କୋଲକତା: ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଶେଷ ହୋଯାଇଛି କିନ୍ତୁ ପଶ୍ଚିମବଙ୍ଗର ଚର୍ଚ୍ଚିତ ନାରା ଭୁଲି ନାହାଁନ୍ତି ଦିଦି । ତୃଣମୂଳ କଂଗ୍ରେସ ଯେଉଁ ନାରା ପାଇଁ ଆଜି ତା ସରକାରକୁ ଫେରିଛି ସେହି ନାରା ଛାଡ଼ିବାକୁ ପ୍ରସ୍ତୁତ ନାହାନ୍ତି ମମତା ବାନାର୍ଜୀ । ଏବେ ଏହି ନାରା ‘ଖେଲା ହୋବେ’କୁ ଟିଏମସି ଦ୍ୱାରା ଏକ ଯୋଜନାର ରୂପ ଦିଆଯାଇଛି। ଏବଂ ପଶ୍ଚିମବଙ୍ଗରେ ‘ଖେଲା ହୋବେ’ ଯୋଜନା ଆରମ୍ଭ କରାଯାଇଛି।
ଏହି ଯୋଜନା ଅଧୀନରେ ବର୍ତ୍ତମାନ ରାଜ୍ୟ ସରକାରଙ୍କ କ୍ରୀଡ଼ା ବିଭାଗ ଦ୍ୱାରା କ୍ଲବଗୁଡ଼ିକୁ ଫୁଟବଲ ବଣ୍ଟନ କରାଯିବ । ଖେଳ ପ୍ରତି ଆଗ୍ରହ ବଢାଇବା ଏବଂ ଯୁବକମାନଙ୍କ ମଧ୍ୟରେ ଫୁଟବଲ ପ୍ରତି ଆଗ୍ରହ ବଢାଇବା ପାଇଁ ଏପରି ଯୋଜନା ପ୍ରସ୍ତୁତ କରାଯାଇଛି । ସରକାର ‘ଖେଲା ହୋବେ’ ଯୋଜନା ଅଧୀନରେ କ୍ଲବକୁ ଫୁଟବଲ ବଣ୍ଟନ କରିବେ, ଯାହା ଦ୍ୱାର ବହୁ ସଂଖ୍ୟକ ଯୁବକ ଏଥିରେ ଯୋଗ ଦେବେ । ପଶ୍ଚିମବଙ୍ଗ ସରକାରଙ୍କ କ୍ରୀଡ଼ା ବିଭାଗ ଅନୁଯାୟୀ, ଜୁଲାଇ ପ୍ରଥମ ସପ୍ତାହରୁ ଫୁଟବଲ ବଣ୍ଟନ ପ୍ରକ୍ରିୟା ଆରମ୍ଭ ହେବ। କେଉଁ କ୍ଲବକୁ କେମିତି ଓ କେତେ ଫୁଟବଲ୍ ଦିଆଯିବ ସେ ସମ୍ବନ୍ଧରେ ସୂଚନା ଦିଆଯିବ ।
ପଶ୍ଚିମବଙ୍ଗ ସରକାର କ୍ରୀଡା ମନ୍ତ୍ରଣାଳୟ ଦ୍ୱାରା ଜାରି କରିଥିବା ନିର୍ଦ୍ଦେଶ ଅନୁଯାୟୀ ଏନେଇ ପ୍ରତ୍ୟେକ ଜିଲ୍ଲାର ଯୁବ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ଏହି ନିର୍ଦ୍ଦେଶ ଅନୁସାରେ ଅଧିକାରୀମାନେ ପ୍ରତ୍ୟେକ ଜିଲ୍ଲାରେ ଉପସ୍ଥିତ ଥିବା କ୍ଲବଗୁଡ଼ିକର ତାଲିକା ପ୍ରସ୍ତୁତ କରିବେ ଯେଉଁ କ୍ଲବରେ ଫୁଟବଲ ଖେଳାଯାଉଥିବ । ଏହି ତାଲିକା କ୍ରୀଡା ମନ୍ତ୍ରଣାଳୟକୁ ପଠାଯିବ | ଏଥିପାଇଁ ଜୁନ୍ ୨୮ ତାରିଖ ସ୍ଥିର କରାଯାଇଛି ।
ଏହା ପରେ କ୍ଲବଗୁଡ଼ିକୁ ଫୁଟବଲ ଦିଆଯିବ । ଖେଲା ହୋବେ ଯୋଜନା ମାଧ୍ୟମରେ ରାଜ୍ୟରେ ଫୁଟବଲର ଲୋକପ୍ରିୟତାକୁ ପ୍ରୋତ୍ସାହିତ କରିବା ହେଉଛି ରାଜ୍ୟ ସରକାରଙ୍କ ଉଦ୍ଦେଶ୍ୟ। ଆପଣଙ୍କୁ କହି ରଖୁଛୁ ଯେ ଫୁଟବଲ ଖେଳ ପଶ୍ଚିମବଙ୍ଗରେ ଲୋକପ୍ରିୟ ହୋଇସାରିଛି।
