ନୂଆଦିଲ୍ଲୀ: ସୁପ୍ରିମକୋର୍ଟରେ ପହଞ୍ଚିଲା କରୋନା ଟିକାର ଦ୍ବିତୀୟ ଡୋଜ୍ ଅବଧି ମାମଲା । ସରକାର କରୋନା ଟିକାର ଦ୍ବିତୀୟ ଡୋଜ୍ ର ସମୟ ବ୍ୟବଧାନକୁ ବାରମ୍ବାର ବଦଲାଉଥିବାରୁ ଏହାକୁ ନେଇ ସୁପ୍ରିମକୋର୍ଟର ଦ୍ବାରସ୍ଥ ହୋଇଛି ଶ୍ରୀ ଜଗନ୍ନାଥ ସେନା । ଟିକାକରଣକୁ ନେଇ କେନ୍ଦ୍ର ସରକାରଙ୍କ ଭିନ୍ନ ଭିନ୍ନ ନୀତିକୁ ନେଇ ଅନେକ ପ୍ରଶ୍ନ ଉଠୁଛି । ଟିକା ଅଭାବ ଯୋଗୁଁ ସରକାର ବାରମ୍ବାର ଟିକାକରଣ ନୀତିରେ ପରିବର୍ତ୍ତନ କରୁଛନ୍ତି, ଏହା ଦ୍ବାରା ଲୋକ ବିଚଳିତ ହେଉଥିବା କହିଛି ଶ୍ରୀ ଜଗନ୍ନାଥ ସେନା । ଏଣୁ ସୁପ୍ରିମକୋର୍ଟ ଘଟଣାର ହସ୍ତକ୍ଷେପ କରିବା ପାଇଁ ଦାବି ହୋଇଛି ।
ଅଶ୍ୱେତ ଜର୍ଜ ଫ୍ଲାୟଡଙ୍କୁ ଆଣ୍ଠୁରେ ଚାପି ହତ୍ୟା କରିଥିବା ପୋଲିସ କର୍ମଚାରୀଙ୍କୁ ୨୨ବର୍ଷର ଜେଲ ଦଣ୍ଡ
ମିନିୟାପୋଲିସ୍: ଆମେରିକାରେ ଅଶ୍ୱେତ ଜର୍ଜ ଫ୍ଲାୟଡଙ୍କ ହତ୍ୟା ଘଟଣାରେ ମିନିୟାପୋଲିସର ପୂର୍ବତନ ପୋଲିସ ଅଧିକାରୀ ଡେରେକ ଚାଉଭିନଙ୍କୁ ୨୨ ବର୍ଷ ୬ ମାସର କାରାଦଣ୍ଡରେ ଦଣ୍ଡିତ କରାଯାଇଛି। ଚାଉଭିନ, ଫ୍ଲୟଡଙ୍କ ବେକକୁ ଆଣ୍ଠୁରେ ଚିପି ଦେଇଥିଲେ, ଯେଉଁଥି ପାଇଁ ଶ୍ୱାସରୁଦ୍ଧ ହୋଇ ତାଙ୍କର ମୃତ୍ୟୁ ହୋଇଯାଇଥିଲା । ଏହି ଘଟଣା ପରେ ଆମେରିକାରେ ଜାତିଗତ ଭେଦଭାବ ବିରୋଧରେ ସବୁଠୁ ବଡ଼ ଆନ୍ଦୋଳନ ହୋଇଥିଲା ।
ଫ୍ଲୋଇଡଙ୍କ ମୃତ୍ୟୁକୁ ନେଇ ଚାଉଭିନ ସମବେଦନା ଜଣାଇଛନ୍ତି
ଏହି ନିଷ୍ପତ୍ତି ଏପରି ଏକ ସମୟରେ ଆସିଥିଲା ଯେତେବେଳେ ପ୍ରାୟ ଏକ ବର୍ଷ ନୀରବତା ପରେ ଚାଉଭିନ ଫ୍ଲୟଡଙ୍କ ପରିବାରକୁ ସମବେଦନା ଜଣାଇଥିଲେ ଏବଂ ଏହାପରେ ତାଙ୍କୁ କିଛି ଶାନ୍ତି ମିଳିବ ବୋଲି ଆଶା କରିଥିଲେ। ଜଣେ ଅଶ୍ୱେତ ବ୍ୟକ୍ତିଙ୍କ ହତ୍ୟା ପାଇଁ ପୋଲିସ ଅଧିକାରୀଙ୍କୁ ଦିଆଯାଇଥିବା ଏହା ହେଉଛି ଦୀର୍ଘତମ ଜେଲ ଦଣ୍ଡ।
