spot_img
Home Blog Page 5065

କ୍ୟାସଲେସ୍ ହେବ ଜେଲ୍

ଭୁବନେଶ୍ବର: ଝାରପଡା ଜେଲରେ ବନ୍ଦ ହେଲା ନଗଦ ଟଙ୍କା କାରବାର । ଟୋକନ ବଦଳରେ ବ୍ୟବହାର ହେବ ସ୍ମାର୍ଟକାର୍ଡ । ମାସକୁ ଥରେ ରିଚାର୍ଜ କରିବେ ଜେଲ୍ କର୍ତ୍ତୃପକ୍ଷ । ୫ଟି ଅଧୀନରେ ଜେଲ୍ ସଂସ୍କାର ଉପରେ ଗୁରୁତ୍ବ । ଭୁବନେଶ୍ବର ଝାରପଡା ଜେଲରେ ୭୦ ଜଣ ଅନ୍ତେବାସୀଙ୍କୁ ମିଳିଛି ସ୍ମାର୍ଟକାର୍ଡ । ଏହି କାର୍ଡର ବ୍ୟବହାର ଅନ୍ତେବାସୀମାନେ କ୍ୟାଣ୍ଟିନ, ଟେଲିଫୋନ, ଲଣ୍ଡ୍ରୀ ଆଦିରେ କରିପାରିବେ । ମାସକୁ ଥରେ ଜେଲ କର୍ତ୍ତୃପକ୍ଷଙ୍କ ସହାୟତାରେ ଏହାକୁ ରିଚାର୍ଜ କରାଯିବ । କ୍ୟାସଲେସ୍ ଟ୍ରାଞ୍ଜକ୍ସନ ପାଇଁ ଏହା ବେଶ ସହାୟକ ହେବ ଓ ନଗଦ ଟଙ୍କା ଦ୍ୱାରା ଚାଲୁଥିବା ହେରଫେର ରୋକାଯାଇପାରିବ । ସ୍ମାର୍ଟକାର୍ଡ ବ୍ୟବସ୍ଥା ଆଗାମୀ ଦିନରେ ରାଜ୍ୟର ଅନ୍ୟ ଜେଲ ମାନଙ୍କରେ ମଧ୍ୟ ଉପଲବ୍ଧ ହେବ ।

ଅନ୍ୟପଟେ ପରିବାର ଠାରୁ ଦୂରରେ ରହି ହତାଶାରେ କାଳ କାଟୁଥିବା ମହିଳାଙ୍କ ମାନସିକ ସ୍ଥିତିରେ ପରିବର୍ତ୍ତନ ପାଇଁ କାମ କରୁଛି ‘କିରନ’ । ବଛା ବଛା ମନସ୍ତତ୍ତ୍ବବିତଙ୍କ ଦ୍ଵାରା କାଉନସେଲିଂ କରାଯାଉଛି । ନାଚ, ଗୀତ, ପ୍ରବଚନ ଜରିଆରେ ମନୋରଞ୍ଜନର ଖୋରାକ ଯୋଗାଇ ଦିଆଯାଉଛି । ହାତ ତିଆରି ଜିନିଷ ତିଆରି କରିବା ସହ ମହିଳା ଅନ୍ତେବାସୀଙ୍କୁ ସ୍ୱାବଲମ୍ବୀ କରାଯାଉଛି ପ୍ରୟାସ । ଆଇନଗତ ଲଢେଇ ଲଢ଼ିବା ପାଇଁ ଯଦି କେହି ଅସମର୍ଥ ହେଉଛନ୍ତି, ସେମାନଙ୍କର ଆଶା ବାଡ଼ି ସାଜିଛି ମାଧ୍ୟମ ଫାଉଣ୍ଡେସନର ପ୍ରୋଜେକ୍ଟ ‘କିରନ’।

୫ଟି ଅଧୀନରେ ଜେଲ ବିଭାଗ ଆସିବା ଦିନଠାରୁ ଅନ୍ତେବାସୀଙ୍କ ଜୀବନ ଧାରଣରେ ଅନେକ ପରିବର୍ତ୍ତନ ଆସିଥିବା ବେଳେ ଗଠନମୂଳକ କାର୍ଯ୍ୟଗୁଡିକୁ ବିଭିନ୍ନ ମହଲରୁ ସ୍ୱାଗତ କରାଯାଇଛି ।

କୃଷୀ ଆଇନ ପ୍ରତ୍ୟାହାର ପରେ ପ୍ରଣବଙ୍କ ଟାର୍ଗେଟରେ ଧର୍ମେନ୍ଦ୍ର

ଭୁବନେଶ୍ବର: କୃଷି ଆଇନ୍‌ ପ୍ରତ୍ୟାହାରକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ କାଉଣ୍ଟର କରିଛନ୍ତି ବିଜେଡି ବିଧାୟକ ତଥା ସାଂଗଠିକ ସମ୍ପାଦକ ପ୍ରଣବ ପ୍ରକାଶ ଦାସ । ଆନ୍ଦୋଳନ ବେଳେ ଯେଉଁ ୭୫୦ ନୀରିହ ଚାଷୀଙ୍କର ମୃତ୍ୟୁ ହୋଇଛି ତାର ନୈତିକ ଦାୟିତ୍ବ କିଏ ନେବ ବୋଲି ପ୍ରଶ୍ନ କରିଛନ୍ତି ପ୍ରଣବ । ଗୃହ ରାଷ୍ଟ୍ରମନ୍ତ୍ରୀଙ୍କ ପୁଅ ଚାଷୀଙ୍କ ଉପରକୁ ଗାଡ଼ି ଚଢାଇବା ଘଟଣାରେ ପୁଅ ଆଶିଷ ମିଶ୍ରା ଗିରଫ ହୋଇ ଜେଲ୍‌ରେ ଅଛନ୍ତି । ତେଣୁ ଗୃହ ରାଷ୍ଟ୍ରମନ୍ତ୍ରୀଙ୍କୁ ନୈତିକତାର ପାଠ ପଢେଇଲେ ଭଲ ହୁଅନ୍ତା ବୋଲି ପ୍ରଣବ କହିଛନ୍ତି ।

