spot_img
Home Blog Page 5754

ଦେଶରେ ୩୫ ପ୍ରତିଶତ କମିଛି ସଂକ୍ରମଣ ମାମଲା

ନୂଆଦିଲ୍ଲୀ: ଦେଶରେ ତଳମୁହାଁ କରୋନା ଗ୍ରାଫ୍  । ଗୋଟିଏ ପଟେ ଦେଶରେ କରୋନାକୁ ନେଇ କରୁଣ ଚିତ୍ର ସାମ୍ନାକୁ ଆସୁଥିବା ବେଳେ ଅନ୍ୟପଟେ ଗତ କିଛି ଦିନ ମଧ୍ୟରେ କରୋନାକୁ ନେଇ ଭଲ ଖବର ଆସିବା ଆରମ୍ଭ ହୋଇଛି । ସ୍ୱାସ୍ଥ୍ୟ ମନ୍ତ୍ରଣାଳୟର ରିପୋର୍ଟ ଅନୁଯାୟୀ, ଗତ ୨୨ ଦିନ ଧରି ଲଗାତାର ଅତ୍ୟଧିକ ମାତ୍ରାରେ ନୂଆ ମାମଲା ଆସୁଛି ଏବଂ ବହୁ ସଂଖ୍ୟାରେ  କରୋନା ପରୀକ୍ଷା କରାଯାଉଛି, ପଜିଟିଭ ହାର ହ୍ରାସ ଏବଂ ପୁନରୁଦ୍ଧାର ହାରରେ ବୃଦ୍ଧି ହେତୁ କରୋନାର ଦ୍ୱିତୀୟ ଲହର ଥମିବାର ନଜର ଆସୁଛି ।

ସ୍ୱାସ୍ଥ୍ୟ ମନ୍ତ୍ରଣାଳୟର ସଚିବ ଲଭ ଅଗ୍ରୱାଲ କହିଛନ୍ତି ଯେ, ସକ୍ରିୟ ମାମଲାରେ କ୍ରମାଗତ ହ୍ରାସ ହେଉଛି । ଦେଶର ୨୪ଟି ରାଜ୍ୟରେ କରୋନା ପଜିଟିଭ୍ ମାମଲାର କମୁଥିବାର ଦେଖିବାକୁ ମିଳିଛି । ସେ ଏହାମଧ୍ୟ କହିଛନ୍ତି ଯେ, କରୋନାର ଲହରରେ ବ୍ରେକ ଲାଗିଲା ଭଳି ନଜର ଆସୁଛି । କିନ୍ତୁ ବର୍ତ୍ତମାନ ସମୟରେ କୋଭିଡ ମାମଲାରେ କଠୋରତା ଏବଂ ସତର୍କତା ନିହାତି ଆବଶ୍ୟକ ।

୩୫ପ୍ରତିଶତ କମିଛି ସଂକ୍ରମଣ ମାମଲା

ବର୍ତ୍ତମାନ ଦେଶରେ ୨୪.୨ ଲକ୍ଷ କରୋନା ପଜିଟିଭ୍ ମାମଲା ରହିଛି। ଏହି ସଂଖ୍ୟା ପୂର୍ବ ସପ୍ତାହର ରିପୋର୍ଟ ତଥା ୯ ମେ’ରେ ଆସିଥିବା ରିପୋର୍ଟ ଠାରୁ ୩୫ ପ୍ରତିଶତ କମ୍ ରହିଛି । ଗତ ସପ୍ତାହରେ ୩୭.୪ ଲକ୍ଷ ସକ୍ରିୟ ମାମଲା ରହିଥିଲା। ଗତ ନଅ ଦିନ ଧରି ଦୈନିକ ୨୦ ଲକ୍ଷ କୋଭିଡ -19 ପରୀକ୍ଷା କରାଯାଉଛି  । ଯଦିଓ ମେ ୨୦ ରୁ ମେ ୨୬ ମଧ୍ୟରେ ପଜିଟିଭ୍ ହାର ୧୦.୪ ପ୍ରତିଶତ ଥିବାବେଳେ ଏପ୍ରିଲ୍ ୨୯ ରୁ ମେ ୫ ମଧ୍ୟରେ ପଜିଟିଭ୍ ହାର ୨୧.୫ ପ୍ରତିଶତ ଥିଲା । ଗୋଟିଏ ପଟେ ଅଧିକ ସଂକ୍ରମିତ ରାଜ୍ୟଗୁଡ଼ିକ ମହାରାଷ୍ଟ୍ର, କେରଳ, କର୍ଣ୍ଣାଟକ, ତାମିଲନାଡୁରେ ସଂକ୍ରମିତ ମାମଲା ହ୍ରାସ ପାଉଛି । ଏହା ସତ୍ତ୍ୱେ ଏହି ୧୦ ପ୍ରତିଶତ ସକାରାତ୍ମକ ହାର ଚିନ୍ତାର ବିଷୟ ପାଲଟିଛି । ପଜିଟିଭିଟି ହାରକୁ ୫ ପ୍ରତିଶତରୁ କମ୍ କରିବାକୁ ରାଜ୍ୟମାନଙ୍କୁ ଅତିରିକ୍ତ ପଦକ୍ଷେପ ନେବାକୁ ପଡ଼ିବ ବୋଲି ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି।

ସେହିପରି ଦେଶରେ  ୨୪ ଘଣ୍ଟାରେ ଚିହ୍ନଟ ହୋଇଛନ୍ତି ୧ ଲକ୍ଷ ୮୬ ହଜାର ୩୬୪ ନୂଆ ପଜିଟିଭ୍ । ଦିନକରେ ୩ ହଜାର ୬୬୦ ଜଣଙ୍କ ଜୀବନ ନେଇଛି କରୋନା । ଏବଂ ଦେଶରେ କରୋନରୁ ସୁସ୍ଥ ହୋଇଛନ୍ତି ଆଉ ୨ ଲକ୍ଷ ୫୯ ହଜାର ୪୫୯ ଆକ୍ରାନ୍ତ । ଏଥିସହ ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୨ କୋଟି ୭୫ ଲକ୍ଷ ୫୫ ହଜାର ୪୫୭ ଛୁଇଁଥିବା ବେଳେ, ସେମଧ୍ୟରୁ ସୁସ୍ଥ ହୋଇଛନ୍ତି ୨ କୋଟି ୪୮ ଲକ୍ଷ ୯୩ ହଜାର ୪୧୦ ଆକ୍ରାନ୍ତ  । ଏବେ ସାରା ଦେଶରେ ମୋଟ ୨୩ ଲକ୍ଷ ୪୩ ହଜାର ୧୫୨ ଆକ୍ଟିଭ କେସ୍ ରହିଛି  । ଅନ୍ୟପଟେ କରୋନା ଟିକାକରଣ ଜାରିଥିବା ବେଳେ, ୨୦ କୋଟି ୫୭ ଲକ୍ଷ ୨୦ ହଜାର ୬୬୦ ଲୋକଙ୍କୁ ଦିଆଯାଇଛି ଟିକା  ।

ନିଜ ସମ୍ବଳରେ ବାତ୍ୟା ‘ୟାସ୍’ ପରବର୍ତ୍ତୀ ସ୍ଥିତିର ମୁକାବିଲା କରିବୁ କହି ଟ୍ୱିଟରରେ ଟ୍ରେଣ୍ଡ୍ ହେଲେ ନବୀନ

