spot_img
Home Blog Page 5532

ଜମାଦବନ୍ଦୀ ପାଇଁ ଗିରଫ ହୋଇପାରିବେନି ବିଦ୍ୟା, କିନ୍ତୁ ୯୦ ଭାଗ ଜଳିସାରିଥିବା ସୌମ୍ୟଙ୍କ ଠାରୁ କେମିତି ମିଳିଲା ଜମାନବନ୍ଦୀ ?

ପାରଳାଖେମୁଣ୍ଡି: ପାରଳାଖେମୁଣ୍ଡି ଏସିଏଫ୍‌ ସୌମ୍ୟରଞ୍ଜନ ମହାପାତ୍ରଙ୍କ ମୃତ୍ୟୁ ମାମଲାରେ ଗିରଫ ହୋଇପାରିବେନି ତାଙ୍କ ପତ୍ନୀ ବିଦ୍ୟାଭାରତୀ। ଏଥିପାଇଁ ରହିଛି ଆଇନଗତ ପ୍ରତିବନ୍ଧକ। ଗତ ୧୨ ତାରିଖରେ ସୌମ୍ୟ ପୋଡ଼ି ହେବା ପରେ ପାରଳାଖେମୁଣ୍ଡି ହସ୍‌ପିଟାଲରେ ମୃତ୍ୟୁକାଳୀନ ଜମାନବନ୍ଦୀରେ ଏହାକୁ ଏକ ଦୁର୍ଘଟଣା ବୋଲି ନିଜେ କହିଥିଲେ। ମାଜିଷ୍ଟ୍ରେଟଙ୍କ ଉପସ୍ଥିତିରେ ପୋଲିସ ସୌମ୍ୟଙ୍କ ମୃତ୍ୟୁକାଳୀନ ଜମାନବନ୍ଦୀ ରେକର୍ଡ କରିଥିଲା। ଏହାପରେ ୧୩ ତାରିଖରେ କଟକର ଏକ ଘରୋଇ ହସ୍ପିଟାଲରେ ସୌମ୍ୟଙ୍କ ମୃତ୍ୟୁ ହୋଇଥିଲା। ସୌମ୍ୟଙ୍କ ମୃତ୍ୟୁ ପରେ ପରିବାର ପକ୍ଷରୁ ଏହାକୁ ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଦର୍ଶାଇ ପାରଳାଖେମୁଣ୍ଡି ଥାନାରେ ବିଧିବଦ୍ଧ ଭାବେ ଲିଖିତ ଅଭିଯୋଗ କରାଯାଇଥିଲା।

ପୋଲିସ ଏହି ଅଭିଯୋଗ ଆଧାରରେ ୩ ଜଣଙ୍କ ନାଁରେ ୩୦୨ ଦଫାରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ତଦନ୍ତ ବେଳେ ପୋଲିସ ଡିଏଫ୍‌ଓ ସଂଗ୍ରାମ କେଶରୀ ବେହେରା ଓ ରୋଷେୟା ମନ୍ମଥ କୁମ୍ଭଙ୍କୁ କ୍ଲିନ ଚିଟ୍‌ ପ୍ରଦାନ କରିସାରିଛି। ମୃତ ସୌମ୍ୟଙ୍କ ପତ୍ନୀ ବିଦ୍ୟାଭାରତୀ ପଣ୍ଡାଙ୍କୁ ତାଙ୍କ ଗାଁରେ ଜେରା କରି ଆସିଛି। ତେବେ ବିଦ୍ୟାଭାରତୀଙ୍କୁ ଗିରଫ କରି ଜେରା କରିବା ପାଇଁ ସୌମ୍ୟଙ୍କ ଓକିଲ ବାରମ୍ବାର ଦାବି କରି ଆସୁଛନ୍ତି। ବିଶ୍ୱସ୍ତ ସୂତ୍ରରୁ ଜଣାପଡିଛି ଯେ ବିଦ୍ୟାଭାରତୀଙ୍କୁ ପୋଲିସ ଗିରଫ କରିବ ନାହିଁ। ରହିଥିବା ଆଇନଗତ ପ୍ରତିବନ୍ଧକ ବାବଦରେ ଯଦିଓ ପୋଲିସ ତର୍ଜମା କରୁଛି, ତଥାପି ଏହି ମାମଲା ଯେ ଆଗକୁ ଆଉ ବଢ଼ିବ ନାହିଁ ତାହା ଆପାତତଃ ସ୍ପଷ୍ଟ ହୋଇ ସାରିଛି।

