spot_img
Home Blog Page 5865

ଆସିକାରେ ପ୍ରଥମ କଣ୍ଟେନମେଣ୍ଟ ଘୋଷଣା ପରେ ସକ୍ରିୟ ସରପଞ୍ଚ

ଆସିକା: କରୋନାରେ ଘାଣ୍ଟି ହେଉଛି ସାରା ରାଜ୍ୟ। ସବୁଠି ଆତଙ୍କ ଓ ସବୁଠି ସତର୍କତା। ଗଞ୍ଜାମ ଜିଲ୍ଲା ଉପରେ ରହିଛ ପ୍ରଶାସନର ନଜର। ସଜାଗ ସରପଞ୍ଚ, ଚାଲିଛି ସଚେତନତା। ଜିଲ୍ଲାର ଆସିକା ଅଞ୍ଚଳରେ ପ୍ରଥମ କଣ୍ଟେନମେଣ୍ଟ ଘୋଷଣା ପରେ ସକ୍ରିୟ ହୋଇଛନ୍ତି ସରପଞ୍ଚ। ଆସିକା ବ୍ଳକର ଆଲିପୁର ପଞ୍ଚାୟତରେ ସରପଞ୍ଚ ଲୋକଙ୍କୁ ସଚେତନ କରିବା ସହ ଶପଥ ପାଠ କରାଇଛନ୍ତି। ସାମାଜିକ କର୍ମୀଙ୍କ ସହ ମିଶି ପ୍ରଚାର ଗାଡ଼ିରେ ଲୋକଙ୍କୁ ସଚେତନ କରିବା ସହ ନିଜେ ସଂଗରୋଧ କେନ୍ଦ୍ର ପ୍ରସ୍ତୁତ କରିଛନ୍ତି।

ଗାଁର ଯୁବକମାନଙ୍କୁ ନେଇ ଗଠିତ କରିଛନ୍ତି କୋରୋନା ଲଢେଇ ଯୋଦ୍ଧା ସଂଗଠନ। ଘର ଘର ବୁଲି ଲୋକଙ୍କ କରୋନା ଲଢେଇରେ ସାମିଲ କରିବାକୁ ସଚେତନ କରାଯାଉଛି। ପ୍ରବାସୀ ଫେରିଲେ କିପରି ସଂଗରୋଧ କେନ୍ଦ୍ରରେ ରଖାଯିବ ସେଥିପାଇଁ ବ୍ୟବସ୍ଥା ହୋଇଛି। କରୋନା ମୁକ୍ତ ପଞ୍ଚାୟତ ପାଇଁ ସଂଗ୍ରାମ ଜାରି ରହିଥିବା କହିଛନ୍ତି ସରପଞ୍ଚ।

ଖାଲି ଆଲିପୁର ନୁହେଁ, ଗତବର୍ଷ କରୋନାରୁ ଶିକ୍ଷା ଲାଭ କରିଛି ପୁରା ଗଞ୍ଜାମ ଜିଲ୍ଲା। ଏଥିପାଇଁ ପଞ୍ଚାୟତ ସ୍ତରରୁ ସବୁଠି ଆରମ୍ଭ ହୋଇଛି ସଚେତନତା।

କରୋନା ମୁକାବିଲା ପାଇଁ ୧୨ OASଙ୍କୁ ପଠାଗଲା ପଶ୍ଚିମ ଓଡ଼ିଶା

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣକୁ ରୋକ ଲଗାଇବା ପାଇଁ ରାଜ୍ୟ ସରକାର ବିଭିନ୍ନ ପଦକ୍ଷେପ ମାନ ନେଇଛନ୍ତି। ତେବେ ରାଜ୍ୟରେ କରୋନା ସଂକ୍ରମଣ ବୃଦ୍ଧି ହେଉଥିବାରୁ ୧୨ OASଙ୍କୁ ପଠାଗଲା ପଶ୍ଚିମ ଓଡ଼ିଶା। ପଶ୍ଚିମ ଓଡ଼ିଶାରେ କରୋନା ସଂକ୍ରମଣ ବୃଦ୍ଧି ଘଟୁଛି। ସେଥିପାଇଁ ୧୨ OAS କରୋନା ମୁକାବିଲା ପାଇଁ ଗଲେ ପଶ୍ଚିମ ଓଡ଼ିଶା। ତୁରନ୍ତ ସଂପୃକ୍ତ ଜିଲ୍ଲାପାଳଙ୍କୁ ରିପୋର୍ଟ କରିବାରୁ OAS ମାନଙ୍କୁ ନିର୍ଦ୍ଦେଶ ଦିଆଯାଇଛି।

୧୨ OAS ମୁକାବିଲା ଓ ପରିଚାଳନାରେ ଜିଲ୍ଲାପାଳମାନଙ୍କୁ ସହଯୋଗ କରିବେ। ବିବେକାନନ୍ଦ ସାହୁ, ହେମନ୍ତ ସିଂ, ଶ୍ବେତ କୁମାର ଦାସ ଗଲେ ନୂଆପଡ଼ା। ଅଯୋଧ୍ୟାକାନ୍ତ ଶତପଥୀ, ଦିଲ୍ଲୀପ ମହାପାତ୍ର ଗଲେ ବଲାଙ୍ଗୀର। ଦୁର୍ଗାପ୍ରସାଦ ମହାପାତ୍ର, ଧୀରେନ୍ଦ୍ର ନାଥ କର ଗଲେ ବରଗଡ଼। ମଧୁସୂଦନ ବେହେରା, ପ୍ରଭାତ ସାହୁଙ୍କୁ ସମ୍ବଲପୁର ପଠାଯାଇଛି। ସେହିପରି ସନ୍ତୋଷ ଦାଶ, ଆଶିଷ ଜେନା, ଦେବାଶିଷ ପଟ୍ଟନାୟକଙ୍କୁ କରୋନା ମୁକାବିଲା ପାଇଁ ସୁନ୍ଦରଗଡ଼ ପଠାଯାଇଛି ।