ଭୁବନେଶ୍ୱର: ଦେଶ ବର୍ତ୍ତମାନ କୋଭିଡ୍ ମହାମାରୀର ମୁକାବିଲା କରୁଛି,ଏଭଳି ପରିସ୍ଥିତିରେ ଆମେ କେନ୍ଦ୍ର ନିକଟରେ କୌଣସି ତତ୍କାଳିକ ଆର୍ଥିକ ସାହାଯ୍ୟ ଦାବି କରିନାହୁଁ । ଆମେ ଏହି ପରିସ୍ଥିତିର ମୁକାବିଲା ପାଇଁ ନିଜ ପାଣ୍ଠି ବ୍ୟବହାର କରିବୁ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏହି ଟ୍ୱିଟ୍ ତାଙ୍କର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହିତ ବାତ୍ୟା ୟାସ୍ ସମୀକ୍ଷା ବୈଠକ ପରେ ଆସିଥିଲା । ଯାହା ଖୁବ କମ ସମୟରେ ଭାଇରାଲ ହେବାରେ ଲାଗିଥିଲା । ନବୀନଙ୍କ ଏହି ଟ୍ୱିଟକୁ ଅନେକ ରିଟ୍ୱିଟ୍ କରିଥିଲେ । କେହି କେହି ମୁଖ୍ୟମନ୍ତ୍ରୀଙ୍କ ଟ୍ୱିଟ୍ ଉପରେ କମେଣ୍ଟ୍ କରି ତାଙ୍କୁ ମହାନ ଓ ନାୟକ ବୋଲି ବର୍ଣ୍ଣନା କରିଥିଲେ ।

ତେବେ ମୁଖ୍ୟମନ୍ତ୍ରୀଙ୍କ ଏହି ଟ୍ୱିଟ୍ ଉପରେ ଯେଉଁ ସବୁ କମେଣ୍ଟ୍ ଆସୁଥିଲା ସେଥି ମଧ୍ୟରୁ ଅଧିକାଂଶରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ନବୀନଙ୍କ ଠାରୁ କିଛି ଶିଖିବାକୁ ପରାମର୍ଶ ଦିଆଯାଇଥିଲା । ଉଞ୍ଚୁ ନାମକ ଟ୍ୱିଟ୍ ହ୍ୟାଣ୍ଡେଲରୁ କରାଯାଇଥିବା ଟ୍ୱିଟରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ପରାମର୍ଶ ଦିଆଯାଇଛି ଯେ, ଅନ୍ୟମାନଙ୍କୁ ଦୋଷ ନଦେଇ କେମିତି କାମ କରାଯିବା କଥା ତାହା କେଜ୍ରିୱାଲ ନବୀନ ପଟ୍ଟନାୟକଙ୍କଠରୁ ଶିଖନ୍ତୁ । ସେହିଭଳି ପ୍ରିତି ନାମକ ଟ୍ୱିଟର ହ୍ୟାଣ୍ଡେଲରୁ ଅରବିନ୍ଦ କେଜ୍ରିୱାଲ ଓ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ କଟାକ୍ଷା କରି ଲେଖାଯାଇଛି ଯେ, ମୁଁ ଏହି ତଥାକଥିତ ମୁଖ୍ୟମନ୍ତ୍ରୀ ମାନେ ଏଥିରୁ କିଛି ଶିକ୍ଷା ଲାଭ କରନ୍ତୁ ବୋଲି ଆଶା କରୁଛି । ଜଣେ ହେଉଛି ‘ଆଡ୍’ ମ୍ୟାନ୍ ଓ ଆଉ ଜଣେ ହେଉଛନ୍ତି ‘ବ୍ୟାଡ୍ ମ୍ୟାନ୍’

 

ସେହିଭଳି ଅତୁଲ ଶର୍ମା ଟ୍ୱିଟ୍ କରିଛନ୍ତି ଯେ, ଏହା ହେଉଛି ପ୍ରକୃତ ରାଷ୍ଟ୍ରନୀତି । ନବୀନ ବାବୁ ଓଡ଼ିଶାର ଦାବିକୁ ନେଇ ସବୁବେଳେ ମୁଖର କିନ୍ତୁ ସେ କେବେ ମଧ୍ୟ ନିଜ ଉପରୁ ନିୟନ୍ତ୍ରଣ ହରାନ୍ତି ନାହିଁ । ଏନଡିଆରଏଫ୍ ଗଠିତ ହେବାର ଢେର ଆଗରୁ ଓଡ଼ିଶା ଓଡ୍ରାଫ୍ ଗଠନ କରିସାରିଥିଲା । ବେଲା ନାମକ ୟୁଜର ଟ୍ୱିଟ୍ କରିଛନ୍ତି ଯେ, ନବୀନ ହେଉଛନ୍ତି ସେହିଭଳି ଜଣେ ନାୟକ ଯାହାଙ୍କଠାରୁ ପ୍ରେରଣା ନିଆଯାଇପାରେ । ସୂଚନାଯୋଗ୍ୟ ଯେ, ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭୁବନେଶ୍ୱରରେ ପହଞ୍ଚି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହିତ ବାତ୍ୟା ୟାସକୁ ନେଇ ସମୀକ୍ଷା ବୈଠକ କରିଥିଲେ

ବାତ୍ୟା ମୁକାବିଲା ନେଇ ଓଡ଼ିଶାର ପ୍ରଭାବଶାଳୀ ପ୍ରସ୍ତୁତି

୧୯୯୯ ମହାବାତ୍ୟାକୁ କିଏ ବା ଭୁଲି ପାରିବ । ସେହି ସମୟର ସେହିପ୍ରଳୟଙ୍କାରୀ ମହାବାତ୍ୟାରେ ଓଡ଼ିଶାର କେତେ ପ୍ରାଣ ହାନି ହୋଇଥିଲା ତାହାକୁ ଭୁଲିବା ଅସମ୍ଭବ । ସେହି ମହାବାତ୍ୟା ଭାରତର ଇତିହାସର ଏକ ଅଭୁଲା ଅତୀତ । ଯହାକୁ ସାମ୍ନା କରିଥିଲା ଓଡ଼ିଶା । ୨୦୨୧ରେ ଆଉ ଏକ ବାତ୍ୟା ୟାସ ଓଡ଼ିଶା ଉପରେ ଆକ୍ରମଣ କରିଥିଲା କିନ୍ତୁ ଓଡ଼ିଶା ସରକାରଙ୍କ ବ୍ୟାପକ ପୂର୍ବ ପ୍ରସ୍ତୁତି ପାଇଁ ଏହି ବାତ୍ୟାରେ ବିଶେଷ କ୍ଷୟକ୍ଷତି ହୋଇ ନାହିଁ ।
ବାତ୍ୟା ୟାସ ମେ ୨୬ରେ ଭଦ୍ରକ ଜିଲ୍ଲାର ଧାମରା ଉପକୂଳ ଓ ବାଲେଶ୍ୱରର ବାହନଗାଠାରେ ସ୍ଥଳଭାଗ ଛୁଇଁ ଥିଲା ଏବଂ ଦୀର୍ଘ ସମୟର ଧ୍ୱଂସ ଲୀଳାପରେ ବାତ୍ୟା ଝାଡଖଣ୍ଡ ମୁହାଁ ହୋଇଥିଲା । ତେବେ ସରକାରଙ୍କ ବ୍ୟାପକ ପ୍ରସ୍ତୁତି ପାଇଁ ଓଡ଼ିଶାରେ ମାତ୍ର ୨ ଜଣଙ୍କ ଜୀବନହାନୀ ହୋଇଛି । ଗତ ୩୦ମାସ ମଧ୍ୟରେ ଓଡ଼ିଶା ପାଖାପାଖି ୬ଟି ବାତ୍ୟାକୁ ସାମ୍ନା କରିଥିବା ବେଳେ ଜିରୋ କାଜୁଆଲିଟି ରେକର୍ଡ କରିଛି । ବାତ୍ୟା ମୁକାବିଲାରେ ଓଡ଼ିଶାର ଏହି ଦକ୍ଷତା ବାବଦରେ କହିବାକୁ ଯାଇ ଓଡ଼ିଶାର ରିଲିଫ କମିଶନର ପି କେ ଜେନା ଗଣମାଧ୍ୟମକୁ କହିଛନ୍ତି ଯେ ୧୯୯୯ ଏବଂ ୨୦୨୧ ମଧ୍ୟରେ ପାର୍ଥକ୍ୟ ହେଉଛି କେବଳ ‘ପୂର୍ବ ପ୍ରସ୍ତୁତି’ର । ସେ ସମୟରେ ଯେଉଁ ବାତ୍ୟା ଆସୁଥିଲା ସେନେଇ ପୂର୍ବ ପ୍ରସ୍ତୁତି କରାଯାଇ ପାରୁ ନଥିଲା କିନ୍ତୁ ଏବେ ପୂର୍ବ ପ୍ରସ୍ତୁତି ପାଇଁ ବିଶେଷ କ୍ଷୟକ୍ଷତି ହେଉ ନାହିଁ ।

