ଭୁବନେଶ୍ୱର ଶ୍ୟାମପୁରରେ ବଡ଼ ଧରଣର ଉଛେଦ । ବିଡିଏ ପକ୍ଷରୁ ଏହି ଉଛେଦ ପକ୍ରିୟା ଆରମ୍ଭ ହୋଇଛି l ପ୍ରାୟ ୬୮ ଏକର ଜମି ଜବରଦଖଲ ପାଇଁ ବିଡିଏ ପକ୍ଷରୁ ଏହି ଉଛେଦ କରାଯାଉଛି । ବୁଲଡୋଜର ମାଡ଼ରେ ମାଟିରେ ମିଶିଛି ଶହେରୁ ଉର୍ଦ୍ଧ୍ବ ଘର l ଆଜି ଦ୍ବିତୀୟ ଦିନରେ ଚାଲିଛି ଏହି ଉଛେଦ ପକ୍ରିୟା । ଏହି ଉଛେଦ ପକ୍ରିୟାରେ ବିଡିଏ ସହ ପୋଲିସ ପ୍ରଶାସନ ରହିଥିବା ବେଳେ ୨୦ ଜେସିବି ମେସିନ ବ୍ୟବହାର କରାଯାଉଛି l ଏଥିରେ ୧୦ ପ୍ଲାଟୁନ ଫୋର୍ସ ସହ ଦମକଳ ବାହିନୀ ଓ ଦଙ୍ଗା ନିୟନ୍ତ୍ରଣ କାରି ଟିମ ଉପସ୍ଥିତ ଅଛନ୍ତି l

ପ୍ରବଳ ଖରା ଯୋଗୁଁ ସ୍କୁଲ ଛୁଟି। କଳାହାଣ୍ଡି ଜିଲ୍ଲା ପ୍ରଶାସନ ଆଜିଠୁ ୨୧ ତାରିଖ ଯାଏ ଛୁଟି ଘୋଷଣା କରିଛନ୍ତି। ସେହିପରି ସୁବର୍ଣ୍ଣପୁର ଜିଲ୍ଲାରେ ୧୮ରୁ ୨୨ ତାରିଖ ଯାଏ, ବଲାଙ୍ଗିରରେ ୧୮ରୁ ୨୧ ତାରିଖ ଯାଏ ଓ ବୌଦ୍ଧରେ ୧୮ରୁ ୨୨ ତାରିଖ ଯାଏ ଛୁଟି ଘୋଷଣା କରିଛନ୍ତି ଜିଲ୍ଲା ପ୍ରଶାସନ। ପିଲାଙ୍କ ସୁରକ୍ଷାକୁ ଦେଖି ଏହି ନିଷ୍ପତ୍ତି ନିଆଯାଇଛି। ସେପଟେ ପାଣିପାଗ ବିଜ୍ଞାନୀଙ୍କ ପକ୍ଷରୁ କୁହାଯାଇଛି,
୨୨ ତାରିଖ ପର୍ଯ୍ୟନ୍ତ ଜଳିବ ଆଭ୍ୟନ୍ତରୀଣ ଓଡ଼ିଶା । ତାତିରୁ ମିଳିବନି ନିସ୍ତାର । ଏଭଳି ଆକଳନ କରିଛନ୍ତି ବିଶିଷ୍ଟ ପାଣିପାଗ ବିଜ୍ଞାନୀ ଡ.ସୁରନ୍ଦ୍ର ନାଥ ପଶୁପାଳକ । ଏପରିକି କେତେକ ସ୍ଥାନରେ ପାରଦ ୪୫ ଡିଗ୍ରିରୁ ଅଧିକ ହୋଇପାରେ । IMD, ECMWF ଓ GFS ମଡେଲ ଅନୁଧ୍ୟାନ କରି ସେ ଏହା କହିଛନ୍ତି।
ଆଗାମୀ ୫ ଦିନ ପର୍ଯ୍ୟନ୍ତ କାଳବୈଶାଖୀର ସମ୍ଭାବନା ବି କମ୍। ଉତ୍ତର-ପଶ୍ଚିମ ଆଡ଼ୁ ଆସୁଥବା ଶୁଷ୍କ ବାୟୁ, ତାତି ବଢାଇଛି। କେତେକ ସ୍ଥାନରେ ‘ହିଟ୍ ଇଣ୍ଡେକ୍ସ’ ବୃଦ୍ଧି ପାଇ ଅସହ୍ୟ ଗୁଳୁଗୁଳି ହେଉଛି। ଏଥିପାଇଁ ସତର୍କ ରହିବା ପାଇଁ କୁହାଯାଇଛି।

