spot_img
Home Blog Page 5390

ପାରିବାରିକ କଳହର କରୁଣ ପରିଣତି, ଶଶ୍ୱୁର ଘରେ ସ୍ତ୍ରୀକୁ ହତ୍ୟା କରି ସ୍ୱାମୀ ଫେରାର

ବଲାଙ୍ଗୀର: ଲୋଇସିଂହା ଥାନା ଫଟାମୁଣ୍ଡା ଗାଁରେ ଅଘଟଣ । ପାରିବାରିକ କଳହରୁ ଶ୍ୱଶୁର ଘରେ ସ୍ତ୍ରୀଙ୍କୁ ତଣ୍ଟି ଚିପି ହତ୍ୟାକଲା ସ୍ୱାମୀ । ନିଶାଶକ୍ତ ଅବସ୍ଥାରେ ସ୍ୱାମୀ ସ୍ତ୍ରୀର ତଣ୍ଟି ଚିପି ହତ୍ୟା କରି ଫେରାର ହୋଇଯାଇଛି  । ସ୍ୱାମୀର ଏପରି ନୃଶଂସ କାର୍ଯ୍ୟରେ ସମଗ୍ର ଅଞ୍ଚଳ ଆଶ୍ଚର୍ଯ୍ୟ ଚକିତ ହୋଇଛି ।  ମିଳିଥିବା ସୂଚନା ମୁତବାକ ମୃତ ମହିଳାଙ୍କ ନାଁ ହେଉଛି କସ୍ତୁରୀ ସାହୁ । ପାରିବାରିକ କଳହ ଯୋଗୁଁ ଗତ ୩/୪ ମାସ ତଳେ କସ୍ତୁରୀ ତାଙ୍କ ଦୁଇ ସନ୍ତାନକୁ ନେଇ ବାପା ଘର ଫଟାମୁଣ୍ଡକୁ ଚାଲିଆସିଥିଲେ ।

ବାପା ଘରେ କିଛି ଦିନ ରହିବା ପରେ ଗାଁରେ ଥିବା ଆଉ ଏକ ଛୋଟିଆ ଘରେ ରହୁଥିଲେ । ତେବେ ଗତ କାଲି ବିଳମ୍ବିତ ରାତିରେ ଅଭିଯୁକ୍ତ ସ୍ୱାମୀ ଗାନ୍ଧିଲାଲ ସାହୁ ତାଙ୍କ ଘରେ ପହଁଚି ହତ୍ୟା କସ୍ତୁରୀଙ୍କୁ ହତ୍ୟା କରି ଫୋରାର ହୋଇଯାଇଥିଲେ  । ଆଜି ସକାଳୁ କସ୍ତୁରୀଙ୍କ ପିଲା ମାନେ ଘର ଭିତରେ କାନ୍ଦୁଥିବା ବେଳେ ଗାଁ ଲୋକେ ପଚରାଉଚୁରା କରିଥିଲେ  । ଘଟଣା ସମ୍ପର୍କରେ ଜାଣିବା ପରେ  ଲୋଇସିଂହା ପୋଲିସକୁ ଖବର ଦେଇଥିଲେ ।  ପୋଲିସ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛି  ।

ଖୋଲିବ ବୈଷୟିକ ଶିକ୍ଷାନୁଷ୍ଠାନ, ସବୁ ସେମିଷ୍ଟାର ପାଇଁ ଚାଲିବ କ୍ଲାସ

ଭୁବନେଶ୍ୱର: ଆଜିଠୁ ଖୋଲିବ ରାଜ୍ୟର ସମସ୍ତ ବୈଷୟିକ ଶିକ୍ଷାନୁଷ୍ଠାନ । ସବୁ ସେମିଷ୍ଟର ପାଇଁ କ୍ଲାସ ରୁମରେ ଶିକ୍ଷାଦାନ ଆରମ୍ଭ ହେବ । ବୈଷୟିକ ବିଶ୍ୱବିଦ୍ୟାଳୟ, ଇଞ୍ଜିନିୟରିଂ ଏବଂ ଧନ୍ଦାମୂଳକ କଲେଜ, ପଲିଟେକ୍‌ନିକ୍‌, ଡିପ୍ଲୋମା କଲେଜ, ଆଇଟିଆଇ କଲେଜର ଛାତ୍ରଛାତ୍ରୀମାନେ ଅଫଲାଇନ କ୍ଲାସରେ ଶିକ୍ଷାଗ୍ରହଣ କରିବେ । କ୍ଲାସ ରୁମରେ ଗହଳି କମାଇବାକୁ ବିଭିନ୍ନ ବ୍ୟାଚ କରି ଅଧିକ ସମୟ ଶିକ୍ଷା ଦାନ ଦିଆଯିବ ।

