ବାଲେଶ୍ବର: ବିଶିଷ୍ଟ ଶିଳ୍ପପତି ହିମାଂଶୁ ଦାସଙ୍କ ପରଲୋକ । ଗତକାଲି ରାତିରେ ତାଙ୍କର ପରଲୋକ ହୋଇଛି । ମୃତ୍ୟୁ ବେଳକୁ ତାଙ୍କୁ ୭୭ବର୍ଷ ବୟସ ହୋଇଥିଲା । ଗତକାଲି ରାତିରେ ସେ ଅସୁସ୍ଥତା ଅନୁଭବ କରିବାରୁ ପରିବାର ଲୋକେ ତାଙ୍କୁ ବାଲେଶ୍ବର ମେଡ଼ିକାଲରେ ଭର୍ତ୍ତି କରିଥିଲେ । ଅବସ୍ଥା ସଂକଟାପର୍ଣ୍ଣ ହେବାରୁ ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା । ହେଲେ ସେଠାରେ ତାଙ୍କର ମୃତ୍ୟୁ ହୋଇଥିଲା । ହରି ପ୍ଲାଷ୍ଟ, ହରି ମେରାଇଲ, ହରି ପ୍ଲାଜା, ହରି ମୋଟର୍ସ ଭଳି ହରି ଉଦ୍ୟୋଗର ପ୍ରତିଷ୍ଠାତା ଥିଲେ ସ୍ବର୍ଗତ ହିମାଂଶୁ ଦାସ । ବାଲେଶ୍ବର ଚାମ୍ବର ଅଫ୍ ଇଣ୍ଡଷ୍ଟ୍ରି ଏଣ୍ଡ କମର୍ସର ଅଧ୍ୟକ୍ଷ ମଧ୍ୟ ଥିଲେ । ବାଲେଶ୍ବରରେ ହୋଇଆସୁଥିବା ଏକ୍ସପୋ ମେଳାକୁ ହିମାଂଶୁ ଦାସ ପରିଚାଳନା କରୁଥିଲେ । ଏହାସହ ସେ ଜଣେ ମେଳାପି, ସମୟାନୁବର୍ତ୍ତି ଶିଳ୍ପପତି ଭାବେ ସାରା ଓଡ଼ିଶାରେ ବେଶ୍ ପରିଚିତ ଥିଲେ । ତାଙ୍କ ବିୟୋଗରେ ବାଲେଶ୍ବର ଜିଲ୍ଲା ଜଣେ ମୁରବି ହରାଇବା ସହିତ ଜଣେ ଉତ୍ସାହି ଶିଳ୍ପଦ୍ୟୋଗୀଙ୍କୁ ହରାଇଲା ବୋଲି ବିଶିଷ୍ଟ ବ୍ୟକ୍ତିମାନେ ଶୋକପ୍ରକାଶ କରିଛନ୍ତି ।
ରାଜ୍ୟରେ ଆଉ ୬ହଜାର ୧୧୮ ଜଣ କରୋନା ସଂକ୍ରମିତ ଚିହ୍ନଟ
ଭୁବନେଶ୍ୱର: ରାଜ୍ୟରେ ଦ୍ରୁତ ଗତିରେ ହ୍ରାସ ପାଉଛି କରୋନା ସଂକ୍ରମଣ । ଦୈନିକ ସଂକ୍ରମଣରେ ଚିହ୍ନଟ ହୋଇଛନ୍ତି ଆଉ ୬ ହଜାର ୧୧୮ ପଜିଟିଭ୍ । କ୍ବାରେଣ୍ଟାଇନରୁ ୩ ହଜାର ୪୫୩ ଜଣ ଥିବା ବେଳେ, ଲୋକାଲ କେସ୍ ରହିଛି ୨ ହଜାର ୬୬୫ । ତେବେ ଗୋଟିଏ ଦିନରେ ଭାଇରସ ନେଇଛି ଆଉ ୪୧ ଜୀବନ । ଦୈନିକ ସଂକ୍ରମଣରେ କଟକରୁ ଚିହ୍ନଟ ହୋଇଥିବା ସର୍ବାଧିକ ୬୪୦ ଆକ୍ରାନ୍ତ । ସେହିପରି ଯାଜପୁରରୁ ୫୬୩, ଖୋର୍ଦ୍ଧାରୁ ୪୯୫, ଅନୁଗୁଳରୁ ୪୧୬, ପୁରୀରୁ ୩୯୮, ମୟୂରଭଞ୍ଜରୁ ୩୫୨, ସୁନ୍ଦରଗଡ଼ରୁ ୨୭୨, ଭଦ୍ରକରୁ ୨୨୮, କେନ୍ଦ୍ରାପଡ଼ାରୁ ୨୨୭, ଜଗତସିଂହପୁରରୁ ୨୧୮, ବାଲେଶ୍ବରରୁ ୧୯୫, କୋରାପୁଟରୁ ୧୮୦, ନବରଙ୍ଗପୁରରୁ ୧୬୬ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିପରି ବରଗଡ଼ରୁ ୧୬୪ ଜଣ ପଜିଟିଭ୍ ଚିହ୍ନଟ ହୋଇଥିବା ବେଳେ, ନୟାଗଡରୁ ୧୬୧, କେନ୍ଦୁଝରରୁ ୧୫୫, କନ୍ଧମାଳରୁ ୧୪୩, ଢେଙ୍କାନାଳରୁ ୧୨୩, ବୌଦ୍ଧରୁ ୧୧୨, ରାୟଗଡ଼ାରୁ ୧୦୮, ମାଲକାନଗିରିରୁ ୧୦୭, ଷ୍ଟେଟ୍ ପୁଲରୁ ୧୦୩, ସମ୍ବଲପୁରରୁ ୧୦୩, ଗଞ୍ଜାମରୁ ୯୩, ଝାରସୁଗୁଡ଼ାରୁ ୮୬, ବଲାଙ୍ଗୀରରୁ ୮୩, କଳାହାଣ୍ଡିରୁ ୮୦, ସୋନପୁରରୁ ୫୨, ନୂଆପଡ଼ାରୁ ୩୬, ଗଜପତିରୁ ୩୦, ଦେବଗଡ଼ରୁ ୨୯ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।
ଏଥିସହିତ ପଢ଼ନ୍ତୁ: ରାଜ୍ୟରେ ବଢ଼ିବ କାଳବୈଶାଖୀ ବର୍ଷା: ୧୫ ଜିଲ୍ଲାକୁ ୟେଲୋ ଆଲର୍ଟ ଜାରି କଲା ପାଣିପାଗ କେନ୍ଦ୍ର
ରାଜ୍ୟରେ ବଢ଼ିବ କାଳବୈଶାଖୀ ବର୍ଷା: ୧୫ ଜିଲ୍ଲାକୁ ୟେଲୋ ଆଲର୍ଟ ଜାରି କଲା ପାଣିପାଗ କେନ୍ଦ୍ର
ଭୁବନେଶ୍ୱର: ରାଜ୍ୟରେ ବଢିବ କାଳବୈଶାଖି ବର୍ଷା । ଏଥିପାଇଁ ୧୫ ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର। ବିଶେଷ କରି କୋରାପୁଟ, ମାଲକାନଗିରି, ନବରଙ୍ଗପୁର, କଳାହାଣ୍ଡି, କନ୍ଧମାଳ, ନୂଆପଡା, ବରଗଡ଼, ଝାରସୁଗୁଡା ଜିଲ୍ଲାରେ କାଳବୈଶାଖି ଦେଖାଦେବ । ଏହା ସହିତ ସୁନ୍ଦରଗଡ, ଦେବଗଡ଼, କେନ୍ଦୁଝର, ମୟୁରଭଞ୍ଜ, ବାଲେଶ୍ବର, ଭଦ୍ରକ ଏବଂ ଯାଜପୁରରେ ମଧ୍ୟ ଘଡଘଡି ବିଜୁଳି ସହିତ ବର୍ଷା ପବନ ହେବାର ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ଟ୍ରପଲାଇନ୍ ପ୍ରଭାବରେ କାଳବୈଶାଖି ବର୍ଷା ଜାରି