ନୂଆପଡ଼ା: କରୋନା ସଂକଟରେ ନୂଆପଡ଼ାରେ ନୂଆ ସମ୍ଭାବନା । ସଂକ୍ରମଣକୁ ମାତ୍ ଦେଇ ବିଜୟୀ ହେଲା ୨୫ ଦିନର ଶିଶୁ । ନୂଆପଡା ସଦର ବ୍ଲକର ଏହି ଶିଶୁ କରୋନାରେ ସଂକ୍ରମିତ ହୋଇଥିଲା । କୋଭିଡ୍ ଟେଷ୍ଟ ପଜିଟିଭ ଆସିବା ପରେ ଗତ ୧୨ ତାରିଖ ଦିନ ଶିଶୁଟିକୁ ଏସଏନସିୟୁରେ ଭର୍ତ୍ତି କରାଯାଇଥିଲା । ଉପଯୁକ୍ତ ଚିକିତ୍ସା ପାଇବା ପରେ ଶିଶୁଟି ସୁସ୍ଥ ହୋଇ ଘରକୁ ଫେରିଛି । ଶିଶୁର ମାଆ ମଧ୍ୟ କରୋନା ସଂକ୍ରମିତ ହୋଇଥିଲେ । ଭୂତାଣୁ ଯୁଦ୍ଧରେ ବିଜୟୀ କୁନି ଯୋଦ୍ଧା । ହାରିଲା ସଂକ୍ରମଣ, ଜିତିଲା ୨୫ ଦିନର ଶିଶୁ । ଏଥିପାଇଁ ଡାକ୍ତର ଓ ସହକର୍ମୀଙ୍କୁ ପ୍ରଶଂସା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମାତ୍ର ସପ୍ତାହେ ମଧ୍ୟରେ ସଂକ୍ରମଣକୁ ମାତ୍ ଦେଇ ଶିଶୁଟି ସୁସ୍ଥ ହୋଇଛି । କରୋନା ବିରୋଧୀ ଲଢ଼େଇରେ ଏହା ଉତ୍ସାହ ବଢ଼ାଇବ ବୋଲି ଟ୍ବିଟ୍ କରି କହିଛନ୍ତି ମୁଖ୍ୟମନ୍ତ୍ରୀ ।
ପଶ୍ଚିମବଙ୍ଗରେ ଟ୍ୱିଟର୍ ୱାର, ସାମ୍ନାସାମ୍ନି ଟିଏମସି ସାଂସଦ ଓ ରାଜ୍ୟପାଳ
କୋଲକାତା: ପଶ୍ଚିମବଙ୍ଗରେ ଟ୍ୱିଟର୍ ୱାର । ଟିଏମସି ସାଂସଦ ମହୁଆ ମିତ୍ରା ଓ ରାଜ୍ୟପାଳ ଜଗଦିପ୍ ଧନକଡଙ୍କ ମଧ୍ୟରେ ଆରମ୍ଭ ହୋଇଛି ଏହି ଟ୍ୱିଟର୍ ୱାର । ରାଜ୍ୟପାଳ ରାଜଭବନକୁ ନିଜର ପାରିବାରିକ ଥଇଥାନ୍ କେନ୍ଦ୍ର କରିଥିବା ଅଭିଯୋଗ କରିଛନ୍ତି ମହୁଆ । ସେ କହିଛନ୍ତି ରାଜଭବନରେ ରାଜ୍ୟପାଳ ନିଜର ପରିବାର ଲୋକ ଓ ସମ୍ପର୍କୀୟଙ୍କୁ ବିଭିନ୍ନ ପଦ ପଦବିରେ ବସାଇଛନ୍ତି । ଏହା ଆଦୌ ବି ଠିକ୍ ନୁହେ । କେଉଁ ପରିସ୍ଥିତିରେ ଏମାନେ ରାଜଭବନରେ ପ୍ରବେଶ କଲେ ସେ ନେଇ ପ୍ରଶ୍ନ କରିଛନ୍ତି ମହୁଆ ।

