ଭୁବନେଶ୍ବର : କ୍ୟାମ୍ପସରେ ଛାତ୍ରୀଙ୍କ ସୁରକ୍ଷା ପାଇଁ ଉଚ୍ଚଶିକ୍ଷା ବିଭାଗ ଜାରି କଲା SOP। ଶ୍ରେଣୀ ଗୃହରେ ଲାଗିବ କାଚ କବାଟ ଓ ଝରକା। କ୍ୟାମ୍ପସରେ ରହିବନି ଆଉ ଅନ୍ଧାରୁଆ ସ୍ଥାନ। ତା ସହିତ ସୁରକ୍ଷାକୁ ମଧ୍ୟ ବୃଦ୍ଧି କରାଯିବ। ଆଭ୍ୟନ୍ତରୀଣ ଅଭିଯୋଗ କମିଟି ବା ଆଇସିସି ନଥିଲେ ସଂପୃକ୍ତ ଶିକ୍ଷାନୁଷ୍ଠାନର ମାନ୍ୟତା ବାତିଲ କରିବାର କଡ଼ା ପ୍ରାବଧାନ ରହିଛି। ଏହା ସହିତ ସେହି ଶିକ୍ଷାନୁଷ୍ଠାନକୁ ନାମଲେଖାରୁ ବାଦ୍ ଦିଆଯିବ। ଫାଟକରୁ ପାର୍କିଂ ଯାଏ ସବୁ ସ୍ଥାନ ହେବ ଆଲୋକୀକରଣ। ସିସିଟିଭି ବାଧ୍ୟତାମୂଳକ, ମହିଳାଙ୍କ ପାଇଁ ସୁରକ୍ଷିତ, ସ୍ବଚ୍ଛ ଶୌଚାଳୟ ରଖିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି।
କୋଣାର୍କ ମନ୍ଦିରରୁ ବାଲିକଢ଼ା ପ୍ରକ୍ରିୟା ; ଟନେଲ ନିର୍ମାଣ ଆରମ୍ଭ, ଚୂଡ଼ାନ୍ତ ପର୍ଯ୍ୟାୟରେ କାମ
ପୁରୀ : ବିଶ୍ଵପ୍ରସିଦ୍ଧ କୋଣାର୍କ ମନ୍ଦିର ଜଗମୋହନ ଗର୍ଭଗୃହରୁ ବାଲି କଢ଼ା ପାଇଁ ଟନେଲ ନିର୍ମାଣ ଆରମ୍ଭ ହୋଇଛି । ଏନେଇ ସମସ୍ତ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ASI ମହାନିର୍ଦ୍ଦେଶକଙ୍କ ନିର୍ଦ୍ଦେଶରରେ ଏକ ମନିଟରିଂ ଟିମ ଅନୁଧ୍ୟାନ କରୁଛି ବୋଲି ASI ପୁରୀ ସର୍କଲ ସୁପରିଟେଣ୍ଡେଣ୍ଟ ଡି.ବି. ଗଡ଼ନାୟକ କହିଛନ୍ତି । ସୂର୍ଯ୍ୟମନ୍ଦିରରୁ ବାଲିକଢା ପ୍ରକ୍ରିୟା ୪ ମାସ ହେଲା ବନ୍ଦ ରହିଥିଲା । ଗତ ଡିସେମ୍ବର ୯ ତାରିଖରେ ପ୍ରତ୍ନତତ୍ତ୍ୱ ବିଭାଗ କୋର୍ କମିଟି ସଦସ୍ୟ, ଆଇଆଇଟି ମାଡ୍ରାସର ପ୍ରଫେସର ଅରୁଣ ମେନନ, ବିଶେଷଜ୍ଞ ଦଳ ପ୍ରମୁଖ ଗର୍ଭଗୃହରୁ ବାଲି କଢା ପ୍ରକ୍ରିୟା ଓ ସୂର୍ଯ୍ୟମନ୍ଦିର ସଂରକ୍ଷଣ ନିମନ୍ତେ ଅନୁଧ୍ୟାନ କରିଥିଲେ ।
ସୂର୍ଯ୍ୟମନ୍ଦିର ଗର୍ଭଗୃହରୁ ବାଲି କାଢିବା ପାଇଁ ପଶ୍ଚିମ ଦିଗ ପ୍ରଥମ ପିଢ଼ରେ ଗର୍ଭଗୃହ ଭିତରକୁ ଟନେଲ ନିର୍ମାଣ କାର୍ଯ୍ୟ ପୂର୍ବରୁ ମନ୍ଦିର କାନ୍ଥ ପଥରର ସ୍ଥିତି ଯାଞ୍ଚ ସହ ମନ୍ଦିର ଗର୍ଭଗୃହ କାନ୍ଥର ଚଉଡା ମାପିବା ପାଇଁ ଡ୍ରିଲ କାର୍ଯ୍ୟ ଆରମ୍ଭ ହୋଇଥିଲା । ମନ୍ଦିର ପଥରର କୌଣସି କ୍ଷତି ନ ପହଞ୍ଚିବା ପାଇଁ ଡ୍ରିଲିଂ ପାଇଁ ଡ଼ାଇମଣ୍ଡ ଡ୍ରିଲ ମେସିନ ସହ ଜିରୋ ଭାଇବ୍ରେଶନ ମେସିନର ବ୍ୟବହାର କରାଯାଇଥିଲା । ପରେ ଗର୍ଭଗୃହର ବାଲି ଓ ଡ୍ରିଙ୍ଗି ସମୟରେ ପଥର ଗୁଣ୍ଡକୁ ସଂଗୃହୀତ କରାଯାଇ ଯାଞ୍ଚ ପାଇଁ ଆଇଆଇଟି ମାଡ୍ରାସ ପଠାଯାଇଥିଲା । ଗର୍ଭଗୃହର ବାଲିକୁ ସୁରକ୍ଷିତ ଉପାୟରେ ପର୍ଯ୍ୟାୟ କ୍ରମେ ବାହାର କରାଯିବ। ସେଥିପାଇଁ ସମୟ ଲାଗିବ ଓ ବାଲି ବାହାରିବା ସମୟରେ ସୂର୍ଯ୍ୟ ମନ୍ଦିର ପ୍ରତି କୌଣସି ବିପଦ ନାହିଁ ବୋଲି କହିଛନ୍ତି ASI ସୁପରିଟେଣ୍ଡେଣ୍ଟ।