ରହିଛି । ତେବେ ଆସନ୍ତା ୧୧ ତାରିଖରୁ ଉତ୍ତର ବଙ୍ଗୋପସାଗରରେ ଏକ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି । ଏହା ପ୍ରଭାବରେ ୧୦ ତାରିଖରୁ ୧୪ ତାରିଖ ମଧ୍ୟରେ ରାଜ୍ୟର ଅଧିକାଂଶ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ । ଏବେ ରାଜ୍ୟରେ ପ୍ରାକ୍ ମୌସୁମୀ ସକ୍ରିୟ ଥିବା ବେଳେ ଆସନ୍ତା ୧୧ ତାରିଖରୁ ଦକ୍ଷିଣ ପଶ୍ଚିମ ମୌସୁମୀ ବାୟୁ ଓଡିଶା ଛୁଇଁବ ବୋଲି ଆକଳନ କରାଯାଇଛି । ଆସନ୍ତା ୯ ତାରିଖରେ କାଳବୈଶାଖି ବର୍ଷା ପାଇଁ ୨୦ ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି ।
ଏଥିସହିତ ପଢ଼ନ୍ତୁ: ସମୁଦ୍ର ଭିତରେ କ’ଣ ରହୁଛନ୍ତି ଏଲିୟନ୍ସ ? ଆମେରିକା ଗୁଇନ୍ଦା ରିପୋର୍ଟ ଲିକ୍ ପରେ ଚର୍ଚ୍ଚା
ଶାଳୀକୁ ହତ୍ୟା ପରେ ଶାଶୂଙ୍କୁ ଦୁଷ୍କର୍ମ ଅଭିଯୋଗ
କେନ୍ଦୁଝର: ଶାଳୀକୁ କୁରାଢ଼ୀରେ ହାଣି ହତ୍ୟା ଓ ଶାଶୂ ହାତ ବାନ୍ଧି ଦୁଷ୍କର୍ମ ଅଭିଯୋଗ । ଶବକୁ ୨୦୦ ଫୁଟ ଖାଲକୁ ଫିଙ୍ଗିଦେଲା ହତ୍ୟାକାରୀ । ଏଭଳି ଜଘନ୍ୟ ଘଟଣା ଘଟିଛି କେନ୍ଦୁଝର ଜିଲ୍ଲା ବଲାଣି ଥାନା କିରିବୁରରେ । ହତ୍ୟା ଅଭିଯୁକ୍ତ ହେଉଛନ୍ତି ରୂପ ସିଂ ସିଦ୍ଧୁ । ମୁର୍ଗାପଡାରେ ରହୁଥିବା ଶାଶୁ ଓ ଶାଳୀ ସହିତ ହତ୍ୟାକାରୀ ରୂପ ସିଂ ଜଙ୍ଗଲକୁ ଛତୁ ଓ କୁରକୁଟି ସଂଗ୍ରହ କରିବା ପାଇଁ ଯାଇଥିଲା । ତେବେ ଏହି ସମୟରେ ଶାଳୀ ସହିତ ଝଗଡ଼ା ହୋଇଥିଲା । ଏଥିରେ ଉତକ୍ଷୀପ୍ତ ହୋଇ ରୂପ ସିଂ ଶାଳୀର ବେକକୁ କୁରାଢ଼ୀରେ ହାଣି ଦେଇଥିଲା । ଏହାପରେ ମୃତଦେହକୁ ୨୦୦ ଫୁଟ ଖାଲକୁ ଫିଙ୍ଗି ଦେଇଥିଲା । ପରେ ଶାଶୂକୁ ବାନ୍ଧି ଦୁଷ୍କର୍ମ କରିଥିବା ଅଭିଯୋଗ ହୋଇଛି । କୌଶଳ କ୍ରମେ ପୀଡ଼ିତା ଜଣକ ଖସି ଆସି କିରିବୁର ଥାନାରେ ଅଭିଯୋଗ କରିଥିଲେ । କିରିବୁର ପୋଲିସ ଘଟଣାସ୍ଥଳରେ ପହଞ୍ଚି ବଲାଣି ଥାନାକୁ ଖବର ଦେଇଥିଲେ । ୨୦୦ ଫୁଟ ତଳେ ଶବ ପଡ଼ିଥିବାରୁ ମୃତଦେହକୁ ଉଦ୍ଧାର କରାଯାଇପାରିନି । ଘଟଣା ପରେ ହତ୍ୟାକାରୀ ରୂପ ସିଂ ସିଦ୍ଧୁ ଫେରାର ହୋଇଯାଇଛି ।
