ବାଲିପାଟଣା: ମଦ ବାରକୁ ବିରୋଧ କରି ରାସ୍ତା ରୋକ୍ କଲେ ମହିଳା ମହାସଂଘ । ବାଲିପାଟଣା ଥାନା ବାଲିପାଟଣା-ବନମାଳିପୁର ରାସ୍ତା ସରିପୁର ଛକ ନିକଟରେ ଶତାଧିକ ମହିଳା ରାସ୍ତା ଉପରେ ବସି ରାସ୍ତା ଅବରୋଧ କରିଛନ୍ତି । ଘଟଣା ସ୍ଥଳରେ ବାଲିପାଟଣା ଥାନା ଅଧିକାରୀ ପହଁଞ୍ଚି ମହିଳାଙ୍କୁ ବୁଝାସୁଝା କରୁଛନ୍ତି । ମାତ୍ର ରାସ୍ତା ଅବରୋଧ ହଟି ନାହିଁ । ଶତାଧିକ ମହିଳା ବର୍ତ୍ତମାନ ଓପନ୍ ବାର୍ ସମ୍ମୁଖରେ ହୋ ହଲା କରିବା ସହ ରାସ୍ତା ଅବରୋଧ କରିଛନ୍ତି ।
ସୂଚନା ଅନୁସାରେ ବାଲିପାଟଣା ଥାନା ସରିପୁର ଛକ ନିକଟରେ ଏକ ଓପନ ବାର୍ ଖୋଲାଯାଇଛି । ଏହାକୁ ସ୍ଥାନୀୟ ଅଂଚଳର ଶତାଧିକ ମହିଳା ବିରୋଧ କରିଛନ୍ତି । ଗ୍ରାମାଞ୍ଚଳରେ ଏଭଳି ବାର୍ ଯୋଗୁ ଅଂଚଳରେ ବିଶୃଙ୍ଖଳା ବଢ଼ିବା ସହ ପରିବାର ଭିତରେ ଅଶାନ୍ତି ସୃଷ୍ଟି ହେଉଛି । ବାଲିପାଟଣା ବ୍ଳକର ଅଠାନ୍ତର, ଗାରେଡ଼ିପାଞ୍ଚଣ ଏବଂ ପମ୍ପାଲୋ ଗ୍ରାମ ପଞ୍ଚାୟତର ଶତାଧିକ ମହିଳା ରାସ୍ତା ଉପରେ ବସି ବାରକୁ ବିରୋଧ କରୁଛନ୍ତି ।
