ଭୁବନେଶ୍ୱର: ରାଜ୍ୟରେ ଦିନକୁ ଦିନ ବଢିବାରେ ଲାଗିଛି କରୋନା ଟିକା ସଂକଟ । ଟିକା ନଥିବାରୁ ୧୧ଟି ଜିଲ୍ଲାରେ ଟିକାକରଣ ବନ୍ଦ ହୋଇଛି । ୧୫୭୯ଟି କେନ୍ଦ୍ରରୁ ୫୦୩ଟି ରେ ଚାଲିଛି ଟିକାକରଣ । ଏବେ ମାତ୍ର ଅଢ଼େଇ ଲକ୍ଷ କୋଭାକ୍ସିନ ଓ ୨ଲକ୍ଷ ୪୦ ହଜାର କୋଭିସିଲ୍ଡ ଟିକା ମହଜୁଦ ରହିଛି । ଯଦି କେନ୍ଦ୍ର ସରକାର ତୁରନ୍ତ ଆଉ ଟିକା ନ ଦିଅନ୍ତ ତେବେ ଆହୁରି ଟିକା କେନ୍ଦ୍ରେ ତାଲା ଝୁଲିବ ଏଥିରେ କୌଣସି ସନ୍ଦେହ ନାହିଁ । ଏହାକୁ ଆଖି ଆଗରେ ରଖି ସରକାର ଖୁବ ଶୀଘ୍ର ଟିକା ଦେବାକୁ ଦାବି ହୋଇଛି । ଯେଉଁ ସ୍ଥାନରେ ଅଧିକ ମାତ୍ରାରେ ସଂକ୍ରମିତ ହେଉଛି, ସେହି ସ୍ଥାନରେ ଟିକାକରଣକୁ ଜୋରଦାର କରାଯାଉଛି । ଦେଶରେ ଯେତିକି ଟିକା ଆବଶ୍ୟକ, ସେତିକି ଟିକା ନାହିଁ । ଯାହାଫଳରେ କେବଳ ଓଡ଼ିଶା ନୁହଁ, ଅନ୍ୟ ରାଜ୍ୟରେ ମଧ୍ୟ ଟିକାର ଅଭାବ ଦେଖାଦେଲାଣି । ଏଥି ପାଇଁ କେନ୍ଦ୍ର ସରକାର ଯଥେଷ୍ଟ ଦୃଷ୍ଟି ଦେବାର ଆବଶ୍ୟକତା ରହିଛି ।
ମହାରାଷ୍ଟ୍ରରେ ଲାଗୁ ହେଲା ୧୪୪ ଧାରା, ଅମାନିଆ ହେଲେ କଡ଼ା କାର୍ଯ୍ୟାନୁଷ୍ଠାନ
ମୁମ୍ବାଇ: ପୁଣି କଲବଲ କଲାଣି କରୋନା। ଦେଶରେ ଦୈନିକ ସଂଖ୍ୟା ବଢୁଥିବାବେଳେ ମୃତ୍ୟୁ ସଂଖ୍ୟା ମଧ୍ୟ ବଢିବାରେ ଲାଗିଛି । ସ୍ଥିତି ଏଭଳି ହୋଇଛି ପ୍ରଥମ ଲହର ଠାରୁ ଦ୍ୱିତୀୟ ଲହର ଅଣାୟତ୍ତ ରହିଛି। ପୂର୍ବ ଥର ଭଳି ଏଥର ମଧ୍ୟ ଅଧିକ ପ୍ରଭାବିତ ହୋଇଛି ମହାରାଷ୍ଟ୍ର। ପରିସ୍ଥିତିକୁ ନଜରରେ ରଖି ଜନତା କର୍ଫ୍ୟୁ ଲାଗୁ କରିଛନ୍ତି ମହାରାଷ୍ଟ୍ର ସରକାର। ଗତକାଲି ରାତି ୮ଟାରୁ ୧୫ ଦିନ ପାଇଁ ପୂରା ରାଜ୍ୟରେ ଲାଗୁ ହୋଇଛି ୧୪୪ ଧାରା ।