ତେବେ ଫ୍ଲୟଡଙ୍କ ପରିବାର ଏବେ ବି ନିରାଶ ହୋଇଛନ୍ତି । କାରଣ ଏହି ଅପରାଧ ପାଇଁ ଉଭିନଙ୍କୁ ୩୦ ବର୍ଷ ଜେଲ ଦଣ୍ଡର ଦାବି କରିଥିଲେ ପରିବାର ସଦସ୍ୟ । ଭଲ ଆଚରଣ ପରେ ୪୫ ବର୍ଷିୟ ଚାଉଭିନଙ୍କୁ ଦଣ୍ଡର ଦୁଇ ତୃତୀୟାଂଶ ପୂରଣ କରିବା ପରେ କିମ୍ବା ପ୍ରାୟ ୧୫ ବର୍ଷ ଜେଲରେ ରହିବା ପରେ ଜାମିନରେ ଆସିପାରନ୍ତି । ମିନିୟାପୋଲିସ୍ ବିରୋଧୀ ନେତା ନେକିମା ଲେବି ଆର୍ମଷ୍ଟ୍ରଙ୍ଗ କହିଛନ୍ତି ଯେ, କେବେଳ ଦଣ୍ଡର ଅବଧି ଅଧିକ ହେବା ଯଥେଷ୍ଟ ନୁହେଁ।
ସର୍ବାଧିକ ଦଣ୍ଡ ଦାବି
ଫ୍ଲୟଡଙ୍କ ପରିବାରର ଓକିଲ ବେନ କ୍ରମ୍ପ କହିଛନ୍ତି ଯେ, ପରିବାର ଆଶା ଅଛି ଯେ, ଚାଉଭିନଙ୍କୁ ଆଗାମୀ ସଂଘୀୟ ନାଗରିକ ଅଧିକାରର ଶୁଣାଣି ସମୟରେ ସର୍ବାଧିକ ଦଣ୍ଡ ଦିଆଯିବ । ସେ କହିଛନ୍ତି ଯେ, ଏହା ମିନିସୋଟାରେ ଜଣେ ପୋଲିସ ଅଧିକାରୀଙ୍କୁ ମିଳିଥିବା ଦୀର୍ଘତମ ଦଣ୍ଡ ଅଟେ। କିନ୍ତୁ ପ୍ରକୃତ ନ୍ୟାୟ ସେତେବେଳେ ହେବ ଯେତେବେଳେ ଆମେରିକାର ଅଶ୍ୱେତ ବା କଳା ପୁରୁଷ ଏବଂ ମହିଳାମାନେ ରଙ୍ଗ କାରଣରୁ ପୋଲିସ ଦ୍ୱାରା ହତ୍ୟା ହେବାର ଭୟ କରିବେ ନାହିଁ ।
ଗୁରୁତର ରୋଗୀଙ୍କୁ ଖଟରେ ବୋହି ନଦୀ ପାର୍ କରି ଆଣିଲେ ଆମ୍ବୁଲାନ୍ସ କର୍ମଚାରୀ
ରାଉରକେଲା: ନଦୀରେ ବର୍ଷା ଜଳର ତ୍ସୋତ । ରୋଗୀଙ୍କ ପାଖରେ ପହଞ୍ଚି ପାରିଲାନି ଆମ୍ବୁଲାନ୍ସ । ବର୍ଷା ଜଳକୁ ଖାତିର୍ କଲେନି ଆମ୍ବୁଲାନ୍ସ କର୍ମଚାରୀ । ଗୁରୁତର ଥିବା ଜଣେ ରୋଗୀଙ୍କୁ ଖଟରେ ବୋହି ଆମ୍ବୁଲାନ୍ସ ପର୍ଯ୍ୟନ୍ତ ଆଣିଲେ । ଆମ୍ବୁଲାନ୍ସ କର୍ମଚାରୀଙ୍କ ଏଭଳି ଉଦ୍ୟମ ପାଇଁ ତାଙ୍କୁ ସବୁଆଡ଼ୁ ପ୍ରଶଂସା କରାଯାଉଛି । ଏଭଳିଘଟଣା ଦେଖିବାକୁ ମିଳିଛି ସୁନ୍ଦରଗଡ଼ ଜିଲ୍ଲା ବାଲିଶଙ୍କରା ବ୍ଲକ ତଳସରା ପଞ୍ଚାୟତର କୁମଡ଼ାଫାଲ ଗାଁରେ ।

ରୋଗୀଙ୍କ ସମ୍ପର୍କୀୟଙ୍କ ସହ ମିଶି ଆମ୍ବୁଲାନ୍ସ କର୍ମଚାରୀ ରୋଗୀକୁ ଖଟିଆରେ ଵୋହି ଆଣିଛନ୍ତି । କୁମଡ଼ାଫାଲ ସମେତ ଆଖପାଖ ଅଞ୍ଚଳର ଗାଁ ଲୋକ ନଦୀ ପାର୍ ହୋଇ ବ୍ଲକ ମୁଖ୍ୟାଳୟ, ଡାକ୍ତରଖାନା ସମେତ ବିଭିନ୍ନ କାମରେ ଆସନ୍ତି । ରାସ୍ତା ନଥିବା ଓ ନଦୀ ପାର୍ ହୋଇ ଯିବାକୁ ପଡ଼ୁଥିବାରୁ ଗାଁକୁ ଆମ୍ବୁଲାନ୍ସ କି ଅନ୍ୟ ଗାଡ଼ି ପହଞ୍ଚି ପାରେ ନାହିଁ । ଫଳରେ କାହାର ଦେହ ଖରାପ ହେଲେ ଖଟିଆରେ ୨ କିଲୋମିଟର ଯାଏ ବୋହି ଆଣିବାକୁ ପଡ଼ିଥାଏ ।
