ନୂଆଦିଲ୍ଲୀ: ସମଗ୍ର ଭାରତରେ ଏବେ କରୋନା ମହାମାରୀ ସହ ସଂଘର୍ଶ କରୁଛି। ପ୍ରତିଦିନ ୩ ଲକ୍ଷରୁ ଅଧିକ ସଂଖ୍ୟାରେ କରୋନା ସଂକ୍ରମିତ ଦେଶରୁ ଚିହ୍ନଟ ହେଉଛନ୍ତି। କରୋନାକୁ ନେଇ ସମସ୍ୟା ଏତେ ମାତ୍ରାରେ ବଢ଼ିଯାଇଛିଯେ ପ୍ରସାଶନର ମୁଣ୍ଡ ବିନ୍ଧାର କାରଣ ପାଲଟିଛି । ଡାକ୍ତରଖାନାରେ ଅମ୍ଳଜାନ ଅଭାବ, ଡାକ୍ତରଖାନାରେ ଶଯ୍ୟା, ଡାକ୍ତର ଏବଂ କର୍ମଚାରୀଙ୍କ ଅଭାବ ହେତୁ ପ୍ରତିଦିନ ହଜାର ହଜାର ଲୋକଙ୍କର ମୃତ୍ୟୁ ହେଉଛି। ଆଉ ଏଇ ଭୟଙ୍କର ସଂଘର୍ଷ ଭିତରେ ଆରମ୍ଭ ହୋଇଛି ଆଇପିଏଲ ମ୍ୟାଚ୍। ୯ ଏପ୍ରିଲରୁ ଆରମ୍ଭ ହୋଇଥିବା ଏହି ଟୁର୍ନାମେଣ୍ଟରେ ଖେଳୁଥିବା ବିଦେଶୀ ଖେଳାଳିମାନେ ବର୍ତ୍ତମାନ କରୋନା କାରଣରୁ ଚିନ୍ତାରେ ରହିଛନ୍ତି। ଭାରତରେ କରୋନା ବଢ଼ୁଥିବାରୁ ଏମାନଙ୍କ ମନରେ ଭୟ ଦେଖା ଦେଲାଣି। ଏଥିପାଇଁ ଅଧିକାଂଶ ଖେଳାଳି ଭାରତର ବର୍ତ୍ତମାନର ପରିସ୍ଥିତିକୁ ଦେଖି ଆଇପିଏଲ ଟୁର୍ଣ୍ଣାମେଣ୍ଟ ମଝିରୁ ଛାଡ଼ି ପଳାଉଛନ୍ତି ।
ବ୍ୟକ୍ତିଗତ କାରଣ ଦର୍ଶାଇ ଆରସିବିର ଅଷ୍ଟ୍ରେଲୀୟ ସ୍ପିନର ଆଡାମ ଜାମ୍ପା, ପେସମ୍ୟାନ୍ କେନ୍ ରିଚାର୍ଡସନ ଘରକୁ ଫେରିବାକୁ ନିଷ୍ପତ୍ତି ନେଇଛନ୍ତି। କିଛି ଘଣ୍ଟା ପୂର୍ବରୁ ତାଙ୍କ ସହଯୋଗୀ ରାଜସ୍ଥାନ ରୟାଲ୍ସର ପେସ୍ ବୋଲର ଆଣ୍ଡ୍ରିୟୁ ଟାଇ ମଧ୍ୟ ଆଇପିଏଲରୁ ଓହରିଯିବାକୁ ନିଷ୍ପତ୍ତି ନେଇଛନ୍ତି। ତେବେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ତାର ଅଫିସିଆଲ୍ ଟ୍ୱିଟର ଆକାଉଣ୍ଟରେ ଏହି ସୂଚନା ଦେଇଛି। ସ୍ପିନର ଆଡାମ ଜାମ୍ପାଙ୍କୁ ଆରସିବି ୧.୦୫ କୋଟି ଟଙ୍କା ଦେଇ କିଣିଥିବା ବେଳେ କେନ୍ ରିଚାର୍ଡସନଙ୍କୁ ୪ କୋଟି ଦେଇ କିଣିଥିଲା ।