କର୍ଫ୍ୟୁ ସମୟରେ ବିନା କାରଣରେ କେହି ବି ରାସ୍ତାକୁ ନ ବାହାରିବାକୁ କୁହାଯାଇଛି। ତେବେ ଏହି ସମୟରେ ଇ-କର୍ମସ, ମେଡିକାଲ, ବ୍ୟାଙ୍କ ଓ ପେଟ୍ରୋଲ ପମ୍ପ ଆଦି ଜରୁରିକାଳୀନ ସେବା ଜାରି ରହିବ। ପ୍ରିଣ୍ଟ, ଇଲେକ୍ଟ୍ରୋନିକ ଗଣମାଧ୍ୟମ ପ୍ରତିନିଧିଙ୍କ ଯିବା ଆସିବାରେ କୌଣସି କଟକଣା ଲାଗୁ ହୋଇନାହିଁ। ହୋଟେଲ, ରେଷ୍ଟୁରାଣ୍ଟ ସହ ଧର୍ମାନୁଷ୍ଠାନ ମଧ୍ୟ ବନ୍ଦ ରହିବ। ଘରୋଇ ଓ ସରକାରୀ କାର୍ଯ୍ୟାଳୟ ଖୋଲା ରହୁଥିବା ବେଳେ ଅଳ୍ପ କର୍ମଚାରୀଙ୍କୁ ନେଇ କାମ କରିବାକୁ ପରାମର୍ଶ ଦିଆଯାଇଛି। ଏହା ବ୍ୟତୀତ ଯଦି ଜରୁରୀ ସାମଗ୍ରୀ ଦୋକାନରେ ଭିଡ଼ ହେବ କିମ୍ବା ମାସ୍କ ଓ ସାମାଜିକ ଦୂରତା ନିୟମ ଉଲଙ୍ଘନ ହେବ ତେବେ ପୋଲିସ ଏହାକୁ ବନ୍ଦ କରିପାରିବ। ଏହାବ୍ୟତୀ ବାହାଘର କିମ୍ବା ଅନ୍ୟାନ୍ୟ କିଛି ସମାରୋହ ଉପରେ ମଧ୍ୟ କଡ଼ା ନଜର ରଖିବାକୁ ନିର୍ଦ୍ଦେଶ ଦେଇଛନ୍ତି ଉଦ୍ଧବ ସରକାର। ବର୍ତ୍ତମାନ ମହାରାଷ୍ଟ୍ରରେ କେବଳ ୨୫ ଜଣଙ୍କୁ ବିବାହ କାର୍ଯ୍ୟକ୍ରମରେ ଯୋଗ ଦେବାକୁ ଅନୁମତି ଦିଆଯାଇଛି।
ସେହିଭଳି ରାଜସ୍ଥାନ ସରକାର ବଢୁଥିବା ସଂକ୍ରମଣକୁ ଆଖି ଆଗରେ ରଖି ବଡ଼ ନିଷ୍ପତ୍ତି ନେଇଛନ୍ତି। ସନ୍ଧ୍ୟା ୫ଟାରୁ ବନ୍ଦ ହେବ ଦୋକାନବଜାର। ସନ୍ଧ୍ୟା ୬ରୁ ଭୋର ୬ଟା ପର୍ଯ୍ୟନ୍ତ ନାଇଟ୍ କର୍ଫ୍ୟୁ ଲାଗୁ କରାଯାଇଛି। ଏପ୍ରିଲ୍ ୩୦ ତାରିଖ ପର୍ଯ୍ୟନ୍ତ ଏହି କଟକଣା ବଳବତ୍ତର ରହିବ। ଦିଲ୍ଲୀ, ଗୁଜରାଟ, ଉତ୍ତର ପ୍ରଦେଶ, ମଧ୍ୟ ପ୍ରଦେଶ, ଛତିଶଗଡ଼ ଓ ପଞ୍ଜାବରେ କରୋନା ତାର ସ୍ଥିତି ଜାହିର କରିବାରେ ଲାଗିଛି।
ମୁଖ୍ୟ ଶାସନ ସଚିବଙ୍କ ସୁନ୍ଦରଗଡ଼ ଜିଲ୍ଲା ଗସ୍ତ: କୋଭିଡ୍ ମୁକାବିଲା ନେଇ ପ୍ରସ୍ତୁତିର କଲେ ସମୀକ୍ଷା
