ପୁରୀ: ଆଜି ଶ୍ରୀମନ୍ଦିରରେ ମହାପ୍ରଭୁଙ୍କର ବନକଲାଗି ନୀତି ଅନୁଷ୍ଠିତ ହେବ । ଶ୍ରୀମନ୍ଦିର ପରିଚାଳନା କମିଟି ବୈଠକ ଏବଂ ଦତ୍ତ ମହାପାତ୍ର ନିଯୋଗ ସହ ଆଲୋଚନା ପରେ ବିବାଦର ସମାଧାନ ହୋଇଛି । ଆଜି ଶ୍ରୀବିଗ୍ରହ ମାନଙ୍କ ବନକଲାଗି ନୀତି କରାଯିବାକୁ ନିଷ୍ପତ୍ତି ହୋଇଛି ।
ପ୍ରାକୃତିକ ଦ୍ରବ୍ୟରେ ଶ୍ରୀଜୀଉଙ୍କ ଶ୍ରୀମୁଖ ଶୃଙ୍ଗାର କରିବେ ଦତ୍ତମହାପାତ୍ର ସେବକ । ଶଙ୍ଖ, କସ୍ତୁରୀ, ହିଙ୍ଗୁଳ, ହରିତାଳ ଭଳି ବିଭିନ୍ନ ପ୍ରାକୃତିକ ଦ୍ରବ୍ୟରେ ମହାପ୍ରଭୁଙ୍କ ଶ୍ରୀ ମୁଖ ଶୃଙ୍ଗାର କରାଯିବ । ନୀତି ପାଇଁ ଦ୍ବିତୀୟ ଭୋଗ ମଣ୍ଡପ ଭୋଗ ଶେଷ ହେବାପରେ ସନ୍ଧ୍ୟା 6ଟାରୁ ରାତି 11ଟା ପର୍ଯ୍ୟନ୍ତ ସର୍ବ ସାଧାରଣ ଦର୍ଶନ ବନ୍ଦ ରହିବ ।
ନୂଆଦିଲ୍ଲୀ: ଆଜି ଦିନ ୧୧ଟାରୁ ପୁଣି ସଂସଦରେ ଆରମ୍ଭ ହେବ ଅନାସ୍ଥା ବିତର୍କ । ମଣିପୁର ହିଂସାକୁ ନେଇ କେନ୍ଦ୍ର ବିରୋଧରେ ଅନାସ୍ଥାକୁ ନେଇ ସଂସଦ ହୁଲୁସ୍ତୁଲ ହେଉଛି । ସଂସଦରେ ଚାଲିଛି ନନଷ୍ଟପ ଆଲୋଚନା । ଆସନ୍ତାକାଲି ପର୍ଯ୍ୟନ୍ତ ଚାଲିବ ବିତର୍କ । ତେବେ ଆଜି କିମ୍ବା ଆସନ୍ତାକାଲି ଅନାସ୍ଥା ପ୍ରସ୍ତାବ ଉପରେ ବକ୍ତବ୍ୟ ରଖିବେ କଂଗ୍ରେସ ସାଂସଦ ରାହୁଲ ଗାନ୍ଧୀ ।
ମଣିପୁର ପ୍ରସଙ୍ଗରେ କାହିଁକି ୮୦ ଦିନ ଧରି ଚୁପ୍ ରହିଲେ ପ୍ରଧାନମନ୍ତ୍ରୀ ? ଦେଶରେ ମଣିପୁର ଜଳୁଥିବା ବେଳେ ପ୍ରଧାନମନ୍ତ୍ରୀ କାହିଁକି ଗଲେ ନାହିଁ ? ଶାନ୍ତି ସ୍ଥାପନା ପାଇଁ କାହିଁକି ପ୍ରଧାନମନ୍ତ୍ରୀ ପ୍ରୟାସ କଲେ ନାହିଁ ବୋଲି ସଂସଦରେ ଯୁକ୍ତି ରଖିଛନ୍ତି କଂଗ୍ରେସ ସାଂସଦ । ମଣିପୁରରେ ଡବଲ ଇଞ୍ଜିନ ଫେଲ ବୋଲି ଗତକାଲି କହିଥିଲେ କଂଗ୍ରେସ ସାଂସଦ ଗୌରବ ଗୋଗେଇ । ପ୍ରଧାନମନ୍ତ୍ରୀଙ୍କ ତରଫରୁ ମଣିପୁରବାସୀଙ୍କୁ ଶାନ୍ତି ପାଇଁ ଅପିଲ ନକରାଯିବା ଚିନ୍ତାର ବିଷୟ । ହିଂସାରେ ମୃତକଙ୍କ ପରିବାରକୁ ସମବେଦନା ମଧ୍ୟ ଜଣାଇନାହାନ୍ତି ପ୍ରଧାନମନ୍ତ୍ରୀ ।
