ମାଲକାନଗିର: ପକ୍ଷୀ ଖେଳ ହେଲା କାଳ । ମାଲିକଙ୍କୁ ଛୁରିରେ ହତ୍ୟା କଲା ଗଞ୍ଜା । ଏଭଳି ଆଶ୍ଚର୍ଯ୍ୟଜନକ ଚକିତ କଲା ଭଳି ଘଟଣା ଘଟିଛି ମାଲକାନଗିରି ଜିଲ୍ଲା ସୀମାନ୍ତ ପଡ଼ୋଶୀ ତେଲଙ୍ଗାନାରେ । ଯେଉଁଠି ନିଜ ମାଲିକଙ୍କୁ ଛୁରିରେ ଆକ୍ରମଣ କରିଛି ଗଞ୍ଜା । ଖେଳ ମଜାରୁ ଚାଲି ଯାଇଛି ମାଲିକଙ୍କ ଜୀବନ । ପୋଲିସ ଗଞ୍ଜାକୁ ଅଟକ ରଖି ତଦନ୍ତ କରୁଛି ।
ସୂଚନା ଅନୁଯାୟୀ ତେଲଙ୍ଗାନା ଜଗତିଆଲ୍ ଜିଲ୍ଲା ଲୁଥିନୂର୍ ଗାଁରେ ଏକ କୁକୁଡ଼ା ଲଢେଇ ଆୟୋଜନ ହୋଇଥିଲା । ଏହି ଲଢେଇରେ ହଜାର ହଜାର ଟଙ୍କା ବାଜି ବି ଲାଗିଥିଲା । ନିଜ ଗଞ୍ଜା ଗୋଡ଼ରେ ଧାରୁଆ ଛୁରି ବାନ୍ଧିଥିଲେ ମାଲିକ ସତୀଶ । କିନ୍ତୁ, କୁକୁଡ଼ା ଏତେମାତ୍ରରେ ଉଗ୍ର ହୋଇଯାଇଥିଲା ଯେ ଭୂଇଁରୁ ଉପରକୁ ଡେଇଁବା ଆରମ୍ଭ କରିଥିଲା ।
ବାରମ୍ବାର ଉପରକୁ ଡେଇଁ ନିଜ ମାଲିକ ଉପରେ ଆକ୍ରମଣ କରିଥିଲା ଗଞ୍ଜା । ସତୀଶ ହଟିବା ପାଇଁ ଚେଷ୍ଟା କରିବ ପରେ ବି ସଫଳ ହୋଇନଥିଲେ । ଗଞ୍ଜା ଗୋଡ଼ରେ ଲାଗିଥିବା ଛୁରୀ ପଶିଯାଇଥିଲା ସତୀଶଙ୍କ ଅଣ୍ଟାରେ । ସତୀଶଙ୍କୁ ଗୁରୁତର ଅବସ୍ଥାରେ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ସତୀଶଙ୍କ ମୃତ୍ୟୁ ହୋଇଥିବା ବେଳେ ମାମଲା ରୁଜୁ କରି ଗଞ୍ଜାକୁ ଥାନାରେ ଅଟକ କରିଛି ପୋଲିସ ।
