ନୂଆଦିଲ୍ଲୀ: ବନ୍ଦ ହେବ କି, ଏସିଆ କପ । ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ୪ ଖେଳାଳି କରୋନା ପଜିଟିଭ୍ ଚିହ୍ନଟ । ଶ୍ରୀଲଙ୍କାର ୪ଜଣ ଖେଳାଳି କରୋନା ପଜିଟିଭ୍ ଚିହ୍ନଟ ହୋଇଥିବା ସୂଚନା ମିଳିଛି । ଶ୍ରୀଲଙ୍କାର ଦ୍ରୃତ ବୋଲର ଚାମିରା, ସ୍ପିନର ହସରଙ୍ଗାଙ୍କ ମଧ୍ୟ କରୋନା ପଜିଟିଭ୍ ଚିହ୍ନ ହୋଇଛନ୍ତି । ହସରଙ୍ଗା ପ୍ରଥମ ଦୁଇଟି ମ୍ୟାଚ ଖେଳିପାରିବେ ନାହିଁ । ଯାହାକି ଦଳର ଚିନ୍ତାର ବିଷୟ ପାଲଟିଛି ।
ନନ୍ଦିଘୋଷ ଟିଭି: ଦେହ କଂଗ୍ରେସ, ମନ ବିଜେପି । ବାଉଳି ହୋଇ ହାଉଳି ଖାଉଛନ୍ତି । କଂଗ୍ରେସରେ ଆଉ ମନ ଲାଗୁନି, ବିଜେପି ପାଇଁ ହାଇପାଇଁ । ଏଭଳି ଅବସ୍ଥା ଏବେ ରାଜ୍ୟ କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜାଙ୍କର । ଋତୁ ଅନୁସାରେ ରଙ୍ଗ ବଦଳାଉଥିବା କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ସମସ୍ୟା ଶୁଣୁନାହାନ୍ତି କି ବିଷୟବସ୍ତୁ ଜାଣୁନାହାଁନ୍ତି । କାରଣ ହେଲା ସାଲୁଜା ଏବେ ନିଜର ରାଜନୈତିକ ଭବିଷ୍ୟତକୁ ନେଇ ସନ୍ଦିହାନ । ବିଭିନ୍ନ ପ୍ରକାର ଅପରାଧିକ କାର୍ଯ୍ୟରେ ସମ୍ପୃକ୍ତି ଯୋଗୁ ଧୀରେ ଧୀରେ ସେ ଜନତାଙ୍କ ଭରସା ହରାଇଲେଣି । ବିଭିନ୍ନ ସମୟରେ ବିବାଦୀୟ ବୟାନ ସାଙ୍ଗକୁ ସରକାରୀ ଅଧିକାରୀଙ୍କ ପ୍ରତି ଦୁର୍ବବ୍ୟହାର ପ୍ରଦର୍ଶନ କରୁଥିବାରୁ ତାଙ୍କ ବିରୋଧରେ ପ୍ରବଳ ଜନ ଅସନ୍ତୋଷ ଦେଖାଦେଲାଣି । ବିକାଶ କାର୍ଯ୍ୟରେ ବାରମ୍ବାର ବାଧା ସୃଷ୍ଟି କରୁଥିବାରୁ ନିଜ ନିର୍ବାଚନମଣ୍ଡଳୀରେ ମଧ୍ୟ ସେ ଭୋଟରଙ୍କ ଆସ୍ଥା ହରେଇସାରିଲେଣି ।
ଯେତେବେଳେ ଯାହା ମନକୁ ଆସିଲା ତାହା କହୁଛନ୍ତି ବିଧାୟକ । କଣ୍ଟାବାଞ୍ଜିବାସୀଙ୍କୁ ମିଥ୍ୟା ପ୍ରତିଶ୍ରୁତି ଦେଇ ବିଧାୟକ ହୋଇଛନ୍ତି ସାଲୁଜା । ସାଲୁଜା ଅତୀତରେ ଜଣେ କାଠ ମାଫିଆ ଓ ତାଙ୍କ ନାଁରେ ଅନେକ ଅପରାଧିକ ମାମଲା ରହିଛି ବୋଲି ମଧ୍ୟ ଅଭିଯୋଗ ହେଉଛି । କିଛି ମାସ ପୂର୍ବେ ସାନପୁଅ ସେଜି ବନ୍ଧୁକ ଦେଖାଇ ସିନେମା ହଲର ମାଲିକ ଓ ଭାଇଙ୍କୁ ଭୟଭୀତ କରିବା ସହ ମାଡ ମାରିଥିବା ଅଭିଯୋଗରେ ଗିରଫ ହୋଇଥିଲେ । ବିଧାୟକ ସନ୍ତୋଷ ସିଂ ସାଲୁଜାଙ୍କ ଅପରାଧିକ ପୃଷ୍ଠଭୂମି ବିଷୟରେ ସମସ୍ତେ ଜାଣିଛନ୍ତି । ଲୋକଙ୍କ ଦୁଃଖ କମ ବରଂ ନିଜର ଖୁସି ଅଧିକ ଖୋଜନ୍ତି ବିଧାୟକ । ବ୍ୟକ୍ତିଗତ ସ୍ଵାର୍ଥ ପାଇଁ ସରକାରୀ ଅଧିକାରୀଙ୍କୁ ଖରାପ ବ୍ୟବହାର କରି ବେଆଇନ କାମ କରିବା ହେଉଛି ସନ୍ତୋଷଙ୍କ ଚିରାଚରିତ ଅଭ୍ୟାସ ।