ଗୋଟିଏ ଟ୍ରେନ୍‌ ଦୁର୍ଘଟଣାରେ ନୈତିକତା ଦୃଷ୍ଟିରୁ ପୂଜ୍ୟ ଶାସ୍ତ୍ରୀଜୀ ଇସ୍ତଫା ଦେଇଥିଲେ । ଆପଣଙ୍କ ଶାସନ କାଳରେ ଅନେକ ଥର ଦୁର୍ଘଟଣା ଘଟିଥିଲେ ମଧ୍ୟ କେତେ ମନ୍ତ୍ରୀ ଇସ୍ତଫା ଦେଇଛନ୍ତି ବୋଲି ଧର୍ମେନ୍ଦ୍ରଙ୍କୁ ପ୍ରଶ୍ନ କରିଛନ୍ତି ପ୍ରଣବ । ଏପଟେ ମମିତା ହତ୍ୟା ମାମଲାରେ ମଧ୍ୟ ଧମେନ୍ଦ୍ରଙ୍କୁ କଡାଭାଷାରେ ଚ୍ୟାଲେଞ୍ଜ କରିଛନ୍ତି । ଯଦି ଦମ ଅଛି ପୋଲିସ କିମ୍ବା କୋର୍ଟ ପାଖରେ ପ୍ରମାଣ ଉପସ୍ଥାପନ କର । ଇସ୍ତଫା ଛାଡନ୍ତୁ ମୁଖ୍ୟମନ୍ତ୍ରୀ ଅଭିଯୁକ୍ତଙ୍କୁ ବାନ୍ଧିକି ଜେଲ୍‌ରେ ଭର୍ତ୍ତି କରିବେ ବୋଲି ଟ୍ବିଟ କରି କହିଛନ୍ତି ।

୫୮୦ ବର୍ଷର ଲମ୍ୱା ଚନ୍ଦ୍ର ଗ୍ରହଣ

ସଙ୍ଗଠିତ ହୋଇଛି ଶତାବ୍ଦୀର ଦୀର୍ଘତମ ଆଂଶିକ ଶେଷ ଚନ୍ଦ୍ର ଗ୍ରହଣ । ଚଳିତ ବର୍ଷର ଏହା ଶେଷ ଚନ୍ଦ୍ର ଗ୍ରହଣ ବୋଲି ଜଣାପଡ଼ିଛି । ଯାହା ୫ ଶହ ୮୦ ବର୍ଷ ମଧ୍ୟରେ ସବୁଠାରୁ ଦୀର୍ଘତମ ଚନ୍ଦ୍ର ଗ୍ରହଣ ଭାବେ ଗଣନା କରାଯାଉଛି । ଭାରତୀୟ ସମୟ ଅନୁଯାୟୀ ଦିନ ୧୨ ଟା ୪୮ ମିନିଟ୍ ସମୟରେ ଚନ୍ଦ୍ର ଗ୍ରହଣ ଲାଗିଥିଲା ଏବଂ ୪ ଟା ୧୭ ମିନିଟ୍ ସମୟରେ ଶେଷ ହୋଇଥିଲା । ତେବେ ଏହା ଦିନରେ ଘଟିଥିବାରୁ ଭାରତର କୈାଣସି ସ୍ଥାନରେ ଦୃଶ୍ୟମାନ ହୋଇନାହିଁ । ସନ୍ଧ୍ୟା ସମୟରେ ଉତ୍ତର-ପୂର୍ବ ରାଜ୍ୟଗୁଡ଼ିକରେ ଏହା ପରିଲକ୍ଷିତ ହୋଇଥିବା ଜଣାପଡ଼ିଛି ।

ଚନ୍ଦ୍ର ଗ୍ରହଣ କାହିଁକି ହୋଇଥାଏ ?

ଯେତେବେଳେ ସୂର୍ଯ୍ୟ, ଚନ୍ଦ୍ର, ପୃଥିବୀ ଗୋଟିଏ ସରଳରେଖାରେ ଆସିଥାନ୍ତି ଏବଂ ସୂର୍ଯ୍ୟ ଓ ଚନ୍ଦ୍ର ମଝିରେ ପୃଥିବୀ ଥାଏ । ପୃଥିବୀର ଛାୟା ଚନ୍ଦ୍ର ଉପରେ ପଡ଼ିଥାଏ । ସେତେବେଳେ ଚନ୍ଦ୍ର ଗ୍ରହଣ ଲାଗିଥାଏ । ଆଜି ୨୦୨୧ ବର୍ଷର ଶେଷ ଚନ୍ଦ୍ର ଗ୍ରହଣ । ଯାହା ଭାରତର ଉତ୍ତର-ପୂର୍ବରେ ଥିବା ଅଞ୍ଚଳ ଯଥା : ଅଷ୍ଟ୍ରେଲିଆ, ଆମେରିକାର ଦକ୍ଷିଣ ଅଞ୍ଚଳ ଆଲାସ୍କା ଏହି ସବୁ ସ୍ଥାନରେ ଆଂଶିକ ଚନ୍ଦ୍ର ଗ୍ରହଣ ଦୃଶ୍ୟମାନ ହୋଇଛି । ଭାରତରେ ଏହା ଦୃଶ୍ୟମାନ ହେଉନଥିବାରୁ ଜ୍ୟୋତିଶ ଶାସ୍ତ୍ରରେ ଏହା ପାଳନୀୟ ନୁହେଁ । ନା ଦେବନୀତି ବନ୍ଦ ହୋଇଛି ନା ପାକତ୍ୟାଗ କରାଯାଇଛି । ତେବେ ଗ୍ରହଣ ଥିବାରୁ ଗରିଷ୍ଠ ଆହାର ନ ଖାଇବାକୁ ଜ୍ୟୋତିର୍ବିତମାନେ ପରାମର୍ଶ ଦେଇଛନ୍ତି ।

କୃଷୀ ଆଇନ ପ୍ରତ୍ୟାହାର ଚାଷୀଙ୍କ ବିଜୟ: ବିଜେଡି

ଭୁବନେଶ୍ବର: ତିନି କୃଷି ଆଇନକୁ ସଂସଦର ଉଭୟ ଗୃହରେ ବିଜେଡି ସବୁବେଳେ ବିରୋଧ କରିଛି । ଉଭୟ ଲୋକସଭା ଓ ରାଜ୍ୟସଭାରେ ଆଇନ୍‌ରେ ବ୍ୟାପକ ତ୍ରୁଟି ଥିବା ଯୁକ୍ତି ରଖିଥିଲା ବିଜେଡି  । ଅଧିକ ଆଲୋଚନା ଏବଂ ବିଚାର ବିମର୍ଶ ପାଇଁ ବିଲ୍‌କୁ ସିଲେକ୍ଟ କମିଟି ପାଖକୁ ପଠାଇବା ପାଇଁ ଦାବି କରିଥିଲେ ବିଜେଡି ସାଂସଦ । ଏଥିସହ ଚାଷୀଙ୍କ ହିତରେ ସବୁବେଳେ ବିଜେଡି, ସଂସଦ ଏବଂ ସଂସଦ ବାହାରେ ସ୍ବର ଉତ୍ତୋଳନ କରିଛି । ଯାହାକୁ ଆଜି ପର୍ଯ୍ୟନ୍ତ କେନ୍ଦ୍ର ସରକାର କର୍ଣ୍ଣପାତ କରିନାହାନ୍ତି ।

