଛି ପୂନଃଉଦ୍ଧାର କାମ । ସାଗରର ପାଣିକୁ ଅତ୍ୟାଧୁନିକ ଉପାୟରେ ଖାଲି କରିବା ସହ ପଙ୍କ ଉଦ୍ଧାର କରାଯାଉଛି । ପୂନଃ ଉଦ୍ଧାର ସହ ସୌନ୍ଦର୍ଯ୍ୟକରଣ କାର୍ଯ୍ୟ ଆରମ୍ଭ ହୋଇଥିବାରୁ ମୁଖ୍ଯମନ୍ତ୍ରୀ ଓ ଫାଇଭ-ଟି ଅଧ୍ଯକ୍ଷଙ୍କୁ ଧନ୍ଯବାଦ ଜଣାଇଛନ୍ତି ।
4୦୦ ବର୍ଷ ତଳେ ରାଜା ରାଜୁଡା ଅମଳରେ ନିର୍ମାଣ ହୋଇଥିଲା ଜଗନ୍ନାଥ ସାଗର। ଏହାର ନିଜର ସତ୍ତା ହରାଇ ବସିଥିବାରୁ ଫାଇଭ-ଟି ଅଧକ୍ଷ କାର୍ତ୍ତିକ ପାଣ୍ଡିଆନଙ୍ଗ ଗସ୍ତ ସମୟରେ ପୂନଃ ଉଦ୍ଧାର ପାଇଁ ଅନୁରୋଧ କରିଥିଲେ ସହରବାସୀ। ପରେ ମୁଖ୍ୟ ଶାସନ ସଚିବ ଆସି ଅନୁଧ୍ୟାନ କରିଥିଲେ । ଏହାପରେ ରାଜ୍ୟ ସରକାର ମଧ୍ଯ ଡିପିଆର ପ୍ରସ୍ତୁତ କରି ସହାୟତା ଯୋଗାଇ ଦେଉଛନ୍ତି । ୮୫ ଟି ଏସଏଚଜି ଗୃପଙ୍କୁ ଏହାର କାମ କରିବାକୁ କାର୍ଯ୍ୟାଦେଶ ଦେଇଛି ଜୟପୁର ପୌର ପରିଷଦ । ଗ୍ରୀଷ୍ମ ଋତୁ ସରିବା ପୁର୍ବରୁ ଏହି କାମ ସମାପ୍ତ ହେବା ନେଇ ଆଶା କରାଯାଉଛି ।
ମୁମ୍ବାଇ ଇଣ୍ଡିଆନ୍ସର ଅଧିନାୟକ ପଦ ଯିବାପରେ ପ୍ରଥମଥର ମୁହଁ ଖୋଲିଲେ ରୋହିତ
ନନ୍ଦିଘୋଷ ବ୍ୟୁରୋ: ଚାଲିଛି ଆଇପିଏଲ ମହାସମର । ରବିବାର ଗୁଜୁରାଟ ଟାଇଟନ୍ସ ବିପକ୍ଷରେ ଚଳିତ ବର୍ଷର ପ୍ରଥମ ମ୍ୟାଚ ଖୋଳିବ ମୁମ୍ବାଇ । ଅହମ୍ମଦାବାଦରେ ଖେଳାଯିବାକୁ ଥିବା ଏହି ମ୍ୟାଚରେ ମୁମ୍ବାଇ ନିଜର ଅଧିନାୟକଙ୍କ ସହ ମଇଦାନକୁ ଓହ୍ଲାଇବ । ଚଳିତ ବର୍ଷ ରୋହିତ ଶର୍ମାଙ୍କ ବଦଳରେ ହାର୍ଦ୍ଦିକ ପାଣ୍ଡ୍ୟାଙ୍କୁ ଅଧିନାୟକ କରିଛି ମୁମ୍ବାଇ । ଯାହାକୁ ନେଇ ପୂର୍ବରୁ ବହୁ ଚର୍ଚ୍ଚା ମଧ୍ୟ ହୋଇଛି । ମୁମ୍ବାଇ ଇଣ୍ଡିଆନ୍ସର ଏଭଳି ନିଷ୍ପତ୍ତି ପରେ ଫଲୋର୍ସ ସଂଖ୍ୟା କମି ଯାଇଥିଲା । ତେବେ ଅଧିନାୟକ ପଦ ଯିବାପରେ ଆଜି ପର୍ଯ୍ୟନ୍ତ ଏନେଇ କୌଣସି ପ୍ରତିକ୍ରିୟା ରଖି ନାହାନ୍ତି ରୋହିତ ଶର୍ମା । ଗୁଜୁରାଟ ବିପକ୍ଷ ମ୍ୟାଚ ପୂର୍ବରୁ ଗଣମାଧ୍ୟମରେ ନିଜର ପ୍ରତିକ୍ରିୟା ରଖିଛନ୍ତି ହିଟମ୍ୟାନ । କହିଛନ୍ତି