ଖାଲି ଫରେନ ଖେଳାଳି ନୁହଁନ୍ତି। କରୋନା ବୃଦ୍ଧି ହେତୁ ଭାରତୀୟ ସ୍ପିନର ରବିଚନ୍ଦ୍ରନ୍ ଅଶ୍ୱିନ୍ ମଧ୍ୟ ଟୁର୍ନାମେଣ୍ଟ ଛାଡିବାକୁ ନିଷ୍ପତ୍ତି ନେଇଛନ୍ତି। ତାମିଲନାଡୁର ଏହି ଅଫ୍ ସ୍ପିନର ଦିଲ୍ଲୀ କ୍ୟାପିଟର ତରଫରୁ ଖେଳୁଥିଲେ। ଟ୍ୱିଟରରେ ତାଙ୍କ ନିଷ୍ପତ୍ତି ବିଷୟରେ ସୂଚନା ଦେଇ ସେ କହିଛନ୍ତି ଯେ ସେ ତାଙ୍କ ପରିବାର ସହିତ ସମୟ ବିତାଇବାକୁ ଚାହୁଁଛନ୍ତି। ଦିଲ୍ଲୀର ସନରାଇଜର୍ସ ହାଇଦ୍ରାବାଦ ବିପକ୍ଷରେ ବିଜୟ ପରେ ଟ୍ୱିଟ୍ କରି ଅଶ୍ୱିନ୍ ଏହି ନିଷ୍ପତ୍ତିକୁ ସମସ୍ତଙ୍କ ସାମ୍ନାକୁ ଆଣିଛନ୍ତି।
ଅଶ୍ୱିନଙ୍କ ପରିବାର ଏବଂ ତାଙ୍କର ଘନିଷ୍ଠ ବନ୍ଧୁମାନେ ମାରାତ୍ମକ କରୋନା ସହ ଲଢ଼ୁଛନ୍ତି। ତେଣୁ ଏତେ କଷ୍ଟଦାୟକ ପରିସ୍ଥିତିରେ ରବି ତାଙ୍କ ପରିବାର ସହ ରହିବାକୁ ଚାହାଁନ୍ତି। ଯଦି ସବୁକିଛି ଠିକ୍ ଠିକ ହୋଇଯାଏ ତେବେ ସେ ଏହି ୧୪ ତମ ସିଜନରେ ପୁଣି ଫେରିବେ ବୋଲି କହିଛନ୍ତି ।
ଆଦାମ ଜାମ୍ପା, କେନ୍ ରିଚାର୍ଡସନ, ଆଣ୍ଡ୍ରିୟୁ ଟାଇ ଏବଂ ଅଶ୍ୱିନଙ୍କ ପୂର୍ବରୁ ମଧ୍ୟ ଅନେକ ଖେଳାଳି ବିଭିନ୍ନ କାରଣରୁ ଟୁର୍ନାମେଣ୍ଟ ଛାଡିଛନ୍ତି। ରାଜସ୍ଥାନ ରୟାଲ୍ସର ବ୍ୟାଟ୍ସମ୍ୟାନ୍ ଲିଆମ୍ ଲିଭିଙ୍ଗଷ୍ଟନ୍ ଗତ ସପ୍ତାହରେ ଟୁର୍ନାମେଣ୍ଟରୁ ଓହରି ଯାଇଥିଲେ। ଗତ ସିଜନରେ ଦେଶରେ କରୋନା ମହାମାରୀ ହେତୁ ୟୁଏଇରେ ଏହି ଟୁର୍ନାମେଣ୍ଟ ଅନୁଷ୍ଠିତ ହୋଇଥିଲା। ତେବେ ସେହି ସମୟରେ ମଧ୍ୟ ଚେନ୍ନାଇ ସୁପରକିଙ୍ଗର ସୁରେଶ ରାଇନା, ହରଭଜନ ସିଂ ମଧ୍ୟ ଏଭଳି ଆଶ୍ଚର୍ଯ୍ୟଜନକ ନିଷ୍ପତ୍ତି ନେଇଥିଲେ।
