ଭୁବନେଶ୍ବର: ଗୁରୁବାରଠାରୁ ଆରମ୍ଭ ହେବ ଯୁକ୍ତ ଦୁଇ କଲେଜରେ NEET ଓ JEE କୋଚିଂ। ଭର୍ଚୁଆଲରେ ଯୁକ୍ତ ଦୁଇ ଛାତ୍ରଛାତ୍ରୀ ପାଇବେ କୋଚିଂ । ସବୁ ସରକାରୀ ଓ ଅନୁଦାନପ୍ରାପ୍ତ ବେସରକାରୀ କଲେଜରେ ଆରମ୍ଭ ହେବ କୋଚିଂ । ଏଥିଲାଗି କଲେଜରେ ସ୍ମାର୍ଟ TV ଓ interactive panel install କରିବାକୁ ନିର୍ଦ୍ଦେଶ ଦିଆଯାଇଛି । ସର୍ବ ଭାରତୀୟ ମେଡିକାଲ ପ୍ରବେଶିକା ପରୀକ୍ଷା, neet ଓ ଇଞ୍ଜିନିୟରିଂ ପ୍ରବେଶିକା ପରୀକ୍ଷା jee ରେ ଓଡ଼ିଆ ଛାତ୍ରଛାତ୍ରୀଙ୍କ ସଫଳତା ହାର ବଢ଼ାଇବାକୁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ଯୋଜନା ଆରମ୍ଭ ହୋଇଛି । ପ୍ରତିଦିନ କୋଚିଂ କ୍ଲାସର ଉପସ୍ଥାନ ସମ୍ପର୍କରେ ନୋଡାଲ ଅଫିସର ନିର୍ଦ୍ଦେଶାଳୟକୁ ଅବଗତ କରାଇବେ । ଅନଲାଇନ୍ କ୍ଲାସ ସମୟରେ କଲେଜ୍ କର୍ତ୍ତୃପକ୍ଷ ପିଲାଙ୍କୁ ସହାୟତା କରିବାକୁ ମେଣ୍ଟର ଟିଚରଙ୍କୁ ନିଯୁକ୍ତ କରିବେ ।
ଅର୍ଥତତ୍ତ୍ବ ଚିଟଫଣ୍ଡ କମ୍ପାନୀର ସମ୍ପତ୍ତି ହେବ ବାଜ୍ୟାପ୍ତ
କଟକ: ଅର୍ଥତତ୍ତ୍ବ ଚିଟଫଣ୍ଡ କମ୍ପାନୀର ସମ୍ପତ୍ତି ହେବ ବାଜ୍ୟାପ୍ତ । ନିର୍ଦ୍ଦେଶ ଦେଲେ କଟକ ସ୍ବତନ୍ତ୍ର ଓପିଆଇଡି କୋର୍ଟ । ଉଭୟ ସ୍ଥାବର ଓ ଅସ୍ଥାବର ସମ୍ପତ୍ତି ବାଜ୍ୟାପ୍ତ ପାଇଁ ନିର୍ଦ୍ଦେଶ ଦେଇଛନ୍ତି କୋର୍ଟ । ୧୧୦ ଏକର ଭୂସମ୍ପତ୍ତି ନିଲାମ କରି ଜମାକାରୀଙ୍କ ମଧ୍ୟରେ ବାଣ୍ଟି ଦେବାକୁ ନିର୍ଦ୍ଦେଶ ଦିଆଯାଇଛି । ଭୁବନେଶ୍ବର, ବେଗୁନିଆ, ଟାଙ୍ଗୀ, ଭଦ୍ରକ, ବାଲେଶ୍ବର, ଗଞ୍ଜାମ, ପୁରୀ, ଅନୁଗୁଳରେ ରହିଛି ଏହି ଭୂସମ୍ପତ୍ତି ।ବ୍ୟାଙ୍କ ଜମା ୨ କୋଟି ୧୭ ଲକ୍ଷ ଓ ୧୧ ଟି ଦାମୀ ଗାଡି ମଧ୍ୟ ନିଲାମ ପାଇଁ ନିର୍ଦ୍ଦେଶ ଦେଇଛନ୍ତି କୋର୍ଟ । ଅର୍ଥତତ୍ତ୍ବ ନାଁରେ ପ୍ରାୟ ୬୦୦ କୋଟି ଟଙ୍କାର ଠକେଇ ଅଭିଯୋଗ ହୋଇଥିଲା । ୨୦୦୯ ରୁ ୨୦୧୨ ମଧ୍ୟରେ କରିଥିଲେ ଏହି ଠକେଇ । ଏହି ମାମଲାରେ ଅର୍ଥତତ୍ତ୍ବ ପରିଚାଳନା ନିର୍ଦ୍ଦେଶକ ପ୍ରଦୀପ ସେଠୀ ଗିରଫ ହୋଇ ଜେଲରେ ରହିଥିଲେ ।