ଗଞ୍ଜାମ: ଗଞ୍ଜାମ ଗସ୍ତରେ 5T ସଚିବ ଭିକେ ପାଣ୍ଡିଆନ । କରିଛନ୍ତି ବିକାଶମୂଳକ କାର୍ଯ୍ୟର ସମୀକ୍ଷା । ଆସ୍କା ବିଜ୍ଞାନ କଲେଜରେ ଆୟୋଜିତ ସାଧାରଣ ସଭାରେ ଯୋଗ ଦେଇ 5T ସଚିବ କହିଛନ୍ତି- ସ୍କୁଲ ଓ କଲେଜଗୁଡିକ ସାମିଲ ଫାଇଭ-ଟିରେ ସାମିଲ କରାଯାଇଛି । କଲେଜ ଓ ସ୍କୁଲ ରେ ସ୍ମାର୍ଟକ୍ଲାସ ରୁମ, ସାଇନ୍ସ ଲ୍ୟାବ ଆଦି ରହିବ । ଲୋକଙ୍କ ସୁଖଦୁଃଖ ବୁଝିବା ଲାଗି ମୁଖ୍ୟମନ୍ତ୍ରୀ ପଠାଇଛନ୍ତି । ବିକାଶ ଲାଗି ଭଲ କାମ କରନ୍ତୁ ବୋଲି ସେ ପରାମର୍ଶ ଦେଇଥିଲେ । ଭଲ କାମ କଲେ ଦ୍ବିତୀୟ ପର୍ଯ୍ୟାୟ ଅନୁଦାନ ମିଳିବ । ଛାତ୍ରଛାତ୍ରୀଙ୍କ ପ୍ରତି ଧ୍ୟାନ ଦେବାକୁ ସେ ଅଧ୍ୟାପକମାନଙ୍କୁ ଆହ୍ବାନ ଦେଇଥିଲେ ।
ଘର ଭିତରୁ ମା ମାନଙ୍କୁ ବାହାରକୁ ଆଣି ସବୁ ପ୍ରକାର ସୁବିଧା ମୁଖ୍ୟମନ୍ତ୍ରୀ ଯୋଗାଇଛନ୍ତି । ମିଶନ ଶକ୍ତି ଏବେ ହୋଟେଲ, ହଷ୍ଟେଲ, ପାନ୍ଥ ନିବାସ ପରିଚାଳନା ସହ ଧାନ କିଣା, ବିଜୁଳି ବିଲ କାମରେ ଲାଗିଛନ୍ତି । ଗାଁ ଗଣ୍ଡା ରେ ପଡିରହିଥିବା ସରକାରୀ ପ୍ରତିଷ୍ଠାନ ଗୁଡିକ ଭଲ କାମରେ ବ୍ୟବହାର ପାଇଁ ମିଶନ ଶକ୍ତିକୁ ହସ୍ତାନ୍ତର କରାଯିବ। ବିଡ଼ିଓ ଙ୍କୁ ଆବେଦନ କଲେ ମାସକ ଭିତରେ ମରାମତି କରି ମିଶନ ଶକ୍ତିଙ୍କୁ ହସ୍ତାନ୍ତର କରିବେ । ଆସ୍କା ଉପଖଣ୍ଡ ହସ୍ପିଟାଲ ରୂପାନ୍ତରଣ ଲାଗି ୪୨ କୋଟି ଟଙ୍କା ଅନୁମୋଦିତ ହୋଇଛି । ଆପଣ ମାନଙ୍କ ଅନେକ ଅଭିଯୋଗ ପାଇଛି। ମନ୍ଦିର ମସଜିଦ ଚର୍ଚ୍ଚ ଓ କମ୍ୟୁନିଟି ସେଣ୍ଟର ପାଇଁ ଯେଉଁ ଦରଖାସ୍ତ ଦେଇଛନ୍ତି, ତା ଉପରେ ସେପ୍ଟେମ୍ବର ୩ ତାରିଖ ମୁଖ୍ୟମନ୍ତ୍ରୀ ଭଲ ଖବର ଦେବେ ବୋଲି ସେ କହିଛନ୍ତି ।