କଣ୍ଟେନମେଣ୍ଟ ଜୋନ୍‌ରେ ରହୁଥିବା ଛାତ୍ରଛାତ୍ରୀ, ବିଶ୍ୱବିଦ୍ୟାଳୟ ଓ କଲେଜ କର୍ମଚାରୀ ଅଫ୍‌ଲାଇନ୍‌ କ୍ଲାସରେ ଯୋଗ ଦେଇପାରିବେ ନାହିଁ । ସାମାଜିକ ଦୂରତା ସହ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଥିବା ବେଳେ ହ୍ୟାଣ୍ଡଓ୍ଵାସ୍‌ ଓ ସାନିଟାଇଜର ବ୍ୟବହାର କରିବା ପାଇଁ କୁହାଯାଇଛି । ସୋମବାର ଠାରୁ କ୍ଲାସ ଖୋଲିବା ନେଇ ବିଜ୍ଞପ୍ତି ପ୍ରକାଶ ପାଇଥିବାବେଳେ ରବିବାର ଠାରୁ  ଛାତ୍ରଛାତ୍ରୀଙ୍କ ପାଇଁ ସମସ୍ତ ହଷ୍ଟେଲ ଖୋଲାଯାଇଛି ।

ଭବାନୀପୁରରୁ ଲଢିବେ ମମତା, ବିଧିବଦ୍ଧ ପ୍ରାର୍ଥୀ ଘୋଷଣା କଲା TMC

କୋଲକାତା: ବାକି ଥିବା ଉପନିର୍ବାଚନ ପାଇଁ ସାନି ତାରିଖ ଘୋଷଣା କରିଛନ୍ତି ଜାତୀୟ ନିର୍ବାଚନ କମିଶନ ।  ପଶ୍ଚିମବଙ୍ଗର ୩ଟି ବିଧାନସଭା ଆସନ ସହ ପିପିଲି ପାଇଁ ଏକାସଙ୍ଗରେ ତାରିଖ ଘୋଷଣା କରାଯାଇଛି  । ସେପଟେ ଉପନିର୍ବାଚନ ତାରିଖ ଘୋଷଣା ପରେ ତୃଣମୂଳ କଂଗ୍ରେସ ନିଜ ପ୍ରାର୍ଥୀ ତାଲିକା ଘୋଷଣା କରିଛି । ମୁଖ୍ୟମନ୍ତ୍ରୀ ମମତା ବାନାର୍ଜୀ ଭବାନୀପୁର ଆସନରୁ ପ୍ରତିଦ୍ୱନ୍ଦିତା ନେଇ ଘୋଷଣା କରିଛି ଦଳ  । ମେ ମାସରେ ହୋଇଥିବା ବିଧାନସଭା ନିର୍ବାଚନରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ନନ୍ଦିଗ୍ରାମରୁ  ପ୍ରାର୍ଥୀ ହୋଇଥିଲେ  ।

ବିଜେପି ନେତା ତଥା ପୂର୍ବରୁ ଟିଏମସିରେ ରହି ଉକ୍ତ ଆସନରୁ ଲଗାତର ବିଜୟୀ ହୋଇ ଆସୁଥିବା ଶୁଭେନ୍ଦୁ ଅଧିକାରୀଙ୍କ ସହ ପ୍ରତିଦ୍ୱନ୍ଦିତା କରିଥିଲେ ମମତା ବାନାର୍ଜୀ  । କିନ୍ତୁ ବିଜେପି ନେତା ଶୁଭେନ୍ଦୁ ଅଧିକାରୀ ସେଠାରେ ବିଜୟୀ ହୋଇଥିବା ବେଳେ ପରାଜୟ ହୋଇଥିଲେ ମମତା  । ସେପଟେ ୬ ମାସ ମଧ୍ୟରେ କୌଣସି ଆସନରୁ ସଦସ୍ୟତା ଗ୍ରହଣ କରିବା ବାଧ୍ୟତାମୂଳକ ଥିବାବେଳେ ଭବାନୀପୁୂର ଆସନରୁ ନିର୍ବାଚନ ଲଢିଥିବା ବିଧ୍ୟାୟକ ପଦବୀରୁ ଇସ୍ତଫା ଦେଇଥିଲେ  । ଫଳରେ ଭବାନୀପୁର ଆସନରୁ ମମତା ବାନାର୍ଜୀ ନିର୍ବାଚନ ଲଢିବା ନେଇ ବାଟ ଫିଟିଥିଲା  । ସେପଟେ  ତାଙ୍କୁ ବିଧିବଦ୍ଧ ଭାବେ ପ୍ରାର୍ଥୀ ନେଇ ଘୋଷଣା କରିଛି ଦଳ  ।

ଅନ୍ୟପଟେ ଜାଙ୍ଗିପୁରରୁ ଜାକିର ହୁସେନ୍ ଓ ସାମସରଗଞ୍ଜରୁ ଆମୀରୁଲ ଇସଲାମ ପ୍ରତିଦ୍ବନ୍ଦିତା କରିବେ । ୩୦ ସେପ୍ଟେମ୍ବରରେ ମତଦାନ ହେବ । ଉପ-ନିର୍ବାଚନ ପାଇଁ ନିର୍ବାଚନ ଆୟୋଗ ଦ୍ବାରା ସ୍ଥିର କରାଯାଇଥିବା ସୂଚୀ ଅନୁଯାୟୀ ସେପ୍ଟେମ୍ବର ୧୩ ନାମାଙ୍କନ ଦାଖଲ କରିବାର ଶେଷ ତାରିଖ ହେବ । ପ୍ରାର୍ଥୀମାନେ ୧୬ ସେପ୍ଟେମ୍ବର ପୂର୍ବରୁ ନାମାଙ୍କନ ପ୍ରତ୍ୟାହାର କରିପାରିବେ । ଅକ୍ଟୋବର ୩ରେ ଫଳାଫଳ ପ୍ରକାଶ ପାଇବ । ବିଧାନସଭା ନିର୍ବାଚନ ପରି ପୁଣି ଥରେ ଉପନିର୍ବାଚନରେ ବିଜେପି ଏବଂ ଟିଏମସି ମୁହାଁ ମୁହିଁ ହେବାକୁ ଯାଉଛନ୍ତି  ।

କମୁଛି କରୋନା, ଗୋଟିଏ ଦିନରେ ୬୦୯ ସଂକ୍ରମିତ

ଭୁବନେଶ୍ୱର: ରାଜ୍ୟରେ କମି କମି ଆସୁଛି କରୋନା ସଂକ୍ରମଣ । ୨୪ ଘଣ୍ଟାରେ ମାତ୍ରା ୮ ଜଣଙ୍କ ଜୀବନ ନେଇଛି କିଲର ଭାଇରସ । ସେହିପରି ଗୋଟିଏ ଦିନରେ ଚିହ୍ନଟ ହୋଇଛନ୍ତି ଆଉ ୬୦୯ ପଜିଟିଭ୍ । କ୍ବାରେଣ୍ଟାଇନରୁ ୩୫୪ ଜଣ ଥିବା ବେଳେ, ଲୋକାଲ କେସ୍ ରହିଛି ୨୫୫ । ସେହିପି ଜନ୍ମରୁ ୧୮ ବର୍ଷ ମଧ୍ୟରେ ୧୨୨ ଜଣ ପିଲା ଆକ୍ରାନ୍ତ ହୋଇଛନ୍ତି । ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରୁ ଖୋର୍ଦ୍ଧାରୁ ସର୍ବାଧିକ ୧୮୮ ଜଣ ଥିବା ବେଳେ, କଟକରୁ ୧୧୩ ଷ୍ଟେଟ ପୁଲରୁ ୪୫ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ସେହିପରି ଯାଜପୁର ଓ ବାଲେଶ୍ବରରୁ ୩୧ ଜଣ ଲେଖାଏଁ, ଜଗତସିଂହପୁରରୁ ୨୨, ମୟୂରଭଞ୍ଜରୁ ୨୧, ପୁରୀରୁ ୨୦, ଭଦ୍ରକରୁ ୧୮, ସମ୍ବଲପୁରରୁ ୧୬, କେନ୍ଦ୍ରାପଡ଼ାରୁ ୧୩, ଅନୁଗୁଳରୁ ୧୨, ସୁନ୍ଦରଗଡ଼ରୁ ୯, ବରଗଡ଼ରୁ ୯, ଢେଙ୍କାନାଳ ଓ କେନ୍ଦୁଝରରୁ ୮ ଜଣ ଲେଖାଏଁ, ରାୟଗଡ଼ାରୁ ୭, କୋରାପୁଟରୁ ୬, ଝାରସୁଗୁଡ଼ା, ଗଞ୍ଜାମ, ନୟାଗଡ଼ ଓ ନବରଙ୍ଗପୁରରୁ ୫ ଜଣ ଲେଖାଏଁ, ବଲାଙ୍ଗୀର, ଦେବଗଡ଼ରୁ ୪ ଜଣ ଲେଖାଏଁ, ସୋନପୁରରୁ ୨, ଗଜପତି ଓ ମାଲକାନଗିରିରୁ ଜଣେ ଲେଖାଏଁ ଆକ୍ରାନ୍ତ ଚିହ୍ନଟ ହୋଇଛନ୍ତି । ଗତ ୨୪ ଘଣ୍ଟାରେ ସାରା ରାଜ୍ୟରୁ ସୁସ୍ଥ ହୋଇଛନ୍ତି ୭୬୩ ଜଣ ସଂକ୍ରିମିତ । ସେହିପରି ଆକ୍ଟିଭ୍ କେସ ୬ ହଜାର ୯୯୬ ରହିଛି ।

ଇଡ଼ିରେ ହାଜର ହେବେ ଅଭିଷେକ, ସିଆଇଡିରେ ଶୁଭେନ୍ଦୁ

କୋଲକାତା: ଇଡିରେ ହାଜର ହେବେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପୁତୁରା ତଥା ଟିଏମସି ସାଂସଦ ଅଭିଷେକ ବାନାର୍ଜୀ । ଦିଲ୍ଲୀ ଇଡି କାର୍ଯ୍ୟାଳୟରେ ହାଜର ହେବା ପାଇଁ ପଶ୍ଚିମବଙ୍ଗରୁ ଦିଲ୍ଲୀ ଯାଇଛନ୍ତି ଅଭିଷେକ । ମନି ଲଣ୍ଡ୍ରିଂ ମାମଲାରେ ଇଡିରେ ହାଜର ହେବା ପାଇଁ ଅଭିଷେକଙ୍କୁ ପୂର୍ବରୁ ନୋଟିସ୍ କରିଥିଲା ଇଡି । କୋଲ୍ ବ୍ଲକ ଆବଣ୍ଟନ ମାମଲାରେ ଅନିୟମିତତା ଭାବେ ଅର୍ଥ ନେଣଦେଣ ହୋଇଥିବା ନେଇ ଅଭିଯୋଗ ହୋଇଥିଲା ।

ସେପଟେ ଏହି ମାମଲାରେ ଆଜି ଇଡିରେ ହାଜର ହେବା ନେଇ ଅଭିଷେକଙ୍କୁ ସୂଚନା ଦେଇଛନ୍ତି । ପୂର୍ବରୁ ଅଭିଷେକଙ୍କ ପତ୍ନୀଙ୍କୁ ମଧ୍ୟ ଇଡି ସମନ୍ କରିଥିଲା । ତେବେ କୋଭିଡ୍ କାରଣ ଦର୍ଶାଇ ଦିଲ୍ଲୀ ଯିବା ପାଇଁ ମନାକରିଥିଲେ ଅଭିଷେକଙ୍କ ପତ୍ନୀ ରୁଜିରା ବାନାର୍ଜୀ । ବିଜେପି ନିର୍ବାଚନ ହାରିବା ପରେ ପ୍ରତିଶୋଧ ପରାୟଣ ହୋଇ ଏଭଳି ରାଜନୀତି କରୁଥିବା କହିଛନ୍ତି ଅଭିଷେକ  ।

ସେପଟେ ପଶ୍ଚିମବଙ୍ଗ ରାଜନୀତିରେ ଏଯାଏଁ  ଥମିନାହିଁ  ବିଦ୍ରୋହ  । ବିଜେପି ବିଧାୟକ ଦଳ ନେତା ଶୁଭେନ୍ଦୁ ଅଧିକାରୀଙ୍କୁ ମଧ୍ୟ ସୁରକ୍ଷାଧିକାରୀ ହତ୍ୟା ଘଟଣାରେ ସିଆଇଡ଼ି ତରଫରୁ ହାଜର ହେବାକୁ କୁହାଯାଇଛି  ।  ବିଧାନସଭା ନିର୍ବାଚନରେ ବିଜେପି ଏବଂ ଶାସନରେ ଥିବା ତୃଣ ମୂଳ ମଧ୍ୟରେ ତୁହାକୁ ତୁହା ବିବାଦ ସୃଷ୍ଟି ହୋଇଥିଲା   । କିନ୍ତୁ ନିର୍ବାଚନର ୪ ମାସ ପରେ ମଧ୍ୟ କମିବାର ନାଁ ଧରୁନି ବିଜେପି-ଟିଏମସି କଳି  ।