ଦିବ୍ୟାଙ୍ଗ ଶିକ୍ଷାର୍ଥୀଙ୍କ ମୁହଁରେ ହସ, ପରିଦର୍ଶନ କରିବେ ରାଜ୍ୟର ବିଭିନ୍ନ ସ୍ଥାନ
ସୁନ୍ଦରଗଡ଼: ଦିବ୍ୟାଙ୍ଗ ଶିକ୍ଷାର୍ଥୀଙ୍କ ମୁହଁରେ ହସ । ସୁନ୍ଦରଗଡ ଦୃଷ୍ଟିହୀନ ବଧିର ବିଦ୍ୟାଳୟର ୫୦ରୁ ଉର୍ଦ୍ଧ୍ବ ଛାତ୍ର ଛାତ୍ରୀ ୫ ଦିନ ଧରି ରାଜ୍ୟର ବିଭିନ୍ନ ସ୍ଥାନ ବୁଲି ପରିଦର୍ଶନ କରିବେ । ଜୟ ଜଗନ୍ନାଥ ଟ୍ରକର୍ସ ଆସୋସିଏସନ ପକ୍ଷରୁ ସେମାନଙ୍କ ବୁଲାବୁଲିର ସମସ୍ତ ଖର୍ଚ୍ଚ ବହନ ହୋଇଛି । ପିଲାଙ୍କ ମୁହଁରେ ହସ ।
କିଏ ଶୁଣି ପାରେ ନାହିଁ , ଆଉ କିଏ କହିପାରେ ନାହିଁ । ହେଲେ ସାଧାରଣ ମଣିଷଟେ ପରି ତାଙ୍କର ବି ଇଚ୍ଛା କେବଳ ପାଠପଢା ନୁହେଁ ପିକନିକ ଋତୁର ମଜାନେବେ । ବୁଲାବୁଲି କରି ନୂଆନୂଆ ସ୍ଥାନ ଦେଖିବେ । ତାଙ୍କର ଏହି ଇଚ୍ଛା ପୂରଣ ହେଉଛି । ସୁନ୍ଦରଗଡ ଦୃଷ୍ଟିହୀନ ବଧିର ବିଦ୍ୟାଳୟର ୫୦ରୁ ଉର୍ଦ୍ଧ୍ବ ଛାତ୍ର ଛାତ୍ରୀ ୫ ଦିନ ଧରି ରାଜ୍ୟର ବଭିନ୍ନ ସ୍ଥାନ ବୁଲି ପରିଦର୍ଶନ କରିବେ । ଦେବଗଡ, ଘଟଗାଁ , ଭୁବନେଶ୍ୱର , ପୁରୀ , କୋଣାର୍କ ଏବଂ ଚିଲିକା ଆଦି ସ୍ଥାନ ପରିଦର୍ଶନ କରି ଆସନ୍ତା ୭ ତାରିଖ ସୁନ୍ଦରଗଡ ଫେରିବେ । ଯେଉଁଥିପାଇଁ ବେଶ୍ ଖୁସି ଅଛନ୍ତି ଶିକ୍ଷାର୍ଥୀ ।
ରାଜବାଟୀ ସ୍ଥିତ ସମଲେଇ ମନ୍ଦିର ଠାରେ ପୂଜାର୍ଚ୍ଚନା ପରେ ଏକ ସ୍ୱତନ୍ତ୍ର ବସରେ ସମସ୍ତ ଛାତ୍ରଛାତ୍ରୀ ଶିକ୍ଷକଙ୍କ ସହିତ ଯାତ୍ରା ଆରମ୍ଭ କରିଥିଲେ । ଏହାକୁ ଜୟ ଜଗନ୍ନାଥ ଟ୍ରକର୍ସ ଆସୋସିଏସନର ସଭାପତି ସଞ୍ଜୟ ନନ୍ଦ ସବୁଜ ପତାକା ଦେଖାଇ ଶୁଭେଚ୍ଛା ଜଣାଇଥିଲେ। ଏହି ଯାତ୍ରାର ସମସ୍ତ ଖର୍ଚ୍ଚ ଆସୋସିଏସନ ବହନ କରିବ ବୋଲି କହିବା ସହିତ ଏପରି ଅସହାୟଙ୍କ ପ୍ରତି ସବୁବେଳେ ଅନୁଷ୍ଠାନ ସାହାଯ୍ୟର ହାତ ବଢାଇବ ବୋଲି କହିଛନ୍ତି ସଭାପତି ସଞ୍ଜୟ ନନ୍ଦ।