ଇସଲାମବାଦ: ଭାରତରେ ସ୍ବାମୀ ଛୁଆଙ୍କୁ ଛାଡ଼ି ପାକିସ୍ତାନୀ ପ୍ରେମିକଙ୍କ ପାଖକୁ ଯାଇଥିବା ଅଞ୍ଜୁଙ୍କୁ ନେଇ ପ୍ରତିଦିନ ନୂଆ ନୂଆ ଖବରମାନ ନଜରକୁ ଆସୁଛି । ପାକିସ୍ତାନରେ ସ୍ବାମୀ ନସରୁଲ୍ଲାଙ୍କ ସହ ରହିଥିବା ଅଞ୍ଜୁଙ୍କୁ ଆସୁଛି ମଡେଲ ବନିବା ପାଇଁ ଅଫର । ବିଭିନ୍ନ ବିଜ୍ଞାପନ ପାଇଁ ଅଞ୍ଜୁଙ୍କୁ ଅଫର ଆସୁଛି । ପାକିସ୍ତାନରେ ଅଞ୍ଜୁ ଏବେ ଜଣେ ସେଲିବ୍ରେଟିଙ୍କ ଭଳି ଜୀବନ କାଟୁଛନ୍ତି । ସେ ଯେଉଁ ସ୍ଥାନକୁ ଯାଉଛନ୍ତି ଲୋକେ ତାଙ୍କ ସହ ସେଲଫି ନେଉଛନ୍ତି । ଏପରିକି ଏତେ ଲୋକ ସେଲଫି ନେବାକୁ ବ୍ୟସ୍ତ ଯେ ଧାଡ଼ିରେ ମଧ୍ୟ ଛିଡ଼ା ହୋଇଥାନ୍ତି । ପାକିସ୍ତାନରେ ଅଞ୍ଜୁଙ୍କ ଲୋକପ୍ରିୟତା ଏତେ ମାତ୍ରାରେ ପରିଣତ ହୋଇଛି ଯେ ଅନେକ ବ୍ରାଣ୍ଡ ତାଙ୍କୁ ସେମାନଙ୍କ ପ୍ରଡକ୍ସନ ପାଇଁ ବିଜ୍ଞାପନ ଦେବା ପାଇଁ ଅଫର୍ ଦେଉଛନ୍ତି । କିଛି ଦିନ ପୂର୍ବେ ଅଞ୍ଜୁ ସାକାକୋଟର ଏକ ବିୟୁଟି ପାର୍ଲରକୁ ମେକ୍ ଇନ୍ ପାଇଁ ଯାଇଥିଲେ, ଯେଉଁଠାରେ ତାଙ୍କଠାରୁ କୌଣସି ଟଙ୍କା ନେଇନଥିଲେ । ଏପରକି ସ୍ବାମୀ ନସରୁଲ୍ଲାଙ୍କ ସହ ଦୈନିକ ବଜାରକୁ ସମାଗ୍ରୀ କିଣିବା ପାଇଁ ଯାଉଥିବାବେଳେ ଦେକାନୀମାନେ ଟଙ୍କା ମଧ୍ୟ ନେଉନାହାନ୍ତି ।
ଅଞ୍ଜୁଙ୍କ ସ୍ବାମୀ ନସରୁଲ୍ଲା କହିଛନ୍ତି କି, ଏଯାବତ ଯଦିଓ ବଡ଼ ବଡ଼ ବ୍ରାଣ୍ଡର ଅଫର ମିଳିନାହିଁ । ତଥାପି ଅନେକ ଛୋଟ ପ୍ରଡକ୍ଟ ପାଇଁ ବିଜ୍ଞାପନ ଅଫର ରହିଛି । ଯଦି ସେ ଚାହିଁବେ ଏଥିରେ ଅଭିନୟ କରିପାରିବେ । ଏଯାବତ ଲୋକେ ଅନେକ ଉପହାର ଦେଇଛନ୍ତି । ଯଦି ସେ ବିଜ୍ଞାପନରେ କାମ କରିବେ ତାହେଲେ ଲୋକଙ୍କ ଆଉ ସେ ଭଲ ପାଇବା ରହିବ ନାହିଁ । ବଜାରରେ ସମସ୍ତେ ତାଙ୍କୁ ଭଉଣୀ ବୋଲି ମଧ୍ୟ ସମ୍ବୋଧନ କରନ୍ତି ।
ମୁମ୍ବାଇ: ବଲିଉଡରେ ଅନେକ ଷ୍ଟାର କିଡ୍ ନିଜର ଜଲଓ୍ବା ଦେଖାଉଛନ୍ତି । କିନ୍ତୁ ଏପରି କିଛି କଳାକାର ଅଛନ୍ତି ଯେଉଁମାନଙ୍କର ବ୍ୟାକ୍ ଟୁ ବ୍ୟାକ୍ ଫିଲ୍ମ ଫ୍ଲପ ହେଉଛି । ପରିବାରର ଅନ୍ୟ ସଦସ୍ୟ ଇଣ୍ଡଷ୍ଟ୍ରିରେ ନାଁ କମେଇଥିବାବେଳେ କିନ୍ତୁ ଏମାନେ ଫ୍ଲପରେ ରାଣୀ ସାଜିଛନ୍ତି । ତେବେ ଆସନ୍ତୁ ଏଭଳି ୪ଜଣ ଅଭିନେତ୍ରୀ ଉପରେ ନଜର ପକାଇବା ।
ପରିଣୀତି ଚୋପ୍ରା: ଗ୍ଲୋବାଲ ଷ୍ଟାର ପ୍ରିୟଙ୍କା ଚୋପ୍ରାଙ୍କ ସାନ ଭଉଣୀ ହେଉଛନ୍ତି ପରିଣୀତି ଚୋପ୍ରା । ଯିଏକି ନିକଟରେ ବିବାହ ବନ୍ଧନରେ ବାନ୍ଧି ହୋଇଛନ୍ତି । ୨୦୧୧ ମସିହାରେ ବଲିଉଡରେ ଡେବ୍ୟୁ କରିଥିବା ପରିଣୀତି ଲଗାତାର ତିନୋଟି ହିଟ୍ ଫିଲ୍ମ ଦେଇ ଦର୍ଶକଙ୍କ ମନମୋହିଥିଲେ । କିନ୍ତୁ ଏବେ ତାଙ୍କର ରିଲିଜ ହେଉଥିବା ଫିଲ୍ମ ଫ୍ଲପ ହେବାରେ ଲାଗିଛି ।