ପଶ୍ଚିମ ଏସିଆ ଯୁଦ୍ଧ ପରିପ୍ରେକ୍ଷୀରେ ଆଜି ଇସ୍ରାଏଲ-ଲେବାନନ ଆଲୋଚନା
ନନ୍ଦିଘୋଷ ବ୍ୟୁରୋ : ପଶ୍ଚିମ ଏସିଆ ଯୁଦ୍ଧ ପରିପ୍ରେକ୍ଷୀରେ ଇସ୍ରାଏଲ ଓ ଲେବାନନ ମଧ୍ଯରେ ବିବାଦ ପ୍ରସଙ୍ଗ। ଆଜି ୱାଶିଂଟନରେ ଲେବାନନ ଓ ଇସ୍ରାଏଲ ମଧ୍ୟରେ ହେବ ସିଧାସଳଖ ଆଲୋଚନା। ଆମେରିକା ପ୍ରତିନିଧିଙ୍କ ଉପସ୍ଥିତିରେ ହେବ ଆଲୋଚନା। କଥାବାର୍ତ୍ତାରେ ସାମିଲ ହେବେ ଆମେରିକ ଲାଗି ନିଯୁକ୍ତ ଇସ୍ରାଏଲ ରାଷ୍ଟ୍ରଦୂତ ୟେସିଲ ଲିଟେର। ଏହି କଥାବାର୍ତ୍ତାରେ ପ୍ରମୁଖ ଭୂମିକା ଗ୍ରହଣ କରିବ ଆମେରିକା ବୈଦେଶିକ ବିଭାଗ।
ଗତ ସପ୍ତାହରେ ହେଜବୁଲ୍ଲା ଓ ଇସ୍ରାଏଲ ମଧ୍ୟରେ ହୋଇଥିବା ଆଲୋଚନା ବିଫଳ ହେବା ପରେ ଏହା ହେଉଛି ଗୁରୁତ୍ବପୂର୍ଣ୍ଣ କଥାବାର୍ତ୍ତା। ଦଶନ୍ଧିରେ ପ୍ରଥମ ଥର ଲାଗି ଗତ ସପ୍ତାହରେ ଲେବାନନ ଓ ଇସ୍ରାଏଲ ମଧ୍ୟରେ ହୋଇଥିଲା ଆଲୋଚନା। ଆଲୋଚନା ଜରିଆରେ ଶାନ୍ତି ଲାଗି ଲେବାନନ ଇଚ୍ଛୁକ ଥିବା କହିଛନ୍ତି ରାଷ୍ଟ୍ରପତି ଯୋଶେଫ ଆଉନ।
ଆସନ୍ତାକାଲି ଆମେରିକା-ଇରାନ ଦ୍ବିତୀୟ ପର୍ଯ୍ୟାୟ ଶାନ୍ତି କଥାବାର୍ତ୍ତା
ନନ୍ଦିଘୋଷ ବ୍ୟୁରୋ : ଆସନ୍ତାକାଲି ସମ୍ଭବତଃ ଆମେରିକା ଓ ଇରାନ ମଧ୍ୟରେ ଦ୍ବିତୀୟ ପର୍ଯ୍ୟାୟ ଶାନ୍ତି କଥାବାର୍ତ୍ତା ହୋଇପାରେ । ଏନେଇ ସୂଚନା ଦେଇଛନ୍ତି ଆମେରିକା ରାଷ୍ଟ୍ରପତି ଟ୍ରମ୍ପ । ସେପଟେ ପୁଣି ଅଶାନ୍ତ ହର୍ମୁଜ । ହର୍ମୁଜ ପ୍ରଣାଳୀରେ ୩ଟି ଜାହାଜ ଉପରେ ହୋଇଛି ଗୁଳିମାଡ଼। ଗୁଳିମାଡର ଶିକାର ହୋଇଥିବା ଜାହାଜ ମଧ୍ୟରୁ ଗୋଟିଏ ଭାରତର । ଜାହାଜଟି ଦୁବାଇରୁ ଗୁଜରାଟର ମୁନ୍ଦ୍ରା ବନ୍ଦରକୁ ଆସୁଥିବା ସୂଚନା ମିଳିଛି । ଇରାନର ରିଭଲୁସନାର ଗାର୍ଡସ ଦ୍ବାରା ୩ଟି ଜାହାଜକୁ ଜବତ କରାଯାଇଛି । ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଯୁଦ୍ଧବିରତି ଅବଧିକୁ ବଢାଇବାର କିଛି ସମୟ ପରେ ପରେ ଏହି ଘଟଣା ଘଟିଛି ।
ପାନାମାର ପତାକା ଲାଗିଥିବା ଏମଏସସି ଫ୍ରାନସେସ୍କା ଓ ଲାଇବେରିଆ ପତାକା ଲାଗିଥିବା ଏପାମିନୋଣ୍ଡାସକୁ ଆଇଆରଜିସି ନିଜ ଅଧିକାରକୁ ନେଇଛି । ତୃତୀୟ ଜାହାଜ ହେଉଛି ଗ୍ରୀକ ମାଲିକାନାଧୀନ ଇଉଫୋରିଆ । ଏପାମିନୋଣ୍ଡାସ ଜାହାଜ ଗୁଜରାଟ ଆସୁଥିଲା । ଏହି ଜାହାଜର ବିଧିବଦ୍ଧ ନଥିପତ୍ର ନଥିଲା ବୋଲି କୁହାଯାଇଛି। ଗୁଳିମାଡ଼ରେ ଗୋଟିଏ ଜାହାଜର କ୍ଷତି ଘଟିଥିବା ଜଣାଯାଇଛି। ଗତ ସପ୍ତାହରେ ୨ଟି ଭାରତୀୟ ଜାହାଜ ଜାଗ ଅର୍ଣ୍ଣବ ଓ ସନମାର ହେରାଲଡ ଉପରେ ହୋଇଥିଲା ଆକ୍ରମଣ।
ସେପଟେ ଯୁଦ୍ଧ ବିରତି ଅବଧି ବଢ଼ାଇଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ସୋସିଆଲ ମିଡିଆରେ ଏ ସଂପର୍କରେ ସେ ସୂଚନା ଦେଇ ଲେଖିଛନ୍ତି, ଯୁଦ୍ଧ ବିରତି ଅବଧି ବୃଦ୍ଧି ପାଇଁ ପାକିସ୍ତାନ ଅନୁରୋଧ କରିଥିଲା। ସେଥିପାଇଁ ସେ ଏହି ପଦକ୍ଷେପ ନେଇଛନ୍ତି। କିନ୍ତୁ ହର୍ମୁଜ ଅବରୋଧ ଜାରି ରହିବ। ଇରାନର ସମସ୍ତ ବନ୍ଦରକୁ ଅବରୋଧ ଜାରି ରହିବ। ଆଲୋଚନାର ଏକ ଭଲ ପ୍ରସ୍ତାବ ଇରାନ ଆଣିବା ଯାଏ ଏହା ଜାରି ରହିବ ବୋଲି ସେ କହିଛନ୍ତି। କଥାବାର୍ତ୍ତା ପାଇଁ ଉପରାଷ୍ଟ୍ରପତି ଜେଡି ଭାନ୍ସ ଇସଲାମାବାଦ ଆସିବେନି ବୋଲି ମଧ୍ୟ କହିଛନ୍ତି ଟ୍ରମ୍ପ।
ଆଜି ତାମିଲନାଡୁ ବିଧାନସଭା ନିର୍ବାଚନ ; ୨୩୪ ଆସନ ଲାଗି ୪ ହଜାର ୨୦୩ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ
ନନ୍ଦିଘୋଷ ବ୍ୟୁରୋ : ଆଜି ବି ତାମିଲନାଡୁ ବିଧାନସଭା ନିର୍ବାଚନ। ସମୁଦାୟ ୨୩୪ ଆସନ ଲାଗି ୪ ହଜାର ୨୦୩ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବେ ପ୍ରାୟ ୫ କୋଟି ୬୮ ଲକ୍ଷ ଭୋଟର। ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନ, ଉପମୁଖ୍ୟମନ୍ତ୍ରୀ ଉଦୟନିଧି, ସୁପରଷ୍ଟାର ତଥା ଟିଭିକେ ମୁଖ୍ୟ ବିଜୟଙ୍କ ସମେତ ବହୁ ହେଭିୱେଟଙ୍କ ହେବ ଭାଗ୍ୟ ନିର୍ଣ୍ଣୟ। ନିର୍ବାଚନ ଲାଗି କଡା ସୁରକ୍ଷାରେ ପଠାଯାଇଛି ଇଭିଏମ। ପ୍ରାୟ ସମସ୍ତ ବୁଥରେ ପହଞ୍ଚିଛନ୍ତି ପୋଲିଂ କର୍ମଚାରୀ। ଭୋଟ ପରିଚାଳନାକୁ ଅବଲୋକନ କରିବା ଲାଗି ପହଞ୍ଚିଛନ୍ତି ଅନ୍ତର୍ଜାତୀୟ ପ୍ରତିନିଧି ମଣ୍ଡଳୀ ।
ଚଳିତ ନିର୍ବାଚନ ମୁଖ୍ୟମନ୍ତ୍ରୀ ଏମ. କେ. ଷ୍ଟାଲିନଙ୍କ ଲାଗି ଅଗ୍ନିପରୀକ୍ଷା । ଏଥର ବି କୋଲଥୁର ବିଧାନସଭା ନିର୍ବାଚନ ମଣ୍ଡଳୀରୁ ପ୍ରାର୍ଥୀ ହୋଇଛନ୍ତି ଷ୍ଟାଲିନ । ତାଙ୍କ ବିରୋଧରେ ଏଆଇଏଡିଏମକେରୁ ପ୍ରାର୍ଥୀ ହୋଇଛନ୍ତି ଆଦି ରାଜାରାମ। ଏହି ଆସନରୁ ଷ୍ଟାଲିନ ଗତ ୨୦୧୧ରୁ ବିଜୟ ଲାଭ କରିଆସୁଛନ୍ତି । ୨୦୧୧, ୨୦୧୬ ଓ ୨୦୨୧ ବିଧାନସଭା ନିର୍ବାଚନରେ ସେ ବିପୁଳ ଭୋଟରେ ବିଜୟୀ ହୋଇଥିଲେ । ଏହି ଆସନରେ ବିଜେପିର ସ୍ଥିତି ପ୍ରାୟ ନଥିବାବେଳେ ତିନି ଥର ଯାକ ସେ ଏଆଇଏଡିଏମକେ ପ୍ରାର୍ଥୀଙ୍କୁ ପରାସ୍ତ କରିଆସିଛନ୍ତି ।
ଦ୍ବିତୀୟ ଥର ଲାଗି ନିର୍ବାଚନ ମଇଦାନରେ ଡିଏମକେ ପ୍ରାର୍ଥୀ ତଥା ତାମିଲନାଡୁ ମୁଖ୍ୟମନ୍ତ୍ରୀଙ୍କ ତୃତୀୟ ତଥା ସର୍ବକନିଷ୍ଠ ପୁଅ ଉଦୟନିଧି ଷ୍ଟାଲିନ l ଏଥର ବି ସେ ଚେପାକ-ତିରୁବାଲିକେନି ବିଧାନସଭା ଆସନରୁ ପ୍ରାର୍ଥୀ ହୋଇଛନ୍ତି l ୨ଟି ଆସନରୁ ଲଢୁଛନ୍ତି ସୁପରଷ୍ଟାର ବିଜୟ। ପେରାମ୍ବୁର ଓ ତିରୁଚିରାପଲ୍ଲୀ ଇଷ୍ଟରୁ ବି ପ୍ରାର୍ଥୀ ହୋଇଛନ୍ତି