ପୋଲିସ ବିଦ୍ୟାଭାରତୀଙ୍କୁ ଗିରଫ ନକଲେ ହାଇକୋର୍ଟଙ୍କ ଆଶ୍ରୟ ନିଆଯିବ ବୋଲି ସୌମ୍ୟଙ୍କ ପରିବାରର ଓକିଲ କହିଛନ୍ତି। ଦୁଇଦିନ ତଳେ ପାରଳାଖେମୁଣ୍ଡି ପୋଲିସ ବଲାଙ୍ଗୀର ଯାଇ ବିଦ୍ୟାଭାରତୀ ରହୁଥିବା ହଷ୍ଟେଲ ରୁମକୁ ସିଲ କରି ଆସିଛି। ସେଠାରେ ବିଭିନ୍ନ ଲୋକଙ୍କୁ ପୋଲିସ ଜେରା କରିଥିଲେ ମଧ୍ୟ କୌଣସି ବିଶେଷ ସୁରାକ ମିଳିନାହିଁ। ଅପରପକ୍ଷରେ ପ୍ରତିଦିନ ବିଦ୍ୟାଭାରତୀଙ୍କ ଗୋଟିଏ ଗୋଟିଏ ଘୃଣାପୂର୍ଣ୍ଣ ଚିଠି ଭାଇରାଲ ହେବାରେ ଲାଗିଛି। ସ୍ୱମୀଙ୍କ ପ୍ରତି ବିଦ୍ୟାଭାରତୀଙ୍କ ମନରେ ରହିଥିବା ପ୍ରଚଣ୍ଡ ଘୃଣା ଏହି ସବୁ ଚିଠିରୁ ସ୍ପଷ୍ଟ ଜଣାପଡୁଛି। ଗତକାଲି ସୌମ୍ୟଙ୍କ ଶବ ବ୍ୟବଚ୍ଛେଦ ରିପୋର୍ଟ ତାଙ୍କ ପରିବାରକୁ ହସ୍ତାନ୍ତର କରାଯାଇଛି। ଏହି ରିପୋର୍ଟରେ କୁହାଯାଇଛି ଯେ ସୌମ୍ୟ ୯୫ ପ୍ରତିଶତ ପୋଡ଼ିଯାଇଥିଲେ। ତାଙ୍କ ଦେହରୁ କିରୋସିନ ଗନ୍ଧ ଆସୁଥିଲା। ବ୍ୟବଚ୍ଛେଦର ୬ ଘଣ୍ଟା ପୂର୍ବରୁ ମୃତ୍ୟୁ ହୋଇଥିଲା। ଏହି ରିପୋର୍ଟ ଆସିବା ପରେ ପ୍ରଶ୍ନ ଉଠୁଛି ଯେ ୯୫ ପ୍ରତିଶତ ପୋଡ଼ିଯାଇଥିବା ଜଣେ ବ୍ୟକ୍ତିଙ୍କ ମୃତ୍ୟୁକାଳୀନ ଜମାନବନ୍ଦୀ କିଭଳି ପୋଲିସ ରେକର୍ଡ କରିବାରେ ସକ୍ଷମ ହେଲା କେମିତି ହେଲା ?

ସୌମ୍ୟ ପାରଳାଖେମୁଣ୍ଡି ହସପିଟାଲରେ ଥିବା ବେଳର ଦୃଶ୍ୟ ବିଭିନ୍ନ ଗଣମାଧ୍ୟମ କ୍ୟାମେରାରେ କଏଦ ହୋଇଛି। ଏହି ଦୃଶ୍ୟରୁ ସ୍ପଷ୍ଟ ହେଉଛି ଯେ ସୌମ୍ୟଙ୍କ ପାଟି ସମ୍ପୂର୍ଣ୍ଣ ଶକ୍ତ ହୋଇସାରିଥିଲା। ତେଣୁ ସେ ଉଚ୍ଚାରଣ କରିବା ସମ୍ଭବ ନୁହେଁ। ଏଥି ସହିତ ସୌମ୍ୟଙ୍କର ସଂଜ୍ଞା ମଧ୍ୟ ନଥିଲା। ତେଣୁ ପୋଲିସ କିପରି ତାଙ୍କ ମୃତ୍ୟୁକାଳୀନ ଜମାନବନ୍ଦୀ ରେକର୍ଡ କଲା ତାହା ଏବେ ବଡ଼ ପ୍ରଶ୍ନବାଚୀ। ସୌମ୍ୟଙ୍କ ମୃତ୍ୟୁ ମାମଲା ଆଗକୁ ବଢ଼ିବାରେ ତଥାକଥିତ ମୃତ୍ୟୁକାଳୀନ ଜମାନବନ୍ଦୀ ହିଁ ମୁଖ୍ୟ ପ୍ରତିବନ୍ଧକ ବୋଲି କୁହାଯାଉଛି।

ବୟସ ଆଗରେ ହାର ମାନିଲା ଖାଲଖମା, ଗୋଡ଼ି ବାଲି ବୋହି ରାସ୍ତା ମରାମତି କଲେ କୁନି କୁନି ପିଲା

 ଭଦ୍ରକ: ତୁମ ପରି ଛୋଟ ପିଲାଟିଏ, ରାସ୍ତା ସମତୁଲ କରିବା ପାଇଁ ଅଣ୍ଟା ଭିଡ଼ିଲେ। କୁନି କୁନି ପିଲାଙ୍କ ରାସ୍ତା ସମତୁଲ ଚିନ୍ତା, ରାସ୍ତା କଡରେ ପଡ଼ିଥିବା ଗୋଡିକୁ ବୋହି ନେଇ ଖାଲରେ ପକାଇ ସମତୁଲ କରିବାର ପ୍ରୟାସ। କିଏ ଅଖାରେ ବୋହି ନେଇଯାଉଛନ୍ତି ତ ଆଉ କିଏ ସାଇକେଲରେ ନେଇ ରାସ୍ତାରେ ଥିବା ଖାଲରେ ଢାଳି ସମାନ କରୁଛନ୍ତି। ଏହି ଚିତ୍ର ବୟାନ କରୁଛି, ଛୋଟ ପିଲା ବେଳେ ବହିରେ ପଢ଼ୁଥିବା ତୁମ ପରି ଛୋଟ ପିଲା ଟିଏ ଗାଁ ଚାହାଳୀର ଚାଟ ସିଏ ଉକ୍ତିଟି। ଦୃଶ୍ୟ ହେଉଛି ଭଦ୍ରକ ଗେଲଟୁଆ ଆଦିବାସୀ କଲୋନୀ ଠାରୁ ବଗମରା ଗାଁକୁ ସଂଯୋଗ କରୁଥିବା ରାସ୍ତାର।

ବର୍ଷା ଦିନ ହେଲେ ଏହି ରାସ୍ତାର ଅବସ୍ଥା ପୁରା ଶୋଚନୀୟ ହୋଇପଡେ। ଅନେକାଂଶରେ ଏହି ରାସ୍ତା କାର୍ଯ୍ୟ ଚାଲିଥିବା ବେଳେ, ଆହୁରି କିଛି ରାସ୍ତା ଅତ୍ୟନ୍ତ କଦର୍ଯ୍ୟ ହୋଇ ପଡ଼ିରହିଛି। ଫଳରେ ଯିବାଆସିବାରେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଲୋକ। ଶେଷରେ ନିର୍ବୋଧ, ନିଷ୍ପାପ କୁନି କୁନି ପିଲା ଏକ ହୋଇ ଏଭଳି ରାସ୍ତା ସମତୁଲ କରିବା ପାଇଁ ଅଣ୍ଟା ଭିଡ଼ିଥିଲେ। ଏହି ଘଟଣା ସମସ୍ତଙ୍କୁ ଚକିତ କରିଥିବା ବେଳେ, ଅନ୍ୟ ମାନଙ୍କ ପାଇଁ ନିଶ୍ଚିନ୍ତ ଶିକ୍ଷଣୀୟ। ପିଲା ମାନଙ୍କର ଏଭଳି କାର୍ଯ୍ୟକୁ ସାଧାରଣ ରେ ପ୍ରଶଂସା କରାଯାଇଛି।

ହଟ୍‌ସଟ୍‌ରୁ ଭିଡିଓ ଡିଲିଟ କରିବା ପାଇଁ ନିର୍ଦ୍ଦେଶ ଆସିଥିଲା ବୋଲି କହିଲେ କୁନ୍ଦ୍ରାଙ୍କ ୪ କର୍ମଚାରୀ

ନୂଆଦିଲ୍ଲୀ: ପର୍ଣ୍ଣୋଗ୍ରାଫିକ ଫିଲ୍ମ ମାମଲାରେ ଗିରଫ ରାଜ କୁନ୍ଦ୍ରାଙ୍କ ଲାଗି ବଢିଲା ଅଡୁଆ। କୁନ୍ଦ୍ରାଙ୍କ ୪ କର୍ମଚାରୀ କହିଛନ୍ତି, ବିଭିନ୍ନ କ୍ଲିପକୁ ଡିଲିଟ କରିଦେବା ଲାଗି ତାଙ୍କୁ ନିର୍ଦ୍ଦେଶ ଦିଆଯାଇଥିଲା। ଏହି କ୍ଲିପଗୁଡିକ ହଟସଟସରେ ଲୋଡ କରାଯାଇଥିଲା। ପୋଲିସ କହିଛି ଆଣ୍ଡ୍ରଏଡ ଫୋନ ଲାଗି ଗୁଗୁଲ ଆପ ଷ୍ଟୋରରୁ ଏବଂ ଆପଲର ଆପ୍ ଷ୍ଟୋରରୁ ହଟସଟସ ଆପକୁ ବାହାର କରି ଦିଆଯାଇଥିଲା। ଏହା ବଦଳରେ ବଲିଫେମ ଆପ୍ ଆରମ୍ଭ ହୋଇଥିଲା। ଗିରଫ ପରେ ପରେ ରେକର୍ଡରୁ ଅନେକ ଡାଟା ଡିଲିଟ କରିଦିଆଯାଇଥିଲା ବୋଲି ପୋଲିସ ତଦନ୍ତରୁ ଜାଣିପାରିଥିଲା।

