spot_img
Home Blog Page 5712

ଦେଶବାସୀଙ୍କୁ ଧର୍ମେନ୍ଦ୍ରଙ୍କ ଝଟକା, କହିଲେ କମିବନି ପେଟ୍ରୋଲ ଦର

ନୂଆଦିଲ୍ଲୀ: ଦେଶରେ ପେଟ୍ରୋଲ୍ ଓ ଡିଜେଲ୍ ଦର ଦିନୁକ ଦିନ ଆକାଶ ଛୁଆଁ ହେବାରେ ଲାଗିଛି । ଏମିତିକି ଭାରତର କିଛି ସହରରେ ପେଟ୍ରୋଲ୍ ଦର ଲି. ପ୍ରତି ୧୦୦ ଟଙ୍କା ଟପିଛି । ବଢୁଥିବା ତୖେଳ ଦରକୁ ନେଇ ଚିନ୍ତାରେ ପଡିଛନ୍ତି ଗ୍ରାହକ। ଏଭଳି ସମୟରେ ପେଟ୍ରୋଲ୍ ଓ ଡିଜେଲ୍ ଦରରୁ ନିସ୍ତାର ମିଳିବ ନାହିଁ ବୋଲି କହିଛନ୍ତି  ପେଟ୍ରାେଲିୟମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।

ଗୁଜୁରାଟରେ କେନ୍ଦ୍ର ମନ୍ତ୍ରୀଙ୍କୁ ପଚରାଯାଇଥିବା ଏକ ପ୍ରଶ୍ନର ଜବାବ ଦେବାକୁ ଯାଇ ସେ କହିଛନ୍ତି, ସରକାରଙ୍କର ଆମଦାନୀ ଏବେ ଖୁବ୍ କମି ଯାଇଛି । ୨୦୨୦-୨୧ ଆର୍ଥିକ ବର୍ଷରେ ଆମଦାନୀ କମିଥିବା ବେଳେ ୨୦୨୧-୨୨ ବର୍ଷରେ ମଧ୍ୟ ଏହା କମ୍ ରହିବାର ଆଶଙ୍କା ରହିଛି । ଏବେ ଆମଦାନୀ କମିବା ସହ ସରକାରଙ୍କର ଖର୍ଚ୍ଚ ମଧ୍ୟ ବଢୁଛି ।

ହେଲଥ ସେକ୍ଟରରେ ଖର୍ଚ୍ଚ ବଢୁଥିବା ବେଳେ ଜନମଙ୍ଗଳ କାର୍ଯ୍ୟରେ ମଧ୍ୟ ସରକାର ଖର୍ଚ୍ଚ କରୁଛନ୍ତି । ଏଭଳି ସ୍ଥଳେ ପେଟ୍ରୋଲ୍ ଓ ଡିଜେଲ୍ ର ଦାମ୍ କମ୍ କରିବାର ଏହା ଉପଯୁକ୍ତ ସମୟ ନୁହେଁ । ତୈଳ ଦର ବଢିବାର ମୁଖ୍ୟ କାରଣ ଅନ୍ତରାଷ୍ଟ୍ରୀୟ ବଜାର । ବଜାରରେ କଞ୍ଚା ତେଲର ମୂଲ୍ୟ ବ୍ୟାରେଲ୍ ପ୍ରତି ୭୦ ଡଲାରରେ ପହଞ୍ଚିଛି । ଯାହା ଫଳରେ ପେଟ୍ରୋଲ୍ ଓ ଡିଜେଲ୍ ଦର ମଧ୍ୟ ବଢୁଛି ।

ତେବେ ଏହା ପୂର୍ବରୁ ନୀତି ଆୟୋଗର ଭାଇସ୍ ଚେୟାରମ୍ୟାନ୍ ରାଜୀବ କୁମାର କହିଥିଲେ ଯେ ତୖେଳ ଦର ବୃଦ୍ଧି ନେଇ ସରକାରଙ୍କୁ କିଛି କରିବା ଉଚିତ୍ ।

IPL 14: ସେପ୍ଟେମ୍ବର ୧୯ରୁ ଆରମ୍ଭ ହେବ ମ୍ୟାଚ୍, ଏହି ଦିନ ଫାଇନାଲ୍…

ନୂଆଦିଲ୍ଲୀ: ଇଣ୍ଡିଆନ୍ ପ୍ରିମିୟର୍ ଲିଗ୍ (ଆଇପିଏଲ୍)ର ୧୪ ତମ ସଂସ୍କରଣ ୟୁଏଇରେ ଖେଳାଯିବାକୁ ଥିବା ବେଳେ ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (ବିସିସିଆଇ) ପକ୍ଷରୁ ତାରିଖ ଘୋଷଣା କରାଯାଇଛି । ଏହାର ପ୍ରଥମ ମ୍ୟାଚ୍ ସେପ୍ଟେମ୍ବର ୧୯ ତାରିଖରେ ଖେଳାଯିବ ।

ସୂଚନା ଅନୁଯାୟୀ, ଫାଇନାଲ୍ ମ୍ୟାଚ୍ ଅକ୍ଟୋବର ୧୫ରେ ଆୟୋଜିତ ହେବ । ଏନେଇ ବିସିସିଆଇ ଓ ଅମିରାତ କ୍ରିକେଟ୍ ବୋର୍ଡ (ଇସିବି) ମଧ୍ୟରେ ବୈଠକ ହେଉଥିବା ବେଳେ ବିସିସିଆଇର ଜଣେ ଅଧିକାରୀ କହିଛନ୍ତି ଯେ ଆଇପିଏଲ୍ ମ୍ୟାଚ୍ ଦୁବାଇରେ ସଫଳତା ପୂର୍ବକ ହେବ ବୋଲି ଆଶା କରାଯାଉଛି ।

