ନନ୍ଦିଘୋଷ ବ୍ୟୁରୋ: ଆଜି ନବୀନ ପଟ୍ଟନାୟକଙ୍କ ଶାସନର ପଞ୍ଚମ ପାଳି ୨ବର୍ଷପୂର୍ତ୍ତି ଦିବସ। ବଦଳୁଥିବା ଭାରତୀୟ ରାଜନୀତିକ ପରିବେଶରେ ଲଗାତାର ଏକ ସ୍ଥିର ଓ ସ୍ୱଚ୍ଛ ସରକାର ପ୍ରତିଷ୍ଠା କରି ନବୀନ ଯେତିକି ଚହଳ ପକାଇଛନ୍ତି ସେତିକି ଓଡ଼ିଆଙ୍କ ପାଖରେ ଓଡ଼ିଶାର ନବ ନିର୍ମାଣ ତଥା ପୁନର୍ଗଠନ ପାଇଁ ବନ୍ଦନୀୟ ବି ହୋଇଛନ୍ତି। ଆଉ ନବୀନଙ୍କ ଏହି ପରିବର୍ତ୍ତନ ରଥର ସାରଥି ହୋଇଛନ୍ତି ସଚିବ ଭି. କାର୍ତ୍ତିକେୟ ପାଣ୍ଡିଆନ୍। ଆଜି ତାଙ୍କଜନ୍ମ ଦିବସରେ ତାଙ୍କୁ ଅଶେଷ ଶୁଭେଚ୍ଛା। ଓଡ଼ିଶା ଲୋକଙ୍କ ପାଖରେ ପାଣ୍ଡିଆନ୍ ଭାବେ ପରିଚିତ ଏହି ଆଇଏଏସ୍ ଅଧିକାରୀଙ୍କ ଜନ୍ମ ହୁଏ ୧୯୭୪ ମସିହା ଆଜିର ଦିନରେ। ତାମିଲ୍ ମୂଳଭାଷୀ ପାଣ୍ଡିୟାନ୍ ଜଣେ ସରକାରୀ ଅଧିକାରୀ ଭାବେ ଓଡ଼ିଶା ଲୋକଙ୍କ ପାଖରେ ଆବିର୍ଭାବ ହୁଅନ୍ତି। ଆଉ ତାଙ୍କ ଦୁଃଖ ସୁଖ ଓ ଭାଷା ବୁଝି ତାହାକୁ ସମାଧାନ କରିବା ଲାଗି ଚେଷ୍ଟା କରନ୍ତି। ତାଙ୍କ କାର୍ଯ୍ୟ କରିବାର ଶୈଳୀ ଅନ୍ୟମାନଙ୍କଠୁ ଭିନ୍ନ ଓ ଅଭିନବ ତଥା ଲୋକ କେନ୍ଦ୍ରିକ ହେବା ହେତୁ ସେ ଅବିଳମ୍ବେ ଲୋକଙ୍କ ନିକଟତର ବି ହୋଇପାରନ୍ତି। ଏବେ ତ ସେ ଓଡ଼ିଆ ମାଟିର ଜ୍ୟୋଇଁ। ପୁଣି ନିଖୁଣ ଓଡ଼ିଆ କହିବା ଓ ଓଡ଼ିଆ ସଂସ୍କୃତିକୁ ସୁରକ୍ଷା ଦେବାରେ ଅନ୍ୟତମ ପୁରୋଧା।
ଓଡ଼ିଶା ପ୍ରଶାସନରେ ଜଣେ ଗମ୍ଭୀର ଓ କଡ଼ା ଅଧିକାରୀ ଭାବେ ସେ ପରିଚିତ। କିନ୍ତୁ ଥରେ ଯିଏ ତାଙ୍କ ସହ ମିଶିଛି ସେ କେବେ କଳ୍ପନାରେ ବି ଚିନ୍ତା କରିପାରିବ ନି ଯେ ସେ କେତେ ନିକଟତର ହୋଇପାରନ୍ତି ! କୁହନ୍ତୁ ବନ୍ଧୁ, ଭାଇ.. ଏମିତି। ତାଙ୍କର ସରଳ ପଣିଆ ଓ ଅନ୍ୟକୁ ସହାୟତା କରିବାର ଆଗ୍ରହ କେବେ ଜାଣିବାକୁ ଚାହିଁଲେ ଥରେ ବୁଲି ଆସନ୍ତୁ ଗୋପାଳପୁରଠାରେ ଥିବା ଶ୍ରଦ୍ଧା ସଞ୍ଜିବନୀକୁ। ଏହା ୨୦୦୭ ମସିହା କଥା, ଯେତେବେଳେ ପାଣ୍ଡିଆନ୍ ଗଞ୍ଜାମ ଜିଲ୍ଲାର ଜିଲ୍ଲାପାଳ ଥିଲେ ସେହି ସମୟରେ ଏଚ୍ଆଇଭି ଏଡ୍ସ୍ ମହାମାରୀ ରୂପେ ଆତଙ୍କ ସୃଷ୍ଟି କରୁଥାଏ । ଏବେ ଯେମିତି କରୋନା ଠିକ୍ ସେହିପରି। ଏହି ସମୟରେ ବାପା ମା’ ହରାଇଥିବା ଏଚ୍ଆଇଭି ଏଡ୍ସ ପ୍ରଭାବିତ ଶିଶୁଙ୍କୁ ବଞ୍ଚିବାର ଏକ ନୂଆ ରାହା ଦିଅନ୍ତି ପାଣ୍ଡିଆନ୍। ଶ୍ରଦ୍ଧା ସଞ୍ଜିବନୀ ନାମକ ଏହି ସଂସ୍ଥା ନିର୍ମାଣ କରି ଜିଲ୍ଲା ପ୍ରଶାସନ ପକ୍ଷରୁ ତାଙ୍କ ଥଇଥାନ ବ୍ୟବସ୍ଥା କରାଇଥିଲେ। । ପରବର୍ତ୍ତୀ ସମୟରେ ଏହି ଗୃହ ବାପା, ମା’ଛେଉଣ୍ଡ ପିଲାଙ୍କ ପାଇଁ ଆତ୍ମ ବିଶ୍ବାସର ଉତ୍ସ ପାଲଟିଛି।
କ୍ଷମତାସୀନ ଅଧିକାରୀ ଭାବେ ୨୦୦୦ ମସିହାରେ ପାଣ୍ଡିଆନ୍ ଓଡ଼ିଶା ଆସିଲେ। ଓଡ଼ିଶାର ରାଜନୀତିକ ଭିତ୍ତିଭୂମି ସେତେବେଳକୁ ବଦଳୁଥାଏ। ନବୀନଙ୍କନେତୃତ୍ବରେ ଓଡ଼ିଶା ନୂଆ ସ୍ବପ୍ନ ଦେଖୁଥାଏ। ଏହିସମୟରେ ପାଣ୍ଡିୟାନ୍ ଧର୍ମଗଡ଼ର ଉପ ଜିଲ୍ଲାପାଳ ଭାବେ ଚାଷୀ-ମିଲର ଭିତରେ ଥିବା ବିବାଦକୁ ସମାଧାନ କରିବାକୁ ଚାହିଁଲେ। ଚାଷୀ ଯେମିତି ତାଙ୍କ ପ୍ରାପ୍ୟ ଏମ୍ଏସ୍ପି ପାଇବେ ଏବଂ ସମବାୟ ସମିତିଗୁଡ଼ିକ ଯେମିତି ଲାଭ ପାଇପାରିବେ ସେଥିଲାଗି ବ୍ୟବସ୍ଥା କଲେ। ଏହାସେତେବେଳେ ଓଡ଼ିଶା ପ୍ରଶାସନରେ ଏକ ଉଦାହରଣ ସାଜିଲା। ଆଉ ମୁଖ୍ୟମନ୍ତ୍ରୀ ନବୀନଙ୍କ ନଜରକୁ ସେ ଆସିଲେ। ୨୦୦୨ ମସିହାରେ ସେ ଏଥିଲାଗି ମୁଖ୍ୟମନ୍ତ୍ରୀଙ୍କ ଦ୍ବାରା ସମ୍ବର୍ଦ୍ଧିତ ହୋଇଥିଲେ। ଏହାପରେ ରାଉରକେଲାର ଅତିରିକ୍ତ ଜିଲ୍ଲାପାଳ ଭାବେ ଛେଣ୍ଡ ବଜାରରେ ଜବରଦଖଲ ଉଚ୍ଛେଦ ରାଉରକେଲାବାସୀଙ୍କ ଲାଗି ଏକ ବରଦାନ କାର୍ଯ୍ୟ ହୋଇଥିଲା।
ରାଉରକେଲାରୁ ସେତେବେଳେ ଭାରତର ସର୍ବ କନିଷ୍ଠ ଜିଲ୍ଲାପାଳ ଭାବେ ପାଣ୍ଡିଆନଙ୍କ ବଦଳି ହେଲା ମୟୂରଭଞ୍ଜ। ଏହି ଯୁବ ଜିଲ୍ଲାପାଳ ନିଜର କାମ ପାଇଁ ସେତେବେଳେ ଭାରତ ସରକାରଙ୍କ ଦ୍ୱାରା ପ୍ରଶଂସିତ ହେଲେ। ଜାତୀୟ ଭିନ୍ନକ୍ଷମ ଚିହ୍ନଟ ଓ ଥଇଥାନ ପାଇଁ ସେ ରାଷ୍ଠ୍ରପତିଙ୍କ ଦ୍ବାରା ପୁରସ୍କୃତ ହେଲେ। ଜିଲ୍ଲା ନୁହେଁ ବରଂ ଗାଁ ବା ବ୍ଲକ ସ୍ତରରୁ ଭିନ୍ନକ୍ଷମଙ୍କୁ ଚିହ୍ନଟ କରିବା ପାଇଁ ସେ ଯେଉଁ ମାପଦଣ୍ଡ ସ୍ଥିର କଲେ ତାହା ପରବର୍ତ୍ତୀ ସମୟରେ ରାଜ୍ୟ ସରକାର ନୀତିଗତ ଭାବେ ଗ୍ରହଣ କରିଲେ। ଖାଲି ସେତିକି ନୁହେଁ, ଗଞ୍ଜାମ ଜିଲ୍ଲାପାଳ ଥିବା ସମୟରେ ଏନ୍ଆର୍ଇଜିଏ ଅଧୀନରେ ହିତାଧିକାରୀଙ୍କୁ ଯେଉଁ ନଗଦ ମଜୁରୀ ପ୍ରଦାନ ବ୍ୟବସ୍ଥା ଥିଲା ସେ ସେଥିରେ ପରିବର୍ତ୍ତନ ଆଣିଲେ। ପ୍ରଥମ ଥର ପାଇଁ ବ୍ୟାଙ୍କ ଆକାଉଣ୍ଟ ମାଧ୍ୟମରେ ମଜୁରୀ ପ୍ରଦାନ ବ୍ୟବସ୍ଥା ହେଲା। ଏହା ଭାରତ ସରକାର ପରବର୍ତ୍ତୀ ସମୟରେ ଗ୍ରହଣ କରିଲେ। ପାଣ୍ଡିଆନଙ୍କ ଏହି ନୀତି ତାଙ୍କର ତୃଣମୂଳ ସ୍ତରର ଧାରଣାକୁ ସ୍ପଷ୍ଟ କରିବା ସହ ଦୁର୍ନୀତିକୁ ଦୂର କରିବାରେ ସହାୟକ ହେଲା।