ଗୁଇନ୍ଦା ବ୍ୟୁରୋର ଜଣେ ଅଧିକାରୀ କହିଛନ୍ତି, ଏହି ଘଟଣାରେ ୟଶ ଠାକୁର ନାମକ ଅନ୍ୟ ଜଣେ ବ୍ୟକ୍ତିଙ୍କ ସମ୍ପୃକ୍ତି ରହିଛି। ତେଣେ କାନପୁରରେ ଥିବା ରାଜ କୁନ୍ଦ୍ରା ଓ ପତ୍ନୀ ଶିଳ୍ପା ସେଟ୍ଟୀଙ୍କ ନାଁରେ ଥିବା ଆକାଉଣ୍ଟକୁ ସିଜ୍ କରିବା ଲାଗି ଷ୍ଟେଟ ବ୍ୟାଙ୍କ ଅଫ ଇଣ୍ଡିଆକୁ ନିର୍ଦ୍ଦେଶ ଦେଇଛି କ୍ରାଇମବ୍ରାଞ୍ଚ। ଏହି ଆକାଉଣ୍ଟରେ କୋଟି କୋଟି ଟଙ୍କା ଜମା ଥିବା ପୋଲିସ ଜାଣିବାକୁ ପାଇଛି। ତେଣେ ତଦନ୍ତରୁ ସ୍ପଷ୍ଟ ହୋଇଛି ରାଜ କୁନ୍ଦ୍ରାଙ୍କ ପ୍ରଡକ୍ସନ କମ୍ପାନୀକୁ ଅରବିନ୍ଦ ଶ୍ରୀବାସ୍ତବ ଚଳାଉଥିଲେ ଏବଂ ତାଙ୍କ ପତ୍ନୀ ହର୍ଷିତାଙ୍କ ଆକାଉଣ୍ଟକୁ ଟଙ୍କା ଟ୍ରାନ୍ସଫର ହେଉଥିଲା। ସେପଟେ ଏହି ମାମଲାରେ ସମନ ପାଇଥିବା ଅଭିନେତ୍ରୀ ଶରଲିନ ଚୋପ୍ରା ଆଗୁଆ ଜାମିନ ଲାଗି ବମ୍ବେ ହାଇକୋର୍ଟର ଦ୍ୱାରସ୍ଥ ହୋଇଛନ୍ତି ।

ସ୍ମାର୍ଟସିଟି ପ୍ରକଳ୍ପ କାରଣରୁ ହଟିବାକୁ ଥିବା ଯୋଦ୍ଧା ଘୋଡ଼ା ଆଉ ହଟିବ ନାହିଁ

ଭୁବନେଶ୍ୱର: ମାଷ୍ଟରକ୍ୟାଣ୍ଟିନ ଛକରୁ ହଟିବନି ଯୋଦ୍ଧା ଘୋଡ଼ା। ଯେଉଁଠି ଅଛି ଯୋଦ୍ଧା ଘୋଡ଼ା ସେଇଠି ହିଁ ରହିବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହସ୍ତକ୍ଷେପ ପରେ ଏଭଳି ଏକ ବଡ଼ ନିଷ୍ପତ୍ତି ନିଆଯାଇଛି। ସ୍ମାର୍ଟସିଟି ପ୍ରକଳ୍ପ କାରଣରୁ ସ୍ଥାପିତ ଘୋଡ଼ା ହଟିବା ଆବଶ୍ୟକ ପଡୁଛି। ଏକଥା ଜାଣିବା ପରେ ମୁଖ୍ୟମନ୍ତ୍ରୀ ଅସନ୍ତୋଷ ପ୍ରକାଶ କରିବା ସହ ଡିଜାଇନ ପରିବର୍ତ୍ତନ କରନ୍ତୁ ବୋଲି ନିର୍ଦ୍ଦେଶ ଦେଇଛନ୍ତି। ଏହାସହ ଘୋଡ଼ା ହଟିବନି ବୋଲି ସଫା ସଫା କହିଦେଇଛନ୍ତି।

ଓଡ଼ିଶାର ଅସ୍ମିତା ସହ ଖେଳାଯାଇପାରିବ ନାହିଁ। ଆକର୍ଷଣୀୟ ହେବ ଘୋଡା ଚାରିପାଖ। ପରେ ଏକ ଉଚ୍ଚସ୍ତରୀୟ ବୈଠକରେ ଘୋଡା ନହଟାଇବାକୁ ସ୍ଥିର ହୋଇଛି। ଏହାରି ଭିତରେ ଏକ ଟିମ୍ ଘୋଡା ସ୍ଥିତି ଅନୁଧ୍ୟାନ କରି ଫେରିଛନ୍ତି। ଗୋଡ଼ାରେ କିଛି ଫାଟ ଥିବା ଜଣାପଡିଛି। ଏ ସବୁର ମରାମତି କରାଯିବ। ମୂଳ କାରିଗର ନଥିବାରୁ କୁଶଳୀ କାରିଗରଙ୍କୁ ଆଣି ମୂର୍ତ୍ତି ମରାମତି ଦାୟିତ୍ୱ ଦିଆଯିବ।

