ଭୁବନେଶ୍ୱର: INS ଚିଲିକାରେ ୨୦୨୦ ଏମଆର୍ ବ୍ୟାଚର ପାସିଙ୍ଗ ଆଉଟ୍ ପରେଡ୍ ଅନୁଷ୍ଠିତ ହୋଇଛି । ଚିଲିକାରେ ଏକ ବର୍ଷର ପ୍ରଶିକ୍ଷଣ ନେଇ କୃତକାର୍ଯ୍ୟ ହୋଇଛନ୍ତି ପ୍ରଶିକ୍ଷାର୍ଥୀ । ପାସିଂ ଆଉଟ୍ ଅବସରରେ ଆକର୍ଷୀଣୀୟ ପରେଡ ପ୍ରଦର୍ଶନ କରାଯାଇଥିଲା । ନୌସେନାର ବରିଷ୍ଠ ଅଧିକାରୀମାନେ ମେଧାବୀ ପ୍ରଶିକ୍ଷାର୍ଥୀଙ୍କୁ ପଦକ ଓ ଟ୍ରଫି ପ୍ରଦାନ କରିଥିଲେ । ପରିକ୍ଷାର୍ଥୀଙ୍କ ଦ୍ୱାରା ପ୍ରଦର୍ଶିତ ସ୍ମାର୍ଟ ଡ୍ରିଲ୍ ଓ ଗତିବିଧିକୁ ଅଧିକାରୀମାନେ ପ୍ରଶଂସା କରିଛନ୍ତି । କୋଭିଡ୍ ନିୟମ ଭିତରେ ସମସ୍ତ ପ୍ରକାର ପ୍ରଶିକ୍ଷଣ ସରିଥିବାରୁ ସମସ୍ତ କର୍ମକର୍ତ୍ତାଙ୍କୁ ପ୍ରଶଂସା କରାଯାଇଛି । ଏହି ଅବସରରେ ଅଲଭିନ୍ କେ ଓ ଅକ୍ଷୟ କୁମାରଙ୍କୁ ଅଲଗା ବର୍ଗରେ ଶ୍ରେଷ୍ଠ ପରୀକ୍ଷାର୍ଥୀ ଭାବେ ବିବେଚନ କରାଯାଇଛି ।
ଦେଶରେ ୧୦ ଦିନ ଭିତରେ ଟିକାକରଣ ଆରମ୍ଭ
ନୂଆଦିଲ୍ଲୀ: ୧୦ ଦିନ ଭିତରେ ଦେଶରେ ଟିକାକରଣ ଆରମ୍ଭ ହେବାକୁ ଯାଉଛି । ଏନେଇ ପ୍ରେସମିଟ୍ରେ ସୂଚନା ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟ ସଚିବ ।
ସୂଚନା ଅନୁଯାୟୀ ମଙ୍ଗଳବାର ଦିନ ଏକ ପ୍ରେସମିଟରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସଚିବ ରାଜେଶ ଭୂଷଣଙ୍କ ପକ୍ଷରୁ କୁହାଯାଇଛି ଯେ, ଦେଶରେ ଲଗାତାର ୩୯ ଦିନ ହେବ କରୋନା ସଂକ୍ରମିତଙ୍କ ତୁଳନାରେ ଅଧିକ ସଂଖ୍ୟକ ସୁସ୍ଥ ହେଉଛନ୍ତି । ନିକଟରେ ଡିସିଜିଆଇ ୨ଟି ଟିକାର ଜରୁରୀକାଳୀନ ବ୍ୟବହାରକୁ ଅନୁମତି ଦେଇଥିଲେ ।
ପରେ ଦେଶର ହୋଇଥିବା ଟିକାର ଡ୍ରାଏ ରନ୍ ମଧ୍ୟ ସଫଳ ହୋଇଛି । ଯେଉଁଥିପାଇଁ ସରକାର ଜାନୁଆରି ୧୩ ତାରିଖରେ କରୋନା ଟିକାର ପ୍ରଥମ ଡୋଜ୍ ଦେଶବାସୀଙ୍କୁ ମିଳିବା ନେଇ ସଙ୍କେତ ଦେଇଛନ୍ତି ।
ପ୍ରାରମ୍ଭିକ ଭାବେ ୩ କୋଟି କରୋନା ଯୋଦ୍ଧାଙ୍କୁ ଭ୍ୟାକ୍ସିନର ପ୍ରଥମ ଡୋଜ ପ୍ରଦାନ କରାଯିବ ବୋଲି ସେ ପ୍ରକାଶ କରିଛନ୍ତି ।
We are prepared to roll out vaccine within 10 days of emergency use authorisation approvals. The final call will be taken by the government: Union Health Secretary Rajesh Bhushan
DGCI gave approval to two vaccines on January 3 pic.twitter.com/g6sWMsX4cG
— ANI (@ANI) January 5, 2021
ଉଲ୍ଲେଖଯୋଗ୍ୟ, କରୋନା ବିରୋଧରେ ସାରା ଦେଶ ଲଢେଇ କରୁଥିବା ବେଳେ ଭାରତରେ ଦୁଇଟି ଟିକାକୁ ଅନୁମୋଦନ ମିଳିଛି । DCGI ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର କୋଭିଶିଲ୍ଡ ଏବଂ ଭାରତ ବାୟୋଟେକର କୋଭାକ୍ସିନକୁ ମଞ୍ଜୁରୀ ଦେଇଥିଲେ ।
ନୂଆବର୍ଷରେ ପ୍ରଥମେ କୋଭିସିଲ୍ଡକୁ ଅନୁମତି ମିଳିଥିଲା ବେଳେ ଦ୍ୱିତୀୟ ଟିକା ଭାବେ କୋଭାକ୍ସିନକୁ ଅନୁମତି ଦିଆଯାଇଥିଲା । ସରକାରଙ୍କ ପକ୍ଷରୁ ଗଠନ ହୋଇଥିବା ପ୍ୟାନେଲ କୋଭାକ୍ସିନର କେବଳ ଜରୁରୀକାଳିନ ବ୍ୟବହାର ପାଇଁ ଅନୁମତି ଦେଇଥିଲେ ।
ଟିକା ବ୍ୟବହାର ନେଇ ଅନୁମୋଦନ ମିଳିବା ପରେ କେନ୍ଦ୍ର ମନ୍ତ୍ରୀ ପ୍ରକାଶ ଜାଭଡେକର କୋଭିଶିଲ୍ଡ ଅନୁମୋଦନ ପାଇବା ପରେ ଖୁସି ବ୍ୟକ୍ତ କରିଥିଲେ। କରୋନା ବିରାେଧରେ ଦେଶବାସୀ ଲଢେଇ ଜାରି ରଖିଥିବା ବେଳେ ଦୁଇଟି ଟିକାର ଜରୁରୀକାଳୀନ ବ୍ୟବହାରକୁ ଅନୁମତି ପରେ ଜନସାଧାରଣ ଆଶ୍ୱସ୍ତୀ ଅନୁଭବ କରିଛନ୍ତି ।
ସେହିପରି ୨ ଟିକାର ବ୍ୟବହାରକୁ ଅନୁମତି ଦେବା ପରେ ଡିସିଜିଆଇ ଗଣମାଧ୍ୟମକୁ ସୂଚନା ଦେଇ କହିଥିଲେ ଯେ, ଟିକା ୧୧୦% ସୁରକ୍ଷିତ । କିଛି ପାର୍ଶ୍ୱ ପ୍ରତିକ୍ରିୟା ଦେଖାଯିବା ସ୍ୱାଭାବିକ । ଜର ହେବା, ଆଲର୍ଜି ଓ ଦରଜ କରିବା ଏଭଳି ପାର୍ଶ୍ୱ ପ୍ରତିକ୍ରିୟା ପ୍ରାୟ ସମସ୍ତ ଭ୍ୟାକ୍ସିନରେ ଦେଖାଯାଇଥାଏ । ଲୋକଙ୍କୁ ଆଶ୍ୱସ୍ତ କରିବାକୁ ଯାଇ ଡିସିଜିଆଇ କହିଛନ୍ତି ଯେ, ସୁରକ୍ଷା ଦୃଷ୍ଟିରୁ କୌଣସି ପ୍ରକାର ବି ଅସୁବିଧା ଥିଲେ ଟିକାକୁ ଅନୁମତି ଦିଆଯିବ ନାହିଁ ।
ପରୀ ହତ୍ୟାକାରୀ ନାବାଳକ ପ୍ରମାଣିତ, ଏବେ ଜେଲ୍ ନୁହେଁ ବାଳ ସୁଧାର ଗୃହ ଯିବ ସରୋଜ
ନୟାଗଡ଼: ଯଦୁପୁର ପରୀ ହତ୍ୟାକାରୀ ସରୋଜକୁ ନାବାଳକ ଦର୍ଶାଇଲେ ନୟାଗଡ଼ ପୋକ୍ସୋ କୋର୍ଟ । ତାକୁ ଜୁଭେନାଇଲ କୋର୍ଟରେ ହାଜର କରିବା ପାଇଁ ଏସ୍ଆଇଟିକୁ କୋର୍ଟଙ୍କ ନିର୍ଦ୍ଦେଶ ରହିଛି । ବୟସ ପ୍ରମାଣ ପାଇଁ, ଜନ୍ମ ପ୍ରମାଣ ପତ୍ର ଓ ସ୍କୁଲ ସାର୍ଟିଫିକେଟକୁ କୋର୍ଟରେ ଦାଖଲ କରାଯାଇଥିଲା । ଏଥିସହ ମା’ ଓ ଭଉଣୀଙ୍କ ବୟାନ ମଧ୍ୟ ନିଆଯାଇଥିଲା । ଏହାକୁ ଆଧାର କରି କୋର୍ଟ ଅଭିଯୁକ୍ତ ସରୋଜ ସେଠୀକୁ ନାବାଳକ ଦର୍ଶାଇଛନ୍ତି । ସରୋଜକୁ ଏବେ ଜେଲ୍ ବଦଳରେ ବାଳ ସୁଧାର ଗୃହକୁ ନିଆଯିବ ।