ଅମ୍ଲଜାନ ସ୍ତର କମିଲେ ଶରୀରରେ ଦେଖାଯାଏ ଏହିସବୁ ଲକ୍ଷଣ

ଦେଶରେ କରୋନା ମହାମାରୀ ତାଣ୍ଡବ ରଚୁଛି। ସଂକ୍ରମଣରୁ ରକ୍ଷା ପାଇବା ପାଇଁ ଲୋକମାନେ ସବୁ ପ୍ରକାରର ଚେଷ୍ଟା କରୁଛନ୍ତି। କିନ୍ତୁ ଏହା ସତ୍ତ୍ୱେ ବି ଲୋକମାନେ କରୋନାର କୋପରୁ ରକ୍ଷା ପାଇପାରୁନାାଁନ୍ତି। କରୋନାର ଏହି ଦ୍ୱିତୀୟ ଲହରରେ ଭେଣ୍ଟିଲେଟର ଅପେକ୍ଷା ରୋଗୀମାନେ ଅଧିକ ଅମ୍ଳଜାନ ଆବଶ୍ୟକ କରୁଛନ୍ତି।  ହେଲେ ଡାକ୍ତରଖାନାରେ ଅମ୍ଳଜାନ ଅଭାବ ସହ ଶଯ୍ୟା, ଡାକ୍ତର ଏବଂ କର୍ମଚାରୀଙ୍କ ଅଭାବ ହେତୁ ପ୍ରତିଦିନ ହଜାର ହଜାର ଲୋକଙ୍କର ମୃତ୍ୟୁ ହେଉଛି।

ଏଭଳି ପରିସ୍ଥିତିରେ ହୋମ ଆଇଶୋଲେଶନରେ ଥିବା ରୋଗୀଙ୍କ ପାଇଁ ବିପଦ ଅଧିକ ରହିଛି। ଘରେ ଚିକିତ୍ସିତ ହେଉଥିବା ରୋଗୀମାନଙ୍କ ପାଇଁ ଶରୀରରେ କମ୍ ଅମ୍ଳଜାନ ସ୍ତରର ଲକ୍ଷଣ କ’ଣ ଏବଂ କେତେବେଳେ  ଡାକ୍ତରଖାନା ଯିବା ଆବଶ୍ୟକ ତାହା ଜାଣିବା ନିହାତି ଜରୁରୀ ଅଟେ। ତେବେ ଆସନ୍ତୁ ଜାଣିବା ଅମ୍ଳଜାନ ହ୍ରାସ ହେବାର ଲକ୍ଷଣ କ’ଣ ଏବଂ ଯଦି ଏହା ଘଟେ ତେବେ କ’ଣ କରିବେ।

ଲକ୍ଷଣ:

ନିଶ୍ୱାସ-ପ୍ରଶ୍ୱାସରେ କଷ୍ଟ ହେବା: ଶରୀରରେ ହଠାତ୍ ଅମ୍ଳଜାନ ସ୍ତର କମିଗଲେ କରୋନା ରୋଗୀଙ୍କୁ ନିଶ୍ୱାସ ପ୍ରଶ୍ୱାସ ନେବାରେ କଷ୍ଟ ଅନୁଭବ ହୁଏ। ରୋଗୀ ଛାତିରେ  ଯନ୍ତ୍ରଣା, ଲଗାତାର କାଶ ଓ ଅଣନିଶ୍ୱାସୀ ଲାଗିବା ଓ ପ୍ରବଳ ମୁଣ୍ଡବିନ୍ଧା ଅନୁଭବ କରନ୍ତି। ତେବେ ଯଦି କରୋନା ରୋଗୀଙ୍କ ଠାରେ ଏଭଳି ଲକ୍ଷଣ ଦେଖାଯାଏ, ତୁରନ୍ତ ଡାକ୍ତରଙ୍କ ସହିତ ଯୋଗାଯୋଗ କରନ୍ତୁ ଏବଂ ଯଥାଶୀଘ୍ର ତାଙ୍କୁ ଡାକ୍ତରଖାନାରେ କରାନ୍ତୁ।

ଚେହେରା ନୀଳ ପଡ଼ିଯିବା: ଯଦି ଶରୀରରେ ଅମ୍ଳଜାନର ଅଭାବ ଥାଏ, ତେବେ ରୋଗୀଙ୍କ ଚେହେରାର ରଙ୍ଗ ନୀଳ ହେବାକୁ ଲାଗେ ଏବଂ ଓଠ ମଧ୍ୟ ନୀଳ ହୋଇଯାଏ। ଏହାକୁ ସିଆନୋସିସ୍ ର ଲକ୍ଷଣ ବି କୁହାଯାଏ। ବାସ୍ତବରେ ସୁସ୍ଥ ଅମ୍ଳଜାନଯୁକ୍ତ ରକ୍ତ ହେତୁ ଆମ ଚର୍ମ ଲାଲ କିମ୍ବା ଗୋଲାପୀ ଦେଖାଯାଏ। କିନ୍ତୁ ଯେତେବେଳେ ଶରୀର ଅମ୍ଳଜାନ ହରାଇବାକୁ ଲାଗେ, ସେତେବେଳେ ଏହିପରି ଲକ୍ଷଣ ଦେଖାଯାଏ।

କ’ଣ କରିବେ:

ଅମ୍ଳଜାନ ସ୍ତର ଯାଞ୍ଚ କରନ୍ତୁ: ଦିଲ୍ଲୀ AIMSର ନିର୍ଦ୍ଦେଶକ ରଣଦୀପ ଗୁଲେରିଆଙ୍କ ଅନୁଯାୟୀ ହୋମ କ୍ୱାରେଣ୍ଟାଇନରେ ଥିବା ରୋଗୀମାନେ ସେମାନଙ୍କର ଅମ୍ଳଜାନ ସ୍ତରକୁ ପର୍ଯ୍ୟାୟକ୍ରମେ ଯାଞ୍ଚ କରିବା ଉଚିତ୍। ଏଥିପାଇଁ ଘରେ ଏକ ପଲ୍ସ ଅକ୍ସିମିଟର ରଖନ୍ତୁ ଏବଂ ଏହାକୁ ହାତର ଆଙ୍ଗୁଳିରେ ଲଗାଇ ଅକ୍ସିଜେନ ଲେଭଲ ମାପନ୍ତୁ। ଯଦି ଆପଣଙ୍କ ଅକ୍ସିଜେନ ଲେଭଲ୍ 94ରୁ ଅଧିକ ଅଛି, ତେବେ ଆପଣ ବିପଦରୁ ଦୂରେରେ ଅଛନ୍ତି।

କେତେବେଳେ ରୋଗୀକୁ ଡାକ୍ତରଖାନାରେ ଭର୍ତ୍ତି କରିବେ: କରୋନା ଦ୍ୱିତୀୟ ଲହରରେ ବ୍ୟକ୍ତି ସଂକ୍ରମିତ ହେବା ମାତ୍ରେ ଅକ୍ସିଜେନ ଲେଭଲ ସ୍ତର କମିଯାଉଛି। ଏଭଳି ସ୍ଥିତିରେ ରୋଗୀଙ୍କ SpO2  ସ୍ତର ଯଦି 94 ରୁ 100 ଭିତରେ ରହୁଛି ତେବେ ଏହା ସୁସ୍ଥ ଥିବାର ଲକ୍ଷଣ। କିନ୍ତୁ ଯଦି ଏହାର ଲେଭଲ 94ରୁ ତଳକୁ ଯାଉଛି ତେବେ ଏହା ହାଇପୋକ୍ସୋମିଆର କାରଣ ହୋଇପାରେ। ଏଭଳି କ୍ଷେତ୍ରରେ ଆପଣଙ୍କ ଶରୀରରେ ଅନେକ ସମସ୍ୟା ହୋଇପାରେ। ଆଉ ଯଦି ଅକ୍ସିୁଜେନ ସାଚୁରେଶନ ଲେଭଲ 90ରୁ ତଳକୁ ଯାଏ ତେବେ ଜୀବନ ବି ଯାଇପାରେଯ ତେଣୁ ଏଭଳି ପରିସ୍ଥିତି ଦେଖାଦେଲେ ରୋଗୀଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରନ୍ତୁ।

ଅମ୍ଳଜାନ ସ୍ତର 91 ରୁ 94 ମଧ୍ୟରେ ରହିଲେ କ’ଣ କରିବେ: ଯଦି ରୋଗୀର ଅମ୍ଳଜାନ ସ୍ତର 91 ରୁ 94 ମଧ୍ୟରେ ଥାଏ, ତେବେ ଘରେ ପ୍ରୋନିଂ ଏକ୍ସରସାଇଜ୍ କରନ୍ତୁ। ତେବେ ଏହି ପ୍ରେନିଂ ଏକ୍ସରସାଇଜ କେମିତି ହୁଏ ଏହାର ସୂଚନା ଆପଣ ଇଣ୍ଟରନେଟରେ ସହଜରେ ପାଇଯିବେ। ତେବେ ଏହି ବ୍ୟାାୟମ କରିବା ଦ୍ୱାରା ରୋଗୀଙ୍କ ଶରୀରର ଅ୍ଳଜାନ ସ୍ତର ବୃଦ୍ଧି ହୋଇଥାଏ।

 

 

ଗର୍ଭବତୀ ମହିଳା ନେଇପାରିବେ କି କରୋନା ଭ୍ୟାକ୍ସିନ୍? କ’ଣ କହୁଛନ୍ତି ଏକ୍ସପର୍ଟ…

ନୂଆଦିଲ୍ଲୀ: କରୋନା ସ୍ଥିତିକୁ ନେଇ ସାରା ଦେଶ ଚିନ୍ତିତ ରହିଥିବା ବେଳେ ମେ ମାସରୁ ରାଷ୍ଟ୍ରୀୟ ଟିକାକରଣ ଅଭିଯାନର ଦ୍ୱତୀୟ ପର୍ଯ୍ୟାୟ ଆରମ୍ଭ ହେବାକୁ ଯାଉଛି । ଯେଉଁଥିରେ ୧୮ ବର୍ଷରୁ ଅଧିକ ଲୋକଙ୍କୁ ଟିକା ଦିଆଯିବ । ହେଲେ ଏଭଳି ସମୟରେ ପ୍ରଶ୍ନ ଉଠୁଛି ଯେ କ’ଣ ଗର୍ଭବତୀ ମହିଳା ମାନେ ମଧ୍ୟ ଟିକା ନେଇପାରିବେ । ଆସନ୍ତୁ ଜାଣିବା କ’ଣ କହୁଛନ୍ତି ଏକ୍ସପର୍ଟ…