ରାଜଧାନୀରେ ଡେଙ୍ଗୁରେ ଗଲା ପ୍ରଥମ ଜୀବନ, ୧୫ବର୍ଷର ବାଳକର ମୃତ୍ୟୁ

ଭୁବନେଶ୍ୱର: ବିଏମସି ନର୍ଥ ଯୋନ ଶୈଳଶ୍ରୀ ବିହାରରେ ଡେଙ୍ଗୁ ଜନିତ ପ୍ରଥମ ମୃତ୍ୟୁ ହୋଇଥିବା ସୂଚନା। ମୃତକ ଜଣକ ହେଲେ ୧୫ବର୍ଷର ବାଳକ। ଗତ କିଛିଦିନ ଧରି ସେ ଜ୍ୱରରେ ପୀଡିତ ଥିଲେ। ଗତକାଲି ଏକ ଘରୋଇ ହସ୍ପିଟାଲରେ ଭର୍ତ୍ତି ହେବା ପୂର୍ବରୁ ତାଙ୍କୁ ମୃତ ଘୋଷଣା କରାଯାଇଛି। ବିଏମସିର ନର୍ଥ ଯୋନରେ ବର୍ତ୍ତମାନ ସୁଦ୍ଧା ମୋଟ୍‌ ୫୬ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଥିବା ବିଏମସି ପକ୍ଷରୁ ସ୍ପଷ୍ଟ କରାଯାଇଛି। ତେବେ ଶୈଳଶ୍ରୀ ବିହାରର ମୃତ୍ୟୁବରଣ କରିଥିବା ବାଳକ ଡେଙ୍ଗୁରେ ଆକ୍ରାନ୍ତ ଥିଲେ ଅଥବା ଅନ୍ୟକିଛି କାରଣ ରହିଛି ତାହା ଜାଣିବାକୁ ବିଏମସି ପକ୍ଷରୁ ତନାଘନା ଜାରି ରହିଥିବା ଅତିରିକ୍ତ ସ୍ୱାସ୍ଥ୍ୟ ନିର୍ଦେଶକ ଡାକ୍ତର ଅନ୍ତର୍ଜାମି ମିଶ୍ର କହିଛନ୍ତି। ସେପଟେ ଡେଙ୍ଗୁ ପ୍ରତିକାର ପାଇଁ ଲୋକଙ୍କ ମଧ୍ୟରେ ସଚେତନତା ସୃଷ୍ଟି ସହ ସଫେଇ ଓ ମଶାଧୂଆଁ ଛାଡିବା ଆଦି କାର୍ଯ୍ୟ ତ୍ୱରାନ୍ୱିତ କରାଯାଇଥିବା ବିଏମସି ନର୍ଥ ଯୋନ ଯୋନଲ ଡେପୁଟି କମିଶନର।

ଭିଜିଲାନ୍ସ ଜାଲରେ ସମ୍ବଲପୁର ଧନକଉଡା BEO କାଯ୍ୟାଳୟର ମୁଖ୍ୟ କିରାଣି

ସମ୍ବଲପୁର: ଭିଜିଲ୍ଲାନ୍ସ ଜାଲରେ ପଡ଼ିଲେ ସମ୍ବଲପୁର ଧନକଉଡା BEO କାଯ୍ୟାଳୟର ମୁଖ୍ୟ କିରାଣି। ମୁଖ୍ୟ କିରାଣିଙ୍କ ନାମ ହେଉଛି ଦିଲିପ ଦେବ। ଆୟବର୍ହିଭୁତ ସମ୍ପତି ଠୁଳ ଅଭିଯୋଗରେ ସମ୍ବଲପୁର ଭିଜିଲାନ୍ସର ଚଢାଉ ଜାରି ରହିଛି। ଅଭିଯୋଗ ପରେ ଆଜି ସକାଳୁ ସକାଳୁ ଚଢ଼ାଉ କରିଥିଲା ଭିଜିଲାନ୍ସ ବିଭାଗ। ମୂଖ୍ୟ କିରାଣି ଦିଲିପ ଦେବଙ୍କ ଘରେ ଚାଲିଛି ଚଢାଉ କରିଛି ଟିମ। ତେବେ ଭିଜିଲାନ୍ନସର ସ୍ୱତନ୍ତ୍ର ବିଭାଗର ୫ ଜଣିଆ ଟିମ ଏସ୍‌ପିଙ୍କ ତତ୍ୱାବଧାନରେ ରଡ୍‌ କରୁଛନ୍ତି। ଏପର୍ଯ୍ୟନ୍ତ ୪ ଟି ବ୍ୟାଙ୍କ ଆକାଉଣ୍ଟ, ଚେକ୍‌, ଅଳଙ୍କାର ଏବଂ ବିଭିନ୍ନ ଗୁରୁତ୍ୱପୂର୍ଣ୍ଣ କାଗଜପତ୍ରକୁ ସିଜ୍‌ କରାଯାଇଛି। ତଦନ୍ତ ବେଳେ କେତେ ପରିମାଣର ଟଙ୍କା ମିଳିଲା ତାହା ତଦନ୍ତ ପରେ ଜଣା ପଡ଼ିବ।

