ନୂଆଦିଲ୍ଲୀ: ଆଜି ରାଜ୍ୟସଭାରେ ୭୨ ଜଣ ସଦସ୍ୟ ଅବସର ନେଇଛନ୍ତି । ପି.ଚିଦାମ୍ବରମ, କପିଲ ସିବଲ, ଜୟରାମ ରମେଶ ଓ ଏ.କେ ଆଣ୍ଟୋନୀଙ୍କ ପରି ବରିଷ୍ଠ କଂଗ୍ରେସ ନେତା ଅବସର ନେଇଛନ୍ତି । ବିଜେପିର ସୁବ୍ରମଣ୍ୟମ ସ୍ୱାମୀ ମଧ୍ୟ ଅବସର ନେଇଥିବା ସଦସ୍ୟଙ୍କ ମଧ୍ୟରେ ଅଛନ୍ତି । ଆଜି ସଦସ୍ୟଙ୍କୁ ବିଦାୟ ସମ୍ବର୍ଦ୍ଧନା ଦିଆଯାଇଥିଲା । ସେଥିପାଇଁ ରାଜ୍ୟସଭାରେ ପ୍ରଶ୍ନକାଳ ବାତିଲ କରାଯାଇ ଅବସର ନେଉଥିବା ସଦସ୍ୟଙ୍କୁ ବିଦାୟ ସମ୍ବର୍ଦ୍ଧନା ଆୟୋଜିତ ହୋଇଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହର ନେତା ପୀୟୂଷ ଗୋୟଲ ଓ ଲୋକସଭା ସଦସ୍ୟ ମଲ୍ଲିକାର୍ଜ୍ଜୁନ ଖର୍ଗେ ବିଦାୟ ନେଉଥିବା ସଦସ୍ୟଙ୍କ ଅବଦାନ ସଂପର୍କରେ କହିଥିଲେ ।
ମଲ୍ଲିକାର୍ଜ୍ଜୁନ ଖର୍ଗେ କହିଥିଲେ ଯେ, ‘ରାଜ୍ୟସଭା ଏକ ସ୍ଥାୟୀ ଗୃହ, କିଛି ସଦସ୍ୟ ଅବସର ନେବେ ଏବଂ ଆଉ କିଛି ସଦସ୍ୟ ଆସିବେ । ଏହା ନିରନ୍ତର ଚାଲିବ । ଆମମାନଙ୍କ ମଧ୍ୟରେ ମତଭେଦ ହୋଇପାରେ କିନ୍ତୁ ଆମକୁ ନିଶ୍ଚିତ କରିବାକୁ ପଡିବ ଯେ ଆମେ ଭଲ କାମ କରୁ । ନେହେରୁ ରାଜ୍ୟସଭାକୁ ଶକ୍ତି ଏବଂ ଅନ୍ତରଙ୍ଗତା ଦେଇଥିଲେ । ସେ ରାଜ୍ୟସଭା ସାଂସଦମାନଙ୍କୁ ବିଭିନ୍ନ କମିଟିର ସଦସ୍ୟ କରିଥିଲେ ।
ଅନ୍ୟପଟେ, ରାଜ୍ୟସଭା ସାଂସଦଙ୍କ ବିଦାୟରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ‘ଏହା ହେଉଛି ସ୍ୱାଧୀନତାର ଅମୃତ ମହୋତ୍ସବ । ଆମର ମହାପୁରୁଷମାନେ ଦେଶ ପାଇଁ ବହୁତ କିଛି ଦେଇଛନ୍ତି, ବର୍ତ୍ତମାନ ଦେବା ଦାୟିତ୍ୱ ଆମର । ଏ ସଂସଦରେ ଆମେ ଦୀର୍ଘ ସମୟ ଅତିବାହିତ କରିଛନ୍ତି। ଆମେ ଯେତିକି ଅବଦାନ ଦେଇ ନାହାନ୍ତି, ଆମ ଜୀବନ ପ୍ରତି ଏ ଗୃହର ଅବଦନା ତା’ଠାରୁ ଅଧିକ। ଏ ଗୃହର ସଦସ୍ୟ ଭାବେ ଆପଣମାନେ ହାସଲ କରିଥିବା ଅଭିଜ୍ଞତା ସବୁକୁ ଦେଶର ସବୁ ପ୍ରାନ୍ତରରେ ପ୍ରସାର କରିବା ଆବଶ୍ୟକ।