ପ୍ରସ୍ତୁତି
ପାଣିପାଗ ବିଶେଷଜ୍ଞମାନେ ବାତ୍ୟା ୟାସ୍ ନିକଟତର ହେବାର ପୂର୍ବାନୁମାନ କରିବା ମାତ୍ରେ ରାଜ୍ୟ ବିପର୍ଯ୍ୟୟ ପରିଚାଳନା ବିଭାଗ ଆକ୍ସନ ମୋଡ ଆସିଥିଲା । ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜିରୋ କାଜୁଆଲଟି ଲକ୍ଷ୍ୟରେ ସବୁ ପ୍ରକାର ପ୍ରସ୍ତୁତି ଆରମ୍ଭ ହୋଇଯାଇଥିଲା । ଜିରୋ କାଜୁଆଲଟି ଲକ୍ଷ୍ୟରେ ସମସ୍ତ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଥିଲା।

ବାତ୍ୟା ୟାସ ଲ୍ୟାଣ୍ଡଫଲ କରିବା ପରେ ODRAF, NDRF, ଓଡିଶା ପୋଲିସ, ଅଗ୍ନିଶମ ବାହିନୀ, ଶକ୍ତି ବିଭାଗ ଏବଂ PWDର ଏକାଧିକ ଟିମ୍ ଯୁଦ୍ଧଭୂମିକୁ ଓହ୍ଲାଇଥିଲେ ଏବଂ ଉଦ୍ଧାର କାର୍ଯ୍ୟ ଓ ପୁନରୁଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଥିଲା । ଫଳସ୍ୱରୂପ, ଘଣ୍ଟାଏ ମଧ୍ୟରେ ରାସ୍ତା ସଫା କରାଯାଇଥିଲା ଏବଂ ୭ରୁ୮ ଘଣ୍ଟା ମଧ୍ୟରେ ବାଲେଶ୍ୱର ଜିଲ୍ଲାରେ ବିଦ୍ୟୁତ୍ ଯୋଗାଣ ସ୍ୱଭାବିକ କରାଯାଇଥିଲା ।

ଓଡ଼ିଶା ସରକାର ପାଖାପାଖି ୭ଲକ୍ଷ ୧୦ହଜାର ଲୋକଙ୍କୁ ସ୍ଥାନାନ୍ତର କରିବାରେ ସଫଳ ହୋଇଥିଲା। NDRF ର ୫୨ ଟି ଟିମ୍ , ODRAF ର ୬୦ଟି ଦଳ, ଅଗ୍ନିଶମ ବାହିନୀର ୨୦୬ ଟି ଦଳ, ୫୦ ପ୍ଲାଟୁନ୍ ଓଡିଶା ସ୍ୱତନ୍ତ୍ର ସଶସ୍ତ୍ର ପୋଲିସ, ରାଜ୍ୟ ଜଙ୍ଗଲ ବିଭାଗର ୮୬ ବୃକ୍ଷ କଟର ଦଳ ଏହି ବାତ୍ୟାମୁକାବିଲାରେ ସାମିଲ ହୋଇଥିଲେ ।

ବିପର୍ଯ୍ୟୟ ମୁକାବିଲା ଦଳ ବ୍ୟତୀତ ରାଜ୍ୟ ଘୂର୍ଣ୍ଣିବଳୟ ପ୍ରଭାବିତ ଅଞ୍ଚଳର ପୁନନିର୍ମାଣ ପାଇଁ ଅନେକ ଦଳ ନିୟୋଜିତ କରିଛି । ଏଥିରେ ଜନ କଲ୍ୟାଣ ବିଭାଗର ୧୫୪ ଜଣ କର୍ମଚାରୀ, ଗ୍ରାମୀଣ ବିକାଶ ବିଭାଗର ୩୧୩ଟି ଟିମ୍, ସଡକ ସଫା କରିବା ପାଇଁ ୧୦୪ ଟି ଟିମ୍, ୬୦୬ଟି ଇଞ୍ଜିନିୟରିଂ ବିଭାଗ ଦଳ ସାମିଲ ଅଛନ୍ତି । ଶକ୍ତି ବିଭାଗର ପାଖାପାଖି ୧୦ହଜାର ସଦସ୍ୟଙ୍କୁ ଶୀଘ୍ର ପୁନରୁଦ୍ଧାରରେ ପ୍ରଶାସନକୁ ସାହାଯ୍ୟ କରିବା ପାଇଁ ଏବଂ ଡାକ୍ତରଖାନା ଓ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସ୍ଥାନରେ ପୂର୍ବରୁ ନିୟୋଜିତ କରାଯାଇଥିଲା ।
ରାଜ୍ୟ ସରକାର କ୍ଷତିଗ୍ରସ୍ତ ଗାଁରେ ଜଳ ଯୋଗାଣ ପାଇଁ ଏକ ହଜାର ଡିଜେଲ ଜେନେରେଟର ବ୍ୟବସ୍ଥା, ଏକ ହଜାର ମୋବାଇଲ୍ ଟ୍ୟାଙ୍କର୍, ୨ହଜାରରୁ ଅଧିକ ପିଭିସି ଟ୍ୟାଙ୍କ ନିୟୋଜିତ କରିଥିଲେ।


ସ୍ଥାନାନ୍ତର
ସମ୍ଭାବ୍ୟ ବାତ୍ୟା ପ୍ରଭାବିତ ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରିବା ପୁଣି କୋଭିଡ୍ -19 ମହାମାରୀ ସମୟରେ ଏହା ଏକ ସରାକାକଙ୍କ ପାଇଁ ଏକ ଚ୍ୟାଲେଞ୍ଜ ଥିଲା । ପ୍ରଥମ ପର୍ଯ୍ୟାୟରେ ପ୍ରଶାସନ ଲୋକଙ୍କୁ କଚ୍ଚା ଘର ଏବଂ ନିମ୍ନମାନର ସ୍ଥାନରୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଥିଲା । ଫଳସ୍ୱରୂପ ୧୫୦ ରୁ ଅଧିକ ଗାଁରେ କୌଣସି ମୃତ୍ୟୁ ହୋଇନଥିଲା ଯଦିଓ ସେଠାରେ ସମୁଦ୍ର ଜୁଆର ମାଡ଼ିଆସିବାରୁ ବନ୍ୟା ଭ୍ରମ ସୃଷ୍ଟି ହୋଇଥିଲା ।