ପଞ୍ଚାୟତ ନିର୍ବାଚନ ପୂର୍ବରୁ କର୍ମୀଙ୍କୁ ଗୁରୁମନ୍ତ୍ର ଦେବେ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ

କଳାହାଣ୍ଡି: ଆଗକୁ ଆସୁଛି ପଞ୍ଚାୟତ ନିର୍ବାଚନ। ନିର୍ବାଚନରେ ଭଲ ପ୍ରଦର୍ଶନ କରିବା ପାଇଁ ଏବେଠୁ ସଂଗଠନକୁ ମଝବୁତ କରିବା ପାଇଁ ଲାଗି ପଡ଼ିଲାଣି ବିଜେଡି। ପଞ୍ଚାୟତ ଏରିଆରେ କେମିତି ରହିଛି ରଣନୀତି କଣ ରହିବ ପ୍ଲାନ୍‌ ସେଥିପାଇଁ କଳାହାଣ୍ଡି ଗ୍ରସ୍ତରେ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ। ପଞ୍ଚାୟତ ନିର୍ବାଚନକୁ ଆଖି ଆଗରେ ରଖି କଳାହଣ୍ଡିରେ ତୃଣମୂଳ ସ୍ତରରେ କର୍ମୀକୁ ସୁଦୃଢ କରିବାକୁ ଗୁରୁମନ୍ତ୍ର ଦେବେ ପ୍ରଣବ ପ୍ରକାଶ ଦାସ। ତେବେ କରୋନାକୁ ଦୃଷ୍ଟିରେ ରଖି କୋଭିଡ କଟକଣା ଭିତରେ ହେବ କର୍ମୀ ସମ୍ମିଳନୀ। ପ୍ରଥମେ ସେ ନର୍ଲା ବିଧନସଭା ମଣ୍ଡଳୀ କଶ୍ରୁପଡା, ପରେ ଭବାନିପାଟଣା ନିର୍ବାଚନ ମଣ୍ଡଳୀର ପାଷ୍ଟିଗୁଡ଼ି ଏବଂ ଲାଞ୍ଜିଗଡ ନିର୍ବାଚନୀ ମଣ୍ଡଳୀର ରିସଗାଁରେ ଆୟୋଜିତ କାର୍ଯ୍ୟକ୍ରମରେ ଯୋଗଦେବେ। ସନ୍ଧ୍ୟାରେ ଭବାନୀପାଟଣା ମୁନିସିପାଲିଟିରେ କାର୍ଯ୍ୟରତ ସଫେଇ କର୍ମଚାରୀଙ୍କୁ ଭେଟିବା କାର୍ଯ୍ୟକ୍ରମ ରହିଛି।

ଆସାମ-ମିଜୋରାମ ସୀମା ବିବାଦରେ ୫ ଯବାନ ସହିଦ

ନୂଆଦିଲ୍ଲୀ: ଆସାମ-ମିଜୋରାମ ସୀମାରେ ତୁମୁଳ ସଂଘର୍ଷ। ସଂଘର୍ଷରେ ଆସାମ ପୋଲିସର ୫ ଜଣ ଅଫିସରଙ୍କ ମୃତ୍ୟୁ ଘଟିଥିବା ବେଳେ, ୫୦ରୁ ଅଧିକ ଲୋକ ଆହତ ହୋଇଛନ୍ତି। ଉତ୍ତେଜନା ପ୍ରବଣ ଅଞ୍ଚଳରେ ସିଆରପିଏଫ ଯବାନଙ୍କୁ ମୁତୟନ କରାଯାଇଛି। ଘଟଣା ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଆସାମ ଓ ମିଜୋରାମର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରି ସ୍ଥିତି ସମୀକ୍ଷା କରିଛନ୍ତି। ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱର୍ମା କହିଛନ୍ତି, ଆସାମ ପୋଲିସ ବିରୋଧରେ ମିଜୋରାମ ପୋଲିସ ଏପରିକି ହାଲୁକା ମେସିନଗନର ବ୍ୟବହାର କରିବା ଯୋଗୁ ସ୍ଥିତି ବିଗିଡିଛି।

ସେପଟେ ଆସାମର କାଚର ଜିଲ୍ଲା ଏସପିଙ୍କ ଦେହରେ ଗୁଳି ଲାଗିବାରୁ ସେ ଗୁରୁତର ଆହତ ହୋଇଛନ୍ତି। ଲୈଲାପୁରରେ ସଂରକ୍ଷିତ ଜଙ୍ଗଲକୁ ନଷ୍ଟ କରି ମିଜୋରାମ ଏକ ସଶସ୍ତ୍ର ଶିବିର ନିର୍ମାଣ କରିବାକୁ ନେଇ ଏହି ସଂଘର୍ଷ ଉପୁଜିଛି। ଶିବିର ପ୍ରତିଷ୍ଠାକୁ ଆସାମ ପୋଲିସ ବିରୋଧ କରିବା ପରେ ମିଜୋରାମ ପକ୍ଷରୁ ଗୁଳିଚାଳନା କରାଯାଇଥିଲା ବୋଲି ଆସାମ ସରକାର ଅଭିଯୋଗ କରିଛନ୍ତି। ସେପଟେ ଆସାମ ବିରୋଧରେ ପାଲଟା ଅଭିଯୋଗ କରିଛି ମିଜୋରାମ। କୋଲାସିବଠାରେ ଏକ ପୋଲିସ ଶିବିର ଉପରେ ଆସାମ ପ୍ରଥମେ ଆକ୍ରମଣ କରିଛି ବୋଲି ମିଜୋରାମ ଅଭିଯୋଗ କରିଛି।

ଶିଲଂରେ ସମସ୍ତ ଉତ୍ତରପୂର୍ବ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କେନ୍ଦ୍ର ଗୃହମନ୍ତ୍ରୀ ଆଲୋଚନା କରିବାର ଦୁଇ ଦିନ ପରେ ଏହି ସଂଘର୍ଷ ଚିନ୍ତାର କାରଣ ହୋଇଛି। ସଂଘର୍ଷକୁ ନେଇ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଓ ମିଜୋରାମ ମୁଖ୍ୟମନ୍ତ୍ରୀ ଜୋରମଥାଙ୍ଗା ପରସ୍ପର ବିରୋଧରେ ଘଟୁଥିବା ହିଂସାକୁ ନେଇ ଟ୍ୱିଟ ଯୁଦ୍ଧ ଚଳାଉଥିଲେ। ଆସାମର କାଚର, ହେଲକାଣ୍ଡି ଓ କରିମଗଞ୍ଜ ଜିଲ୍ଲା ସହ ମିଜୋରାମର ଆଇଜଲ, କୋଲାସିବ ଓ ମାମିତ ଜିଲ୍ଲାର ସୀମା ଲାଗିଛି। ଆସାମ ଓ ମିଜୋରାମ ମଧ୍ୟରେ ଆନ୍ତଃରାଜ୍ୟ ସୀମାର ଦୀର୍ଘତା ହେଉଛି ୧୬୪ କିଲୋମିଟର।

 

ୟେଦିୟୁରପ୍ପାଙ୍କ ପରେ କିଏ ହେବ କର୍ଣ୍ଣାଟକ ମୁଖ୍ୟମନ୍ତ୍ରୀ ?

ନୂଆଦିଲ୍ଲୀ: କର୍ଣ୍ଣାଟକ ରାଜନୀତିରେ ୟେଦିୟୁରପ୍ପା ଶାସନର ପତନ ପରେ ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବେ ତାହାକୁ ନେଇ ଚର୍ଚ୍ଚା। ନୂଆ ମୁଖ୍ୟମନ୍ତ୍ରୀ ଲାଗି ଆରମ୍ଭ ହୋଇଛି ରେସ୍। ନୂଆ ମୁଖ୍ୟମନ୍ତ୍ରୀ ବାଛିବା ଲାଗି ପର୍ଯ୍ୟବେକ୍ଷକ ଭାବେ ନିଯୁକ୍ତ ହୋଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେପି ଜାତୀୟ ସାଧାରଣ ସମ୍ପାଦକ ତଥା କର୍ଣ୍ଣାଟକ ପ୍ରଭାରୀ ଅରୁଣ ସିଂ । ଲିଙ୍ଗାୟତ୍ତ ସମ୍ପ୍ରଦାୟର ୟେଦିୟୁରପ୍ପାଙ୍କ ପରେ ଜଣେ ବ୍ରାହ୍ମଣଙ୍କୁ ମୁଖ୍ୟମନ୍ତ୍ରୀ କରାଯାଇପାରେ ବୋଲି ଚର୍ଚ୍ଚା ଜୋର ଧରିଛି। କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଷୀଙ୍କ ନାଁ ଏବେ ଆଗରେ ରହିଛି। ସେ ଜଣେ ବ୍ରାହ୍ମଣ ଓ ସମସ୍ତଙ୍କୁ ଧରି ଆଗକୁ ଯାଇପାରିବାର କ୍ଷମତା ତାଙ୍କ ନିକଟରେ ରହିଛି। ସେପଟେ ଭୋକାଲିଗା ସମ୍ପ୍ରଦାୟର ବି କାହାକୁ କରାଯାଇପାରେ ମୁଖ୍ୟମନ୍ତ୍ରୀ।