ସୋନାକ୍ଷୀ ସିହ୍ନା: ଶତ୍ରୃଘ୍ନ ସିହ୍ନାଙ୍କ ଝିଅ ହେଉଛନ୍ତି ସୋନାକ୍ଷୀ । ସଲମାନଙ୍କ ସହ ଦବଙ୍ଗ ଫିଲ୍ମ ଜରିଆରେ ବଲିଉଡରେ ଡେବ୍ୟୁ କରିଛନ୍ତି । ରାଓ୍ବଡି ରାଠୋର, ଆକ୍ସନ ଜାକ୍ସନ ଭଳି କିଛି ଫିଲ୍ମ ହିଟ୍ ହୋଇଥିବାବେଳେ ପରବର୍ତ୍ତୀ ସମୟରେ ରିଲିଜ ହୋଇଥିବା ଫିଲ୍ମ ଗୁଡ଼ିକ ଫ୍ଲପ ହେବା ପରେ ଓ୍ବେବ ସିରିଜରେ କାମ ଆରମ୍ଭ କରିଛନ୍ତି ସୋନାକ୍ଷୀ ।
ସୋନମ କପୁର: ଅନୀଲ କପୁରଙ୍କ ଝିଅ ସୋନମ କପୁର । କ୍ୟାରିୟର ପ୍ରଥମାର୍ଦ୍ଧରେ ହିଟ୍ ଫିଲ୍ମରେ ଅଭିନୟ କରିଥିବାବେଳେ ଶେଷଥର ପାଇଁ ରିଲିଜ ହେଉଥିବା ଫିଲ୍ମ ଗୁଡ଼ିକ ଫ୍ଲପ ହେବାରେ ଲାଗିଛି ।
ଶମିତା ସେଟ୍ଟୀ: ଶିଳ୍ପା ସେଟ୍ଟୀଙ୍କ ଭଉଣୀ ହେଉଛନ୍ତି ଶମିତା । ବିଗ ବସରୁ ସେ ଲାଇମଲାଇଟକୁ ଆସିଥିଲେ । ବଲିଉଡରେ ଅେନକ ହିଟ୍ ଫିଲ୍ମରେ ନଜର ଆସିଥିବାବେଳେ ବ୍ୟାକ ଟୁ ବ୍ୟାକ ଫ୍ଲପ ହେବା ପରେ ବଡ଼ ପରଦାରୁ ସେ ଦୂରେଇ ରହିଛନ୍ତି ।
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗ୍ରୀସ ଗସ୍ତରୁ ଫେରିବା ପରେ ବେଙ୍ଗାଲୁରୁରେ ଇସ୍ରୋର ବୈଜ୍ଞାନିକମାନଙ୍କୁ ଭେଟି ଶୁଭେଚ୍ଛା ଜଣାଇଛନ୍ତି । ଏହି ଅବସରରେ ବୈଜ୍ଞାନିକମାନଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କିଛି ଗୁରୁତ୍ୱପୂର୍ଣ୍ଣ ଘୋଷଣା ମଧ୍ୟ କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ ଚନ୍ଦ୍ରରପୃଷ୍ଠର ଯେଉଁ ସ୍ଥାନରେ ଚନ୍ଦ୍ରଯାନ-୩ର ବିକ୍ରମ ଲ୍ୟାଣ୍ଡର ଅବତରଣ କରିଛି ତାର ନାଁ ଏବେ ଶିବଶକ୍ତି ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଏହି ଘୋଷଣାକୁ ନେଇ ବିରକ୍ତି ପ୍ରକାଶ କରିଛନ୍ତି କଂଗ୍ରେସ ନେତା ରଶିଦ ଅଲଭି । ସେ କହିଛନ୍ତି ଯେ ଆମେ ସେହି ଲ୍ୟାଣ୍ଡିଂ ପଏଣ୍ଟର ମାଲିକ ନୁହେଁ ଯେ ନାମକରଣ କରିଦେବା ।
ଏକ ଜାତୀୟ ଗଣମାଧ୍ୟମକୁ ସାକ୍ଷାତକାରରେ ରଶିଦ କହିଛନ୍ତି, ନରେନ୍ଦ୍ର ମୋଦୀଙ୍କୁ ଏହି ଅଧିକାର କିଏ ଦେଲା ଯେ ସେ ଚନ୍ଦ୍ରପୃଷ୍ଠର ନାମକରଣ କରିବେ? ଏହା ହାସ୍ୟାସ୍ପଦ ଅଟେ । ଏହି ନାମକରଣ ପରେ ସାରା ବିଶ୍ୱ ଏହା ଉପରେ ହସିବ । ଚନ୍ଦ୍ରର ସାଉଥ ପୋଲରେ ଲ୍ୟାଣ୍ଡିଂ ହେବା ଭଲ କଥା ଏବଂ ଏହା ଉପରେ ଆମକୁ ଗର୍ବ ମଧ୍ୟ ଲାଗୁଛି ଏଥିରେ କୌଣସି ସନ୍ଦେହ ନାହିଁ । କିନ୍ତୁ ଆମେ ଚନ୍ଦ୍ରର ମାଲିକ ନୁହେଁ, ସେହି ଲ୍ୟାଣ୍ଡିଂ ପଏଣ୍ଟର ମାଲିକ ନୁହେଁ ଆମେ । ଏପରି କରିବା ବିଜେପିର ଅଭ୍ୟାସ ରହିଆସିଛି । ଯେବେଠୁ ସେ କ୍ଷମତାକୁ ଆସିଛି ନାମ ପରିବର୍ତ୍ତନର ଅଭ୍ୟାସ ରହିଛି ।
ଯେବେ ତାଙ୍କୁ ପଚରା ଯାଇଥିଲା ଯେ, ୟୁପିଏ ଶାସନ ସମୟରେ ଯେଉଁଠି ଚନ୍ଦ୍ରଯାନ-୧ର ଲ୍ୟାଣ୍ଡିଂ ହୋଇଥିଲା ସେହି ସ୍ଥାନର ନାଁ ଜବାହାର ପଏଣ୍ଟ ରଖାଯାଇଥିଲା, କିନ୍ତୁ ବିଜେପି କହୁଛି ଯେ ପିଏମ ଏହି ଲ୍ୟାଣ୍ଡିଂ ପଏଣ୍ଟର ନାଁ ତ ଅଟଳ ବିହାରୀ ବାଜପେୟୀ ବା ନିଜ ନାଁରେ ରଖିନାହିଁ । ଆପଣଙ୍କ ସରକାର ଜବାହାର ପଏଣ୍ଟ ନାଁ ରଖିଥିଲା । ଏହାର ଜବାବ ଦେଇ ଅଲଭି କହିଛନ୍ତି, ଜବାହାରଲାଲ ନେହେରୁଙ୍କ ତୁଳନା ଆପଣ କରିପାରିବେ ନାହିଁ । ଆଜି ଇସ୍ରୋ ଯାହା ବି ଅଛି ତାହା ପଣ୍ଡିତ ନେହେରୁଙ୍କ ଅବଦାନ କାରଣରୁ ହିଁ ଅଛି । ୧୯୬୨ ମସିହାରେ ପଣ୍ଡିତ ନେହେରୁ ଏବଂ ବିକ୍ରମ ସାରାଭାଇ ଇସ୍ରୋର ମୂଳଦୁଆ ପକାଇଥିଲେ । ଆପଣ କହିପାରିବେ ଯେ ପଣ୍ଡିତ ନେହେରୁ ଏହାର ଫାଉଣ୍ଡର ଥିଲେ । ତାହା ସମ୍ପୂର୍ଣ୍ଣ ଅଲଗା କଥା ଥିଲା, କିନ୍ତୁ ମୋଦୀ ଜୀ ଏହାର ରାଜନୀତିକରଣ କରୁଛନ୍ତି ବୋଲି ରଶିଦ କହିଛନ୍ତି ।
ନନ୍ଦିଘୋଷ ବ୍ୟୁରୋ: କୁକୁରଙ୍କ ପାଇଁ ଦିନଟିଏ । ଆଜି ହେଉଛି ଇଣ୍ଟର ନ୍ୟାସନାଲ ଡଗ୍ ଡେ । ସମାଜରେ ଏଭଳି ଅନେକ ପଶୁପ୍ରେମୀ ରହିଛନ୍ତି ଯେଉଁମାନେ ଘରେ କୁକୁର ପାଳିବାକୁ ଭଲ ପାଆନ୍ତି । ଏଭଳିକି କୁକୁରଙ୍କ ସେବାରେ ଲକ୍ଷାଧିକ ଟଙ୍କା ମଧ୍ୟ ଖର୍ଚ୍ଚ କରନ୍ତି । ଆଉ କିଛି ଲୋକ କୁକୁରଙ୍କୁ ଡରୁଥିବାବେଳେ କାଳେ କୁକୁରଙ୍କଠାରୁ କିଛି ରୋଗ ହେବ ଏହି ଡରରେ କୁକୁରଙ୍କଠାରୁ ଦୂରରେ ରହିଥାନ୍ତି । ତେବେ କୁକୁରଙ୍କୁ ନେଇ ଅନେକ ରିସର୍ଚ୍ଚ ମଧ୍ୟ କରାଯାଇଛି । ଯେଉଁଥିରେ ପ୍ରକାଶ କରାଯାଇଛି କି, ନିଜର ପ୍ରିୟଜନଙ୍କଠାରୁ କୁକୁରକୁ ଚମ୍ବନ ଦେବା କ୍ଷତିକାରକ ହୋଇନଥାଏ ।
