କୋଣାର୍କ: ଏବେ ହାତକୁ ହାତ ନୁହେଁ ଫୋନ ପେ’ରେ ହେଉଛି ଲାଞ୍ଚ କାରବାର । ଏଭଳି ଅଭିଯୋଗ ଆସିଛି ପୁରୀ ଜିଲ୍ଲା ଅସ୍ତରଙ୍ଗ ତହସିଲଦାର କାର୍ଯ୍ୟାଳୟରୁ । ସିସିଟିଭିରେ ଧାରା ପଡ଼ିଯିବା ଭୟରେ ଅସ୍ତରଙ୍ଗ ତହସିଲର ମୁଖ୍ୟ ଭାବରେ କାର୍ଯ୍ୟ କରୁଥିବା ଅଫିସର ପ୍ରଶାନ୍ତ କୁମାର ପାତ୍ର ଫୋନ ପେ’ରେ ଲାଞ୍ଚ ନେଉଥିବା ଅଭିଯୋଗ ଆସିଛି । ଏକ ଭାଇରାଲ ଭିଡିଓରେ ପ୍ରଶାନ୍ତ ଅତିରିକ୍ତ ଜିଲ୍ଲାପାଳ, RIଙ୍କ ନାଁ ନେଇ ସାଧାରଣ ଲୋକଙ୍କୁ ସିଧା ଲାଞ୍ଚ ମାଗୁଛନ୍ତି ।
ସୂଚନା ଅନୁସାରେ ନୂଆଗଡ଼ ଗ୍ରାମର ଅଶୋକ କୁମାର ବାରିକଙ୍କ ପତ୍ନୀ ଭାରତୀ ବାରିକଙ୍କ କୋଭିଡରେ ମୃତ୍ୟୁ ହୋଇଥିଲା । ସରକାରଙ୍କ ଅନୁକମ୍ପା ପାଇବାକୁ ତହସିଲର ଯାଞ୍ଚ ପାଇଁ ଯାଇଥିବା ବେଳେ ତାଙ୍କୁ ସେଠି ପ୍ରଶାନ୍ତ ଅତିରିକ୍ତ ଜିଲ୍ଲାପାଳ, RI ନାଁ କହି ୫୦୦ ଟଙ୍କା ମାଗିଥିଲେ । ଅଶୋକ ଟଙ୍କା ଆଣି ନଥିବା କହିବା ସତ୍ତ୍ୱେ ମଧ୍ୟ ପ୍ରଶାନ୍ତ ବାଧ୍ୟ କରି ଫୋନ ପେ’ରେ ନେଇଥିଲେ । ଯାହା ଭାଇରାଲ ଭିଡିଓରେ ପ୍ରଶାନ୍ତ ଓ ଅଶୋକଙ୍କ ମଧ୍ୟରେ ହୋଇଥିବା ବାର୍ତ୍ତାଳାପରୁ ସ୍ପଷ୍ଟ ହେଉଛି । ପ୍ରଶାନ୍ତ ତାଙ୍କ ଫୋନ ପେ’ ନମ୍ବର ୭୭୩୫୩୯୧୩୦୦ ଦେଇ RI ତପନ ବାବୁଙ୍କୁ ଡକାଯିବ । ମାଇଣ୍ଡ କୁଲ୍ ନ ରହିଲେ ଅତିରିକ୍ତ ଜିଲ୍ଲାପାଳ ଆପତ୍ତି କରିବେ ବୋଲି ଅଶୋକଙ୍କୁ କହୁଛନ୍ତି । ଏମିତି ଅନେକ କଥା କହି ଧମକ ଦେଇ ସାଧାରଣ ଲୋକଙ୍କଠାରୁ ଲାଞ୍ଚ ଆଦାୟ କରିବା ଘଟଣା ଅସ୍ତରଙ୍ଗ ଅଂଚଳରେ ବେଶ ଚର୍ଚ୍ଚାର ବିଷୟ ପାଲଟିଛି ।