ଆମେରିକାର ୟୁଏସଏ ସେଣ୍ଟର ଫର୍ ଡିଜିଜ୍ କଣ୍ଟ୍ରୋଲ୍ ଆଣ୍ଡ୍ ପ୍ରିଭେସନ (US CDC)ର ଏକ ଅଧ୍ୟୟନ ଅନୁଯାୟୀ, ମଡର୍ଣ୍ଣା ଓ ଫାଇଜର-ବାୟୋଏନଟେକ୍ ଭ୍ୟାକ୍ସିନ୍ ଗର୍ଭବସ୍ଥା ସମୟରେ ବ୍ୟବହାର କରିବା ସୁରକ୍ଷିତ। ଏହା ସଂକ୍ରମଣ କବଳରୁ ଶିଶୁକୁ ସୁରକ୍ଷା ଦେବାରେ ସକ୍ଷମ । ଏଥିପାଇଁ US CDC ପକ୍ଷରୁ ଗର୍ଭବତୀ ମହିଳାଙ୍କୁ କରୋନା ଟିକା ନେବା ପାଇ ସୁପାରିଶ କରାଯାଇଛି । CDCର ନିର୍ଦ୍ଦେଶକ ରୋଶେଲ ବାଲେକ୍ସି ସ୍ପଷ୍ଟ କରିଛନ୍ତି । ଏଥିପାଇଁ ଆମେରିକାରେ ଗର୍ଭବତୀ ମହିଳା ମାନେ ଟିକାକରଣ କରୁଛନ୍ତି।

ଦ ନ୍ୟୁ ଇଂଲଣ୍ଡ ଜର୍ନଲ ଅଫ୍ ମେଡିସିନରେ ପ୍ରକାଶିତ ଆର୍ଟିକିଲ୍ ଅନୁଯାୟୀ ୩୫,୦୦୦ରୁ ଅଧିକ ମହିଳାଙ୍କର ଡାଟା ମୂଲ୍ୟାଙ୍କନ କରାଯାଉଛି । ଯେଉଁମାନେ ଡିସେମ୍ବର ୧୪ରୁ ଫେବୃଆରୀ ୨୮ ମଧ୍ୟରେ ଏମଆରଏନଏ କୋଭିଡ-୧୯ ଟିକା ଲଗାଇଥିଲେ । ଦ ଟ୍ରିବ୍ୟୁନର ରିପୋର୍ଟ ଅନୁସାରେ ପ୍ରାରମ୍ଭିକ ନିଷ୍କର୍ସରୁ କୌଣସି ସ୍ପଷ୍ଟ ସେଫ୍ଟି କନସର୍ନ ନଜରକୁ ଆସିନାହିଁ ।

ଖାସକରି ଥର୍ଡ ଟ୍ରାଇମେଷ୍ଟରରେ ଟିକା ନେଇଥିବା ବ୍ୟକ୍ତିଙ୍କ ପିଲାମାନଙ୍କ ମଧ୍ୟରେ କୗେଣସି ସମସ୍ୟା ଦେଖାଦେଇନାହିଁ । ଯାହାକୁ ନେଇ CDC କହିଛି ଯେ ଗର୍ଭବତୀ ମାଆ ମାନଙ୍କୁ ମଧ୍ୟ ଟିକା ଦିଆଯିବା ଉଚିତ୍ । କିନ୍ତୁ ଭାରତୀୟ ଟିକାକୁ ନେଇ ଏଯାବତ୍ ଏଭଳି କୌଣସି ଷ୍ଟଡି ଆସିନି । ସେଥିପାଇଁ ଡାକ୍ତରଙ୍କ ପରାମର୍ଶ ନେଇ ଟିକା ନେବା ଉଚିତ୍।

ଏକ ମେଡିକାଲ୍ ଜର୍ନଲରେ ପ୍ରକାଶିତ ହାର୍ଟଫୋଡ୍ ହେଲ୍ଥ କେୟାର ଡିଭିଜନ୍ ଅଫ୍‌ ଇନଫେକସିୟସ୍ ଡିଜିଜେଜର ଡା. ଏନ୍ ପାମରଙ୍କ ରିପୋର୍ଟ ଅନୁଯାୟୀ SARC CoV-2 ଭ୍ୟାକ୍ସିନ୍ ନେବା ପରେ ଯେଉଁ ମହିଳାମାନେ ଗର୍ଭଧାରଣ ସମ୍ପର୍କରେ ଚିନ୍ତା କରୁଛନ୍ତି ସେମାନଙ୍କ ପାଇଁ କିଛି ଚିନ୍ତା କରିବାର ନାହିଁ । କାରଣ ଟିକା ନେବା ପରେ କୗେଣସି ପ୍ରକାରର ଇନଫର୍ଟିଲିଟିର ପ୍ରମାଣ ମିଳିନାହିଁ ।

 

ଯାତ୍ରୀ ନ ନେଇ ଖାଲି ଖାଲି ଫେରି ଆସିଲା ଏୟର ଇଣ୍ଡିଆର ଫ୍ଲାଇଟ

ନୂଆଦିଲ୍ଲୀ: ସିଡନୀରୁ ଉଡ଼ାଣ ଭରିବାକୁ ଥିବା ଏୟର ଇଣ୍ଡିଆ ବିମାନର ଜଣେ ପାଏଲଟ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଏହି ଘଟଣା ସାମ୍ନାକୁ ଆସିବା ପରେ ସିଡନୀରୁ ଦିଲ୍ଲୀ ଉଡ଼ାଣ ଭରିବାକୁ ଥିବା ବିମାନରେ ଯାତ୍ରା କରିବାକୁ ଥିବା ସମସ୍ତ ଯାତ୍ରୀଙ୍କୁ ଏହି ବାବଦରେ ସୂଚନା ଦିଆଯାଇଥିଲା । ଯେଉଁଥିପାଇଁ ବିମାନ ବିନା ଯାତ୍ରୀରେ ଖାଲି ଖାଲି ଦିଲ୍ଲୀ ଫେରିଥିଲା ।