ବାତ୍ୟା ସମୟରେ କୋଭିଡ୍ ପରିଚାଳନା
ବାତ୍ୟା ଏବଂ କୋଭିଡ -19 ମହାମାରୀ ପରିସ୍ଥିରେ ଦୁଇ ଦୁଇଟି ଚ୍ୟାଲେଞ୍ଜର ସମ୍ମୁଖୀନ ହୋଇ ପୁନରୁଦ୍ଧାର ଦଳ ସେମାନଙ୍କ କାର୍ଯ୍ୟ ଜାରି ରଖିଥିଲେ ଏବଂ କୋଭିଡର ନିର୍ଦ୍ଦିଷ୍ଟ ଡାକ୍ତରଖାନାର ପର୍ଯ୍ୟାପ୍ତ ପରିମାଣରେ ଔଷଧ, ଇଞ୍ଜେକ୍ସନ, ଆବଶ୍ୟକୀୟ ସାମଗ୍ରୀକୁ ଡାକ୍ତରଖାନାରେ ମହଜୁଦ ରଖିଥିଲେ । ଏହାସହ ଡାକ୍ତରଖାନାରେ ପର୍ଯ୍ୟାପ୍ତ ଅମ୍ଳଜାନ ସିଲିଣ୍ଡର ମଧ୍ୟ ରଖାଯାଇଥିଲା । ଏହାସହ ଡାକ୍ତରଖାନା ଭିତରେ ରୋଗୀ, ଡାକ୍ତର ଏବଂ ପାରାମେଡିକ୍ସଙ୍କ ପାଇଁ ଖାଦ୍ୟ ବ୍ୟବସ୍ଥା କରାଯାଇଥିଲା । ଫଳସ୍ୱରୂପ, ବାତ୍ୟା ପ୍ରଭାବିତ ଜିଲ୍ଲାମାନଙ୍କରେ ଥିବା କୋଭିଡ ଡାକ୍ତରଖାନାଗୁଡ଼ିକ ମଧ୍ୟରୁ କୌଣସି ଅଘଟଣ ଘଟି ନ ଥିବା ଜଣାଯାଇଛି।

ବୁଧବାର ଦିନ ବାତ୍ୟା ୟାସ୍ ପାଇଁ ଓଡ଼ିଶା କୋଭିଡ୍ ପ୍ରଭାବିତ ରାଜ୍ୟକୁ ଅମ୍ଳଜାନ ପରିବହନରେ ବାଧା ସୃଷ୍ଟି ହୋଇଥିଲା । ସମ୍ଭାବ୍ୟ ବାତ୍ୟା ପ୍ରଭାବିତ ଜିଲ୍ଲାଗୁଡିକର ପ୍ରତ୍ୟେକ ଗର୍ଭବତୀ ମହିଳାଙ୍କୁ ଯେଉଁମାନଙ୍କର ଜୁନ୍ ପ୍ରଥମ ସପ୍ତାହ ପର୍ଯ୍ୟନ୍ତ ଆନୁମାନିକ ପ୍ରସବ ତାରିଖ ଥିଲା ସେମାନଙ୍କୁ ଚିହ୍ନଟ କରିବାକୁ ଏବଂ ସେମାନଙ୍କୁ ବାତ୍ୟା ଆଶ୍ରୟସ୍ଥଳକୁ ନେବା ପରିବର୍ତ୍ତେ ଡାକ୍ତରଖାନାକୁ ସ୍ଥାନାନ୍ତର କରିବାକୁ କୁହାଯାଇଥିଲା।
ଏପରି ପ୍ରାୟ ୪ହଜାର ୫ଶହ ମହିଳାଙ୍କୁ ଚିହ୍ନଟ କରାଯାଇଥିଲା ଯେଉଁଥିରୁ ୨୫ଶହ ଜଣଙ୍କୁ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ସୂଚନା ମିଳିଥିଲା । ଯେଉଁ ଦିନ ବାତ୍ୟା ୟାସ୍ ଅବତରଣ କରିଥିଲା, ସେହି ଦିନ ଓଡିଶାରେ ୧୯୦ଟି ପ୍ରସବ ହୋଇଥିବା ସୂଚନା ମିଳିଛି ।
ସେହିପରି ପ୍ରଶାସନ ମାନସିକ ବିକାରଗ୍ରସ୍ତ ଲୋକଙ୍କୁ ଏବଂ ଭିନ୍ନକ୍ଷମଙ୍କୁ ଚିହ୍ନଟ କରି ସେମାନଙ୍କୁ ସ୍ୱତନ୍ତ୍ର ସୁବିଧା ସହିତ ବିଭିନ୍ନ ଆଶ୍ରୟ ଗୃହକୁ ସ୍ଥାନାନ୍ତର କରାଯାଇଥିଲା ।

ବିପର୍ଯ୍ୟୟକୁ ମାତ ଦେବାରେ ଓଡ଼ିଶା ସରକାର ସକ୍ଷମ
୧୯୯୯ରୁ ୨୦୨୧ ପର୍ଯ୍ୟନ୍ତ ବାତ୍ୟା ବିରୋଧରେ ଯେଉଁ ଲଢେଇ ଚାଲିଛି ତାହା ମଧ୍ୟରେ ଆକଶ ପାତାଳର ପାର୍ଥକ୍ୟ । ଦକ୍ଷ ନେତୃତ୍ୱ ପାଇଁ ଆଜି ବଦଳିଛି ଓଡ଼ିଶା ଆଉ ବଦଳିଛି ଓଡ଼ିଶାର ବିପର୍ଯ୍ୟୟ ମୁକାବିଲାର କୌଶଳ ।
୨୦୦୦ ପରେ ପ୍ରଥମ ଥର ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏମିତି ଏକ ପଦକ୍ଷେପ ନେଇଛନ୍ତି ଯାହା ପାଇଁ ରାଜ୍ୟର ବିଶେଷ କ୍ଷୟକ୍ଷତି ହେଉନାହିଁ । ରାଜ୍ୟ ରିଲିଫ କମିଶନର ଜେନା ମୁଖ୍ୟମନ୍ତ୍ରୀ ନବୀନ ପଟ୍ଟନାୟଙ୍କ ସହ ହୋଇଥିବା ଏକ ବୈଠକକୁ ମନେପକାଇ କହିଛନ୍ତି ଯେ ‘ଆମ ରାଜ୍ୟ ଉପକୂଳବର୍ତ୍ତୀ ରାଜ୍ୟ ହୋଇଥିବାରୁ ବାତ୍ୟାକୁ ସମ୍ପୂର୍ଣ୍ଣ ରୂପେ ଏଡାଇ ପାରିବା ନାହିଁ । କିନ୍ତୁ ଆମେ କେବଳ ଜୀବନ ବଞ୍ଚାଇ ପାରିବାରେ ସକ୍ଷମ ହୋଇପାରିବା ଏବଂ ପ୍ରତ୍ୟେକ ଜୀବନ ମୋ ପାଇଁ ମୂଲ୍ୟବାନ ଅଟେ।‘ ବୋଲି ମୁଖ୍ୟମନ୍ତ୍ରୀ କହିଥିଲେ ।