ବିଜେପିର ନିର୍ବାଚନୀ ପ୍ରତିଶ୍ରୁତି ମୁତାବକ ଏମଏସ୍‌ପିକୁ ଦେଢ ଗୁଣା ବୃଦ୍ଧି କରିବାକୁ ବିଜେଡିର ସାଂସଦମାନେ ସଂସଦର ଉଭୟ ଗୃହରେ ସବୁବେଳେ ଦାବି କରିଛନ୍ତି ।  ଧାନର ଏମଏସ୍‌ପି କୁଇଣ୍ଟାଲ ପିଛା ୨ହଜାର୯୩୦ ଟଙ୍କା କରିବାକୁ ବିଜେଡି  ଦାବି କରି ଆସିଛି । ଏହି ପ୍ରସ୍ତାବକୁ ବିଧାନସଭାରେ ରାଜ୍ୟ ସରକାର ସର୍ବସମ୍ମତ ପ୍ରସ୍ତାବ ପାରିତ କରିଛନ୍ତି । ଯାହାକୁ ବିଜେପି ବିଧାୟକମାନେ ମଧ୍ୟ ସମର୍ଥନ କରିଥିଲେ ।

ଚାଷୀଙ୍କ ହିତରେ ସବୁବେଳେ ସ୍ବର ଉଠାଉଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏନେଇ କେନ୍ଦ୍ରକୁ ବାରମ୍ବାର ଚିଠି ଲେଖିଛନ୍ତି ।  ଚାଷୀଙ୍କ ସ୍ବାର୍ଥ ଦୃଷ୍ଟିରୁ ସ୍ବାମିନାଥନ କମିଶନ ରିପୋର୍ଟକୁ ଲାଗୁ କରିବାକୁ ମୁଖ୍ୟମନ୍ତ୍ରୀ ଦାବି କରିଥିଲେ । ରାଜ୍ୟରେ ଧାନ ଫସଲ ପ୍ରଚୁର ମାତ୍ରାରେ ହେଉଥିବା ବେଳେ କେନ୍ଦ୍ରର ବୈମାତୃକ ମନୋଭାବ ପାଇଁ ରାଜ୍ୟର ଚାଷୀ ସବୁବେଳେ ହଇରାଣ ହୋଇଛନ୍ତି ।  ଏଫସିଆଇ ମଧ୍ୟ ରାଜ୍ୟର ବଳକା ଉଷୁନା ଚାଉଳ ଉଠାଇବ ନାହିଁ ବୋଲି ସିଧାସିଧା କହିଦେଇଥିଲା । ଏଥିପାଇଁ ଅନେକ ଚାଷୀ ବ୍ୟାପକ ମାତ୍ରାରେ ପ୍ରଭାବିତ ହୋଇଥିଲେ । ଏଫସିଆଇର ଏଭଳି ବୈମାତୃକ ମନୋଭାବ ପାଇଁ ଚାଷୀ ହଇରାଣ ହୋଇଛନ୍ତି । ଚାଷୀଙ୍କ ସ୍ବାର୍ଥ ଦୃଷ୍ଟିରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ରକୁ ବାରମ୍ବାର ଚିଠି ଲେଖି ଚାଷୀଙ୍କ ସମସ୍ୟା ଉଠାଇଛନ୍ତି । ହେଲେ ଆଜି କୃଷି ଆଇନ ପ୍ରତ୍ୟାହାର ଘୋଷଣା ହେବା ପରେ ଏହା କୌଣସି ରାଜ୍ୟନୈତିକ ବିଜୟ ନୁହେଁ ବରଂ ଚାଷୀଙ୍କର ବିଜୟ ବୋଲି କହିଛି ଶାସକ ବିଜେଡି ।

ମୁଣ୍ଡ ନୁଆଁଇବାକୁ ବାଧ୍ୟ ହେଲେ କେନ୍ଦ୍ର ସରକାର

ଭୁବନେଶ୍ବର: ଶହ ଶହ ଚାଷୀଙ୍କ ବଳିଦାନ । ଆରବ ଆରବ ଅର୍ଥନୈତିକ କ୍ଷତି । ଗର୍ଜ୍ଜନରୁ ଘେରାବନ୍ଦୀ, ବର୍ଷର୍ରୁ ଅଧିକ ସମୟ ଆନ୍ଦୋଳନ । ହାର ମାନିଲେନି ଚାଷୀ । ନଇଁବାକୁ ବାଧ୍ୟ ହେଲେ କେନ୍ଦ୍ର ସରକାର । ତିନି କୃଷି ଆଇନ ପ୍ରତ୍ୟାହାର ନେଇ ଅଚାନକ ଘୋଷଣା କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ପ୍ରଧାନମନ୍ତ୍ରୀଙ୍କ ଘୋଷଣା ସହ ଦେଶର କୋଣ ଅଣୁକୋଣରେ ଆରମ୍ଭ ହୋଇ ଯାଇଥିଲା ଉତ୍ସବର ମାହୋଲ । କିଏ ନାଚୁଥିଲା ତ କିଏ ଖଉସିରେ ଆତ୍ମହରା ହୋଇଯାଉଥିଲେ । ଏହା ପରେ ବି ସରକାରଙ୍କ ଉପରେ ଭରସା କରିପାରରୁନି ସଂଯୁକ୍ତ କିଷାନ ମୋର୍ଚ୍ଚା  । ଆଇନ ପ୍ରତ୍ୟାହାର ଘୋଷଣା ପରେ ବି ଘମାସାନ ଜାରି ରହିବ ବୋଲି କହିଛନ୍ତି ସଂଗଠନର ପ୍ରମୁଖ ନେତା । ଚେତାବନୀ ଦେଇଛନ୍ତି, ଯେଉଁଦିନ କୃଷି ଆଇନ ପ୍ରତ୍ୟାହାର ପ୍ରକ୍ରିୟା ଆରମ୍ଭ ହେବ ସେହିଦିନ ଆନ୍ଦୋଳନ ପ୍ରତ୍ୟାହାର ହେବ । ମୋର୍ଚ୍ଚା କେବଳ ଆଇନ ପ୍ରତ୍ୟାହାର ନୁହେଁ ବରଂ ଏମଏସପିର ଆଇନଗତ ମାନ୍ୟତା ପାଇଁ ଆନ୍ଦୋଳନ କରୁଥିଲା ବୋଲି ପ୍ରଧାନମନ୍ତ୍ରୀଙ୍କୁ ମନେ ପକାଇ ଦେଇଛନ୍ତି ଚାଷୀ ନେତା ରାକେଶ ଟିକାୟତ ।