ପ୍ରେମିକକୁ ଦେଖାକରିବାରୁ ଜୀବନରୁ ମାରିଦେଲା ବାପା
ଉତ୍ତରପ୍ରଦେଶ:ଝିଅକୁ ମାରିଦେଲା ନୃଶଂସ ବାପା । ବୟଫ୍ରେଣ୍ଡ ସହ ଦେଖାକରିବାକୁ ଯାଇଥିବା ଜାଣି ଝିଅକୁ ମାରିଦେଲେ ବାପା । ଏଭଳି କିଛି ଅଭାବନୀୟ ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶର ବୁଡାନ୍ ଜିଲ୍ଲାରେ । ସୂଚନା ଅନୁସାରେ ଝିଅ ବୟଫ୍ରେଣ୍ଡ ସହ ଦେଖାକରିବାକୁ ଭୋର୍ ୪ଟାରେ ଘରୁ ବାହାରିଥିଲା ବେଳେ ବାପା ମଧ୍ୟ ଝିଅର ପଛେ ପଛେ ଯାଇଥିଲେ। ଝିଅ ବୟଫ୍ରେଣ୍ଡ ସହ ଦେଖାକରିବାର ଦେଖି ବ୍ୟକ୍ତି ଜଣକ ଉଭୟଙ୍କୁ କୋଦାଳରେ ପିଟି ପିଟି ମାରିଦେଲେ । ପରେ ସେ ସେହି କୋଦାଳକୁ ନେଇ ପୋଲିସ୍ ଷ୍ଟେସନ୍ ରେ ପହଞ୍ଚି ଆତ୍ମସର୍ମପଣ କରିଥିଲେ । ବୁଡାନ୍ ର ସିନିୟର୍ ସୁପରିଟେଣ୍ଡେଡ୍ ଅଫିସର୍ କହିଛନ୍ତି ଯେ , ଗୋଟେ ୧୯ ବର୍ଷୀୟା ଝିଅ ଏବଂ ତାର ୨୦ ବର୍ଷୀୟ ବୟଫ୍ରେଣ୍ଡକୁ ଝିଅର ବାପା ଏବଂ ସମ୍ପର୍କୀୟ ମିଳିମିଶି ହତ୍ୟା କରିଛନ୍ତି । ଅଭିଯୁକ୍ତ ବାପା ମହେଶ ପୋଲିସ୍ ଷ୍ଟେସନରେ ପହଞ୍ଚି ଆତ୍ମସର୍ମପଣ କଲା । ସେ ଆହୁରି ମଧ୍ୟ କହିଛନ୍ତି ଯେ , ଆମେ ଆଇପିସି ଧାରା ୩୦୨ରେ ହତ୍ୟା, ୧୪୭ରେ ଦଙ୍ଗାରେ ମାମଲା ରୁଜୁ କରାଯାଇଛି । ଝିଅର ବାପା, ମାଆ ଏବଂ ଝିଅର ସମ୍ପର୍କୀୟଙ୍କୁ ଗିରଫ କରାଯାଇଛି । ଝିଅ ,ପୁଅ ଦୁଇଜଣ ଯାକ ଏକା ଜାତିର ହୋଇଥିବା ବେଳେ ଉଭୟେ ଉଭୟଙ୍କୁ ୨ବର୍ଷ ହେଲା ଜାଣିଥିଲେ। ଦୁଇଜଣଙ୍କ ମୃତଦେହକୁ ପୋଲିସ୍ ପୋଷ୍ଟମର୍ଟମ ପାଇଁ ପଠେଇଦେଇଛି । ଅଭିଯୁକ୍ତ ଝିଅର ବାପାକୁ ଜେରା କଲାବେଳେ ସେ ପୋଲିସ୍ କୁ କହିଥିଲେ ଯେ, ତାଙ୍କ ଝିଅ ପଡୋଶୀଙ୍କ ପୁଅ ସହ ଲୁଚି ପଳେଇଯାଇ ବାହାହୋଇଯିବ ବୋଲି ଜାଣିବାକୁ ପାଇଥିଲେ । ସେଥିପାଇଁ ସେ ଉଭୟଙ୍କ ଉପରେ ନଜର ରଖିଥିଲେ । ମଙ୍ଗଳବାର ଭୋର୍ ୪ଟାରେ ତାଙ୍କ ଝିଅ ଯେତେବେଳେ ବୟଫ୍ରେଣ୍ଡ ସହ ଦେଖାକରିବାକୁ ଯାଇଥିଲା । ଅଭିଯୁକ୍ତ ବାପା ତା ପଛେ ପଛେ ଯାଇଥିଲେ । ଏବଂ ଉଭୟଙ୍କୁ ଧରି ପକାଇ କୋଦାଳରେ ପିଟି ପିଟି ମାରିଦେଇଥିଲେ ।
ଜନ୍ମକଲା ମା’ କୋଳକୁ ଯିବନି ସମ୍ବଲପୁର ବୋରଓ୍ବେଲରୁ ଉଦ୍ଧାର ହୋଇଥିବା ଶିଶୁ କନ୍ୟା
ସମ୍ବଲପୁର: ଜନ୍ମକଲା ମା’ କୋଳକୁ ଯିବନି ବିଜୟିନୀ । ସମ୍ବଲପୁର ଜିଲ୍ଲା ପ୍ରଶାସନ ନେଲା ନିଷ୍ପତ୍ତି । ଜନ୍ମକଲା ଝିଅକୁ ବୋରଓ୍ବେଲରେ ଫିଙ୍ଗିଥିବା ସ୍ବିକାର ପରେ ଜିଲ୍ଲା ପ୍ରଶାସନର ନିଷ୍ପତ୍ତି । ଜିଲ୍ଲା ପ୍ରଶାସନର ଶିଶୁ ପାଳନ କେନ୍ଦ୍ରରେ ରହିବ ବିଜୟିନୀ । ପରେ ପୋଷ୍ୟ ସନ୍ତାନ ପ୍ରକ୍ରିୟାରେ କୌଣସି ଦମ୍ପତ୍ତିଙ୍କୁ ଦିଆଯିବ ବୋଲି ପ୍ରଶାସନ ନିଷ୍ପତ୍ତି ନେଇଛି । ଗତ ଡିସେମ୍ବର ୧୨ ତାରିଖରେ ଜଙ୍ଗଲର ଏକ ପରିତ୍ୟକ୍ତ ବୋରଓ୍ବେଲରୁ ବିଜୟିନୀ ଉଦ୍ଧାର ହୋଇଥିଲା । ଏବେ ଭିମସାରରେ ତାର ଚିକିତ୍ସା କରାଯାଉଥିବାବେଳେ ତାର ନାମକରଣ ହୋଇଛି । ଉଦ୍ଧାର ଶିଶୁକନ୍ୟା ବିଜୟିନୀର ବାପାମାଆଙ୍କୁ ଠାବ କରିଥିଲା ପୋଲିସ । ମାଆଙ୍କ ମାନସିକ ସ୍ଥିତି ଠିକ୍ ନଥିବାରୁ ତାଙ୍କୁ କଟକ ଏସସିବିରେ ଚିକିତ୍ସିତ ହେଉଥିଲେ । ମଙ୍ଗଳବାର ତାଙ୍କୁ ଡିସଚାର୍ଜ କରାଯାଇଛି । ଶିଶୁକନ୍ୟାଟି ତାଙ୍କର ବୋଲି ସେ ସ୍ବୀକାର କରିଥିବାବେଳେ ମାନସିକ ସ୍ଥିତି ଠିକ ନଥିବାରୁ ବୋରଓ୍ବେଲରେ ଫିଙ୍ଗିଦେଇଥିବା କହିଥିଲେ ।
ପିକନିକ୍ ପାଇଁ ଉଦୟଗିରିରେ ଜମୁଛି ପର୍ଯ୍ୟଟକଙ୍କ ଭିଡ଼
ଯାଜପୁର: ଆରମ୍ଭ ହୋଇଛି ପର୍ଯ୍ୟଟନ ଋତୁ । ଶୀତରେ ଚାଲିଛି ପିକନିକର ମଜା । ଯାଜପୁରର ବୌଦ୍ଧ କୀର୍ତ୍ତିରାଜି ବହନ କରୁଥିବା ଉଦୟଗିରିରେ ମଧ୍ୟ ଭିଡ । ବୌଦ୍ଧ ଐତିହ୍ୟକୁ ଦେଖିବା ପାଇଁ ଚଳିତ ଥର ମଧ୍ୟ ପରଞ୍ଚିଛନ୍ତି ପର୍ଯ୍ୟଟକ । ଲୋକଙ୍କ ମନରେ ନାହିଁ ନଥିବା ଉତ୍ସାହ। ଏଠାକାର ସୁନ୍ଦର ଓ ଶାନ୍ତ ପରିବେଶ ପର୍ଯ୍ୟଟକଙ୍କୁ କରିଥାଏ ଆକର୍ଷିତ।