ଗତ ବର୍ଷ ବାତ୍ୟା ଆମ୍ଫାନ୍ ପାଇଁ ପ୍ରସ୍ତୁତି ବେଳେ ସିଏମ୍ ନବୀନ ପଟ୍ଟନାୟକ ପ୍ରଶାସନ ଆଗରେ ‘ଶୂନ୍ୟ କାଜୁଆଲିଟି’ ଟାର୍ଗେଟ ରଖିଥିଲେ। ଯଦିଓ ବାତ୍ୟା ୟାଶ ଯୋଗୁଁ ରାଜ୍ୟରେ ଏକ ଅଙ୍କ ବିଶିଷ୍ଟ ମୃତ୍ୟୁ ସଂଖ୍ୟା ପଞ୍ଜିକୃତ ହୋଇଛି।
ଜେନା କହିଛନ୍ତି ଯେ, ଆମେ ବର୍ତ୍ତମାନ ୨୪ ଘଣ୍ଟାରୁ କମ୍ ସମୟ ମଧ୍ୟରେ ଅତି କମରେ ୧୦ ରୁ ୫୦ଲକ୍ଷ ଲୋକଙ୍କୁ ସ୍ଥାନାନ୍ତର କରିବାର କ୍ଷମତା ହୋଇପାରିଛୁ । ଜେନା କହିଛନ୍ତି ଯେ ପ୍ରତିବର୍ଷ ଜୁନ୍ ୧୯ରେ ସାମୁଦ୍ରିକ ଝଡ଼ କିମ୍ବା ବାତ୍ୟା ଆସିଲେ ସରକାର କିଭଳି ପ୍ରସ୍ତୁତି କରିବେ ସେନେଇ ରାଜ୍ୟବ୍ୟାପୀ ମକ୍ ଡ୍ରିଲ୍ କରନ୍ତି । ସେ କହିଛନ୍ତି ଯେ, ” ଏହିସବୁ କ୍ଷେତ୍ରରେ ଅନୁଷ୍ଠାନ କଠିନ ହେବା ଉଚିତ୍ ନୁହେଁ; ଏହା ନମନୀୟ, ଅନୁକୂଳ ହେବା ଉଚିତ୍। କାରଣ ଜରୁରୀକାଳୀନ ପରିସ୍ଥିତିକୁ ଆପଣ କେତେ ଶୀଘ୍ର ସାମ୍ନା କରିବେ, ପରିସ୍ଥିତିର ଆବଶ୍ୟକତା ଅନୁଯାୟୀ ଆପଣ ପ୍ଲାନ୍-ବି ସହିତ କିଭଳି ଶୀଘ୍ର ପରିବର୍ତ୍ତନ କରିବେ, ଏହା ଗୁରୁତ୍ୱପୂର୍ଣ୍ଣ ଅଟେ।” ।

କରୋନା ଔଷଧ ୨-ଡିଜିର ମୂଲ୍ୟ ନିର୍ଦ୍ଧାରିତ: ଜାଣନ୍ତୁ କେତେ ଟଙ୍କାରେ ମିଳିବ ଔଷଧ

ନୂଆଦିଲ୍ଲୀ: କରୋନା ଔଷଧ ୨_ଡିଜିର ମୂଲ୍ୟ ନିର୍ଦ୍ଧାରଣ । ଡିଆରଡିଓର ଏହି ଆଣ୍ଟି କୋଭିଡ ଔଷଧ ୯୯୦ଟଙ୍କାରେ ଉପଲବ୍ଧ ହେବ । ଗୋଟିଏ ସାଚେଟର ଦାମ ୯୯୦ଟଙ୍କା ଧାର୍ଯ୍ୟ କରାଯାଇଛି । ସରକାରୀ ମେଡିକାରେ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଏହି ମେଡିସିନ୍ ନିଜ ନିଜ ଧାର୍ଯ୍ୟ ଡିସକାଉଣ୍ଟ ପ୍ରାଇସରେ ମିଳିପାରିବ । ୨_ଡିଜି ବା ଡି-ଗ୍ଳୁକୋଜ୍ ଡିଆରଡିଓ ବୈଜ୍ଞାନିକଙ୍କ ଦ୍ବାରା ପ୍ରସ୍ତୁତ ଏହି ଔଷଧକୁ ଜରୁରୀକାଳୀନ ବ୍ୟବହାର ପାଇଁ ଅନୁମତି ମିଳିସାରିଛି । ଅନ୍ୟ ଔଷଧ ଅପେକ୍ଷା ୨_ଡିଜି ଔଷଧରେ ଅଢେଇ ଦିନ ପୂର୍ବରୁ ଭଲ ହେଉଛନ୍ତି ଆକ୍ରାନ୍ତ । ପ୍ରାଥମିକ ପର୍ଯ୍ୟାୟରେ ଏହା ଦିଲ୍ଲୀ ଏମ୍ସର ରୋଗୀଙ୍କୁ ଦିଆଯାଇଛି। ହାଇଦ୍ରାବାଦ ସ୍ଥିତ ଡକ୍ଚର ରେଡ୍ଡୀ ଲାବ୍ରୋଟାରୀରେ ଏହାକୁ ପ୍ରସ୍ତୁତ କରିଛି ଡିଆରଡିଓର ନ୍ୟୁକ୍ଲିଅର ମେଡିସିନ୍ ଓ ଆଲାଏଡ ସେଣ୍ଟର ।

ବାତ୍ୟା ‘ୟାସ’ ଉପରେ ପିଏମଙ୍କ ସମୀକ୍ଷା ବୈଠକକୁ ଶୁଭେନ୍ଦୁଙ୍କୁ ନିମନ୍ତ୍ରଣ, ସାମିଲ ହେବେ ନାହିଁ ମମତା

କୋଲକାତା: ବାତ୍ୟା ୟାସକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶା ଓ ପଶ୍ଚିମବଙ୍ଗ ଗସ୍ତରେ ଅଛନ୍ତି । ଓଡ଼ିଶାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହିତ ସମୀକ୍ଷା ବୈଠକ କରିବା ପରେ ସେ ପଶ୍ଚିମବଙ୍ଗ ଯିବେ । ତେବେ ପ୍ରଧାନମନ୍ତ୍ରୀଙ୍କ ସମୀକ୍ଷା ବୈଠକକୁ ନେଇ ସେଠାରେ ରାଜନୀତି ଆରମ୍ଭ ହୋଇଯାଇଛି । ବିରୋଧି ଦଳ ନେତା ଶୁଭେନ୍ଦୁ ଅଧିକାରୀଙ୍କୁ ବୈଠକକୁ ନିମନ୍ତ୍ରଣ କରାଯିବାକୁ ନେଇ ଉତକ୍ଷିପ୍ତ ମୁଖ୍ୟମନ୍ତ୍ରୀ ମମତା ବାନାର୍ଜୀ ବୈଠକରେ ଯୋଗ ଦେବେ ନାହିଁ । ସୂଚନାଯୋଗ୍ୟ ଯେ, ନିକଟରେ ଶେଷ ହୋଇଥିବା ପଶ୍ଚିମବଙ୍ଗ ନିର୍ବାଚନରେ ଶୁଭେନ୍ଦୁ ମମତାଙ୍କୁ ନନ୍ଦିଗ୍ରାମ ଆସନରୁ ପରାସ୍ତ କରିଥିଲେ ।

ଏଥିସହିତ ପଢ଼ନ୍ତୁ: ହତ୍ୟା ଅଭିଯୁକ୍ତ ଅଲିମ୍ପିକ୍ସ ପଦକ ବିଜେତା ସୁଶୀଲ କୁମାର ମାଡ଼ ମାରୁଥିବା ଫଟୋ ଭାଇରାଲ୍‌

