ନନ୍ଦିଘୋଷ ବ୍ୟୁରୋ : ଦୁର୍ଦ୍ଦିନରେ ଦେବ ଗୁରୁ । ଦିନ ଥିଲା ମାର୍ଗଶିର ମାସରେ ଦେବଗୁରୁ ସଂପ୍ରଦାୟର ଲୋକେ ଘରକୁ ଘର ବୁଲି ଧାନରେ ତିଆରି ମହାଲକ୍ଷ୍ମୀ ମୂର୍ତ୍ତି ଦେଇ ଦୁଇ ପଇସା ରୋଜଗାର କରୁଥିଲେ । ହେଲେ ଆଧୁନିକ ଯୁଗରେ ସେ ଆଉ ଚାଲୁନି । ଫଳରେ ଦୁର୍ଦ୍ଦିନରେ ଦିନ କାଟୁଛନ୍ତି ଅନେକ ଲୋକେ ।

ଆଧୁନିକତା ଛାପରେ ଆଉ ଶୁଭୁନି କେନ୍ଦେରା ବାଦ୍ୟ । କଳାହାଣ୍ଡି ଜିଲ୍ଲା ଧର୍ମଗଡରେ ଆଉ ଗୁଞ୍ଜରିତ ହେଉନି ଦେବଗୁରୁ ସଂପ୍ରଦାୟ ଲୋକଙ୍କ ଗୁଣୁଗୁଣୁ ଗୀତ । ଦିନ ଥିଲା ଦେବଗୁରୁ ସମ୍ପ୍ରଦାୟର ଲୋକେ କାର୍ତ୍ତିକ ଓ ମାର୍ଗଶିର ଦୁଇ ମାସ ଘରକୁ ଘର ବୁଲୁଥିଲେ । ପ୍ରତି ଘରେ ଧାନରେ ତିଆରି ଲକ୍ଷ୍ମୀ ମୂର୍ତ୍ତି ଦେଇ ଦୁଇ ପଇସା ରୋଜଗାର କରିବା ସହ ଧାନ ସଂଗ୍ରହ କରି ପରିବାର ପ୍ରତିପୋଷଣ କରୁଥିଲେ । ହେଲେ ଏବେ ପଶ୍ଚିମ ଓଡ଼ିଶାରେ ଆଉ ଶୁଭୁନି କେନ୍ଦେରା ବାଦ୍ୟ । ବୁଡ଼ିବାକୁ ବସିଲାଣି ଦେବଗୁରୁ ସଂପ୍ରଦାୟ ଲୋକଙ୍କ କୌଳିକ ବୃତ୍ତି l

ବର୍ତ୍ତମାନ ଯୁଗରେ ରୌପ୍ୟ ବ୍ରୋଞ୍ଜ, କଂସା ଓ ପିତଳ ତିଆରି ସାମଗ୍ରୀ ଜିନିଷର ଚାହିଦା ବଢିଗଲାଣି । ଫଳରେ ଦିନକୁ ଦିନ ଦେବଗୁରୁ ସଂପ୍ରଦାୟ ଲୋକଙ୍କ କୂଳ ବେଉସା ବୁଡିବାକୁ ବସିଲାଣି । ଜାଗା ବାଡି ନ ଥିବା ଏହି ସମ୍ପ୍ରଦାୟ ଲୋକଙ୍କୁ ପୁର୍ବ ସରକାର ସମୟରେ ଘର ଖଣ୍ଡିଏ ଯୋଗାଇ ଦିଆଯାଇଥିଲା । ହେଲେ ଏବକାର ସରକାର ସେମାନଙ୍କ ଦୁଃଖ ବୁଝୁନଥିବା ଅଭିଯୋଗ ହୋଇଛି ।