ସୀମା ଜାମ, ଭୋଟ ଚୋଟ, ଗାଁକୁ ନୋ ଏଣ୍ଟ୍ରି, ନେତାଙ୍କୁ ଘେରାବନ୍ଦୀ । କୃଷି ଆନ୍ଦୋଳନର ଏ ଥିଲା ରଣନୀତି । ବହୁ ସଂଘର୍ଷ ପରେ ଏପରି ନିଷ୍ପତ୍ତିରେ ସାରା ଦେଶରେ ଖୁସିର ମାହୋଲ । ଗାଜିପୁର, ଦିଲ୍ଲୀ, ହରିୟାଣା, ପଞ୍ଜାବ, ଉତ୍ତରପ୍ରଦେଶ ସବୁଠି ଉତ୍ସବ ମନାଇଛନ୍ତି ଚାଷୀ ସଂଗଠନ । ବାଜା ବଜାଇ ବାଣ ଫୁଟାଇ ନିଜ ବିଜୟକୁ ସେଲିବ୍ରେଟ କରିଛନ୍ତି କୃଷକ ସଂଗଠନ । ସେପଟେ ସରାକାରଙ୍କ ଅହଂକାରର ପତନ ଦେଖି ଆକ୍ରମଣ ମୋଡରେ ବିରୋଧୀ । ଚାଷୀଙ୍କ ଜିଦ୍‌ ଆଗରେ ସରକାରଙ୍କ ଅହଂକାର ଚୂର୍ଣ୍ଣ ହୋଇଛି ବୋଲି କହିଛନ୍ତି ବିରୋଧୀ । କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ଠାରୁ ଆରମ୍ଭ କରି ଟିଏମସି, ଏନସିପି, ଆରଜେଡିର ପ୍ରମୁଖ ନେତା ସରକାରଙ୍କୁ କଡ଼ା ଭାଷାରେ କଟାକ୍ଷ କରି ସରକାର ନିର୍ବାଚନ ହାରିବା ଭୟରେ ଆଇନ ପ୍ରତ୍ୟାହାର କରିଥିବା କହିଛନ୍ତି ।

ଜ୍ୟ ବିଜେପି କୃଷି ଆଇନ ପ୍ରତ୍ୟାହାର ନିଷ୍ପତ୍ତିକୁ ଭିନ୍ନ ଢଙ୍ଗରେ ସ୍ବାଗତ କରିଛି । କୃଷି ଆଇନକୁ ଠିକ୍‌ ଭାବେ ବୁଝି ନାହାଁନ୍ତି ବୋଲି କହିଛନ୍ତି ବିରୋଧୀ ଦଳ ଉପନେତା ବିଷ୍ଣୁ ସେଠୀ । କେବଳ ସେତିକି ନୁହେଁ ପ୍ରତ୍ୟାହାର ପଛର ରହସ୍ୟକୁ ଖୋଲି ଦେଇଛନ୍ତି ବିଷ୍ଣୁ । କହିଛନ୍ତି ଭୋଟ୍ ପାଇଁ ସବୁ ନାଟ । ସେପଟେ ସିପିଆଇ ଦାବି କରିଛି,  ଏମଏସଏପିକୁ ଆଇନ ପରିସରଭୁକ୍ତ କରିବା ସହ ଶ୍ରମ ଓ ବିଦ୍ୟୁତ ଆଇନ ବି କେନ୍ଦ୍ର ପ୍ରତ୍ୟାହାର କରୁ । ଏକାଠି ହେଲେ ନଛୋଡବନ୍ଧା ସରକାରଙ୍କଠାରୁ ଦାବି ହାସଲ କରିହେବ ବୋଲି କହିଛି ସିପିଆଇଏମ ।

ଭାଙ୍ଗିଲା କେନ୍ଦ୍ର ସରକାରଙ୍କ ଅହଂକାର, ଜିତିଲା ଚାଷୀଙ୍କ ଲହୁଲୁହର ବିଦ୍ରୋହ

ଭୁବନେଶ୍ବର: ଚାଷୀଙ୍କ ବିଦ୍ରୋହରେ ଚୂରମାର ହୋଇଗଲା କେନ୍ଦ୍ର ସରକାରଙ୍କ ଅହଂକାର । ବିଜୟ ହେଲା ଲହୁଳୁହର । ନରମିଲା କେନ୍ଦ୍ର । ଚାଷୀଙ୍କ ଜିଦ୍‌ ଆଗରେ ହାର ମାନିଲା ସରକାରଙ୍କ ଅହଙ୍କାର । ୩ଟି ଯାକ କୃଷି ଆଇନ୍‌ ପ୍ରତ୍ୟାହାର କରିବାକୁ ନିଷ୍ପତ୍ତି ନେଲେ ପ୍ରଧାନମନ୍ତ୍ରୀ । ଶୀତ ଅଧିବେଶନରେ ଆରମ୍ଭ ହେବ ପ୍ରକ୍ରିୟା । ତେବେ ଉତ୍ତର ପ୍ରଦେଶ ଓ ପଞ୍ଜାବ ବିଧାନସଭା ନିର୍ବାଚନରେ ପରାଜୟର ଭୟ ବିଜେପିକୁ ଏତେ ମାତ୍ରାରେ ଘାରିଛି ଯେ, ଏନେଇଛନ୍ତି ଏମିତି ବଡ଼ ନିଷ୍ପତ୍ତି । ଲଖିମପୁର-ଖେରୀ ମାମଲା ମଧ୍ୟ ଉଭୟ କେନ୍ଦ୍ର ଓ ରାଜ୍ୟର ନିଦ ହଜାଇଛି । ସୁପ୍ରିମକୋର୍ଟଙ୍କ ତାଗିଦ ପାଇଁ ବାରମ୍ବାର ରାଜ୍ୟ ସରକାରଙ୍କୁ ନିନ୍ଦିତ ହେବାକୁ ପଡିଛି । ଚାଷୀଙ୍କ ଆନ୍ଦୋଳନ ଜାରି ରହିଲେ ଶହେରୁ ଅଧିକ ଆସନ ହରାଇ ପାରେ ବିଜେପି । ସେହି ଭୟରେ କଲେ ବିବାଦୀ କୃଷୀ ଆାଇନ ପ୍ରତ୍ୟାହାର ।

ପ୍ରଧାନମନ୍ତ୍ରୀଙ୍କ ଘୋଷଣା ସହ ଅନ୍ନଦାତାଙ୍କ ହୋଇଛି ଐତିହାସିକ ବିଜୟ । ଚାଷୀଙ୍କ ଜିଦ୍‌ ଆଗରେ ହାର ମାନିଲେ କେନ୍ଦ୍ର ସରକାର । ତରିବରିଆ ନିଷ୍ପତ୍ତି ନେଇ ଦେଲେ ପଛଘୁଞ୍ଚା । କୃଷି ଆଇନକୁ ପ୍ରତ୍ୟାହାର କରି ବ୍ୟାକ୍‌ଫୁଟ୍‌ ବିଜେପି ସରକାର ।