ଆରମ୍ଭ ହୋଇଛି ପର୍ଯ୍ୟଟନ ଋତୁ । ଶୀତରେ ଚାଲିଛି ପିକନିକର ମଜା । ସାଙ୍ଗ ସାଥୀ ପରିବାର ସହ ବିଭିନ୍ନ ପର୍ଯ୍ୟଟନ ସ୍ଥଳ ବୁଲୁଛନ୍ତି ଲୋକେ । ଯାଜପୁରର ବୌଦ୍ଧ କୀର୍ତ୍ତିରାଜି ବହନ କରୁଥିବା ଉଦୟଗିରିରେ ମଧ୍ୟ ଭିଡ । ବୌଦ୍ଧ ଏୗତିହକୁ ଦେଖିବା ପାଇଁ ଚଳିତ ଥର ମଧ୍ୟ ପରଞ୍ଚିଛନ୍ତି ପର୍ଯ୍ୟଟକ । ଲୋକଙ୍କ ମନରେ ନାହିଁ ନଥିବା ଉତ୍ସାହ। ଏଠାକାର ସୁନ୍ଦର ଓ ଶାନ୍ତ ପରିବେଶ ପର୍ଯ୍ୟଟକଙ୍କୁ କରିଥାଏ ଆକର୍ଷିତ। ବୌଦ୍ଧ ଏୗତିହ୍ୟ ମଧ୍ୟରୁ ଉଦୟଗିରିରେ ରହିଛି ଦୁଇଟି ବୌଦ୍ଧ ବିହାର, ବୁଦ୍ଧଙ୍କ ମୂର୍ତ୍ତି, ଅନେକ ବୌଦ୍ଧ ସ୍ତୁପ ସହ ବହୁ ପୁରାତନ ବାମ୍ଫି। ଯାହାକୁ ଦେଖିବାକୁ ଦୂର ଦୂରାନ୍ତରରୁ ଆସନ୍ତି ପର୍ଯ୍ୟଟକ ।
କେନ୍ଦ୍ର ପତ୍ନତତ୍ୱ ବିଭାଗ ପକ୍ଷରୁ ଉଦୟଗିରିରୁ ବହୁ ବୌଦ୍ଧ କୀର୍ତ୍ତିରାଜି ଉଦ୍ଧାର କରାଯାଇଛି। ଏହାର ସଠିକ ଭାବେ ରକ୍ଷଣବେକ୍ଷଣ ପାଇଁ ସ୍ଥାନୀୟ ଲୋକେ ନିବେଦନ କରିଛନ୍ତି। ପର୍ଯ୍ୟଟନ ସ୍ଥଳରେ ରାସ୍ତା , ଶୌଚାଳୟ ଆଦି କାମ ସଠିକ ହୋଇପାରିଲେ ବୁଲାବୁଲି ସମୟରେ ଆଉ କୌଣସି ସମସ୍ୟା ରୁହନ୍ତାନି ବୋଲି ପର୍ଯ୍ୟଟକ କୁହନ୍ତି ।
ଏଣିକି କଟକ SCB ମେଡିକାଲରେ କରାଯିବ ଲିଭର ପ୍ରତିରୋପଣ
କଟକ: କଟକ SCB ମେଡିକାଲରେ ଏଣିକି କରାଯିବ ଲିଭର ପ୍ରତିରୋପଣ । ଏଥିପାଇଁ ହାଇଦ୍ରାବାଦ ସ୍ଥିତ ଏସିଆ ଇନଷ୍ଟିଚ୍ୟୁଟ୍ ଅଫ ଲିଭର ଟ୍ରାନ୍ସପ୍ଲାଣ୍ଟ ସହ ହୋଇଛି ବୁଝାମଣା । ଏହା ସମ୍ଭବ ହେଲେ ରୋଗୀ ତାଙ୍କ ସମ୍ପର୍କୀୟଙ୍କୁ ଆଉ ବାହାର ରାଜ୍ୟର ହସ୍ପିଟାଲ ଉପରେ ନିର୍ଭର କରିବାକୁ ପଡ଼ିବ ନାହିଁ । ସମ୍ପୂର୍ଣ୍ଣ ମାଗଣାରେ ଏଠାରେ ହେବ ବ୍ୟୟବହୁଳ ଲିଭର ପ୍ରତିରୋପଣ । ୫ ତାରିଖରେ ହାଇଦ୍ରାବାଦରୁ ବିଶେଷଜ୍ଞ ଟିମ ଆସି ଭିତ୍ତିଭୂମିର ସମୀକ୍ଷା କରିବେ ।