ଯାଜପୁରରେ ବଢୁଛି ବିଜେଡି, ପ୍ରଣବଙ୍କ ଉପସ୍ଥିତିରେ ଯୋଗଦେଲେ ଶତାଧିକ କର୍ମୀ

ଯାଜପୁର: ବଢୁଛି ବିଜେଡି ବଳ । ପଞ୍ଚାୟତ ନିର୍ବାଚନ ପୂର୍ବରୁ ଆହୁରି ସଶକ୍ତ ହେଉଛି ବିଜେଡି । ଯାଜପୁରରେ ଆଜି ବିଜୁ ଜନତା ଦଳର ମିଶ୍ରଣ ପର୍ବ ଅନୁଷ୍ଠିତ ହୋଇଛି । ସିମିଳିଆ ପଞ୍ଚାୟତର ବହୁ ଯୁବକ ମହିଳା ବିଜୁ ଜନତା ଦଳରେ ଯୋଗ ଦେଇଛନ୍ତି । ଯାଜପୁର ବିଧାୟକ ତଥା ବିଜେଡିର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ମିଶ୍ରଣ ପର୍ବରେ ଯୋଗଦେଇ କର୍ମୀଙ୍କୁ ଉତ୍ସାହିତ କରିଛନ୍ତି ।

ପଞ୍ଚାୟତରେ ଆଗକୁ କିପରି ଆହୁରି ଉନ୍ନତି ହେବ ଏବଂ ମା ମାନେ ସ୍ବାବଲମ୍ବୀ ହେବେ ସେନେଇ ପଦକ୍ଷେପ ନିଆଯିବ ବୋଲି ବିଧାୟକ କହିଛନ୍ତି । ।ଆଗାମୀ ଦିନରେ ସ୍ଥାନୀୟ ଅଞ୍ଚଳରେ ଏକ ସେତୁ ନିର୍ମାଣ କରାଯିବ ଯାହା ଫଳରେ ବନ୍ୟା ଦାଉରୁ ଲୋକମାନେ ରକ୍ଷା ପାଇପାରିବେ । ସଠିଆଟିକିରି ଠାରୁ ଯାଜପୁର ମୁଖ୍ୟ ରାସ୍ତା ପର୍ଯ୍ୟନ୍ତ ଏହି ସେତୁ ନିର୍ମାଣ କରିବାକୁ ନିଷ୍ପତ୍ତି ହୋଇଛି ।

ମିଶ୍ରଣ ପର୍ବରେ ଯାଜପୁର ବିଜେଡିର ପୂର୍ବତନ ପୌରାଧକ୍ଷ ଭାବପ୍ରସାଦ ଦାସ, ସ୍ଥାନୀୟ ସରପଞ୍ଚ ପରେସ ବିଶ୍ବାଳଙ୍କ ବରିଷ୍ଠ କର୍ମୀମାନେ ଯୋଗଦେଇଥିଲେ । ଆଗାମୀ ଦିନରେ ଦଳକୁ ମଜଭୁତ କରିବା ସହ ପଞ୍ଚାୟତ ନିର୍ବାଚନରେ କିପରି ନେତୃତ୍ୱ ମାନଙ୍କୁ ଜିତାପଟ କରାଯିବ ସେନେଇ ବୈଠକରେ ବିସ୍ତୃତ ଆଲୋଚନା ହୋଇଥିଲା  । ଅନ୍ୟ ଦଳରୁ ଶତାଧିକ କାର୍ଯ୍ୟକର୍ତ୍ତା ବିଜୁ ଜନତା ଦଳରେ ପ୍ରବେଶ କରିବା ନିହାତି ଦଳକୁ ଶକ୍ତିଶାଳୀ କରିବ ବୋଲି ମତବ୍ୟକ୍ତ କରିଥିଲେ ବରିଷ୍ଠ ନେତା  ।

କୋରାଇ ଓ ବ୍ୟାସନଗରରେ ନିର୍ମାଣ ହେବ ସ୍ମାର୍ଟ କ୍ଲାସ ରୁମ୍

ଯାଜପୁର: କୋରାଇ ବ୍ଲକ ଓ ବ୍ୟାସନଗର ପୌରାଞ୍ଚଳର ବିଭିନ୍ନ ସ୍କୁଲରେ ନିର୍ମାଣ ହେବାକୁ ଥିବା ସ୍ମାର୍ଟ କ୍ଲାସରୁମ୍ ଓ ଇ-ଲାଇବ୍ରେରୀ ପାଇଁ ଭିତ୍ତିଭୂମିର ତଦାରଖ । କୋରାଇ ବିଧାୟକ ଅଶୋକ ବଳ ଓ ଯାଜପୁର ଜିଲ୍ଲାପାଳ ଚକ୍ରବର୍ତ୍ତୀ ସିଂ ରାଠୋର ଭିତ୍ତିଭୂମିର ତଦାରଖ କରିଛନ୍ତି । ହାଇସ୍କୁଲ ରୂପାନ୍ତର କାର୍ଯ୍ୟକ୍ରମ ଅଧିନରେ କୋରାଇ ବ୍ଲକର ୮ ଟି ଓ ବ୍ୟାସନଗର ପୌରାଞ୍ଚଳର ୨ଟି ଉଚ୍ଚ ବିଦ୍ୟାଳୟରେ ସ୍ମାର୍ଟ କ୍ଲାସ ରୁମ୍ ନିର୍ମାଣ ହେବ ।