ତେବେ ଏହି ମୁକାବଲା ଶାରଜାହ  ଓ ଆବୁ ଧାବିରେ ହେବ ।

ମ୍ୟାଚରେ ବିଦେଶୀ ଖେଳାଳିଙ୍କ ସ୍ଥିତିକୁ ନେଇ ଜଣେ ଅଧିକାରୀ କହିଛନ୍ତି ଯେ ଭାରତୀୟ ବୋର୍ଡକୁ ସକରାତ୍ମକ ଫଳାଫଳର ଆଶା ରହିଛି । ‘ଚର୍ଚ୍ଚା ଆରମ୍ଭ ହୋଇଗଲାଣି, ଆମକୁ ଆଶା ଅଛି ଯେ ଅଧିକରୁ ଅଧିକ ବିଦେଶୀ ଖେଳାଳି ଉପଲବ୍ଧ ରହିବେ’ । ଯଦି ସେମାନଙ୍କ ମଧ୍ୟରେ କେହି ନଆସନ୍ତି ତେବେ ଆମେ ଆଗାମୀ ଭବିଷ୍ୟତରେ ଏନେଇ ନିଷ୍ପତ୍ତି ନେବୁ । କିନ୍ତୁ ଏବେ ପାଇଁ ୟୁଏଇରେ ୧୪ ତମ ସଂସ୍କରଣ ଦମଦାର ଭାବେ ଖେଳାଯିବ ।

ତେବେ ୨୬ ଦିନ ଧରି ଚାଲିବ ଆଇପିଏଲ ମୁକାବିଲା । ୟୁଏଇରେ ଚଳିତବର୍ଷ ଆଇପିଏଲର ଅବଶିଷ୍ଟ ବଳକା ମ୍ୟାଚ୍ ଖେଳାଯିବ। କରୋନା ପାଇଁ ଚଳିତବର୍ଷ ଆଇପିଏଲକୁ ଅଧାରୁ ସ୍ଥଗିତ ରଖାଯାଇଥିଲା ।

ଜୁନ ୧୦ରେ ସୂର୍ଯ୍ୟ ପରାଗ, ଏହି ରାଶିଗୁଡ଼ିକ ଉପରେ ପଡ଼ିବ କୁପ୍ରଭାବ

ଭୁବନେଶ୍ୱର: ଚଳିତ ବର୍ଷର ପ୍ରଥମ ସୂର୍ଯ୍ୟ ପରାଗ ପଡୁଛି ଜୁନ ୧୦ ଗୁରୁବାର ଦିନ। ଏହି ଦିନ ସଧବାଙ୍କ ପର୍ବ ସାବିତ୍ରୀ ମଧ୍ୟ । ଜ୍ୟୋତିଷ ବିଜ୍ଞାନ ଅନୁସାରେ, ସୂର୍ଯ୍ୟ ପରାଗର ଶୁଭ ଓ ଅଶୁଭ ପ୍ରଭାବ ସମସ୍ତ ରାଶି ଉପରେ ଭିନ୍ନ ଭିନ୍ନ ହୋଇଥାଏ । ତେବେ ଆସନ୍ତୁ ଜାଣିବା ଚଳିତ ଥରର ସୂର୍ଯ୍ୟ ପରାଗ କେଉଁ ରାଶି ଉପରେ ଅଶୁଭ ପ୍ରଭାବ ପକାଇବ ।

ବୃଷ: ଏଥରକ ବୃଷ ରାଶିରେ ପରାଗ ଲାଗିବାକୁ ଯାଉଛି । ଏଣୁ ଏହି ରାଶିର ବ୍ୟକ୍ତିଙ୍କ ଉପରେ ଅଶୁଭ ପ୍ରଭାବ ପଡ଼ିବ । ଏମାନେ ଖର୍ଚ୍ଚାନ୍ତ ଓ ଅସୁସ୍ଥ ହୋଇପାରନ୍ତି ।

ମିଥୁନ: ଏହି ପରାଗ ମିଥୁନ ରାଶି ପାଇଁ ଆଦୌ ଶୁଭ ନୁହେଁ। ଏହି ରାଶିର ବ୍ୟକ୍ତିଙ୍କ ବ୍ୟବସାୟରେ କ୍ଷତି ହୋଇପାରେ। ଏଣୁ କାହା ସହ ନେଣ-ଦେଣ କରନ୍ତୁ ନାହିଁ।

ତୁଳା: ତୁଳା ରାଶିର ବ୍ୟକ୍ତିଙ୍କ ପାଇଁ ଏହି ସୂର୍ଯ୍ୟ ପରାଗ ବହୁ ସମସ୍ୟା ନେଇ ଆସିବ। ଚାକିରି କିମ୍ବା ବେପାର ସମସ୍ୟାର ସମ୍ମୁଖୀନ ହେବେ। ଦାମ୍ପତ୍ୟ ଜୀବନ ଉପରେ ବି ଏହାର ପ୍ରଭାବ ପଡିବ।

ମକର: ଏହି ସୂର୍ଯ୍ୟ ପରାଗ ମକର ରାଶିର ଲୋକଙ୍କ ପାଇଁ ଅଶୁଭ ପ୍ରଭାବ ନେଇ ଆସୁଛି। ଏ ଅବସରରେ ସାବଧାନ ରୁହନ୍ତୁ। ଅସଫଳ ହୋଇପାରନ୍ତି ।

