ରାଜଧାନୀରେ ରେଭ ପାର୍ଟି । ବାର ଗାର୍ଲଙ୍କ ଉପରେ ଉଡୁଛି ପୁଳା ପୁଳା ଟଙ୍କା । ରାତି ଅଧ ଯାଏଁ ଖୋଲି ଛାତି ଥରାଇ ଦେଉଛି ବାର । ଗରାଖ ଉଡାଉଛନ୍ତି ଲକ୍ଷାଧିକ ଟଙ୍କା । ରାଜଧାନୀ ଭୁବନେଶ୍ବରର ଏକ ବାରରେ ଗତକାଲି ଦେଖିବାକୁ ମିଳିଛି ଏ ଦୃଶ୍ୟ । ରାତି ସାଢ଼େ ୩ ପର୍ଯ୍ୟନ୍ତ ଖୋଲାଥିଲା ବାର । ଭିତରେ ଚାଲିଥିଲା ରେଭ ପାର୍ଟି । ଖବର ପାଇ ଚଢ଼ାଉ କରିଥିଲା ଅବକାରୀ ବିଭାଗ ।
ଆଜିଠୁ ଆରମ୍ଭ ହୋଇଛି ମାଟ୍ରିକ ପରୀକ୍ଷା: ଏଥର ପରୀକ୍ଷା ଦେଉଛନ୍ତି ୫ ଲକ୍ଷରୁ ଅଧିକ ପିଲା
ଆଜିଠୁ ଆରମ୍ଭ ହୋଇଛି ମାଟ୍ରିକ ପରୀକ୍ଷା। ଏଥର ୫ ଲକ୍ଷ ୬୦ ହଜାରରୁ ଅଧିକ ପିଲା ପରୀକ୍ଷା ଦେଉଛନ୍ତି। ସେମାନଙ୍କ ପାଇଁ କରାଯାଇଛି ୩ ହଜାର ୮୨ଟି ସେଣ୍ଟର । ୯ଟାରୁ ପରୀକ୍ଷା ଆରମ୍ଭ ଆରମ୍ଭ ହୋଇ ସାଢ଼େ ୧୧ଟା ୩୦ରେ ଶେଷ ହେବ। ପିଲାମାନେ ସାଢ଼େ ୮ଟାରୁ ହଲରେ ପ୍ରବେଶ କରିଥିଲେ । ତେବେ ସକାଳ ୯.୩୦ ପର୍ଯ୍ୟନ୍ତ ପିଲାଙ୍କୁ ପରୀକ୍ଷା କେନ୍ଦ୍ରକୁ ଯିବାକୁ ସୁଯୋଗ ଦେବାକୁ ବୋର୍ଡ ପକ୍ଷରୁ ନିର୍ଦ୍ଦେଶ ଦିଆଯାଇଛି । ତା ପରେ ଆଉ ସୁଯୋଗ ଦିଆଯିବନି। ପରୀକ୍ଷାର୍ଥୀଙ୍କ ଆଡ୍ମିଟ୍କାର୍ଡରେ କୌଣସି ତ୍ରୁଟି ରହିଥିଲେ, ପ୍ୟାରେଣ୍ଟ ସ୍କୁଲର ଶିକ୍ଷକଙ୍କ ପରାମର୍ଶ କ୍ରମେ ପିଲାଙ୍କୁ ପରୀକ୍ଷା ଦେବାକୁ ସୁଯୋଗ ଦିଆଯିବ l କୌଣସି ପିଲା ଯେପରି ପରୀକ୍ଷା ଦେବାରୁ ବଞ୍ଚିତ ନ ହୁଅନ୍ତି, ସେଥିପାଇଁ କେନ୍ଦ୍ର ସୁପରିଟେଣ୍ଡେଣ୍ଟ ଯତ୍ନଶୀଳ ହେବାକୁ ବୋର୍ଡ ପକ୍ଷରୁ ନିର୍ଦ୍ଦେଶ ରହିଛି । ପୂର୍ବବର୍ଷ ଭଳି ଚଳିତ ବର୍ଷ ମଧ୍ୟ ପ୍ରତି ପ୍ରଶ୍ନପତ୍ର ବୁକଲେଟ୍ର ପ୍ରତି ପ୍ରଶ୍ନରେ ୱାଟର ମାର୍କ ସହ ସମସ୍ତ ପରୀକ୍ଷା କେନ୍ଦ୍ରରେ ସିସି କ୍ୟାମେରା ଲଗାଯାଇଛି। ସମସ୍ତ ପରୀକ୍ଷା କେନ୍ଦ୍ରକୁ ବୋର୍ଡ ମୁଖ୍ୟ କାର୍ଯ୍ୟାଳୟରେ ଖୋଲାଯାଇଥିବା କମାଣ୍ଡ କଣ୍ଟ୍ରୋଲ ରୁମ୍ ସହ ସଂଯୋଗ କରାଯାଇଛି। ପରୀକ୍ଷାରେ କପି ରୋକିବା ପାଇଁ ବୋର୍ଡ ପକ୍ଷରୁ ୩୭ଟି ସେଣ୍ଟ୍ରାଲ ସ୍ଟ୍ରାଡ୍ କରାଯିବା ସହ ଜିଲ୍ଲା ଶିକ୍ଷାଧିକାରୀ, ଜିଲ୍ଲାପାଳଙ୍କ ପକ୍ଷରୁ ଫ୍ଲାଇଂ ସ୍ପାଡ୍ ବ୍ୟବସ୍ଥା ହୋଇଛି। ପରୀକ୍ଷାକେନ୍ଦ୍ରକୁ କେବଳ ସୁପରିଟେଣ୍ଡେଣ୍ଟଙ୍କ ବ୍ୟତୀତ ଅନ୍ୟ କାହାରିକୁ ମୋବାଇଲ୍ ଫୋନ ନେବା ଉପରେ କଟକଣା କରାଯାଇଛି।