ଅନ୍ୟପଟେ ନାର୍କୋ ଆନାଲିସିସ୍ ଟେଷ୍ଟ ପାଇଁ କୋର୍ଟରେ ଏସ୍ଆଇଟି କରିଥିବା ଆବେଦନ ଉପରେ ଶୁଣାଣି ହେବା ନେଇ କୁହାଯାଉଛି । ଏନେଇ ସୋମବାର ସରୋଜକୁ କୋର୍ଟରେ ହାଜର କରାଯାଇଥିବା ବେଳେ ମଙ୍ଗଳବାର ଶୁଣାଣି କରିବାକୁ ସମୟ ଧାର୍ଯ୍ୟ ହୋଇଥିଲା ।
କେତେ ସତ କହୁଛି ସରୋଜ ସେଠୀ ? କେତେ ଶୁଣାଉଛି ମନଗଢ଼ା ଗପ ? ଏସବୁର ଟେର୍ ପାଇବାକୁ ସରୋଜର ନାର୍କୋ ଆନାଲିସିସ ଟେଷ୍ଟ କରିବାକୁ ନିଷ୍ପତି ନେଇଛି ଏସ୍ଆଇଟି । ଏଥିପାଇଁ ଅନୁମତି ଦେବାକୁ ନୟାଗଡ଼ ପୋକ୍ସୋ କୋର୍ଟରେ ଏସ୍ଆଇଟି ଆବେଦନ କରିଥିଲା । ପରୀ ହତ୍ୟା ମାମଲାର ଏସଆଇଟି ତଦନ୍ତ ପରେ ସାମ୍ନାକୁ ଆସିଥିଲା ସରୋଜର ରାକ୍ଷସ ରୂପ । ତାକୁ ଗିରଫ ପରେ ଗତ ୨୪ ତାରିଖରେ ନିଜେ କରିଥିବା ବର୍ବରକାଣ୍ଡର ସିନ୍ ରି-କ୍ରିଏଟ କରି ଦେଖାଇସାରିଛି ।
ଋଷିଆ ସହ ଭାରତର ଏସ-୪୦୦ ଡିଲ୍, ବାଧା ଦେଇପାରେ ଆମରିକା
ନୂଆଦିଲ୍ଲୀ: ଋଷିଆଠୁ ଏସ ୪୦୦ ବା ବାୟୁ ରକ୍ଷା ପ୍ରଣାଳି ମିସାଇଲ ସିଷ୍ଟମ ଭାରତ କିଣିବା ନେଇ ଆମେରିକା ସମସ୍ୟା ସୃଷ୍ଟି କରିପାରେ ବୋଲି ଚର୍ଚ୍ଚା ହେଉଛି।
ଆମେରିକାର ସଂସଦ କଂଗ୍ରେସର ରିପୋର୍ଟ ଅନୁଯାୟୀ ଭାରତ ସହ ଋଷର ବ୍ୟବସାୟୀକ ଚୁକ୍ତି ଉପରେ କିଛି କଟକଣା ଲଗା ଯାଇପାରେ । ଆମେରିକା ନିଜ ଶତ୍ରୁ ଉପରେ ଲଗାଉଥିବା କିଛି ଆଇନର ଦ୍ବାହି ଦେଇ ଏହି ଚୁକ୍ତିକୁ ଭଣ୍ଡୁର କରିବାକୁ ଯୋଜନା କରିଛି । ୨୦୧୮ ଆମେରିକା ସରକାରଙ୍କ ଚେତାବନୀ ସତ୍ବେ ଭାରତ ସରକାର ଋଷ ସହ ଏସ ୪୦୦ କିଣିବା ପାଇଁ ଚୁକ୍ତି କରିଥିଲେ ।
ଏହାଦ୍ବାରା ଭାରତ ଓ ଆମେରିକା ମଧ୍ୟରେ ଥିବା ସମ୍ପର୍କ କ୍ଷୁର୍ଣ୍ଣ ହେବ ବୋଲି ମଧ୍ୟ ପୂର୍ବରୁ ଟ୍ରମ୍ପ ପ୍ରଶାସନ ଏକପ୍ରକାର ଚେତାବନୀ ଦେଇଥିଲେ । ହେଲେ ଏହି ଡିଲ୍ ଲାଗି ଭାରତ ସରକାର ୨୦୧୯ରେ ଋଷ ସରକାରକୁ ୮୦ କୋଟି ଟଙ୍କା ପଇଠ ମଧ୍ୟ କରିସାରିଛନ୍ତି ।
ତେବେ ଏସ ୪୦୦ ଋଷର ସବୁଠୁ ଉନ୍ନତ ମାନର ମିସାଇଲ ବୋଲି କୁହାଯାଉଛି । ଏହି ମିସାଇଲ ଆକାଶରୁ ଆକାଶ ମାର୍ଗକୁ ଉତ୍ତକ୍ଷେପଣ କରିବାର କ୍ଷମତା ରଖିଛି । ଭାରତୀୟ ସେନାରେ ଏହା ସାମିଲ ହେଲେ ସେନା ଆହୁରି ଶକ୍ତିଶାଳୀ ହେବ।
ରାସ୍ତାରେ ପଡ଼ିଛି ବିଡ଼ା ବିଡ଼ା ଟଙ୍କା, ହେଲେ କେହି ନେଉ ନାହାନ୍ତି କି ନିଜର ବୋଲି କହୁନାହାନ୍ତି..