ଶିକ୍ଷା ଭିତ୍ତିଭୂମିର ବିକାଶ ପାଇଁ ରାଜ୍ୟ ସରକାରଙ୍କ ପକ୍ଷରୁ ରାଜ୍ୟର ସମସ୍ତ ବ୍ଲକରେ ସ୍ମାର୍ଟ କ୍ଲାସ ରୁମ୍ ନିର୍ମାଣ କରାଯାଉଛି । ଯାହା ଆଗାମୀ ଦିନରେ ଛାତ୍ରଛାତ୍ରୀମାନଙ୍କ ପାଇଁ ବେଶ ଉପଯୋଗୀ ହୋଇପାରିବ । ଆଗାମୀ ଦିନରେ ଶିକ୍ଷା ବ୍ୟବସ୍ଥାକୁ ସୁଦୃଢ କରିବା ପାଇଁ ରାଜ୍ୟ ସରକାର ପ୍ରୟାସରତ ।  ବ୍ୟାସନଗର ପୌରାଞ୍ଚଳର ବିଭିନ୍ନ ସ୍କୁଲରେ ନିର୍ମାଣ ହେବାକୁ ଥିବା ସ୍ମାର୍ଟ କ୍ଲାସରୁମ୍ ଓ ଇ-ଲାଇବ୍ରେରୀ ପାଇଁ ଭିତ୍ତିଭୂମିର ତଦାରଖ କରିଛନ୍ତି

ଶିକ୍ଷକଙ୍କୁ ଧମକ ଦେଇ ଟଙ୍କା ମାଗୁଥିଲେ ପୋର୍ଟାଲ ସାମ୍ବାଦିକ, ଗିରଫ କଲା ପୋଲିସ

ନବରଙ୍ଗପୁର: ସ୍କୁଲ ଶିକ୍ଷକଙ୍କୁ ଧମକ ସହ ଟଙ୍କା ନେବା ପଡ଼ିଲା ମହଙ୍ଗା । ଗିରଫ ହେଲେ ଦୁଇ ୱେବ୍ ପୋର୍ଟାଲର ସାମ୍ବାଦିକ । ଗିରଫ ଦୁଇ ଜଣ ସାମ୍ବାଦିକ ହେଲେ ଜିତେନ୍ଦ୍ର ଦାଶ ଓ ଶଙ୍କର ପ୍ରସାଦ ତୁରୁକ । ଏହାସହ ଅନ୍ୟ ଜଣେ ଓ୍ବେବ ପୋର୍ଟାଲ ସାମ୍ବାଦିକ ଫେରାର ଥିବା ବେଳେ ପୋଲିସ ଖୋଜୁଛି । ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ନାୟକଗୁଡା ସ୍କୁଲର ସହକାରୀ ଶିକ୍ଷକଙ୍କଠୁ ଧମକାଇ ଟଙ୍କା ଆଦେୟ କରିଥିଲେ ୩ ଓ୍ବେବ ପୋର୍ଟାଲର ସାମ୍ବାଦିକ ।

ସୂଚନା ମୁତାବକ ଏହି ସାମ୍ବାଦିକ ୫୦ ହଜାର ଟଙ୍କା ଦାବି କରିଥିବା ବେଳେ ଶିକ୍ଷକଙ୍କ ଠାରୁ ଧମକାଇ ୩୫ ହଜାର ଟଙ୍କା ନେଇଥିଲେ । ଅଭିଯୁକ୍ତଙ୍କ ନାମରେ ଧମକ, ଗାଳି ଗୁଲଜ କରିବା ଏବଂ ଆଟ୍ରୋସିଟି ଭଳି ସଙ୍ଗିନ ଦଫା ଲଗାଇ ତଦନ୍ତ କରୁଛି ପୋଲିସ  । ଦୁଇ ଦିନ ତଳେ ରାଜଧାନୀର ଜଣେ ପୋର୍ଟାଲ ସାମ୍ବାଦିଙ୍କୁ ମଧ୍ୟ ଅଶାଳୀନ ଭାଷା ବ୍ୟବହାର କରିବା, ଲାଞ୍ଚ ମାଗିବା ଆଦି ସଙ୍ଗୀନ ଦଫା ଲଗାଇ ଗିରଫ କରିଛି ମହିଳା ଥାନା ପୋଲିସ  ।