ଡବଲ ଇଞ୍ଜିନ ସରକାରରେ ଚାଷୀଙ୍କୁ ଡବଲ ଧୋକ୍କା: ଦିବ୍ୟଶଙ୍କର ମିଶ୍ର
ବିରୋଧୀ ଦଳର ସଦସ୍ୟମାନେ ନାରାବାଜି କରୁଥିବାରୁ ଆଜି ମଧ୍ୟ ବିଧାନସଭା ଠିକରେ ଚାଲିପାରି ନାହିଁ । ତେଣୁ ବାଚସ୍ପତି ସୁରମୀ ପାଢ଼ୀ ଗୃହକୁ ସାଢ଼େ ୧୧ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ । ଗତ ଦୁଇଦିନ ଧରି ବିଜେଡି ବିଧାନସଭାରେ ଚାଷୀ ପ୍ରସଙ୍ଗ ଉଠାଇଥିବା ଦେଖିବାକୁ ମିଳୁଛି । ଡବଲ ଇଞ୍ଜିନ ସରକାର ଠିକ୍ ଦିଗରେ ଯାଇ ପାରୁନାହିଁ । ମଣ୍ଡିରେ ହଜାର ହଜାର କୁଇଣ୍ଟାଲ ଧାନ ପଡ଼ି ରହିଛି । କଳାହାଣ୍ଡି, ବରଗଡ଼ ପରି ସବୁ ଜିଲ୍ଲାରେ ଏଭଳି ସ୍ଥିତି ଦେଖିବାକୁ ମିଳିଛି । ମନ୍ତ୍ରୀମାନଙ୍କର ବକ୍ତବ୍ୟ ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ । ଏହା ସରକାରଙ୍କ ଦାୟିତ୍ବହୀନତାକୁ ସୂଚାଉଛି । ଗରିବ ଚାଷୀଟିଏ ଯଦି ତା’ର ଉତ୍ପାଦିତ ଫସଲ ବିକ୍ରି କରିପାରିବ ନାହିଁ, ତେବେ ସେ ଚଳିବ କିପରି ବୋଲି ପ୍ରଶ୍ନ କରିଛନ୍ତି ବିଜେଡି ବିଧାୟକ କ୍ୟାପଟେନ ଦିବ୍ୟଶଙ୍କର ମିଶ୍ର ।
ଡବଲ ଇଞ୍ଜିନ ସରକାରରେ ଡବଲ କଟନି ଛଟନି ହେଉଥିବା ଅଭିଯୋଗ କଲା ବିଜେଡି
ଆଜି ମଧ୍ୟ ବିଧାନସଭାରେ ହଙ୍ଗାମା ଦେଖିବାକୁ ମିଳିଥିଲା । ବିରୋଧୀ ଦଳର ସଦସ୍ୟମାନେ ଗୃହରେ ନାରାବାଜି କରିବା ସହିତ ପ୍ଲାକାର୍ଡ କରି ସ୍ଲୋଗାନ ଦେଇଥିଲେ । ମଣ୍ଡି ବିଭ୍ରାଟକୁ ନେଇ ପ୍ରତିବାଦ ଦେଖିବାକୁ ମିଳିଥିଲା । ତେଣୁ ଶାନ୍ତି ଶୃଙ୍ଖଳା ବଜାୟ ରଖିବାକୁ ବାଚସ୍ପତି ସୁରମା ପାଢ଼ୀ ଅନୁରୋଧ କରିଥିଲେ ଓ ନିଜ ନିଜ ଆସନକୁ ଫେରିଯିବାକୁ ଗୃହର ସଦସ୍ୟମାନଙ୍କୁ କହିଥିଲେ । ଗୃହର ମଧ୍ୟଭାଗରେ ବିଜେଡି ଓ କଂଗ୍ରେସର ବିଧାୟକମାନେ ହଟ୍ଟଗୋଳ କରିଥିଲେ । ତେଣୁ ପରିସ୍ଥିତିକୁ ଦୃଷ୍ଟିର ରଖି ବାଚସ୍ପତି ଗୃହକୁ ଦିନ ୧୧.୩୦ ପର୍ଯ୍ୟନ୍ତ ମୁଲତବୀ ରଖିଥିଲେ ।