ଏଥିରୁ ସ୍ପଷ୍ଟ ଯେ ବିଜେପି ପାଇଁ ମଣିପୁରରେ ଆଜି ନିଆଁ ଜଳୁଛି । କାହିଁକି ମଣିପୁର ସିଏମଙ୍କୁ ହଟାଯାଇନାହିଁ ବୋଲି ଲୋକସଭାରେ ପ୍ରଶ୍ନ କରିଛି କଂଗ୍ରେସ ? ଭାବମୂର୍ତ୍ତି ବଞ୍ଚାଇବାକୁ କେନ୍ଦ୍ର ଚେଷ୍ଟା କରୁଛି । ଇଣ୍ଡିଆ ଟିମ୍ ମଣିପୁର ପୀଡ଼ିତାଙ୍କୁ ଭେଟି ସମବେଦନା ଜଣାଇଛନ୍ତି । ମଣିପୁର ସରକାର ବଞ୍ଚାଇବାକୁ ଯାଇ ପ୍ରଧାନମନ୍ତ୍ରୀ ଚୁପ୍ ବୋଲି କଂଗ୍ରେସ ବିତର୍କ କରିଛି । ଅନ୍ୟ ଦଳର ସାଂସଦ ମାନେ ବିଜେପିକୁ ଅହଂକାରୀ ବୋଲି କହିବା ସହ ହିଂସା ରାଜନୀତିରେ ଦଳ ବିଶ୍ବାସ କରେ ବୋଲି ଯୁକ୍ତି ରଖିଛନ୍ତି ।
ବେଙ୍ଗାଲୁରୁ: ସ୍ବାମୀଙ୍କ ରଙ୍ଗ କଳା ହୋଇଥିବାରୁ ଆପଣ ତାଙ୍କୁ ହୀନ ଦୃଷ୍ଟିରେ ଦେଖୁଛନ୍ତି କି ? ସବୁବେଳେ ତାଙ୍କ ରଙ୍ଗକୁ ନେଇ ତାଙ୍କୁ କୁତ୍ସିତ ଦୃଷ୍ଟିରେ ଦେଖୁଛନ୍ତି କି ? ଏପରି ଅପମାନ ଏବେ ପଡ଼ିପାରେ ମହଙ୍ଗା । ଏବେ ଏନେଇ କର୍ଣ୍ଣାଟକ କୋର୍ଟ ଏକ ରାୟ ଶୁଣାଇଛନ୍ତି । ସ୍ବାମୀଙ୍କ ରଙ୍ଗ କଳା ବୋଲି କହି ଯଦି ଅପମାନ କରନ୍ତି ତାହାଲେ ଏହା ନିଷ୍ଠୁରତା ସାବ୍ୟସ୍ତ ହେବ । କେବଳ ନିଷ୍ଠୁରତା ନୁହେଁ ଏନେଇ ଯଦି ସ୍ବାମୀ ଛାଡ଼ପତ୍ର ଆବେଦନ କରନ୍ତି ତାହାଲେ ଛାଡ଼ପତ୍ର ବି ହୋଇପାରେ । ଏକ ମାମଲାର ଶୁଣାଣି କରି କୋର୍ଟ ଏହି ରାୟ ଶୁଣାଇଛନ୍ତି ।
କ’ଣ ଥିଲା ପୂରା ଘଟଣା ଜାଣନ୍ତୁ
କର୍ଣ୍ଣାଟକ ହାଇକୋର୍ଟର ଜଷ୍ଟିସ ଆଲୋକ ଅରାଧେ ଓ ଜଷ୍ଟିସ୍ ଅନନ୍ତ ରାମନାଥ ହେଗଡ଼େଙ୍କ ଦ୍ବାରା ଗଠିତ ଖଣ୍ଡପୀଠ କହିଛନ୍ତି ଯେ, ସ୍ତ୍ରୀ ସ୍ବାମୀଙ୍କୁ କଳା କହିବା ସହ ଏହି କଥାକୁ ଲୁଚାଇବା ପାଇଁ ସ୍ବାମୀଙ୍କ ଉପରେ ମିଥ୍ୟା ଅଭିଯୋଗ ଆଣିଥିଲେ । ଅନ୍ୟ ମହିଳାଙ୍କ ସହ ସ୍ବାମୀଙ୍କର ସମ୍ପର୍କ ଥିବା ମଧ୍ୟ କହିଥିଲେ । ଏହା ପରେ କୋର୍ଟ ହିନ୍ଦୁ ମ୍ୟାରେଜ ଆକ୍ଟ ଧାରା ୧୩ (i) (a) ଅନୁସାରେ ଦମ୍ପତିଙ୍କ ଛାଡ଼ପତ୍ରକୁ ମଞ୍ଜୁରୀ ଦେଇଛନ୍ତି । ଦମ୍ପତିଙ୍କ ବିବାହ ୨୦୦୭ ମସିହାରେ ହୋଇଥିଲା । ଉଭୟଙ୍କର ଝିଅଟିଏ ମଧ୍ୟ ଅଛି । ୨୦୧୨ ମସିହାରେ ବ୍ୟକ୍ତି ଜଣଙ୍କ ଛାଡ଼ପତ୍ର ଆବେଦନ କରିଥିଲେ । ହାଇକୋର୍ଟ ଏନେଇ କହିଛନ୍ତି ଯେ, ବାରମ୍ବାର କଳା କହି ସ୍ତ୍ରୀ ସ୍ବାମୀଙ୍କୁ ଅପମାନ କରୁଥିଲେ । କିନ୍ତୁ ଛୋଟ ଝିଅ ପାଇଁ ବ୍ୟକ୍ତି ଏ ସବୁ ସହି ଯାଉଥିଲେ । ହେଲେ ମହିଳା ଜଣଙ୍କ ସ୍ବାମୀ, ଶାଶୁ ଏବଂ ଶ୍ବଶୁରଙ୍କ ବିରୋଧରେ ଆଇପିସି ଧାରା ୪୯୮A ଆଧାରରେ ମାମଲା ରୁଜୁ କରିଥିଲେ । ଘରୋଇ ହିଂସା ଆଧାରରେ ମହିଳା ଜଣଙ୍କ ଝିଅକୁ ନେଇ ବାପା ମାଆଙ୍କ ପାଖରେ ରହୁଥିଲେ । ହେଲେ ଏହି ଘଟଣାକୁ ସ୍ବାମୀ ଖଣ୍ଡନ କରିବା ସହ ତାଙ୍କ ପରିବାର ସହ ଦୁର୍ବ୍ୟବହାର କରିଛନ୍ତି ବୋଲି କହିଥିଲେ । ୨୦୧୭ ମସିହାରେ ଫ୍ୟାମିଲି କୋର୍ଟରେ ତାଙ୍କର ଛାଡ଼ପତ୍ର ଆବେଦନ ଖାରଜ ହୋଇଥିଲା । କିନ୍ତୁ ପରେ ତାଙ୍କୁ ହାଇକୋର୍ଟରୁ ମଞ୍ଜୁରୀ ମିଳିଛି ।
ଭୁବନେଶ୍ୱର: ସାପ କାମୁଡ଼ା ନେଇ ସଚେତନତା । ସ୍କୁଲରେ ମକଡ୍ରିଲ କଲା ସ୍ନେକ ହେଲ୍ପ ଲାଇନ । କ୍ଲାସରୁମରେ ନୁହେଁ ଖେଳ ପଡ଼ିଆରେ କୌଶଳ ଶିଖିଲେ ପିଲା । ଖେଳ ପଡ଼ିଆରେ କିଏ ବୁଲୁଛି ତ, ଆଉ କିଏ ବସିଛି । ଆଉ କିଏ ପିଲା ଖେଳୁଛନ୍ତି । ସାପ କାମୁଡ଼ି ଦେଲା । ସ୍କୁଲରେ ପଡିଲା ହୁରି । ଯିଏ ଯେଉଁଠି ଥିଲେ ଦୌଡ଼ି ଆସିଲେ । ହେଲେ ସତରେ ସାପ କାମୁଡି ନଥିଲା । ସାପ କାମୁଡ଼ିଲେ କେମିତି ରକ୍ଷା ପାଇବେ ସେନେଇ ପିଲାଙ୍କୁ କରାଯାଇଛି ସଚେତନ । ଲକ୍ଷ୍ମୀସାଗର ଉଚ୍ଚ ବିଦ୍ୟାଳୟର ସ୍ନେକ ହେଲ୍ପ ଲାଇନ ପକ୍ଷରୁ କରା ଯାଇଥିଲା ମକଡ୍ରିଲ । ସ୍ନେକ ହେଲ୍ପ ଲାଇନର ସଦସ୍ୟମାନେ ଅଭିନୟ ମାଧ୍ୟମରେ ସାପ କାମୁଡ଼ିବା ପରେ କିପରି ରୋଗୀକୁ ଚଲାବୁଲା କମ୍ କରିବ, ସାପ କାମୁଡ଼ିଥିବା ଅଙ୍ଗରେ ଥିବା ଚୁଡି, ମୁଦି ଆଦି ଖୋଲିବ, କ୍ରେପ ବ୍ୟାଣ୍ଡେଜ୍ କିମ୍ବା ଗାମୁଛା ଦ୍ଵାରା କିପରି ହାତ ବା ଗୋଡକୁ କ୍ଷତ ସ୍ଥାନର ଉପରକୁ ଗୁଡ଼େଇ ଗୁଡ଼େଇ ବାନ୍ଧିବାକୁ ହୁଏ, ସେଇ ପଦ୍ଧତି ଗୁଡିକ ଦେଖାଇଥିଲେ । ତା’ ପରେ ୪ରୁ ୫ ଜଣ ପିଲାଙ୍କୁ ନେଇ ଗୋଟିଏ ଗୋଟିଏ ଗ୍ରୁପ କରାଯାଇ ଛୋଟ ଛୋଟ ପିଲାମାନେ ମକଡ୍ରିଲ ମାଧ୍ୟମରେ ଅଭ୍ୟାସ କରିଥିଲେ ।
ସେପଟେ ବିଦ୍ୟାଳୟରେ ପିଲାମାନେ କ୍ରୀଡା ଓ ଅଭିନୟ ଛଳରେ ସାପ କାମୁଡାର ପ୍ରାଥମିକ ଚିକିତ୍ସା ଭଳି ଏକ ଜୀବନ ରକ୍ଷାକାରୀ ତଥା ଗୁରୁତ୍ବପୂର୍ଣ୍ଣ ବିଷୟରେ ଶିକ୍ଷା ଗ୍ରହଣ କରିଛନ୍ତି । ଏହା ଦ୍ବାରା ଛାତ୍ରଛାତ୍ରୀମାନେ ନିଜ ଘରେ ଓ ସାହିରେ ସାପ କାମୁଡା ଉପରେ ସଚେତନ କରିବେ ବୋଲି ପ୍ରଧାନ ଶିକ୍ଷୟତ୍ରୀ କହିଛନ୍ତି । ସ୍କୁଲରେ ମକଡ୍ରିଲରେ ବିଦ୍ୟାଳୟର ସମସ୍ତ ଶିକ୍ଷକ ଓ ଶିକ୍ଷୟିତ୍ରୀମାନେ ଉପସ୍ଥିତ ରହି ନିଜେ ମଧ୍ୟ କୌଶଳ ଶିଖିବା ସହିତ ସଚେତନ ହୋଇଥିଲେ । ସ୍ନେକ ହେଲ୍ପ ଲାଇନ ତରଫରୁ ଲଳିତ ମୋହନ ପଣ୍ଡା, ସଞ୍ଜୟ ଦାସ, ଅମିତ ସାହୁ, ଆଶିଷ ବେହେରା, ଓ ରାଜେଶ ସୁତାର ମକଡ୍ରିଲରେ ସହଯୋଗ କରିଥିଲେ ।
ଭୁବନେଶ୍ୱର: କିନ୍ନରଙ୍କୁ ହକ୍ ଦେବାରେ ଓଡ଼ିଶା ପ୍ରଥମ । ସମାଜର ମୁଖ୍ୟସ୍ରୋତରେ ସାମିଲ ତୃତୀୟ ଲିଙ୍ଗୀ । ସରକାରଙ୍କ ବିଭିନ୍ନ ଯୋଜନାରେ ଭାଗିଦାର । ବଢାଇଛନ୍ତି ସହଭାଗିତାର ହାତ । ମିଳିଛି ସମ୍ମାନର ସହ ବଞ୍ଚିବାର ନ୍ୟାଯ୍ୟ ଅଧିକାର । ୨୦୧୪ରେ ସୁପ୍ରିମକୋର୍ଟଙ୍କ ରାୟ ଆସିବା ପରେ ଦେଶରେ ପ୍ରଥମ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୧୪ ହଜାର କିନ୍ନରଙ୍କୁ ଖାଦ୍ୟ ସୁରକ୍ଷା ଯୋଜନାରେ ସାମିଲ କରିଥିଲେ । ମଧୁବାବୁ ପେନସନ୍ ଯୋଜନାରେ ମାସିକ ୫୦୦ ଟଙ୍କା ସହାୟତା ମିଳୁଛି । ଏହାସହିତ ବିଦ୍ୟାଳୟ ସ୍ତରରେ ପାଠ ପଢିବା ପାଇଁ ତୃତୀୟ ଲିଙ୍ଗୀଙ୍କୁ ମିଳୁଛି ମାସିକ ୩ ହଜାର ଟଙ୍କା । ଉଚ୍ଚଶିକ୍ଷା ପାଇଁ ବି ଦିଆଯାଉଛି ବୃତ୍ତି । ‘ ସ୍ବୀକୃତି’ ଯୋଜନା ଅନ୍ତର୍ଗତ କିନ୍ନରଙ୍କ ଆର୍ଥିକ ବିକାଶ ଓ ସେମାନଙ୍କ ସଦସ୍ୟତାରେ ରାଜ୍ୟରେ ଗଢିଉଠିଛି ସ୍ବୟଂ ସହାୟକ ଗୋଷ୍ଠୀ । ଏବେ ପ୍ରତ୍ୟେକ ଏସଏଚଜିଙ୍କୁ ଆବର୍ତ୍ତନ ପାଣ୍ଠି ବାବଦରେ ମିଳୁଛି ୫୦ ହଜାର ଟଙ୍କା । ଆଗକୁ ଏହି ରାଶିର ପରିମାଣ ୧ ଲକ୍ଷ ୨୫ ହଜାର ଟଙ୍କାକୁ ବୃଦ୍ଧି କରାଯିବ ।
କିନ୍ନରଙ୍କୁ ବିଭିନ୍ନ ସରକାରୀ ଯୋଜନାରେ ସାମିଲ କରିଛନ୍ତି ମୁଖ୍ୟମନ୍ତ୍ରୀ । ହୋଲ୍ଡିଂ ଟିକସ ଆଦାୟଠାରୁ ଆରମ୍ଭ କରି ଆବର୍ଜନା ପରିଚାଳନା, ପାର୍କିଂ ଫି ଆଦାୟ, ବସ୍ କଣ୍ଡକ୍ଟର୍ ଭଳି ନିଯୁକ୍ତି ମିଳିଛି । ରାଜ୍ୟରେ ଶିଳ୍ପ ପ୍ରତିଷ୍ଠା କରିଥିବା ବଡ଼ ବଡ଼ କର୍ପୋରେଟ୍ କମ୍ପାନୀରେ କିନ୍ନରଙ୍କୁ ମିଳିଛି ଲୋକୋ ପାଇଲଟ୍ ନିଯୁକ୍ତି । କିନ୍ନରଙ୍କୁ ସାମାଜିକ ନ୍ୟାୟ ଯୋଜନାରେ ଆର୍ଥିକ ବିକାଶ କ୍ଷେତ୍ରରେ ଅଗ୍ରଣୀ କରିବାରେ ମୁଖ୍ୟମନ୍ତ୍ରୀଙ୍କ ପଦକ୍ଷେପକୁ ଭୂୟସୀ ପ୍ରଶଂସା କରିଛନ୍ତି କିନ୍ନର ସମାଜ । ତୃତୀୟ ଲିଙ୍ଗୀ ଓଡ଼ିଶାରେ ପାଇଛନ୍ତି ମଣିଷ ପରି ବଞ୍ଚିବାର ଅଧିକାର । ସବୁ ବର୍ଗର ଆର୍ଥିକ ଓ ସାମାଜିକ ବିକାଶ କରିବା ମୁଖ୍ୟମନ୍ତ୍ରୀଙ୍କ ଲକ୍ଷ୍ୟ । ଯେଭଳି ଭାବେ ଓଡ଼ିଶା ସରକାର କିନ୍ନରଙ୍କୁ ସରକାରୀ ଯୋଜନା ସହିତ ସାମିଲ କରିଛନ୍ତି ତାହା ଅନ୍ୟ ରାଜ୍ୟ ପାଇଁ ସୃଷ୍ଟି କରିଛି ଉଦାହରଣ ।
ଇସଲାମାବାଦ: ଆସନ୍ତା ୫ ବର୍ଷ ପର୍ଯ୍ୟନ୍ତ ନିର୍ବାଚନ ଲଢିପାରିବେ ନାହିଁ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ । ତାଙ୍କ ଉପରେ ପାଞ୍ଚ ବର୍ଷ ପାଇଁ ପ୍ରତିବନ୍ଧକ ଲଗାଇଲେ ପାକିସ୍ତାନ ନିର୍ବାଚନ ଆୟୋଗ । ବହୁଚର୍ଚ୍ଚିତ ତୋଷଖାନା ମାମଲାରେ ଇମ୍ରାନ ଖାନ ଦୋଷୀ ସାବ୍ୟସ୍ତ ହୋଇ ଗିରଫ ହେବା ପରେ ଏଭଳି ପଦକ୍ଷେପ ନେଇଛନ୍ତି ପାକିସ୍ତାନ ନିର୍ବାଚନ ଆୟୋଗ । ମାମଲାର ଶୁଣାଣି କରି ୩ ବର୍ଷ ଜେଲ୍ ଦଣ୍ଡାଦେଶ ଦେଇଥିଲେ କୋର୍ଟ । ମାମଲାରେ ଇମ୍ରାନଙ୍କ ବିରୋଧରେ ଗିରଫ ପରଓ୍ବାନା ଜାରି କରିଥିଲା ଇସଲାମାବାଦ ପୋଲିସ । ବିଦେଶୀ ଅତିଥିଙ୍କଠାରୁ ପ୍ରାପ୍ତ ଉପହାରଗୁଡିକୁ ବିକ୍ରି କରିଥିବା ଅଭିଯୋଗକୁ ନେଇ ଅଡୁଆରେ ପଡିଥିଲେ ଇମ୍ରାନ । ୨୦୧୮ରେ ଇମ୍ରାନଙ୍କୁ ପ୍ରାୟ ୧୫୪ ନିୟୁତ ଟଙ୍କାର ରତ୍ନ ଖଚିତ ଘଣ୍ଚା ଉପହାର ମିଳିଥିଲା । ତେବେ ସେଥିରୁ ୩ଟି ଦାମୀ ଘଣ୍ଟାକୁ ୩୬ ନିୟୁତ ଟଙ୍କାରେ ବିକ୍ରି କରିଦେଇଥିଲେ ଇମ୍ରାନ । ଏହା ସହ ଉପହାର ସମ୍ପର୍କରେ ମିଥ୍ୟା ତଥ୍ୟ ଦେଇ ଭଣ୍ଡାଇଥିଲେ । ସେ ପାଇଥିବା ଉପହାର ମଧ୍ୟରେ ରହିଛି ଗ୍ରାଫ୍ଟ ରିଷ୍ଟଓ୍ବାଚ, ଦୁଇଟି କଫଲିଙ୍କ, ଏକ ଦାମୀ ପେନ, ୪ଟି ରୋଲେକ୍ସ ଘଡ଼ି ଇତ୍ୟାଦି । ନିୟମ ଅନୁସାରେ ପ୍ରଧାନମନ୍ତ୍ରୀଙ୍କୁ ଯେଉଁ ଉପହାର ମିଳେ ତାହାକୁ ସରକାରୀ ମାଲିକାନାଧୀନ ତୋଷଖାନାରେ ରଖାଯିବା କଥା ।
ଭୁବନେଶ୍ୱର: ମୋ ଘର, ଆମ ଓଡ଼ିଶା, ନବୀନ ଓଡ଼ିଶା । ହସିବ ଗାଁ, ହସିବ ଓଡ଼ିଶା । ବିକଶିତ ଓଡ଼ିଶା ଗଠନରେ ମୁଖ୍ୟମନ୍ତ୍ରୀଙ୍କ ଯୋଜନା ମାଇଲଖୁଣ୍ଟ । ପଞ୍ଚମ ପାଳିରେ ନବୀନଙ୍କ ସବୁ ଲୋକାଭିମୁଖୀ ଯୋଜନା ସଫଳ । ୨୫ ବର୍ଷ ଧରି ଜନସେବା ଜାରି ରଖିଛନ୍ତି