ଏଥିସହିତ ପଢ଼ନ୍ତୁ: ସାମାନ୍ୟ ସେଲଫି ସାଜିଲା କାଳ, ଡ୍ୟାମକୁ ଖସିପଡିଲେ ଦୁଇ ସାଙ୍ଗ
ଗୀତ ଗାଇ ସଚେତନତା କରାଉଛନ୍ତି ବିଜେଡ଼ି ମହିଳା କର୍ମୀ
ବଲାଙ୍ଗୀର: କଣ୍ଟାବାଞ୍ଜିରେ ବିଜେଡି ମହିଳା କର୍ମକର୍ତ୍ତାଙ୍କ ନିଆର ସଚେତନତା । କରୋନା ପ୍ରତି ଗୀତ ଗାଇ ଲୋକଙ୍କୁ ସଚେତନ କରିବା ସହ ଗାଁ ଗାଁ ବୁଲି କରୁଛନ୍ତି ମାକ୍ସ ବଣ୍ଟନ । କରୋନା ଲଢେଇରେ ସଚେତନତା ହିଁ ଏକମାତ୍ର ଔଷଧ ବୋଲି ଲୋକଙ୍କୁ ବୁଝାଉଛନ୍ତି ମହିଳା କର୍ମୀ । କଣ୍ଟାବାଞ୍ଜି ନିର୍ବାଚନ ମଣ୍ଡଳିର ମୁରିବାହାଲ, ତୁରେକେଲା, ବଙ୍ଗୋମୁଣ୍ଡା ବ୍ଲକର ବିଭିନ୍ନ ଗାଁରେ ଗୀତ ଗାଇ ଲୋକଙ୍କୁ ସଚେତନ କରୁଛନ୍ତି ।
ଗ୍ରାମାଞ୍ଚଳ ଲୋକେ ଟିକା ନେବା ପାଇଁ ଭୟ ନକରିବାକୁ ବୁଝାଇଛନ୍ତି । ଏହାସହ କୌଣସି ଲକ୍ଷଣ ଦେଖାଗଲେ ତୁରନ୍ତ ଡାକ୍ତରଙ୍କୁ ଦେଖା କରିବାକୁ ମଧ୍ୟ କହୁଛନ୍ତି । ମହିଳାଙ୍କ ଏଭଳି ସଚେତନତା କାର୍ଯ୍ୟକ୍ରମ କୁ ଗାଁଲୋକେ ପ୍ରଶଂସା କରିଛନ୍ତି । ମହାମାରୀ ସମୟରେ ଏପରି ମହତ ଉଦ୍ୟେଶ ରଖି ବିଜେଡ଼ି ମହିଳା କର୍ମୀ ସାଧାରଣ ଲୋକଙ୍କୁ ସଚେତନତା କରାଇବା ପକ୍ରିୟାକୁ ସବୁଠୁ ପ୍ରଶଂସା କରାଯାଉଛି ।
କୋଭିଡ ରୋଗୀଙ୍କ ଘର ଦୁଆର ମୁହଁରେ ପହଁଚିବ ଅକ୍ସିଜେନ, ରାଜ୍ୟ ସରକାରଙ୍କ ଘୋଷଣା
ଭୁବନେଶ୍ୱର: ଏବେ ଘର ଦୁଆର ମୁହଁରେ ପହଁଚିବ ଅକ୍ସିଜେନ । କୋଭିଡ ସଂକ୍ରମିତଙ୍କ ଚିକତ୍ସା ସୁବିଧା ପାଇଁ ଅକ୍ସିଜେନ୍ କନସେନଟ୍ରେଟର ଯୋଗାଇଦିଆଯିବ । ରାଜ୍ୟ ସରକାରଙ୍କ ପକ୍ଷରୁ ଆରମ୍ଭ ହୋଇଛି ସେବା । ପ୍ରଥମ ପର୍ଯ୍ୟାୟରେ ଭୁବନେଶ୍ୱର, ବ୍ରହ୍ମପୁର, କଟକ, ରାଉରକେଲା ଏବଂ ସମ୍ବଲପୁରରେ ଆରମ୍ଭ ହୋଇଛି ସେବା । ରାଜ୍ୟ ସରକାର ଟ୍ବିଟ ଯୋଗେ ଏହି ସୂଚନା ଦେଇଛନ୍ତି ।