ସୁପରଷ୍ଟାର ବିଜୟ । କେନ୍ଦ୍ରମନ୍ତ୍ରୀ ତଥା ବିଜେପି ନେତା ଏଲ. ମୁରୁଗାନ ଅବାନାଶୀରୁ ପ୍ରାର୍ଥୀ ହୋଇଥିବାବେଳେ ଧର୍ମପୁରୀ ଆସନରୁ ଲଢୁଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ତଥା ରାଜ୍ୟସଭା ସଦସ୍ୟ ଡକ୍ଟର ଅମ୍ବୁମଣି ରାମଦୋସଙ୍କ ପତ୍ନୀ ଡକ୍ଟର ସୋମିୟା ଅମ୍ବୁମଣି l ମାୟଲାପୁରରେ ବିଜେପିରୁ ଲଢୁଛନ୍ତି ପୂର୍ବତନ ରାଜ୍ୟପାଳ ତାମିଲସାଇ ସୁନ୍ଦରରାଜନ । ପେରାମ୍ବୁର ଓ ତିରୁଚିରାପଲ୍ଲୀ ଇଷ୍ଟରୁ ଲଢୁଛନ୍ତି ଟିଭିକେ ସୁପ୍ରିମୋ ବିଜୟ।
ପଶ୍ଚିମବଙ୍ଗରେ ଆଜି ପ୍ରଥମ ପର୍ଯ୍ୟାୟ ନିର୍ବାଚନ ; TMC ଓ BJP ମଧ୍ୟରେ କଡ଼ା ଟକ୍କର
ନନ୍ଦିଘୋଷ ବ୍ୟୁରୋ : ପଶ୍ଚିମବଙ୍ଗରେ ଆଜି ପ୍ରଥମ ପର୍ଯ୍ୟାୟ ନିର୍ବାଚନ। ପ୍ରଥମ ପର୍ଯ୍ୟାୟରେ ୧୫୨ ଆସନ ଲାଗି ୧ ହଜାର ୪୭୫ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ୩ କୋଟି ୬୦ ଲକ୍ଷ ୭୭ ହଜାର ଭୋଟର l ପ୍ରଥମ ପର୍ଯ୍ୟାୟରେ ୧୬ ଜିଲ୍ଲା ଅର୍ଥାତ- ମାଲଦା, ମୁର୍ଶିଦାବାଦ, ପୁରୁଲିଆ, ବାଙ୍କୁରା, ପଶ୍ଚିମ ମେଦିନୀପୁର, କୁଚବେହାର, ଆଲିପୁରଦୁଆର, ଜଲପାଇଗୁଡି, ଦାର୍ଜିଲିଂ, ଉତ୍ତର ଓ ଦକ୍ଷିଣ ଦିନାଜପୁର, ଝାରଗ୍ରାମ, ପଶ୍ଚିମ ବର୍ଦ୍ଧମାନ, ବୀରଭୂମ ଓ ନଦିଆ ଜିଲ୍ଲାରେ ହେବ ଭୋଟ। ଗତ ୧୫ ବର୍ଷ ଧରି ଶାସନରେ ଥିବା ଟିଏମସି ଲାଗି ଏହି ନିର୍ବାଚନ ହେବ ଅଗ୍ନିପରୀକ୍ଷା।
ବିଜେପିକୁ ମୁକାବିଲାରେ ଦଳ ସଫଳ କି ବିଫଳ ହେବ ତାହା ଜଣାପଡିବ ମେ ୪ରେ। ଗତ ୨୦୨୧ରେ ୨୯୪ ଆସନରୁ ଟିଏମସି ୨୧୩ ଆସନ ଅର୍ଥାତ ୪୭.୯ ପ୍ରତିଶତ ଭୋଟ ଲାଭ କରିଥିଲା। ମମତାଙ୍କ ଲକ୍ଷ୍ମୀ ଭଣ୍ଡାର ଯୋଜନା ତାଙ୍କ ବିଜୟ କ୍ଷେତ୍ରରେ ପ୍ରମୁଖ ଭୂମିକା ନେଇଥିଲା। ଚଳିତ ଥର ମମତାଙ୍କ ହାତରୁ ଶାସନ ଛଡ଼ାଇନେବା ଲାଗି ବିଜେପି ପ୍ରାଣମୂର୍ଚ୍ଛା ସଂଗ୍ରାମ କରିଛି। ଗତ ୨୦୨୧ରେ ବିଜେପି ହାସଲ କରିଥିଲା ୭୭ ଆସନ।
ସେପଟେ କଂଗ୍ରେସ ଓ ବାମପନ୍ଥୀ ଦଳ ସମ୍ମାନ ରକ୍ଷା ଲାଗି ଲଢୁଥିବା ପ୍ରତୀୟମାନ ହେଉଛି। ସେପଟେ ମୁସଲିମ ଭୋଟ ହାତେଇ ବିଜୟୀ ହେବାକୁ ଲକ୍ଷ୍ୟ ରଖିଛି ଏଆଇଏମଆଇଏମ। ଚଳିତ ଥର ୧୧ଟି ଆସନରେ ପ୍ରାର୍ଥୀ ଦେଇଛି ଦଳ। ଟିଏମସିରୁ ସସପେଣ୍ଡ ହୋଇଥିବା ହ୍ୟୁମାୟୁନ କବୀରଙ୍କ ଆମ୍ ଜନତା ଉନ୍ନୟନ ପାର୍ଟି ବା ଏଜେୟୁପି ସହ ଏଆଇଏମଆଇଏମ ମେଣ୍ଟ କରିଥଇଲେ ବି ବିଜେପି ସହ ଡିଲ୍ ସଂକ୍ରାନ୍ତ ଭିଡିଓ ଲୋକଲୋଚନକୁ ଆସିବା ପରେ ଏହି ମେଣ୍ଟ ଭାଙ୍ଗିଥିଲା। ଏହି ନିର୍ବାଚନରେ ଏଜେୟୁପି ମୋଟ ୧୮୦ ଆସନରେ ପ୍ରାର୍ଥୀ ଦେଇଛି।