ସୂଚନା ଅନୁସାରେ, ସିଡନୀ ଏବଂ ଦିଲ୍ଲୀ ମଧ୍ୟରେ ଉଡ଼ାଣ ଚଳାଚଳ ପୂର୍ବରୁ ଗତ ଶନିବାର ଦିଲ୍ଲୀରେ ବିମାନର ସମସ୍ତ ପାଏଲଟଙ୍କ ଆରଟି.ପିସିଆର ଯାଞ୍ଚ୍‌କରାଗଲା ଏବଂ ସମସ୍ତଙ୍କ ରିପୋର୍ଟ ନେଗେଟିଭ୍‌ଆସିଲା । ରବିବାର ସକାଳେ ସିଡନୀରେ ପହଞ୍ଚିବା ପରେ ଅଷ୍ଟ୍ରେଲିଆ ଅଧିକାରୀମାନେ ସମସ୍ତ ପାଏଲଟ ସଦସ୍ୟଙ୍କ ଆରଟି.ପିସିଆର ଯାଞ୍ଚ୍‌କଲେ । ଯାହାର ରିପୋର୍ଟ ସୋମବାର ଆସିଲା । ଏମାନଙ୍କ ମଧ୍ୟରୁ ଜଣେ ପଜିଟିଭ୍‌ଚିହ୍ନଟ ହେଲେ । ଯାହାପରେ ଅଷ୍ଟ୍ରେଲିଆ ଅଧିକାରୀ ଯାତ୍ରୀଙ୍କୁ ବିମାନରେ ଆସିବା ଉପରେ ରୋକ ଲଗାଇଲେ ।

ସୂଚନା ମୁତାବକ ପଜିଟିଭ୍‌ଚିହ୍ନଟ ହୋଇଥିବା ପାଏଲଟଙ୍କ ସମେତ ଅନ୍ୟ ସମସ୍ତଙ୍କୁ କ୍ୱାରେଣ୍ଟାଇନରେ ରଖାଯାଇଛି । ଅଷ୍ଟ୍ରେଲିଆ ଭାରତରେ କୋଭିଡ ୧୯ ସଂକ୍ରମଣକୁ ନଜରରେ ରଖି ୧୫ ମଇ ପର୍ଯ୍ୟନ୍ତ ଭାରତ ଓ ସିଡନୀ ମଧ୍ୟରେ ବିମାନ ଚଳାଚଳ ଉପରେ ପ୍ରତିବନ୍ଧକ ଲଗାଇଛି ।
ସୂଚନାଯୋଗ୍ୟ ଭାରତରେ କରୋନାର ଦ୍ୱିତୀୟ ପ୍ରବାହ କାୟା ବିସ୍ତାର କରି ସାରିଲାଣି । ଏଥିପାଇଁ ଭାରତରେ କରୋନା ଜନିତ ମୃତ୍ୟୁସଂଖ୍ୟା ମଧ୍ୟ ବଢୁଛି । ସ୍ଥିତିକୁ ଦୃଷ୍ଟିରେ ରଖି ଏକାଧିକ ରାଜ୍ୟରେ ଲକଡାଉନ ଘୋଷଣା କରାଯାଇଛି ।

ଉତ୍ତରପ୍ରଦେଶରେ କରୋନା ପିଡିତଙ୍କୁ ମିଳିଲାନି ଚିକିତ୍ସା, ୫୦ ହଜାର ଟଙ୍କା ଦେଇ ଆମ୍ବୁଲାନ୍ସରେ ଗଲେ…

ହୁଗଲି: ଦେଶରେ କରୋନା ସଂକ୍ରମଣ ଦିନକୁ ଦିନ ବଢୁଥିବା ବେଳେ ଉତ୍ତରପ୍ରଦେଶରେ ମଧ୍ୟ କରୋନାର କାୟା ଦେଖିବାକୁ ମିଳିଛି । କରୋନା ସଙ୍କଟ ବେଳେ ଅକ୍ସିଜେନର ଅଭାବ ପରିଲିକ୍ଷିତ ହୋଇଛି । ଏଭଳି ସମୟରେ ଉତ୍ତରପ୍ରଦେଶର ଅଯୋଧ୍ୟାରେ ରହୁଥିବା ଜଣେ ଦମ୍ପତି ଏକ ହୃଦୟ ବିଦାରକ ଦୃଶ୍ୟ ବଖାଣିଛନ୍ତି ।

ସୂଚନା ଅନୁଯାୟୀ, ଉତ୍ତରପ୍ରଦେଶ ବାସିନ୍ଦା ଜଣେ ଦମ୍ପତ୍ତି କୋଭିଡ ପଜିଟିଭ ଚିହ୍ନଟ ହୋଇଥିଲେ । କରୋନା ଆକ୍ରାନ୍ତ ସ୍ୱାମୀଙ୍କୁ ନିଶ୍ୱାସପ୍ରଶ୍ୱାସ ନେବାରେ ଅସୁବିଧା ହେଉଥିବା ବେଳେ ହସ୍ପିଟାଲରେ ଅକ୍ସିଜେନ୍ ସିଲିଣ୍ଡର ମିଳିପାରିନଥିଲା । ଏଭଳି ପରିସ୍ଥିତିରେ ସମ୍ପୃକ୍ତ ଦମ୍ପତ୍ତି ପଶ୍ଚିମବଙ୍ଗର ହୁଗୁଳିରେ ରହୁଥିବା ନିଜ ସମ୍ପର୍କୀୟଙ୍କ ସହ ଯୋଗାଯୋଗ କରିଥିଲେ । ସେମାନଙ୍କ ଠାରୁ ଆଶ୍ୱାସନା ପାଇବା ପରେ ସେ ସ୍ୱାମୀଙ୍କୁ ଆମ୍ବୁଲାନ୍ସରେ ଧରି ହୁଗୁଲିର ଚୁଚୁଡାରେ ପହଞ୍ଚିଥିଲେ । ଆଉ ଯେଉଁଥିପାଇଁ ତାଙ୍କୁ ଦେବାକୁ ପଡିଥିଲା ୫୦ ହଜାର ଟଙ୍କା ।

ଯେଉଁ ଜୀବନ ତାଙ୍କୁ ଉତ୍ତରପ୍ରଦେଶର ଡାକ୍ତରଖାନାରେ ମିଳିପାରିନଥିଲା ତାହା ଚୁୁଚୁଡାର ଅଜନ୍ତା କୋଭିଡ଼ ହସ୍ପିଟାଲ୍ ଦେଇଥିଲା । ଏନେଇ ପିଡିତ ଦମ୍ପତ୍ତି ଲାଲଜୀ ଓ ରେଖା ଯାଦବଙ୍କ ସମ୍ପର୍କୀୟ କହିଛନ୍ତି ଯେ ଉତ୍ତରପ୍ରଦେଶରେ ଚିକିତ୍ସା ବ୍ୟବସ୍ଥା ଏକପ୍ରକାର ଦୋହଲିଯାଇଛି । କରୋନା ମହାମାରୀ ସମୟରେ ସେଠାରେ ଲୋକଙ୍କୁ ସଠିକ୍ ଚିକିତ୍ସା ମିଳୁନଥିବା ବେଳେ ଜୀବନଦାୟୀ ଅକ୍ସିଜେନର ମଧ୍ୟ ମିଳୁନି ବୋଲି ସେ ଅଭିଯୋଗ କରିଛନ୍ତି ।

କରୋନା ସମୟରେ ରନ୍ଧାଖାଦ୍ୟର ଅର୍ଥ ପାଇନଥିବାରୁ ମହିଳା ସରପଞ୍ଚଙ୍କୁ ସଂଘବଦ୍ଧ ଆକ୍ରମଣ

କାମାକ୍ଷାନଗର: ମହିଳା ସରପଞ୍ଚଙ୍କୁ ସଂଘବଦ୍ଧ ଆକ୍ରମଣ। ସର୍ବସମ୍ମୁଖରେ ମହିଳା ସରପଞ୍ଚ ଓ ତାଙ୍କ ସ୍ବାମୀଙ୍କୁ ସଂଘବଦ୍ଧ ଆକ୍ରମଣ ଅଭିଯୋଗ। ଯାହାର ଏକ ଭିଡିଓ ସୋସିଆଲ ମିଡିଆରେ ଘୁରି ବୁଲୁଛି। ଢେଙ୍କାନାଳ ଜିଲ୍ଲା ପରଜଙ୍ଗ ବ୍ଲକ କଙ୍କିଳି ପଞ୍ଚାୟତର ମହିଳା ସରପଞ୍ଚ ରେଣୁବାଳା ପଲାଇଙ୍କୁ କଙ୍କିଳି ଗାଁର ଗୋଟିଏ ପରିବାରର ପାଞ୍ଚଜଣ ସଦସ୍ୟ ଘରୁ ଘୋଷାଡ଼ି ଘୋଷାଡ଼ି ସଂଘବଦ୍ଧ ଭାବେ ଆକ୍ରମଣକରି ମାଡ଼ ମାରିଥିବା ଅଭିଯୋଗ ହୋଇଛି। ଆକ୍ରମଣକାରୀମାନେ ସରପଞ୍ଚ ଓ ତାଙ୍କ ସ୍ବାମୀଙ୍କୁ ଜୀବନରେ ମାରିଦେବାକୁ ଧମକ ଦେଇଥିବା ମଧ୍ୟ ଅଭିଯୋଗ ହୋଇଛି।

ସୂଚନା ଅନୁସାରେ ଗତ କରୋନା ସମୟରେ ସରକାରଙ୍କ ତରଫରୁ ବିଭିନ୍ନ ପଞ୍ଚାୟତରେ ରନ୍ଧା ଖାଦ୍ୟ ବଣ୍ଟନ କରାଯାଉଥିଲା। କଙ୍କିଳି ପଞ୍ଚାୟତରେ ମଧ୍ୟ ଏକ ମହିଳା ଗୋଷ୍ଠୀକୁ ପଞ୍ଚାୟତ ତରଫରୁ ରନ୍ଧାଖାଦ୍ୟ ବଣ୍ଟନ ଦାୟିତ୍ୱ ଦିଆଯାଇଥିଲା। କିନ୍ତୁ ସେହି ଗୋଷ୍ଠୀ ଆଜି ପର୍ଯ୍ୟନ୍ତ ଅର୍ଥ ପାଇ ନଥିବା ଅଭିଯୋଗ କରି ସରପଞ୍ଚଙ୍କୁ ବାରମ୍ବାର ଅର୍ଥ ମାଗୁଥିଲେ। ସରପଞ୍ଚ ସେମାନଙ୍କୁ କିଛି ପଇସା ଦେଇ ଅବଶିଷ୍ଟ ବିଲ୍‌ ହେବା ପରେ ଦେବାକୁ କହି ଆସୁଥିଲେ। କିନ୍ତୁ ବାରମ୍ବାର ନିଜ ପଇସା ପାଇବାରୁ ବଞ୍ଚିତ ହେବାରୁ ଗତକାଲି ମହିଳା ଗୋଷ୍ଠୀର ସମ୍ପାଦିକା ଓ କିଛି ଲୋକ ସରପଞ୍ଚଙ୍କ ଘରକୁ ଯାଇ ତାଙ୍କୁ ପଇସା ଦେବା ସହ କରୋନା ସମୟରେ ଦିଆଯାଇଥିବା ଖାଦ୍ୟ ବିଲ ମାଗିଥିଲେ।