ଭୁବନେଶ୍ୱର: ରାଜଧାନୀରେ ମଙ୍ଗଳବାର ଦେଖିବାକୁ ମିଳିଛି ଏକ ବିରଳ ଦୃଶ୍ୟ । ରାସ୍ତାରେ ପଡ଼ିଛି ବିଡ଼ା ବିଡ଼ା ଟଙ୍କା । କାହାର ସେ ଟଙ୍କା ଜଣା ନାହିଁ ? ପଚାରିଲେ ବି କେହି କହୁ ନାହନ୍ତି । କିମ୍ବା ଟଙ୍କାକୁ କେହି ଖୋଜୁ ନାହାନ୍ତି । ଶହେ କି ଦୁଇ ଶହ ନୁହେଁ ଏକା ଥରକେ ଦେଢ଼ ଲକ୍ଷ ଟଙ୍କା ପଡ଼ିଛି ରାସ୍ତା ଉପରେ । ତାହା ପୁଣି ଜନଗହଳି ପୂର୍ଣ୍ଣ ରାସ୍ତାରେ । ଟଙ୍କା ଯେଉଁଠି ପଡ଼ିଛି ସେହି ସମ୍ମୁଖରେ ସରକାରୀ କ୍ୱାର୍ଟର । ସରକାରୀ ଚାକିରି କରିଥିବା ଜଣେ ବଡ଼ବାବୁଙ୍କ ଘର ମଧ୍ୟ ସେହି ପାଖରେ । ହେଲେ କେହି ଜାଣି ନାହନ୍ତି ଟଙ୍କା କାହାର । ଟଙ୍କା ଦେଖି ଶହ ଶହ ଲୋକଙ୍କ ଭିଡ଼ ହେଲେ କାହା ଟଙ୍କା ପଚାରିଲେ କେହି କିଛି କହୁ ନାହାନ୍ତି । ଗଙ୍ଗନଗର ରାସ୍ତା ଉପରୁ ମିଳିଲା ଏହି ୫ ଶହ ଟଙ୍କିଆ ତିନୋଟି ବଣ୍ଡଲ ।
ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଉକ୍ତ ଟଙ୍କା ଗୁଡ଼ିକୁ ଉଦ୍ଧା କରିଛି । ତେବେ ଏହି ଟଙ୍କା କାହାର କୋଉଠୁ ଆସିଲା ସେନେଇ ଏବେ ସୁଦ୍ଧା ଜଣାପଡ଼ି ନାହିଁ । ଯାହାର ଏହି ଟଙ୍କା ସେ ପ୍ରକୃତ ପ୍ରମାଣ ଦେଇ ଥାନାରୁ ନେଇପାରିବ ବୋଲି କୁହାଯାଇଛି ।
ଅସୁସ୍ଥ ପୂର୍ବତନ କର୍ମଚାରୀଙ୍କୁ ଭେଟିବା ପାଇଁ ପୁଣେ ପହଞ୍ଚିଲେ ରତନ ଟାଟା, ସମସ୍ତେ ଚକିତ
ପୁଣେ: ୮୩ ବର୍ଷ ବୟସ୍କ ଜଣାଶୁଣା ଶିଳ୍ପପତି ରତନ ଟାଟାଙ୍କୁ କିଏବା ନଜାଣେ । ସେ ଜଣେ ସଫଳ ବ୍ୟବସାୟୀ ହେବା ସହ ଅନେକ ସମୟରେ ମାନବିକତା ପାଇଁ ମଧ୍ୟ ଚର୍ଚ୍ଚାରେ ରହିଥାନ୍ତି । ଏହି ପରିପ୍ରେକ୍ଷୀରେ ତାଙ୍କର ଜଣେ ପୂର୍ବତନ କର୍ମଚାରୀ ଅସୁସ୍ଥ ଥିବା ଖବର ପାଇବା ପରେ ତାଙ୍କୁ ଦେଖିବା ଲାଗି ପୁଣେରେ ପହଞ୍ଚିଯାଇଥିଲେ ରତନ ।
ନିକଟ ଅତୀତରେ ସେ ପୁଣେ ଯାଇ ସେହି କର୍ମଚାରୀଙ୍କୁ ଘରେ ଭେଟିଥିଲେ । ଅଚାନକ ରତନ ଟାଟାଙ୍କୁ ଘରେ ଦେଖି ଚକିତ ହୋଇ ପଡିଥିଲେ ସମ୍ପୃକ୍ତ କର୍ମଚାରୀ । ଯାହା ପରେ ତାଙ୍କ ଆଖିରୁ ଧାର ଧାର ଲୁହ ବୋହିବାରେ ଲାଗିଥିଲା ।
ରତନ ଏହି ପୂର୍ବତନ କର୍ମଚାରୀଙ୍କ ଘରେ ପହଞ୍ଚି ତାଙ୍କର ସ୍ବାସ୍ଥ୍ୟବସ୍ଥା ସମ୍ପର୍କରେ ପଚାରି ବୁଝିଥିଲେ । ପରେ ସେ ଜାଣିବାକୁ ପାଇଥିଲେ ଯେ କର୍ମଚାରୀ ଜଣକ ବିଗତ ୨ ବର୍ଷ ହେବ ରୋଗରେ ପିଡିତ ।
