ଭୁବନେଶ୍ୱର: ଫେକ ସିମ୍ କାର୍ଡ ଜବତ ମାମଲା । ୩ ଅଭିଯୁକ୍ତଙ୍କୁ ୫ ଦିନିଆ ରିମାଣ୍ଡରେ ନେଲା କ୍ରାଇମବ୍ରାଞ୍ଚ । ଅଭିଯୁକ୍ତ ଦୁଷ୍ମନ୍ତ, ସାଇପ୍ରକାଶ ଓ ଅବିନାଶକୁ ଅଧିକା ପଚରାଉଚରା କରିବ କ୍ରାଇମବ୍ରାଞ୍ଚ । ସାଇପ୍ରକାଶ ବିଏସଏନଏଲ ଡିଲର ଥିବା ବେଳେ ଅବିନାଶ ତାର ସହଯୋଗୀ କର୍ମଚାରୀ ଥିଲା । ମାଷ୍ଟରମାଇଣ୍ଡ ଦୁଷ୍ମନ୍ତ ବାୟର ସେଲର ଗ୍ରୁପର ମୁଖ୍ୟ ଥିଲା । ଲୋକସଭା ସ୍ପିକର ଓମ୍ ବିର୍ଲାଙ୍କ ନାଁରେ ଫେକ୍ ସିମ୍ ବାହାର କରି ଲୋକସଭା ସାଂସଦମାନଙ୍କୁ ଟଙ୍କା ମାଗୁଥିଲେ ଏହି ଠକ । ସିମ୍ ସବୁ ଢେଙ୍କାନାଳରୁ କିଣା ହୋଇ ଆକ୍ଟିଭେଟ ହୋଇଥିଲା ବୋଲି ତଦନ୍ତରୁ ଜଣାପଡ଼ିଛି ।
ଦୁଷ୍ମନ୍ତ ଓ ତାଙ୍କ ପରିବାର ଲୋକଙ୍କ ମୋଟ ୭ଟି ବ୍ୟାଙ୍କ ଆକାଉଣ୍ଟ, ୩ଟି ପେଟିଏମ୍ ଆକାଉଣ୍ଟ ଠାବ ହୋଇଛି । ସେଥିମଧ୍ୟରୁ ଦୁଇଟି ପେଟିଏମର ତଥ୍ୟ ପାଇଛି କ୍ରାଇମବ୍ରାଞ୍ଚ । ୧୮ ଏପ୍ରିଲ୍ ୨୦୨୦ରୁ ଏହି ଜାଲିଆତି ଆରମ୍ଭ କରିଥିଲେ ଅଭିଯୁକ୍ତ । ଦୁଇଟି ପେଟିଏମ୍ ଆକାଉଣ୍ଟରେ ୩୦ ଲକ୍ଷ ଟଙ୍କାର କାରବାର କରିଥିବା ତଥ୍ୟ ମିଳିଛି । ଅନ୍ୟ ଆକାଉଣ୍ଟ ଗୁଡ଼ିକର ତଦନ୍ତ ଜାରି ରହିଛି ବୋଲି ସୂଚନା ଦେଇଛନ୍ତି କ୍ରାଇମବ୍ରାଞ୍ଚ ଏଡିଜି ସଞ୍ଜୀବ ପଣ୍ଡା । ଅନ୍ୟପଟେ ସବୁ ଜିଲ୍ଲାର ଏସପିଙ୍କୁ ସମସ୍ତ ବିଏସଏନଏଲ, ଜିଓ, ଭୋଡାଫୋନ ଡିଲର ପଏଣ୍ଟ, ସିମ୍ ବିକ୍ରେତାଙ୍କ ଉପରେ ଚଢ଼ାଉ କରିବାକୁ ନିର୍ଦେଶ ଦେଇଛି କ୍ରାଇମବ୍ରାଞ୍ଚ ।
ଆଗକୁ ଭୋଡଫୋନ ଭୁବନେଶ୍ୱର ମୁଖ୍ୟ କମର୍ସିଆଲ ମ୍ୟାନେଜର, ବିଏସଏନଏଲର ଢେଙ୍କାନାଳ ଜେନେରାଲ ମ୍ୟାନେଜର ଓ ଜିଓର ଢେଙ୍କାନାଳ ଏରିଆ ମ୍ୟାନେଜରଙ୍କୁ ମଧ୍ୟ ଖୁବଶୀଘ୍ର ଜେରା କରାଯିବ । ଏମାନଙ୍କୁ ନୋଟିସ୍ ଜାରି କରାଯାଇଛି ବୋଲି କହିଛି କ୍ରାଇମବ୍ରାଞ୍ଚ । ପ୍ରି-ଆକ୍ଟିଭେଟ ସିମ୍ ବିକ୍ରି ରୋକିବା ପାଇଁ ଥିବା ଏସଓପି କଡ଼ାକଡି ପାଳନ ହେଉଛି କି ନାହିଁ, ଏ ସମ୍ପର୍କରେ ପଚରାଉଚରା ହେବ ବୋଲି କ୍ରାଇମବ୍ରାଞ୍ଚ ଏଡିଜି କହିଛନ୍ତି ।