ଚଳିତ ନିର୍ବାଚନରେ ଲଢୁଛନ୍ତି ଟିଏମସି, ବିଜେପି ଓ କଂଗ୍ରେସର ହାଇପ୍ରୋଫାଇଲ ପ୍ରାର୍ଥୀ । ବରହମପୁର ଆସନରୁ ଲଢୁଛନ୍ତି କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ। ତାଙ୍କ ବିରୋଧରେ ପ୍ରାର୍ଥୀ ଅଛନ୍ତି ବିଜେପିର ସୁବ୍ରତ ମଇତ୍ରା ଓ ଟିଏମସିର ନାରୁ ଗୋପାଳ ମୁଖାର୍ଜୀ । ନନ୍ଦିଗ୍ରାମରେ ଲଢୁଛନ୍ତି ବିଜେପିର ଶୁଭେନ୍ଦୁ ଅଧିକାରୀ । ତାଙ୍କ ବିରୋଧରେ ଟିଏମସିରୁ ଲଢୁଛନ୍ତି ପବିତ୍ର କର ଓ କଂଗ୍ରେସର ଶେଖ ଜରିଆତୁଲ ହୋସେନ । ୨୦୨୧ ନିର୍ବାଚନରେ ଏହି ଆସନରୁ ପ୍ରାୟ ୨ ହଜାର ଭୋଟରେ ଶୁଭେନ୍ଦୁଙ୍କଠାରୁ ପରାସ୍ତ ହୋଇଥିଲେ ମମତା ବାନାର୍ଜୀ । ୨୦୧୬ରେ ଏଠାରୁ ଶୁଭେନ୍ଦୁ ଟିଏମସି ପ୍ରାର୍ଥୀ ଭାବେ ବିପୁଳ ଭୋଟରେ ବିଜୟୀ ହୋଇଥିଲେ । ଖଡଗପୁର ସଦର ଆସନରେ ବିଜେପିର ପୂର୍ବତନ ରାଷ୍ଟ୍ରୀୟ ଉପସଭାପତି ଦିଲ୍ଲୀପ ଘୋଷ ଲଢୁଥିବାବେଳେ ଟିଏମସିରୁ ଲଢୁଛନ୍ତି ପ୍ରଦୀପ ସରକାର ।
କ୍ରସ ଭୋଟିଙ୍ଗ କରିଥିବା ବିଧାୟକଙ୍କ ସଭ୍ୟପଦ ରଦ୍ଦ କରିବାକୁ ଦାବି କରିଛନ୍ତି ପ୍ରସନ୍ନ ଆଚାର୍ଯ୍ୟ
ଭୁବନେଶ୍ୱର : ରାଜ୍ୟସଭା ନିର୍ବାଚନରେ କ୍ରସ ଭୋଟିଙ୍ଗ କରିଥିବା ବିଧାୟକଙ୍କ ସଭ୍ୟପଦ ରଦ୍ଦ କରିବାକୁ ଦାବି କରିଛନ୍ତି ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ । କହିଛନ୍ତି, ସମ୍ବିଧାନ ନିୟମ ଅନୁସାରେ ବାଚସ୍ପତି ତ୍ୱରିତ ପଦକ୍ଷେପ ନିଅନ୍ତୁ । ନିକଟରେ ଅନୁଷ୍ଠିତ ରାଜ୍ୟସଭା ନିର୍ବାଚନରେ ୧୧ଜଣ ବିଧାୟକ କ୍ରସ ଭୋଟିଙ୍ଗ କରିଛନ୍ତି । ସେମାନଙ୍କ ସଭ୍ୟ ପଦ ରଦ୍ଦ କରିବାକୁ ବାଚସ୍ପତିଙ୍କ ପାଖରେ ଦାବି ହୋଇଛି । ଦଳୀୟ ଶୃଙ୍ଖଳା ଭଙ୍ଗ କରି ବିଧାୟକମାନେ ଅନ୍ୟ ଦଳକୁ ସମର୍ଥନ କରିଥିଲେ । ଯାହା ଦଳ ବିରୋଧୀ । ତେଣୁ ସମ୍ବିଧାନ ନିୟମ ଅନୁସାରେ ତାଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଦରକାର ବୋଲି ପ୍ରସନ୍ନ ଦାବି କରିଛନ୍ତି । ବିଳମ୍ବିତ ନ୍ୟାୟ ନ୍ୟାୟ ନୁହେଁ । ବାଚସ୍ପତି ବିଧାୟକମାନଙ୍କ ଉପରେ କାର୍ଯ୍ୟାନୁଷ୍ଠାନ ନେବା ଆବଶ୍ୟକ ।
ପଶ୍ଚିମବଙ୍ଗରେ ‘ଫିସ୍ ପଲିଟିକ୍ସ’
ନନ୍ଦିଘୋଷ ବ୍ୟୁରୋ : ପଶ୍ଚିମବଙ୍ଗରେ ‘ଫିସ୍ ପଲିଟିକ୍ସ’ ବା ମାଛକୁ ନେଇ ରାଜନୀତି l କାହିଁକି ବିଜେପି ନେତାମାନେ ଦୁନିଆକୁ କହୁଛନ୍ତି ଯେ ସେମାନେ ମାଛ ଖାଉଛନ୍ତି l ଓଡିଶାର ପଡୋଶୀ ରାଜ୍ୟରେ ଏବେ ନିର୍ବାଚନୀ ମାହୋଲ l ଦିଦି ବନାମ ମୋଦି l “ମାଛେ ଭାତେ ବଙ୍ଗାଳୀ” ନାରା କୁ ନେଇ ତୀବ୍ର ରାଜନୈତିକ ଲଢ଼େଇ l ମମତା ବନାର୍ଜୀ ଓ ତାଙ୍କ ନେତାମାନେ କହୁଛନ୍ତି ଯଦି ବିଜେପି କ୍ଷମତାକୁ ଆସେ, ତେବେ ମାଛ, ମାଂସ, ଅଣ୍ଡା ଖାଇବା ଉପରେ ନିଷେଧାଦେଶ ଲଗାଇଦେବ। ଏପଟେ ବିଜେପି ନେତା ଓ ପ୍ରାର୍ଥୀମାନେ ମଧ୍ୟ ମାଛ ହାତରେ ନେଇ ପ୍ରଚାର କରୁଛନ୍ତି।ସେମାନେ କହୁଛନ୍ତି ବିଜେପି କେବେ ବି ଖାଦ୍ୟ ଉପରେ ନିୟନ୍ତ୍ରଣ କରିବ ନାହିଁ ।