୨୦୧୧ ମସିହାରେ ପାଣ୍ଡିଆନଙ୍କୁ ମୁଖ୍ୟମନ୍ତ୍ରୀଙ୍କ ଦପ୍ତରରେ କାମ କରିବାର ସୁଯୋଗ ମିଳିଲା। ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭାବେ ସେ ନିଯୁକ୍ତ ହେଲେ। ନିଜର କର୍ତ୍ତବ୍ୟନିଷ୍ଠା, ଉତ୍ସର୍ଗ ଓ ଲୋକଙ୍କ ପାଖରେ ସରକାରୀ ନୀତିକୁ ପହଞ୍ଚାଇବା ପାଇଁ ତାଙ୍କର ବିଚକ୍ଷଣ ବୁଦ୍ଧି ତାଙ୍କୁ ମୁଖ୍ୟମନ୍ତ୍ରୀଙ୍କ ନିକଟତର କରିଲା। ଦିନକୁ ଦିନ ତାଙ୍କ ଉପରେ ମୁଖ୍ୟମନ୍ତ୍ରୀଙ୍କ ଭରସା ବଢ଼ିଲା। ସେ ହେଲେ ମୁଖ୍ୟମନ୍ତ୍ରୀଙ୍କ ସବୁଠାରୁ ଭରସାଯୋଗ୍ୟ ଅଧିକାରୀ। ତାଙ୍କ ଦ୍ବାରା ମୁଖ୍ୟମନ୍ତ୍ରୀଙ୍କ ପରିକଳ୍ପିତ ଓଡ଼ିଶାର ପ୍ରଗତିରଥକୁ ତ୍ବରାନ୍ବିତ କରିବା ଲାଗି ନବୀନ ତାଙ୍କୁ ଅଧିକ କ୍ଷମତା ଦେଲେ। ନୂଆକରି ୫-ଟି ବିଭାଗ ଖୋଲି ତାହାର ମୁଖ୍ୟ କରାଇଲେ। ଆଉ ଏବେ ଏହାର ସୁଫଳ ଓଡ଼ିଶାବାସୀ ଅନୁଭବ କରୁଛନ୍ତି।
ଶ୍ରୀକ୍ଷେତ୍ର ପୁରୀର ପରିବର୍ତ୍ତନ କଥା କୁହନ୍ତୁ କି ଲିଙ୍ଗରାଜ କ୍ଷେତ୍ର ଅଥବା ଘଟଗାଁ ତାରିଣୀ, ବିରଜା କ୍ଷେତ୍ର, ତାରାତାରିଣୀଙ୍କ ମନ୍ଦିର, ସମଲେଶ୍ବରୀଙ୍କ ପୀଠ ସବୁଠି ପରିବର୍ତ୍ତନ ଓ ବିକାଶର ପଦଧ୍ବନି ଦେଖିବାକୁ ମିଳୁଛି। ପୁଣି କେବଳ ହିନ୍ଦୁ ଦେବାଦେବୀଙ୍କ ମନ୍ଦିର ନୁହେଁ, ଓଡ଼ିଶାରେ ସଂସ୍କୃତିର ବିକାଶ ସ୍ରୋତକୁ ଧର୍ମ ନିରପେକ୍ଷ ଧାରାରେ ପରିଚାଳିତ କରିବା ଲାଗି କଟକର ମାଉଣ୍ଟ ହାଉସ୍ ଚର୍ଚର ପୁନର୍ବିନ୍ୟାସ କରାଯାଇଛି। ଭଦ୍ରକର ପ୍ରସିଦ୍ଧ ଦର୍ଘା-ଏହଜୁର ମସ୍ଜିଦ୍, ଭୁବନେଶ୍ବରର ଜାମା ମସ୍ଜିଦ୍, ସୁନ୍ଦରଗଡ଼ର ଗୁରୁଦ୍ବାର ପ୍ରଭୃତିରେ ଏହି ପୁନର୍ବିନ୍ୟାସର ଝଲକ ଦେଖିବାକୁ ମିଳିଛି।