କୁମଡ଼ଫାଲ ଗାଁର ଜଣେ ଯୁବକ ବିଷ ପିଇ ଗୁରୁତର ହୋଇ ପଡ଼ିଥିଲେ । ୧୦୮କୁ ଫୋନ୍ କରି ଡାକିଥିଲେ ଘର ଲୋକେ । ନାଳରେ ବର୍ଷା ପାଣି ଚାଲୁଥିବାକୁ ଗାଁକୁ ଆମ୍ବୁଲାନ୍ସ ଯାଇପାରି ନଥିଲା । ଫଳରେ ଗାଁ ଲୋକ ଓ ଆମ୍ବୁଲାନ୍ସ କର୍ମଚାରୀ ଗୁରୁଚତରଙ୍କୁ ଖଟିଆରେ ଆମ୍ବୁଲାନ୍ସ ପର୍ଯ୍ୟନ୍ତ ଆଣି ମେଡିକାଲ୍ ନେଇଥିଲେ । ଆମ୍ବୁଲାନ୍ସ କର୍ମଚାରୀଙ୍କ ମାନବିକତା ଯୋଗୁଁ ଯୁବକ ଜଣଙ୍କ ଜୀବନ ବଞ୍ଚି ଯାଇଛି ।
ଭାରତରେ ଟୀକାକରଣ ଭାଙ୍ଗିଲା ସବୁ ରେକର୍ଡ, ସପ୍ତାହକରେ ଦିଆଗଲା ୪କୋଟି ଟିକା
ନୂଆଦିଲ୍ଲୀ: ଚଳିତ ସପ୍ତାହରେ ଭାରତରେ ପ୍ରାୟ ୪କୋଟି ଲୋକଙ୍କୁ ଟିକା ଦିଆଯାଇଛି। ସରକାରଙ୍କ କୋବିନ ପୋର୍ଟାଲରେ ପ୍ରକାଶିତ ତଥ୍ୟ ଅନୁଯାୟୀ, ଏପ୍ରିଲରେ ରେକର୍ଡ କରାଯାଇଥିବା ଟିକାକରଣ ରେକର୍ଡ ଭାଙ୍ଗି ଏକ ନୂଆ ରେକର୍ଡ ହୋଇଛି । ଜୁନ୍ ୨୧ରୁ ନୂତନ ନିର୍ଦ୍ଦେଶାବଳୀ ସହିତ ଆରମ୍ଭ ହୋଇଥିବା ଏହି ଟୀକାକରଣ ମହତ୍ୱପୂର୍ଣ୍ଣ ପ୍ରଭାବ ପକାଇଛି । ତେଣୁ ଜୁଲାଇରୁ ଟିକା କାର୍ଯ୍ୟକ୍ରମର ଗତି ତ୍ୱରାନ୍ୱିତ ହୋଇପାରେ ବୋଲି ଆଶା କରାଯାଉଛି। ଏଥିସହିତ ଅଧିକାରୀମାନେ ସୂଚନା ଦେଇଛନ୍ତି ଯେ ସରକାର ଜୁଲାଇରେ ୨୦ କୋଟି ଏବଂ ଅଗଷ୍ଟରେ ୩୦ କୋଟି ଡୋଜ ଦେବାକୁ ପ୍ରସ୍ତୁତ ହେଉଛନ୍ତି।
ଗୋଟିଏ ସପ୍ତାହରେ କେତେ ଡୋଜ ଦିଆଯାଇଛି
ଜୁନ୍ ୧୨-୧୮ ରେ ୨.୧୨ କୋଟି ଟିକା ଦିଆଯାଇଛି। ଏହି ଟିକାକରଣରେ ବୃଦ୍ଧି ହୋଇ ଜୁନ୍ ୧୯-୨୫ ମଧ୍ୟରେ ୩.୯୮ କୋଟି ଡୋଜ ଦିଆଯାଇଥିଲା । ଏହାପୂର୍ବରୁ, ଏପ୍ରିଲ ୩-୯ ମଧ୍ୟରେ ସର୍ବାଧିକ ୨.୪୭ ଟିକା ଦିଆଯାଇଥିଲା। କେନ୍ଦ୍ର ତରଫରୁ ରାଜ୍ୟରେ ୧୮-୪୪ ବୟସ ବର୍ଗଙ୍କ ପାଇଁ ଟିକା କିଣିବା କାର୍ଯ୍ୟ ପ୍ରତ୍ୟାହାର କରିବା ପୂର୍ବରୁ ମେ ୧୫-୨୧ ମଧ୍ୟରେ ଟୀକାକରଣ ସର୍ବନିମ୍ନ ପର୍ଯ୍ୟାୟରେ ଥିଲା। ସେହି ସମୟ ମଧ୍ୟରେ କେବଳ ୯୨ ଲକ୍ଷ ଡୋଜ ଦିଆଯାଇଥିଲା ।