ବାତ୍ୟା ୟାସ ଦ୍ୱାରା ପଶ୍ଚିମବଙ୍ଗର ୧ କୋଟି ଲୋକ ପ୍ରଭାବିତ ହୋଇଥିବା ରାଜ୍ୟ ପକ୍ଷରୁ ଦାବି କରାଯାଇଛି । ଆଜି ହେବାକୁ ଥିବା ସମୀକ୍ଷା ବୈଠକକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସମେତ ରାଜ୍ୟପାଳ ଜଗଦୀପ ଧନକଡ୍,ବିଜେପି ସାଂସଦ ତଥା କେନ୍ଦ୍ର ମନ୍ତ୍ରୀ ଦେବଶ୍ରୀ ଚୌଧୁରୀ ଓ ଧର୍ମେନ୍ଦ୍ର ପ୍ରଧାନ ଏବଂ ବିଧାନସଭାରେ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀଙ୍କୁ ନିମନ୍ତ୍ରଣ କରାଯାଇଥିଲା । ତେବେ ମମତା ଏହି ବୈଠକରେ ଯୋଗ ଦେବେ ନାହିଁ । ଶୁଭେନ୍ଦୁଙ୍କୁ ନିମନ୍ତ୍ରଣ କରାଯାଇଥିବାରୁ ମମତା ସମୀକ୍ଷା ବୈଠକରେ ଯୋଗ ଦେବେ ନାହିଁ ବୋଲି କୁହାଯାଉଛି । ତେବେ ମମତା ପ୍ରଧାନମନ୍ତ୍ରୀଙ୍କୁ ଗୋଟିଏ ଦସ୍ତାବିଜ୍ ଦେବା ପାଇଁ କାଲିକୁଣ୍ଡା ଯିବେ ବୋଲି ଜଣା ପଡିଛି । ନିର୍ବାଚନ ପରେ ପ୍ରଥମ ଥର ପାଇଁ ମମତା ପ୍ରଧାନମନ୍ତ୍ରୀଙ୍କୁ ସାକ୍ଷାତ କରିବେ । ସମୀକ୍ଷା ବୈଠକରେ ମମତା ଯଦି ସାମିଲ ନହୁଅନ୍ତି ତେବେ କେନ୍ଦ୍ର ଓ ରାଜ୍ୟ ମଧ୍ୟରେ ମତଭେଦ ଆଗକୁ ଆହୁରି ବଢିବ ।

ହତ୍ୟା ଅଭିଯୁକ୍ତ ଅଲିମ୍ପିକ୍ସ ପଦକ ବିଜେତା ସୁଶୀଲ କୁମାର ମାଡ଼ ମାରୁଥିବା ଫଟୋ ଭାଇରାଲ୍‌

ନୂଆଦିଲ୍ଲୀ: କୁସ୍ତିଯୋଦ୍ଧା ସୁଶୀଲ କୁମାର ମାଡ ମାରୁଥିବା ଫଟୋ ଭାଇରାଲ୍ । ସାଗର ରଣା ନାମକ ଜଣେ କୁସ୍ତିଯୋଦ୍ଧାଙ୍କୁ ମାଡ ମାରୁଥିବାର ଫଟୋ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ସୁଶୀଲ ଗୋଟିଏ ବାଡି ଧରି ସାଗରଙ୍କୁ ମାରୁଥିବା ବେଳେ ସାଗର ତଳେ ପଡିଥିବା ଦେଖିବାକୁ ମିଲିଛି । ଏହି ବିବାଦ ପାଇଁ କିଛି ଦିନ ତଳେ ସୁଶୀଲ କୁମାରଙ୍କୁ ଗିରଫ କରାଯାଇଥିଲା । ସୁଶୀଲଙ୍କ ମାଡ଼ରେ ସମ୍ପୃକ୍ତ କୁସ୍ତି ଖେଳାଳିଙ୍କ ଜୀବନ ବି ଯାଇଥିଲା । ଘଟଣାରେ ସୁଶୀଲ୍‌ଙ୍କ ସହଯୋଗୀ ଅଜୟ କୁମାରଙ୍କୁ ମଧ୍ୟ ପୁଲିସ ଗିରଫ କରିଥିଲା ।

Wrestler Sushil Kumar Arrested Sagar Dhankhar Murder Case New Photos Viral  Of Sagar Being Brutally Beaten New Revealing About Sushil Wrestler - बेरहम:  सागर को बेरहमी से पीटने की नई तस्वीरें आईं

ମେ ୪ ତାରିଖ ରାତିରେ ଦିଲ୍ଲୀର ଉତ୍ତରାଞ୍ଚଳରେ ଅବସ୍ଥିତ ଛତ୍ରଶାଳ ଷ୍ଟାଡିୟମ୍‌ ଭିତରେ ସୁଶୀଲ୍‌ କୁମାରଙ୍କ ସମେତ ଅନ୍ୟ ଖେଳାଳୀ ମାନେ ଆକ୍ରମଣ କରିବାରୁ ୨୩ ବର୍ଷୀୟ ସାଗର ରାଣାଙ୍କର ମୃତ୍ୟୁ ହୋଇଥିଲା । ତାଙ୍କର ଦୁଇଜଣ ବନ୍ଧୁ ଆହତ ହୋଇଥିଲେ । ପୁଲିସ କହିବା ଅନୁସାରେ, ପାର୍କିଙ୍ଗ୍ ଏରିଆରେ ସୁଶୀଲ୍ କୁମାର, ଅଜୟ କୁମାର, ପ୍ରିନ୍‌ସ୍‌, ସୋନୁ, ସାଗର ରାଣା, ଅମିତ ଏବଂ ଅନ୍ୟମାନଙ୍କ ମଧ୍ୟରେ ସଂଘର୍ଷ ହୋଇଥିଲା । ଏହାପରେ ପୁଲିସ ମଡେଲ୍‌ ଟାଉନ୍ ଥାନାରେ ସେମାନଙ୍କ ବିରୋଧରେ ମାମଲା ରୁଜୁ କରିଥିଲା ।

ଏଥିସହିତ ପଢ଼ନ୍ତୁ: ଦେଶରେ କରୋନା ଟିକାର ଅଭାବ ଭିତରେ ଏହି ହିସାବ ବଢାଇଲା ଚିନ୍ତା,ଗାଏବ ଟିକାକୁ ନେଇ ଉଠିଲା ପ୍ରଶ୍ନ

ବାତ୍ୟା କ୍ଷତିଭରଣା ନିଜେ କରିବ ରାଜ୍ୟ: ବାତ୍ୟା ନିରୋଧୀ ଭିତ୍ତିଭୂମି ପାଇଁ ପ୍ରଧାନମନ୍ତ୍ରୀଙ୍କ ନିକଟରେ ଦାବି

ଭୁବନେଶ୍ୱର: ଶୁକ୍ରବାର ଓଡ଼ିଶା ଗସ୍ତରେ ଆସି ବାତ୍ୟା କ୍ଷୟକ୍ଷତିର ସମୀକ୍ଷା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଭୁବନେଶ୍ୱରେ ଅନୁଷ୍ଠିତ ଏହି ଉଚ୍ଚସ୍ତରୀୟ ବୈଠକରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ପ୍ରତାପ ଷଡ଼ଙ୍ଗୀ, ମୁଖ୍ୟ ଶାସନ ସଚିବ ସୁରେଶ ମହାପାତ୍ର,ସ୍ୱତନ୍ତ୍ର ରିଲିଫ୍ କମିଶନର ପ୍ରଦୀପ ଜେନା ଓ ୫-ଟି ସଚିବ ଭି.କେ ପାଣ୍ଡିଆନ୍‌ଙ୍କ ସମେତ ଅନ୍ୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ ।

ସମୀକ୍ଷା ବୈଠକରେ ହୋଇଥିବା ଆଲୋଚନା ସମ୍ପର୍କରେ ଗଣମାଧ୍ୟମକୁ ସୂଚନା ଦେଇ ଏସ୍‌ଆରସି ପ୍ରଦୀପ କୁମାର ଜେନା କହିଛନ୍ତି ଯେ, କ୍ଷତିକ୍ଷତି ନେଇ ଆକଳନ ଚାଲିଛି ଏବେ କ୍ଷୟକ୍ଷତି ବାବଦରେ ଅର୍ଥରାଶି ଆମେ କେନ୍ଦ୍ରକୁ ମାଗିନାହୁଁ । ୭ ଦିନ ପରେ କ୍ଷୟକ୍ଷତି କେତେ ହୋଇଛି ଆମେ ଜଣାଇବୁ  । ବାତ୍ୟାରେ କ’ଣ ହୋଇଛି ସେ ନେଇ ୮ ମିନିଟର ଏକ ଭିଡିଓ କ୍ଳିପ୍ ମାଧ୍ୟମରେ ପ୍ରଧାନମନ୍ତ୍ରୀଙ୍କୁ ଅବଗତ କରାଯାଇଛି । ବାତ୍ୟା ଅଞ୍ଚଳର ସ୍ଥିତି ନେଇ ମଧ୍ୟ ପାଓ୍ୱାର ପଏଣ୍ଟ ମାଧ୍ୟମରେ ପ୍ରଦର୍ଶିତ କରାଯାଇଛି । ତେବେ ଅନୁଷ୍ଠିତ ବୈଠକରେ ରାଜ୍ୟ ପକ୍ଷରୁ ବାତ୍ୟା ନିରୋଧୀ ଭିତ୍ତିଭୂମି ଓ ବେଳାଭୂମିର ସୁରକ୍ଷା ପାଇଁ ଅନୁରୋଧ କରାଯାଇଥିବା ଶ୍ରୀ ଜେନା ସୂଚନା ଦେଇଛନ୍ତି । ତେବେ ବାତ୍ୟା କ୍ଷୟକ୍ଷତିର ଭରଣା ରାଜ୍ୟ ନିଜେ କରିବ ବୋଲି ଶ୍ରୀ ଜେନା କହିଛନ୍ତି ।

