ଭୁବନେଶ୍ୱର: କ୍ୟାପିଟାଲ ହସ୍ପିଟାଲରେ ନବଜାତ ଶିଶୁ ଅଦଳବଦଳ ଅଭିଯୋଗ ମାମଲା । ଡିଏନଏ ଟେଷ୍ଟ ପାଇଁ ଛୁଆ ଓ ମା’ ଙ୍କର ହେଲା ସାମ୍ପଲ କଲେକ୍ସନ । ଫୋରେନ୍ସିକ ଲ୍ୟାବ ଡାକ୍ତର ଏମ୍ .ଏମ୍. ଗିରି ଏହି ଡିଏନ୍ଏ ସାମ୍ପଲ ସଂଗ୍ରହ କରିଛନ୍ତି । ସାମ୍ପଲ କଲେକ୍ସନ ପରେ ପୋଲିସକୁ କ୍ୟାପିଟାଲ ହସ୍ପିଟାଲ ହସ୍ତାନ୍ତର କରିଛି । ପୋଲିସ୍ ଏହାକୁ ରାଜ୍ୟ ଫରେନ୍ସିକ୍ ଲ୍ୟାବକୁ ନେଇଛି । ୧୦ ଦିନ ମଧ୍ୟରେ ଏହି ରିପୋର୍ଟ ଆସିବ । ରିପୋର୍ଟ ଆସିବା ପରେ ଏହି ରିପୋର୍ଟ ଭୁବନେଶ୍ବର କୋର୍ଟରେ ଦାଖଲ କରିବ ପୋଲିସ । ଏହାପରେ ସତ୍ୟାସତ୍ୟ ପଦାକୁ ଆସିବ । ଶିଶୁ ଅଦଳବଦଳ ନେଇ କ୍ୟାପିଟାଲ ହସପିଟାଲ ଓ ଥାନାରେ ଅଭିଯୋଗ କରିଥିଲେ ପ୍ରାଣକୃଷ୍ଣ ବିଶ୍ବାଳ । ଅଭିଯୋଗ ପରେ ଆରମ୍ଭ ହୋଇଥିଲା ତଦନ୍ତ ।
ଗୁଗୁଲ ମ୍ୟାପରେ ବାଟବଣା ହୋଇ ନଦୀରେ ପଶିଗଲେ, ଡାକ୍ତର ମୃତ
କୋଚି: ଭୁଲ୍ ବାଟ ଦେଖାଇଲା ଜିପିଏସ୍। ରାସ୍ତା ଭାବି ନଦୀରେ ପଶିଲା ଗାଡ଼ି । କେରଳ ଏର୍ଣ୍ଣାକୁଲମରେ ୨ଡାକ୍ତରଙ୍କ ମୃତ୍ୟୁ। ମୃତକ ହେଉଛନ୍ତି ଡାକ୍ତର ଅଦ୍ବୈତ ଓ ଡାକ୍ତର ଅଜମଲ ଅସିଫ୍ । ଗତକାଲି ରାତି ସାଢେ ୧୨ଟାରେ ଏର୍ଣ୍ଣାକୁଲମ ଜିଲ୍ଲାର ଗୋଥୁରୁଥ ଅଞ୍ଚଳରେ ଦୁର୍ଘଟଣା ଘଟିଛି । ଅନ୍ୟ ୩ ଜଣଙ୍କୁ ଗାଡ଼ିରୁ ସୁରକ୍ଷିତ ଉଦ୍ଧାର କରାଯାଇଛି। ଗତ ଶନିବାର ଅଦ୍ବୈତଙ୍କ ଜନ୍ମଦିନ ଥିଲା।
ସେଲିବ୍ରେସନ୍ ପରେ କୋଚିରୁ ସମସ୍ତେ କୋଡୁଙ୍ଗାଲୁର ଫେରୁଥିଲେ। ପ୍ରବଳ ବର୍ଷା, ଅନ୍ଧାର ରାତି ଓ ଅଜଣା ଜାଗା ଯୋଗୁଁ ଠିକ୍ ରାସ୍ତା ଜାଣିବା ପାଇଁ ଜିପିଏସ୍ ଉପରେ ଭରସା କରିଥିଲେ। ରାସ୍ତା ଦେଖାଉଥିବା ଆପ୍ ସାହାଯ୍ୟରେ ବାଟ ଖୋଜିଥିଲେ। ଗାଡ଼ି ସାମନାରେ ପାଣି ଭର୍ତ୍ତି ରାସ୍ତା ଥିଲା। ତେବେ ମ୍ୟାପ୍ ଅନୁସାରେ ଆଗକୁ ବଢିଥିଲେ ଡାକ୍ତର ଅଦ୍ବୈତ। ହେଲେ ସେମାନଙ୍କ ଅଜାଣତରେ ଗାଡ଼ି ନଦୀ ଭିତରେ ପଶି ଯାଇଥିଲା। ଫଳରେ କାରଟି ପାଣିରେ ବୁଡ଼ି ଯାଇଥିଲା।
ସ୍ଥାନୀୟ ଲୋକେ ଅନ୍ୟ ତିନି ଜଣଙ୍କୁ ଉଦ୍ଧାର କରିଥିଲେ। ସେମାନଙ୍କୁ ଚିକିତ୍ସା ପାଇଁ କୋଚି ହସପିଟାଲରେ ଭର୍ତ୍ତି କରାଯାଇଛି ।
ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର, ଦଶ ବର୍ଷ ପୂର୍ବେ ନିଖୋଜ ଥିଲେ
ଆନନ୍ଦପୁର: ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର । ସ୍କୁଲ ପରିସରରରୁ ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି। କେନ୍ଦୁଝର ଜିଲ୍ଲା ଆନନ୍ଦପୁର ଘଷିପୁରା ଥାନା ବସନ୍ତପୁରା ବଳଦେବଜୀଉ ସ୍କୁଲ ପରିସରରୁ ମୃତଦେହ ଉଦ୍ଧାର ହୋଇଛି ।
ମୃତକ ସ୍ଥାନୀୟ ତୋରାଣିଆପାଳ ଗାଁର ବାସନ୍ତୀ ଜେନା ବୋଲି ଜଣାପଡିଛି। ଦଶବର୍ଷ ପୂର୍ବେ କେଉଁଆଡେ ଚାଲିଯାଇଥିଲେ ବାସନ୍ତୀ। ଏବେ ସ୍କୁଲ ପରିସରରୁ ତାଙ୍କ ଝୁଲନ୍ତା ମୃତଦେହ ମିଳିବା ପରେ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି। ଘଟଣାସ୍ଥଳରେ ପହଞ୍ଚି ବିଭିନ୍ନ ଦିଗକୁ ନେଇ ତଦନ୍ତ ଆରମ୍ଭ କରିଛି ପୋଲିସ ।