ହୃଦଘାତରେ ଅଭିନେତ୍ରୀ ତରଲା ଜୋଶୀଙ୍କ ଦେହାନ୍ତ

ମୁମ୍ବାଇ: ଟିଭି ସିରିଏଲ୍ ‘ଏକ୍ ହଜାରୋଁ ମେଁ ମେରୀ ବେହେନା ହେ’ରେ ବଡି ବିଜି ଭୂମିକାରେ ନଜର ଆସିଥିବା ଅଭିନେତ୍ରୀ ତରଲା ଜୋଶୀଙ୍କର ହୃଦଘାତରେ ଦେହାନ୍ତ ହୋଇଛି। ତାଙ୍କ ମୃତ୍ୟୁରେ ଟିଭି ଇଣ୍ଡଷ୍ଟ୍ରିର ବହୁ ସେଲିବ୍ରିଟି ଶ୍ରଦ୍ଧାଞ୍ଜଳି ଜଣାଇବା ସହ ଶୋକସନ୍ତପ୍ତ ପରିବାର ପ୍ରତି ସମବେଦନା ଜଣାଇଛନ୍ତି।

ଅଭିନେତ୍ରୀ ନିଆ ଶର୍ମାଙ୍କ ସହ ‘ଏକ୍ ହଜାରୋଁ ମେଁ ମେରୀ ବେହେନା ହେ’ରେ ତାରଲା ଯୋଶୀଙ୍କୁ ଦେଖିବାକୁ ମିଳିଥିଲା। ନିଆ ଶର୍ମା ତାଙ୍କ ଇନଷ୍ଟାଗ୍ରାମରେ ତରଲାଙ୍କ ମୃତ୍ୟୁ ନେଇ ସୂଚନା ଦେଇଛନ୍ତି। ଏକ ଫଟୋ ସେୟାର କରି ନିଆ ଲେଖିଛନ୍ତି, ଆପଣଙ୍କ ଆତ୍ମାକୁ ​​ଶାନ୍ତି ମିଳୁ ବଡି ବିଜି, ଆପଣ ବହୁତ ମନେ ପଡିବେ । ନିଆଙ୍କ ବ୍ୟତୀତ କୁଶଲ ଟଣ୍ଡନ୍, କରଣ ଟେକର୍ ଏବଂ କ୍ରିଷ୍ଟଲ୍ ଡି’ସୁଜା ମଧ୍ୟ ତରଲାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

‘ଏକ୍ ହଜାରୋଁ ମେଁ ମେରୀ ବେହେନା ହେ’ ବ୍ୟତୀତ ତରଲା ଯୋଶୀ ଅନେକ ଟିଭି ସିରିଏଲରେ କାମ କରିଛନ୍ତି । ‘ସରାଭାଇ ବନାମ ସରାଭାଇ’ ଏବଂ ‘ବନ୍ଦିନୀ’ ଆଦି ରହିଛି। ଅଭିନୟ ଜଗତରେ ପ୍ରବେଶ କରିବା ପୂର୍ବରୁ ତରଲା କଷ୍ଟ୍ୟୁମ ଡିଜାଇନର୍ ଭାବରେ ନିଜର କ୍ୟାରିଅର୍ ଆରମ୍ଭ କରିଥିଲେ । ସେ ଗାନ୍ଧୀ ମାଇଁ ଫାଦର, ମଜିୟାରା ହେ, ହମ ଜୋ କହ ନ ପାଏ ଭଳି ଚଳଚ୍ଚିତ୍ରରେ ମଧ୍ୟ କାମ କରିଛନ୍ତି।

ମାଟିତଳେ କୀଟ ରହୁଛି ୧୭ ବର୍ଷ, DNA ଟେଷ୍ଟରୁ ଜଣା ପଡିଲା ସତ

ଦକ୍ଷିଣ ଆଫ୍ରିକା: ଆପଣ କୀଟ ଦେଖିଥିବେ । ଅନେକ କୀଟ ପତଙ୍ଗ ସଦଳବଳେ ଚାଷ ଜମିରେ ବସନ୍ତି । ଆଉ ଫସଲ ନଷ୍ଟ କରି ଚାଲି ଯାଆନ୍ତି । ଅତି ବେଶିରେ ଚାଷ ଜମିରେ ବସିବାର ଅବଧି ଅତି ବେଶିରେ ରହିଥାଏ ୧୫ ଦିନରୁ ମାସେ । କିନ୍ତୁ ଆମେ ଆପଣଙ୍କୁ ଏମିତି ଏକ କୀଟ ବିଷୟରେ କହିବାକୁ ଯାଉଛୁ, ଯିଏ ଜମିରେ ମାସେ କିମ୍ବା ବର୍ଷେ ନୁହେଁ । ଲୁଚି ରୁହନ୍ତି ୧୭ ବର୍ଷ । ଆମେରିକାର ପୂର୍ବ ତଟରେ ଦେଖିବାକୁ ମିଳୁଛି ଏମିତି କିଛି କୀଟ । ପ୍ରଥମେ ଆମେରିକାର ପୂର୍ବ ଅଞ୍ଚଳରେ ଅଜବ ଶବ୍ଦ ଶୁଣିବାକୁ ମିଳିଥିଲା । ପରବର୍ତ୍ତୀ ସମୟରେ ଏହାର ଅନୁସନ୍ଧାନ କରିବାରୁ ଜଣା ପଡ଼ିଲା ଯେ, ଜମି ଭିତରୁ ଆସିବାରେ ଲାଗୁଛି ଏହି ଶବ୍ଦ । ଏବଂ ଏହି ଶବ୍ଦ କୌଣସି ପଶୁର କିମ୍ବା ପକ୍ଷୀର ନଥିଲା । ଏହା ଥିଲା ଚାଷ ଜମିରେ ବସୁଥିବା କୀଟର । ଲାଲ ଆଖି ଥିବା ଏହି କୀଟ ମାଟି ଭିତରେ ରୁହନ୍ତି । ଆଉ ପାଗ ବଦଳିବାରୁ ମାଟିରୁ ବାହାରିବାରେ ଲାଗିଛନ୍ତି । ହମିଙ୍ଗ ହେଲା ଭଳି ସାଉଣ୍ଡ କରୁଥିବା ଏହି କୀଟ ମାଟି ଭିତରେ ହିଁ ରହିଥାନ୍ତି । ସେଇଠି ହିଁ ପିଲା ଛୁଆ ଜନ୍ମ କରିବା ପରେ ମରିଯାଆନ୍ତି । ଅର୍ଥାତ କହିବାକୁ ଜୀବନର କିଛି ଅନ୍ତିମ ସମୟ ବିତାଇବା ପାଇଁ ଏମାନେ ମାଟି ଉପରକୁ ଆସିଥାନ୍ତି ।