ଏଥିସହିତ ପଢ଼ନ୍ତୁ: ବିପର୍ଯ୍ୟୟ ଆଗରେ ହିମାଳୟ ଭଳି ମଜଭୁତ୍ ନବୀନ

ଦେଶରେ କରୋନା ଟିକାର ଅଭାବ ଭିତରେ ଏହି ହିସାବ ବଢାଇଲା ଚିନ୍ତା,ଗାଏବ ଟିକାକୁ ନେଇ ଉଠିଲା ପ୍ରଶ୍ନ

ନୂଆଦିଲ୍ଲୀ: ଭାରତରେ କରୋନା ଟିକାକୁ ନେଇ ହୋହଲ୍ଲା ଜାରି ଥିବାବେଳେ ଭାରତ ବାୟୋଟେକର କୋଭାକ୍ସିନ୍ ଟିକାର ୪କୋଟି ଡୋଜର ହିସାବ ମିଳୁନାହିଁ । ଯାହାକୁ ନେଇ ପ୍ରଶ୍ନ ଉଠିବାରେ ଲାଗିଛି । ଦେଶରେ ପ୍ରତିଦିନ ଦିଆଯାଉଥିବା ଟିକା ଓ ଉତ୍ପାଦନ ତଥ୍ୟ ମେଳ ଖାଉନଥିବା ଅଭିଯୋଗ ହେଉଛି । ଆସନ୍ତୁ କୋଭାକ୍ସିନର ଗଣିତକୁ ବୁଝିବାକୁ ଚେଷ୍ଟା କରିବା । ଜାଣିବା କ’ଣ ପାଇଁ ଏହି ପ୍ରଶ୍ନ ଉଠୁଛି । କେଉଁଥିପାଇଁ କୋଭାକ୍ସିନ୍ ଟିକାକୁ ନେଇ ସନ୍ଦେହ ସୃଷ୍ଟି ହେଉଛି । ସରକାରୀ ଡାଟା ଅନୁସାରେ ଗୁରୁବାର ସକାଳ ସୁଧା ଦେଶରେ ୨ କୋଟି ୧ ଲକ୍ଷ ଡୋଜ୍ ଲଗା ଯାଇ ସାରିଛି । ଟାଇମ୍ସ ଅଫ୍ ଇଣ୍ଡିଆ ଡାଟା ଅନୁସାରେ ଦେଶରେ ଏବେ ମଧ୍ୟ ୬ କୋଟିରୁ ଅଧିକ କୋଭାକ୍ସିନ୍ ଡୋଜ୍ ଉପଲବ୍ଧ ଅଛି । ଏହାମଧ୍ୟରେ ଭ୍ୟାକ୍ସିନ ରପ୍ତାନୀ ଡାଟା ମଧ୍ୟ ରହିଛି । ଭାରତ ବାୟୋଟେକ୍ ଏପ୍ରିଲ ୨୦ ତାରିଖରେ କହିଥିଲା ଯେ, ମାର୍ଚ୍ଚ ୧.୫ କୋଟି ଡୋଜ୍ ତିଆରି ହୋଇଛି ଏପ୍ରିଲ ଶେଷ ସୁଧା ଅଧିକ ୨ କୋଟି ଡୋଜ୍ ପ୍ରସ୍ତୁତ ହେବ । କମ୍ପାନୀ ସିଏମଡି କୃଷ୍ଣା ଏଲ୍ଲା କହିଥିଲେ ଯେ, ମେ’ ମାସରେ ୩ କୋଟି ଟିକା ଉତ୍ପାଦନ ହେବ । ଯଦି ମଧ୍ୟ ଉତ୍ପାଦନ ଆଶା ମୁତାବକ ନହୋଇଥିବ ତେବେ ମଧ୍ୟ ମେ’ ମାସ ଶେଷ ସୁଧା ୫ କୋଟି ୫୦ ଲକ୍ଷ ଟିକା ଉପଲବ୍ଧ ରହିବା କଥା । କେନ୍ଦ୍ର ମଧ୍ୟ ଅଲଗା ଅଲଗା ଦୁଇଟି ସତ୍ୟପାଠରେ କହିଥିଲା ଯେ, କୋଭାକ୍ସିନର ମାସିକ ଉତ୍ପାଦନ ୨ କୋଟି । ଏଥିମଧ୍ୟରୁ ଗୋଟିଏ ସତ୍ୟପାଠ ମେ’ ୨୪ ତାରିଖରେ ଦିଲ୍ଲୀ ହାଇକୋର୍ଟରେ ରଖାଯାଇଥିଲା । ଜାନୁଆରି ୫ ତାରିଖରେ ଭ୍ୟାକ୍ସିନେସନ୍ କାର୍ଯ୍ୟକ୍ରମ ଆରମ୍ଭ ହେବା ପୂର୍ବରୁ ଏଲା କହିଥିଲେ ଯେ, ବାୟୋଟେକ୍ ପାଖରେ ୨ କୋଟି ଟିକାର ଷ୍ଟକ୍ ରହିଛି । ଯଦି ଏହି ୨ କୋଟିକୁ ହିସାବକୁ ନିଆଯାଏ ତେବେ ମୋଟ ଟିକା ସଂଖ୍ୟା ହେଉଛି ୭ କୋଟି ୫୦ ଲକ୍ଷ । ପୁଣି ଯଦି ଏଥିରେ ଜାନୁଆରି ଓ ଫେବ୍ରୁଆରୀ ଉତ୍ପାଦନକୁ ମିଶାଯାଏ ତେବେ ଏହି ସଂଖ୍ୟା ୮ କୋଟି ଡୋଜ୍ ହେବ । ମାର୍ଚ୍ଚ ଓ ଏପ୍ରିଲ ତୁଳନାରେ ସେହି ସମୟରେ ଉତ୍ପାଦନ କମ ହୋଇଥିଲା । ଉତ୍ପାଦିତ ଟିକା ଡୋଜରୁ ଭ୍ୟାକ୍ସିନ୍ ଡିପ୍ଲୋମାସୀ କ୍ରମରେ କିଛି ଟିକାକୁ ବିଦେଶକୁ ରପ୍ତାନୀ କରାଯାଇଥିଲା । ଭାରତରୁ ମୋଟ ୬ କୋଟି ୬୦ ଲକ୍ଷ ଟିକା ବିଦେଶକୁ ଯାଇଛି । ତେବେ ବିଦେଶକୁ ରପ୍ତାନୀ ହୋଇଥିବା ଟିକା ମଧ୍ୟରୁ ସଂଖ୍ୟାଧିକ ହେଉଛି କୋଭିସିଲ୍ଡ । ଯଦି ବି ମାନି ନିଆଯାଏ ଯେ, ୨ କୋଟି କୋଭିସିଲ୍ଡ୍ ଟିକା ବିଦେଶକୁ ପଠାଯାଇଛି ତେବେ ବି ବାକି ୪ କୋଟି କୋଭାକ୍ସିନ୍ ଡୋଜ୍ କୁଆଡେ ଗଲା ପ୍ରଶ୍ନର ଉତ୍ତର ମିଳୁନାହିଁ ।

