ଇନ୍ଦୋର: ମଧ୍ୟପ୍ରଦେଶ ଇନ୍ଦୋର ମନ୍ଦିର ଟ୍ରାଜେଡି । ମୃତକଙ୍କ ସଂଖ୍ୟା ୩୬କୁ ବୃଦ୍ଧି । ମାମଲାରେ ମନ୍ଦିର ଟ୍ରଷ୍ଟର ଅଧ୍ୟକ୍ଷ ସେବାରାମ ଗଲାନୀଙ୍କ ନାଁରେ ହତ୍ୟା ମାମଲା ରୁଜୁ କରାଯାଇଛି । ୨୦ରୁ ଅଧିକ ଆହତଙ୍କ ଚିକିତ୍ସା ଏବେବି ଚାଲିଛି । ବିଳିମ୍ବିତ ରାତି ପର୍ଯ୍ୟନ୍ତ ଉଦ୍ଧାର କାର୍ଯ୍ୟ ଜାରି ରହିଥିଲ । ରାତି ୧୨ଟାରୁ ୧.୩୦ ମଧ୍ୟରେ ୧୬ଟି ଶବ ଉଦ୍ଧାର କରାଯାଇଥିଲା । ଶୁକ୍ରବାର ସକାଳେ ଉଦ୍ଧାର ପୁଣିଥରେ ଆରମ୍ଭ କରାଯାଇଥିଲା । ମନ୍ଦିରର କାନ୍ଥ ଏବଂ କୂଅର ସ୍ଲାପ ଭଙ୍ଗାଯାଇଥିଲା । ସେନା ଏବଂ ପ୍ରଶାସନର ଅନେକ ଟିମ ଉଦ୍ଧାର କାର୍ଯ୍ୟରେ ଲାଗିଥିଲେ ।
୫୩ ବର୍ଷୀୟ ସୁନୀଲ ନାମକ ବ୍ୟକ୍ତିଙ୍କ ଶବ ଆଜି ୧୨ଟାରେ ବାହାରକୁ ବାହାର କରାଯାଇଛି । ଏଥିସହିତ ଉଦ୍ଧାର କାର୍ଯ୍ୟ ଶେଷ ହୋଇଛି । ଘଟଣାସ୍ଥଳ ପାଖରେ ଏକ ଧର୍ମଶାଳାରେ ପଟେଲ ସମାଜର ଲୋକମାନେ ରୁଣ୍ଢ ହୋଇଥିଲେ । ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ୱାନ ଶୁକ୍ରବାର ସକାଳେ ସେମାନଙ୍କୁ ଭେଟିବାକୁ ପହଞ୍ଚିଥିଲେ । ଏଠାରେ ଲୋକମାନେ ହାଏ-ହାଏ ଏବଂ ମୁର୍ଦ୍ଦାବାଦ ନାରା ଲଗାଇଥିଲେ । ଦୁର୍ଘଟଣାରେ ପଟେଲ ସମାଜର ୧୧ଜଣଙ୍କର ମୃତ୍ୟୁ ହୋଇଛି । ସମାଜର ପଦାଧିକାରୀ କହିଛନ୍ତି ଯେ, ଯେଉଁମାନଙ୍କ ମୃତ୍ୟୁ ହୋଇଛି, ସେମାନଙ୍କ ପରିବାରକୁ ମୁଖ୍ୟମନ୍ତ୍ରୀଙ୍କୁ ଭେଟିବା ଆବଶ୍ୟକ ।
ପ୍ରକାଶଥାଉକି, ଗତକାଲି ଅର୍ଥାତ ଗୁରୁବାର ରାମନବମୀ ଅବସରରେ ୬୦ ବର୍ଷ ପୂରୁଣା ମନ୍ଦିରରେ ପୂଜାର୍ଚ୍ଚନା ଚାଲିଥିଲା । ୧୧ଟା ସମୟରେ ହୋମ ଆରମ୍ଭ ହୋଇଥିଲା । ମନ୍ଦିର ପରିସରରେ ଥିବା କୂଅ ଛାତରେ ୬୦ରୁ ଅଧିକ ଲୋକ ବସିଥିଲେ । ପ୍ରାୟ ୧୨ ଟା ୩୦ ସମୟରେ ସ୍ଲାବ ଭୁଶୁଡ଼ିପଡ଼ିଥିଲା । ଲୋକମାନେ ୬୦ ଫୁଟ ଗଭୀର କୂଅକୁ ଖସିପଡ଼ିଥିଲେ । ମୃତକଙ୍କ ମଧ୍ୟରେ ୨୧ ମହିଳାଏବଂ ୧୫ ପୁରୁଷ ସାମିଲ ଅଛନ୍ତି । ଏମାନଙ୍କ ମଧ୍ୟରେ ୩ ଶିଶୁ କନ୍ୟା ଓ ଜଣେ ପୁଅ ସାମିଲ ଅଛନ୍ତି । ମୃତକଙ୍କ ପରିବାର ପାଇଁ ୫ଲକ୍ଷ ଓ ଆହତଙ୍କ ପରିବାରକୁ ୫୦ହଜାର ଲେଖାଏ ଅନୁକମ୍ପାମୂଳକ ସହାୟତା ଘୋଷଣା କରିଛନ୍ତି ମଧ୍ୟପ୍ରଦେଶ ସରକାର ।