 

ଏହି କୀଟ ମାନଙ୍କର ପ୍ରଚଳନରେ ଏକ ରୋଚକ କଥା ରହିଛି । ଏମାନଙ୍କ ଶବ୍ଦରେ ମଧ୍ୟ ରହିଛି ରହସ୍ୟପୂର୍ଣ୍ଣ କଥା । ମାଟିରୁ ବାହାରିବା ପରେ ଏହି କୀଟମାନେ ଫସଲ କ୍ଷେତରେ ବିଛୁରିତ ହୋଇ ବସି ରହନ୍ତି । କହିବାକୁ ଗଲେ ଫସଲକୁ ନଷ୍ଟ କରିପକାନ୍ତି । ଏବଂ ଶବ୍ଦ କରୁଥିବା କୀଟ କେବଳ ପୁରୁଷ ପ୍ରଜାତିର । ଶବ୍ଦ କରିବା ଦ୍ବାରା ମାଇ କୀଟ ମାନେ ଆକର୍ଷିତ ହୁଅନ୍ତି । ପୁରୁଷ କୀଟର ଶବ୍ଦ ଶୁଣିବା ପରେ ମାଇ କୀଟ ସେହି ପଥରେ ହିଁ ଯାଇଥାନ୍ତି । ଏବଂ ଗନ୍ତବ୍ୟ ସ୍ଥଳରେ ପହଁଚିବାରେ ସକ୍ଷମ ହୁଅନ୍ତି । ଯଦି ମାଇ କୀଟଟି କୌଣସି କାରଣରୁ ଏହି ଶବ୍ଦ ପାଇପାରେ ନାହିଁ ଅର୍ଥାତ ଶୁଣିବାରେ ସମସ୍ୟା ସୃଷ୍ଟି ହୁଏ । ତେବେ ସେ ଶେଷ ଥର ପାଇଁ ଶୁଣିଥିବା ଶବ୍ଦ ପଥର ସନ୍ଧାନରେ ରହିଥାଏ । ଅନ୍ତିମ ଥର ପାଇଁ କୀଟଟି ଯେଉଁଠାରୁ ହିଁ ପୁରୁଷ କୀଟର ଶବ୍ଦ ଶୁଣିଥଲା, ସେଇଠାକୁ ଯିବାକୁ ଲାଗିପଡ଼େ । ଏହି ଶବ୍ଦ ସେମାନଙ୍କର ସମ୍ଭୋଗ ଏବଂ ପ୍ରଜୋଜନର ମହତ୍ୱ ରଖିଥାଏ ।

ଏହାରି ଭିତରେ ଏପରି ନିର୍ଦ୍ଧିଷ୍ଟ କୀଟକୁ ଗତିପଥ ଏବଂ ପ୍ରଚଳନକୁ ପରିଲିଖିତ କରି ବୈଜ୍ଞାନିକ ମଧ୍ୟ ସତର୍କ ହୋଇଯାଇଛନ୍ତି । ମୌସୁମୀରେ ପରିବର୍ତ୍ତନ, ମାଟିର ସ୍ୱଭାବରେ ସାମଞ୍ଜସ୍ୟ ଏବଂ ପାଣିପାଗରେ ପରିବର୍ତ୍ତନ ଆଦି ସମସ୍ତ ବିଷୟକୁ ଅଧ୍ୟୟନ କରିବା ପରେ କୀଟଙ୍କ ଏପରି ସ୍ୱଭାବ ସମ୍ବନ୍ଧରେ ଅବଗତ ହୋଇଛନ୍ତି । ଜଳବାୟୁରେ ପରିବର୍ତ୍ତନ ହେବାରୁ ୨୦୧୭ ମସିହାରେ ଏହିପରି କିଛି କୀଟ ଆମେରିକାରେ ଦେଖିବାକୁ ମିଳିଥିଲେ । ୧୭ ବର୍ଷ ମାଟି ଭିତରେ ରହିବା ପରେ ଏମାନେ ପଦାକୁ ଆସିଥିବା ଜଣାପଡ଼ିଥିଲା । ବୈଜ୍ଞାନିକଙ୍କ କହିବା ମୁତାବକ ପାଣିପାଗରେ ପରିବର୍ତ୍ତନ ଘଟିବା ସହ ଏମାନଙ୍କ ଜୀବନ ଉପରେ ମଧ୍ୟ ଏହାର ପ୍ରଭାବ ପକାଇଥାଏ । ୟୁନିଭରସିଟ ଅଫ କନେକ୍ଟଭିଟ ସଂସ୍ଥା ଏହି କୀଟଙ୍କ ଉପରେ ପାଖାପାଖି ୩ ଦଶକ ଧରି ବିଶ୍ଲଷଣ ଜାରି ରଖିବା ପରେ ଏମାନଙ୍କ ସମ୍ବନ୍ଧରେ ଜାଣିବାକୁ ପାୱଇଛନ୍ତି । ଅନୁସନ୍ଧାନ କରୁଥିବା ସଂସ୍ଥାର କହିବା ମୁତାବକ ପାଣିପାଗରେ ପରିବର୍ତ୍ତନ ଘଟିବା ଏମାନଙ୍କ ଜୀବନ ଉପରେ ମଧ୍ୟ ପ୍ରଭାବ ପକାଇଥାଏ । ମାଟି ଭିତରେ ରହିବାର ମଧ୍ୟ କାରଣ ରହିଛି । ଅନ୍ୟା ଛୋଟ ଜୀବ ଏବଂ କୀଟପତଙ୍ଗ ସହ ଏମାନଙ୍କର ସାମଞ୍ଜସ୍ୟ ରହିଥାଏ । ଚଳପ୍ରଚଳରେ ସମସ୍ୟା ସୃଷ୍ଟି ହୁଏ । ଯାହା ଫଳରେ ଏମାନେ ମାଟି ଭିତରେ ରହିବାକୁ ପସନ୍ଦ କରିଥାନ୍ତି ।