ତେବେ ସରକାର ଚାଷୀ ମାରଣନୀତି ଅବଲମ୍ବନ କରିଥିବା ବିଜେଡି ପକ୍ଷରୁ ଅଭିଯୋଗ କରାଯାଇଛି । ସରକାର ଧାନ କିଣା ବ୍ୟବସ୍ଥାକୁ ସମ୍ପୂର୍ଣ୍ଣ ରୂପେ ଅବ୍ୟବସ୍ଥିତ କରିଛନ୍ତି । ୮ରୁ ୧୨ କିଲୋ ପର୍ଯ୍ୟନ୍ତ କଟନି ଛଟନି ହେଉଛି । ଡବଲ ଇଞ୍ଜିନ ସରକାରରେ ଡବଲ କଟନି ଛଟନି ହେଉଛି । ଧାନର ଅଭାବୀ ବିକ୍ରି ହେଉଛି । ସରକାର ଧାନ କିଣିପାରୁ ନଥିବାରୁ ଚାଷୀମାନେ ୧୬୦୦/୧୭୦୦ ଟଙ୍କାରେ ଧାନ ବିକୁଛନ୍ତି ବୋଲି କହିଛନ୍ତି ବିଜେଡି ବିଧାୟକ ବ୍ୟୋମକେଶ ରାୟ । ଅନ୍ୟପକ୍ଷରେ ସରକାର ପରିବର୍ତ୍ତନ ପରେ ଚାଷୀମାନେ ଲାଭବାନ ହେଉଥିବା ବିଜେପି ପକ୍ଷରୁ କୁହାଯାଇଛି । ବିଜେପି ସରକାର ମଧ୍ୟ ଚାଷୀଙ୍କୁ ପ୍ରାଧାନ୍ୟ ଦେଉଛନ୍ତି । ରାଜ୍ୟରେ ଯେଉଁ ଚାଷୀମାନେ ଚାଷ ଛାଡ଼ିଦେଉଥିଲେ, ସେମାନେ ଏବେ ଚାଷ କଲେଣି ବୋଲି ବିଜେପି ବିଧାୟକ ପ୍ରକାଶ ସେଠୀ କହିଛନ୍ତି ।
ସରକାର ଜାଣିଶୁଣି ଚାଷୀଙ୍କ ବିରୋଧରେ ଷଡ଼ଯନ୍ତ୍ର ରଚିଛନ୍ତି: ବିଜେଡି
ଧାନ କିଣା ବିଭ୍ରାଟ ପାଇଁ ବିଧାନସଭା ଅଚଳ। ୫ ମିନିଟ ବି ଚାଲି ପାରିଲା ନାହିଁ ଗୃହ। ଆଜି ଗୃହ କାର୍ଯ୍ୟ ଆରମ୍ଭ ହେବା ମାତ୍ରେ ମଧ୍ୟଭାଗକୁ ଆସି ପାଟିତୁଣ୍ଡ କରିଥିଲେ ଉଭୟ ବିଜେଡି ଓ କଂଗ୍ରେସ ବିଧାୟକ। ବିଜେଡି ବିଧାୟକମାନେ ପ୍ଲାକାର୍ଡ ଧରି ସ୍ଲୋଗାନ ଦେଇଥିଲେ। ବାଚସ୍ପତି ଶାନ୍ତି ଶୃଙ୍ଖଳା ରକ୍ଷା କରି ନିଜ ନିଜ ସିଟକୁ ଫେରି ଯିବାକୁ ବାରମ୍ଵାର ଅନୁରୋଧ ପରେ ବି ସୁଧୁରିନଥିଲା ସ୍ଥିତି। ତେଣୁ ବାଚସ୍ପତି ପ୍ରଥମେ ଗୃହକୁ ସକାଳେ ସାଢ଼େ ୧୧ଟା ଯାଏ ମୁଲତବୀ ରଖିଥିଲେ। ସାଢ଼େ ୧୧ଟା ପରେ ବି ସ୍ଥିତି ସୁଧୁରିନଥିଲା। ତେଣୁ ଅପରାହ୍ନ ୪ଟା ଯାଏ ଗୃହକୁ ମୁଲତବୀ ରଖିଛନ୍ତି ବାଚସ୍ପତି। ଧାନ କିଣା ନେଇ ବିଜେଡି ଆଣିଛି ସଂଗୀନ ଅଭିଯୋଗ। ଚାଷୀଙ୍କ ଧାନ ନ କିଣିବାକୁ ସରକାର ଷଡ଼ଯନ୍ତ୍ର କରିଛନ୍ତି। ସରକାରୀ ସ୍ତରରେ ନିଷ୍ପତ୍ତି ହୋଇଛି । ଚାଷୀଙ୍କୁ ହଇରାଣ କରିବାକୁ ଏପରି କରାଯାଇଛି। କିନ୍ତୁ ଚାଷୀଙ୍କ ସପକ୍ଷରେ ସଂଗ୍ରାମ କରିବ ବିଜେଡି। ସବୁ ଚାଷୀଙ୍କୁ ସବୁ ଧାନ କିଣିବା ଯାଏ ସଂଗ୍ରାମ ଜାରି ରହିବ ବୋଲି କହିଛି ଦଳ। ସରକାର ଜାଣିଶୁଣି ଧାନ ବିକ୍ରିର ପ୍ରକ୍ରିୟାକୁ ବିଳମ୍ବିତ କରୁଛନ୍ତି ବୋଲି କହିଛନ୍ତି ବିଜେଡି ବିଧାୟକ ଗୌତମବୁଦ୍ଧ ଦାସ ।
ବିଧାନସଭାରେ ଉପସ୍ଥାପିତ ହୋଇଛି ଅର୍ଥନୈତିକ ସର୍ଭେ ରିପୋର୍ଟ
ବିଧାନସଭାରେ ଉପସ୍ଥାପିତ ହୋଇଛି ଅର୍ଥନୈତିକ ସର୍ଭେ ରିପୋର୍ଟ। ୨୦୨୫-୨୬ ଆର୍ଥିକ ବର୍ଷର ସର୍ଭେ ରିପୋର୍ଟ ଉପସ୍ଥାପିତ ହୋଇଛି। ଆର୍ଥିକ ବର୍ଷ ୨୦୨୬-୨୭ର ବଜେଟ ଉପସ୍ଥାପନ ଆସନ୍ତାକାଲି ହେବ। ମୁଖ୍ୟମନ୍ତ୍ରୀ ମୋହନ ମାଝୀ ବଜେଟ ଉପସ୍ଥାପନ କରିବେ। ତା ପୂର୍ବରୁ ଆଜି ଅର୍ଥନୈତିକ ସର୍ଭେ ରିପୋର୍ଟ ଉପସ୍ଥାପିତ ହୋଇଛି। ଏଥିରେ ଆକଳନ କରାଯାଇଛି, 2025-26 ରେ ଆର୍ଥିକ ଅଭିବୃଦ୍ଧି ହାର 7.9 % ରହିବ। 2024-25 ରେ ଆର୍ଥିକ ଅଭିବୃଦ୍ଧି ହାର ଥିଲା 7.2 % । 2025-26 ର GSDP ୯.୯ ଲକ୍ଷ କୋଟି ଟଙ୍କା ହେବା ନେଇ ଆକଳନ କରାଯାଇଛି।
ନେଦରଲ୍ୟାଣ୍ଡସକୁ ୧୭ ରନରେ ପରାସ୍ତ କଲା ଭାରତ
ନନ୍ଦିଘୋଷ ବ୍ୟୁରୋ : ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯାଇଥିବା ଏକ ମ୍ୟାଚ୍ରେ ଭାରତ ନେଦରଲ୍ୟାଣ୍ଡସକୁ ପରାସ୍ତ କରିଛି। ଏହା ସହିତ, ଟିମ୍ ଇଣ୍ଡିଆ ତାର ଗ୍ରୁପ୍ ପର୍ଯ୍ୟାୟର ସମସ୍ତ ଚାରୋଟି ମ୍ୟାଚରେ ବିଜୟୀ ହୋଇଛି। ଭାରତ ୧୭ ରନରେ ନେଦରଲ୍ୟାଣ୍ଡସକୁ ପରାସ୍ତ କରିଛି। ମ୍ୟାଚର ଶେଷ ଓଭରରେ ମ୍ୟାଚର ନିଷ୍ପତ୍ତି ନିଆଯାଇଥିଲା, ଯେଉଁଠାରେ ନେଦରଲ୍ୟାଣ୍ଡସକୁ ୨୮ ରନର ଆବଶ୍ୟକତା ଥିଲା। ଭାରତ ପାଇଁ ଶିବମ୍ ଦୁବେ ଶେଷ ଓଭର ବୋଲିଂ କରିଥିଲେ ଏବଂ ସେହି ସ୍କୋରକୁ ରକ୍ଷା କରିବାରେ ସଫଳ ହୋଇଥିଲେ। ଏହା ମଧ୍ୟ ଉଲ୍ଲେଖନୀୟ ଯେ ଟିମ୍ ଇଣ୍ଡିଆ ପାଞ୍ଚଟି କ୍ୟାଚ୍ ଛାଡ଼ିବା ପରେ ନେଦରଲ୍ୟାଣ୍ଡସ୍ ବିପକ୍ଷରେ ମ୍ୟାଚ୍ ଜିତିଥିଲା।