ରାଉରକେଲା: ବୁଧବାର ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଏବଂ ରାଜ୍ୟସ୍ତରୀୟ ବରିଷ୍ଠ ଅଧିକାରୀ ସ୍ଵାସ୍ଥ୍ୟ ବିଭାଗର ନିର୍ଦ୍ଦେଶକ ଡାକ୍ତର ବିଜୟ କୁମାର ମହାପାତ୍ର, ଡିଏମଇଟି ଡାକ୍ତର ସିବିକେ ମହାନ୍ତିଙ୍କ ସହିତ ରାଉରକେଲା ସହର ଏବଂ ସୁନ୍ଦରଗଡ଼ ଜିଲ୍ଲାର କୋଭିଡ୍ ସ୍ଥିତି ଓ ଏହାର ପରିଚାଳନା ପାଇଁ ପ୍ରସ୍ତୁତି ଅନୁଧ୍ୟାନ କରିଛନ୍ତି ।
ରାଜ୍ୟ ସରକାରଙ୍କ ଏହି ଉଚ୍ଚସ୍ତରୀୟ ଟିମ୍ ରାଉରକେଲାରେ ପହଞ୍ଚି ଜେ .ପି କୋଭିଡ୍ ହସ୍ପିଟାଲ ପରିଦର୍ଶନ କରିବା ସହିତ ହାଇଟେକ୍ କୋଭିଡ୍ ହସ୍ପିଟାଲ, ଶାନ୍ତି ମେମୋରିଆଲ କୋଭିଡ୍ ହସ୍ପିଟାଲ, ଏନଟିପିସି କୋଭିଡ୍ ସେଣ୍ଟରରେ ଉପଲବ୍ଧ ଚିକିତ୍ସା ସୁବିଧା, ଉପକରଣ ଓ ଔଷଧପତ୍ର ଆଦି ବିଷୟରେ ସମୀକ୍ଷା କରିଥିଲେ। ରାଉରକେଲା ମହାନଗର ନିଗମର ସମ୍ମିଳନୀ କକ୍ଷରେ ଅନୁଷ୍ଠିତ ସମୀକ୍ଷା ବୈଠକରେ ଜିଲ୍ଲାପାଳ ନିଖିଲ ପବନ କଲ୍ୟାଣ ଏବଂ ଜିଲ୍ଲାସ୍ତରୀୟ ଅଧିକାରୀମାନେ କୋଭିଡ୍ ସମ୍ପର୍କିତ କ୍ଷେତ୍ର ସ୍ତରୀୟ ସ୍ଥିତି ଓ ତଥ୍ୟ ଉପାସ୍ଥାପନ କରିଥିଲେ।
ସମୀକ୍ଷା ପରେ ଗଣମାଧ୍ୟମ ପ୍ରଶ୍ନର ଉତ୍ତର ଦେଇ ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର କହିଛନ୍ତି ଯେ, ସୁନ୍ଦରଗଡ଼ ଜିଲ୍ଲାରେ କୋଭିଡ୍ ସଂକ୍ରମଣକୁ ରୋକିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ସଂକ୍ରମିତ ବ୍ୟକ୍ତିଙ୍କୁ ଉପଯୁକ୍ତ ଚିକିତ୍ସା ଯୋଗାଇ ଦେବା ପାଇଁ କୋଭିଡ୍ ହସ୍ପିଟାଲରେ ଆବଶ୍ୟକ ବେଡ୍, ଆଇସିୟୁ ଏବଂ ଅକ୍ସିଜେନର ବ୍ୟବସ୍ଥା କରାଯାଇଛି। ରାଉରକେଲାରେ ଥିବା ଜେ ପି ହସ୍ପିଟାଲରେ ୨୫୦ଟି ବେଡ୍ କୋଭିଡ୍ ଚିକିତ୍ସା ପାଇଁ ରଖାଯାଇଛି। ସୁନ୍ଦରଗଡ଼ସ୍ଥିତ ଏନଟିପିସି ମେଡିକାଲ କଲେଜ ଏବଂ ହସ୍ପିଟାଲରେ କୋଭିଡ୍ ରୋଗୀଙ୍କ ପାଇଁ ୪୦୦ ଶଯ୍ୟା ରହିଛି। ସେହିପରି ରାଉରକେଲାସ୍ଥିତ ହାଇଟେକ କୋଭିଡ୍ ହସ୍ପିଟାଲକୁ ଖୁବଶୀଘ୍ର କୋଭିଡ୍ ଆକ୍ରାନ୍ତଙ୍କ ପାଇଁ ଖୋଲାଯିବ। ଏହାଛଡ଼ା ସୁନ୍ଦରଗଡ଼ ଜିଲ୍ଲାରେ କୋଭିଡ୍ କେୟାର ସେଂଟରଗୁଡ଼ିକରେ ୧ ହଜାରରୁ ଅଧିକ ବେଡର ବ୍ୟବସ୍ଥା କରାଯାଇଛି। ଜିଲ୍ଲାରେ କୋଭିଡ୍ ସଂକ୍ରମଣର ପ୍ରତିରୋଧ ନିମନ୍ତେ କୋଭିଡ୍ ନିୟମଗୁଡ଼ିକୁ କଡ଼ାକଡ଼ି ଭାବେ ପ୍ରବର୍ତ୍ତନ କରାଯିବ ଏବଂ ଉଲ୍ଲଂଘନକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। ଏହାଛଡ଼ା ଟେଷ୍ଟିଂ, ଟ୍ରାକିଂ ଓ ଟ୍ରିଟମେଣ୍ଟକୁ ଅଧିକ ବ୍ୟାପକ କରାଯିବ। ଆବଶ୍ୟକସ୍ଥଳେ ଜିଲ୍ଲା ପ୍ରଶାସନ ମାଇକ୍ରୋ କଣ୍ଟେନମେଣ୍ଟ ଜୋନ୍ ମଧ୍ୟ କରିପାରିବେ।
ଏହି ଗସ୍ତ ଓ ସମୀକ୍ଷା ସମୟରେ ରାଉରକେଲା ବିଧାୟକ ତଥା ଜିଲ୍ଲା ଯୋଜନା କମିଟିର ଅଧ୍ୟକ୍ଷ ସାରଦା ପ୍ରସାଦ ନାୟକ, ଅତିରିକ୍ତ ଜିଲ୍ଲାପାଳ ଆବୋଲି ସୁନିଲ ନରୱଣେ, ଆରଏମସି କମିଶନର ଦିବ୍ୟଜ୍ୟୋତି ପରିଡ଼ା, ରାଉରକେଲା ଏସପି ମୁକେଶ ଭାମୋ, ସିଡିଏମଓ ଡାକ୍ତର ସରୋଜ କୁମାର ମିଶ୍ର, ଆରଏସପି ସିଇଓ ଦୀପକ ଚଟ୍ଟରାଜଙ୍କ ସହିତ ଆରଜିଏଚ, ଆଇଜିଏଚ, ଶାନ୍ତି ମେମୋରିଆଲ ହସ୍ପିଟାଲ, ହାଇଟେକ୍ ହସ୍ପିଟାଲ, ଆରଏସପିର ବରିଷ୍ଠ ଅଧିକାରୀ ଏବଂ ଜିଲ୍ଲା ସ୍ୱାସ୍ଥ୍ୟ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
ଗଛରେ ପିଟି ହେଲା କାର୍: ଚାଳକ ମୃତ, ଅନ୍ୟ ଜଣେ ଗୁରୁତର
ବ୍ରହ୍ମପୁର: ଗଞ୍ଜାମ ଜିଲ୍ଲା କୋଦଳା ଥାନା ଅନ୍ତର୍ଗତ ନୂତନ ବ୍ରହ୍ମପୁର ନିକଟରେ ଦୁର୍ଘଟଣା । ଆଜି ବିଳମ୍ବିତ ସନ୍ଧ୍ୟାରେ ଗୋଟିଏ କାର ଗଛକୁ ଧକ୍କା ଦେବା ଫଳରେ ଚାଳକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ତାଳପଡ଼ା ଗାଁର ସୁନିଲ କୁମାର ଭୂୟାଁ ପୁସ୍ତପୁର ଗାଁରେ ଏକ ଦୋକାନ କରିଛନ୍ତି । ଆଜି ସନ୍ଧ୍ୟାରେ ଦୋକାନ ବନ୍ଦ କରି ପୁସ୍ତପୁର ଗାଁରୁ ରାହୁଲ ଘୋଷଙ୍କ ସହ ଏକ କାର(ଓଆର ୦୨ ବିଏଚ ୭୯୪୫) ଯୋଗେ ପୁସ୍ତପୁରରୁ ଖଲ୍ଲିକୋଟ ଅଭିମୁଖେ ଆସୁଥିବା ବେଳେ ନୂତନ ବ୍ରହ୍ମପୁର ନିକଟରେ ରାସ୍ତା ପାର୍ଶ୍ବରେ ଥିବା ଏକ ଗଛକୁ ଜୋରରେ ପିଟି ହୋଇଥିଲେ । ଘଟଣାସ୍ଥଳରେ ଚାଳକ ରାହୁଲ ଘୋଷଙ୍କ ମୃତ୍ୟୁ ଘଟିଥିବା ବେଳେ କାରରେ ବସିଥିବା ସୁନୀଲ ଗୁରୁତର ଆହତ ହୋଇଥିଲେ । ଦୁର୍ଘଟଣା ଏତେ ଭୟଙ୍କର ଥିଲା ଯେ ଗଛକୁ ପିଟିଲା ପରେ ଚାଳକ କାର ଭିତରେ ଚାପି ହୋଇ ରହିଯାଇଥିଲେ । ଖବରପାଇ ବେଗୁନିଆପଡ଼ା ପୋଲିସ ଘଟଣା ସ୍ଥଳରେ ପହଞ୍ଚିଥିଲା । ଖଲ୍ଲିକୋଟ ଦମକଳ ବାହିନୀ ପହଞ୍ଚି ବହୁ କଷ୍ଟ ରେ ମୃତଦେହ କାର ମଧ୍ୟରୁ ବାହାର କରିଥିଲେ ।ଗୁରୁତର ଆହତ ହୋଇ ଥିବା ସୁନୀଲ ଙ୍କୁ ଖଲ୍ଲିକୋଟ ମେଡ଼ିକାଲ ରେ ପ୍ରାଥମିକ ଚିକିତ୍ସା ପରେ ବ୍ରହ୍ମପୁର ଏମକେସିଜି କୁ ସ୍ଥାନାନ୍ତର କରାଯାଇଛି ।
ରାଜ୍ୟ ସ୍ୱାସ୍ଥ୍ୟ ସେବା କ୍ଷେତ୍ରରେ ଐତିହାସିକ ଦିନ: କ୍ୟାନସର୍ ହସ୍ପିଟାଲ ପାଇଁ ବୁଝାମଣା ପତ୍ର ସ୍ୱାକ୍ଷର
ଭୁବନେଶ୍ୱର: ରାଜ୍ୟ ସ୍ୱାସ୍ଥ୍ୟ ସେବା କ୍ଷେତ୍ରରେ ଐତିହାସିକ ଦିନ । ରାଜ୍ୟ ସରକାର ଏବଂ ଶ୍ରୀଶଙ୍କର କ୍ୟାନସର ଇନ୍ଷ୍ଟିଚ୍ୟୁଟ୍ କରୁଣାଶ୍ରୟ ପାଲିଏଟିଭ୍ କେୟାର ସେଣ୍ଟର ଏବଂ ସୁସ୍ମିତା ବାଗଚୀ ମଧ୍ୟରେ ଭୁବନେଶ୍ୱରେ କ୍ୟାନସର ହସ୍ପିଟାଲ ସ୍ଥାପନ ନେଇ ବୁଝାମଣା ପତ୍ର ସ୍ୱାକ୍ଷରିତ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ଏହି ବୁଝାମଣା ପତ୍ର ସ୍ୱାକ୍ଷରିତ ହୋଇଛି । ଅପରପକ୍ଷରେ ସୁସ୍ମିତା ବାଗଚୀ ଏବଂ ସୁବ୍ରତୋ ବାଗଚୀଙ୍କ ଏହି ସହଯୋଗ ପାଇଁ ଶୁଭେଚ୍ଛା ଜଣାଇଛନ୍ତି ରାଜ୍ୟ ମୁଖ୍ୟ ଶାସନ ସଚିବ ।