ଆମେରିକାର ଅନ୍ୟ କିଛି ରିସର୍ଚର ମଧ୍ୟ ଏହି କୀଟଙ୍କ ଉପରେ ନିଜର ପରୀକ୍ଷା ନିରୀକ୍ଷା ଜାରି ରଖିଥିଲେ । ଦେଶର ବିଭିନ୍ନ ପ୍ରାନ୍ତରୁ ଏହି କୀଟମାନଙ୍କୁ ସଂଗ୍ରହ କରି ସେମାନଙ୍କର ଡିଏନଏକୁ ଏକତ୍ର କରାଇଥିଲେ । ଏମାନଙ୍କର ଲାଇଫ ଷ୍ଟାଇଲ ବିଷୟରେ ଜାଣିବାକୁ ପାଇଥିଲେ ଯେ କାହିଁକି ଏମାନେ ୧୭ ବର୍ଷ ଧରି ମାଟି ଭିତରେ ରହିଥାନ୍ତି । ଯେତେବେଳେ ପ୍ରଜନନ ସମୟ ହୋଇଥାଏ, ସେହି ସମୟରେ ହିଁ କେବଳ ବାହାରକୁ ଆସିଥାନ୍ତି । କେବଳ ଜଳବାୟୁ ପରିବର୍ତ୍ତନ ଯୋଗୁଁ ହିଁ ୧୭ ଏହି ନିର୍ଦ୍ଧିଷ୍ଟ କୀଟ ମାଟି ଭିତରେ ଛପି ରହିଥାନ୍ତି ।

ଏବେ କରୋନା ରୋଗୀଙ୍କୁ ଦିଆଯିବନି ଏସବୁ ମେଡିସିନ୍, ଜାରି ହେଲା ନୂଆ ଗାଇଡଲାଇନ୍

ନୂଆଦିଲ୍ଲୀ: କରୋନା ଆକ୍ରାନ୍ତଙ୍କ ଚିକିତ୍ସାରେ ବ୍ୟବହୃତ ଔଷଧକୁ ନେଇ ନୂଆ ନିୟମାବଳୀ ଆଣିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଡାଇରେକ୍ଟାେରେଟ୍ ଜେନେରାଲ୍ ଅଫ୍ ହେଲଥ ସର୍ଭିସେସ୍ (ଡିଜିଏଚଏସ୍) । ସାମାନ୍ୟ ଲକ୍ଷଣ ବା ଲକ୍ଷଣ ନ ଥିବା କରୋନା ରୋଗୀଙ୍କୁ ହାଇଡ୍ରୋକ୍ଲୋରୋକ୍ବିନ୍, ଆଇଭରମେଜ୍ଟିନ, ଡକ୍ସିସାଇକ୍ଲିନ୍, ଜିଙ୍କ, ମଲ୍ଟିଭିଟାମିନ୍ ଆଦି ଦିଆଯିବନାହିଁ ବୋଲି କହିଛି ଡିଜିଏଚଏସ୍।

ଏହା ପୂର୍ବରୁ କୋଭିଡ୍ ସଂକ୍ରମିତଙ୍କ ଚିକିତ୍ସା ପାଇଁ ଏହିସବୁ ମେଡିସିନ୍ ବିପୁଳ ପରିମାଣରେ ବ୍ୟବହାର କରାଯାଉଥିଲା। ପୂର୍ବରୁ  ମେ ୨୭ ତାରିଖରେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ମହାନିର୍ଦ୍ଦେଶକ ଏହି ନୂଆ ଗାଇଡଲାଇନ ଜାରିବା ସହ ମେଡିସିନ୍ ବ୍ୟବହାର ନେଇ ରୋକ୍ ଲଗାଇଥିଲେ ।

ଏକ ରିପୋର୍ଟ ଅନୁଯାୟୀ, ଯେଉଁ ରାେଗୀ ମାନଙ୍କର ଶରୀରରେ କରୋନା ସଂକ୍ରମଣର ଲକ୍ଷଣ ନାହିଁ କିମ୍ବା ସାମାନ୍ୟ ଲକ୍ଷଣ ରହିଛି, ସେମାନଙ୍କୁ ମେଡିସିନ୍ ଖାଇବାର କୌଣସି ଆବଶ୍ୟକତା ନାହିଁ । ସେମାନଙ୍କୁ କେବଳ ସନ୍ତୁଳିତ ଖାଦ୍ୟ ଖାଇବା ଆବଶ୍ୟକ । ଯଦି ଅନ୍ୟ କିଛି ରୋଗ ପାଇଁ ମେଡିସିନ୍ ଖାଉଛନ୍ତି ତାହେଲେ ସେହି ମେଡିସିନ୍ ଗୁଡିକ ସେମାନେ ଖାଇପାରିବେ । ଆବଶ୍ୟକ ସ୍ଥଳେ ରୋଗୀ ମାନଙ୍କୁ ଟେଲି କନସଲଟେନ୍ସ ଜରିଆରେ ପରାମର୍ଶ ଦିଆଯିବା ନେଇ ସୂଚନା ମିଳିଛି ।