ତେବ ଏହାକୁ ନେଇ ଜଣେ ବରିଷ୍ଠ ସରକାରୀ ଅଧିକାରୀ କହିଛନ୍ତି ଯେ, ଚଳିତ ବର୍ଷ ଡିସେମ୍ବର ସୁଦ୍ଧା ଦେଶର ୯୪ କୋଟି ସବୁ ବୟସ ବର୍ଗର ଲୋକ ଉଭୟ ଟିକା ପାଇବେ। ସେ କହିଛନ୍ତି, ‘ଜୁନ୍ ମାସରେ ଗୋଟିଏ ସପ୍ତାହରେ ପ୍ରାୟ ୪କୋଟି ଲୋକଙ୍କୁ ଟିକାକରଣ କରାଯାଇଛି ଯେଉଁଥିପାଇଁ ଆଗକୁ ଏମିତି ଟିକାକରଣ ବଢିବାକୁ ପ୍ରୋତ୍ସାହିତ କରୁଛି । ତେଣୁ ସରକାର ଜୁଲାଇ ମାସରେ ୨୦ କୋଟି ଏବଂ ଅଗଷ୍ଟ ମାସରେ ୩୦ କୋଟି ଲୋକଙ୍କୁ ଟୀକାକରଣ ପାଇଁ ପ୍ରସ୍ତୁତ ହେଉଛନ୍ତି । ସେହିପରି
ଚଳିତ ସପ୍ତାହରେ ଦିଆଯାଇଥିବା ୩.୯୮ କୋଟି ଡୋଜ ମଧ୍ୟରୁ ପ୍ରାୟ ୭୦ ପ୍ରତିଶତ ୧୮-୪୪ ବୟସ ଶ୍ରେଣୀରେ ଦିଆଯାଇଛି। ସେଥିମଧ୍ୟରୁ ୮୯ ପ୍ରତିଶତ ଟିକା ପ୍ରଥମ ଡୋଜ ଭାବରେ ଲୋକଙ୍କୁ ଦିଆଯାଇଛି । ଦ୍ୱିତୀୟ ଡୋଜ ସହିତ ୪୫ ବର୍ଷରୁ ଅଧିକ ବୟସ ବର୍ଗଙ୍କ ପାଇଁ ଟୀକାକରଣ ଉପରେ ସରକାର ଗୁରୁତ୍ୱାରୋପ କରୁଛନ୍ତି। କିନ୍ତୁ ଏହି ସମୟ ମଧ୍ୟରେ ୧୮-୪୪ବର୍ଷ ବୟସ ଲୋକଙ୍କ ପାଇଁ ପ୍ରଥମ ଡୋଜ ଚାହିଦା ବଢିଛି ।
ଚଳିତ ସପ୍ତାହରେ କେଉଁ ରାଜ୍ୟରେ କେତେ ଟୀକାକରଣ
ଜୁଲାଇରେ ଟୀକାକରଣ ସଂଖ୍ୟା ବୃଦ୍ଧି ପାଇବର ଆଶା ରହିଛି ଏବଂ ସେହି ସମୟ ମଧ୍ୟରେ ଟୀକାକରଣ ସଂଖ୍ୟା ସପ୍ତାହରେ ୫କୋଟି ପହଞ୍ଚିପାରେ ବୋଲି ଆଶା କରାଯାଉଛି । ଉତ୍ତରପ୍ରଦେଶରେ ପ୍ରତିଦିନ ୧୦ ଲକ୍ଷ ଟିକା ଦେବା ପାଇଁ ପ୍ରସ୍ତୁତି ଚାଲିଛି। ୟୁପିର ନାମ ଚଳିତ ସପ୍ତାହରେ ଟୀକାକରଣ ଲିଷ୍ଟର ଶୀର୍ଷରେ ପହଞ୍ଚିଛି । ରାଜ୍ୟରେ ୪୫ ଲକ୍ଷ ଡୋଜ ଦିଆଯାଇଥିଲା। ଯେତେବେଳେ କି, ଏହି ସଂଖ୍ୟା ମଧ୍ୟପ୍ରଦେଶରେ ୩୭ ଲକ୍ଷ, କର୍ଣ୍ଣାଟକରେ ୩୧ ଲକ୍ଷ, ମହାରାଷ୍ଟ୍ରରେ ୩୦ ଲକ୍ଷ, ରାଜସ୍ଥାନରେ ୨୮ ଲକ୍ଷ ଏବଂ ଗୁଜରାଟରେ ୨୬ ଲକ୍ଷ ଟୀକାକରଣ କରାଯାଇଛି ।