ଅଦରକାରୀ କାଗଜର କଳାକୃତି ଦେଉଛି ଲକ୍ଷାଧିକ ଟଙ୍କା, ମାଧ୍ୟମ ସାଜିଛି ୟୁଟ୍ୟୁବ

ଭଦ୍ରକ: ଘରେ ବସି ମାସକୁ ହେଉଛି ଲକ୍ଷେ ଟଙ୍କା ରୋଜଗାର । ୟୁଟ୍ୟୁବରୁ ଲକ୍ଷାଧିକ ଟଙ୍କା ରୋଜଗାର କରି ସ୍ବାବଲମ୍ବୀ ହୋଇଛନ୍ତି ଭଦ୍ରକ ଜିଲ୍ଲା ତରାଗୋ ଗାଁର ଅର୍ପିତା ପ୍ରିୟଦର୍ଶିନୀ । ଅଦରକାରୀ କାଗଜରେ ବିଭିନ୍ନ କଳାକୃତି କରି ଏହାର ପ୍ରସ୍ତୁତି ଭିଡିଓ ୟୁଟ୍ୟୁବରେ ଅପଲୋଡ୍ କରୁଛନ୍ତି । ଏଥିରୁ ସେ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି ।ଘରେ ବସି ମାସକୁ ଲକ୍ଷେ ଟଙ୍କାର ରୋଜଗାର କରୁଛନ୍ତି ଯୁବତୀ । ସରକାରୀ ଚାକିରି ନୁହେଁ କିମ୍ବା କୌଣସି ବଡ କମ୍ପାନୀ ନୁହେଁ ।

ୟୁଟ୍ୟୁବ ଦେଉଛି ଲକ୍ଷାଧିକ ଟଙ୍କାର ରୋଜଗାର । ବିଭିନ୍ନ କଳାକୃତିର ଭିଡିଓ ୟୁଟ୍ୟୁବରେ ଅପ୍‌ଲୋଡ କରି ରୋଜଗାରକ୍ଷମ ହୋଇଛନ୍ତି ଭଦ୍ରକ ଜିଲ୍ଲା ବନ୍ତ ବ୍ଲକ ତରାଗୋ ଗାଁର ଅର୍ପିତା ପ୍ରିୟଦର୍ଶିନୀ । ଅଦରକାରୀ କାଗଜରେ ଦେବାଦେବୀଙ୍କଠୁ ଆରମ୍ଭ କରି ଫଟୋ ଫ୍ରେମ, ଫୁଲଦାନୀ ଏବଂ ଘର ସଜ୍ଜା ସାମଗ୍ରୀର ପ୍ରସ୍ତୁତ ଭିଡିଓ କରି ୟୁଟ୍ୟୁବରେ ଅପଲୋଡ୍ କରୁଛନ୍ତି । ଆଉ ଏହାକୁ ଦର୍ଶକମାନେ ବେଶ୍ ପସନ୍ଦ କରୁଛନ୍ତି । ଘରେ ବସିରହିବା ସମୟରେ ବିଭିନ୍ନ ଅଦରକାରୀ ସାମଗ୍ରୀକୁ ବ୍ୟବହାର କରି ଅନେକ ସୁନ୍ଦର କଳାକୃତି ପ୍ରସ୍ତୁତ କରିଥିଲେ ଅର୍ପିତା ।

ପରେ ୟୁଟ୍ୟୁବରେ କ୍ରାଫ୍ଟ ଗ୍ୟାଲେରୀ ଆକାଉଣ୍ଟ ଖୋଲି ଏହାର ପ୍ରସ୍ତୁତି ଭିଡିଓକୁ ଅପଲୋଡ୍ କରିଥିଲେ । ଅର୍ପିତା ପ୍ରଥମେ ମାସିକକୁ ୪ହଜାର ଟଙ୍କା ରୋଜଗାର କରୁଥିଲେ । ଏବେ ଚ୍ୟାନେଲରେ ଦର୍ଶକ ସଂଖ୍ୟା ବୃଦ୍ଧି ପାଇବାରୁ ମାସକୁ ଲକ୍ଷାଧିକ ଟଙ୍କା ରୋଜଗାର ହେଉଛି । ଯୁବକ ଯୁବତୀଙ୍କ ପାଇଁ ସୋସିଆଲ୍ ମିଡିଆ ଆଣିଛି ନୂଆ ସମ୍ଭାବନା । ଏହାର ସଫଳ ଉପଯୋଗ କରି ଏବେ ସ୍ବାବଲମ୍ବୀ ହେଉଛନ୍ତି ଅନେକ ବେକାର ଯୁବକ ଯୁବତୀ ।