ନବୀନ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକାଭିମୁଖୀ ଯୋଜନାକୁ ପ୍ରତ୍ୟେକ ଓଡ଼ିଆଙ୍କ ପାଖରେ ପହଞ୍ଚାଇବା ପାଇଁ ବିଜେଡି ଅଣ୍ଟା ଭିଡ଼ିଛି । ୨୦୨୪ ନିର୍ବାଚନ ପ୍ରସ୍ତୁତି ସହ ସବୁ ନିର୍ବାଚନୀମଣ୍ଡଳୀରେ ଦଳ ମୁଖ୍ୟମନ୍ତ୍ରୀଙ୍କ ବିକାଶର ବାର୍ତ୍ତା ପହଞ୍ଚାଯିବ । ତୃଣମୂଳ ସ୍ତରରେ ବିଜେଡି ସଂଗଠନକୁ ଅଧିକ ଶକ୍ତିଶାଳୀ କରିବା ସହ ନିର୍ବାଚନରେ ବଡ଼ ବିଜୟ ହେବ ବୋଲି ଶାସକ ଦଳର ମନ୍ତ୍ରୀ ଓ ବିଧାୟକ ଯୁକ୍ତି ବାଢ଼ିଛନ୍ତି । ନବୀନଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରିବା ପାଇଁ ଓଡ଼ିଶାବାସୀ ମନସ୍ଥ କରିଥିବା ବିଜେଡି କହିଛି ।
ସବୁକ୍ଷେତ୍ରରେ ଦେଶର ୧ ନମ୍ବର ରାଜ୍ୟ ଭାବେ ଓଡ଼ିଶାକୁ ଗଢ଼ି ତୋଳିବାକୁ ମୁଖ୍ୟମନ୍ତ୍ରୀ କାମ କରିଚାଲିଛନ୍ତି । ଶିଳ୍ପ, କୃଷି, ସ୍ବାସ୍ଥ୍ୟ, କ୍ରୀଡ଼ା ଓ ପର୍ଯ୍ୟଟନର ବିକାଶଠାରୁ ଆରମ୍ଭ କରି ପ୍ରାକୃତିକ ବିପର୍ଯ୍ୟୟ ମୁକାବିଲାରେ ଦେଶରେ ଅଗ୍ରଣୀ ରାଜ୍ୟରେ ପରିଣତ ହୋଇଛି ଓଡ଼ିଶା । ରାଜ୍ୟ ସ୍ବାର୍ଥ ସମ୍ବଳିତ ବିଭିନ୍ନ ପ୍ରସଙ୍ଗରେ ବିଜେଡିର ଲଢ଼େଇ ଜାରି ରହିବ । ନୂଆ ଓଡ଼ିଶା, ସଶକ୍ତ ଓଡ଼ିଶା ଗଠନରେ ପ୍ରତ୍ୟେକ ଓଡ଼ିଆଙ୍କୁ ସାମିଲ କରିବାକୁ ବିଜେଡି ଲକ୍ଷ୍ୟ ରଖିଛି।
ଦେଶ ଓ ରାଜ୍ୟରେ ନିର୍ବାଚନ ହାଓ୍ବା ବହିଲାଣି । ସବୁ ଦଳ ନିର୍ବାଚନ ପ୍ରସ୍ତୁତି ଆରମ୍ଭ କରିଛନ୍ତି । ତେବେ ବିଜେଡି ସବୁବେଳେ ନିର୍ବାଚନ ପାଇଁ ପ୍ରସ୍ତୁତ ଅଛି । ନିର୍ବାଚନ ନୁହେଁ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମାର୍ଗଦର୍ଶନରେ ବିକଶିତ ଓଡ଼ିଶା ଗଠନ ପାଇଁ ବିଜେଡି ନେତା ଓ କର୍ମୀ କାମ କରୁଛନ୍ତି । ଏପରି ଲକ୍ଷ୍ୟ ହାସଲ ପାଇଁ ଓଡ଼ିଶାବାସୀଙ୍କର ଅକୁଣ୍ଠ ଆଶୀର୍ବାଦ ରହିଛି ।
ଭୁବନେଶ୍ୱର: କ୍ରିପ୍ଟୋ ଇନଭେଷ୍ଟମେଣ୍ଟ ନାଁରେ ହଜାର କୋଟିର ଠକେଇ ଘଟଣା । ଗିରଫ ଦୁଇ ଅଭିଯୁକ୍ତଙ୍କୁ ୩ ଦିନିଆ ରିମାଣ୍ଡରେ ନେଲା EOW । ଗତକାଲି ଉଭୟଙ୍କୁ ୫ ଦିନିଆ ରିମାଣ୍ଡରେ ନେବା ପାଇଁ ଓପିଆଇଡି କୋର୍ଟରେ ଆବେଦନ କରିଥିଲେ ଅର୍ଥନୈତିକ ଅପରାଧ ଶାଖା । ତିନି ଦିନିଆ ରିମାଣ୍ଡରେ ନେବାକୁ ଅନୁମତି ଦେଲେ କୋର୍ଟ । ଗିରଫ ଦୁଇ ଅଭିଯୁକ୍ତ ହେଲେ ଗୁରୁତେଜ ସିଂ ସିଧୁ ଓ ନିରଦ ଦାସ । କ୍ରିପ୍ଟୋ ଇନଭେଷ୍ଟ ନାଁରେ ସାରା ଭାରତରେ ୧୦୦୦ କୋଟିର ଚୁନା ଲଗାଇ ଥିଲା ଏହି ସଂସ୍ଥା । ସଂସ୍ଥାର ଭାରତ ମୁଖ୍ୟ ଓ ଓଡ଼ିଶା ମୁଖ୍ୟଙ୍କୁ ଗିରଫ କରିଥିଲା EOW । ରିମାଣ୍ଡରେ ଆଣି ଅଧିକ ତଦନ୍ତ କରିବ EOW ।
ନୂଆଦିଲ୍ଲୀ: ରାଜ୍ୟସଭାରେ ଉଠିଲା ପ୍ରତିଷେଧକମୂଳକ ସ୍ବାସ୍ଥ୍ୟ ପରୀକ୍ଷାରେ ଟିକସ ରିହାତି ପ୍ରସଙ୍ଗ । ରାଜ୍ୟସଭାରେ ପ୍ରସଙ୍ଗ ଉଠାଇଲେ ବିଜେଡିର ୩ ସାଂସଦ ମାନସ ମଙ୍ଗରାଜ, ସୁଲତା ଦେଓ ଓ ନିରଞ୍ଜନ ବିଶି । ଏଥିରେ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌବେ ଉତ୍ତର ଦେଇଛନ୍ତି । ପ୍ରତିଷେଧକମୂଳକ ସ୍ବାସ୍ଥ୍ୟ ପରୀକ୍ଷା ପାଇଁ ନାହିଁ ଟିକସ ରିହାତି । ଆୟକର ଆଇନ ୧୯୬୧ରେ ଏନେଇ କୌଣସି ବ୍ୟବସ୍ଥା ନାହିଁ । କେନ୍ଦ୍ର ସରକାର ଆୟକର ଆଇନରେ ସରଳୀକରଣ ପାଇଁ ଯୋଜନା କରୁଛନ୍ତି ବୋଲି କେନ୍ଦ୍ରମନ୍ତ୍ରୀ ଉତ୍ତର ଦେଇଛନ୍ତି ।
ସେହିପରି ରାଜ୍ୟସଭାରେ ଉଠିଲା ଦିବ୍ୟାଙ୍ଗକୁ GST ରିହାତି ସାର୍ଟିଫିକେଟ ପ୍ରସଙ୍ଗ । ଅଣତାରକା ପ୍ରଶ୍ନ ମାଧ୍ୟମରେ ପ୍ରସଙ୍ଗ ଉଠାଇଲେ ବିଜେଡି ସାଂସଦ ମାନସ ମଙ୍ଗରାଜ ଓ ନିରଞ୍ଜନ ବିଶି । ପ୍ରଶ୍ନର ଉତ୍ତର ରଖିଲେ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌବେ । ଓଡ଼ିଶାରୁ ୧୨ଜଣ ଦିବ୍ୟାଙ୍ଗଙ୍କୁ ମିଳିଛି GST ରିହାତି । ନିର୍ଦ୍ଦିଷ୍ଟ କିଛି ଗାଡ଼ି କିଣିବାକୁ ମିଳିଛି GST ରିହାତି । ଏଥିସହ ଶାରୀରିକ ଅକ୍ଷମତା ହାର ୩୦ ପ୍ରତିଶତକୁ ହ୍ରାସ କରିବା ପାଇଁ କୌଣସି ପ୍ରସ୍ତାବ ନାହିଁ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ।
ଭୁବନେଶ୍ୱର: ଭଲ ପଲିଟେକନିକ୍ କଲେଜରେ ପଢିବାକୁ ଚାହୁଁଛନ୍ତି କି ? ତେବେ ଓଡ଼ିଶା ଆସନ୍ତୁ । କାରଣ ଏଠାରେ ପଲିଟେକନିକ୍ କଲେଜ ଗୁଡ଼ିକୁ ପ୍ରଦର୍ଶନ ଅନୁଯାୟୀ ଦିଆଯାଉଛି ରାଙ୍କିଂ । ସାରା ଦେଶରେ ଏକମାତ୍ର ରାଜ୍ୟ ଭାବେ ପଲିଟେକନିକ କଲେଜ ଗୁଡ଼ିକୁ ପ୍ରଦର୍ଶନ ଆଧାରରେ ରାଙ୍କ ଦେଉଛି ଓଡ଼ିଶା । ଉତ୍ତମ ବୈଷୟିକ ଶିକ୍ଷା ଦିଗରେ ଓଡ଼ିଶା ସରକାରଙ୍କ ଏହି ପଦକ୍ଷେପକୁ ମିଳିଛି କେନ୍ଦ୍ରୀୟ ସ୍ବୀକୃତି । ରାଙ୍କିଂ ବ୍ୟବସ୍ଥାକୁ ସ୍ଵଚ୍ଛ କରିବା ପାଇଁ କ୍ବାଲିଟି କଣ୍ଟ୍ରୋଲ ଅଫ ଇଣ୍ଡିଆକୁ ଦାୟିତ୍ବ ଦିଆଯାଇଥିଲା। ନ୍ୟାସନାଲ ଆକ୍ରିଡିଏସନ ବୋର୍ଡ ଫର୍ ଏଜୁକେସନ୍ ଆଣ୍ଡ ଟ୍ରେନିଂ ବୋର୍ଡର କ୍ବିସିଆଇ ରାଙ୍କିଙ୍ଗରେ ସ୍ଥାନ ପାଇଥିବା ସମସ୍ତ ଶହେ ପଲିଟେକନିକାଲ କଲେଜ ପରିଦର୍ଶନ କରିବା ସହ ଏକାଧିକ ପର୍ଯ୍ୟାୟରେ ମୂଲ୍ୟାଙ୍କନ କାର୍ଯ୍ୟ କରିଛନ୍ତି । ସମସ୍ତ ଅଭିଯୋଗ ସମାଧାନ ଓ ଅପିଲ୍ ରିଜୋଲ୍ୟୁସନ୍ ପରେ ଚୂଡ଼ାନ୍ତ ମାନ୍ୟତା ଦିଆଯାଇଛି। ଉଭୟ ସରକାରୀ ଓ ଘରୋଇ ପଲିଟେକନିକ କଲେଜକୁ ନେଇ ରାଙ୍କିଂ ବ୍ୟବସ୍ଥା କରାଯାଇଛି। ରାଜ୍ୟ ସରକାରଙ୍କ 5T କାର୍ଯ୍ୟକ୍ରମ ଆଧାରରେ ରାଙ୍କିଂ ଦିଆଯାଇଛି। ରାଜ୍ୟ ସରକାରଙ୍କ ଏହି ରାଙ୍କିଂ ପଦ୍ଧତିକୁ କେନ୍ଦ୍ରୀୟ ଏଜେନସି କ୍ବିସିଆଇ ପ୍ରଶଂସା କରିଛି। ଏହା ପଲିଟେକନିକ୍ କଲେଜ ଗୁଡ଼ିକ ମଧ୍ୟରେ ସୁସ୍ଥ ପ୍ରତିଯୋଗିତା ବଢାଇବା ଫଳରେ ଛାତ୍ରଛାତ୍ରୀ ଉପକୃତ ହେବେ । ଅନ୍ୟ ରାଜ୍ୟ ବି ଓଡ଼ିଶାର ଏହି ମଡେଲକୁ ଅନୁସରଣ କରି ବୈଷୟିକ ଶିକ୍ଷା ଓ ଶିକ୍ଷାନୁଷ୍ଠାନର ଗୁଣବତ୍ତା ବୃଦ୍ଧି କରିବା ନେଇ ମତ ଦେଇଛି ନାବେଟ୍ ।
ରାଜ୍ୟରେ ପଲିଟେକନିକ୍ କଲେଜ ଗୁଡ଼ିକର ଡିପ୍ଲୋମାସ୍ତରୀୟ ଶିକ୍ଷାର ଗୁଣବତ୍ତା ସୁନିଶ୍ଚିତ କରିବା ପାଇଁ ଓଡ଼ିଶାରେ ୨୦୨୨ ମସିହାରୁ ରାଙ୍କିଂ ପଦ୍ଧତି ଗ୍ରହଣ କରାଯାଇଛି । ଚଳିତ ବର୍ଷ କିଟ୍ ପଲିଟେକନିକ୍ ପ୍ରଥମ ସ୍ଥାନରେ ରହିଥିବା ବେଳେ ଶ୍ରେଷ୍ଠ ୧୦ କଲେଜ ଭିତରେ ୬ଟି ସରକାରୀ ପଲିଟେକନିକ କଲେଜ ରହିଛି । ଆଗକୁ ଛାତ୍ରଛାତ୍ରୀଙ୍କ ଭିତରେ ପ୍ରତିଯୋଗିତାମୂଳକ ମନୋଭାବ ବୃଦ୍ଧି କରିବାକୁ ସେମାନଙ୍କ ଅଭିନବ ପ୍ରକଳ୍ପକୁ ବି ରାଙ୍କିଂ ଦିଆଯିବାର ବ୍ୟବସ୍ଥା କରାଯାଉଛି । କ୍ରୀଡ଼ା ପରି ଶିକ୍ଷାର ହବ୍ ପାଲଟୁଛି ଓଡ଼ିଶା । ନୂଆ ନୂଆ ଶିକ୍ଷା ପଦ୍ଧତି ସହ 5T ଆଧାରରେ ବିକଶିତ ଚିନ୍ତାଧାରା ନେଇ କାର୍ଯ୍ୟ କରୁଛନ୍ତି ରାଜ୍ୟ ସରକାର। ଏଥିସହ ପ୍ରଦର୍ଶନ ଓ ପ୍ରତିଯୋଗିତାକୁ ପ୍ରାଥମିକତା ଦିଆଯାଉଛି ।