ଆସନ୍ତା ସପ୍ତାହ ସୁଦ୍ଧା ଉତ୍ତରପ୍ରଦେଶ ମହାରାଷ୍ଟ୍ରକୁ ଅତିକ୍ରମ କରିପାରେ, ଯାହା ଦେଶରେ ସର୍ବାଧିକ ସଂଖ୍ୟକ ଟିକା ପ୍ରୟୋଗ କରିବାରେ ଶୀର୍ଷରେ ରହିଛି । ୟୁପିରେ ଏପର୍ଯ୍ୟନ୍ତ ୨.୯୯ କୋଟି ଏବଂ ମହାରାଷ୍ଟ୍ରରେ ୩.୦୩ କୋଟି ଡୋଜ ଦିଆଯାଇଛି । ୟୁପିରେ ପ୍ରତିଦିନ ୭-୮ ଲକ୍ଷ ଲୋକଙ୍କୁ ଟିକା ଦିଆଯାଉଛି। ଯେତେବେଳେ କି, ମହାରାଷ୍ଟ୍ରରେ ଏହି ସଂଖ୍ୟା ପ୍ରତିଦିନ ୫ ଲକ୍ଷ ରହିଛି । ରାଜସ୍ଥାନ ସରକାର କହିଛି ଯେ, ଯଦି ପର୍ଯ୍ୟାପ୍ତ ଟିକା ଯୋଗାଯାଏ ତେବେ ସେମାନେ ପ୍ରତିଦିନ ୧୫ ଲକ୍ଷ ଲୋକଙ୍କୁ ଟିକା ଦେଇପାରିବେ।
ଦ୍ୱିତୀୟ ଲହର ଭଳି ଭୟଙ୍କର ହେବ ନାହିଁ ତୃତୀୟ ଲହର : ICMR ଅଧ୍ୟୟନ
ନୂଆଦିଲ୍ଲୀ: ଦେଶରେ କରୋନାର ଦ୍ୱିତୀୟ ଲହର ଥମିବାର କିଛି ସମୟ ପରେ ଏବେ ତୃତୀୟ ଲହରକୁ ନେଇ ଆଶଙ୍କା କରଯାଉଛି । ନିକଟରେ ପ୍ରକାଶିତ କରୋନାର ଡେଲଟା ପ୍ଲସ୍ ଭାରିଆଣ୍ଟ ଚିନ୍ତା ବଢାଇଛି । ବିଶେଷଜ୍ଞମାନେ କହିଛନ୍ତି ଯେ ଯଦି ତୃତୀୟ ଲହର ଆସେ ତେବେ ଏହାର ମୁଖ୍ୟକାରକ ଭାବେ ଡେଲଟା ପ୍ଲସ୍ ଭାରିଆଣ୍ଟ କାର୍ଯ୍ୟ କରିପାରେ । ଏଭଳି ପରିସ୍ଥିତିରେ, ICMR ଭାରତରେ COVID-19 ର ତୃତୀୟ ଲହରର ସମ୍ଭାବନା ଉପରେ ଏକ ଅଧ୍ୟୟନ ପ୍ରକାଶ କରିଛି ।
ଅଧ୍ୟୟନରେ କୁହାଯାଇଛି ଯେ, ଯଦି କରୋନାର ତୃତୀୟ ଲହର ଦେଶକୁ ଆସେ, ତେବେ ଏହା ଦ୍ୱିତୀୟ ଲହର ଭଳି ଭୟଙ୍କର ହେବ ନାହିଁ। ତଥାପି, ଟୀକାକରଣର ଦ୍ରୁତ ବୃଦ୍ଧି କେବଳ କରୋନା ନୁହେଁ ଭବିଷ୍ୟତରେ ଅନ୍ୟ ଲହରକୁ ହ୍ରାସ କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ । ଅଧ୍ୟୟନରେ ତୃତୀୟ ଲହରର ସମ୍ଭାବନା ବିଷୟରେ ଆଲୋଚନା କରି କୁହାଯାଇଛି ଯେ ଏହି ତୃତୀୟ ଲହର ସମୟରେ ରୋଗ ପ୍ରତିରୋଧକ ଶକ୍ତି ସମୟ ସହିତ ହ୍ରାସ ହୋଇପାରେ। ଏପରି ପରିସ୍ଥିତିରେ, ଯେଉଁମାନେ ସଂକ୍ରମିତ ହୋଇସାରିଛନ୍ତି, ସେମାନେ ହିଁ ପୁଣି ଥରେ ସଂକ୍ରମିତ ହୋଇପାରନ୍ତି ।