ପଶ୍ଚିମବଙ୍ଗରେ ନେତାମାନେ ‘ଫିସ୍ ପଲିଟିକ୍ସ’ରେ ଏବେ ମାତିଛନ୍ତି । ଏହା ଏକ ‘ସାଂସ୍କୃତିକ ଲଢେଇ’। ଟିଏମ୍ସି ବଙ୍ଗାଳୀ ଆତ୍ମସମ୍ମାନର କାର୍ଡ ଖେଳୁଛି, ଯେତେବେଳେ ବିଜେପି ୨୦୨୬ରେ କ୍ଷମତା ଦଖଲ କରିବା ପାଇଁ ଏକ ପୂର୍ଣ୍ଣାଙ୍ଗ ଛବି ତିଆରି କରିବାକୁ ଚେଷ୍ଟା କରୁଛି। ମାଛ ଏବେ କେବଳ ଥାଳିରେ ନୁହେଁ, ଭୋଟ୍ ବ୍ୟାଙ୍କ ରାଜନୀତିରେ ସାମିଲ ହୋଇଛି । ଭୋଟ୍ ଦେବା ସମୟରେ ପଶ୍ଚିମବଙ୍ଗ ଭୋଟରଙ୍କ ମନରେ ନିଶ୍ଚୟ ମାଛର ପ୍ରଶ୍ନ ଉଠିବ। ମାଛ ପଶ୍ଚିମବଙ୍ଗର ପରିଚୟ। ପଶ୍ଚିମବଙ୍ଗର ନାମ ନେଲେ ମନକୁ ଯେଉଁ ଛବି ଆସେ , ମାଛ ସେଥିରୁ ଗୋଟିଏ। ପଶ୍ଚିମବଙ୍ଗରର ବିଧାନସଭା ନିର୍ବାଚନରେ ଅନେକ ପ୍ରସଙ୍ଗ ମଧ୍ୟରେ ମାଛ ଖାଇବା ମଧ୍ୟ ଏକ ପ୍ରସଙ୍ଗ ହୋଇଛି। ବିଜେପିର ବଡ଼ ନେତା ଅନୁରାଗ୍ ଠାକୁର ପଶ୍ଚିମବଙ୍ଗରରେ ମାଛ ଖାଉଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଈ ସୋରେନ୍ ମାଛ ଖାଉଥିବା ଫଟୋ ଏକ୍ସରେ ପୋଷ୍ଟ କରିଛନ୍ତି।
ପଶ୍ଚିମବଙ୍ଗରରେ ‘ଫିସ୍ ପଲିଟିକ୍ସ’ କଣ? କାହିଁକି ବିଜେପି ନେତାମାନେ ଦୁନିଆକୁ କହୁଛନ୍ତି ଯେ ସେମାନେ ମାଛ ଖାଉଛନ୍ତି । ମାଛ-ଭାତ ଟିଏମ୍ସି ଏହି ନିର୍ବାଚନରେ ପଶ୍ଚିମବଙ୍ଗରର ସାଂସ୍କୃତିକ ପରିଚୟର ପ୍ରସଙ୍ଗକୁ ଜୋର୍ ଦେଇଛି। ଟିଏମ୍ସି ବିଜେପି ଉପରେ ଅଭିଯୋଗ ଲଗାଉଛି ଯେ ଯଦି ବିଜେପି କ୍ଷମତାକୁ ଆସେ ତେବେ ବଙ୍ଗାଳୀମାନଙ୍କୁ ମାଛ, ମାଂସ ଓ ଅଣ୍ଡା ଖାଇବାରୁ ବନ୍ଦ କରି ଦିଆଯିବ। ମମତା ବାନାର୍ଜୀଙ୍କ ଟିଏମ୍ସି କହୁଛି ଯେ ‘ମାଛ-ଭାତେ ବଙ୍ଗାଳୀ’ ଅର୍ଥାତ୍ ମାଛ-ଭାତ ବଙ୍ଗାଳୀର ପରିଚୟ। ଲଗାତାର ଚତୁର୍ଥ ଥର ପାଇଁ କ୍ଷମତାକୁ ଆସିବାକୁ ଚେଷ୍ଟା କରୁଥିବା ମମତା ଚେତାବନୀ ଦେଇଛନ୍ତି ଯେ ବିଜେପି ପଶ୍ଚିମବଙ୍ଗରର ଜୀବନଶୈଳୀ ପାଇଁ ବିପଦ। ସେ ମାଛ ଓ ଭାତକୁ ନେଇ ପଶ୍ଚିମବଙ୍ଗର ଲୋକଙ୍କ ପାଇଁ ଏପରି ଜିନିଷ କହିଛନ୍ତି ଯାହା ଉପରେ ଏବେ ଜୋରଦାର ଚର୍ଚ୍ଚା । ଏକ ନିର୍ବାଚନୀ ସଭାରେ ମମତା କହିଥିଲେ, “ବିଜେପି ତୁମକୁ ମାଛ ଖାଇବାକୁ ଦେବ ନାହିଁ। ମାଂସ ଖାଇବାକୁ ଦେବ ନାହିଁ , ଅଣ୍ଡା ଖାଇବାକୁ ଦେବ ନାହିଁ।”ଆଉ ଏକ ସଭାରେ ବିଜେପିକୁ ଆକ୍ରମଣ କରି ମମତା କହିଥିଲେ, ” ପଶ୍ଚିମବଙ୍ଗରରେ ଲୋକ ମାଛ ଓ ଭାତ ଉପରେ ନିର୍ଭର କରନ୍ତି। ବିଜେପି ପଶ୍ଚିମବଙ୍ଗରର ଲୋକଙ୍କୁ କହୁଛ ଯେ ସେମାନେ ମାଛ ଖାଇପାରିବେ ନାହିଁ, ମାଂସ ଖାଇପାରିବେ ନାହିଁ, ଅଣ୍ଡା ଖାଇପାରିବେ ନାହିଁ, ତେବେ ସେମାନେ କଣ ଖାଇବେ?” ମମତା କହୁଛନ୍ତି ଯେ ବିଜେପି ପଶ୍ଚିମବଙ୍ଗର ସଂସ୍କୃତି ଉପରେ ଆକ୍ରମଣ କରୁଛି ।