କି, ମୁଁ ପ୍ରଥମେ ଖେଳିବା ପାଇଁ ପ୍ରସ୍ତୁତି କରିଥାଏ । ମ୍ୟାଚ ପୂର୍ବରୁ ପ୍ରସ୍ତୁତ ହେବା ବହୁତ ମହତ୍ବପୂର୍ଣ୍ଣ ହୋଇଥାଏ । ମୋତେ ଲାଗୁଛି କି, ମୁଁ ବହୁତ କିଛି କରିଛି । ବାସ କିଛି ବାକି ରହିଛି ତାକୁ କରିବାକୁ ପଡ଼ିବ । କହି ରଖୁଛୁ କି, ରୋହିତ ଶର୍ମାଙ୍କ ଅଧିନାୟକତ୍ବରେ ମୁମ୍ବାଇ ଇଣ୍ଡିଆନ୍ସ ୫ଥର ଚାମ୍ପିୟନ ହୋଇଛି । କିନ୍ତୁ ଚଳିତ ସିଜିନରେ ମୁମ୍ବାଇ ତାଙ୍କ ବଦଳରେ ହାର୍ଦ୍ଦିକ ପାଣ୍ଡ୍ୟାଙ୍କୁ ଅଧିନାୟକ କରିଛି । ନିକଟରେ ଅଭ୍ୟାସ ସମୟରେ ହାର୍ଦ୍ଦିକ ରୋହିତ ସହ ହାତ ମିଳାଇବାବେଳର ଏକ ଭିଡିଓ ଭାଇରାଲ ହୋଇଥିଲା । ଯେଉଁଥିରେ ଫ୍ୟାନ୍ସମାନେ ପାଣ୍ଡ୍ୟାଙ୍କଚୁ ବିଭିନ୍ନ କେମଣ୍ଟମାନ କରିଥିଲେ ।
ଓଡିଶା ବିହାର ବନ୍ଧୁକ ବ୍ୟବସାୟ ରାକେଟର ମୁଖ୍ୟ ଗୋଲଡେନ ସିଂହକୁ ଗିରଫ କଲା କମିଶନରେଟ ପୋଲିସର ସ୍ୱତନ୍ତ୍ର ଟିମ
କଟକ: କଟକ ପୋଲିସକୁ ବଡ଼ ସଫଳତା । ଓଡିଶା ବିହାର ବନ୍ଧୁକ ବ୍ୟବସାୟ ରାକେଟର ମୁଖ୍ୟ ଗୋଲଡେନ ସିଂହକୁ ବିହାର ଏସଟିଏଫ ସହଯୋଗରେ ଗିରଫ କରିବାରେ ସକ୍ଷମ ହୋଇଛି କମିଶରେଟ ପୋଲିସର ସ୍ୱତନ୍ତ୍ର ଟିମ । ସହଯୋଗୀ କଟକ କେଶରପୁର ଅଞ୍ଚଳର ୱାସିମ ଖାନକୁ ମଧ୍ୟ ମଙ୍ଗଳାବାଗ ପୋଲିସ ଗିରଫ କରିଛି । ତା ଠାରୁ ଗୋଟିଏ ବନ୍ଧୁକ ଓ ଗୋଲଡେନ ଠାରୁ ଦୁଇଟି ବନ୍ଧୁକ ସମୁଦାୟ 3ଟି ବନ୍ଧୁକ ଜବତ ହୋଇଛି । 3 ଦିନ ରିମାଣ୍ଡରେ ଆଣିବା ପାଇଁ କୋର୍ଟରେ ଆବେଦନ କରିଛି ପୋଲିସ୍ । ରିମାଣ୍ଡରେ ଆସିବା ପରେ ଏନେଇ ଅଧିକ ତଥ୍ୟ ସାମ୍ନାକୁ ଆସିବ ବୋଲି ଡିସିପି କେ. ଵିଶାଲ ସିଂହ ସୂଚନା ଦେଇଛନ୍ତି। ଗତ କିଛିଦିନ ତଳେ ଜଗତପୁର ଅଞ୍ଚଳରେ ବ୍ୟାଙ୍କ ଏଟିଏମ ଭ୍ୟାନ ଲୁଟ ଯୋଜନା କରୁଥିବା ବେଳେ ପୋଲିସ ହାତରେ ଧରାପଡ଼ିଥିବା 4ଜଣ ଡକାୟତଙ୍କ ନିକଟରୁ 4ଟି ବନ୍ଧୁକ ଜବତ ହୋଇଥିଲା । ଏହି ବନ୍ଧୁକ ସେମାନେ ବିହାରର ମୁଙ୍ଗେରରୁ ଆଣି ଏହି ଡକାୟତି କଲାପରେ ବିକ୍ରି କରିବାକୁ ଯୋଜନା କରିଥିବା ପୋଲିସ ଜାଣିବାକୁ ପାଇଥିଲା । ସେମାନଙ୍କ ଠାରୁ ମିଳିଥିବା ତଥ୍ୟକୁ ଆଧାର କରି ଡିସିପିଙ୍କ ନିର୍ଦ୍ଦେଶରେ ଏକ ସ୍ୱତନ୍ତ୍ର ଟିମ ବିହାର ଯାଇଥିଲା । ଅଭିଯୁକ୍ତମାନଙ୍କ ବୟାନକୁ ଆଧାରକରି କଟକ ସମେତ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିଲା ପୋଲିସ ।
ଛାତ୍ରଛାତ୍ରୀଙ୍କୁ ଡାକ୍ତରଙ୍କ ପରାମର୍ଶ, ହୋଲି ଖେଳିବାବେଳେ..
ଖୋର୍ଦ୍ଧା: ରଙ୍ଗ ର ପର୍ବ ହୋଲି। ଆନନ୍ଦ ଉତ୍ସାହ ରେ ପରଷ୍ପର ମଧ୍ୟ ରେ ରଙ୍ଗ ଖେଳିବା ପାଇଁ ପିଲା ଠାରୁ ବଡ ପର୍ଯ୍ୟନ୍ତ ସମସ୍ତେ ଆଗ୍ରହୀ। ରଙ୍ଗ ଖେଳିଲା ବେଳେ ପିଲାମାନେ ନିଜ ଶରୀର ପ୍ରତି ଦୃଷ୍ଟି ଦେବା ନିହାତି ଆବଶ୍ୟକ। ଏହି ଉପରେ ଛାତ୍ର ଛାତ୍ରୀ ମାନଙ୍କୁ ପରାମର୍ଶ ଦେଇଛନ୍ତି ଡାକ୍ତର ।
ଆସିଛି ହୋଲି । ରଙ୍ଗ ବେରଙ୍ଗ ଫଗୁରେ ରଙ୍ଗୀନ ପୂରପଲ୍ଲୀ । ଅବିର ସାଙ୍ଗକୁ ପିଚକାରୀରେ ରଙ୍ଗେଇ ହେବାକୁ ତତ୍ପର ସମସ୍ତେ । ପରଷ୍ପର ମଧ୍ୟରେ ରଙ୍ଗ ଖେଳି ଆନମନା ହୋଇଛନ୍ତି ଛାତ୍ରଛାତ୍ରୀ । ପିଲାମାନଙ୍କୁ ଦୋଳ ଏବଂ ହୋଲି ପରମ୍ପରାର ଅନୁଭବ ଓ ଜ୍ଞାନ ଦେବାକୁ ସ୍କୁଲରେ ପାଳିତ ହୋଇଛି ବସନ୍ତ ଉତ୍ସବ। ଏହି ଉତ୍ସବରେ ରଙ୍ଗ ଖେଲିଲା ବେଳେ ନିଜର ଆଖି, ପାଟି, ମୁଁହ, ଚର୍ମ ପ୍ରତି ଧ୍ୟାନ ଦେବା ନିହାତି ଆବଶ୍ୟକ ବୋଲି ପିଲାଙ୍କୁ ପରାମର୍ଶ ଦେଇଛନ୍ତି ଡାକ୍ତର।
ପିଲାମାନେ କେବଳ ରଙ୍ଗ ଖେଳି ନଥିଲେ, ନିଜକୁ ଶ୍ରୀକୃଷ୍ଣ ରାଧା ବେଶରେ ସଜାଇ ହୋଇ ପୌରାଣିକ ଯୁଗର ଅବିର ଖେଳକୁ ନୃତ୍ୟ ମାଧ୍ୟମରେ ପ୍ରଦର୍ଶନ କରିଥିଲେ। ପରଷ୍ପରକୁ ହୋଲିର ଶୁଭେଚ୍ଛା ଜଣାଇଥିଲେ । ହୋଲି ଖେଳିଲାବେଳେ ରାସାୟନିକ ରଙ୍ଗ କୁ ସମ୍ପୂର୍ଣ ବାରଣ କରିବାକୁ ଛାତ୍ର ଛାତ୍ରୀଙ୍କୁ ସଚେତନ କରାଇବା ସହ ଲୋକଙ୍କୁ ସଚେତନ କରାଯାଇଥିଲା । ଆନନ୍ଦର ପର୍ବ ହୋଲି ଖେଲିଲା ବେଳେ ସମସ୍ତେ ନିଜ ଶରୀର ପ୍ରତି ସଚେତନ ରହିଲେ ହୋଲି ସମସ୍ତଙ୍କ ମନରେ ଖୁସି ଭରିଦେବ ବୋଲି ମତପ୍ରକାଶ ପାଇଥିଲା ।