କୁକୁର ପାଟିରେ ୬ଶହ ପ୍ରକାରର ବ୍ୟାକ୍ଟେରିଆ ରହିଥାନ୍ତି । ମାନବ ପାଟିରେ ରହୁଥିବା ଜୀବାଣୁ ସମ୍ପର୍କରେ ଅଧ୍ୟୟନ କରାଯାଇଥିବାବେଳେ ଜଣାପଡ଼ିଛି କି, ୬୧୫ ପ୍ରକାରର ଜୀବାଣୁ ରହିଛନ୍ତି । ଅଧ୍ୟୟନରୁ ଜଣାପଡ଼ିଛି କି, ମଣିଷ ଏବଂ କୁକୁରଙ୍କ ଜୀବାଣୁ ପ୍ରାୟତଃ ସମାନ । ବିଶ୍ବାସ କରାଯାଏ ଯେ ଆମେ କୁକୁରକୁ ଯଦି ଚମ୍ବନ ଦେଉଛେ ତାହେଲେ ରୋଗ ଆସିପାରେ । ବାସ୍ତବରେ ଏହା ହୋଇନଥାଏ ବୋଲି କୁହାଯାଇଛି । କୁକୁରଙ୍କ ପାଟିରେ ଥିବା ଅଧିକାଂଶ ଜୀବାଣୁ ସଂକ୍ରାମକ ନୁହଁନ୍ତି । ଏଣୁ ଯଦି ଆପଣ କୁକୁରକୁ ଚୁମ୍ବନ ଦିଅନ୍ତି ତାହେଲେ ରୋଗ ବ୍ୟାପିବାର ସଂଖ୍ୟା କମ ରହିଥାଏ । ଯଦି କୁକୁରଙ୍କୁ ଖଞ୍ଚା ଖାଦ୍ୟ ପରସାଯାଏ ତାହେଲେ ରୋଗ ଆକ୍ରାନ୍ତ ହେବାର ଆଶଙ୍କା ଅଧିକ ରହିଥାଏ ।
ପୋଷା କୁକୁରଙ୍କୁ ସଫା ସୁତୁରା ରଖିବା । ଯେପରିକି ମଣିଷଙ୍କ ଭଳି କୁକୁରଙ୍କୁ ଦାନ୍ତ ଘଷାଇବା ମଧ୍ୟ ଜରୁରୀ । ଯାହାଦ୍ବରା ତାଙ୍କ ପାଟିରୁ କୌଣସି ରୋଗ ସଂକ୍ରମଣ ହେବ ନାହିଁ । କେବଳ କୁକୁର ନୁହଁନ୍ତି ମଣିଷଙ୍କ ଦାନ୍ତ ମଧ୍ୟ ରୋଗ ସଂକ୍ରାମକ ହୋଇଥାଏ । ଉଭୟ କୁକୁର ଏବଂ ମଣିଷଙ୍କ ପାଟିରେ ମାଇକ୍ରୋବସ ଥାଏ । ଉଭୟଙ୍କ ପାଟିରେ ଜୀବାଣୁ ଥାଏ । ମାତ୍ର କୁକୁରଙ୍କ ପାଟିରେ ଅଧିକ ପରିମାଣର ଜୀବାଣୁ ରହିଥାଏ । ବିଶ୍ବାସ ରହିଛି କି, କୁକୁରଙ୍କ ପାଟିର ଲାଳରେ ଅନେକ ରୋଗର ଉପସମ ହୋଇଥାଏ । ଏପରିକି ମଣିଷମାନେ ମଧ୍ୟ ନିଜ ପାଟିରୁ ଛେପ କାଡ଼ି କ୍ଷେତ ସ୍ଥାନରେ ଲଗାଇଥାନ୍ତି । ତେବେ ଅଧ୍ୟୟନରୁ ଜଣାପଡିଛି କି, କୁକୁର ମଣିଷଙ୍କ ଭଳି ସମସ୍ତ ସ୍ତନ୍ୟପାୟୀ ଜୀବଙ୍କ ଲାଳରେ କ୍ଷତ ଭଲ ହୋଇଥାଏ ।
ନନ୍ଦିଘୋଷ ବ୍ୟୁରୋ: ତାମିଲନାଡ଼ୁର ମଦୁରାଇ ରେଳଷ୍ଟେସନରେ ଘଟିଥିବା ଅଘଟଣ ସମସ୍ତଙ୍କ ଆଚମ୍ବିତ କରିଛି । ଗ୍ୟାସ ସିଲିଣ୍ଡର ପାଇଁ ୧୦ ଜଣଙ୍କ ଜୀବନ ଯାଇଥିବାବେଳେ ୨୦ଜଣ ଗୁରୁତର ଆହତ ହୋଇଛନ୍ତି । ରେଳଯାତ୍ରା ସମୟରେ ଗ୍ୟାସ ସିଲିଣ୍ଡର ନେବା ଅବୈଧ ହୋଇଥିବାବେଳେ ଏହା ନେବା ଦଣ୍ଡନୀୟ ଅପରାଧ । ତେବେ ଗ୍ୟାସ ଭଳି ଅନେକ ସାମଗ୍ରୀ ରହିଛି ଯାହାକି ଯାତ୍ରା