ଅକ୍ସିଜେନ୍ କନସେନଟ୍ରେଟର ବୁକିଂ କରିବା ପାଇଁ ରାଜ୍ୟ କୋଭିଡ ଡାସବୋର୍ଡରେ ଦୁଇଟି ଲିଙ୍କ ଦିଆଯାଇଛି । statedashboard.odisha.gov.in ଏବଂ 02boking.sachetakapp.in ଲିଙ୍କରେ ଅକ୍ସିଜେନ୍ ବୁକିଂ କରିପାରିବେ ସଂକ୍ରମିତ । ରାଜ୍ୟ ସରକାରଙ୍କ ଏହି ପଦକ୍ଷେପ ଅନେକ ଅମୂଲ୍ୟ ଜୀବନ ରକ୍ଷା କରିବାରେ ମହତ୍ବପୂର୍ଣ୍ଣ ସାବସ୍ତ ହେବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ।
ବିପର୍ଯ୍ୟସ୍ଥ କଲାଣି ତେଲଦର, ଲୋକଙ୍କ ସ୍ୱାର୍ଥ ବଦଳରେ କୁଠାର ଘାତ କରିଛି କେନ୍ଦ୍ର
ଭୁବନେଶ୍ୱର: କରୋନା ମହାମାରୀ ଲକ୍ଷ ଲକ୍ଷ ଲୋକଙ୍କ ଛଡାଇନେଇଛି ଜୀବିକା । ଆର୍ଥିକ ବ୍ୟବସ୍ଥା ବିପର୍ଯ୍ୟସ୍ଥ କରିଦେଇଛି । ଏତିକି ବେଳେ ୧୦୦ ଟପିଲାଣି ତୈଳଦର । ଲୋକଙ୍କ ସ୍ବାର୍ଥକୁ ଗୁରୁତ୍ବ ଦେବା ବଦଳରେ କୁଠାର ଘାତ କରାଯାଉଛି । ଯାହାକି ଜନତାଙ୍କ ପାଇଁ ଏହା ବୋଝ ଉପରେ ଲଳିତାବିଡା ସଦୃଶ ବୋଲି ବିଜେଡି ସାଧାରଣ ସମ୍ପାଦକ ସଞ୍ଜୟ ଦାସବର୍ମା କହିଛନ୍ତି । ମାତ୍ରାଧିକ ତୈଳଦର ବୃଦ୍ଧି ଯୋଗୁ ଅତ୍ୟାବଶ୍ୟକ ସାମଗ୍ରୀ ମୁଲ୍ୟ ଆକାଶଛୁଆଁ ହୋଇଛି । ଲୋକେ ଏବେ ଭୀଷଣ ଆର୍ଥିକ ସଂକଟର ସମ୍ମୁଖୀନ ହୋଇଛନ୍ତି ।
ଓଡ଼ିଶାର ମାଲାକାନଗିରି ଓ କୋରାପୁଟରେ ତେଲ ଦର ୧୦୦ ପାର କଲାଣି । ମାତ୍ରାଧିକ ଟିକସ ଯୋଗୁ ଦର ବୃଦ୍ଧି ହେଉଥିବା ମନେ କରାଯାଉଛି । କିନ୍ତୁ କେନ୍ଦ୍ର ସରକାର ଏ ଦିଗରେ ଦୃଷ୍ଟି ଦେଉନାହାନ୍ତି । କେବଳ ମେ ମାସରେ ତୈଳଦର ୧୬ ଥର ବଢିଛି । ଏଭଳି ଏକ ସମ୍ବେଦନଶୀଳ ବିଷୟକୁ କରୋନା ଆଢୁଆଳରେ ଚପାଇ ଦିଆଯାଉଛି । ଦେଶର ପ୍ରମୁଖ ବିରୋଧୀ ଦଳ ମାନେ ଏହି ପ୍ରସଙ୍ଗରେ ନିରବ ରହିବା ବିଡମ୍ବନାର ବିଷୟ । କିନ୍ତୁ ଏ ପ୍ରସଙ୍ଗ ଜୀବନ୍ତ । ଜନସାଧାରଣଙ୍କ ନଜରରେ ଏହା ରହିଛି । ଆଗାମି ଦିନରେ ଏଥିପାଇଁ ‘ଏନଡିଏ’ ସରକାର ଉତ୍ତରଦାୟୀ ରହିବ ବୋଲି କହିଛନ୍ତି ସଞ୍ଜୟ ଦାସବର୍ମା କହିଛନ୍ତି ।
୨୦୧୪ ପୂର୍ବରୁ ପେଟ୍ରୋଲ ଡିଜେଲ ଦର ବଢୁଥିଲା । ସେ ସମୟରେ ବିଜେପିର ନେତାମାନେ ରାଜରାସ୍ତାକୁ ଓହ୍ଲାଇ ପ୍ରତିବାଦ କରୁଥିଲେ । କ୍ଷମତାକୁ ଆସିଲେ ଦରଦାମ ନିୟନ୍ତ୍ରଣ କରିବୁ, ଆମ ସରକାର ଜନତାଙ୍କ ସରକାର ହେବ ବୋଲି କହୁଥିଲେ । କିନ୍ତୁ ସବୁ ପ୍ରତିଶ୍ରୁତି ପାଣିର ଗାର ପାଲଟିଛି । ତେବେ ତୈଳଦର ହ୍ରାସ କରିବା ପାଇଁ ତୁରନ୍ତ କେନ୍ଦ୍ର ସରକାର ପଦକ୍ଷେପ ନିଅନ୍ତୁ । ନଚେତ୍ ଜନସାଧାରଣ ଏହାର ଉଚିତ ଜବାବ ଦେବେ ବୋଲି କହିଛନ୍ତି ସଞ୍ଜୟ ଦାସବର୍ମା ।
କାନ୍ଦୁଛି ଗଙ୍ଗା ଭାସୁଛି ଶବ, ୟୁପି ନୁହେଁ ଏବେ କୋଲକାତାରେ..
କୋଲକାତା: ଗଙ୍ଗାରେ ଭାସିଲା ପୁଣି ଶବ । ବିହାର ଓ ଉତ୍ତର ପ୍ରଦେଶ ପରେ କୋଲକାତାରେ ସମାନ ସ୍ଥିତି । ପଶ୍ଚିମବଙ୍ଗରେ କରୋନା ଆକ୍ରାନ୍ତଙ୍କ ମୃତଦେହ ଗଙ୍ଗା ନଦୀରେ ଭାସୁଥିବା ଦେଖିବାକୁ ମିଳିଛି । ମାଲ୍ଦା ଜିଲ୍ଲାସ୍ଥିତ ମାଣିକ ଛକ ନିକଟରେ ଗଙ୍ଗାରେ କିଛି ମୃତଦେହ ଭାସୁଥିବା ଦେଖିବାକୁ ମିଳିଛି । ଗତ ୫ ଦିନ ହେବ ଗଙ୍ଗାରେ ଏଭଳି ମୃତଦେହ ଭାସୁଛି ବୋଲି ଡଙ୍ଗା ଚାଳକ କହିଛନ୍ତି ।
ଫଳରେ କରୋନା ସଂକ୍ରମଣ ବ୍ୟାପିବା ନେଇ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି । ସ୍ଥାନୀୟ ପ୍ରଶାସନିକ ଅଧିକାରୀଙ୍କ ସହାୟତାରେ ଶବ ସତ୍କାର ହୋଇଛି । ମାଲଦା ଏସପିଙ୍କ କହିବା କଥା ପଶ୍ଚିମବଙ୍ଗରେ ଶବ ସତ୍କାର ଠିକ୍ ଭାବେ କରାଯାଉଛି । ଏହି ଶବ ଗୁଡିକ ପଡୋଶୀ ରାଜ୍ୟରୁ ବୋହି ଆସିଛି । ଏଥିସହ ଲୋକଙ୍କୁ ଆତଙ୍କିତ ନହେବାକୁ ପରାମର୍ଶ ଦେଇଛନ୍ତି । ରାଜ୍ୟ ସରକାର ମଧ୍ୟ ମାଲଦା ଜିଲ୍ଲା ପ୍ରଶାସନକୁ ସତର୍କ ରହିବାକୁ ନିର୍ଦ୍ଦେଶ ଦେଇଛନ୍ତି । ଅନ୍ୟ ରାଜ୍ୟରୁ ବୋହି ଆସୁଥିବା ଶବକୁ ସମ୍ମାନର ସହ ସତ୍କାର କରିବାକୁ ନିର୍ଦ୍ଦେଶ ଦେଇଛନ୍ତି ।
ପହଁଚିଲା କେନ୍ଦ୍ରୀୟ ଟିମ୍, ସୋମବାରରୁ ବାତ୍ୟାଞ୍ଚଳରେ କ୍ଷତି ଆକଳନ
ଭୁବନେଶ୍ୱର: ପହଁଚିଲା କେନ୍ଦ୍ରୀୟ ଟିମ୍ । ଓଡ଼ିଶାରେ ବାତ୍ୟା ୟାସ କ୍ଷୟକ୍ଷତିର ଆକଳନ ପାଇଁ କେନ୍ଦ୍ରୀୟ ଟିମ୍ ଆସି ଓଡ଼ିଶାରେ ଆଜି ପହଞ୍ଚିଛନ୍ତି । ଏୟାର ଇଣ୍ଡିଆର ସ୍ୱତନ୍ତ୍ର ବିମାନ ଯୋଗେ ଆସି ଭୁବନେଶ୍ୱର ବିମାନ ବନ୍ଦରରେ ପହଁଚିଛି ଦଳ । ସୋମବାର ବାତ୍ୟା ପ୍ରଭାବିତ ଅଞ୍ଚଳ ଗସ୍ତ କରିବ ଟିମ୍ । ଗୃହ ମନ୍ତ୍ରାଳୟର ଯୁଗ୍ମ ସଚିବ ସୁନୀଲ କୁମାର ବର୍ଣ୍ଣଓ୍ୱାଲଙ୍କ ନେତୃତ୍ୱରେ ଏହି ଟିମ ଓଡ଼ିଶା ଆସିଛି । ଏହି କେନ୍ଦ୍ରୀୟ ଦଳରେ 7 ଜଣ ସଦସ୍ୟ ରହିଛନ୍ତି । ଦୁଇଦିନ ଧରି ବାତ୍ୟା ପ୍ରଭାବିତ ଅଞ୍ଚଳ ବୁଲି ଦେଖିବାର କାର୍ଯ୍ୟକ୍ରମ ରହିଛି ।
ବାତ୍ୟା ୟସ ଦ୍ବାରା ବିଶେଷ ଭାବେ ପ୍ରଭାବିତ ହୋଇଥିବା 4 ଜିଲ୍ଲା ବାଲେଶ୍ବର, ଭଦ୍ରକ, କେନ୍ଦ୍ରାପଡା ଓ ମୟୂରଭଞ୍ଜ ଗସ୍ତ କରିବ ଏହି ଟିମ । ଦୁଇ ଟିମରେ ବିଭକ୍ତ ହୋଇ 4 ଜିଲ୍ଲା ଗସ୍ତ କରିବ ଏହି କେନ୍ଦ୍ରୀୟ ପ୍ରତିନିଧି ଦଳ । 2 ଦିନର ଅନୁଧ୍ୟାନ ପରେ ଲୋକସେବା ଭବନରେ ମୁଖ୍ୟ ଶାସନ ସଚିବ ଓ ସ୍ବତନ୍ତ୍ର ରିଲିଫ କମିଶନରଙ୍କ ସହ ଟିମ ଆଲୋଚନା ମଧ୍ୟ କରିବାର କାର୍ଯ୍ୟକ୍ରମ ରହିଛି । ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶା ଗସ୍ତରେ ଆସି ବାତ୍ୟାଞ୍ଚଳ ବୁଲି ଦେଖିବା ସହ ମୁଖ୍ୟମନ୍ତ୍ରୀ ଏବଂ ରାଜ୍ୟ ସରକାରଙ୍କ ପ୍ରତିନିଧି ମଣ୍ଡଳୀ ସହ ସମୀକ୍ଷା ବୈଠକ କରିଥିଲେ ।