ଭାରତ ନେଦରଲ୍ୟାଣ୍ଡସକୁ ବିଜୟ ପାଇଁ ୧୯୪ ରନର ଟାର୍ଗେଟ ଦେଇଥିଲା, ଏବଂ ସେମାନେ ଏହାକୁ ୨୦ ଓଭରରେ ୭ ୱିକେଟ ହରାଇ ୧୭୬ ରନ କରି ପିଛା କରିଥିଲେ। ଭାରତ ପକ୍ଷରୁ ବରୁଣ ଚକ୍ରବର୍ତ୍ତୀ ଏବଂ ଶିବମ ଦୁବେ ଦୁଇଜଣ ସଫଳ ବୋଲର ଥିଲେ। ବରୁଣ ଚକ୍ରବର୍ତ୍ତୀ ତିନୋଟି ୱିକେଟ ନେଇଥିଲେ, ଯେତେବେଳେ ଶିବମ ଦୁବେ ଦୁଇଟି ୱିକେଟ ନେଇଥିଲେ। ବୁମରାହ ଏବଂ ହାର୍ଦ୍ଦିକ ପ୍ରତ୍ୟେକେ ଗୋଟିଏ ୱିକେଟ ନେଇଥିଲେ।
ନେଦରଲ୍ୟାଣ୍ଡସ୍ ବିପକ୍ଷରେ ଶିବମ୍ ଦୁବେଙ୍କ ବୋଲିଂ ଓ ବ୍ୟାଟିଂ ଭଲ ଥିଲା। ସେ ଟିମ୍ ଇଣ୍ଡିଆ ପାଇଁ ସବୁଠାରୁ ସଫଳ ବ୍ୟାଟ୍ସମ୍ୟାନ୍ ଥିଲେ। ତାଙ୍କର ୬୬ ରନ୍, ଯେଉଁଥିରେ ୬ଟି ଛକା ଥିଲା, ଟିମ୍ ଇଣ୍ଡିଆକୁ ମ୍ୟାଚରେ ମୋଟ ୧୯୩ ରନ୍ ସ୍କୋର କରିବାରେ ସାହାଯ୍ୟ କରିଥିଲା।
ଯଦି ଟିମ୍ ଇଣ୍ଡିଆ ମ୍ୟାଚ୍ରେ ପାଞ୍ଚଟି କ୍ୟାଚ୍ ଛାଡ଼ି ନଥାନ୍ତା, ତେବେ ନେଦରଲ୍ୟାଣ୍ଡସ୍ ବିପକ୍ଷରେ ଭାରତର ବିଜୟ ଆହୁରି ବଡ଼ ହୋଇପାରିଥାନ୍ତା। ଭାରତର କ୍ୟାଚ୍ ଅକ୍ଷର ପଟେଲ, ଅଭିଷେକ ଶର୍ମା, ୱାଶିଂଟନ୍ ସୁନ୍ଦର, ସୂର୍ଯ୍ୟକୁମାର ଯାଦବ ଏବଂ ତିଲକ ବର୍ମା ଛାଡ଼ିଥିଲେ।
ସେକ୍ସ ରାକେଟ ଠାବ : ଘର ମାଲିକାଣୀ ସହ ୨ ଯୁବତୀ ଓ ୪ ଗ୍ରାହକ ଅଟକ
ବଲାଙ୍ଗୀର : ବଲାଙ୍ଗୀର ସୁଦପଡ଼ା ଗ୍ୟାସ୍ ଗୋଦାମ ସାମ୍ନା ଘରୁ ସେକ୍ସ ରାକେଟ ଠାବ l ସେକ୍ସ ରାକେଟ ଠାବ କଲା ବଲାଙ୍ଗୀର ଟାଉନ ଥାନା ପୋଲିସ । ଦେହ ବ୍ୟବସାୟ ଚାଲୁଥିବା ବେଳେ ଗ୍ରାହକ ବେଶରେ ଚଢାଉ କରି ଠାବ କରିଛି ଟାଉନ୍ ପୋଲିସ । ଦୀର୍ଘ ବର୍ଷ ହେବ ଘର ମାଳିକାଣି ସେକ୍ସ ରାକେଟ ଚଳାଉଥିବା ନେଇ ତଦନ୍ତ ବେଳେ ପୋଲିସ ଜାଣିବାକୁ ପାଇଛି । ରାଣୀ ମହୁମାଛି ଘର ମାଲିକାଣୀ ସହ ୨ ଯୁବତୀ ଓ ୪ ଜଣ ଗ୍ରାହକଙ୍କୁ ପୋଲିସ ଅଟକ ରଖି ପଚରାଉଚରା ଚଳାଇଛି । ଅଟକ ଯୁବତୀ ମାନଙ୍କ ମଧ୍ୟରୁ ଜଣେ କଲିକତାର ହୋଇଥିବା ବେଳେ ଆଉ ଜଣେ ଅନୁଗୁଳ ଜିଲ୍ଲାର ବୋଲି ଜଣାପଡିଛି । ଆସନ୍ତା କାଲି ସେମାନଙ୍କୁ କୋର୍ଟଚାଲାଣ କରାଯିବ । ଅସଂଗତ ଅବସ୍ଥାରେ ଥିବା ବେଳେ ପୋଲିସ ଚଢାଉ କରିଥିଲା । ଘରୁ ପୋଲିସ ବହୁ ଆପତ୍ତିଜନକ ସମାଗ୍ରୀ ଜବତ କରିଛି ।ରାକେଟରେ ଆଉକେଉଁମାନେ ସାମିଲ ଅଛନ୍ତି ସେନେଇ ଅଧିକ ଖୋଲତାଡ କରୁଛି ବଲାଙ୍ଗୀର ଟାଉନଥାନା ପୋଲିସ ।