ସମସ୍ତଙ୍କ ସାହାରା ପାଲଟିଛନ୍ତି ଆଶାକର୍ମୀ ନୟନା ସାହୁ
ଅନୁଗୁଳ: ଦିନ ଥିଲା କ୍ଷକ୍ଷ୍ମା ରୋଗର ନା ଶୁଣିଲେ ମନରେ ଭୟ ସୃଷ୍ଟି ହେଉଥିଲା । ଦୃଷିତ ଜଳବାୟୁ ଓ ଅସାବଧନତା ଯୋଗୁ ରୋଗ ବ୍ୟାପୁଥିଲା । ହେଲେ ଏବେ ଠିକ ସମୟରେ ରୋଗ ଚିହ୍ନଟ ଓ ଚିକିତ୍ସା ପାଇଁ ସୁସ୍ଥ ହେଉଛନ୍ତି ଲୋକ । ରୋଗକୁ ଭୟ ନୁହଁ ସଠିକ ଚିକିତ୍ସା ଆବଶ୍ୟକତା ଥିବା ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିଛନ୍ତି ଅନୁଗୁଳ ଜିଲ୍ଲାର ଆଶାର୍କମୀ ନୟନା ସାହୁ । ୨୦୦୭ ମସିହାରୁ ସେ ଚେଷ୍ଟା କରି ଅନେକ ରୋଗୀଙ୍କୁ ଭଲ କରିବା ସହ ଅନେକଙ୍କ କୂଅଭ୍ୟାସ ଦୂର କରି ପାରିଛନ୍ତି ।
ଯକ୍ଷ୍ମାମୁକ୍ତ ଭାରତର ନୂଆ ଦିଗଦ୍ରଷ୍ଟା ନୟନା । ଦୃଢ ମନୋବଳ ଓ ନିରନ୍ତର ଚେଷ୍ଟା ଆଜି ଗଢିଛି ସୁସ୍ଥ ସମାଜ । ସମସ୍ତଙ୍କ ସାହାରା ସାଜିଛନ୍ତି ଆଶାକର୍ମୀ । ଅନୁଗୁଳ ଜିଲ୍ଲା ସଦର ମହକୁମା ଠାରୁ ମାତ୍ର ୧୫ କିଲୋମିଟର ଦୂରରେ ଅବସ୍ଥିତ ଦଲାବେହେରା ସାହି। ଏହି ଗାଁର ଜନସଂଖ୍ୟା ୧୫ ଶହରୁ ଅଧିକ । ଏଠି ୨୦୦୫-୦୬ ମସିହାରୁ ଆଶାକର୍ମୀ ଭାବେ ନୟନା ସାହୁ କାର୍ଯ୍ୟ କରିଆସୁଛନ୍ତି। କିଛି ବର୍ଷ ତଳେ ଏହି ଅଞ୍ଚଳରେ ଯକ୍ଷ୍ମା ରୋଗୀ ଓ ସଂକ୍ରମଣ ହାର ବେଶ ଅଧିକ ଥିଲା । ଏହି ସମୟରେ ଆଶାକର୍ମୀ ନୟନାଙ୍କ ନିସ୍ବାର୍ଥପର ଉଦ୍ୟମ ଓ ସେବାମନୋଭାବ ଯକ୍ଷ୍ମା ରୋଗୀଙ୍କୁ ଚିହ୍ନଟ ଓ ସେମାନଙ୍କ ଚିକିତ୍ସାକୁ ସରଳ କରିପାରିଥିଲା । ଏଯାବତ ସେ ୫୧ ଜଣ ଯକ୍ଷ୍ମା ରୋଗୀଙ୍କୁ DOTS ମାଧ୍ୟମରେ ପ୍ରତ୍ୟକ୍ଷ ତତ୍ତ୍ବାବଧାନରେ ଔଷଧ ଖୁଆଇ ସୁସ୍ଥ କରାଇଛନ୍ତି ।
ଗାଁର ଅନେକ ଲୋକ କାଠ କାରଖାନାରେ କାମ କରନ୍ତି । ଆଉ କାମରୁ ଫେରି ଥକାପଣ ମେଣ୍ଟାଇବାକୁ ଯାଇ ବିଭିନ୍ନ ପ୍ରକାର ନିଶା ସେବନ କରନ୍ତି । ଯାହା ଫଳରେ ଗାଁରେ ଯକ୍ଷ୍ମା ଉଗ୍ର ରୂପ ନେଉଥିଲା । ଏହି ସମୟରେ ନୟନା ଦିଦି `ସରକାରଙ୍କ ଯକ୍ଷ୍ମା ହାରିବ ଦେଶ ଜିତିବ’ସ୍ଲୋଗାନକୁ ସାକାର କରିବାକୁ ଚେଷ୍ଟା ଆରମ୍ଭ କରିଥିଲେ। କଫ ନମୁନା ସଂଗ୍ରହ କରି ପରୀକ୍ଷା ଠାରୁ ଆରମ୍ଭ କରି ଲୋକଙ୍କ ମଧ୍ୟରେ ସେଚତନତା ସୃଷ୍ଟି କରିଥିଲେ। ନୟନାଙ୍କ କାର୍ଯ୍ୟକୁ ଏବେ ସବୁ ମହଲରୁ ପ୍ରଶଂସା କରାଯାଇଛି ।
ଉପକୂଳ ଅପେକ୍ଷା ଆଭ୍ୟନ୍ତରରେ ବଢ଼ିଛି ତାତି, ୨୮ ତାରିଖରୁ ସ୍ଥିତି ହେବ ସାଂଘାତିକ
ଭୁବନେଶ୍ବର: ସାରା ରାଜ୍ୟରେ ଉପରମୁହାଁ ହୋଇଛି ପାରଦ। ଉପକୂଳ ଅପେକ୍ଷା ଆଭ୍ୟନ୍ତରୀଣ ଓଡ଼ିଶାରେ ବଢିଛି ତାତି। ଆସନ୍ତା ୨୮ ତାରିଖରୁ ଆହୁରି ଜଳିବ ଓଡ଼ିଶା। ପଶ୍ଚିମ ଓଡ଼ିଶାରେ ତାତି ୪୦ ଡିଗ୍ରୀ କିମ୍ବା ଅଧିକ ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ବିଶେଷ କରି ବଲାଙ୍ଗିର, ସୋନପୁର, ବୌଦ୍ଧ, ସମ୍ବଲପୁର, ବରଗଡ, କଳାହାଣ୍ଡି, କନ୍ଧମାଳ, ଗଜପତି, ମାଲକାନଗିରି ଜିଲ୍ଲା ସମେତ ଟୁଇନ୍ସିଟି କଟକ ଏବଂ ଭୁବନେଶ୍ବରରେ ହଟ୍ ଓ୍ବେଦର କଣ୍ଡିସନ ଦେଖାଦେବ। ଗତ କାଲି ଠାରୁ ରାଜ୍ୟରେ ମେଘ ମୁକ୍ତ ଆକାଶ ସହ ଶୁଖିଲା ପାଗ ଜାରି ରହିଛି। ଏହାସହ ଆଭ୍ୟନ୍ତରୀଣ ଓଡ଼ିଶାରେ ବାୟୁମଣ୍ଡଳରେ ଶୁଷ୍କତା ବୃଦ୍ଧି ପାଇଛି। ପ୍ରଭାବରେ ତାତି ବଢିଛି।ଅଧିକାଂଶ ସହରର ତାପମାତ୍ରା ୩୫ ଡିଗ୍ରୀରୁ ୩୮ ଡିଗ୍ରୀରେ ପହଞ୍ଚିଛି। ଆସନ୍ତା ୩ ଦିନ ପର୍ଯ୍ୟନ୍ତ ରାଜ୍ୟରେ ତାତି ଆହୁରି ବୃଦ୍ଧି ପାଇବ ବୋଲି ପାଣିପାଗ କେନ୍ଦ୍ର ସତର୍କ କରାଇଛି । ବିଶେଷ କରି ଆଭ୍ୟନ୍ତରୀଣ ଓଡ଼ିଶା ବା ପଶ୍ଚିମ ଓଡ଼ିଶାରେ ସ୍ବାଭାବିକ ଠାରୁ ୩ ରୁ ୫ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବ। ସେପଟେ ଆସନ୍ତା କାଲି ରାଜ୍ୟରେ ଏକ ପଶ୍ଚିମା ଝଡ ସକ୍ରିୟ ହେବାର ସମ୍ଭାବନା ରହିଛି। ପ୍ରଭାବରେ ୨୫ ଏବଂ ୨୬ ତାରିଖରେ ଉତ୍ତର ଓଡ଼ିଶାର ବାଲେଶ୍ବର, ଭଦ୍ରକ, ଯାଜପୁର, ମୟୁରଭଞ୍ଜ, କେନ୍ଦୁଝର, ସୁନ୍ଦରଗଡ ଏବଂ ଝାରସୁଗୁଡା ଜିଲ୍ଲାରେ ପାଗ ମେଘୁଆ ରହିବା ସହ କିଛି ସ୍ଥାନରେ ହାଲୁକା ବର୍ଷା ହେବାର ସମ୍ଭାବନା ରହିଛି। କିନ୍ତୁ ବାକି ଓଡିଶାର ଜିଲ୍ଲା ଗୁଡିକରେ ପାଗ ଶୁଖିଲା ରହିବା ସହ ତାତି ଅନୁଭୁତ ହେବ। ୨୭, ୨୮, ୨୯ ଏବଂ ୩୦ ତାରିଖରେ ସାରା ରାଜ୍ୟରେ ଅସମ୍ଭାଳ ତାତି ନେଇ ଆକଳନ କରାଯାଇଛି। ବର୍ତ୍ତମାନ ରାଜ୍ୟରେ ପାଗ ଶୁଖିଲା ରହିଥିଲେ ମଧ୍ୟ ରାଜ୍ୟକୁ ପ୍ରବେଶ କରୁଥିବା ପ୍ରଚୁର ପରିମାଣର ସାମୁଦ୍ରିକ ପବନ ପ୍ରଭାବରେ ତାତି ଯେତିକି ବୃଦ୍ଧି ହେବା କଥା ତାହା ହେଉନାହିଁ।
ଆଶୀର୍ବାଦ ମାଇକ୍ରୋ ଫାଇନାନ୍ସ ନାଁରେ ସାଂଘାତିକ ଅଭିଯୋଗ
ରାଜନଗର: ସୁନା ବନ୍ଧକ ରଖିଥିବା ଗ୍ରାହକଙ୍କୁ ନ ଜଣାଇ ସୁନା ନିଲାମ କରିଦେଲା ଘରୋଇ ଫାଇନାନ୍ସ ସଂସ୍ଥା। ଆଶୀର୍ବାଦ ମାଇକ୍ରୋ ଫାଇନାନ୍ସ ନାମକ ସଂସ୍ଥା ନାଁରେ ଆସିଛି ଏଭଳି ସାଂଘାତିକ ଅଭିଯୋଗ। କେନ୍ଦ୍ରାପଡ଼ା ରାଜନଗର ସ୍ଥିତ ଆଶୀର୍ବାଦ ମାଇକ୍ରୋ ଫାଇନାନ୍ସ ସଂସ୍ଥାର ନାଁରେ ଆସିଛି ଏ ସାଂଘାତିକ ଘୋଟାଲା। ନିଜେ ଫାଇନାସ ସଂସ୍ଥାର ଶାଖା ପରିଚାଳକ ଏ ଅନିୟମିିତତା କରିଥିବା ମାନିଛନ୍ତି। ରିଜିଓନାଲ ମ୍ୟାନେଜର ଜୋର ଜବରଦସ୍ତ ଡରାଇ ଧମକାଇ ଏହି ସୁନା ନିଲାମ କରିବାକୁ ବାଧ୍ୟ କରିଥିଲେ ବୋଲି କହିଛନ୍ତି ଫାଇନାନ୍ସ ସଂସ୍ଥା ଶାଖା ପରିଚାଳକ। ରାଜନଗର ବ୍ଲକ କୋଇଲିପୁର ଅଂଚଳର ଦିଲ୍ଲୀପ କୁମାର ବେହେରା ତାଙ୍କ ଓ ପତ୍ନୀ ମୌସୁମୀ ପ୍ରିୟଦର୍ଶିନୀ ଆଶୀର୍ବାଦ ମାଇକ୍ରୋ ଫାଇନାନ୍ସ ସଂସ୍ଥାରେ ୨୦୨୩ ଫେବୃୟାରୀ ୧୦ତାରିଖରେ ୨୧୦ ଗ୍ରାମ ସୁନା ବନ୍ଧକ ରଖି ୮ ଲକ୍ଷ ୧୦ ହଜାର ଟଙ୍କା ଋଣ ନେଇଥିଲେ। ନଭେମ୍ବର ୨୦୨୩ରେ ସୁଧ ବାବଦକୁ ୧ ଲକ୍ଷ ଟଙ୍କା ଜମା ମଧ୍ୟ କରିଛନ୍ତି। ବାକି ଟଙ୍କା ପରିଶୋଧ କରି ସୁନା ମୁକୁଳାଇବାକୁ ଗଲାବେଳେ ସୁନା ନିଲାମ ହୋଇଛି ଜାଣିବାକୁ ପାଇଥିଲେ। ଏ ନେଇ ମୌସୁମୀ ପ୍ରିୟଦର୍ଶିନୀ ରାଜନଗର ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା। ପୋଲିସ ଆଗରେ ବ୍ରାଞ୍ଚ ମ୍ୟାନେଜର ତାଙ୍କୁ ଡରାଇ ଧମକାଇ ସୁନା ଦେବାକୁ ରିଜିଓନାଲ ମ୍ୟାନେଜର କହିଥିବା କହିଛନ୍ତି। ପୋଲିସକୁ ବ୍ରାଂଚ ମ୍ୟାନେଜର ଲେଖିକି ଏହି ସୂଚନା ଦେବା ପରେ କେଳେଙ୍କାରୀକୁ ସାମ୍ନାକୁ ଆସିଛି।
ଶାହାରୁଖଙ୍କ ସହ ପୁରୁଣା ଭିଡିଓ ସେୟାର କଲେ ପ୍ରୀତି ଜିଣ୍ଟା, ଫ୍ୟାନ୍ସ କହିଲେ..
ନନ୍ଦିଘୋଷ ବ୍ୟୁରୋ: ବଲିଉଡ ଅଭିନେତ୍ରୀ ପ୍ରୀତି ଜିଣ୍ଟା ଏକ ପୁରୁଣା ଭିଡିଓ ନିଜର ଇନଷ୍ଟାଗ୍ରାମ ପେଜରେ ସେୟାର କରିଛନ୍ତି । ଯେଉଁଥିରେ ସେ ଶାହାରୁଖ ଖାନଙ୍କ ସହ ନଜର ଆସିଛନ୍ତି । ’ଜିଆ ଜଲେ’ ଗୀତରେ ଉଭୟ ଡ୍ୟାନ୍ସ କରିଥିବା ନଜର ଆସିଛନ୍ତି । ଯାହାକି ଉଭୟଙ୍କ ବହୁ ଚର୍ଚ୍ଚିତ ଫିଲ୍ମ ବୀର ଜାରା’ ଫିଲ୍ମର ଗୀତ । ଏହି ଫିଲ୍ମଟି ଉଭୟଙ୍କ କେମେଷ୍ଟ୍ରିକୁ ବେଶ ପସନ୍ଦ କରିଥିଲେ ଦର୍ଶକେ । ତେବେ ଏହି ଭିଡିଓଟି ଏକ ଆଓ୍ବାର୍ଡ ଶୋ’ ସମୟର । ରିହର୍ସାଲ କରୁଥିବାବେଳେ ଉଭୟଙ୍କ ଏହି ଭିଡିଓଟି ରହିଥିଲା । ଦୀର୍ଘ ବର୍ଷପରେ ପ୍ରୀତି ଏହି ଭିଡିଓଟି ସେୟାର କରିଥିବାବେଳେ ଫ୍ୟାନ୍ସମାନେ ଏହାକୁ ବେଶ ପସନ୍ଦ କରିଥିବା ଦେଖିବାକୁ ମିଳିଛି । ତେବେ ଅନେକ ପ୍ରଶଂସକାମାନେ ବହୁ ମଜାଳିଆ କମେଣ୍ଟମାନ ଦେଇଥିବା ଦେଖିବାକୁ ମିଳିଛି । କହିଛନ୍ତି କି, ବୀର ଜାରା ଫିଲ୍ମକୁ ମନେ ପକାଇ ଦେଇଛନ୍ତି । ଏହା ଆମ ପିଲାଦିନର ଫିଲ୍ମ । ଏଭଳି ମଜାଳିଆ କମେଣ୍ଟମାନ କରିଛନ୍ତି ବହୁ ଫ୍ୟାନ । ଜଣେ ଲେଖିଛନ୍ତି କି, ଡିଡିଏଲଜେ ଠାରୁ ଏହି ଫିଲ୍ମ ମୋର ବେଶ ପସନ୍ଦ ଥିଲା ।
https://www.instagram.com/realpz/?utm_source=ig_embed&ig_rid=d740d9e0-7377-4621-9a2b-4702242b537c
ସୋସିଆଲ ମିଡିଆରେ ଭାଇରାଲ ହେଉଛି ଏହି ଫଟୋ , ’ରାମାୟଣ’ ପାଇଁ ପ୍ରସ୍ତୁତ ହେଉଛନ୍ତି କି ରଣବୀର?