ସୂଚନା ଯୋଗ୍ୟ ଯେ, ରାଜଧାନୀ ଭୁବନେଶ୍ୱରେ ପ୍ରତିଷ୍ଠା ହେବ ଅତ୍ୟାଧୁନିକ କ୍ୟାନସର ହସ୍ପିଟାଲ । ବାଗ୍ଚୀ-ଶ୍ରୀଶଙ୍କର କର୍କଟ ହସ୍ପିଟାଲ ଏବଂ ଗବେଷଣା କେନ୍ଦ୍ର ପ୍ରତିଷ୍ଠା ପ୍ରସ୍ତାବକୁ ଅନୁମୋଦନ କରିଛି ରାଜ୍ୟ କ୍ୟାବିନେଟ୍ । ୨୦୨୪ ସୁଦ୍ଧା ଏହି ହସ୍ପିଟାଲ କାର୍ଯ୍ୟକ୍ଷମ ହେବ । ପ୍ରାଥମିକ ପର୍ଯ୍ୟାୟରେ ୨୫୦ ଶଯ୍ୟାରେ ରୋଗୀଙ୍କୁ ଚିକିତ୍ସା ସେବା ମିଳିବ । ପରେ ଏହା ୫ଶହ ଶଯ୍ୟାକୁ ସମ୍ପ୍ରସାରିତ ହେବ । ଏହି କ୍ୟାନସର ହସ୍ପିଟାଲ ପାଇଁ ସୁବ୍ରୋତ ବାଗଚୀ ଓ ସୁସ୍ମିତା ବାଗଚୀ ୨୧୦ କୋଟି ଟଙ୍କା ସହାୟତା କରିବେ । ସେହିପରି ଭୁବନେଶ୍ୱରରେ କରୁଣାଶ୍ରୟ ପାଲିଏଟିଭ୍ କେୟାର ସେଣ୍ଟର ମଧ୍ୟ ପ୍ରତିଷ୍ଠା ହେବ । ପ୍ରଥମ କରି ରାଜ୍ୟରେ ପ୍ରତିଷ୍ଠା ହେଉଥିବା ଏହି ଅନୁଷ୍ଠାନ ପାଇଁ ବାଗଚୀ ଦମ୍ପତି ୧୩୦ କୋଟି ଦେବେ । ଏ ଦୁଇ ସ୍ୱାସ୍ଥ୍ୟସେବା ଅନୁଷ୍ଠାନ ପାଇଁ ସୁବ୍ରତୋ ବାଗଚୀ ଓ ସୁସ୍ମିତା ବାଗଚୀ ମୋଟ ୩ଶହ ୪୦ କୋଟି ଟଙ୍କା ଅନୁଦାନ ଦେବେ । ଏହି କ୍ୟାନସର ହସ୍ପିଟାଲ ନିର୍ମାଣ ହେବା ପରେ ରାଜ୍ୟରେ ହଜାର ହଜାର ସଂଖ୍ୟାରେ ରୋଗୀ ଉପକୃତ ହେବେ ।
ହାଇକୋର୍ଟଙ୍କ ଭର୍ତ୍ସନା ପରେ ଆକ୍ସନ ମୋଡରେ EC, ପଶ୍ଚିମବଙ୍ଗ ଭୋଟ୍ ପ୍ରଚାରକୁ ନେଇ ୧୬ ଏପ୍ରିଲରେ ସର୍ବଦଳୀୟ ବୈଠକ
କୋଲକତା: ପଶ୍ଚିମବଙ୍ଗର ୮ ପର୍ଯ୍ୟାୟ ଭୋଟରୁ ୪ ପର୍ଯ୍ୟାୟ ମତଦାନ ସରିଯାଇଛି । ତେବେ ଅଧା ନିର୍ବାଚନ ସରିବା ପରେ ନିର୍ବାଚନ ଆୟୋଗ କରୋନାକୁ ନେଇ ହଠାତ ସତର୍କ ହୋଇଛନ୍ତି । କୋଲକତା ହାଇକୋର୍ଟଙ୍କ ଭର୍ତ୍ସନା ପରେ ଆୟୋଗ ଏପ୍ରିଲ ୧୬ ତାରିଖ ଦିନ ସର୍ବଦଳୀୟ ବୈଠକ ଡକାଇଛନ୍ତି । ଏହି ବୈଠକରେ ସବୁ ରାଜନୈତିକ ଦଳ ପ୍ରଚାର ଓ ରାଲିରେ କୋଭିଡ୍ ଗାଇଡ୍ ଲାଇନକୁ ପାଳନ କରୁଛନ୍ତି କି ନାହିଁ ତାହା ଉପରେ ଆଲୋଚନା ହେବ ।
ସୂଚନାଯୋଗ୍ୟ ଯେ, ମଙ୍ଗଳବାର ଦିନ କୋଲକତା ହାଇକୋର୍ଟ ନିର୍ବାଚନ ଆୟୋଗଙ୍କୁ ତାଗିଦ କରିଥିଲେ । ପ୍ରଚାର କାଳରେ ରାଜନୈତିକ ଦଳ ଯେପରି କୋଭିଡ୍ ଗାଇଡ୍ ଲାଇନକୁ ପାଳନ କରିବେ ତାକୁ ସୁନିଶ୍ଚିତ କରିବାକୁ ଅଦାଲତ ଆୟୋଗଙ୍କୁ କହିଥିଲେ ।
ହାଇକୋର୍ଟ ନିଜ ଆଭିମୁଖ୍ୟକୁ କଠୋର କରି ସବୁ ଜିଲାର ଡିଏମଙ୍କୁ ରାଜନୈତିକ ରାଲି ଉପରେ ନଜର ରଖିବାକୁ କହିଥିଲେ। ଏପରିକି ଆବଶ୍ୟକ ହେଲେ ସାମାଜିକ ଦୂରତା ପାଳନ ପାଇଁ ୧୪୪ ଧାରା ଲାଗୁ କରିବାକୁ ମଧ୍ୟ କହିଥିଲେ। ସୂଚନାଯୋଗ୍ୟ ଯେ,ପ୍ରଚାର ଓ ରାଲି ସମୟରେ କୋଭିଡ୍ ଗାଇଡ ଲାଇନକୁ ପାଳନ କରାଯାଉ ନଥିବା ଦେଖିବାକୁ ମିଳୁଛି । ଅନ୍ୟ ରାଜ୍ୟଙ୍କ ଭଳି ପଶ୍ଚିମବଙ୍ଗରେ ମଧ୍ୟ କରୋନା ସଂକ୍ରମଣ ମାମଲାରେ ବୃଦ୍ଧି ପରିଲକ୍ଷିତ ହୋଇଛି । ଏହାକୁ ଦୃଷ୍ଟିରେ ରଖି ହାଇକୋର୍ଟ କହିଥିଲେ ଯେ, କରୋନା ସଂକ୍ରମଣ ରୋକିବା ପାଇଁ ପଦକ୍ଷେପ ନେବା ଦାୟିତ୍ୱ ଜିଲ୍ଲାଧିକାରୀ ଓ ନିର୍ବାଚନ ଅଧିକାରୀଙ୍କର । ତେଣୁ ସେମାନଙ୍କୁ ସମସ୍ତ ପଦକ୍ଷେପ ନେବାକୁ ପଡିବ।
ଆବଶ୍ୟକ ହେଲେ ଧାରା ୧୪୪ ଲାଗୁ କର
ଅଦାଲତ କହିଥିଲେ ଯେ, କରୋନାର ଭୟାବହତାକୁ ଦୃଷ୍ଟିରେ ଯଦି ଆବଶ୍ୟକ ହୁଏ ତେବେ ୧୪୪ ଧାରା ଲାଗୁ କର। ଏହି ସମୟରେ ମାସ୍କ ପିନ୍ଧିବା ଅନିବାର୍ଯ୍ୟ ହେଉ। ସବୁ ସ୍ଥାନରେ ସାନିଟାଇଜର ବ୍ୟବସ୍ଥା ହେଉ । ସାମାଜିକ ଦୂରତା ବ୍ୟବସ୍ଥା ଯେକୌଣସି ପରିସ୍ଥିତିରେ ମଧ୍ୟ ଲାଗୁ ହେଉ।
କରୋନା ଟିକା ଅଭାବ ପ୍ରସଙ୍ଗ: ପ୍ରଡକ୍ସନ ବୃଦ୍ଧି ପାଇଁ କେନ୍ଦ୍ର ସରକାରଙ୍କ ଆଦେଶ