ବିଧାନସଭାରେ ‘ଚାଷୀ’ ନିଆଁ, ଧାନ ରଖି ବିଜେଡିର ଜୋରଦାର ପ୍ରତିବାଦ…
ଭୁବନେଶ୍ୱର : ବିଧାନସଭାରେ ‘ଚାଷୀ’ ନିଆଁ । ଧାନ ରଖି ବିଜେଡିର ଜୋରଦାର ପ୍ରତିବାଦ । ବିଜେଡି ସ୍ୱରରେ ସ୍ବର ମିଳାଇଲା କଂଗ୍ରେସ । ବିଜେପି କହିଲା ରାଜନୀତିର ଭାଷା । ବିଧାନସଭାରେ ଚାଷୀଙ୍କ ସ୍ୱର ସାଜିଲା ବିଜେଡି l ବିଧାନସଭା ସଚିବଙ୍କ ଟେବୁଲ ଉପରେ ଧାନ ରଖି ଜୋରଦାର ପ୍ରତିବାଦ l ଚାଲିପାରିଲାନି ପ୍ରଶ୍ନକାଳ କି ଶୂନ୍ୟକାଳ l ଗୃହକାର୍ଯ୍ୟ ଆରମ୍ଭ ହେବାମାତ୍ରେ ବିଜେଡି ସଦସ୍ୟମାନେ ଧାନର ଅଭାବୀ ବିକ୍ରି ସଂକ୍ରାନ୍ତରେ ହାତରେ ଫ୍ଲେକ୍ସମାନ ଧରି ଗୃହ ମଧ୍ୟକୁ ଆସି ପ୍ରତିବାଦ କରିଥିଲେ । ଏହି ସମୟରେ ସଦସ୍ୟ ରୋମାଞ୍ଚ ରଞ୍ଜନ ବିଶ୍ୱାଳ ମୁଣ୍ଡରେ ଗାମୁଛା ବାନ୍ଧି ଗୋଟିଏ ପୁଡା ଧାନ ମୁଣ୍ଡାଇ ଗୃହ ମଧ୍ୟଭାଗକୁ ଆସିବା ସହିତ ଧାନକୁ ସଚିବଙ୍କ ଟେବୁଲ ଉପରେ ରଖି ପ୍ରତିବାଦ କରିଥିଲେ l ଧାନକୁ ହାତରେ ଧରି ଉପରକୁ ଟେକି ପ୍ରଦର୍ଶନ କରିବା ସହ ବାଚସ୍ପତିଙ୍କ ପୋଡିୟମ ତଳେ ସରକାର ବିରୋଧୀ ନାରାବାଜି କରିଥିଲେ l ପ୍ରବଳ ହଟ୍ଟଗୋଳ ଯୋଗୁଁ ବାଚସ୍ପତି ଗୃହକୁ ୧୦ଟା ୩୩ରୁ ପୂର୍ବାହ୍ନ ୧୧ଟା ୩୦ ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ । ପୁର୍ନବାର ଗୃହକାର୍ଯ୍ୟ ଆରମ୍ଭ ହେବାମାତ୍ରେ ବିଜେଡି ଓ କଂଗ୍ରେସ ସଦସ୍ୟମାନେ ହାତରେ ବ୍ୟାନର ଓ ପୋଷ୍ଟର ଧରି ଗୃହ ମଧ୍ୟଭାଗରେ ଆସି ହଟ୍ଟଗୋଳ କରିବାରୁ ବାଚସ୍ପତି ଗୃହକୁ ମୁଲତବୀ କରିଥିଲେ l ଚାଷୀଙ୍କ ଧାନ ନ କିଣିବା ଯାଏ ବିଜେଡି ପ୍ରତିବାଦ ଜାରି ରଖିବ ବୋଲି ଚେତାବନୀ ଦେଇଛି l
ବିଜେଡି ସହ କଂଗ୍ରେସ ସଦସ୍ୟମାନେ ମଧ୍ୟ ହାତରେ ପ୍ଲାକାର୍ଡ ଧରି ଗୃହ ମଧ୍ୟକୁ ଆସି ଧାନର ଅଭାବୀ ବିକ୍ରି ନେଇ ପ୍ରଦର୍ଶନ କରିଥିଲେ । ହଟ୍ଟଗୋଳ ଜାରି ରହିବାରୁ ବାଚସ୍ପତି ଗୃହକୁ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ l ଚାଷୀଙ୍କୁ ବିଜେପି ସରକାର ଠକି ଥିବାରୁ ଦୁଇ ବିରୋଧୀ ରାଜରାସ୍ତାରୁ ବିଧାନସଭା ଯାଏ ଲଢେଇ ଜୋରଦାର କରିବେ ବୋଲି ଚେତାବନୀ ଦେଇଛନ୍ତି l ବିଜେଡି ଓ କଂଗ୍ରେସର ପ୍ରତିବାଦର ଜବାବ ଦେଇଛି ଶାସକ ବିଜେପି l ଅପରାହ୍ନରେ ବି ଅଧିବେଶନ ଆରମ୍ଭ କ୍ଷଣି ବିଜେପି ସରକାରର ଚାଷୀମାରଣ ନୀତିକୁ ବିରୋଧ କରି ଦୁଇ ବିରୋଧୀ ଗୃହର ମଧ୍ୟ୍ ଭାଗରେ ହଟ୍ଟଗୋଳ କରିଥିଲେ l ମାତ୍ର ୨ମିନିଟରେ ଗୃହ ଗୁରୁବାର ଯାଏ ମୁଳତବୀ ଘୋଷଣା କରିଥିଲେ ବାଚସ୍ପତି l ଚାଷୀ ନ୍ୟାୟ ନପାଇବା ଯାଏ ପ୍ରତିବାଦ ଜାରି ରହିବ ବୋଲି ଚେତାବନୀ ଦେଇଛନ୍ତି ବିରୋଧୀ l ତେଣୁ ପ୍ରଶ୍ନ ଉଠୁଛି ଆସନ୍ତାକାଲି ଗୃହ ଚାଲିବ ତ?
ଯୋଗାଣ ମନ୍ତ୍ରୀ ବନାମ ବିଜେପି ବିଧାୟକ । କିଏ କହୁଛନ୍ତି ସତ ?…
ଭୁବନେଶ୍ୱର ; ଯୋଗାଣ ମନ୍ତ୍ରୀ ବନାମ ବିଜେପି ବିଧାୟକ ? କିଏ କହୁଛନ୍ତି ସତ ? ପୂର୍ବରୁ ୧୫୦ କୁଇଣ୍ଟାଲ ଧାନ କ୍ୟାପିଙ୍ଗ କଥା ଘୋଷଣା କରିଥିଲେ ଯୋଗାଣ ମନ୍ତ୍ରୀ କୃଷ୍ଣ ପାତ୍ର । ଯାହାକୁ ନେଇ ଆଜି ଯାଏଁ ବିରୋଧ ଚାଲିଛି । ଗୃହ ଭିତରେ ଓ ବାହାରେ ଏ ନେଇ ପ୍ରତିବାଦ ହେଉଛି । ହେଲେ ଆଜି ଯୋଗାଣ ମନ୍ତ୍ରୀଙ୍କୁ ଭୁଲ ପ୍ରମାଣିତ କରିଛନ୍ତି ନିଜ ଦଳର ବିଧାୟକ ଅଶ୍ୱିନୀ ଷଡ଼ଙ୍ଗୀ। ସେ କହିଛନ୍ତି, କୌଣସି କ୍ୟାପିଙ୍ଗ ନାହିଁ । ୨୨୫ କୁଇଣ୍ଟାଲ ଯାଏଁ ଧାନ ଉଠିଲାଣି । ଚାଷୀ ବି ୩୧ଶହ ଟଙ୍କା ପାଇଲେଣି । ଏଥିରେ କିଏ ସତ କହୁଛନ୍ତି ତାକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି । ବିଜେପି ବିଧାୟକ କହିଲେ, ମନ୍ତ୍ରୀ କଣ କହିଛନ୍ତି ମୁଁ ଜାଣିନି । ହେଲେ ଆଜି ଗୃହରେ ଯୋଗାଣ ମନ୍ତ୍ରୀଙ୍କ ଲିଖିତ ଉତ୍ତରରୁ ଜଣା ପଡିଲା ଯେ କ୍ୟାପିଙ୍ଗ ଉଠିନି । ବିଜେଡି ପ୍ରଶ୍ନ କରିଛି ଯେ ବିଧାୟକ କଣ ମନ୍ତ୍ରୀଙ୍କ ପକ୍ଷରୁ କହୁଛନ୍ତି କି ? କ୍ୟାପିଙ୍ଗ ହଟିଥିଲେ, ବିଜ୍ଞପ୍ତି ପ୍ରକାଶ କରି ଘୋଷଣା କରନ୍ତୁ ବୋଲି ଦାବି ହୋଇଛି । ଏଠି ସରକାରଙ୍କ ବାମ ହାତ କଣ କରୁଛି, ତାକୁ ଡାହାଣ ହାତ ଜାଣି ପାରୁନି କେମିତି ?