ଆହୁରି ଆଗକୁ ବଢୁଛି କଟକ SCB ବଡମେଡିକାଲ । ଅତ୍ୟାଧୁନିକ ଚିକିତ୍ସା କ୍ଷେତ୍ରରେ ସୃଷ୍ଟି କରୁଛି ନୂଆ ମାଇଲଷ୍ଟୋନ । କିଡନୀ ପରେ ଏଣିକି କରାଯିବ ଲିଭର ପ୍ରତିରୋପଣ । ରୋଗୀଙ୍କୁ ସମ୍ପୂର୍ଣ୍ଣ ମାଗଣାରେ ମିଳିବ ବ୍ୟବହୁଳ ଚିକିତ୍ସା । ରାଜ୍ୟ ସ୍ବାସ୍ଥ୍ୟ ବିଭାଗର ପ୍ରତ୍ୟକ୍ଷ ତତ୍ତ୍ବାବଧାନରେ ୨୦୨୩ରୁ ଏହି ପକ୍ରିୟା ଆରମ୍ଭ କରାଯାଇଛି । ଏଥିପାଇଁ ହାଇଦ୍ରାବାଦ ସ୍ଥିତ ଏସିଆ ଇନଷ୍ଟିଚ୍ୟୁଟ ଅଫ ଲିଭର ଟ୍ରାନ୍ସପ୍ଲାଣ୍ଟ ସହିତ ଅନୁବନ୍ଧିତ ହୋଇଛି ଏସସିବି । ଏକ ଡାକ୍ତରୀ ଟିମ ହାଇଦ୍ରାବାଦ ଯାଇ ପ୍ରତିରୋପଣ ବ୍ୟବସ୍ଥାର ସମସ୍ତ ସୋପାନକୁ ଅନୁଶୀଳନ କରିଛନ୍ତି । ସେହି ଅନୁଯାୟୀ ଏସସିବିରେ ପ୍ରତିରୋପଣ ପାଇଁ ଆବଶ୍ୟକ ବ୍ୟବସ୍ଥା କରାଯାଇଛି । ୫ ତାରିଖ ଦିନ ହାଇଦ୍ରାବାଦରୁ ଏକ୍ସପର୍ଟ ଟିମ ଆସି ଏସସିବିର ଭିତ୍ତିଭୂମି ଯାଞ୍ଚ କରିବା ପରେ ଆରମ୍ଭ ହେବ ପ୍ରକ୍ରିୟା ।
ଏସସିବି ମେଡିକାଲ ରେଫରାଲ ହସ୍ପିଟାଲ ହେବା ସାଙ୍ଗକୁ ଏଠାରେ ଚିକିତ୍ସା ସେବା ସମ୍ପୂର୍ଣ ମାଗଣା ହୋଇଥିବାରୁ କେବଳ ଓଡିଶା ନୁହେଁ ପଡୋଶୀ ରାଜ୍ୟର ରୋଗୀ ମଧ୍ୟ ନିର୍ଭର କରୁଛନ୍ତି । ପ୍ରତି ମାସରେ ୧୫ ଶହରୁ ୨ ହଜାର ଲିଭର ରୋଗୀ ଏସସିବି ଆସୁଛନ୍ତି । ୬୦ ପ୍ରତିଶତ ରୋଗୀ ନିଶା ପାନୀୟ ପାଇଁ ରୋଗର ଶିକାର ହୋଇଥିବା ଜଣାପଡୁଛି । ସେମାନଙ୍କ ମଧ୍ୟରୁ ବି କାଟାଗୋରୀ ଅର୍ଥାତ ପ୍ରତିରୋପଣ ସମ୍ଭବ ଥିବା ରୋଗୀଙ୍କ ସଂଖ୍ୟା ୧୦ ରୁ ୧୨ ପ୍ରତିଶତ । ତେବେ ଏହି ପକ୍ରିୟା ଉଭୟ ଲିଭର ଦାନ କରୁଥିବା ଓ ପ୍ରତିରୋପଣ ହେଉଥିବା ବ୍ୟକ୍ତିଙ୍କ ପାଇଁ ବେଶ ଜଟିଳ ଓ ବିପଦପୂର୍ଣ୍ଣ । ତେଣୁ ସ୍ଥିତିକୁ ଦେଖି ଏସସିବିରେ ସମସ୍ତ ପ୍ରକାର ବ୍ୟବସ୍ଥା ଗ୍ରହଣ ପରେ ଯାଇ ଏହାକୁ ଆରମ୍ଭ କରାଯିବ ବୋଲି କହିଛନ୍ତି ଡାକ୍ତର ।