ନନ୍ଦିଘୋଷ ବ୍ୟୁରୋ : ଆସନ୍ତାକାଲିଠାରୁ ସଂସଦର ଶୀତକାଳୀନ ଅଧିବେଶନ। ଗୃହକୁ ସୁରୁଖୁରୁରେ ଚଳାଇବା ଲାଗି ସର୍ବଦଳୀୟ ବୈଠକରେ ଆଲୋଚନା ହୋଇଛି। ଏହି ଅଧିବେଶନରେ ଅନେକ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା ହେବ। ଡିସେମ୍ବର ୧୯ ଯାଏ ଚାଲିବ ସଂସଦ ଅଧିବେଶନ। ଏହି ଅଧିବେଶନ ବିଭିନ୍ନ ଦୃଷ୍ଟିରୁ ଗୁରୁତ୍ବପୂର୍ଣ୍ଣ ହେବ।  ଏହି ଅଧିବେଶନରେ ୧୫ଟି ସିଟିଂ ବସିବ। ଅଧିବେଶନରେ ପ୍ରାଇଭେଟ ମେମ୍ବର୍ସ ବିଲ୍ ଗୁଡିକ ଡିସେମ୍ବର ୫ ଓ ଡିସେମ୍ବର ୧୯ରେ ଆଗତ ହେବ ବୋଲି ଜଣାଯାଇଛି। ସେପଟେ କମ୍ ଦିନ ଲାଗି ହେଉଥିବା ଅଧିବେଶନକୁ ନେଇ ସମାଲୋଚନା କରିଛନ୍ତି ବିରୋଧୀ। ଏହି ଅଧିବେଶନରେ କିଛି ବିଲ୍ ଆଗତ ହେବ ବୋଲି ସୂଚନା ମିଳିଛି। ଏହା ସହ ଗତ ଅଧିବେଶନ କାଳରେ ଗୃହୀତ ହୋଇ ପାରି ନଥିବା କିଛି ବିଲ୍ ବି ଗୃହରେ ଆଗତ ହେବ। ବିରୋଧୀ ଦଳର ବିରୋଧ ଯୋଗୁ କିଛି ବିଲ୍ ସଂସଦର ଉଭୟ ଗୃହରେ ଗୃହୀତ ହୋଇପାରି ନଥିଲା। ଏହି ଅଧିବେଶନ ଲାଗି ସମ୍ମତି ପ୍ରଦାନ କରିଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ତେଣେ ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବା ଲାଗି ବିରୋଧୀ କରିଛନ୍ତି ରଣନୀତି।..

ଏହି ଅଧିବେଶନରେ ବିଭିନ୍ନ ପ୍ରସଙ୍ଗ ଉଠାଇବ ବିଜେଡି। ଦରବୃଦ୍ଧି, ମୁଦ୍ରାସ୍ଫୀତି, ବେକାରୀ, ଓଡ଼ିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ପ୍ରଦାନ, ଆଇନଶୃଙ୍ଖଳା, ମହିଳା ଓ ଶିଶୁଙ୍କ ବିରୋଧରେ ହେଉଥିବା ହିଂସା ପ୍ରସଙ୍ଗ ଉଠାଇବ ବିଜେଡି। ସେହିପରି ନୂଆପଡ଼ା ଉପନିର୍ବାଚନରେ ହୋଇଥିବା ଅନିୟମିତତା, ପୋଲିସ ଏସଆଇ ପରୀକ୍ଷା ହୋଇଥିବା ଦୁର୍ନୀତି, ପୋଲାଭରମ ଓ ମହାନଦୀ ପ୍ରସଙ୍ଗ, କୋଇଲା ରୟାଲିଟି ଓ ଗ୍ରୀନ ଟାକ୍ସ ଆଦି ପ୍ରସଙ୍ଗରେ ସରକାରଙ୍କୁ ଜବାବ ମାଗିବ ବିଜେଡି। ଏହା ସହ କୃଷକଙ୍କ ଲାଗି ଏମଏସପି, ସମ୍ବଲପୁର, କୋରାପୁଟ, ବାଲେଶ୍ବରରେ ପୂର୍ଣ୍ଣକାଳୀନ ଏମସ୍ ପ୍ରତିଷ୍ଠା, ଆଦିବାସୀ ବିକାଶ, ଜାତୀୟ ରାଜପଥ, ଉପକୂଳ ରାଜପଥ, ରେଳ ସଂଯୋଗ, ମୋବାଇଲ ଟାୱାର ପ୍ରତିଷ୍ଠା ଆଦି ପ୍ରସଙ୍ଗ ବିଜେଡି ଉଠାଇବ।