ନନ୍ଦିଘୋଷ ବ୍ୟୁରୋ: ନିର୍ଦ୍ଦେଶକ ନୀତିଶ ତିଓ୍ବାରୀ ବଡ଼ ପରଦାରେ ରିଲିଜ କରିବେ ’ରାମାୟଣ’ । ଏହି ଫିଲ୍ମକୁ ନେଇ ଚର୍ଚ୍ଚା ଆରମ୍ଭ ହୋଇଥିବାବେଳେ ଏଯାବତ କୌଣସି ଅଫିସିଆଲ ସୂଚନା ଦିଆଯାଇନାହିଁ । ମାତ୍ର ଷ୍ଟାରକାଷ୍ଟକୁ ନେଇ ସୋସିଆଲ ମିଡିଆରେ ବେଶ ଚର୍ଚ୍ଚା ହେଉଛି । କୁହାଯାଉଛି କି, ରଣବୀର କପୁର ଏହି ଫିଲ୍ମରେ ରାମ ଭୂମିକାରେ ନଜର ଆସିବେ । ଏବେ ସୋସିଆଲ ମିଡିଆରେ ରଣବୀର କପୁରଙ୍କ ଏକ ଫଟୋ ଭାଇରାଲ ହେବାରେ ଲାଗିଛି । ଯେଉଁଥିରେ ହାଜଟ୍ୟାଗ ରାମାୟଣ ମଧ୍ୟ ରହିଛି । ଜିମରେ ଓଲଟା ଲଟକିଥିବାର ଏକ ଫଟୋ ଇନଷ୍ଟାଗ୍ରାମ ପେଜରେ ସେୟାର ହୋଇଛି । ଯାହାକୁ ୟୁଜର୍ସମାନେ ବେଶ ପସନ୍ଦ କରୁଥିବାବେଳେ ସେୟାର ମଧ୍ୟ କରୁଛନ୍ତି । ’ଆନିମଲ’ ବକ୍ସ ଅଫିସରେ ହିଟ୍ ହେବା ପରେ ରଣବୀରଙ୍କ କ୍ରେଜ୍ ମଧ୍ୟ ବଢ଼ିଯାଇଛି । ଦର୍ଶକେ ତାଙ୍କ ଅଭିନୟକୁ ବେଶ ପସନ୍ଦ କରୁଥିବାବେଳେ ଫ୍ୟାନ ଫଲୋର୍ସଙ୍କ ସଂଖ୍ୟା ମଧ୍ୟ ବଢ଼ିବାରେ ଲାଗିଛି ।
https://www.instagram.com/trainingwithnam/?utm_source=ig_embed&ig_rid=77cf887f-adc9-44c0-a199-587b49c4f739
ଏକ ରିପୋର୍ଟରେ ପ୍ରକାଶ ପାଇଛି କି, ଏପ୍ରିଲ ମାସରୁ ରାମାୟଣ ଫିଲ୍ମର ସୁଟିଂ ଆରମ୍ଭ ହୋଇପାରେ । ପ୍ରଯୋଜନା ସଂସ୍ଥା ପକ୍ଷରୁ ପ୍ରସ୍ତୁତି ଆରମ୍ଭ କରାଯାଇଥିବା କୁହାଯାଉଛି । ତେବେ ଏହି ଫିଲ୍ମରେ କଳାକାରଙ୍କ ମଧ୍ୟରେ ସାଇ ପଲ୍ଲବୀ ସୀତା, ୟଶ ରାବଣ ଏବଂ ସନ୍ନି ଦେଓଲ ହନୁମାନ ଭୂମିକାରେ ନଜର ଆସିପାରନ୍ତି । ଲାରା ଦତ୍ତ ମଧ୍ୟ ଏହି ଚଳଚିତ୍ରରେ ଅଭିନୟ କରିବେ ବୋଲି ଏକ ରିପୋର୍ଟରେ ପ୍ରକାଶ ପାଇଛି । କିନ୍ତୁ ଏଯାବତ ଅଫିସିଆଲି କୌଣସି ଘୋଷଣା କରାଯାଇନାହିଁ ।