ଏପଟେ ବିଜେପି ପ୍ରାର୍ଥୀଙ୍କ ହାତରେ ମାଛ ମମତାଙ୍କ ଅଭିଯୋଗର ଜବାବ ଦେବା ପାଇଁ ବିଜେପି ପଶ୍ଚିମବଙ୍ଗରରେ ବଡ଼ ସ୍ତରରେ ‘ଫିସ୍ ପଲିଟିକ୍ସ’ ଆରମ୍ଭ କରିଛି। ବିଜେପି ନେତା ଓ ପ୍ରାର୍ଥୀମାନେ ଖୋଲାଖୋଲି ମାଛ ଖାଉଛନ୍ତି, ହାତରେ ବଡ଼ ବଡ଼ ମାଛ ଧରି ପ୍ରଚାର କରୁଛନ୍ତି ଏବଂ ମାଛ ବଜାରରେ ବୁଲୁଛନ୍ତି ।କୋଲକାତା ପୋର୍ଟରୁ ବିଜେପି ଟିକେଟ୍ରେ ନିର୍ବାଚନ ଲଢ଼ୁଥିବା ରାକେଶ୍ ସିଂ ଦୁଇ ହାତରେ ମାଛ ଧରି ଘର ଘର ବୁଲୁଛନ୍ତି ।ଏହି ଅବସ୍ଥା କୌସ୍ତଭ ବାଗଚୀଙ୍କର ମଧ୍ୟ। ବାଗଚୀ ହାତରେ ମାଛ ଧରି ଧଳା ଓ ଲାଲ୍ ପୋଷାକ ପିନ୍ଧି ଘର ଘର ବୁଲୁଛନ୍ତି । ତାଙ୍କ ପଛରେ ଢୋଲ ବାଜୁଛି ଏବଂ ସମର୍ଥକମାନେ ତାଙ୍କୁ ଜୟଧ୍ୱନି ଦେଉଛନ୍ତି। ବୈରାକପୁରରୁ ବିଜେପି ପ୍ରାର୍ଥୀ ବାଗଚୀ ଲୋକଙ୍କୁ ଆକୃଷ୍ଟ କରିବା ପାଇଁ ମାଛ ଉପରେ ଜୋର ଦେଉଛନ୍ତି ।
ପଶ୍ଚିମବଙ୍ଗରରେ ଶାକାହାରୀ ଛବିରୁ ମୁକ୍ତି ପାଇବାର ବିଜେପିର ଏହି ପ୍ରୟାସର ଉଦ୍ଦେଶ୍ୟ ହେଉଛି ନିଜକୁ ‘ବାହାରୁ ଆସିଥିବା’, ‘ହିନ୍ଦୀ ପାର୍ଟି ‘ ଏବଂ ‘ଶାକାହାରୀ’ ଦଳର ଛବିରୁ ମୁକ୍ତ କରିବା। ମାଛ ଖାଉଥିବା ସମୟରେ ଅନୁରାଗ୍ ଠାକୁର ସାମ୍ବାଦିକଙ୍କୁ କହିଥିଲେ, “ଏଠାରେ ମାଛ ଅଛି, ଭାତ ଅଛି, ସମସ୍ତେ ଖାଉଛନ୍ତି। ବିଜେପିର ସରକାର ୧୬ଟି ରାଜ୍ୟରେ ଅଛି, ଏନ୍ଡିଏର ୨୦ଟି ରାଜ୍ୟରେ ସରକାର ଅଛି, କିନ୍ତୁ କୌଣସି ଜାଗାରେ କାହାରି ବକ୍ତବ୍ୟ, ଖାଦ୍ୟ, ପୂଜା-ପାଠ ଉପରେ କୌଣସି ପ୍ରତିବନ୍ଧକ ନାହିଁ। ମମତା ବାନାର୍ଜୀ ଭୟ, ବିଭ୍ରାନ୍ତି ଏବଂ ଗୁଜବ ସୃଷ୍ଟି କରୁଛନ୍ତି ।”
ଏହି ମାଛ ପ୍ରସଙ୍ଗ ନିର୍ବାଚନରେ ଏତେ ଗୁରୁତ୍ୱପୂର୍ଣ୍ଣ ହୋଇଛି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଏହି ପ୍ରସଙ୍ଗକୁ ସ୍ପର୍ଶ କରିଛନ୍ତି। ପିଏମ୍ ଏକ ସଭାରେ କହିଥିଲେ, “୧୫ ବର୍ଷ କ୍ଷମତାରେ ଥାଇ ତୃଣମୂଳ କଂଗ୍ରେସ୍ ମାଛ ପରି ଏକ ସାଧାରଣ ଜିନିଷ ମଧ୍ୟ ଯୋଗାଇ ଦେବାରେ ବିଫଳ ହୋଇଛି। ମାଛ ମଧ୍ୟ ରାଜ୍ୟ ବାହାରୁ ଆଣିବାକୁ ପଡ଼ୁଛି।”
ମୁଖ୍ୟ ନିର୍ବାଚନ ଅଧିକାରୀଙ୍କ ଅଫିସ ଘେରାଉ କରିଛି ବିଜେଡି