କିଛି ରାଜ୍ୟରେ ବିଧାନସଭା ନିର୍ବାଚନ ପୂର୍ବରୁ ଏଭଳି ନିଷ୍ପତ୍ତି ବିରୋଧୀଙ୍କୁ ବି ଚମକାଇ ଦେଇଛି । ଗୁରୁ ପରବ ଅବସରରେ ନିଜ ସମ୍ବୋଧନରେ କଳା କୃଷି ଆଇନ୍‌ ପ୍ରତ୍ୟାହାର କରିବା ନେଇ ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଚାଷୀଙ୍କ ଦୁଃଖ ତାଙ୍କୁ ଦେଖାଯାଉନି ବୋଲି କହିଛନ୍ତି । ଆନ୍ଦୋଳନ ବନ୍ଦ କରି ଚାଷୀ ଏବେ ନିଜ ନିଜ ଘରକୁ ଫେରିବାକୁ ନିବେଦନ କରିଛନ୍ତି  । ଆସନ୍ତା ଶୀତକାଳିନ ଅଧିବେଶନରେ ଆଇନ୍‌କୁ ସମ୍ପୂର୍ଣ୍ଣ ପ୍ରତ୍ୟାହାର କରିବା ପାଇଁ ପ୍ରକ୍ରିୟା ଆରମ୍ଭ କରିବେ ବୋଲି ପ୍ରତିଶ୍ରୁତି ଦେବା ସହ ମଣ୍ଡି ସମସ୍ୟାର ସମାଧାନ ହେବ ବୋଲି କହିଛନ୍ତି । ଦେଶରେ ମଣ୍ଡି ସଂଖ୍ୟା ବଢିବା ସହ ଏମଏସପି ମଧ୍ୟ ବଢିଛି ବୋଲି କହିଛନ୍ତି ।

ନବୀନଙ୍କ ସ୍ବାଗତ

୩ କୃଷି ଆଇନ ପ୍ରତ୍ୟାହାର ପରେ ଟ୍ବିଟ୍ କରି ପ୍ରଧାନମନ୍ତ୍ରୀଙ୍କ ନିଷ୍ପତ୍ତିର ସ୍ବାଗତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦେଶ ତଥା ଚାଷୀର ସ୍ବାର୍ଥ ଦୃଷ୍ଟିରୁ ନିଷ୍ପତ୍ତି ନିଆଯାଇଛି । ଯାହା ଏକ ସ୍ବାଗତ ଯୋଗ୍ୟ ପଦକ୍ଷେପ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଚାଷୀଙ୍କ ପରିବାର ଓ ଚାଷ ଜମି ତାଙ୍କୁ ଅପେକ୍ଷା କରିଛି । ଘରକୁ ଫେରିଲେ ସେମାନେ ସ୍ବାଗତ କରିବେ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଚାଷୀଙ୍କ ସ୍ବାର୍ଥକୁ ବିଜେଡି ସବୁବେଳେ ସମର୍ଥନ କରିଆସିଛି ବୋଲି ଟ୍ବିଟରେ ଉଲ୍ଲେଖ କରିଛନ୍ତି ନବୀନ ।

କୃଷୀ ଆଇନ ପ୍ରତ୍ୟାହାର ପଛର ଅସଲ ସତ

କାହିଁକି ପଛଘୁଞ୍ଚା ଦେଲେ କେନ୍ଦ୍ର ସରକାର ? ଆନ୍ଦୋଳନ ବେଳେ ୭୦୦ରୁ ଅଧିକ ଚାଷୀଙ୍କ ମୃତ୍ୟୁ ହୋଇଥିବା ବେଳେ ଆହା ପଦେ କହିନଥିଲେ ପ୍ରଧାନମନ୍ତ୍ରୀ । ଚାଷୀଙ୍କ ଉପରକୁ ଗାଡ଼ି ଚଢା ଯାଇଥିଲେ ମଧ୍ୟ ପ୍ରତିକ୍ରିୟା ଦେବାକୁ ପସନ୍ଦ କରିନଥିଲେ । ବିବାଦରେ ଛନ୍ଦି ହୋଇଥିବା କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରାଙ୍କୁ ନିଜ ମନ୍ତ୍ରିମଣ୍ଡଳରୁ ହଟାଇନଥିଲେ । ହେଲେ ହଠାତ କାହିଁକି ଏହି ନିଷ୍ପତ୍ତି ଆସନ୍ତୁ ନଜର ପକାଇବା ।

ପ୍ରଥମତଃ ୧୧ ମାସରୁ ଅଧିକ ଦିନ ହୋଇଗଲାଣି ଚାଷୀ କୃଷି ଆଇନକୁ ନେଇ ଆନ୍ଦୋଳନ ଜାରି ରଖିଛନ୍ତି  । ଚାଷୀ ରାଜରାସ୍ତାରେ ପଡି ରହି ଆନ୍ଦୋଳନ ଜାରି ରଖିଛନ୍ତି । ୩୦ରୁ ଅଧିକ ଥର ସରକାର ଓ ଚାଷୀଙ୍କ ମଧ୍ୟ ଆଲୋଚନା ବିଫଳ ହୋଇଛି । ତଥାପି ସରକାର ନିଜେ ବୁଝିଥିଲେ ନା ଚାଷୀଙ୍କୁ ବୁଝାଇ ପାରିଥିଲେ । ଶେଷରେ ହାର ମାନିଲେ । ଯେଉଁ କୃଷି ଅର୍ଥଶାସ୍ତ୍ରୀଙ୍କ ପରାମର୍ଶ ମାନି ଏଭଳି କରିଛନ୍ତି ବୋଲି କହୁଛନ୍ତି ପ୍ରଧାନମନ୍ତ୍ରୀ । ହେଲଷ ସେମାନଙ୍କ କଥା ଆଜି ପର୍ଯ୍ୟନ୍ତ କାହିଁକି ଶୁଣୁନଥିଲେ ବୋଲି ପ୍ରଶ୍ନ ଉଠିଛି ।

ଦ୍ବିତୀୟ କାରଣ ସବୁଠୁ ଗୁରୁତ୍ବପୂର୍ଣ୍ଣ । ଆସନ୍ତାବର୍ଷ କିଛି ରାଜ୍ୟରେ ବିଧାନସଭା ନିର୍ବାଚନ ହେବ । ଉତ୍ତରପ୍ରଦେଶ ଓ ପଞ୍ଜାବରେ ନିଜ ସରକାରକୁ ବଞ୍ଚାଇକୁ ଏହା ବଡ଼ କସ୍‌ରତ୍‌  । ନିଜର ମାନ ସମ୍ମାନ ପଛେ ଯାଉ, ରାଜ୍ୟରେ ସରକାର ବଞ୍ଚିରହୁ । ଏହି ଦୁଇ ରାଜ୍ୟରୁ ସବୁଠୁ ଅଧିକ ଚାଷୀ ଏହି କୃଷି ଆଇନ୍‌କୁ ବିରୋଧ କରୁଛନ୍ତି । ସେମାନଙ୍କ ଅସନ୍ତୁଷ୍ଟ ହେବାର କାରଣ ବିଜେପି ସରକାର ଏହି ଦୁଇ ରାଜ୍ୟରେ ନିଜର ଚିହ୍ନବର୍ଣ୍ଣ ମଧ୍ୟ ହରାଇବା ସୁନିଶ୍ଚିତ ।

