କିବ୍: ବିଶ୍ୱରେ ବଢ଼ିଚାଲିଛି ବେଲୁନ ବିପଦ। ରାଜଧାନୀ କିବ୍ ଉପରେ ଉଡୁଥିବା ୬ଟି ଋଷୀୟ ବେଲୁନକୁ ଖସାଇଛି ୟୁକ୍ରେନ। ଏହି ବେଲୁନ ଗୁଡିକରେ ରିଫ୍ଲେକ୍ଟର ଓ ତଥ୍ୟ ସଂଗ୍ରହକାରୀ ଯନ୍ତ୍ରପାତି ରହିଥିବା ଅଭିଯୋଗ କରିଛି ୟୁକ୍ରେନ। ଏହି ବେଲୁନ ଉଡିବା ପରେ କିବରେ ଏୟାର ଆଲର୍ଟ ଜାରି କରାଯାଇଥିଲା। ବେଲୁନ ଗୁଡିକ ପବନର ଗତି ଅନୁସାରେ କିବ୍ ଚାରିପଟେ ଘୂରୁଥିବାକୁ ନେଇ ଉଦବେଗ ପ୍ରକାଶ କରିଥିଲା ୟୁକ୍ରେନ।
ବେଲୁନ ଜରିଆରେ ୟୁକ୍ରେନର ଏୟାର ଡିଫେନ୍ସ ସମ୍ପର୍କରେ ତଥ୍ୟ ହାସଲ କରାଯାଉଥିବା ନେଇ ୟୁକ୍ରେନ ଅଭିଯୋଗ କରିଛି। ନିଜର ଡ୍ରୋନ ଗୁଡିକୁ ସୁରକ୍ଷିତ ରଖି ଏହି ବେଲୁନ ଜରିଆରେ ଋଷ ବିଭିନ୍ନ ତଥ୍ୟ ହାସଲ କରୁଥିବା କହିଛି ୟୁକ୍ରେନ। ସେପଟେ ଆମେରିକା ଆକାଶରେ ଉଡୁଥିବା ଅବସ୍ଥାରେ ଖସାଯାଇଥିବା ବେଲୁନକୁ ନେଇ ନୂଆ ତଥ୍ୟ ଆସିଛି।
ଏହି ବେଲୁନଟି ଗୁଆମ ଓ ହାଓ୍ବାଲି ଅଭିମୁଖେ ଯାଇଥାନ୍ତା ବୋଲି କୁହାଯାଇଛି। ଏହି ବେଲୁନଟିକୁ ଚୀନର ଦକ୍ଷିଣ ପୂର୍ବ ଉପକୂଳର ହାଇନାନ ଦ୍ବୀପରୁ ଛଡ଼ାଯାଇଥିଲା ବୋଲି ପ୍ରମାଣିତ ହୋଇଥିଲା । ଏହି ବେଲୁନଟିକୁ ଆମେରିକା ଏଫ-୨୨ ଫାଇଟର ଜେଟ ଜରିଆରେ ଖସାଇବାକୁ ନେଇ ଦୁଇ ରାଷ୍ଟ୍ର ମଧ୍ୟରେ ଉତ୍ତେଜନା ସୃଷ୍ଟି ହୋଇଥିଲା।