ଏକ୍ଷେତ୍ରରେ ଚର୍ଚ୍ଚାରେ ଅଛନ୍ତି ବିଜେପି ଜାତୀୟ ସମ୍ପାଦକ ସି.ଟି ରବି। ଯୋଶୀଙ୍କୁ ଯଦି ମୁଖ୍ୟମନ୍ତ୍ରୀ କରାଯାଏ, ତେବେ ଏହା ହେବ ୧୯୮୮ ପରଠାରୁ ସବୁଠାରୁ ବଡ ପଦକ୍ଷେପ। ଏହାଦ୍ୱାରା ରାଜ୍ୟରେ ଉଚ୍ଚବର୍ଗଙ୍କ ସମର୍ଥନ ପାଇପାରିବ ବିଜେପି। ତେଣେ ଯଦି ରବିଙ୍କୁ ମୁଖ୍ୟମନ୍ତ୍ରୀ କରାଯାଏ ତେବେ ଭୋକାଲିଗା ବହୁଳ ଦକ୍ଷିଣ କର୍ଣ୍ଣାଟକରେ ବିଜେପି ନିଜର ପ୍ରଭାବ ବଢାଇ ପାରିବ।

ଲିଙ୍ଗାୟତ୍ତ ସମ୍ପ୍ରଦାୟର ଥିବା ୟେଦ୍ୟୁରପ୍ପାଙ୍କ ପରେ ଏହି ସମ୍ପ୍ରଦାୟରୁ ବି କାହାକୁ ମୁଖ୍ୟମନ୍ତ୍ରୀ କରିବା ଲାଗି ପଦକ୍ଷେପ ନେଇପାରନ୍ତି ହାଇକମାଣ୍ଡ। ଯୋଷୀ ଏବେ ଧରଓ୍ୱାଡରୁ ସାଂସଦ ଅଛନ୍ତି। ସେ ୨୦୧୨ରୁ ୨୦୧୬ ଯାଏଁ ବିଜେପି ରାଜ୍ୟ ସଭାପତି ଥିଲେ। ଏହାସହ ଖଣିମନ୍ତ୍ରୀ ମୁରୁଗେଶ ନିରାନି, ଗୃହମନ୍ତ୍ରୀ ବାସବରାଜ ବୋମାଇ, ଉପମୁଖ୍ୟମନ୍ତ୍ରୀ ସିଏନ ଅଶ୍ୱଥ ନାରାୟଣ, ବିଧାୟକ ଅରବିନ୍ଦ ବେଲାଡଙ୍କ ନାଁ ବି ଚର୍ଚ୍ଚାରେ ରହିଛି। ତେଣେ ପ୍ରଭାରୀ ଅରୁଣ ସିଂହ କହିଛନ୍ତି, ଦଳର ସଂସଦୀୟ ବୋର୍ଡ ଓ ବିଧାୟକ ଦଳ ବୈଠକରେ ଏନେଇ ନିଷ୍ପତ୍ତି ନିଆଯିବ।

ସ୍ପେନ୍‌କୁ ୩-୦ରେ ହରାଇ ଟୋକିଓ ଅଲମ୍ମିକ୍ସରେ ବିଜୟ ରାସ୍ତାକୁ ଓହ୍ଲାଇଲା ଭାରତୀୟ ହକି ଦଳ

ନୂଆଦିଲ୍ଲୀ: ଟୋକିଓ ଅଲିମ୍ପିକ୍ସରେ ବିଜୟ ରାସ୍ତାକୁ ଫେରିଲା ଭାରତୀୟ ହକି ଟିମ୍। ପୁଲ୍-ଏର ତୃତୀୟ ମ୍ୟାଚରେ ସ୍ପେନକୁ ୩-୦ ଗୋଲରେ ମାତ୍ ଦେଇଛି ଭାରତୀୟ ହକି ଟିମ୍  । ଟିମ୍ ପକ୍ଷରୁ ରୂପିନ୍ଦର ପାଲ୍ ସର୍ବାଧିକ ୨ଟି ଗୋଲ୍ କରିଛନ୍ତି । ସିମରନଜିତ୍ ସିଂହ ଖୋଳର ୧୪ ମିନିଟରେ ଗୋଟିଏ ଗୋଲ ଦେଇଛନ୍ତି । ଗୁରୁବାର ଭାରତର ପରବର୍ତ୍ତୀ ମୁକାବିଲା ଆର୍ଜେଣ୍ଟିନା ବିପକ୍ଷରେ ହେବ ।  ଅଷ୍ଟ୍ରେଲିଆଠାରୁ ୧-୭ରେ ହାରିଥିବା ଭାରତୀୟ ଟିମ୍ ଆଜି ପୁରା ଦମରେ ଖେଳିଥିଲା । ଗ୍ରୁପ୍ ଏରେ ଦ୍ବିତୀୟ ନମ୍ବରରେ ରହିଛି ଭାରତୀୟ ହକି ଟିମ୍  । ୩ଟି ମ୍ୟାଚରୁ ଗୋଟିଏରେ ପରାଜୟ ଓ ୨ଟି ମ୍ୟାଚରେ ବିଜୟର ସ୍ବାଦ ଚାଖିଛି ଟିମ୍  ।