ଆଇନଗତ ପଦକ୍ଷେପ ମଧ୍ୟ କେନ୍ଦ୍ରର ନିଦ ହଜେଇ ଦେଇଛି । କୃଷି ଆଇନ୍‌ ଆସନ୍ତା ୬ ମାସ ପର୍ଯ୍ୟନ୍ତ ଲାଗୁ ହୋଇପାରିବ ନାହିଁ ବୋଲି ସୁପ୍ରିମକୋର୍ଟ ଗତ ଜାନୁଆରୀ ମାସରେ ନିର୍ଦ୍ଦେଶ ଦେଇଥିଲେ । ଏଥିପାଇଁ ୩ ଜଣିଆ କମିଟି ମଧ୍ୟ ଗଠନ କରିଥିଲେ । ଗତ ମାର୍ଚ୍ଚରେ ଏହି କମିଟି କୋର୍ଟରେ ରିପୋର୍ଟ ଦାଖଲ କରିଥିଲେ । ହେଲେ ଆଜି ସୁଦ୍ଧା ରିପୋର୍ଟରେ କ’ଣ ରହିଛି ତାହା ସାର୍ବଜନୀନ ହୋଇପାରିନାହିଁ । ଏବେ ବି ଏହି ମାମଲା ବିଚାରଧୀନ ଅଛି । ଯଦି ସୁପ୍ରିମକୋର୍ଟ ଚାଷୀଙ୍କ ସମର୍ଥନ ରାୟ ଦିଅନ୍ତି, ତାହେଲେ ଶୁଖିଲାରେ କେନ୍ଦ୍ର ସରକାରଙ୍କୁ ଅପମାନ ସହିବାକୁ ପଡିଥାନ୍ତା ।

ଲଖିମପୁର-ଖେରୀ ମାମଲା କେନ୍ଦ୍ର ପାଇଁ ଟର୍ଣ୍ଣିଂ ପଏଣ୍ଟ ପାଲଟିଥିଲା । ୩ ଅକ୍ଟୋବରେ ହୋଇଥିବା ହିଂସା ଯୋଗୁଁ ଚାଷୀଙ୍କ ସମେତ ୮ ଜଣଙ୍କର ମୃତ୍ୟୁ ହୋଇଥିଲା । ଏଥିରେ କେନ୍ଦ୍ରମନ୍ତ୍ରୀଙ୍କ ପୁଅ ଆଶିଷ ମିଶ୍ରାଙ୍କ ସମ୍ପୃକ୍ତି, ବିଜେପିକୁ ପଛଘଚଞ୍ଚା ଦେବାକୁ ବାଧ୍ୟ କରିଥିଲା । ଘଟଣାରେ ପୂରା ପ୍ରକରଣ କେନ୍ଦ୍ର ସରକାରଙ୍କ ବିପକ୍ଷରେ ଯାଇଥିଲା । ମାମଲାକୁ ନେଇ ରାଜ୍ୟ ସରକାରଙ୍କୁ ସୁପ୍ରିମକୋର୍ଟଙ୍କ ଭର୍ସନା, ୟୁପିରେ ବିଜେପି ସରକାରର ସ୍ଥିତି ଟଳମଳ କରିଥିଲା । ଯେତେ ଯୋଜନା ଘୋଷଣା କଲେ ମଧ୍ୟ କିଛି ଫରକ ପଡିନଥିଲା ।

ଧୋନିଙ୍କ ପାଇଁ ୧୪୩୬ କି.ମି ପଦଯାତ୍ରା

0

ଝାଡ଼ଖଣ୍ଡ : କ୍ରିକେଟ ଜଗତର ଅଧିନାୟକ ମହେନ୍ଦ୍ର ସିଂ ଧୋନିଙ୍କର ଦେଶରେ କୋଟିଏ ଫ୍ୟାନ୍ସ । ମାତ୍ର ଧୋନିଙ୍କ ପ୍ରତି ଏତେ ଭଲପାଇବା ଦେଖି କିଛି ଏମିତି ଫ୍ୟାନ୍ସଙ୍କ ଫ୍ୟାନ ପାଲଟିଛନ୍ତି ନିଜେ ଧୋନି । ଆମେ କହୁଛୁ ହରିୟାଣାରୁ ଆସିଥିବା ଧୋନିଙ୍କର ଜଣେ ବଡ଼ ପ୍ରଶଂସକଙ୍କ କଥା । ଯିଏ ଧୋନିଙ୍କୁ ନିଜ ଭଗବାନ ମାନନ୍ତି । ଧୋନିଙ୍କ ସହ  କେବଳ ଦେଖା କରିବାକୁ ନିଜ ଗାଁରୁ ଚାଲି ଚାଲି ଆସିଛନ୍ତି । ସେ ପୁଣି ଶହେ କି ଦୁଇଶହ ନୁହେଁ ପୁରା ୧ ହଜାର ୪ ଶହ ୩୬ କିଲୋମିଟର । ଦୀର୍ଘ ୧୮ ଦିନ ପଦଯାତ୍ରା ପରେ ସେ ଧୋନିଙ୍କ ପାଖରେ ପହଁଞ୍ଚିଥିଲେ । ଏହି ବ୍ୟକ୍ତି ଜଣକ ହେଉଛନ୍ତି ଅଜୟ ଗିଲ୍ । ଯେ କି ହରିୟାଣାରୁ ରାଞ୍ଚି ଚାଲି ଚାଲି ଆସିଛନ୍ତି । କେବଳ ଏତିକି ନୁହେଁ ଧୋନିଙ୍କ ପ୍ରତି ନିଜ ଭଲପାଇବା ଜାହିର କରି ସେ ଧୋନିଙ୍କୁ ଆଇ ଲଭ ୟୁ ମଧ୍ୟ କହିଥିଲେ ।

୧୮ ବର୍ଷୀୟ ଅଜୟ ହରିୟାଣା ଜିଲ୍ଲାର ଜଲାନ ଖେଡ଼ାର ବାସିନ୍ଦା । ଧୋନିଙ୍କର ବହୁତ ବଡ଼ ଫ୍ୟାନ୍ସ ନାମରେ ସାରା ଦେଶରେ ପ୍ରସିଦ୍ଧ । ତିନି ମାସରେ ଦ୍ୱିତୀୟ ଥର ପାଇଁ ସେ ପଦଯାତ୍ରା କରି ଧୋନିଙ୍କୁ ଭେଟିଛନ୍ତି । ଗତ ଥର ୧୬ ଦିନରେ ସେ ୧୪୩୬ କିଲୋମିଟରର ପଦଯାତ୍ରା କରିଥିଲେ । ମାତ୍ର ଏଥର ତାଙ୍କୁ ୧୮ ଦିନରେ ଲାଗିଛି । ଧୋନିଙ୍କ ସହ ଭେଟ ହେବା ପରେ ଅଜୟ ଧୋନିଙ୍କ ସହ ତାଙ୍କ ଫାର୍ମ ହାଉସ ଯାଇଥିଲେ ଏଥିସହ ଅଜୟଙ୍କ ସହ ଧୋନି ସେଲ୍ଫି ଉଠାଇଥିଲେ ।