ସରପଞ୍ଚଙ୍କ ସ୍ୱାମୀ ସେମାନଙ୍କ ପାଖରେ ବିଲ ନାହିଁ ଓ ପଞ୍ଚାୟତ ସେକ୍ରେଟାରୀ ଆସିଲେ ବିଲ ଓ ଅନ୍ୟ ଖାଦ୍ୟ ଖର୍ଚ୍ଚର ବିବରଣୀ ଦେବାକୁ କହିଥିଲେ। ଯାହାକୁ ନେଇ ଉଭୟ ଗୋଷ୍ଠୀ ମଧ୍ୟରେ ବଚସା ହୋଇଥିଲା। ବଚସା ଫଳରେ ଉଭୟ ଗୋଷ୍ଠୀ ମଧ୍ୟରେ ହାତାହାତି ହୋଇଥିଲା। ଯାହାର ଏକ ଭିଡ଼ିଓ ସୋସିଆଲ ମିଡିଆରେ ଘୁରି ବୁଲୁଛି। ଏହି ଗଣ୍ଡଗୋଳକୁ ନେଇ ଉଭୟ ପକ୍ଷରୁ ପରଜଙ୍ଗ ଥାନାରେ ମାମଲା ରୁଜୁ କରାଯାଇଛି।

ସମସ୍ୟା ସମାଧାନ ନହେଲେ ପିପିଲି ଉପନିର୍ବାଚନରେ ଭୋଟ ବର୍ଜନ କରିବୁ: ଗ୍ରାମବାସୀ

ପିପିଲି: ସମସ୍ୟା ସମାଧାନ ନହେଲେ ଭୋଟ ବର୍ଜନ ଧମକ। ସମସ୍ୟା ସମାଧାନ ନହେଲେ ପିପିଲି ଉପନିର୍ବାଚନ ଭୋଟ ବର୍ଜନ କରିବେ ବୋଲି ନିଷ୍ପତ୍ତି ନେଇଛନ୍ତି ଗ୍ରାମବାସୀ ! ଏ ଅଭିଯୋଗ ଆସିଛି ପିପିଲି ତେଇଶପୁର ପଂଚାୟତ ନୂଆଗୋଡ଼ି ଗାଁରୁ। ନୂଆଗୋଡ଼ି ଗାଁ ବାଙ୍ଗରପଡ଼ା ମୌଜାର ୧୦୮ ଜଣ ଭୋଟର ଥିବାବେଳେ ସେମାନେ ଅନ୍ୟ ପଞ୍ଚାୟତରେ ଭୋଟ ଦେଇଆସୁଛନ୍ତି। ପଞ୍ଚାୟତ ଭୋଟ ନିଜ ଗାଁ ବୁଥରେ ମତଦାନ କରୁଥିବାବେଳେ ବିଧାନସଭା ପାଇଁ ଅନ୍ୟ ପଞ୍ଚାୟତକୁ ଯିବାକୁ ପଡୁଛି। ସହଜପୁରରେ ସେମାନେ ଭୋଟ ଦେଉଛନ୍ତି।

ତେଣୁ ପିପିଲି ଉପନିର୍ବାଚନ ପାଇଁ ନୂଆଗୋଡ଼ିରେ ବୁଥ କରିବା ପାଇଁ ସେମାନେ ପିପିଲି ବିଡିଓଙ୍କୁ ଭେଟି ଦାବିପତ୍ର ଦେଇଛନ୍ତି। ଯଦି ପ୍ରଶାସନ ସମସ୍ୟା ସମାଧାନ କରିବାରେ ଅସଫଳ ହୁଅନ୍ତି ତେବେ ଆଗାମୀ ପିପିଲି ଉପନିର୍ବାଚନ ବର୍ଜନ କରିବେ ବୋଲି ବାଙ୍ଗରପଡ଼ା ମୌଜାର ଅଧିବାସୀ ଧମକ ଦେଇଛନ୍ତି। ତେବେ ଏବେ ଖୁବ କମ ସମୟ ଥିବାରୁ ସମସ୍ୟାର ସମାଧାନ ସମ୍ଭବପର ନହୋଇପାରେ। ତଥାପି ଉପରିସ୍ଥ ଅଧିକାରୀଙ୍କ ସହ ଆଲୋଚନା କରି ସମସ୍ୟାର ସମାଧାନ ପାଇଁ ଚେଷ୍ଟା କରାଯିବ ବୋଲି କହିଛନ୍ତି ପିପିଲି ବିଡିଓ।

