ନୂଆଦିଲ୍ଲୀ: ଅଶୋଧିତ ତୈଳ ବଜାରରେ ହା ହା କାର ଦେଖିବାକୁ ମିଳିଛି । ଏବଂ ଏହାର ପ୍ରଭାବ ଘରୋଇ ବଜାରରେ ମଧ୍ୟ ଦେଖିବାକୁ ମିଳିଛି । ଯଦିଓ ବର୍ତ୍ତମାନ ତୈଳ ଦର ସ୍ଥିର ଅଛି କିନ୍ତୁ ଆଗାମୀ ୧୦ ଦିନରେ ୧୨ଟଙ୍କା ପର୍ଯ୍ୟନ୍ତ ବୃଦ୍ଧି ପାଇପାରେ ବୋଲି କୁହାଯାଉଛି । ଯଦି ଆଜି ଅର୍ଥାତ୍ ମାର୍ଚ୍ଚ ୫ କଥା କୁହାଯାଏ ତେବେ ଦେଶରେ ପେଟ୍ରୋଲ ଡିଜେଲ ଦର ସ୍ଥିର ରହିଛି । ବିଧାନସଭା ନିର୍ବାଚନ ପୂର୍ବରୁ ତୈଳ ଦର ବୃଦ୍ଧି ପାଇବା ନେଇ କୌଣସି ସମ୍ଭାବନା ମଧ୍ୟ ନାହିଁ । ଅନ୍ୟପଟେ ଋଷ ୟୁକ୍ରେନ ଯୁଦ୍ଧ ମଧ୍ୟରେ ଅଶୋଧିତ ତୈଳ ଦର ବୃଦ୍ଧି ପାଇଛି ।
ଅଶୋଧିତ ତୈଳ ଦର କ୍ରୟ କରିବାରେ ବ୍ୟାରେଲ ପିଛା ୧୧୭.୩୯ ଡଲାର ହୋଇଯାଇଛି । ଏହି ଦର ୨୦୧୨ ପରେ ପ୍ରଥମଥର ପାଇଁ ସର୍ବାଧିକ ହୋଇଛି । ଯେତେବେଳେ ଗତବର୍ଷ ନଭେମ୍ବରରେ ପେଟ୍ରୋଲ ଡିଜେଲ ଦର ବୃଦ୍ଧି ଉପରେ ରୋଗ ଲାଗିଥିଲା ସେତେବେଳେ ଅଶୋଧିତ ତୈଳ ଦର ବ୍ୟାରେଲ ପିଛା ୮୧.୫ ଡଲାର ଥିଲା ।
ଏଭଳି ପରିସ୍ଥିତିରେ ଖୁଚୁରା ଇନ୍ଧନ ବିକ୍ରେତାମାନେ ମାର୍ଚ୍ଚ ୧୬ ସୁଦ୍ଧା ପେଟ୍ରୋଲ ଏବଂ ଡିଜେଲର ମୂଲ୍ୟ ଲିଟର ପିଛା ୧୨ ଟଙ୍କାରୁ ଅଧିକ ବୃଦ୍ଧି କରିବା ଆବଶ୍ୟକ ପଡ଼ିପାରେ ବୋଲି କୁହାଯାଉଛି । ଆଇସିଆଇସିଆଇ ସିକ୍ୟୁରିଟି ଏକ ରିପୋର୍ଟରେ କହିଛି ଯେ ଗତ ଦୁଇ ମାସ ମଧ୍ୟରେ ଆନ୍ତର୍ଜାତୀୟ ତୈଳ ମୂଲ୍ୟ ବୃଦ୍ଧି ହେତୁ ଖୁଚୁରା ବ୍ୟବସାୟୀମାନେ ଏହାର ମୂଲ୍ୟ ପୁନରୁଦ୍ଧାର ପାଇଁ ମାର୍ଚ୍ଚ ୧୬, ୨୦୨୨ କିମ୍ବା ତା ପୂର୍ବରୁ ଲିଟର ପିଛା ୧୨.୧ବୃଦ୍ଧି କରି ପାରନ୍ତି । ଏଥି ସହିତ, ତୈଳ କମ୍ପାନୀଗୁଡିକର ମାର୍ଜିନକୁ ମିଶାଇଲେ ତୈଳ ଦର ୧୫.୧ ଟଙ୍କା ବୃଦ୍ଧି ହେବାର ଆବଶ୍ୟକତା ରହିବ ବୋଲି କୁହାଯାଉଛି ।
୧୫ ରାଷ୍ଟ୍ର ବିଶିଷ୍ଟ ନିରାପତ୍ତା ପରିଷଦର ଏକ ଜରୁରୀ ବୈଠକରେ ଭାରତର ସ୍ଥାୟୀ ପ୍ରତିନିଧି ଟିଏସ ତିରୁମୂର୍ତ୍ତି କହିଛନ୍ତି ଯେ, ଋଷ-ୟୁକ୍ରେନ ଯୁଦ୍ଧ ପରିସ୍ଥିତିରେ ଆଣବିକ କାରଖାନା ଉପରେ ଆକ୍ରମଣ ଜନଜୀବନ ଲାଗି ଭୟଙ୍କର ବିପଦ ସୃଷ୍ଟି କରିବ । ଏହାର ସୁରକ୍ଷା ଅତି ଜରୁରୀ । ଆଲବାନିଆ, ଫ୍ରାନ୍ସ, ଆୟାର୍ଲାଣ୍ଡ, ନରୱେ , ବ୍ରିଟେନ ଓ ଆମେରିକା ଦ୍ୱାରା ଏହି ବୈଠକ ଆହୂତ ହୋଇଥିଲା । ତେଣେ ଆନ୍ତର୍ଜାତିକ ଆଣବିକ ଶକ୍ତି ସଂସ୍ଥା ବା ଆଇଏଇଏର ମହାନିର୍ଦ୍ଦେଶକ ରାଫେଲ ମାରିଆନୋ ଗ୍ରସି କହିଛନ୍ତି ଯେ, ୟୁକ୍ରେନସ୍ଥିତ ଆଣବିକ କାରଖାନା ଉପରେ ସତର୍କ ଦୃଷ୍ଟି ରଖାଯାଇଛି । ସେ ଚେର୍ଣ୍ଣୋବିଲ ଯାଇ ଏହି ପ୍ରସଙ୍ଗରେ ଋଷ ଓ ୟୁକ୍ରେନ ସହ ଆଲୋଚନା କରିବା ଲାଗି ପ୍ରସ୍ତାବ ଦେଇଛନ୍ତି ।
