କରାଚୀ: ଘୋର ଆର୍ଥିକ ସଙ୍କଟ ଦେଇ ଗତି କରୁଥିବା ପାକିସ୍ତାନରେ ରମଜାନ ମାସରେ ଆକାଶ ଛୁଆଁ ହୋଇଛି ଫଳ ଦାମ । ରମଜାନ ମାସରେ ହୋସ ଉଡାଇଦେବା ଭଳି ଦାମରେ ବିକ୍ରି ହେଉଛି ଫଳ ।
କେବଳ କଦଳୀ ଏବଂ ଅଙ୍ଗୁର ନୁହେଁ, ଦୈନନ୍ଦିନ ଜିନିଷର ମୂଲ୍ୟ ମଧ୍ୟ ଆକାଶଛୁଆଁ ହେଉଛି। ସେହିପରି ପୂଜା ସାମଗ୍ରୀର ଦାମ ମଧ୍ୟ ବୃଦ୍ଧି ପାଇଛି । ପିଆଜ କିଲୋ ପ୍ରତି ୨୨୮ଟଙ୍କା, ଅଟା ଦାମ ୧୨୦ ପ୍ରତିଶତ ବଢ଼ିଛି । ସେନସିଟିବ ପ୍ରାଇସ୍ ଇଣ୍ଡିକେଟର (SPI) ଅନୁସାରେ ମାର୍ଚ୍ଚ ଶେଷ ସପ୍ତାହ ବେଳକୁ ପାକିସ୍ତାନରେ ଦରଦାମ୍ ବୃଦ୍ଧି ୪୭ ପ୍ରତିଶତରେ ପହଞ୍ଚିଥିଲା । ପୂର୍ବରୁ ଜୀବନ ବଞ୍ଚାଇବା ପାଇଁ ସଂଘର୍ଷ କରୁଥିବା ପାକିସ୍ତାନୀଙ୍କ ମୁଣ୍ଡରେ ଚଡ଼କ ପଡିଛି ।
କାଙ୍ଗାଳ ରାଷ୍ଟ୍ରକୁ ବେଲଆଉଟ ପ୍ୟାକେଜ ଦେବାକୁ ଅନେକଗୁଡ଼ିଏ ସର୍ତ୍ତ ରଖିଛି ଆଇଏମଏଫ । ଯଦି ଇଣ୍ଟରନାସନାଲ ମନିଟାରୀ ଫଣ୍ଡ ପାକିସ୍ତାନ ପାଇଁ ପ୍ୟାକେଜ ଘୋଷଣା କରେ, ତେବେ ଏହା ପାକିସ୍ତାନ ଅର୍ଥବ୍ୟବସ୍ଥା ପାଇଁ ସଞ୍ଜିବନୀ ସଦୃଶ ହେବ ବୋଲି ବିଶେଷଜ୍ଞ କହିଛନ୍ତି । ଫେବୃଆରୀ ଆରମ୍ଭରୁ ପାକିସ୍ତାନ ଏବଂ ଆଇଏମଏଫ ମଧ୍ୟରେ ୧.୧ ବିଲିୟନ ଡଲାରର ଋଣ ଛାଡକୁ ନେଇ ଆଲୋଚନା ଚାଲିଛି। କିନ୍ତୁ ପାକିସ୍ତାନର ବିଦେଶୀ ମୁଦ୍ରା ଭଣ୍ଡାର ବୃଦ୍ଧି ପାଇ ୧୦.୧୪ ବିଲିୟନ୍ ଡଲାରରେ ପହଞ୍ଚିଛି ।
ରମଜାନ୍ ମାସରେ ପାକିସ୍ତାନୀଙ୍କ ମୁଣ୍ଡରେ ଚଡ଼କ । ପାକିସ୍ତାନରେ ରମଜାନ ମାସ ବେଳେ ଦରଦାମ ବୃଦ୍ଧି କେବଳ ଏକ ସହର ପର୍ଯ୍ୟନ୍ତ ସୀମିତ ନାହିଁ । କରାଚୀ, ରାୱଲପିଣ୍ଡି, ଇସଲାମବାଦ ଓ ଲାହୋର ଭଳି ବଡ଼ ସହରରେ ଦରଦାମ୍ ବୃଦ୍ଧି ହୋଇଛି । ଯାହା ଫଳରେ ରମଜାନ ମାସରେ ମଧ୍ୟ ଲୋକେ କମ୍ ଜିନିଷ କିଣୁଛନ୍ତି । ପାକିସ୍ତାନରେ ମୁଦ୍ରାସ୍ପିତି ହାର ୫୦ ବର୍ଷରେ ଉଚ୍ଚ ସ୍ତରରେ ପହଞ୍ଚିଛି ।