ଚାଷୀଙ୍କୁ ୮ଶହ ଟଙ୍କା ଇନପୁଟ ସହାୟତା ଦେଉଥିବାରୁ ବାହା ବାହା ନେଉଛନ୍ତି ସରକାର । ହେଲେ ଏହା ଯେ ପାଳନ ହୋଇନି, ତାକୁ ବିଧାନସଭାରେ ଯୋଗାଣ ମନ୍ତ୍ରୀ କୃଷ୍ଣ ପାତ୍ରଙ୍କ ଉତ୍ତର ପ୍ରମାଣିତ କରିଛି । ଚାଷୀଙ୍କୁ ୮ଶହ ଟଙ୍କା ଇନପୁଟ ସବସିଡି ମିଳୁନି । ଏହି ହିସାବ ଗୃହରେ ରଖିଛନ୍ତି ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । କେନ୍ଦ୍ର ୨୩୬୯ ଟଙ୍କାରେ ଧାନ କିଣୁଛି । ରାଜ୍ୟ ସରକାର ଦେଉଛନ୍ତି ୭୩୧ ଟଙ୍କା । ଯାହା ସ୍ପଷ୍ଟ କରୁଛି ଯେ, ରାଜ୍ୟ ସରକାର ୮ଶହ ବଦଳରେ ୭୩୧ ଟଙ୍କା ସବସିଡି ଦେଉଛନ୍ତି । ଯଦି ୮ଶହ ଟଙ୍କା ଦେଇଥାନ୍ତେ, ତେବେ ୩୧୬୯ ଟଙ୍କାରେ ଧାନ କିଣିଥାନ୍ତେ ସରକାର । ଚାଷୀ ଅତିରିକ୍ତ ୬୯ ଟଙ୍କା ପାଇଥାନ୍ତେ । ବିଜେପିର ନିର୍ବାଚନ ପ୍ରତିଶୃତିରେ ୩୧ ଶହ ଟଙ୍କାରେ ଧାନ କିଣିବା କଥା ଥିଲା । ସେ ସମୟରେ କେନ୍ଦ୍ର ୨୩ ଶହ ଟଙ୍କା ଏମଏସପି ଦେଉଥିଲା । ବାକି ୮୦୦ ଟଙ୍କାରେ ବିଜେପି ମାରିଥିଲା କ୍ୟାବିନେଟ ମୋହର । ବିନା ସଂଶୋଧନରେ କିପରି କ୍ୟାବିନେଟ ନିଷ୍ପତ୍ତି ବଦଳିଲା ବୋଲି ବିରୋଧୀ ପ୍ରଶ୍ନ କରିଛନ୍ତି । କାରଣ ଯୋଗାଣ ମନ୍ତ୍ରୀଙ୍କ ଉତ୍ତର ପରେ ସରକାରଙ୍କ ଅସଲ ମୁଖା ଖୋଲିଯାଇଛି । ଚାଷୀଙ୍କୁ ନେଇ ସବୁବେଳେ ମିଛ କୁହାଯାଉଥିବାରୁ ସରକାରଙ୍କ ଚାଷୀ ବିରୋଧୀ ମାନସିକତାକୁ ଟାର୍ଗେଟ କରିଛନ୍ତି ବିରୋଧୀ ଦଳ ।
ଆଜି ସୁଦ୍ଧା ଧାନ କିଣା ତଥ୍ୟ ଜାରି କଲେ ସରକାର । ବର୍ତ୍ତମାନ ସୁଦ୍ଧା ମଣ୍ଡିକୁ ଆସିଛି ୫୯ ଲକ୍ଷ ୯୨ ହଜାର ୮୬୪ ମେଟ୍ରିକ ଟନ । ୫୯ ଲକ୍ଷ ୭୩ ହଜାର ୫୫୨ ମେଟ୍ରିକ ଟନ ଧାନ କିଣା ହୋଇଥିବା ବେଳେ ୫୮ ଲକ୍ଷ ୬ ହଜାର ୪୩୨ ମେଟ୍ରିକ ଟନ ଧାନ ଉଠା ହୋଇଛି । ୧ ଲକ୍ଷ ୯୪ ହଜାର ୮୪୬ ମେଟ୍ରିକ ଟନ ଧାନ ମଣ୍ଡିରେ ପଡିରହିଛି । ଏବେ ୧୩ ଲକ୍ଷ ୯୦ ହଜାର ୯୭୮ ଚାଷୀ ଧାନ ବିକ୍ରି କରି ସାରିଛନ୍ତି । ଧାନ ବାବଦକୁ ଚାଷୀଙ୍କ ଆକାଉଣ୍ଟକୁ ଯାଇଛି ୪ ହଜାର ୪୫ କୋଟି ଟଙ୍କାର ଇନପୁଟ ସବସିଡି ସହ ଏମଏସପି ବାବଦକୁ ୧୩ ହଜାର ୧୧୦ କୋଟି ଟଙ୍କା ଯାଇଛି । ତେବେ ଏହି ଇନପୁଟ ସବସିଡିର ଅସଲ ହିସାବରେ ୬୯ ଟଙ୍କାର ଭୂମିକାକୁ ନେଇ ସନ୍ଦେହ ଉପୁଜିଛି ।