ଏହାସହ, ଆଇସିଏମଆର ଦ୍ୱାରା କରାଯାଇଥିବା ଅନ୍ୟ ଏକ ଅଧ୍ୟୟନରୁ ଜଣାପଡିଛି ଯେ ଭାରତରେ କୋଭିଡ -19 ଦ୍ୱିତୀୟ ଲହର ସମୟରେ ଗର୍ଭବତୀ ମହିଳାମାନେ ଅଧିକ ପ୍ରଭାବିତ ହୋଇଥିଲେ। ଚଳିତ ବର୍ଷ ମୃତ୍ୟୁ ହାର ଏବଂ ସଂକ୍ରମିତ ରୋଗୀଙ୍କ ସଂଖ୍ୟା ମଧ୍ୟ ଯଥେଷ୍ଟ ବୃଦ୍ଧି ପାଇଛି। ଏଭଳି ପରିସ୍ଥିତିରେ ଆଇସିଏମଆରର ମହାନିର୍ଦ୍ଦେଶକ (ଡିଜି) ଡକ୍ଟର ବଳରାମ ଭାର୍ଗବ କହିଛନ୍ତି ଯେ ସ୍ୱାସ୍ଥ୍ୟ ମନ୍ତ୍ରଣାଳୟର ନିର୍ଦ୍ଦେଶାବଳୀ ଅନୁସାରେ ଗର୍ଭବତୀ ମହିଳାଙ୍କୁ ଟୀକାକରଣ କରାଯାଇପାରିବ। ତେଣୁ ଗର୍ଭବତୀ ମହିଳାମାନଙ୍କ ପାଇଁ ଟୀକାକରଣ ଉପଯୋଗୀ ଏବଂ ଏହାକୁ ଦିଆଯିବା ଉଚିତ୍ |
ସୂଚନା ଯୋଗ୍ୟ ଯେ, ଏପ୍ରିଲ-ମେ ମାସରେ, କରୋନାର ଦ୍ୱିତୀୟ ଲହର ଦେଶରେ ଭୟଙ୍କର ପରିସ୍ଥିତି ସୃଷ୍ଟି କରିଛି । ଏହି ସମୟରେ ଦୈନିକ ସଂକ୍ରମିତଙ୍କ ସଂଖ୍ୟା ସବୁ ରେକର୍ଡ ଭାଙ୍ଗିଛି। ଯଦିଓ ବର୍ତ୍ତମାନ ଦୈନନ୍ଦିନ ମାମଲା ହ୍ରାସ ପାଇବା ପରେ ସରକାର ତୃତୀୟ ଲହର ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। ସରକାର ଯଥାଶୀଘ୍ର ଅଧିକରୁ ଅଧିକ ଲୋକଙ୍କୁ ଟୀକାକରଣ କରିବାକୁ ଚେଷ୍ଟା କରୁଛନ୍ତି।
ସହକାରୀ ନିର୍ବାହ ଯନ୍ତ୍ରୀ କାର୍ଯ୍ୟାଳୟ କର୍ମଚାରୀଙ୍କ କିରୋସିନି ଢାଳି ଆତ୍ମହତ୍ୟା ଉଦ୍ୟମ
ବାସୁଦେବପୁର: ଜଳସମ୍ପଦ ବିଭାଗର ସହକାରୀ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟରେ କାର୍ଯ୍ୟରତ ଏନ୍ଏମ୍ଆର ଦିବାକର ଦାସଙ୍କ ଆତ୍ମହତ୍ୟା ଉଦ୍ୟମ । କିରୋସିନି ଢାଳି ଆତ୍ମହତ୍ୟା ଉଦ୍ୟମ କରିଥିଲେ ଦିବାକର । ପୋଲିସ ପହଞ୍ଚି ତାଙ୍କୁ ଉଦ୍ଧାର କରିଛି । ଶନିବାର ଜଳସମ୍ପଦ ବିଭାଗର ବାଲେଶ୍ୱର ନିର୍ବାହୀ ଯନ୍ତ୍ରୀ କାମ ଦେଖିବାକୁ ବାସୁଦେବପୁର କାର୍ଯ୍ୟାଳୟରେ ପହଞ୍ଚି ସାଇଡ୍ କାମ ସମ୍ପର୍କରେ ଅଲୋଚନା