ସୂଚନା ଅନୁଯାୟୀ ଗତ ରବିବାର ୩ଟା ସମୟରେ ରତନ ଟାଟା କୋଥରୁଡର ଗାନ୍ଧୀ ଭବନ ନିକଟସ୍ଥ ବୁଡଲେଣ୍ଡ ସୋସାଇଟିରେବିନା କୌଣସି ସୁରକ୍ଷାରେ ପହଞ୍ଚିଥିଲେ । ସେଠାରେ ସେ ପାଖାପାଖି ଅଧଘଣ୍ଟା ଯାଏଁ ରହିବା ସହ ଇମାନଦାର ଙ୍କ ସହ ଆଲୋଚନା କରିଥିଲେ । ଏପରିକି ସେ ତାଙ୍କର ଆଶୁ ଆରୋଗ୍ୟ କାମନା କରିଥିଲେ ।
ଏଭଳି ଘଟଣା ଦେଖି ସୋସାଇଟିର ଲୋକମାନେ ମଧ୍ୟ ଆଶ୍ଚର୍ଯ୍ୟ ଚକିତ ହୋଇପଡିଥିଲେ । ସୋସାଇଟିର ଜଣେ ବାସିନ୍ଦା ଅଞ୍ଜଳି ପାର୍ଡିକର୍ କହିଛନ୍ତି ଯେ ରତନ ଟାଟା ଏତେ ସାଧାରଣ ଦେଖାଯାଉଥିଲେ ଯେ ତାଙ୍କୁ ଦେଖି ହଠାତ୍ କେହି ଭାବି ପାରିବେନି ଯେ ସେ ଏତେ ବଡ ଶିଳ୍ପପତି ବୋଲି । ତାଙ୍କ ଭିତରେ ଅହଙ୍କାର ଥିବା ଭଳି ଜମା ଲାଗୁନଥିଲା ।
ସେ ଆହୁରି ମଧ୍ୟ କହିଛନ୍ତି ଯେ, ସୋସାଇଟି ମଧ୍ୟକୁପ୍ରଥମେ ଦୁଇଟି ଗାଡି ଆସି ପହଞ୍ଚିଲା । ଗୋଟିଏ ଗାଡିରୁ ରତନ ଟାଟା ଓହ୍ଲାଇଥିଲେ । ପରେ ସେ ଲିଫ୍ଟକୁ ଚାଲି ଯାଇଥିଲେ ।
ରତନ ଟାଟାଙ୍କ ଏଭଳି ଅପ୍ରତ୍ୟାଶିତ ଆଗମନରେ ଆମକୁ ଲାଗିଲା ଯେ ଆମେ ଯେମିତି ଭଗବାନଙ୍କୁ ସାକ୍ଷାତ କରିଲୁ । ଏଭଳି କହିଛନ୍ତି ସମ୍ପୃକ୍ତ କର୍ମଚାରୀଙ୍କ ପୁଅ । ଏପରିକି ସେ ବିନା କୗେଣସି ସଙ୍କୋଚରେ ଆମ ସହ କଥାବାର୍ତ୍ତା ହୋଇଥିଲେ ବୋଲି ପ୍ରକାଶ କରିଛନ୍ତି ।
ମାହାଙ୍ଗା ଡବଲ ମର୍ଡର: ଅଭିଯୁକ୍ତକୁ ଧରି କ୍ରାଇମ୍ ସିନ୍ ରି-କ୍ରିଏଟ୍ କରୁଛି ପୋଲିସ
କଟକ: ମାହାଙ୍ଗା ଡବଲ ମର୍ଡର ମାମଲା । ମୁଖ୍ୟ ଅଭିଯୁକ୍ତକୁ ଘଟଣାସ୍ଥଳକୁ ନେଇ ତଦନ୍ତ ଚଳାଇଛି ପୋଲିସ । କେମିତି ଓ କେଉଁ ପରିସ୍ଥିତିରେ ହତ୍ୟାକାଣ୍ଡ ଘଟିଲା ସେନେଇ ଅଧିକ ତଥ୍ୟ ଦେଉଛି ଅଭିଯୁକ୍ତ । ଘଟଣାସ୍ଥଳରେ କ୍ରାଇମ୍ ସିନ ରିକ୍ରିଏସନ୍ ଚାଲିଛି । କେଉଁ ହତିଆରରେ ହତ୍ୟା କରିଥିଲା ଅଭିଯୁକ୍ତ ତାକୁ ଧରି ପୁରା କ୍ରାଇମ୍ ସିନର ଡେମୋ ଦେଖାଉଛି ଅଭିଯୁକ୍ତ ।
ଡବଲ ମର୍ଡର ଘଟଣାରେ ୪ଜଣଙ୍କୁ ଗିରଫ କରିଛି ପୋଲିସ । ୪ ଅଭିଯୁକ୍ତଙ୍କୁ ପଚରାଉଚରା କରାଯାଇଛି । ଗ୍ରାମାଞ୍ଚଳ SP ଓ କେନ୍ଦ୍ରାଞ୍ଚଳ DIG ଆଶିଷ ସିଂ ମାହାଙ୍ଗା ଥାନାରେ ପହଞ୍ଚିଛନ୍ତି । ସୋମବାର ରାତିରେ ଅଭିଯୁକ୍ତଙ୍କୁ ପୋଲିସ ଗିରଫ କରିଥିଲା । ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ପୋଲିସର ଚଢାଉ ଜାରି ରହିଛି । ମାହାଙ୍ଗା ବ୍ଲକ୍ର ପୂର୍ବତନ ଅଧ୍ୟକ୍ଷ କୁଳମଣି ବରାଳ ଓ ତାଙ୍କ ସହଯୋଗୀ ଦିବ୍ୟସିଂହ ବରାଳଙ୍କୁ ପୂର୍ବ ଶତ୍ରୁତାରୁ ହତ୍ୟା କରାଯାଇଥିବା ସେମାନଙ୍କ ସମ୍ପର୍କୀୟ ଅଭିଯୋଗ କରିଥିଲେ ।