ରାଜଭବନର ୱେବସାଇଟରେ ଥିବା ଏହି ଲୋକମାନେ କିଏ ତାହା ସ୍ପଷ୍ଟ ହେବା ଆବଶ୍ୟକ ବୋଲି ମହୁଆ ମିତ୍ରା କହିଛନ୍ତି । ଏ ନେଇ ସେ ତାଙ୍କ ଟ୍ୱିଟରରେ ତଥ୍ୟ ରଖିଛନ୍ତି । ସେପଟେ ଏହାର ଜବାବ ରଖିଛନ୍ତି ରାଜ୍ୟପାଳ ଜଗଦିପ ଧନକଡ । ଟିଏମସି ସାଂସଦ ଆଣିଥିବା ସମସ୍ତ ଅଭିଯୋଗ ଭିତ୍ତିହୀନ ଅଟେ । ଓଏସଡିରେ ନିଯୁକ୍ତି ପାଇଥିବା ବ୍ୟକ୍ତିଙ୍କ ସହ ମୋର କୌଣସ ସମ୍ପର୍କ ନାହିଁ । ସେମାନେ ଅଲଗା ଅଲଗା ରାଜ୍ୟର ଓ ଜାତିର । ତେଣୁ ମହୁଆ ଏଭଳି କହିବା ଠିକ୍ ନୁହେଁ ବୋଲି କହିଛନ୍ତି ରାଜ୍ୟପାଳ । ପଶ୍ଚିମବଙ୍ଗରେ ଅରାଜକତା ଲାଗି ରହିଥିବାବେଳେ ଏହା ଉପରୁ ଦୃଷ୍ଟି ହଟାଇବା ପାଇଁ ଟିଏମସି ଏଭଳି କରୁଥିବା କହିଛନ୍ତି ରାଜ୍ୟପାଳ ।
ପୁଣେ କେମିକାଲ ଫ୍ୟାକ୍ଟ୍ରିରେ ଅଗ୍ନିକାଣ୍ଡ: ମୃତକଙ୍କ ପରିବାରକୁ ୨ ଲକ୍ଷ ସହାୟତା ରାଶି ଘୋଷଣା କଲେ ପ୍ରଧାନମନ୍ତ୍ରୀ
ପୁଣେ: ମହାରାଷ୍ଟ୍ର ପୁଣେରେ ବଡଧରଣର ଅଗ୍ନିକାଣ୍ଡ । କେମିକାଲ ଫ୍ୟାକ୍ଟ୍ରିରେ ନିଆଁ ଲାଗି ୧୮ ମୃତ । ନିଆଁ ଲିଭାଇବା ପାଇଁ ୫ଟି ଦମକଳଗାଡି ନିୟୋଜିତ ହୋଇଥିଲେ । ଯାହାଫଳରେ ନିଆଁକୁ ଆୟତ୍ତ କରାଯାଇଛି । ମୃତକଙ୍କ ମଧ୍ୟରେ ୧୨ ଜଣ ମହିଳା ଥିବା ସୂଚନା ମିଳିଛି । ପିରଗଣ୍ଟ ଅଞ୍ଚଳରେ ଲାଗି ଥିବା ଏହି ଫ୍ୟାକ୍ଟ୍ରିରେ ୩୭ ଜଣ କାମ କରୁଥିଲେ ।