ନିୟନ୍ତ୍ରଣ ବାହାରେ ଅସାମାଜିକ ବ୍ୟକ୍ତି, ସିସିଟିଭି ଲଗାଇବାକୁ ଦାବି

ବୌଦ୍ଧ: ବେଫିକର ଅପରାଧୀ । ବିନା ବାଧାରେ ବୁଲୁଛନ୍ତି, ଲୁଟୁଛନ୍ତି । ଦିନକୁ ଦିନ ବଢିବାରେ ଲାଗିଛି ଚୋରି, ଡକାୟତି । ଅପରାଧୀଙ୍କୁ ନିୟନ୍ତ୍ରଣ କରିବାରେ ପୋଲିସ ବିଫଳ । ଏ ହେଉଛି ବୌଦ୍ଧର ସ୍ଥିତି । ଏଠି ଦିନରେ ବି କୌଣସି ସ୍ଥାନକୁ ଯିବାକୁ ଉଚିତ ମଣୁନାହାନ୍ତି ଲୋକେ । କେତେବେଳେ କେଉଁଠି ଲୁଟେରାଙ୍କ ହାବୁଡ଼ରେ ପଡ଼ିଯିବେ ରହୁଛି ଭୟ । ଏମିତି ସ୍ଥିତିରେ ପାଟ୍ରୋଲିଂ ବ୍ୟବସ୍ଥା କଡ଼ାକଡ଼ି କରିବା ସହ ସହରରେ ସିସିଟିଭି ଲଗାିବାକୁ ହେଉଛି ଦାବି ।

ଲକଡାଉନ୍ ପରେ ସକ୍ରିୟ ଅପରାଧୀ । ବାଇକ ଚୋରି ସହିତ ଡିକି ଭାଙ୍ଗି ଟଙ୍କା ଲୁଟ । ରାତି ଅଧରେ ରାଜରାସ୍ତାରେ ଲୁଟ୍ ଏବଂ ଗଞ୍ଜେଇ ଚାଲାଣ ଭଳି ଅନେକ ଅପରାଧ ବଢିବାରେ ଲାଗିଛି । ବର୍ଷକ ମଧ୍ୟରେ ୨୦ରୁ ଅଧିକ ବାଇକ୍ ଚୋରି ହୋଇଥିବା ଅଭିଯୋଗ ହୋଇଛି । ମାତ୍ର ଅପରାଧୀଙ୍କୁ ଧରିବାରେ ପୋଲିସ ବିଫଳ । ଏମିତି ସ୍ଥିତିରେ ସହରରେ ସିସିଟିଭି ଲଗାଇବାକୁ ସାଧାରଣରେ ଦାବି ହେଉଛି । ଲୋକଙ୍କ ଦାବିକୁ ନଜରରେ ରଖି ମୁଖ୍ୟ ଟ୍ରାଫିକ ପୋଷ୍ଟରେ ସିସିଟିଭି କ୍ୟାମେରା ଲାଗିବ ବୋଲି ପ୍ରତିଶ୍ରୁତି ଦେଇଛନ୍ତି ଜିଲ୍ଲାପାଳ ।

ସହରରେ ଅସାମାଜିକ ତଥା ଅପରାଧୀଙ୍କୁ ନିୟନ୍ତ୍ରଣ କରିବାକୁ ପ୍ରଶାସନ ପକ୍ଷରୁ ଅନେକ ପଦକ୍ଷେପ ନିଆଯାଉଛି । ମୁଖ୍ୟ ଛକଗୁଡିକରେ ଲାଇଟ ଲଗାଯିବା ସହିତ ଗହଳି ଅଞ୍ଚଳରେ ସୁରକ୍ଷା ଅଧିକାରୀଙ୍କୁ ନିୟୋଜିତ କରାଯାଇଛି ।

କୃଷି ଆଇନ ହଟିବା ପରେ ବି-ଟାଉନରେ ଖୁସିର ମାହୋଲ

ଭାରତରେ କୃଷି ଆଇନ ହଟିବା ପରେ ଚାଷୀମାନଙ୍କ ଖୁସି କହିଲେ ନ ସରେ । ଆଜି ସକାଳେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତବାସୀଙ୍କୁ ବିଶେଷ କରି ଭାରତର କୃଷକମାନଙ୍କୁ କ୍ଷମା ମାଗିବା ପରେ ଲାଗୁ ହୋଇଥିବା ତିନୋଟି କୃଷି ଆଇନ ଉଚ୍ଛେଦ କରିଛନ୍ତି । କୃଷି କ୍ଷେତ୍ରରେ ସୁଧାର ଆଣିବା ଲାଗି ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ତିନୋଟି ଆଇନ ଲାଗୁ କରାଯାଇଥିଲା । ଏହି ଆଇନ ଲାଗୁ ହେବା ପରେ ଭାରତର ଶହ ଶହ ଚାଷୀ ଏହି ଆଇନ ବିରୁଦ୍ଧରେ ଦେଶର ପ୍ରତ୍ୟେକ ସ୍ଥାନରେ ଆନ୍ଦୋଳନ ଜାରି କରିଥିଲେ । ଏଥିସହ ଦେଶର କୋଣଅନୁକୋଣରୁ ହଜାର ହଜାର ଚାଷୀ ରାଜଧାନୀ ଦିଲ୍ଲୀରେ ଆନ୍ଦୋଳନ ଆରମ୍ଭ କରିଥିଲେ । ଦୀର୍ଘ ବର୍ଷର କଠିନ ପରିଶ୍ରମ ପରେ ଆଜି କୃଷକମାନଙ୍କ ଆଶା ସଫଳ ହୋଇଛି ।

କୃଷି ଆଇନ ଉଚ୍ଛେଦକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେଯେ “ବର୍ଷ ବର୍ଷ ଧରି ଦେଶରେ ଚାଷୀ ଆନ୍ଦୋଳନ ଚାଲିଆସୁଥିଲା । ଦେଶରେ ଲାଗୁ ହୋଇଥିବା ଆଇନକୁ ଚାଷୀଙ୍କ ସମର୍ଥନ ମିଳିନଥିଲା । ମୁଁ ଭାରତବାସୀଙ୍କୁ ଏଥିପାଇଁ କ୍ଷମା ମାଗୁଛି । ବୋଧହୁଏ ମୋର କୈାଣସି ଭୁଲ ରହିଥିଲା । ଆଜି ଗୁରୁ ନାନକଙ୍କ ପ୍ରକାଶ ପର୍ବ । ମୁଁ ସମସ୍ତ ଦେଶବାସୀଙ୍କୁ କହିରଖୁଛିଯେ ଲାଗୁ ହୋଇଥିବା ତିନୋଟି କୃଷି ଆଇନ ଉଚ୍ଛେଦ କରିବାକୁ ଆଜି ନିଷ୍ପତ୍ତି ନିଆଯାଇଛି । ଲାଗୁ ହୋଇଥିବା ଏହି ତିନୋଟି କୃଷି ଆଇନ ଉଚ୍ଛେଦର ସମ୍ୱିଧାନିକ ପ୍ରକ୍ରିୟା ଖୁବ୍ ଶୀଘ୍ର ଆରମ୍ଭ ହେବାକୁ ଯାଉଛି । ଆପଣମାନେ ମଧ୍ୟ ନିଜ ନିଜ ଘର, ପରିବାର, ସମ୍ପର୍କୀୟଙ୍କ ପାଖକୁ ଫେରିଯାନ୍ତୁ । ଆଜିଠୁ ସମସ୍ତେ ଏକ ନୂତନ ସକାଳର ଆରମ୍ଭ କରିବା ।”