ପରିବାର ପକ୍ଷରୁ ୧୨ଜଣଙ୍କ ନାଁରେ ଏତଲା ଦିଆଯାଇଛି । କଟକ ଗ୍ରାମାଞ୍ଚଳ ଏସ୍ପିଙ୍କ ନେତୃତ୍ୱରେ ୫ଟି ଟିମ୍ ଘଟଣାର ତଦନ୍ତ କରୁଛି । ହତ୍ୟାକାଣ୍ଡର କାରଣ ଓ ତଦନ୍ତର ଅଗ୍ରଗତି ସଂପର୍କରେ ପ୍ରେସ୍ମିଟ୍ରେ ସବିଶେଷ ସୂଚନା ଦିଆଯିବ ବୋଲି କଟକ ଗ୍ରାମାଞ୍ଚଳ ଏସପି କହିଛନ୍ତି । ଗତ ୨ତାରିଖ ରାତିରେ କୁଳମଣି ଓ ଦିବ୍ୟସିଂହ ବାଇକ୍ରେ ଜଙ୍କୋଟି ଗାଁରୁ ମୃତାଙ୍ଗ ଫେରୁଥିବା ବେଳେ ୧୦- ୧୨ଜଣ ଦୁର୍ବୃତ୍ତ ସେମାନଙ୍କୁ ମାରଣାସ୍ତ୍ରରେ ଆକ୍ରମଣ କରିଥଲେ । କୁଳମଣି ଘଟଣାସ୍ଥଲରେ ଓ ଦିବ୍ୟସିଂହ କଟକ ବଡ଼ ମେଡିକାଲରେ ପ୍ରାଣ ହରାଇଥିଲେ ।
ବାର୍ଡ ଫ୍ଲୁ ଆତଙ୍କ: କେରଳରେ ରାଜ୍ୟ ବିପର୍ଯ୍ୟୟ ଘୋଷଣା, କୁକୁଡ଼ା ଓ ଅଣ୍ଡା ଦୋକାନ ବନ୍ଦ କରିବାକୁ ନିର୍ଦ୍ଦେଶ
କେରଳ: କରୋନା ସଙ୍କଟ ମଝିରେ ଆଉ ଏକ ନୂଆ ସଙ୍କଟ ମୁଣ୍ଡ ଟେକିଛି । ଦେଶରେ ଅନେକ ରାଜ୍ୟରେ ବ୍ୟପିବାରେ ଲାଗିଛି ବାର୍ଡ ଫ୍ଲୁ । ରାଜସ୍ଥାନ, ମଧ୍ୟ ପ୍ରଦେଶ ପରେ ହିମାଚଳ ପ୍ରଦେଶ ଏବଂ କେରଳରେ ବ୍ୟାପୁଛି ବାର୍ଡ ଫ୍ଲୁର ଆତଙ୍କ । ଏହାକୁ ନଜରରେ ରଖି ବିଭିନ୍ନ ରାଜ୍ୟର ସରକାର ସତର୍କତା ଜାରି କରିଛନ୍ତି । ଏମିତିକି କେରଳ ଏହାକୁ ରାଜ୍ୟ ବିପର୍ଯ୍ୟୟ ଘୋଷଣା କରିଛି ।
ମଧ୍ୟ ପ୍ରଦେଶରେ ୨୩ ଡିସେମ୍ବରରୁ ୩ ଜାନୁଆରୀ ମଧ୍ୟରେ ୩୭୬ଟି କାଉର ମୃତ୍ୟୁ ହୋଇଛି । ଏଥିରୁ ୧୪୨ଟି ମୃତ୍ୟୁ ଇନ୍ଦୋର ସହରରେ ହୋଇଛି । ଏହାବ୍ୟତୀତ ସନ୍ଦସୌରରେ ୧୦୦, ଆଗର ମାଲୱାରେ ୧୧୨, ଖରଗୋନ ଜିଲ୍ଲାରେ ୧୩, ସିହୋରରେ ୯ ଟି କାଉର ମୃତ୍ୟୁ ହୋଇଛି । ପଶୁପାଳନ ମନ୍ତ୍ରୀ ପ୍ରେମ ସିଂ ପଟେଲ ସୂଚନା ଦେଇଛନ୍ତି ଯେ, ମୃତ କାଉ ମାନଙ୍କ ସ୍ୟାମ୍ପୁଲ ଭୋପାଳର ଷ୍ଟେଟ ଡି.ଆଇ ଲ୍ୟାବ ପଠାଯାଇଛି । ଇନ୍ଦୋର ଏବଂ ସନ୍ଦସୌରକୁ ପଠାଯାଇଥିବା ସ୍ୟାମ୍ପୁଲରେ ବାର୍ଡ ଫ୍ଲୁର ଭାଇରସ ଥିବା ନିଶ୍ଚିତ କରାଯାଇଛି ।
ବାର୍ଡ ଫ୍ଲୁ ହୋଇଥିବା ନିଶ୍ଚିତ ହେବା ପରେ ପଶୁପାଳନ ବିଭାଗର ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି ଯେ ଯଦିଓ କୁକୁଡ଼ା ପକ୍ଷୀମାନଙ୍କ ପାଖରେ କୌଣସି ଲକ୍ଷଣ ଦେଖାଦେଇନାହିଁ, ତଥାପି କୁକୁଡ଼ା ଏବଂ କୁକୁଡ଼ା ଉତ୍ପାଦ ବଜାର, ଚାଷଜମି, ଜଳଭଣ୍ଡାର ଏବଂ ସ୍ଥାନାନ୍ତରିତ ପକ୍ଷୀମାନଙ୍କ ଉପରେ ବିଶେଷ ନଜର ରଖିବା ଉଚିତ୍ ।
ଥାନାବାବୁଙ୍କ ଦାଦାଗିରି; ତଦନ୍ତ ପାଇଁ ଲାଞ୍ଚ ନେଉଛନ୍ତି, ପଚାରିଲେ ରାଗି ଯାଉଛନ୍ତି