ତେବେ ଜ୍ୱର ଆସିଲେ କେବଳ ଆଣ୍ଟିପାଇରେଟିକ୍ ବା ପାରାସିଟାମଲ୍ ଓ ଥଣ୍ଡା ହେଲେ ଆଣ୍ଟିଟ୍ୟୁସିଭ୍ ଦିଆଯିବ । ଏହାସହ ଅତି ଜରୁରୀ ନଥିଲେ ସିଟି ସ୍କାନ ମଧ୍ୟ ନକରିବାକୁ କହିଛି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ। କରୋନା ଆକ୍ରାନ୍ତମାନେ ସମସ୍ତ କଟକଣା ମାନିବା ସହ ସନ୍ତୁଳିତ ଆହାର ସେବନ କରିବାକୁ କୁହାଯାଇଛି ।

ଅତି ଗମ୍ଭୀର ରୋଗରେ ପୀଡ଼ିତ ବ୍ୟକ୍ତି ଯଦି ଲକ୍ଷଣହୀନ କରୋନା ଆକ୍ରାନ୍ତ ହୁଅନ୍ତି, ତାଙ୍କୁ ଔଷଧ ଖାଇବାର ଆବଶ୍ୟକତା ରହିଛି । ନଚେତ ଲକ୍ଷଣହୀନ କରୋନା ରୋଗୀ କୌଣସି ଔଷଧ ନ ଖାଇବାକୁ ପରାମର୍ଶ ଦେଇଛି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ।

ଉଲ୍ଲେଖଯୋଗ୍ୟ,  ଗତ ୨୪ ଘଣ୍ଟା ମଧ୍ୟରେ ଦେଶରେ ୧,୦୦,୬୩୬ ପଜିଟିଭ ଚିହ୍ନଟ ହୋଇଛନ୍ତି । ଏଥିସହିତ ୨ ହଜାର ୪୨୭ ଜଣଙ୍କର କରୋନାରେ ମୃତ୍ୟୁ ହୋଇଛି । ଏହାକୁ ମିଶାଇ ଦେଶରେ ମୋଟ ମୃତ୍ୟୁ ସଂଖ୍ୟା ୩ଲକ୍ଷ ୪୯ହଜାର ୧୮୬ ପାର୍ କରିଛି । ଗୋଟିଏ ଦିନରେ କରୋନା ସଂକ୍ରମଣରୁ ସୁସ୍ଥ ହୋଇ ଫେରିଛନ୍ତି ୧ ଲକ୍ଷ ୭୪ ହଜାର ୩୯୯ ଆକ୍ରାନ୍ତ। ନୂଆ ଆକ୍ରାନ୍ତକୁ ମିଶାଇ ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୨ କୋଟି ୮୯ ଲକ୍ଷ ୯ ହଜାର ୯୭୫ ପାର୍ କରିଛି। ଏବେ ସୁଦ୍ଧା ସାରା ଦେଶରେ ୨୩ କୋଟି ୨୭ ଲକ୍ଷ ୮୬ ହଜାର ୪୮୨ ଲୋକଙ୍କୁ କରୋନା ଟିକା ଦିଆ ସରିଛି।

ଡଲାର ତୁଳନାରେ ଟଙ୍କା ୧୨ ପଇସା ମଜବୁତ

ମୁମ୍ବାଇ: ଘରୋଇ ସେୟାର ବଜାରରେ ପଜିଟିଭ୍ ଟ୍ରେଣ୍ଡ୍ ଓ ଅଶୋଧିତ ତୈଳ ମୂଲ୍ୟ ହ୍ରାସ କାରଣରୁ ସୋମବାର ଦିନ ଆମେରିକୀୟ ଡଲାର ତୁଳନାରେ ଟଙ୍କା ୧୨ ପଇସା ମଜବୁତ ହୋଇଛି । ଡଲାର ତୁଳନାରେ ଟଙ୍କାରେ ୧୨ ପଇସା ବୃଦ୍ଧି ହୋଇ ୭୨.୮୭ରେ ପହଞ୍ଚିଛି।

Rupee sees biggest one-day fall vs US dollar in 20 months

ଏହା ବ୍ୟତୀତ ଡିଲରଙ୍କ କହିବାନୁଯାୟୀ, ଘରୋଇ ବଜାରରେ ଏହା  ଆଶ୍ୱସ୍ତି ଆଣିଛି । ଇଣ୍ଟରବ୍ୟାଙ୍କ ଫରେନ୍ ଏକ୍ସଚେଞ୍ଜ ଅନୁଯାୟୀ ଆଜି ଡଲାର ତୁଳନାରେ ଟଙ୍କା ୭୨.୮୫ରେ ଖୋଲିଥିଲା । ପ୍ରାରମ୍ଭିକ କାରବାରରେ ୭୨.୮୭ ଛୁଇଁ ଖସିଥିଲା,  ପୂର୍ବ ବନ୍ଦ ତୁଳନାରେ ଯାହା ୧୨ ପଇସା ବୃଦ୍ଧି ହୋଇଥିଲା।

 

ଶୁକ୍ରବାର ଦିନ ଆମେରିକୀୟ ଡଲାର ତୁଳନାରେ ଟଙ୍କା ୭୨.୯୯ରେ ସ୍ଥିର ରହିଥିଲା। ଅନ୍ୟପକ୍ଷରେ ଅଶୋଧିତ ତୈଳ ମୂଲ୍ୟରେ ୦.୫୪ ପ୍ରତିଶତ ହ୍ରାସ ହୋଇ ଏହା ବ୍ୟାରେଲ୍ ପିଛା ୭୧.୫୦ ଡଲାର ରହିଛି ।

ସବୁ ବର୍ଗର ଲୋକ ଏଠି ପ୍ରଭାବିତ: ସଞ୍ଜୟ ଦାସବର୍ମା

ଭୁବନେଶ୍ୱର:  ବର୍ତ୍ତମାନ ସାରା ଭାରତ ବର୍ଷରେ ଯେଉଁ ଭଳି ଦରଦାମ୍ ହୁ ହୁ ହୋଇ ବଢ଼ିଚାଲିଛି । ଏହି ସମୟରେ ପ୍ରାୟ ସମସ୍ତେ ବେକାର । ଜିଡିପି ୪୦ ବର୍ଷ ତଳେ । ଏଭଳି ସମୟରେ ଲଗାତାର ଭାବେ ତୈଳ ଦର ଲୋକଙ୍କ ଉପରେ ଲଦି ଦିଆଯାଉଛି ଏହାକୁ ତୀବ୍ର ନିନ୍ଦା କରିଛି ବିଜୁ ଜନତା ଦଳ । ଯେଉଁ ସରକାର ଆଚ୍ଛେ ଦିନର ସ୍ଲୋଗାନ ଦେଉଥିଲେ ତାହାର ଓଲଟା ହେଉଛି । ସବୁଵର୍ଗର ଲୋକ ଏଠିରେ ପ୍ରଭାବିତ ହେଉଛନ୍ତି । ଲଗାତାର ଭାବେ ୧୬ ଥର ତୈଳ ଦର ବୃଦ୍ଧି କରାଯାଇଛି । ଯାହା ସିଧା ସଳଖ ଭାବେ ଲୋକଙ୍କ ଉପରେ ପ୍ରଭାବ ପଡ଼ିଛି । କେନ୍ଦ୍ର ସରକାର ନେଉଥିବା ଟ୍ୟାକ୍ସ ହାର କମାଇବା ସହ ରିହାତି ହାର ବୃଦ୍ଧି କରନ୍ତୁ । ଆନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ଯେଉଁ ହାର ବୃଦ୍ଧି ପାଉନି ତା ତୁଳନାରେ ତୈଳ ଦର ଯଥେଷ୍ଟ ଅଧିକ ବୃଦ୍ଧି ପାଉଛି । ତୈଳ ଦର ବୃଦ୍ଧି ସାଧାରଣ ଲୋକଙ୍କୁ ବହୁତ ପ୍ରଭାବିତ କରୁଛି ବୋଲି କହିଛନ୍ତି ବିଜେଡି ନେତା ସଞ୍ଜୟ ଦାସବର୍ମା । ଅଗାମୀ ଦିନରେ ତୈଳ ଦର ବୃଦ୍ଧି ପ୍ରତିବାଦ ନେଇ ବିଜେଡି ଆହୁରି ଶକ୍ତ ଆଭିମୁଖ୍ୟ ଆପଣେଇବ ବୋଲି ଦଳ ପକ୍ଷରୁ କୁହାଯାଇଛି ।

ଆୟକର ବିଭାଗର ନୂଆ ପୋର୍ଟାଲ୍ ଲଞ୍ଚ, ଟିକସଦାତାଙ୍କୁ ମିଳିବ ଏହି ସୁବିଧା

ନୂଆଦିଲ୍ଲୀ: ଆୟକର ବିଭାଗର ନୂଆ ପୋର୍ଟାଲ ସୋମବାର ଦିନ ଠାରୁ ଆରମ୍ଭ ହେଉଛି । ବିଭାଗ ଅନୁଯାୟୀ ଟିକସଦାତାମାନେ ଏହି ପୋର୍ଟାଲ ଜରିଆରେ ଅନଲାଇନରେ ବିବରଣୀ ଦେଇପାରିବେ। ଏହାସହିତ ଏହି ପୋର୍ଟାଲ୍ ରେ ଦିଆଯାଇଥିବା ବିବରଣୀ ଗୁଡିକର ତୁରନ୍ତ ପ୍ରକ୍ରିୟାକରଣ ହେବା ସହ ତୁରନ୍ତ ଟିକସ ଫେରସ୍ତ ପ୍ରକ୍ରିୟା ସୁବିଧା ମଧ୍ୟ ଉପଲବ୍ଧ ହେଉଛି ।

କେନ୍ଦ୍ରୀୟ ବୋର୍ଡ ଅଫ୍ ଡାଇରେକ୍ଟ ଟ୍ୟାକ୍ସ (ସିବିଡିଟି) ଅନୁଯାୟୀ, ଏହି ପୋର୍ଟାଲ www.incometax.gov.in ଆଜିଠାରୁ ଆରମ୍ଭ ହେଉଛି ।  CBDT ପକ୍ଷରୁ ଜୁନ୍ ୧୮ରେ ଏକ ନୂଆ ପେମେଣ୍ଟ ସିଷ୍ଟମ୍ ଆରମ୍ଭ କରିବାକୁ ଯାଉଛି । ପୋର୍ଟାଲ ଲଞ୍ଚ ପରେପରେ ଏକ ମୋବାଇଲ୍ ଆପ୍ ମଧ୍ୟ ଜାରି କରାଯିବ । ଯାହା ଫଳରେ ଟିକସଦାତାମାନେ ଏହାର ବିଭିନ୍ନ ଫିଚର ସମ୍ପର୍କରେ ଅବଗତ ହୋଇପାରିବେ ।