ଅନାବୃଷ୍ଟି ସ୍ଥିତି ନେଇ ସରକାର ସଜାଗ, ମୁଖ୍ୟ କାର୍ଯ୍ୟାଳୟ ଛାଡ଼ିପାରିବେ ନାହିଁ କୃଷି ଅଧିକାରୀ

ଭୁବନେଶ୍ୱର: ରାଜ୍ୟରେ ଅନାବୃଷ୍ଟି ଜନିତ ସ୍ଥିତି ନେଇ ଜରୁରିକାଳୀନ ସମୀକ୍ଷା ବୈଠକ । ଏଥିରେ ଅଧ୍ୟକ୍ଷତା କରି କୃଷିମନ୍ତ୍ରୀ ଡ. ଅରୁଣ ସାହୁ କ୍ଷେତ୍ର ଅଧିକାରୀଙ୍କୁ ଚାଷୀଙ୍କ ସହ ନିୟମିତ ସମ୍ପର୍କ ରଖିବାକୁ ପରାମର୍ଶ ଦେଇଛନ୍ତି । ଏହି ପରିସ୍ଥିତିରେ କେହି ମୁଖ୍ୟ କାର୍ଯ୍ୟାଳୟ ଛାଡ଼ିପାରିବେ ନାହିଁ । ଦରକାର ପଡ଼ିଲେ କ୍ଷେତ୍ରସ୍ଥଳକୁ ଯିବା ପାଇଁ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ପଞ୍ଚାୟତ ଓ ବ୍ଲକସ୍ତରରେ ନିଜ ଅଞ୍ଚଳର ଜଳନିଧି ଉଠା ଜଳସେଚନ, କ୍ଷେତ ପୋଖରୀ, କ୍ଷୁଦ୍ର ଓ ମଧ୍ୟମ ଜଳସେଚନ ପ୍ରକଳ୍ପର ଡାଟାବେସ୍‌ ପ୍ରସ୍ତୁତ କରାଯିବ ।

ସେଥିମଧ୍ୟରୁ କୋତୋଟି ସଂପୂର୍ଣ୍ଣ, କେଉଁଗୁଡିକ ଅଚଳ, ମରାମତି ଯୋଗ୍ୟ ସେନେଇ ତଥ୍ୟ ଦେଲେ ତ୍ବରିତ ପଦକ୍ଷେପ ନିଆଯିବ । କୌଣସି ଅଧିକାରୀ ମୋବାଇଲ ବନ୍ଦ କରିପାରିବେ ନାହିଁ । ସ୍ଥିତିର ମୁକାବିଲା ପାଇଁ ସପ୍ତାହର ୭ଦିନ ଅଫିସ ଖୋଲା ରହିବ । ଅନାବୃଷ୍ଟି ଓ ମରୁଡ଼ିର ପ୍ରତିକାର ପାଇଁ ଯୋଜନା ପ୍ରସ୍ତୁତ କରିବାକୁ ନିର୍ଦ୍ଦେଶ ଦିଆଯାଇଛି । ନିଜ ଅଞ୍ଚଳର ଅନାବୃଷ୍ଟି ଓ ଓ ସମ୍ଭାବ୍ୟ ମରୁଡ଼ିର ପ୍ରତିକାର ପାଇଁ ଫସଲ ବିବିଧିକରଣ ଓ ସମନ୍ୱିତ କୃଷି କାର୍ଯ୍ୟକ୍ରମକୁ ଆଖିରେ ରଖି ଜିଲ୍ଲାସ୍ତରରେ ଆପାତକାଳୀନ ଯୋଜନା ପ୍ରସ୍ତୁତ କରିବାକୁ କୁହାଯାଇଛି ।

ଏଥିରେ ସ୍ୱଳ୍ପ ମିଆଦି ଓ ମଧ୍ୟମ ମିଆଦି ଯୋଜନା ରହିବ । ଜଳ ଯୋଗାଣ ପାଇଁ ସୁବିଧା ଥିଲେ ଜଳ ସମ୍ପଦ ବିଭାଗ ସହ ଯୋଗାଯୋଗ କରିବାକୁ କୁହାଯାଇଛି । ପ୍ରତି ଶନିବାର ଅପରାହ୍ନରେ ବ୍ଲକ ଓ ଜିଲ୍ଲାସ୍ତରରେ ସମୀକ୍ଷା ବୈଠକ ହେବ । ଏଥିସହ ପଞ୍ଚାୟତସ୍ତରୀୟ ବୈଠକ ଯଥାରୀତି ଚାଲିବ । ସବୁ ରବିବାର ରାଜ୍ୟର ସବୁ ଅଧିକାରୀଙ୍କ ସହ ସମୀକ୍ଷା କରିବେ କୃଷି ମନ୍ତ୍ରୀ ।