ପ୍ରଥମେ ୨୦ ଜଣକୁ ଉଦ୍ଧାର କରାଯାଇଥିଲେ । ଏହା ପରେ ୧୨ ଜଣକ ଜୀବନ ଯାଇଥିବାବେଳେ ୫ ଜଣ ନିଖୋଜ ଥିଲେ । ପରବର୍ତ୍ତି ସମୟରେ ସେମାନଙ୍କର ବି ଜୀବନ ଯାଇଥିଲା । କିଭଳି ନିଆଁ ଲାଗିଲା ସେ ନେଇ ତଦନ୍ତ ନିର୍ଦ୍ଦେଶ ଦେଇଛନ୍ତି ସ୍ଥାନୀୟ ଅଧିକାରୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘଟଣାରେ ଦୁଃଖ ପ୍ରକାଶ କରିବା ସହ ମୃତକଙ୍କ ପରିବାର ପ୍ରତି ୨ ଲକ୍ଷ ଲେଖାଏଁ ସହାୟତା ରାଶି ଘୋଷଣା କରିଛନ୍ତି । ସେହିଭଳି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଘଟଣାରେ ଦୁଃଖ ପ୍ରକାଶ କରିବା ସହ ମୃତକଙ୍କ ପରିବାର ପ୍ରତି ସମବେଦନା ଜଣାଇଛନ୍ତି ।
ପିଜିଆଇ ସର୍ଭେରେ ଓଡ଼ିଶାକୁ ସାର୍ଟିଫିକେଟ: ୨୦୧୯-୨୦ରେ ସ୍କୁଲ ଶିକ୍ଷାରେ ଆଖିଦୃଶିଆ ଉନ୍ନତି
ଭୁବନେଶ୍ୱର: ବିଦ୍ୟାଳୟ ଶିକ୍ଷାରେ ଓଡିଶାର ପ୍ରଦର୍ଶନରେ ଆଖିଦୃଶିଆ ଉନ୍ନତି ଘଟିଛି । କେନ୍ଦ୍ର ସରକାରଙ୍କ ଦ୍ୱାରା ୨୦୧୯-୨୦ର ପରଫର୍ମାନ୍ସ ଗ୍ରେଡିଂ ଇଣ୍ଡେକ୍ସ ବା ପିଜିଆଇ ସର୍ଭେରୁ ଜଣାପଡିଛି । ୨୦୧୭-୧୮ରେ ପ୍ରଥମ ଥର ପାଇଁ ପିଜିଆଇ ଇଣ୍ଡେକ୍ସ ପ୍ରସ୍ତୁତ ହୋଇଥିବା ବେଳେ ପରବର୍ତ୍ତୀ ଇଣ୍ଡେକ୍ସରେ ଓଡିଶାର ପ୍ରଦର୍ଶନରେ ୧୦ରୁ ୨୦ ପ୍ରତିଶତ ଉନ୍ନତି ହୋଇଛି । ଶିକ୍ଷାଦାନ ମାନରେ ଉନ୍ନତି, ଭିତ୍ତିଭୂମି, ସୁଯୋଗ ସୃଷ୍ଟି ଓ ସରକାରୀ ପ୍ରକ୍ରିୟା ଭଳି ୫ଟି କ୍ଷେତ୍ରରେ ରାଜ୍ୟର ପ୍ରଦର୍ଶନରେ ଉନ୍ନତି ହୋଇଛି ।
ସ୍କୁଲ ଶିକ୍ଷାରେ ଥିବା ଅଭାବ ଅସୁବିଧାକୁ ଦୂର କରିବାକୁ ୨୦୧୭-୧୮ରେ ଆରମ୍ଭ ହୋଇଥିଲା ପରଫର୍ମାନ୍ସ ଗ୍ରେଡିଂ ଇଣ୍ଡେକ୍ସ । ଗତ ତିନି ବର୍ଷ ଧରି ଏହି ଇଣ୍ଡେକ୍ସ ପ୍ରସ୍ତୁତ ହେଉଥିବା ବେଳେ ଏଥର ଓଡିଶାର ପ୍ରଦର୍ଶନ ଉତ୍ସାହଜନକ ରହିଛି । ବିଦ୍ୟାଳୟ ଶିକ୍ଷାରେ ଭିତ୍ତିଭୂମି, ଶିକ୍ଷା ମାନଦଣ୍ଡ ଆଦି ୭୦ଟି ସୂଚକାଙ୍କକୁ ନେଇ ଏହି ରିପୋର୍ଟ ପ୍ରସ୍ତୁତ ହୋଇଛି । ତଦନୁଯାୟୀ ଓଡିଶା ୨୦୧୭-୧୮ରେ ଓଡିଶା ୭୦୧-୭୫୦ ମଧ୍ୟରେ ସ୍କୋର କରି ଗ୍ରେଡ ଥ୍ରୀରେ ଥିଲା । ୨୦୧୯-୨୦ରେ କିନ୍ତୁ ଓଡିଶାର ସ୍କୋର ୮୦୧ରୁ ୮୫୦ ରାଙ୍କକୁ ବିଢିଛି ।
ପିଜିଆଇର ଭିତ୍ତିଭୂମି ଓ ସୁବିଧା ଡୋମେନରେ ୧୩ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ ୧୦ ପ୍ରତିଶତ ଅର୍ଥାତ ୧୫ ପଏଣ୍ଟ କିମ୍ବା ତତୋଧିକ ସୁଧାର ପ୍ରଦର୍ଶନ କରିଛନ୍ତି । ଆଣ୍ଡାମାନ ଓ ନିକୋବାର ଦ୍ବୀପସମୂହ ଏବଂ ଓଡ଼ିଶା ୨୦ ପ୍ରତିଶତ କିମ୍ବା ତାଠାରୁ ଅଧିକ ପ୍ରଦର୍ଶନରେ ସୁଧାର ଆଣିପାରିଛନ୍ତି । ସେହିପରି ପିଜିଆଇର ଇକ୍ୟୁଟି ଡୋମେନରେ ଅରୁଣାଚଳ ପ୍ରଦେଶ, ମଣିପୁର ଓ ଓଡ଼ିଶା ୧୦ ପ୍ରତିଶତ ପ୍ରଦର୍ଶନ ସୁଧାର କରିଛନ୍ତି । ପ୍ରଶାସନିକ ପ୍ରକ୍ରିୟାରେ ଦୁଇ ବର୍ଷରେ ୩୬ ପ୍ରତିଶତ ବୃଦ୍ଧି ଘଟିଛି । ୨୦୧୭-୧୮ରେ ୨୨୩ ପଏଣ୍ଟ ତୁଳନାରେ ୨୦୧୯-୨୦ରେ ୩୦୪ ପଏଣ୍ଟ ପାଇଛି ଓଡିଶା । ନିୟମିତ ଭାବେ ସ୍କୁଲ ପରିଚାଳନା କମିଟି, ଅଭିଭାବକଙ୍କ ସହ ନିୟମିତ ଯୋଗାଯୋଗ ଦ୍ୱାରା ଏହି ଲକ୍ଷ୍ୟ ସାଧିତ ହୋଇଛି । ମୋ ସ୍କୁଲ ଯୋଜନା ଏଦିଗରେ ବ୍ୟାପକ ସଂସ୍କାର ଆଣିବାରେ ସକ୍ଷମ ହୋଇଛି ।
ଲର୍ଣ୍ଣିଂ ଆଉଟକମ ଓ ଶିକ୍ଷା ମାନଦଣ୍ଡରେ ୨୦୧୭-୧୮ରେ ରାଜ୍ୟକୁ ୧୩୪ ପଏଣ୍ଟ ମିଳିଥିବା ବେଳେ ୨୦୧୯-୨୦ରେ ୧୩୮ ପଏଣ୍ଟ ମିଳିଛି । ଶିକ୍ଷକଙ୍କୁ ନିୟମିତ ଭାବେ ପାଠ୍ୟ ଉପକରଣ ଯୋଗାଇଦିଆଯିବାରୁ ଲର୍ଣ୍ଣିଂ ଆଉଟକମ ଓ ଶିକ୍ଷା ମାନଦଣ୍ଡରେ ଉନ୍ନତି ହୋଇଛି । ଭିତ୍ତିଭୂମି କ୍ଷେତ୍ରରେ ଓଡିଶା ୧୦୯ ପଏଣ୍ଟ ସ୍କୋର କରିଛି । ୨୦୧୭-୧୮ରେ ଓଡିଶାର ସ୍କୋର ଥିଲା ୭୨ । ଓଡିଶା ଆଦର୍ଶ ବିଦ୍ୟାଳୟ ଏଦିଗରେ ରୋଲ ମଡେଲ ହୋଇଛି । ଅନୁସୂଚିତ ଜାତି ଜନଜାତି ଛାତ୍ରଛାତ୍ରୀଙ୍କ ପାଇଁ ଆବାସିକ ସ୍କୁଲ ପ୍ରତିଷ୍ଠା କରାଯାଇଛି । ଆଦିବାସୀ ଅଧ୍ୟୁଷିତ ଅଂଚଳରେ ଛାତ୍ରାବାସ ଦ୍ବାରା ଅଧିକ ସଂଖ୍ୟାରେ ଅନୁସୂଚିତ ଜନଜାତି ଛାତ୍ରଛାତ୍ରୀ ପାଠ ପଢୁଛନ୍ତି । ଦୁର୍ଗମ ଅଞ୍ଚଳରେ ମଧ୍ୟ ବିଦ୍ୟାଳୟ ପ୍ରତିଷ୍ଠା ଦ୍ବାରା ଶିକ୍ଷାଦାନ ବ୍ୟବସ୍ଥା ବ୍ୟାପକ ହୋଇଛି ।
ଛାତ୍ରଛାତ୍ରୀଙ୍କ ହାତ ପାହାନ୍ତାରେ ପହଁଚିଛି ସ୍କୁଲ । ମୁଖ୍ୟତଃ ଅନୁସୂଚିତ ଜାତି ଜନଜାତି ଛାତ୍ରଛାତ୍ରୀଙ୍କ ପାଇଁ ସ୍ୱତନ୍ତ୍ର ଛାତ୍ରାବାସ ଦ୍ୱାରା ସ୍କୁଲ ଏନରୋଲମେଣ୍ଟରେ ଉନ୍ନତି ଆସିଛି । ଇକ୍ୟୁଟି କ୍ଷେତ୍ରରେ ଓଡିଶାର ସ୍କୋର ୨୧୪ରୁ ୨୧୯କୁ ବୃଦ୍ଧି ପାଇଛି । ପୂର୍ବ ଅପେକ୍ଷା ଅଧିକ ସଂଖ୍ୟାରେ ଛାତ୍ରୀ ପାଠପଢା ପ୍ରତି ଆଗ୍ରହ ପ୍ରକାଶ କରୁଛନ୍ତି । ପଂଚାୟତ ସ୍ତରରେ ବ୍ୟାପକ ସଚେତନତା ଦ୍ବାରା ବାଳିକା ଶିକ୍ଷାକୁ ନେଇଥିବା ଅନ୍ଧବିଶ୍ୱାସ ଦୂର ହୋଇଛି । ବିଦ୍ୟାଳୟ ଶିକ୍ଷା ପାଇଁ ଅନୁସୂଚିତ ଜାତି, ଜନଜାତି, ସଂଖ୍ୟାଲଘୁ, ଅନ୍ୟାନ ପଛୁଆ ବର୍ଗର ଛାତ୍ରୀଛାତ୍ରୀଙ୍କ ନାମଲେଖା ସମାନ୍ତରାଳ ଭାବେ ବୃଦ୍ଧି ପାଇଛି । ଏହି ପାଞ୍ଚଟି କ୍ଷେତ୍ରରେ ଓଡିଶାର ଉନ୍ନତ ପ୍ରଦର୍ଶନ ଯୋଗୁଁ ରାଜ୍ୟ ଗ୍ରେଡ ଥ୍ରୀରୁ ଗ୍ରେଡ ୱାନକୁ ଲମ୍ଫ ଦେଇଛି ।