କରୁଥିବା ବେଳେ ପୂର୍ବରୁ ପ୍ରସ୍ତୁତ ଥିବା ଏନ୍ଏମ୍ଆର ଆତ୍ମହତ୍ୟା ଉଦ୍ୟମ କରିଥିଲେ । ଏନ୍ଏମ୍ଆର ଦିବାକର ଦାସ ପାଞ୍ଚ ବର୍ଷ ଦରମା ପାଇନଥିବାରୁ ସେ ଆତ୍ମହତ୍ୟା ଉଦ୍ୟମ କରିଥିବା କହିଛନ୍ତି । ସେ ଆହୁରି କହିଛନ୍ତି ବହୁ ଆଗରୁ ଆମରଣଅନଶନ କରି ଉଚ୍ଚ ପଦସ୍ଥ ଅଧିକାରୀଙ୍କ ଠାରୁ ପ୍ରତିଶ୍ରୁତି ପାଇ ଓହରି ଯାଇଥିଲେ । ତାଙ୍କ ସହିତ ଅନ୍ୟ ଦୁଇ କର୍ମଚାରୀ ଅବସର ନେଲେଣି । ଚାକିରିର ସ୍ଥାୟୀତ୍ୱ ଓ ୫ ବର୍ଷର ଦରମା ପ୍ରଦାନ କରିବାକୁ ଦୃଷ୍ଟି ଆକର୍ଷଣ କରିଥିଲେ । ଅଧିକାରୀ କୌଣସି କଥା ନଶୁଣିବାରୁ ବାଧ୍ୟ ହୋଇ ଆତ୍ମହତ୍ୟାର ଧମକ ଦେଇଥିଲେ । ଆଜି ଠିକ ୧୦ ବେଳେ ଏନ୍ଏମ୍ଆର ଦିବାକର ଦାସ ଏକ କିରୋସିନି ଜାର୍ ଆଣି ଢାଳିବାକୁ ଲାଗିଥିଲେ । ଏହି ସମୟରେ ସେଠାରେ ଉପସ୍ଥିତ ପୋଲିସ ଜାର୍ ସହ ଦିବାକରଙ୍କୁ କାବୁ କରି ଥାନାକୁ ନେଇଯାଇଥିଲେ । ଅପରପକ୍ଷରେ ନିର୍ବାହୀ ଯନ୍ତ୍ରୀ ଜଣଙ୍କ ତାଙ୍କ ଫାଇଲ୍ ପଠାଯାଇଥିବା କହିଛନ୍ତି ।

ବାସ୍ତୁ ଟିପ୍ସ: ଜାଣନ୍ତୁ ଘର କାନ୍ଥରେ ଘଡ଼ି ଲଗାଇବାର ସଠିକ୍ ବିଧି
ବାସ୍ତୁ ଅନୁସାରେ ଘରେ ରହୁଥିବା ପ୍ରତ୍ୟେକ ଜିନିଷ ଭିତରେ କିଛି ସକାରାତ୍ମକ ଓ ନକାରାତ୍ମକ ଉର୍ଜ୍ଜା ରହିଥାଏ | ଯଦି ଏହି ସବୁ ଜିନିଷକୁ ସଠିକ ସ୍ଥାନ ବା ସଠିକ ଦିଗରେ ରଖାନଯାଏ, ତେବେ ଏହାର ନକରାତ୍ମକ ଊର୍ଜାର ପ୍ରଭାବ ଆମ ଜୀବନରେ ପଡିଥାଏ | ସେଭଳି କି ହିଁଁ ଏକ ଜିନିଷ ହେଉଛି ଘଡ଼ି। ଘଡ଼ି, ଯାହାକୁ ଆମେ ପ୍ରତିଦିନ ଦେଖିଥାଉ | କିନ୍ତୁ କେବେ ଆମେ ଭାବିନୁ ଯେ ଏହି ଘଡି ଆମର ଖରାପ ସମୟକୁ ପରିବର୍ତନ କରି ଭଲ ସମୟ ଆଣି ଦେବାରେ ଆମକୁ ସାହାଯ୍ୟ କରିପାରିବ |