ବାଲେଶ୍ୱର: କଥାରେ ଅଛି ‘ଚୋରି ଉପର ସେ ସିନା ଜୋରି’ । ଥାନା ବାବୁ ତଦନ୍ତ ପାଇଁ ଲାଞ୍ଚ ନେଉଛନ୍ତି, ପଚାରିଲେ ପୁଣି ଗାଳିଗୁଲଜ କରୁଛନ୍ତି । ଜଣେ ପୋଲିସ ଅଧିକାରୀଙ୍କ ନାଁରେ ଏଭଳି ଏକ ସାଂଘାତିକ ଅଭିଯୋଗ ଆସିଛି ବାଲେଶ୍ୱର ଜିଲ୍ଲା କମର୍ଦ୍ଦାରୁ ।
କମର୍ଦ୍ଦା ଥାନାରେ ଗୋପାଳ ଚନ୍ଦ୍ର ବାରିକ୍ ନାମକ ଜଣେ ବ୍ୟକ୍ତି ନିଜ ୧୪ ବର୍ଷର ଝିଅ ନିଖୋଜ ହୋଇଥିବା ନେଇ ଡିସେମ୍ବର ୨୩ ତାରିଖରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପରେ ତଦନ୍ତ କରିବା ପାଇଁ ପୋଲିସ ଅଧିକାରୀ ତଥା ଥାନା ଏଏସ୍ଆଇ ଭକ୍ତହରି ପଟ୍ଟନାୟକ ଦୁଇ ହଜାର ଟଙ୍କା ଲାଞ୍ଚ ନେଇଥିବା ନାବାଳିକାର ବାପା କହିଛନ୍ତି ।
ତେବେ ଅଭିଯୋଗ କରିବାର ୧୨ ଦିନ ପରେ ମଧ୍ୟ ପୋଲିସ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଇନଥିଲା । ତେଣୁ ଏନେଇ ଅଭିଯୋଗକାରୀ ତଥା ନିଖୋଜ ଝିଅର ପରିବାର ଲୋକ ଥାନାବାବୁଙ୍କୁ ପଚାରିବାରୁ, ଥାନା ବାବୁ ନିଖୋଜ ଝିଅ ବିଷୟରେ ସୂଚନା ଦେବା ପରିବର୍ତ୍ତେ ଓଲଟି ଅଭିଯୋଗକାରୀଙ୍କୁ ଗାଳିଗୁଲଜ କରିଥିଲେ । ଖାଲି ସେତିକି ନୁହେଁ ଅଭିଯୋଗକାରୀଙ୍କୁ ବିଭିନ୍ନ ଧମକ ଚମକ ଦେବା ସହ ପେଲାଠେଲା ମଧ୍ୟ କରିଥିଲେ ।
ତେବେ ଏହି ସବୁ ଘଟଣାର ସମ୍ପୂର୍ଣ୍ଣ ଦୃଶ୍ୟକୁ ନିଜ ମୋବାଇଲ କ୍ୟାମେରାରେ କଏଦ କରୁଥିବା ଜଣେ ସାମ୍ବାଦିକଙ୍କୁ ମଧ୍ୟ ପୋଲିସ ବାବୁ ଛାଡ଼ିନଥିଲେ । ସାମ୍ବାଦିକଙ୍କୁ ଆକ୍ରମଣ କରିବାକୁ ଓ ତାଙ୍କ କ୍ୟାମେରା ଛଡ଼ାଇନେବାକୁ ମଧ୍ୟ ପଛାଇନଥିଲେ ।
ଅନ୍ୟପଟେ ଖାଲି ନିଖୋଜ ଝିଅକୁ ଖୋଜିବା ପାଇଁ ଲାଞ୍ଚ ନୁହେଁ ବରଂ ବିଭିନ୍ନ ଜମିବାଡ଼ି ଗଣ୍ଡଗୋଳ ମାମଲାର ସମାଧାନ କରିବା ପାଇଁ ମଧ୍ୟ ପୋଲିସ ବାବୁ ହଜାର ହଜାର ଟଙ୍କା ଲାଞ୍ଚ ନେଉଥିବା ଅଭିଯୋଗ ହୋଇଛି ।
Fake News Fact Check :ସ୍କୁଲ ଖୋଲିବ ନାହିଁ ବୋଲି ନନ୍ଦିଘୋଷ ନାଁରେ ଚାଲିଥିବା ଖବରର ସତ୍ୟାସତ୍ୟ ଜାଣନ୍ତୁ
ଭୁବନେଶ୍ୱର: ନନ୍ଦିଘୋଷ ଟିଭିରେ ପ୍ରସାରିତ ଏକ ଖବରକୁ ନିଜ ଅନୁସାରେ ବଦଳାଇ କିଛି ବ୍ୟକ୍ତି ଜନ ସାଧାରଣଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରୁଛନ୍ତି । ସୋସିଆଲ ମିଡିଆରେ ଏହି ବଦଳାଯାଇଥିବା ଫ୍ରେମରେ ଶେୟାର କରାଯାଇଛି । ହେଲେ ସେହିପରି କୌଣସି ଟେମ୍ପ୍ଲେଟ୍ ବା ଗ୍ରାଫିକ୍ସ ନନ୍ଦିଘୋଷ ଟେଲିଭିଜନ୍ ବା ଏହାର ଡିଜିଟାଲ୍ ଓ୍ବିଙ୍ଗ୍ ପକ୍ଷରୁ ଶେୟର କରାଯାଇ ନଥିବା ଚ୍ୟାନେଲ୍ ପକ୍ଷରୁ କୁହାଯାଇଛି । ସେଦିନ ପ୍ରସାରଣ କରାଯାଇଥିବା ନ୍ୟୁଜ୍ର ସ୍କ୍ରିନ୍ ଶଟ୍ ଦେଖିଲେ ଏହା ସ୍ପଷ୍ଟ ହେଉଛି ଆାସନ୍ତୁ ଜାଣିବା ଏହି ଖବର ସତ୍ୟତା ବାବଦରେ ।