ରଥଯାତ୍ରା ପାଇଁ ପଞ୍ଚମ ପର୍ଯ୍ୟାୟରେ ବୌଦ୍ଧରୁ ଆସିଲା ୫୧ଖଣ୍ଡ ଅସନ ଓ ଧଉରା କାଠ

ପୁରୀ: ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ପଞ୍ଚମ ପର୍ଯ୍ୟାୟରେ ବୌଦ୍ଧରୁ ୫୧ଖଣ୍ଡ ଅସନ ଓ ଧଉରା କାଠ ଆସି ପହଞ୍ଚିଛି। ସକାଳେ ଚତୁର୍ଥ ପର୍ଯ୍ୟାୟରେ ୪୫ଖଣ୍ଡ କାଠ ଆସିଥିଲା। ଗତକାଲି ନୟାଗଡ ବନଖଣ୍ଡରୁ ତୃତୀୟ ପର୍ଯ୍ୟାୟରେ ୧୭ଟି ଧଉରା ଓ ଅସନ କାଠ ଆସିଥିଲା। ଚଳିତବର୍ଷ ରଥଯାତ୍ରା ପାଇଁ ମୋଟ ୮୬୫ ଖଣ୍ଡ କାଠ ଆବଶ୍ୟକ ଥିବାବେଳେ ପୂର୍ବ ବର୍ଷର ୬୯ ଖଣ୍ଡ କାଠ ବଳକା ରହିଛି। ତେଣୁ ଚଳିତ ରଥଯାତ୍ରା ପାଇଁ ୭୯୬ ଖଣ୍ଡ କାଠର ଆବଶ୍ୟକତା ରହିଛି। ତେବେ ୭୯୭ ଖଣ୍ଡରୁ ଆଜି ପର୍ଯ୍ୟନ୍ତ ମୋଟ ୧୭୫ଖଣ୍ଡ କାଠ ପୁରୀରେ ପହଞ୍ଚିଥିବା ବେଳେ ବଳକା କାଠ ପର୍ଯ୍ୟାୟ କ୍ରମେ ଆସି ପହଞ୍ଚିବ। ଖପୁରିଆ କରତକଳକୁ ୩୬୦ଖଣ୍ଡ କାଠ ପଠାଯାଇ ସାରିଛି। ଗତ ସରସ୍ୱତୀ ପୂଜା ଦିନ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟ ସମ୍ମୁଖରେ ତିନୋଟି କାଠକୁ ପାରମ୍ପରିକ ବିଧିରେ ପୂଜାର୍ଚ୍ଚନା କରାଯାଇଥିଲା। ଆସନ୍ତା ଅକ୍ଷୟ ତୃତୀୟା ଦିନ ତିନି ରଥ ନିର୍ମାଣର ଶୁଭାରମ୍ଭ ହେବାର ବିଧି ରହିଛି। ତିନିରଥ ନିର୍ମାଣ ପାଇଁ ପରମ୍ପରା ଅନୁଯାୟୀ ଶ୍ରୀରାମ ନବମୀ ଠାରୁ କଟକ ସ୍ଥିତ ଖପୁରିଆ କରତକଳରେ ରଥକାଠ ଚିରଟ ପ୍ରକ୍ରିୟା ଆରମ୍ଭ ହୋଇଛି।

ପିପିଲି ଉପ ନିର୍ବାଚନ ପୂର୍ବରୁ ତୁଟୁଛି ଭରସା, ବିଜେଡିରେ ସାମିଲ୍ ହେଲେ ୪ ଗ୍ରାମପଞ୍ଚାୟତର କଂଗ୍ରେସ କମିଟି ସଭାପତି

ଭୁବନେଶ୍ୱର: ମେ ୧୬ରେ ହେବାକୁ ଯାଉଛି ପିପିଲି ଉପନିର୍ବାଚନ। ଆଉ ଏଥିପାଇଁ ପ୍ରସ୍ତୁତ ଏବେ ବିଜେପି ବିଜେଡି ଏବଂ କଂଗ୍ରେସ। ହେଲେ ପିପଲି ଉପନିର୍ବାଚନରେ ଦଳ ଆମର ପୁରା ପ୍ରସ୍ତୁତ ଅଛି ବୋଲି କଂଗ୍ରେସ କହୁଥିବା ବେଳେ କଂଗ୍ରେସ କର୍ମୀ ଆସି ବିଜେଡିରେ ମିଶିଛନ୍ତି। ଯାହାପରେ ବିଜେଡିର ଶକ୍ତି ବଢ଼ିବାରେ ଲାଗିଛି। ପିପିଲି ନିର୍ବାଚନ ମଣ୍ଡଳୀର ୪ଟି ଗ୍ରାମପଞ୍ଚାୟତର କଂଗ୍ରେସ କମିଟି ସଭାପତି ଆଜି ବିଜୁ ଜନତା ଦଳରେ ସାମିଲ୍ ହୋଇଛନ୍ତି। ପିପିଲି ବ୍ଲକ ଅନ୍ତର୍ଗତ ସରସ୍ୱତୀପୁର ଗ୍ରାମପଞ୍ଚାୟତର କଂଗ୍ରେସ କମିଟି ସଭାପତି ବାଲୁଙ୍କେଶ୍ୱର ମହାପାତ୍ର, ରୁପୁଦେଈପୁର ଗ୍ରାମପଞ୍ଚାୟତର କଂଗ୍ରେସ କମିଟି ସଭାପତି ନୃସିଂହ ବେହେରା, ଯଶୁଆପୁର ଗ୍ରାମପଞ୍ଚାୟତର କଂଗ୍ରେସ କମିଟି ସଭାପତି କାଳୁଚରଣ ପ୍ରଧାନ ଏବଂ ରଥ-ପୁରୁଷୋତ୍ତମପୁର ଗ୍ରାମପଞ୍ଚାୟତର କଂଗ୍ରେସ କମିଟି ସଭାପତି ଜୟନ୍ତ କୁମାର ପରିଡ଼ା ଆଜି ବିଜେଡ଼ିରେ ଯୋଗ ଦେଇଛନ୍ତି। ଏମାନଙ୍କ ସହ ଶତାଧିକ କଂଗ୍ରେସ କର୍ମୀ ମଧ୍ୟ ବିଧିବଦ୍ଧ ଭାବେ ବିଜୁ ଜନତା ଦଳରେ ସାମିଲ୍ ହୋଇଛନ୍ତି। ମନ୍ତ୍ରୀ ସମୀର ରଞ୍ଜନ ଦାଶଙ୍କ ନେତୃତ୍ୱରେ ଅନୁଷ୍ଠିତ ଆଜିର ଏହି ମିଶ୍ରଣ ପର୍ବରେ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓ ବିଧାୟକ ପ୍ରତାପ କେଶରୀ ଦେବ ଉପସ୍ଥିତ ଥିଲେ।