ଆଜି ଆମେ ଆପଣଙ୍କୁ କହିବାକୁ ଯାଉଛୁ ଯେ , କେମିତି ଘଡିକୁ ସଠିକ ଦିଗରେ ଲଗେଇଲେ , ଆପଣଙ୍କ ଜୀବନକୁ ସଠିକ ମାର୍ଗ ପ୍ରଦାନ କରିବାରେ ଏହା ସହାୟକ ହୋଇଥାଏ | ବାସ୍ତୁଶାସ୍ତ୍ର ଅନୁଯାୟୀ ଘଡି ଗୋଲ କିମ୍ବା ଅଣ୍ଡା ଆକୃତିର ହେଲେ ଏହାକୁ ଶୁଭ ବୋଲି କୁହାଯାଏ | ଆଜିକାଲି ଦେଖାଯାଉଛି , ବଜାରରେ ବିଭିନ୍ନ ଡିଜାଇନ୍ ର ଘଡି ବିକ୍ରି ହେଇଥାଏ | ଯେଉଥିରେ ଘରର ସଦଶ୍ୟ ଓ ଭଗବାନ ର ଫୋଟୋ ମଧ୍ୟ ଲଗା ଯାଇଥାଏ | କିନ୍ତୁ ଘଡିରେ ସଦସ୍ୟଙ୍କ ଫଟୋ କିମ୍ବା ଭଗବାନ ଙ୍କ ଫଟୋ ଲଗେଇବା ଉଚିତ ନୁହେଁ | ଏହା ଲଗାଇବା ଦ୍ଵାରା ଘରେ ଥିବା ସଦସ୍ୟମାନଙ୍କ ଜୀବନ ଉପରେ ସମୟର ଖରାପ ପ୍ରଭାବ ପଡିଥାଏ | ଭଗବାନଙ୍କ ଫଟୋକୁ ଭୁଲରେ ବି ଘଡିରେ ଲଗାନ୍ତୁ ନାହିଁ | କାହିଁକି ନା ଭଗବାନଙ୍କ ଫୋଟୋରେ ଦୀପ, ଧୂପ , ଧୂପକାଠି ଦେଇ ପୂଜାର ଆବଶ୍ୟକତା ପଡିଥାଏ | କିନ୍ତୁ ଘଡ଼ି ବହୁ ଦିନ ପର୍ଯ୍ୟନ୍ତ ସଫା ହେଉ ନ ଥାଏ | ଯାହାଦ୍ୱାରା ଭଗବାନଙ୍କୁ ଅପମାନ ହୋଇଥାଏ | ସେଥିପାଇଁ ବାସ୍ତୁଶାସ୍ତ୍ର ଆନୁଯାୟୀ ଏହିଭଳି ଘଡିକୁ ଅଶୁଭ ମନାଯାଏ | ତେଣୁ ଘଡିକୁ ସର୍ବଦା ସଫା ରଖିବା ଦରକାର | ଯାହା ଦ୍ଵାରା ଆପଣଙ୍କ ଜୀବନ ବି ଘଡି ପରି ଉଜ୍ଜଳମାନ ହୋଇଥାଏ |
ସେହିପରି ପୁରୁଣା ଘଡି, ବନ୍ଦ ରହିଥିବା ଘଡି, ଧୁଳି ଲାଗିଥିବା ଘଡି କୁ ଘରେ ରଖିବା ଉଚିତ ନୁହେଁ | ଏହା ରଖିବା ଦ୍ଵାରା ଆପଣଙ୍କ ଜୀବନରେ ଦାରିଦ୍ରତା ଗ୍ରାସ କରିଥାଏ | ଆଉ ମଧ୍ୟ ଘଡିକୁ କେବେ ଯିବାଆସିବା ବାଟରେ ଲଗେଇବା ଉଚିତ ନୁହେଁ | ଏହା ଲଗେଇବା ଦ୍ଵାରା ଆପଣଙ୍କ ଯାତ୍ରା ରେ ଅଶୁଭ ଘଟିଥାଏ |
ଘଡିର ସମୟକୁ କେବେ ପଛକୁ ରଖିବା କଥା ନୁହେଁ | ସର୍ବଦା ୫ , ୧୦ ମିନିଟ ଆଗକୁ ରଖିବା କଥା , ଏହା କରିବା ଦ୍ଵାରା ଆପଣଙ୍କ ଭାଗ୍ୟରେ କାଳ ଚକ୍ରର ଖରାପ ପ୍ରଭାବ ପଡି ନ ଥାଏ | ଆହୁରି ମଧ୍ୟ ଘଡିକୁ ଦକ୍ଷିଣ ଦିଗରେ ଲଗେଇବା ଉଚିତ ନୁହେଁ | ଦକ୍ଷିଣ ଦିଗ ଅର୍ଥାତ କାଳ ବା ଯମର ଦିଗ ବୋଲି କୁହାଯାଏ | ତେଣୁ ଘଡିକୁ ମୁଖ୍ୟ ଦ୍ଵାର ଅର୍ଥାତ ପୂର୍ବ , ଉତ୍ତର ଦିଗରେ ଲଗେଇବା ଉଚିତ | ଏ ଥିଲା ବାସ୍ତୁ ଶାସ୍ତ୍ର ଅନୁଯାୟୀ ଘରେ ଘଡ଼ି ଲଗାଇବାର ବିଧି ।