ରାଜ୍ୟରେ ସ୍ବାସ୍ଥ୍ୟସେବାକୁ ଗୁରୁତ୍ବ ଦେଇ ତାହାର ବିକାଶ ପାଇଁ ମୁଖ୍ୟମନ୍ତ୍ରୀଙ୍କ ନିର୍ଦେଶକୁ କାର୍ଯ୍ୟରେ ଲଗାଇଛନ୍ତି ୫-ଟି ସଚିବ ପାଣ୍ଡିଆନ୍। କଟକ ଶ୍ରୀରାମଚନ୍ଦ୍ର ହସ୍ପିଟାଲ୍ ଓ କଲେଜକୁ ୫୦୦୦ ଶଯ୍ୟା ବିଶିଷ୍ଟ ବିଶ୍ବସ୍ତରୀୟ ମେଡିକାଲ୍ କଲେଜ୍ ଓ ହସ୍ପିଟାଲ୍ରେ ପରିଣତ ପାଇଁ କାର୍ଯ୍ୟ ଆରମ୍ଭ ହୋଇଛି। ଏଥିଲାଗି ୩୫୦୦ କୋଟି ଯଙ୍କା ଖର୍ଚ ହେବ ବୋଲି ଆକଳନ ହୋଇଛି। ପ୍ରତି ଜିଲ୍ଲା ସଦର ମହକୁମା ହସ୍ପିଟାଲ୍ଗୁଡ଼ିକର ନବୀକରଣ କରାଯାଇଛି। ଆଉ ଏବେ ମହାମାରୀ ସମୟରେ ରାଜ୍ୟର ସ୍ବାସ୍ଥ୍ୟ ବ୍ୟବସ୍ଥାକୁ ପରିଚାଳନା କରିବା ପାଇ ବିଶେଷ ଧ୍ୟାନ ଦେଇଛନ୍ତି ସେ। ରାଜ୍ୟରେ ଯେମିତି ସମସ୍ତେ ଚିକିତ୍ସା ସୁବିଧା ପାଇବେ ସେଥିଲାଗି ବିଭିନ୍ନ ସ୍ଥାନରେ କୋଭିଡ୍ ହସ୍ପିଟାଲ୍ ସାଙ୍ଗକୁ ରାଜ୍ୟବାସୀଙ୍କୁ ମାଗଣାରେ ଚିକିତ୍ସା ସେବା ଏବଂ ଚିକିତ୍ସା ପାଇଁ ଆବଶ୍ୟକ ଔଷଧ ଓ ଟିକା ମାଗଣାରେ ବ୍ୟବସ୍ଥା କରିଛନ୍ତି ରାଜ୍ୟ ସରକାର।
ପରିବର୍ତ୍ତନର ସାରଥି ଭାବେ ଓଡ଼ିଶାକୁ ହକିର ଏନ୍ତୁଡ଼ିଶାଳ ଭାବେ ଖ୍ୟାତି ଦେବା ଲାଗି ମୁଖ୍ୟମନ୍ତ୍ରୀଙ୍କ ପ୍ରୟାସକୁ ପାଣ୍ଡିଆନ୍ ଆଗକୁ ନେଇଛନ୍ତି। ହକି ବିଶ୍ବକପ୍ ଆୟୋଜନ ଏହାର ନିଦର୍ଶନ। ଏହାଛଡ଼ା ଆଗକୁ ପରବର୍ତ୍ତୀ ହକି ବିଶ୍ୱକପ୍ ୨୦୨୩ ଆୟୋଜନ ପାଇଁ ଅଣ୍ଟା ଭିଡ଼ିବା ଆଉ ଏକ ଗୌରବମୟ ମୁହୂର୍ତ୍ତ। ବିଭିନ୍ନ ଷ୍ଟାଡିୟମ୍ ଏହି ଶାସନ ସମୟରେ ପୁନରୁଦ୍ଧାର ହୋଇପାରିଛି । ହକି ପ୍ରତି ତାଙ୍କର ଆଗ୍ରହକୁ ପ୍ରଶଂସା କରିଛି ଆନ୍ତର୍ଜାତୀୟ ହକି ସଂଘ । ଏଥିଲାଗି ନିକଟରେ ପାଣ୍ଡିଆନଙ୍କୁ ପ୍ରେସିଡେଣ୍ଟ ପୁରସ୍କାର ପ୍ରଦାନ କରାଯାଇଛି। କର୍ମଚାରୀ ଓ ଅଧିକାରୀ ମାନଙ୍କ ସହ ସୁ ସମ୍ପର୍କ ଏବଂ ସେମାନଙ୍କୁ ପରିଚାଳନା କରିବାର ଦକ୍ଷତା ନଥିଲେ ପାଣ୍ଡିଆନଙ୍କୁ ଏତେ ସଫଳତା କେବେ ମିଳି ନଥାଆନ୍ତା। ଟିମ୍ ୱାର୍କରେ ବିଶ୍ବାସ କରୁଥିବା ପାଣ୍ଡିଆନ୍ କେବେ କୌଣସି କାମକୁ ଛୋଟ ବା ବଡ଼ ଭାବନ୍ତି ନାର୍ହି। ଏମିତିକି ପରିସ୍ଥିତି ଆସିଲେ ସେ ମୁଖ୍ୟମନ୍ତ୍ରୀଙ୍କ ଡ୍ରାଇଭର ବି ପାଲଟି ପାରନ୍ତି। ତାହା ବି ଦେଖିବାକୁ ମିଳିଥିଲା ୨୦୨୦ ମସିହାରେ ଯେତେବେଳେ ମୁଖ୍ୟମନ୍ତ୍ରୀଙ୍କ କାରକୁ ସେ ଚଳାଇ ସ୍ବାଧୀନତା ଦିବସ ସମାରୋହକୁ ଆସିଥିଲେ।
ଫିଜିଓଲୋଜିରେ ସ୍ନାତ୍ତକୋତ୍ତର ପାଠ୍ୟକ୍ରମ ପ୍ରଥମ ଶ୍ରେଣୀରେ ଉତ୍ତୀଣ୍ଣ ହୋଇଥିବା ପାଣ୍ଡିଆନ୍ ୨୦୦୦ ମସିହାରେ ଓଡ଼ିଶା କ୍ୟାଡର ଆଇଏଏସ୍ ଅଧିକାରୀ ଭାବେ ନିଯୁକ୍ତ ହୋଇଥିଲେ। ସେହିଦିନଠାରୁ ଓଡ଼ିଶା ସରକାରଙ୍କ ଅଧୀନରେ ବିଭିନ୍ନ କାର୍ଯ୍ୟକ୍ରମ ଓ ଦାୟିତ୍ୱକୁ ସୁପରିଚାଳନା କରିବା ନଜର ଆସିଛନ୍ତି। ସେ ଓଡ଼ିଶାର କେନ୍ଦ୍ରାପଡ଼ା ଜିଲ୍ଲାରେ ବିବାହ କରିଛନ୍ତି। ଏକଦା ଜାମସେଦପୁରରେ ଶିଶୁରୋଗ ଚିକିତ୍ସକ ଭାବେ ଖ୍ୟାତି ଅର୍ଜନ କରିଥିବା ଅକ୍ଷୟ କୁମାର ରାଉତଙ୍କଝିଅ ତଥା ବର୍ତ୍ତମାନର ମିଶନ ଶକ୍ତି ବିଭାଗ ସଚିବ ଆଇଏସ୍ ଅଧିକାରୀ ସୁଜାତା କାର୍ତ୍ତିକେୟ ହେଉଛନ୍ତି ତାଙ୍କ ପତ୍ନୀ। ତାଙ୍କର ଜଣେ ପୁଅ ଏବେ ଅଧ୍ୟୟନରତ। ଆଜି ତାଙ୍କରି ୪୭ତମ ଜନ୍ମ ଦିବସରେ ନନ୍ଦିଘୋଷ ଡିଜିଟାଲ୍ ପରିବାର ପକ୍ଷରୁ ତାଙ୍କର ଉତ୍ତରୋତ୍ତର ଉନ୍ନତି କାମ୍ୟ କରୁଛୁ। ଓଡ଼ିଶାର ପ୍ରଗତୀ ସେମିତି ବଢ଼ିଚାଲୁ। ଶ୍ରୀ ଜଗନ୍ନାଥଙ୍କ ଆସ୍ଥା ତାଙ୍କ ଉପରେ ନିରନ୍ତର ରହୁ।