ପାଲିଙ୍କି ବଦଳରେ ଉଠିଲା ବରର କୋକେଇ…

“ମୋର ବାହାଘର ହେବ । ମୁଁ ପାଲିଙ୍କିରେ ଚଢି ମୋ ସପନର ରାଜକୁମାରୀକୁ ଘରକୁ ଆଣିବି । ତାସହ ସାତ ଜନମର ସାଥୀ ହୋଇ ରହିବାର ପ୍ରତିଶୃତି ଦେବି । ମୋ ବୋଉ ପାଇଁ ସୁନାନାଖୀ ବୋହୁଟିଏ ଆଣିଦେବି । ମୁଁ ବାହାହେବି ।”

ଏମିତି ଅନେକ ଅସୁମାରୀ ସପ୍ନ ଦେଖି ନିଜ ବାହାଘର ତାରିଖକୁ ଅପେକ୍ଷା କରିଥିଲେ ଜୀବର୍ଧନ । ଖୁବ୍ ଖୁସି ମିଜାଜ୍‌ର ପିଲା ଥିଲେ ଜୀବର୍ଧନ । ସମସ୍ତଙ୍କୁ ହସାଇବାରେ ସେ ଖୁସି ପାଉଥିଲେ । ହେଲେ ଦୁଃଖର କଥା ଯେ ନିଜ ବାହାଘରର ଖୁସିରେ ନିଜେ ହିଁ ସାମିଲ ହୋଇପାରିଲେନି । କିଏ ବା ଜାଣିଥିଲା ବେଦୀରେ ହୋମନିଆଁ ଜଳିବା ପୂର୍ବରୁ ମଶାଣୀରେ ଜୁଇନିଆଁ ଜଳିବ ବୋଲି । ବରଗଡ ଜିଲ୍ଲାର ଲହଣ୍ଡା ପଂଚାୟତ ଯୋଗୀପାଲି ଗାଁର ବାସିନ୍ଦା ହେଉଛନ୍ତି ଜୀବର୍ଧନ ଭୋଇ । ସମ୍ବଲପୁରର ଏକ ଘରୋଇ କମ୍ପାନୀରେ ସେ କାମ କରୁଥିଲେ । ଗତ ୨୫ ତାରିଖରେ ତାଙ୍କର ବିବାହ ହେଇଥାନ୍ତା । ସେଥିପାଇଁ ଛୁଟିରେ ଘରକୁ ଆସି ବିବାହକାର୍ଯ୍ୟ ପାଇଁ ପରିବାର ଲୋକଙ୍କ ସହ ସାମିଲ ହୋଇଥିଲେ । କିନ୍ତୁ ଗତ ୨୧ ତାରିଖ ଦିନ କରୋନାରେ ଆକ୍ରାନ୍ତ ହୋଇ ସମ୍ବଲପୁର କୋଭିଡ ହସ୍ପିଟାଲରେ ତାଙ୍କୁ ଭର୍ତି କରାଯାଇଥିଲା ।

ହେଲେ ଭାଗ୍ୟର ବିଡମ୍ବନା ଯେ କୋଭିଡରୁ ସୁସ୍ଥ ହୋଇ ବର ବେଶ ଧାରଣ କରିପାରିଲେନି ଜୀବର୍ଧନ । ଭାବିଥିଲେ ଦେହ ଭଲ ହୋଇଯାଇଥିଲେ ୨୫ତାରିଖ ଦିନ ବାହାହେଇଥାନ୍ତେ । କିନ୍ତୁ ବାହାଘର ଦିନ ହିଁ କରୋନା କାରଣରୁ ସବୁଦିନ ପାଇଁ ଆଖି ବୁଜି ଦେଲେ ଜୀର୍ବଧନ । ସାତଜନ୍ମ ପାଇଁ ସାଥି ସାଜିବାକୁ ଧାର୍ଯ୍ୟ କରିଥିବା ତାରିଖ ହିଁ ତାଙ୍କ ଜୀବନର ଶେଷ ତାରିଖ ପାଲଟିଲା । ବିବାହ ଦିନ ହିଁ ଚାଲିଗଲା ବରର ଜୀବନ । ବରବେଶ ଧରି କନିଆ ପାଖକୁ ଯିବାର ଆଶା ନିରବୀ ଗଲା ସବୁଦିନ ପାଇଁ । ଘର ଦୁଆରୁ ବରଯାତ୍ରୀ ବାହାରିବା ବଦଳରେ କୋକେଇ ଉଠିଲା । ଯାହା ସତରେ ଖୁବ୍ ହୃଦୟବିଦାରକ ଘଟଣା । ଜୀବର୍ଧନଙ୍କ ମୃତରେ ସାରା ଗାଁରେ ଶୋକାକୁଳ ପରିବେଶ । କରୋନା କିଭଳି ନିଜର କାୟା ମେଲାଇଚାଲିଛି ଓ ଅନେକ ପରିବାରର ସୁଖ ଛଡେଇନେଉଛି ତାହା ହିଁ ବର୍ତମାନ ସବୁ ସ୍ଥାନରେ ଦେଖିବାକୁ ମିଳୁଛି । ନା ବୟସ ନା ସମୟ କିଛି ବି ମାନୁନି କରୋନା । କେବଳ ଛଡାଇନେଉଛି ମଣିଷ ଦେହରୁ ଜୀବନ ।

ନୂଆଗାଁ ତହସିଲଦାର ନିଲମ୍ୱିତ

ନୟାଗଡ଼: ନୂଆଗାଁ ତହସିଲ୍‌ଦାରଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ । ନୂଆଗାଁ ଶରତ କୁମାର ମଲ୍ଲିକଙ୍କୁ ନିଲମ୍ୱିତ କରିଛନ୍ତି ରାଜ୍ୟପାଳ । ଓସିଏସ୍ ନିୟମ ୧୯୬୨ ଅନୁଯାୟୀ ତହସିଲଦାରଙ୍କ ବିରୋଧରେ ଏହି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ । ତେବେ ପରବର୍ତ୍ତୀ ଆଦେଶ ଯାଏଁ ନୟାଗଡ଼ ଜିଲ୍ଲାପାଳଙ୍କ କାର୍ଯ୍ୟାଳୟରେ ରହିବେ ଶରତ କୁମାର ମଲ୍ଲିକ । ବିନା ଅନୁମତି ଜିଲ୍ଲା ସଦରମହକୁମା ଛାଡ଼ିବେ ନାହିଁ।  ତେବେ  ସେ ଓଡ଼ିଶା ସର୍ଭିସ୍‌ କୋଡ୍‌ ଅନୁସାରେ ସବ୍‌ସିଷ୍ଟେନ୍ସ ଭତ୍ତା ପାଇବାକୁ ଯୋଗ୍ୟ। ଏ ନେଇ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଏକ ପ୍ରେସ ବିଜ୍ଞପ୍ତି ଜରିଆରେ ସୂଚିତ କରାଯାଇଛି ।

ଏଥିସହିତ ପଢ଼ନ୍ତୁ: ରାଜ୍ୟରେ ଫଳପ୍ରଦ ହୋଇଛି ଲକ୍‌ଡାଉନ୍ କଟକଣା: ଅବଧି ବୃଦ୍ଧି ନେଇ କିଛି ଏଭଳି କହିଲେ ସ୍ୱାସ୍ଥ୍ୟ ବିଶେଷଜ୍ଞ