ନୂଆଦିଲ୍ଲୀ: ଦେଶରେ କରୋନା ମହାମାରିର ଦ୍ୱିତୀୟ ପର୍ଯ୍ୟାୟ ମଧ୍ୟରେ ଟିକାର ଘୋର ଅଭାବ ଦେଖା ଦେଇଛି। ଏହାମଧ୍ୟରେ କେନ୍ଦ୍ର ସରକାର ରେମଡେସିଭିର ଇଂଜକସନ ତିଆରି କରୁଥିବା ଦେଶର ୭ କମ୍ପାନୀଙ୍କୁ ଉତ୍ପାଦନ ବୃଦ୍ଧି ପାଇଁ ଆଦେଶ ଦେଇଛନ୍ତି। ନିକଟରେ କେନ୍ଦ୍ର ସରକାର ଓ ଏହି କମ୍ପାନୀ ଗୁଡିକର ଅଧିକାରୀଙ୍କ ସହିତ ହୋଇଥିବା ଆଲୋଚନା କାଳରେ ଏହି ନିଷ୍ପତ୍ତି ନିଆଯାଇଛି । ବୈଠକରେ ଉତ୍ପାଦନ ବୃଦ୍ଧି ସହିତି ସପ୍ଲାଇ ଚେନ୍ ସୁନିଶ୍ଚିତ କରିବାକୁ ସମସ୍ତ କମ୍ପାନୀଙ୍କୁ କୁହାଯାଇଛି। ଏହାସହିତ ରେମଡେସିଭିର ଇଂଜେକ୍ସନର କଳାବଜାରି ଯେପରି ନହୁଏ ତାହା ପ୍ରତି ଦୃଷ୍ଟି ଦେବାକୁ ଆଦେଶ ଦିଆଯାଇଛି।
ସରକାର ଏହି କମ୍ପାନୀଙ୍କୁ ଏଥିପାଇଁ ସମସ୍ତ ଆବଶ୍ୟକ ଅନୁମତି ଦେଇଛନ୍ତି । ଉତ୍ପାଦକ ଯେପରି ତୁରନ୍ତ ଉତ୍ପାଦନ ବଢାଇ ପାରିବେ ସେଥିପାଇଁ ଆବଶ୍ୟକ ପଦକ୍ଷେପ ନେଇଛନ୍ତି। ସୂଚନାଯୋଗ୍ୟ ଯେ ,ଆଗରୁ କେନ୍ଦ୍ର ସରକାର ରେମଡେସିଭିର ଇଂଜେକ୍ସନ ରପ୍ତାନୀ ଉପରେ ପ୍ରତିବନ୍ଧକ ଲାଗୁ କରିଥିଲେ ।
ସୂଚନାଯୋଗ୍ୟ ଯେ, ଜାହାଜ,ଜଳପଥ ଓ କେନ୍ଦ୍ର ରାସାୟନିକ ଓ ସାର ରାଷ୍ଟ୍ରମନ୍ତ୍ରୀ ମନସୁଖ ମଣ୍ଡାଭିଆ ରେମଡେସିଭିର ଇଂଜେକ୍ସନ ଉତ୍ପାଦନ କରୁଥିବା ସମସ୍ତ ୭ କମ୍ପାନୀର ପ୍ରତିନିଧିଙ୍କ ସହିତ ଏପ୍ରିଲ ୧୨ ଓ ଏପ୍ରିଲ ୧୩ ତାରିଖ ଦିନ ଆଲୋଚନା କରିଥିଲେ । ଏହି ଆଲୋଚନା କାଳରେ ରେମଡେସିଭିର ଉତ୍ପାଦନ ବୃଦ୍ଧି,ଯୋଗାଣ ସୁନିଶ୍ଚିତ କରିବା ଓ ମୂଲ୍ୟ ନିର୍ଧାରଣ ଉପରେ ବିଚାର କରାଯାଇଥିଲା ।
ରେମଡେସିଭିର ଇଂଜେକ୍ସନ ଉତ୍ପାଦନ କରୁଥିବା ୭ କମ୍ପାନୀଙ୍କ ଉତ୍ପାଦନ କ୍ଷମତା ମାସିକ ପାଖାପାଖି ୩୯ ଲକ୍ଷ ଶିଶି। ୬ ଜଣ ଉତ୍ପାଦକଙ୍କୁ ମାସିକ ୧୦ ଲକ୍ଷ ଶିଶି ଉତ୍ପାଦନ କରୁଥିବା ୭ ଅତିରିକ୍ତ ସ୍ଥାନ ପାଇଁ ଫାଷ୍ଟ୍ ଟ୍ରାକ୍ ସ୍ୱିକୃତୀ ଦିଆଯାଇଛି ।