ଭୁବନେଶ୍ୱର :ନିଜ ଘରେ, ନିଜ ମାଟିରେ ଭୋଟରଙ୍କୁ ଶରଣାର୍ଥୀ କରିବାକୁ ଉଦ୍ୟମ। ଏହି ସଂଗୀନ ଅଭିଯୋଗ କରି ମୁଖ୍ୟ ନିର୍ବାଚନ ଅଧିକାରୀଙ୍କ ଅଫିସ ଘେରାଉ କରିଛି ବିଜେଡି। ପ୍ରାକ୍ SIR ରେ ରାଜ୍ୟର ଭୋଟର ତାଲିକାରୁ ୯ ଲକ୍ଷ ୮୦ ହଜାରରୁ ଅଧିକ ଭୋଟରଙ୍କୁ ବାଦ୍ ଦିଆଯାଇଛି। ଓଡ଼ିଶାରେ ବିରୋଧୀଙ୍କ ଗଡ଼ ଭାଙ୍ଗିବାକୁ ଏହା ବିଜେପି ସରକାରର ଷଡଯନ୍ତ୍ର। ଯେଉଁଠି ବିରୋଧୀଙ୍କ ଗଡ଼, ସେଠି ଭୋଟରଙ୍କୁ ବାଦ ପକାଇ ବୁଥ କବଜା କରିବାକୁ ରାଜ୍ୟ ସରକାର କରୁଛନ୍ତି ହୀନ ଚକ୍ରାନ୍ତ। ନିର୍ବାଚନ କମିଶନ ସ୍ୱଚ୍ଛତା ଅଵଲମ୍ବନ କରନ୍ତୁ ବୋଲି ଦାବି କରିଛି ବିଜେଡି। ପୁଣି ଥରେ ଯାଞ୍ଚ କରି ବାଦ ପଡ଼ିଥିବା ଭୋଟରଙ୍କୁ ତାଲିକାରେ ସାମିଲ କରିବାକୁ ଦାବି କରାଯାଇଛି। ନ ହେଲେ ଲୋକସେବା ଭବନ ଘେରାଉ କରାଯିବ। ଆବଶ୍ୟକ ପଡିଲେ, ବାଦ ପଡ଼ିଥିବା ଭୋଟରଙ୍କୁ ନେଇ ଆନ୍ଦୋଳନ କରିବାକୁ ବିଜେଡି ନିଷ୍ପତ୍ତି ନେଇଛି।
ଯୁଦ୍ଧ ବିରତି ଅବଧି ବଢ଼ାଇଛନ୍ତି ଡୋନାଲଡ ଟ୍ରମ୍ପ
ନନ୍ଦିଘୋଷ ବ୍ୟୁରୋ : ସଙ୍କଟ ଭିତରେ ବିଶ୍ୱ । ଆମେରିକା ଇରାନ ଭିତରେ ସମ୍ପର୍କ ସୁଧୁରିବା ଏବେ ବି କଷ୍ଟ । ଶାନ୍ତି ଆଲୋଚନା ବିଫଳ ହେଉଛି । ଆମେରିକା ସର୍ତ୍ତରେ ଇରାନ ରାଜି ହେବା ଭଳି ମନେ ହୁଏନାହିଁ । ମଧ୍ୟପ୍ରାଚ୍ୟ ସଂକଟ ନେଇ ପୁଣି ଆଲୋଚନାର ବାତାବରଣ କିନ୍ତୁ ସୃଷ୍ଟି ହୋଇଛି । ଯୁଦ୍ଧ ବିରତି ଅବଧି ବଢ଼ାଇଛନ୍ତି ଆମେରିକାର ରାଷ୍ଟ୍ରପତି ଡୋନାଲଡ ଟ୍ରମ୍ପ। ସୋସିଆଲ ମିଡିଆରେ ଏ ସଂପର୍କରେ ସେ ସୂଚନା ଦେଇ ଲେଖିଛନ୍ତି, ଯୁଦ୍ଧ ବିରତି ଅବଧି ବୃଦ୍ଧି ପାଇଁ ପାକିସ୍ତାନ ଅନୁରୋଧ କରିଥିଲା ତେଣୁ ସେ ଏହି ପଦକ୍ଷେପ ନେଇଛନ୍ତି। କିନ୍ତୁ ହର୍ମୁଜ ଅବରୋଧ ଜାରି ରହିବ। ଇରାନର ସମସ୍ତ ବନ୍ଦରକୁ ଅବରୋଧ ଜାରି ରହିବ।
କଥାବାର୍ତ୍ତା ପାଇଁ ଉପରାଷ୍ଟ୍ରପତି ଜେଡି ଭାନ୍ସ ଇସଲାମାବାଦ ଆସିବେନି ବୋଲି ମଧ୍ୟ କହିଛନ୍ତି ଟ୍ରମ୍ପ। ସେପଟେ ଇରାନ ଏହାକୁ ପ୍ରତ୍ୟାଖ୍ୟାନ କରିଛି। କହିଛି, ଟ୍ରମ୍ପ ନିଜେ ନିଜେ ଏହି ଘୋଷଣା କରିଛନ୍ତି। ଆଲୋଚନା ପାଇଁ କୌଣସି ସର୍ତ୍ତରେ ମଂଜୁର ନୁହେଁ ବୋଲି ଇରାନ ପକ୍ଷରୁ କୁହାଯାଇଛି। ଦୁଇ ସପ୍ତାହ ଧରି ଯୁଦ୍ଧ ବନ୍ଦ ଥିଲା। ଶାନ୍ତି ପାଇଁ ଇସଲାମାବାଦରେ ଇରାନ ଓ ଆମେରିକା ମଧ୍ୟରେ ଆଲୋଚନା ହୋଇଥିଲା। କିନ୍ତୁ ଏହା ଫେଲ୍ ମାରିଥିଲା। କୌଣସି ଡିଲ୍ ହୋଇପାରିନଥିଲା। ଦ୍ଵିତୀୟ ପର୍ଯ୍ୟାୟ ଆଲୋଚନା ପାଇଁ ଆମେରିକାର ଟିମ୍ ପାକିସ୍ତାନ ଆସିବାର ଥିଲା। କିନ୍ତୁ ଇରାନ ଏହାକୁ ପ୍ରତ୍ୟାଖ୍ୟାନ କରିଥିଲା। ଏପରିକି ନିଜ ଟିମ୍ ବି ପଠାଇନଥିଲା। ଆଜି ଯୁଦ୍ଧ ବିରତିର ଶେଷ ଦିନ ଥିଲା। କଣ ହେବ ବୋଲି ବିଶ୍ଵ ସମୁଦାୟ ଚିନ୍ତିତ ଥିବା ବେଳେ ଟ୍ରମ୍ପ ଯୁଦ୍ଧ ବିରତିକୁ ବୃଦ୍ଧି କରିଛନ୍ତି। ଏହା ଦ୍ଵାରା ମଧ୍ୟପ୍ରାଚ୍ୟରେ ଶାନ୍ତି ପାଇଁ ଆଲୋଚନାର ବାଟ ଫିଟିବ ବୋଲି ଆଶା କରାଯାଉଛି।