କେ.ଜେ.ଏସ୍. ଆଲ୍ଲୁଓ୍ବାଲିଆ ପ୍ଲାଣ୍ଟରେ ବିସ୍ଫୋରଣ
କେନ୍ଦୁଝର: କେନ୍ଦୁଝର ବରପଦା ଠାରେ ଥିବା କେ.ଜେ.ଏସ୍. ଆଲ୍ଲୁଓ୍ବାଲିଆ ପ୍ଲାଣ୍ଟରେ ବିସ୍ଫୋରଣ । ମଧ୍ୟାହ୍ନରେ ପ୍ଲାଣ୍ଟର ଇଣ୍ଡକ୍ସନ୍ ଫର୍ନେସରେ ଏହି ବିସ୍ଫୋରଣ ଘଟିଛି । ବିସ୍ଫୋରଣ ଯୋଗୁଁ ଇଣ୍ଡକ୍ସନ୍ ଫର୍ନେସରୁ ତରଳ ଧାତୁ ଛିଟିକି ପାଖରେ ଥିବା ଏକ ହାଇୱା ଉପରେ ପଡିଥିଲା । ଫଳରେ ହାଇୱାର ପଛଭାଗ ଜଳି ଯାଇଛି । ଦୁର୍ଘଟଣାରେ କେହି ମୃତାହତ ହୋଇ ନଥିବା ପୋଲିସ କହିଛି । ଦୁର୍ଘଟଣା ସମୟରେ ପାଖରେ କେହି ଶ୍ରମିକ ନଥିବାରୁ ବଡ ଅଘଟଣ ଟଳିଛି ।
ବରଗଡ଼ ଧନୁଯାତ୍ରା ପାଇଁ ଜୋରଦାର ଚାଲିଛି ଆଖଡ଼ା
ବରଗଡ: ଧନୁଯାତ୍ରା ପାଇଁ ଚଳଚଞ୍ଚଳ ବରଗଡ । ଆରମ୍ଭ ହେଲାଣି ଅଭ୍ୟାସ । ୪ ଦିନ ଧରି ଆଖଡ଼ାଶାଳରେ କୁନି କୁନି କଳାକାର ନିଜ ନିଜର ଚମତ୍କାର ଅଭିନୟ ପାଇଁ ଅଭ୍ୟାସ ଜାରି ରଖିଛନ୍ତି । ଅଭିଜ୍ଞ ବ୍ୟକ୍ତିବିଶେଷ ମାନଙ୍କ ଦ୍ଵାରା ଏହି କୁନି କୁନି କଳାକାରଙ୍କୁ ଶ୍ଳୋକ, ଗୀତ ଓ ଅଭିନୟ ପାଇଁ ପ୍ରସ୍ତୁତ କରାଯାଉଛି ।
ବରଗଡରେ ଧନୁଯାତ୍ରା ପାଇଁ ଆରମ୍ଭ ହେଲାଣି ଅଭ୍ୟାସ । ୪ଦିନ ଧରି ଆଖଡ଼ାଶାଳରେ କୁନି କୁନି କଳାକାର ନିଜ ନିଜର ଚମତ୍କାର ଅଭିନୟ ପାଇଁ ଅଭ୍ୟାସ ଜାରି ରଖିଛନ୍ତି । ଗୋପପୁରରେ କୃଷ୍ଣ ଭୂମିକାରେ ଅଭିନୟ କରୁଥିବା ସମ୍ରାଟ ମହାପାତ୍ର, ରାଧା ଭୂମିକା ପାଇଁ ବୈଷ୍ଣବୀ ବିର୍ତିଆ ଓ ବଳରାମ ଭୂମିକା ପାଇଁ କିଶନ କୁମାର ବିର୍ତିଆ ସହ ଗୋପୀ, ଗୋପାଳ ଚରିତ୍ରରେ ଅଭିନୟ କରୁଥିବା କୁନି କଳାକାର ମାନେ ନିଜ ନିଜ ମଧ୍ୟରେ ଅଭିନୟର ମଧୁର ସମନ୍ଵୟ ପାଇଁ ଚେଷ୍ଟା କରୁଛନ୍ତି ।