ସମୟରେ ନେବା ଦଣ୍ଡନୀୟ ଅପରାଧ । ତେବେ ଏସବୁ ସାମଗ୍ରୀ ଗୁଡ଼ିକ ହେଲା ଗ୍ୟାସ ସିଲିଣ୍ଡର, ଷ୍ଟୋଭ୍, ବାଣ, ଏସିଡ୍, ଚମଡ଼ା, ଗ୍ରୀସ୍, ଦୁର୍ଗନ୍ଧଯୁକ୍ତ ସାମଗ୍ରୀ, ନିଶାଯୁକ୍ତ ସାମଗ୍ରୀ କିମ୍ବା କୌଣସି ଜ୍ବଳନ୍ତ ରାସାୟନିକ ପଦାର୍ଥ । ଏପରିକି ୨୦ କିଲୋ ପର୍ଯ୍ୟନ୍ତ ଘିଅ ନେଇପାରିବେ ।
ଟ୍ରେନରେ ଯାତ୍ରା କରୁଥିବା ସମୟରେ ନିଷିଦ୍ଧ ସାମଗ୍ରୀ ନେବା ଆଇନତଃ ଅପରାଧ । ଯଦି କେହି ଏସବୁ ନେବା ସମୟରେ ଧରାପଡ଼ନ୍ତି ତାହେଲେ ରେଳ ନିୟମ ଧାରା ୧୬୪ ଅନୁଯାୟୀ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏପରିକି ଭାରି ଜରିମାନା ସହ ୩ ବର୍ଷ ପର୍ଯ୍ୟନ୍ତ ଜେଲ ଦଣ୍ଡ ହୋଇପାରେ ।
ମୁମ୍ବାଇ: ବକ୍ସ ଅଫିସରେ ବେବାଲ ମଚାଉଛି ସନ୍ନି ଦେଓଲଙ୍କ ଅଭିନୀତ ଫିଲ୍ମ ’ଗଦର-୨’ । ୫ଶହ କୋଟି କ୍ଲବରେ ସାମିଲ ହେବାକୁ ଯାଉଛି ଏହି ଫିଲ୍ମ । ସନ୍ନିଙ୍କ ଅଭିନୟକୁ ଦର୍ଶକେ ବେଶ ପସନ୍ଦ କରୁଛନ୍ତି । ଆଗାମ ଦିନରେ ସନ୍ନିଙ୍କ ଅନେକ ଫିଲ୍ମର ସିକ୍ବେଲ ୨ ଆସିବା ନେଇ ପ୍ରଯୋଜକମାନେ ଯୋଜନା ପ୍ରସ୍ତୁତ କରୁଛନ୍ତି । ତେବେ ସନ୍ନି ଦେଓଲ ଆଗାମି ଫିଲ୍ମ ଗୁଡ଼ିକରେ ନିଜର ଫିସ ବଢ଼ାଇବେ ବୋଲି କୁହାଯାଉଛି । ସଲମାନ ଶାହାରୁଖ ଗୋଟିଏ ଫିଲ୍ମ ପାଇଁ ଅଧିକ ପାରିଶ୍ରମିକ ନେଇଉଥିବାବେଳେ ସନ୍ନି ମଧ୍ୟ ଅଧିକ ଟଙ୍କା ନେବେ ବୋଲି କୁହାଯାଉଛି ।
ନିକଟରେ ଜଣେ ପ୍ରଯୋଜକ ସନ୍ନିଙ୍କ ସହ ଏକ ଫିଲ୍ମ ପାଇଁ କଥା ହୋଇଥିବାବେଳେ ସେ ୫୦ କୋଟି ନେଲେ ଫିଲ୍ମ ସାଇନ କରିବେ ବୋଲି କହିଛନ୍ତି । ପ୍ରଯୋଜକ ଗଣମାଧ୍ୟମକୁ ଏନେଇ ପ୍ରତିକ୍ରିୟା ଦେଇଛନ୍ତି । ତେବେ ଯଦି ସନ୍ନି ୫୦ କୋଟି ନିଅନ୍ତି ତାହେଲେ ସଲମାନ ଏବଂ ଶହାରୁଖଙ୍କ ସହ ଟକ୍କର ଦେବା ପାଇଁ ପ୍ରସ୍ତୁତ ହୋଇଛନ୍ତି ବୋଲି ପ୍ରଂଶସକମାନେ କହିଛନ୍ତି ।
ହିମାଚଳ ପ୍ରଦେଶ : କାହିଁକି ବାରମ୍ବାର ଭୂସ୍ଖଳନ ଓ ବର୍ଷା ହିମାଚଳରେ । କୋଟି କୋଟି ଟଙ୍କାର ସମ୍ପତ୍ତି ନଷ୍ଟ ହୋଇଥିବାବେଳେ ପ୍ରାଣ ହରାଇଲେଣି ଶତାଧିକ ଲୋକ । ତେବେ ବିଶ୍ବ ତାପାୟନ ଯୋଗୁ ଏହି ବିପର୍ଯ୍ୟୟ ଘଟୁଛି ବୋଲି କହିଛନ୍ତି ବୈଜ୍ଞାନିକ । ଭାରତ ପରି ଏକ ଦେଶରେ 70 ପ୍ରତିଶତ ବର୍ଷା ସବୁକ୍ଷେତ୍ରରେ ହୋଇଥାଏ ଉପଯୋଗୀ । ମାତ୍ର ହିମାଳୟରେ ଲଘୁଚାପଜନିତ ଜଳବାୟୁ କାରଣରୁ ସେଠାରେ ଅସ୍ବାଭାବିକ ଅବସ୍ଥା ଲାଗି ରହିବା ସହ ପ୍ରବଳ ବର୍ଷା ହେଉଛି । ତାପମାତ୍ରା ବୃଦ୍ଧି କାରଣରୁ ଏହା ଘଟୁଛି ବୋଲି ବୈଜ୍ଞାନିକ କହିଛନ୍ତି । ଦିଲ୍ଲୀସ୍ଥିତ ଆଇଏମଡି କର୍ତ୍ତୃପକ୍ଷ କୁଳଦୀପ ଶ୍ରୀବାସ୍ତବ କହିଛନ୍ତି- ଦୁଇଟି ଶକ୍ତିଶାଳୀ ପ୍ରକ୍ରିୟାରେ ସଂଘାତ ହିଁ ଏହି ବିପର୍ଯ୍ୟୟର କାରଣ । ବିଶ୍ବ ତାପମାତ୍ରା ବୃଦ୍ଧିଜନିତ ଜଳବାୟୁ ପରିବର୍ତ୍ତନ କାରଣରୁ ହିମାଚଳ ପ୍ରଦେଶରେ ବାଦଲଫଟା ବର୍ଷା, ଅତ୍ୟଧିକ ବର୍ଷା ଘଟୁଛି । ଉଭୟ ହିମାଚଳ ଓ ଉତ୍ତରାଖଣ୍ଡରେ 2011ରୁ 2020 ମଧ୍ୟରେ ପ୍ରବଳ ବର୍ଷା ହେଉଥିବା ଦିବସ ସଂଖ୍ୟା 74ରୁ ବୃଦ୍ଧି ପାଇ 118ରେ ପହଞ୍ଚିଛି । ବର୍ତ୍ତମାନ ସୁଦ୍ଧା ହିମାଚଳରେ 120ରୁ ଅଧିକ ଏବଂ ଉତ୍ତରାଖଣ୍ଡରେ 75ରୁ ଅଧିକ ଲୋକ ଭୂସ୍ଖଳନରେ ପ୍ରାଣ ହରାଇଲେଣି । ମୌସୁମୀ ସହ ପଶ୍ଚିମୀ ଜଳବାୟୁର ସହାବସ୍ଥାନ ଯୋଗୁ ଏହି ସମସ୍ୟା ସୃଷ୍ଟି ହେଉଛି ।
ଇଣ୍ଡିଆନ ଇନଷ୍ଟିଚ୍ୟୁଟ ଅଫ ଜିଓମାଗ୍ନେଟିଜମର ନିର୍ଦ୍ଦେଶକ ଭି.ପି.ଦିମ୍ରି କହିଛନ୍ତି- ପଶ୍ଚିମୀ ଜଳବାୟୁ ସାଧାରଣତଃ ଜୁନ ଓ ଅକ୍ଟୋବର ମଧ୍ଯରେ ଉତ୍ତରାଞ୍ଚଳ ସୀମା ଦେଇ ଗତିକରିଥାଏ । ମାତ୍ର ତାପମାତ୍ରା ବୃଦ୍ଧି ଯୋଗୁ ଏହା ତାହା ସାମାନ୍ୟ ଦକ୍ଷିଣ ଦିଗରେ ପ୍ରବାହିତ ହୋଇଥାଏ । ଏହି କାରଣରୁ ବାଦଲଫଟା ବର୍ଷା ଘଟିଥାଏ । ସେପଟେ ପ୍ରବଳ ବର୍ଷା ଯୋଗୁ କୁଲୁ-ମଣ୍ଡି ରୋଡ ବିଚ୍ଛିନ୍ନ ହୋଇଛି । ଫଳରେ ଶହ ଶହ ପନିପରିବା ବୋଝେଇ ଯାନ ଅଟକିଥିବା ଦେଖାଯାଇଛି । ରାଜ୍ୟର କ୍ଷତିଗ୍ରସ୍ତ ଅଞ୍ଚଳରେ ଏବେ ଜାରି ରହିଛି ଉଦ୍ଧାର କାର୍ଯ୍ୟ । ବିଭିନ୍ନ ସ୍ଥାନରୁ ଆସିବାରେ ଲାଗିଛି ଛାତିଥରା ଦୃଶ୍ଯ । ଅନେକ ସ୍ଥାନରେ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିବାବେଳେ ଏନଡିଆରଏଫ, ଏସଡିଆରଏଫ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି । ରାଜ୍ୟର ୭୨୯ ରାସ୍ତାରେ ଯାତାୟାତ ପ୍ରଭାବିତ ହୋଇଛି । ୨୮ଶହ ୯୭ରୁ ଅଧିକ ପାଓ୍ବାର ଟ୍ରାନ୍ସଫର୍ମର କ୍ଷତିଗ୍ରସ୍ତ ହୋଇଛି ।