ସିବିଡିଟି ଅନୁଯାୟୀ, “ଟିକସ ଦେବାର ନୂତନ ବ୍ୟବସ୍ଥା ସମ୍ପର୍କରେ ଅଭ୍ୟସ୍ତ ହେବା ପାଇଁ ଟିକସଦାତାଙ୍କୁ କିଛି ସମୟ ଲାଗିପାରେ। ବ୍ୟବହାର କରିବା ପୂର୍ବରୁ ଏହାର ସମସ୍ତ ବୈଶିଷ୍ଟ୍ୟଗୁଡିକୁ ଟିକସଦାତା ମାନେ ଭଲ ଭାବରେ ବୁଝନ୍ତୁ ବୋଲି ଆମର ପ୍ରଚେଷ୍ଟା ରହିଛି ।

ଉଲ୍ଲେଖଯୋଗ୍ୟ, ଜୁନ୍ ୧ରୁ ୬ ତାରିଖ ଯାଏଁ ଇନକମ୍ ଟ୍ୟାକ୍ସ ଡିପାର୍ଟମେଣ୍ଟର ଇ-ଫାଇଲିଂ ପୋର୍ଟାଲ୍ କାମ କରିବ ନାହିଁ ବୋଲି ପୂର୍ବରୁ ସୂଚନା ଦିଆଯାଇଥିଲା। କାରଣ ବିଭାଗ ପକ୍ଷରୁ ଟ୍ୟାକ୍ସ ପେୟର୍ସଙ୍କ ପାଇଁ ଇନକମ୍ ଟ୍ୟାକ୍ସ ଇ-ଫାଇଲିଂର ନୂଆ ପୋର୍ଟାଲ୍ ଲଞ୍ଚ କରାଯାଇଥାନ୍ତା ।

ଅଧିକ ପଢନ୍ତୁ- ଜୁନ୍ ୧ରୁ ହେବ ଏହି ୬ଟି ପରିବର୍ତ୍ତନ, ଜାଣନ୍ତୁ…

ଆଜି ସନ୍ଧ୍ୟା ୫ଟାରେ ଦେଶବାସୀଙ୍କୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ସନ୍ଧ୍ୟା ୫ଟାରେ ଦେଶବାସୀଙ୍କୁ ସମ୍ବୋଧିତ କରିବେ। ଏନେଇ ପିଏମଓ ଅଫିସ୍ ପକ୍ଷରୁ ଟୁଇଟ୍ କରି ସୂଚନା ଦିଆଯାଇଛି । ଟୁଇଟ୍ ଅନୁଯାୟୀ, ‘‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୁନ୍ ୭ ତାରିଖ ତଥା ଆଜି ସନ୍ଧ୍ୟା ୫ଟାରେ ଦେଶକୁ ସମ୍ବୋଧିତ କରିବେ’’।

ସୂଚନା ଅନୁଯାୟୀ, ଦେଶରେ ସାମ୍ପ୍ରତିକ ପରିସ୍ଥିତିକୁ ନେଇ ପ୍ରଧାନମନ୍ତ୍ରୀ କିଛି ସୂଚନା ଦେଇପାରନ୍ତି । ଏଥସହିତ ସେ ଟୀକାକରଣ ସମ୍ପର୍କରେ ମଧ୍ୟ ଦେଶବାସୀଙ୍କୁ ମଧ୍ୟ ଆହ୍ୱାନ କରିପାରନ୍ତି । ଦେଶର ଅନେକ ରାଜ୍ୟରେ ଅନଲକ୍ ପ୍ରକ୍ରିୟା ଧୀରେ ଧୀରେ ଆରମ୍ଭ ହେଉଥିବା ବେଳେ ପ୍ରଧାନମନ୍ତ୍ରୀ ସମ୍ବୋଧନ କରିବେ ।

୬୧ ଦିନ ପରେ ସବୁଠୁ କମ୍ ମାମଲା-

ଖାସ୍ କଥା ହେଉଛି, ପ୍ରାୟ ୬୧ ଦିନ ପରେ ଦେଶରେ ସର୍ବନିମ୍ନ ମାମଲା ରୁଜୁ ହୋଇଛି । ସୋମବାର ଦିନ ଭାରତରେ ୧,୦୦,୬୩୬ ନୂଆ ମାମଲା ରୁଜୁ ହୋଇଛି । ଏଥିସହିତ ୨ ହଜାର ୪୨୭ ଜଣଙ୍କର କରୋନାରେ ମୃତ୍ୟୁ ହୋଇଥିବା ରିପୋର୍ଟ ଦେଇଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ। ଏହାକୁ ମିଶାଇ ଦେଶରେ ମୋଟ ମୃତ୍ୟୁ ସଂଖ୍ୟା ୩ଲକ୍ଷ ୪୯ହଜାର ୧୮୬ ପାର୍ କରିଛି । ଗୋଟିଏ ଦିନରେ କରୋନା ସଂକ୍ରମଣରୁ ସୁସ୍ଥ ହୋଇ ଫେରିଛନ୍ତି ୧ ଲକ୍ଷ ୭୪ ହଜାର ୩୯୯ ଆକ୍ରାନ୍ତ। ନୂଆ ଆକ୍ରାନ୍ତକୁ ମିଶାଇ ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୨ କୋଟି ୮୯ ଲକ୍ଷ ୯ ହଜାର ୯୭୫ ପାର୍ କରିଛି। ଏବେ ସୁଦ୍ଧା ସାରା ଦେଶରେ ୨୩ କୋଟି ୨୭ ଲକ୍ଷ ୮୬ ହଜାର ୪୮୨ ଲୋକଙ୍କୁ କରୋନା ଟିକା ଦିଆ ସରିଛି।