ବାଲେଶ୍ୱର: ବାଲେଶ୍ବରବାସୀଙ୍କ ଦୁଃଖ ପାଲଟିଛି କାଂଶବାଂଶ। ଜିଲ୍ଲାର ସୋର, ସିମୁଳିଆ ଓ ଖଇରା ବ୍ଲକ ଦେଇ ପ୍ରବାହିତ ହେଉଛି ଏହି ନଈ। ହେଲେ ବର୍ଷା ଦିନ ଆସିଲେ ନଦୀ ଦେଉଛି କଷ୍ଟ। ନଈ କୂଳରେ ଥିବା ୪୦ ଗାଁର ୨୦ ହଜାରରୁ ଉର୍ଦ୍ଧ୍ବ ଲୋକେ ପ୍ରଭାବିତ ହୁଅନ୍ତି। ବହ୍ୟ ଜଗତରୁ ବିଛିନ୍ନ ହୁଏ ଏହି ୪୦ ଗାଁ। ନଦୀ ଗର୍ଭ ପୋତି ହେବା ସହ ପଥର ପ୍ୟାକିଂ ନଷ୍ଟ ହେବାକୁ ବସିଥିବାରୁ ଭୟର ବିତୁଛି ଲୋକଙ୍କ ଜୀବନ। ଏନେଇ ବାରମ୍ବାର ଅଭିଯୋଗ ହୋଇଛି। କାମ ପାଇଁ ଅର୍ଥ ମଧ୍ୟ ମଞ୍ଜୁର ହେଉଛି। ହେଲେ ମରାମତି ପାଇଁ ବିଭିନ୍ନ ଯୋଜନାରେ ଆସୁଥିବା ସରକାରୀ ଅର୍ଥ ବାଟମାରଣା ହେଉଥିବା ଲୋକେ ଅଭିଯୋଗ କରିଛନ୍ତି।

ପ୍ରତିବର୍ଷ ବର୍ଷା ଦିନ ଆସିଲେ ନଈ କୂଳ ଲଂଘେ। ଫଳରେ ଅଞ୍ଚଳର ଏକର ଏକର ଜମିରେ ପାଣି ପଶି ଫସଲ ନଷ୍ଟ ହୁଏ। ସେପଟେ ବିଭାଗୀୟ ଯନ୍ତ୍ରୀଙ୍କ କହିବା କଥା, ନଦୀ ଖନନ ପରେ ମାଟି ପକାଇବାକୁ ସ୍ଥାନ ନଥିବାରୁ ପାଖ ଜମିରେ ପକାଇବାକୁ ପଡୁଛି। ତେବେ ଖୁବଶୀଘ୍ର ପଥର ପ୍ୟାକିଂ କରି ମରାମତି କରାଯିବ। ନଦୀର ଉପଯୁକ୍ତ ମରାମତି କରାଗଲେ ଏହା ଉପରେ ନିର୍ଭର କରୁଥିବା ଲୋକଙ୍କ ଜୀବନ ଜୀବିକା ସୁରକ୍ଷିତ ହୋଇ ପାରନ୍ତା ବୋଲି କହିଛନ୍ତି ବୁଦ୍ଧିଜୀବୀ।

ଭୁବନେଶ୍ୱର: ଚାଷୀଙ୍କ ପାଇଁ କାଳ ସାଜିଛି ପାରଦୀପ ଆଇଓସିଏଲ ତୈଳ ବିଶୋଧନାଗାର। ଏକର ଏକର ଜମିରି ପଶୁଛି ତେଲମିଶା ପାଣି। ନିଷ୍କାସନର ସୁବିଧା ନଥିବାରୁ ଜମିରେ ମାଡୁଛି। ଯାହାଫଳରେ ସଢି ଯାଉଛି ଧାନ ଗଛ। ଚାଷୀଙ୍କ ସୁନାର ସ୍ୱପ୍ନ ଆଇଓସିଏଲ୍‌ ପାଇଁ ଭାଙ୍ଗିରୁଜି ଚୁରମାର ହେଉଛି। ଏହାରି ବିରୋଧରେ ଏକାଠି ହେଲେଣି ପାରାଦୀପ ଢ଼ିଙ୍କିଆ, ତ୍ରୀଲୋଚନପୁର ଓ ବଡକଣ୍ଟା ଗ୍ରାମର ଚାଷୀ।

ଘଣ୍ଟ ବାଡେଇ ଲୋକଙ୍କୁ ଏକାଠି କରୁଛନ୍ତି ଅଞ୍ଚଳବାସୀ। କମ୍ପାନୀର ପରିଚାଳନାଗତ ତ୍ରୁଟି ଯୋଗୁଁ ଚାଷୀ ଦୁଃଖ ସହୁଥିବା ଅଭିଯୋଗ ହୋଇଛି। ଆସନ୍ତା ୧୫ ଦିନ ମଧ୍ୟରେ କ୍ଷତିପୂରଣ ସହିତ ସ୍ଥାୟୀ ସମାଧାନ କରାନଗଲେ ଆନ୍ଦୋଳନ ର ଚେତାବନୀ ଦେଇଛନ୍ତି ଲୋକେ।