ଅଭିଜ୍ଞ ବ୍ୟକ୍ତିବିଶେଷ ମାନଙ୍କ ଦ୍ଵାରା ଏହି କୁନି କୁନି କଳାକାରଙ୍କୁ ଶ୍ଳୋକ, ଗୀତ ଓ ଅଭିନୟ ପାଇଁ ପ୍ରସ୍ତୁତ କରାଯାଉଛି । ତେବେ ଗତବର୍ଷ କୃଷ୍ଣ, ବଳରାମ ଓ ରାଧା ଭୂମିକାରେ ଅଭିନୟ କରିଥିବା କଳାକାରଙ୍କୁ ପରିବର୍ତ୍ତନ ନକରାଯାଇ ସେହି କଳାକାର ମାନେ ଏ ବର୍ଷର ବିଶ୍ୱ ପ୍ରସିଦ୍ଧ ଧନୁଯାତ୍ରାରେ ପୁନର୍ବାର ଅଭିନୟ କରିବେ । ତେବେ ପୌରାଣିକ କଥାବସ୍ତୁ ଉପରେ ଆଧାରିତ ବୃହତ ମୁକ୍ତାକାଶ ରଙ୍ଗମଞ୍ଚରେ ନିଜ ନିଜର ଉତ୍କୃଷ୍ଟ କଳା ପ୍ରଦର୍ଶନ ପାଇଁ ଗୋପପୁରର କୁନି ଅଭିନେତା ମାନେ ଅଣ୍ଟା ଭିଡି ସାରିଛନ୍ତି । ଗୋପପୁରର ଗୋପୀ ଗୋପାଳ, କୃଷ୍ଣ ବଳରାମ ଓ ରାଧା ଆଦି କଳାକାରଙ୍କ ଆଖଡ଼ାଶାଳରେ କଠିନ ପରିଶ୍ରମ ବିଶ୍ୱ ପ୍ରସିଦ୍ଧ ବରଗଡ଼ ଧନୁଯାତ୍ରାକୁ ଆହୁରି ଆକର୍ଷଣୀୟ କରିବ।
ଗେମ୍ ଖେଳୁଥିବା ବେଳେ ଭର୍ଚୁଆଲରେ ନାବାଳିକାଙ୍କୁ ଗଣଦୁଷ୍କର୍ମ ଅଭିଯୋଗ
ନନ୍ଦିଘୋଷ ବ୍ୟୁରୋ: ମେଟାଭର୍ସରେ ୧୬ବର୍ଷୀୟ ନାବାଳିକାଙ୍କୁ ଗଣଦୁଷ୍କର୍ମ। ଗେମ୍ ଖେଳୁଥିବା ବେଳେ ଭର୍ଚୁଆଲରେ ନାବାଳିକାଙ୍କ ସହ ଗଣଦୁଷ୍କର୍ମ ହୋଇଥିବା ଅଭିଯୋଗ ହୋଇଛି । ବ୍ରିଟେନରେ ଏଭଳି ପ୍ରଥମ ମାମଲା ସାମନାକୁ ଆସିଛି। ନାବାଳିକା ଜଣକ ଭର୍ଚୁଆଲ୍ ରିୟଲିଟି ବା ଭିଆର ହେଡସେଟ୍ ପିନ୍ଧି ଗେମ୍ ଖେଳୁଥିବା ବେଳେ ତାଙ୍କ ଡିଜିଟାଲ୍ ଅବତାର ସହ କିଛି ଅଜଣା ଲୋକ ଗ୍ୟାଙ୍ଗରେପ୍ କରିଥିବା ଅଭିଯୋଗ ହୋଇଛି। ନାବାଳିକାଙ୍କର ଶାରୀରିକ ଭାବେ କୌଣସି କ୍ଷତି ହୋଇନି। ହେଲେ ମାନସିକ ସ୍ତରରେ ସେ ବହୁ ମାତ୍ରାରେ ପ୍ରଭାବିତ ହୋଇଛନ୍ତି । ଜଣେ ଦୁଷ୍କର୍ମ ପୀଡ଼ିତା ଯେଉଁଭଳି ମାନସିକ ଭାବେ କ୍ଷତ ବିକ୍ଷତ ଅନୁଭବ କରନ୍ତି, ସେହିପରି ଭର୍ଚୁଆଲ ଗ୍ୟାଙ୍ଗରେପରେ ପୀଡ଼ିତା ଜଣକ ସମାନ ଅବସ୍ଥା ଅନୁଭବ କରିଛନ୍ତି ବୋଲି କହିଛନ୍ତି । ପୂର୍ବରୁ ମଧ୍ୟ ମେଟାଭର୍ସରେ ଏଭଳି ଅତ୍ୟାଚାର ମାମଲା ସାମନାକୁ ଆସିଛି । ହେଲେ ଗଣଦୁଷ୍କର୍ମର ଏହା ପ୍ରଥମ ମାମଲା ।