ଏହାକୁ ନେଇ ରିଲ୍ ଓ ରିଏଲ ଲାଇଫ ହିରୋ ସୋନୁ ସୁଦ୍ଧ ଲେଖିଥିଲେ, ଚାଷୀ ପୁଣି ନିଜ ଚାଷକ୍ଷେତକୁ ଫେରିବେ । ଦେଶର କ୍ଷେତ ପୁଣି ହସିଉଠିବ । ଦେଶର ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେବା ସହ ଜୟ ଯବାନ ଜୟ କିଶାନ ବୋଲି ନାରା ଦେଇଥିଲେ । ଏହି ଉଚ୍ଛେଦକୁ ନେଇ ‘ଆମେ ବିଜୟୀ ହେଲୁ’ ବୋଲି କହି ଜଣେ ଚାଷୀ ନିଜ ଟ୍ୱିଟରରେ ଲେଖିଥିଲେ । ବିଜୟୀ ହେଲେ ଆପଣ । ଆପଣଙ୍କ ବିଜୟରେ ଆମ ସମସ୍ତଙ୍କ ବିଜୟ ରହିଛି କହି ବଲିଉଡ ଅଭିନେତା ରିଚ୍ଚା ଚଡ୍ଡା ରିଟ୍ୱିଟ୍ କରିଛନ୍ତି । ଏଥିସହ ଉର୍ମିଳା ମାତୋଣ୍ଡକର, ଗିପ୍ପୀ ଗ୍ରେୱାଲଙ୍କ ଭଳି ବଲିଉଡ ଅଭିନେତା ଏହାକୁ ନେଇ ନିଜ ମତ ପ୍ରକାଶ କରିଛନ୍ତି ।

 

 

 

 

ଇଲାସଙ୍କ ସଂଘର୍ଷ କାହାଣୀ: ପଥର ପିଟିଲେ ୬ ପ୍ରାଣୀ କୁଟୁମ୍ବଙ୍କ ପେଟକୁ ଯାଏ ଦାନା

ଭଞ୍ଜନଗର: ପଥର ପିଟିଲେ ଘର ଜଳୁଛି, ଭୋକ ମେଣ୍ଟୁଛି । ଏଇଥିରୁ ରୋଜଗାର ପଇସାରେ ସ୍ବାମୀଙ୍କ ଚିକତ୍ସା ବି ହେଉଛି । ଏ ହେଉଛି ଗଞ୍ଜାମ ଜିଲ୍ଲା ଘାଟିପଲ୍ଲୀ ଗାଁର ଇଲାସ ନାୟକଙ୍କ ସଂଘର୍ଷର କାହାଣୀ ।  ଲିଭର ନଷ୍ଟ କାରଣରୁ ସ୍ବାମୀ ଘରେ ବସି ରହିଥିବା ବେଳେ ୬ ପ୍ରାଣୀ କୁଟୁମ୍ବଙ୍କ ଦାୟିତ୍ବ ମୁଣ୍ଡାଇଛନ୍ତି ଇଲାସ ।

ଭଙ୍ଗା ଦଦରା ଘର । ଛପର ଦେଇ ଦିଶୁଛନ୍ତି ଚନ୍ଦ୍ର, ସୂର୍ଯ୍ୟ । ଚାରିପାଖରେ ଝାଟିମାଟିର ବାଡ଼ । ଏହାରି ଭିତରେ ପଥର ପିଟିଲେ ଘରେ ଚୁଲି ଜଳେ । ରୋଗୀଣା ସ୍ବାମୀ ସହିତ ୬ ପ୍ରାଣୀଙ୍କର ପେଟକୁ ଦାନା ଯାଏ । ମାସେ ନୁହେଁ କି ବର୍ଷେ ନୁହେଁ, ୫ ବର୍ଷ ହେବ ଏମିତି ସଂଘର୍ଷ କରୁଛନ୍ତି ଇଲାସ । ପଥର ବାଡେଇ ସ୍ବାମୀଙ୍କ ଚିକିତ୍ସା ଖର୍ଚ୍ଚ ସାଙ୍ଗକୁ ପିଲାଙ୍କ ବୋଝ ଉଠାଉଛନ୍ତି । ଯେଉଁଦିନ କାମ କରୁନାହାନ୍ତି ସେଦିନ ଚୁଲି ଜଳୁନି । ସାହି ପଡୋଶୀ ଯାହା ଦେଲେ ସେତିକିରେ କଟୁଛି ଦିନ । ଏମିତି ସ୍ଥିତିରେ ପଡୋଶୀ ବି କେତେ ସାହାଯ୍ୟ କରିବେ ।

୫ ବର୍ଷ ପୂର୍ବେ ବୃନ୍ଦାବନଙ୍କୁ ପ୍ରଥମେ ଜ୍ବର ହୋଇଥିଲା । ପରେ ତାଙ୍କର ଲିଭର ନଷ୍ଟ ହୋଇଯାଇଥିବା ଜଣାପଡିଥିଲା । ବ୍ରହ୍ମପୁର ବଡ଼ ମେଡିକାଲରେ ଚିକିତ୍ସା ପରେ ମଧ୍ୟ କିଛି ସଫଳତା ମିଳିନଥିଲା । ରହିବାକୁ ଭଲ ଘରେ ଖଣ୍ଡେ ନଥିବାବେଳେ ଅନିଶ୍ଚିତ ଭବିଷ୍ୟତର ଦିନ ଗଣୁଛନ୍ତି ଚାରି ଚାରୋଟି ପିଲା । ଏ ସମ୍ପର୍କରେ ଜଗନ୍ନାଥ ପ୍ରସାଦ ବିଡିଓଙ୍କୁ ଯୋଗାଯୋଗ କରାଯିବାରେ ବୃନ୍ଦାବନଙ୍କ ଚିକିତ୍ସା ସାଙ୍ଗକୁ ଅନ୍ୟାନ୍ୟ ସୁବଧା ସୁଯୋଗ ଯୋଗାଇ ଦିଆାଯିବ ବୋଲି ପ୍ରତିଶ୍ରୁତି ଦେଇଛନ୍ତି ।