ସ୍ବର୍ଣ୍ଣଗର୍ଭା କୁହାଯାଉଥିବା ବନ୍ଦର ନିକଟସ୍ଥ ଢ଼ିଙ୍କିଆ, ନୂଆଗାଁ, ଗୋବିନ୍ଦପୁର, ବାଲିତୁଠ ଅଞ୍ଚଳ ଏବେ ଆଇଓସିଏଲ ତେଲ ଯୋଗୁଁ ଶ୍ରୀହିନ ହେବାକୁ ବସିଛି। ଧାନ, ପାନ ଓ ମାଛ ଚାଷ ତେଲ ଯୋଗୁଁ ନଷ୍ଟ ହେଉଛି।

ର୍ତୈଳ ମିଶ୍ରିତ ପାଣି ଚାଷ ଜମି ସହ ନଦୀରେ ମିଶୁଛି। ବାରମ୍ବାର ଏନେଇ ଅଭିଯୋଗ ହୋଇଥିଲେ ସୁଦ୍ଧା କମ୍ପାନୀ କର୍ତ୍ତୃପକ୍ଷ ଶୁଣୁ ନଥିବା ଅଭିଯୋଗ ହୋଇଛି। ନଦୀ ଓ ଚାଷ ଜମିରେ ଏକ ତୈଳାକ୍ତ ଆସ୍ତରଣ ଜମି ରହୁଛି। ତେଣୁ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି।

ବଲାଙ୍ଗୀର: ବଲାଙ୍ଗୀରରେ ଭାରତ ବନ୍ଦ ବେଳେ ଅପ୍ରୀତିକର ପରିସ୍ଥିତି। ଜିଲ୍ଲାପାଳଙ୍କ ପ୍ରକୋଷ୍ଠକୁ ଧସେଇ ପଶିଲେ ଆନ୍ଦୋଳନକାରୀ। ଚାଷୀ ସଂଗଠନ ଗୁଡିକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ ସଭା ସହିତ ଧାରଣା ଦେଇଥିଲେ। ତେବେ ଜିଲ୍ଲାପାଳ ତାଙ୍କ ଅଫିସ ପ୍ରକୋଷ୍ଠରେ ମାଜିଷ୍ଟ୍ରେଟ ଦାୟିତ୍ୱରେ ଥାଇ କାମ କରୁଥିବା ବେଳେ ଆନ୍ଦୋଳନକାରୀ ମାନେ ତୀବ୍ର ଅସନ୍ତୋଷ ପ୍ରକାଶ କରିଥିଲେ। ଏପରିକି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖ ଫାଟକରେ ମୁତୟନ ଥିବା ସୁରକ୍ଷାକର୍ମୀଙ୍କୁ ଠେଲି ଆନ୍ଦୋଳନକାରୀ ଜିଲ୍ଲାପାଳଙ୍କ ଅଫିସ ଭିତରକୁ ଧସେଇ ପଶିଯାଇଥିଲେ।

ଏପରିକି ଜିଲ୍ଲାପାଳଙ୍କ ପ୍ରକୋଷ୍ଠକୁ ଆନ୍ଦୋଳନକାରୀ ଚାଷୀ ଓ କଂଗ୍ରେସ କର୍ମୀ ଧସେଇ ପଶିଥିଲେ। ଆନ୍ଦୋଳନ ଯୋଗୁଁ ଜିଲ୍ଲାର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିଥିବା ବେଳେ ନିଜେ ଜିଲ୍ଲାପାଳ କାର୍ଯ୍ୟାଳୟରେ ଆସି କାର୍ଯ୍ୟ କରୁଥିବାରୁ ଆନ୍ଦୋଳନକାରୀମାନେ ପ୍ରତିବାଦ କରିଥିଲେ। ତେବେ ପାଣିପାଗ ବିଭାଗ ପକ୍ଷରୁ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଥିବାରୁ ଜରୁରୀକାଳୀନ କାମରେ ଜିଲ୍ଲାପାଳ କାର୍ଯ୍ୟାଳୟକୁ ଆସି କାମ କରୁଥିବା ଜିଲ୍ଲାପାଳ ଚଞ୍ଚଲ ରାଣା ସୂଚନା ଦେଇଛନ୍ତି। ତେବେ ଜିଲ୍ଲାପାଳଙ୍କ ସହ ଆଲୋଚନା ପରେ ଆନ୍ଦୋଳନକାରୀମାନେ ପୁଣି ଆନ୍ଦୋଳନସ୍ଥଳକୁ ଫେରିଆସିଥିଲେ।