ଭୁବନେଶ୍ୱର: ଜାନୁଆରୀ ରାଜ୍ୟଗୋଷ୍ଠୀ କ୍ରୀଡ଼ା ପାଇଁ କୁଇନ୍ସ ବ୍ୟାଟନ୍ ଆଜି ଭୁବନେଶ୍ୱରରେ ପହଞ୍ଚିଛି  ।  ହରିହର କୌଶିକ ଏବଂ କାମୋଡ଼ର ରବିକାନ୍ତ ଶ୍ରୀବାସ୍ତବ ଇଣ୍ଡିଆନ ଅଲିମ୍ପିକ୍ସ ଆସୋସିଏସନର 4ଜଣ ସହାୟକ କୁଇନ୍ସ ବ୍ୟାଟନ୍ ସହ ଆଜି ଅପରାହ୍ନରେ ଭୁବନେଶ୍ୱର ବିମାନ ବନ୍ଦରରେ ପହଁଚିଥିଲେ  । କୁଇନ୍ସ ବ୍ୟାଟନ୍ ଭୁବନେଶ୍ୱର ବିମାନ ବନ୍ଦରରେ ପହଂଚିବା ପରେ ଓଡିଶା ହକି ପ୍ରୋତ୍ସାହନ ପରିଷଦର ଅଧକ୍ଷ  ଦିଲୀପ ତିର୍କି, କ୍ରୀଡ଼ା ଓ ଯୁବସେବା ବିଭାଗ ଯୁଗ ଶାସନ ସଚିବ ଶୈଳେନ୍ଦ୍ର କୁମାର ଜେନା, ଭାରତୀୟ ଅଲିମ୍ପିକ୍ ଆସୋସିଏସନ୍ ର କର୍ମକର୍ତ୍ତା ଏବଂ କ୍ରୀଡ଼ା ଓ ଯୁବସେବା ବିଭାଗର ଅଧିକାରୀଗଣ ଉପସ୍ଥିତ ରହି ଭବ୍ୟ ସ୍ୱାଗତ ଜଣାଇଥିଲେ  ।

କୁଇନ୍ସ ବ୍ୟାଟନକୁ ସ୍ୱାଗତ କରିବା ପାଇଁ ଓଡିଶାର ବିଶିଷ୍ଟ କ୍ରୀଡ଼ାବିତ୍ ଅନୁରାଧା ବିଶ୍ୱାଳ ଏବଂ ଶ୍ରଦ୍ଧାଞ୍ଜଳି ସାମନ୍ତରାୟ ମଧ୍ୟ ବିଜୁ ପଟ୍ଟନାୟକ ବିମାନବନ୍ଦରରେ ମଧ୍ୟ ଉପସ୍ଥିତ ଥିଲେ। ଏହି ରିଲେ ବ୍ୟାଟନ୍ ଶୁକ୍ରବାର ରାତିରେ ଭୁବନେଶ୍ୱର ସହରରେ ଅବସ୍ଥାନ କରିବ । ଶନିବାର ଦାୟିତ୍ୱରେ ଥିବା ଅଧିକାରୀଙ୍କ ସହ କୁଇନ୍ସ ବ୍ୟାଟନ୍ ଏକ ସୁସଜ୍ଜିତ ସ୍ୱତନ୍ତ୍ର ଯାନରେ ପୁରୀ ଏବଂ କୋଣାର୍କ ଗସ୍ତ କରିବ । ସେଠାରେ ଜିଲ୍ଲା ପ୍ରଶାସନ ଏବଂ ବିଶିଷ୍ଟ ବ୍ୟକ୍ତିମାନଙ୍କ ଦ୍ୱାରା ବ୍ୟାଟନକୁ ସ୍ୱାଗତ ଓ ଅଭ୍ୟର୍ଥନା ଜଣାଇବାର କାର୍ଯ୍ୟକ୍ରମ ରହିଛି  । ପରେ ଅପରାହ୍ନରେ ବ୍ୟାଟନ ଭୁବନେଶ୍ୱର ଫେରିବା ପରେ ସହର ପରିକ୍ରମା କରିବ । ଏଥିରେ ରାଜ୍ୟର ବିଶିଷ୍ଟ କ୍ରୀଡ଼ାବିତମାନେ ଅଂଶଗ୍ରହଣ କରିବେ।

ଏହା ଆମ ପାଇଁ ଏକ ମହତପୂର୍ଣ୍ଣ ଏବଂ ଐତିହାସିକ ଘଟଣା  । ରାଜ୍ୟଗୋଷ୍ଠୀ କ୍ରୀଡ଼ା 2022 ଆରମ୍ଭ ହେବା ପୂର୍ବରୁ କୁଇନ୍ସ ବ୍ୟାଟନ୍ ଯାତ୍ରାର ଏକ ଅଂଶ ହେବା ଆମ ଓଡିଶା ରାଜ୍ୟ ପାଇଁ ଗର୍ବର ବିଷୟ  । ଏଥିପାଇଁ ସମସ୍ତ ପ୍ରକାର ଆୟୋଜନ କରି ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ବେଶ ଖୁସି ବୋଲି କ୍ରୀଡା ଓ ଯୁବସେବା ମନ୍ତ୍ରୀ ତୁଷାରକାନ୍ତି ବେହେରା ମତବ୍ୟକ୍ତ କରିଛନ୍ତି  । ଏଠାରେ ସୂଚନା ଯୋଗ୍ୟକି କୁଇନ୍ସ ବ୍ୟାଟନ୍ ରିଲେ ହେଉଛି ଏକ ଖେଳ ପରମ୍ପରା ଯାହା ଖେଳ ଆରମ୍ଭ ସମୟରେ ରାଜ୍ୟଗୋଷ୍ଠୀ ସମ୍ପ୍ରଦାୟ ମଧ୍ୟରେ ଭାତୃଭାବ ସୃଷ୍ଟି ସହ ପରିବେଶକୁ ଉତ୍ସବ ମୁଖର କରି ଗଢ଼ିତୋଳେ  ।

ବକିଙ୍ଗହମ୍ ପ୍ୟାଲେସରୁ ଏହି ରିଲେ 07 ଅକ୍ଟୋବର 2021 ରୁ ଆରମ୍ଭ ହୋଇଥିଲା I ଯେଉଁଠାରେ ରାଣୀ ଏଲିଜାବେଥ୍ ଦ୍ୱିତୀୟ କମନ୍ୱେଲଥକୁ ବ୍ୟାଟନ ବାର୍ତ୍ତା ପଠାଇଥିଲେ  । 294 ଦିନଧରି ଚାଲିବାକୁ ଥିବା ଏହି ରିଲେ 72 ଟି ରାଜ୍ୟଗୋଷ୍ଠୀ ଦେଶ ପରିଭ୍ରମଣକରିବ  । 2022 ରାଜ୍ୟଗୋଷ୍ଠୀ କ୍ରୀଡ଼ା କୁଇନ୍ସ ବ୍ୟାଟନ୍ ରିଲେରେ ରାଜ୍ୟ ତଥା କେନ୍ଦ୍ର ସରକାରଙ୍କ ସମସ୍ତ COVID-19 ମାର୍ଗଦର୍ଶିକାକୁ କଡାକଡି ପାଳନକରାଯିବ  । ବ୍ୟାଟନ୍ ଜାନୁଆରୀ 16 ରେ ସିଙ୍ଗାପୁର ଅଭିମୁଖେ ଯାତ୍ରା କରିବ  । ବ୍ୟାଟନ୍ ଜୁଲାଇ 2022 ରେ ଇଂଲଣ୍ଡରେ ପହଞ୍ଚିବ  । ଖେଳଗୁଡିକ ଜୁଲାଇ 28 ରୁ ଅଗଷ୍ଟ 8, 2022 ମଧ୍ୟରେ ହେବ ବୋଲି ଆଶା କରାଯାଉଛି  ।