ଦିଲ୍ଲୀ ଫେରି ଓଡ଼ିଶାକୁ 5 ଶହ କୋଟିର ସହାୟତା ରାଶି ପ୍ରଦାନ କରିଥିଲେ ପ୍ରଧାନମନ୍ତ୍ରୀ । କେନ୍ଦ୍ରୀୟ ଟିମ ସମୀକ୍ଷା କରିବା ପରେ ବାକି ସହାୟତା ଅର୍ଥ ପ୍ରଦାନ କରାଯିବ ବୋଲି ଘୋଷଣା କରିଥିଲେ ପ୍ରଧାନମନ୍ତ୍ରୀ । ପ୍ରାକୃତିକ ବିପର୍ଯ୍ୟୟ ମୁକାବିଲା ଲାଗି ଦୀର୍ଘ ସ୍ଥାୟୀ ଯୋଜନା କରିବା ଲାଗି କେନ୍ଦ୍ର ନିକଟରେ ଦାବି ରଖିଛି ରାଜ୍ୟ । ଅନ୍ୟପଟେ ୟାସ ବାତ୍ୟା ଓ ପରବର୍ତ୍ତୀ ବନ୍ୟାରେ ପ୍ରାୟ 620 କୋଟି କ୍ଷୟକ୍ଷତି ହୋଇଥିବା ରାଜ୍ୟ ସରକାରଙ୍କ ପକ୍ଷରୁ ସୂଚନା ଦିଆଯାଇଛି ।
ମହାମାରୀରେ ଜୀବନ ଦେଉଛି ଓଡିଶା ମୋ ପରିବାର, ସଂଗ୍ରହ ହେଲାଣି ୧ଲକ୍ଷ ୟୁନିଟ ରକ୍ତ
ଭୁବନେଶ୍ୱର: ମହାମାରୀ ସମୟରେ ଓଡିଶା ମୋ ପରିବାରର କୃତିତ୍ୱ । ମୁଖ୍ୟମନ୍ତ୍ରୀଙ୍କ ଆହ୍ୱାନ କ୍ରମେ ସାରା ଓଡ଼ିଶାରେ ଓଡିଶା ମୋ ପରିବାର ଆନୁକୂଲ୍ୟରେ ଆୟୋଜିତ ରକ୍ତଦାନ ଶିବିର ଦ୍ୱାରା ସଂଗୃହିତ ହେଲାଣି ୧ ଲକ୍ଷ ୟୁନିଟ ରକ୍ତ । ୧ ଲକ୍ଷ ୟୁନିଟ ରକ୍ତ ସଂଗ୍ରହ ଲକ୍ଷ୍ୟ ହାସଲ ଅବସରରେ କୃତଜ୍ଞତା ଜଣାଇଛି ଓଡିଶା ମୋ ପରିବାର କର୍ମକର୍ତ୍ତା ବୃନ୍ଦ ।

ମହାମାରୀ କୋଭିଡ ସଙ୍କଟ ସମୟରେ ରାଜ୍ୟର ଅନେକ ମେଡିକାଲରେ ରକ୍ତ ଅଭାବ ପରିଲିଖିତ ହେଉଛି । ଓଡ଼ିଶା ମୋ ପରିବାରର ଏଭଳି କାର୍ଯ୍ୟ ଅନେକ ରୋଗୀଙ୍କ ଜୀବନ ବଞ୍ଚାଇବାରେ ସହାୟକ ସାଜିଛି । ମୁଖ୍ୟମନ୍ତ୍ରୀଙ୍କ ଆହ୍ୱାନକ୍ରମେ ସମଗ୍ର ରାଜ୍ୟରେ ରକ୍ତ ସଂଗ୍ରହ ଜାରି ରହିଛି ।

ଏପରି ସ୍ଥିତିରେ ରକ୍ତଦାନ ଭଳି ମହାନ କାର୍ଯ୍ୟ ଜାରି ରଖିଛି ଓଡ଼ିଶା ମୋ ପରିବାର । ବର୍ତ୍ତମାନ ସୁଦ୍ଧା ୧ଲକ୍ଷ ୟୁନିଟ ରକ୍ତ ସଂଗ୍ରହ କରାଯାଇଥିବାବେଳେ ଆଗାମୀ ଦିନରେ ଏହି କାର୍ଯ୍ୟ ଜାରି ରହିବ ବୋଲି ସଂକ୍ଳପ ନେଇଛନ୍ତି ସଦସ୍ୟ ।