ନନ୍ଦିଘୋଷ ଟିଭି ପକ୍ଷରୁ ପ୍ରକାଶିତ ଖବର ଫ୍ରେମ୍ରେ ଏହାକୁ କୁହାଯାଇଥିଲା ଯେ, ରାଜ୍ୟର ସମସ୍ତ ସ୍କୁଲ ଏବଂ କଲେଜ ଖୋଲିବା ନେଇ ସରକାର ନିଷ୍ପତ୍ତି ନେଇଛନ୍ତି । ଏହା ସହ ଶିକ୍ଷାନୁଷ୍ଠାନ ସହ ସମ୍ପୃକ୍ତ ହଷ୍ଟେଲ୍ଗୁଡ଼ିକ ବି ଖୋଲିବ । ଜାନୁଆରୀ ୩ ତାରିଖରେ ସରକାରଙ୍କ ଘୋଷଣାକୁ ଆଧାର କରି ଏହି ଖବର ପ୍ରକାଶ ପାଇଥିଲା । ଗଣଶିକ୍ଷାମନ୍ତ୍ରୀ ସମୀର ଦାଶଙ୍କ ସୂଚନାକୁ ଏଥିରେ ଆଧାର କରାଯାଇଥିଲା । ଏହି ଖବରକୁ ନନ୍ଦିଘୋଷ ଟିଭି ଗ୍ରାଫିକ୍ସ ପ୍ଲେଟ ମାଧ୍ୟମରେ ପ୍ରସାରଣ କରିଥିଲା । କିନ୍ତୁ କୌଣସି ଦୁର୍ବୁତ୍ତ ନନ୍ଦିଘୋଷ ଟିଭିର ଏହି ବ୍ରେକିଙ୍ଗ ନ୍ୟୁଜ୍ ଫ୍ରେମକୁ ନିଜ ଅନୁସାରେ ଏଡିଟ୍ କରି ଭୁଲ୍ ତଥ୍ୟ ଉପସ୍ଥାପନା କରିଛନ୍ତି । ଏଥିରୁ ସ୍ପଷ୍ଟ ହେଉଛି ଯେ, ଜାଣିଶୁଣି ଏହି ଦୁର୍ବୃତ୍ତ ନନ୍ଦିଘୋଷ ଟିଭି ଚ୍ୟାନେଲ୍ର ପ୍ରତିଛବିକୁ ନଷ୍ଟ କରିବାକୁ ଉଦ୍ୟମ କରିଛନ୍ତି । ଏହା ସାଇବର ଆଇନକୁ ଉଲ୍ଲଙ୍ଘନ କରୁଛି ।
ରବିବାର ଦିନ ଏହି ଖବରକୁ ପ୍ରଥମେ ନନ୍ଦିଘୋଷ ଟିଭି ପକ୍ଷରୁ ପ୍ରକାଶ କରାଯାଇଥିଲା । ସୋମବାର ଦିନ କେହି ବ୍ୟକ୍ତି ଜାଣିଶୁଣି ଖବର ପ୍ରକାଶିତ ହୋଇଥିବା ଗ୍ରାଫିକ୍ସ ପ୍ଲେଟକୁ ଫଟୋଶପ୍ ମାଧ୍ୟମରେ ବଦଳାଇଥିବା ସାମ୍ନାକୁ ଆସିଛି । ଯେଉଁଥିରେ ନନ୍ଦିଘୋଷ ଟିଭି ଲୋଗୋ ରହିଥିବା ସ୍ପଷ୍ଟ ରହିଛି ଏଥିରେ ‘ପୁଣି ବଦଳିଲା ନିଷ୍ପତ୍ତି, ଜାନୁୟାରୀରୁ ଖୋଲିବନି ସ୍କୁଲ୍ କଲେଜ୍ ଗଣ ଶିକ୍ଷାମନ୍ତ୍ରୀ ସମୀର ଦାସଙ୍କ ସୂଚନା’ ବେଲି ଉଲ୍ଲେଖ ରହିଛି ।’ ଏଭଳି କପୋଳ କଳ୍ପିତ ଏବଂ ମିଥ୍ୟା ଖବର ଭାଇରାଲ ହେବା ପରେ, ଏହାର ସତ୍ୟାସତ୍ୟ ଜାଣିବା ପାଇଁ ମଧ୍ୟ ଅନେକ ୟୁଜର୍ସ ସ୍ପଷ୍ଟ ହେବାକୁ ଚାହିଁଛନ୍ତି ।
କାର୍ଟୁନିଷ୍ଟ ସୁଦାମ ଶେଖର ନାମକ ଜଣେ ଫେସବୁକ ୟୁଜର ଏହାକୁ ପୋଷ୍ଟ କରିବା ସହ ଖବର ବାବଦରେ ସ୍ପଷ୍ଟୀକରଣ ଜାଣିବାକୁ ମତାମତ ଲୋଡିଛନ୍ତି । କିନ୍ତୁ ପୁନର୍ବାର ଆମେ କହି ରଖିବାକୁ ଚାହୁଁ, ନନ୍ଦିଘୋଷ ଟିଭିର ବ୍ରେକିଂ ପ୍ଲେଟକୁ କୌଣସି ଦୁର୍ବୁତ୍ତ ନ୍ୟସ୍ତସ୍ବାର୍ଥ ରଖି ବ୍ୟବହାର କରିଛନ୍ତି । ସତ୍ୟ ଖବରକୁ ଏଡିଟିଂ କରି ମିଥ୍ୟା ଏବଂ ଭିତ୍ତିହୀନ ଖବରକୁ ଉଲ୍ଲେଖ କରିଛନ୍ତି । ଏଥିରେ ନନ୍ଦିଘୋଷ ଟିଭିର କୌଣସି ସମ୍ପୃକ୍ତି ନାହିଁ ।