ଆଜି ୧୨ ଘଣ୍ଟିଆ ମୟୂରଭଞ୍ଜ ବନ୍ଦ ପାଳନ କରାଯାଉଛି। ସକାଳ ୬ଟା ଠାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଅଖ ଚକ ବନ୍ଦ। ରାସଗୋବିନ୍ଦପୁର ଆଶ୍ରମ ବିଦ୍ୟାଳୟର ଛାତ୍ରୀଙ୍କ ମୃତ୍ୟୁ ପ୍ରତିବାଦରେ ବିଜେଡି ଏହି ବନ୍ଦ ଡାକରା ଦେଇଛି। ବିଷାକ୍ତ ଖାଦ୍ୟ ଯୋଗୁଁ ଛାତ୍ରୀଙ୍କ ମୃତ୍ଯୁ ହୋଇଥିବା ଅଭିଯୋଗ ହୋଇଛି। ବିଜେଡି କହିଛି, ଏହି ହରତାଳ ଆମ ପିଲାଙ୍କ ସୁରକ୍ଷା ପାଇଁ। ସରକାରଙ୍କ ଅବହେଳାରୁ ଛାତ୍ରୀଙ୍କ ମୃତ୍ୟୁ ହେଲା। ସଂପୃକ୍ତ ଛାତ୍ରୀକୁ ନ୍ୟାୟ ଦେବା ପାଇଁ ବନ୍ଦ ପାଳନ କରାଯାଉଛି। ଆନ୍ଦୋଳନ ହେଲେ ହିଁ ଶୋଇଥିବା ସରକାରର ନିଦ ଭାଙ୍ଗିବ। ୧୪୬ ଛାତ୍ର ଛାତ୍ରୀଙ୍କୁ ବିଷାକ୍ତ ଖାଦ୍ୟ ପ୍ରଦାନ କରିବାରେ କିଏ ଦାୟୀ ବୋଲି ପ୍ରଶ୍ନ କରିଛି ବିଜେଡି। ଏହି ବନ୍ଦକୁ ବିଭିନ୍ନ ଦଳଗତ ନିର୍ବିଶେଷରେ ସମସ୍ତେ ସମର୍ଥନ ଦେଇଛନ୍ତି। ଏହା ସହିତ ଜିଲ୍ଲା ଓକିଲ ସଙ୍ଘ, ବସ ସଙ୍ଘ ପରି ଅନେକ ସଙ୍ଗଠନ ସାମିଲ ହୋଇଛନ୍ତି। ମୟୂରଭଞ୍ଜ ବିଜେଡ଼ିର ଜିଲ୍ଲା ସଭାପତି ତଥା ପୂର୍ବତନ ମନ୍ତ୍ରୀ ସୁଦାମ ମାରାଣ୍ଡିଙ୍କ ନେତୃତ୍ବରେ ଏହି ବନ୍ଦ ପାଳନ ଚାଲିଛି। ବାଙ୍ଗିରିପୋଷି ପୁରୀ ସୁପରଫାଷ୍ଟ ଟ୍ରେନ ବେତନଟି ଷ୍ଟେସନ୍ ନିକଟରେ ଅଟକି ରହିଛି। ବାରିପଦା ଦେଇ ଯାଇଥିବା ୧୮ ନମ୍ବର ଜାତୀୟ ରାଜପଥର ପାଲବନି ବାଇପାସ, ମୁର୍ଗାବାଡ଼ି ଛକରେ ଟାୟାର ଜାଳି ରାସ୍ତା ଅବରୋଧ କରାଯାଇଛି। ଅଟକି ରହିଛି ବହୁ ଗାଡ଼ି ମଟର। ଅତ୍ୟାବଶକୀୟ ଦୋକାନ ଖୋଲା ରହିବା ସହିତ ଆମ୍ବୁଲାନ୍ସ କୁ ଅଟକାଯିବ ନାହିଁ ବୋଲି କୁହାଯାଇଛି।

ନୟାଗଡ଼ ଜିଲ୍ଲା ଖଣ୍ଡପଡ଼ା ଏସ୍‌ଡିପିଓ ମଦନ ମୋହନ ପ୍ରଧାନଙ୍କ ବିରୋଧରେ ସଂଗୀନ ଅଭିଯୋଗ । ଅଭିଯୋଗ ଆଣିଛନ୍ତି ଫତେଗଡ଼ ଥାନା ଅଞ୍ଚଳର ଜଣେ ମହିଳା । ଏକ ମାମଲାର ରଫାଦଫା ପାଇଁ ଏସ୍‌ଡିପିଓ ହ୍ଵାଟ୍ସଆପରେ ତାଙ୍କୁ ଅଶ୍ଳୀଳ ବାର୍ତ୍ତା ପଠାଉଛନ୍ତି, ଖରାପ ଉଦ୍ଦେଶ୍ୟ ରଖି ବିଭିନ୍ନ ଜାଗାକୁ ଡାକୁଛନ୍ତି। ମହିଳା ଜଣକ ଡିଜିଙ୍କ ନିକଟରେ ଲିଖିତ ଅଭିଯୋଗ କରି ତଦନ୍ତ ଓ ଏସ୍‌ଡିପିଓଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ପୀଡ଼ିତାଙ୍କ ଅଭିଯୋଗ ଅନୁସାରେ ଗତ ବର୍ଷ ଜୁଲାଇ ୩ ତାରିଖର ଏକ ଗଣ୍ଡଗୋଳକୁ ନେଇ ଥାନାରେ ମାମଲା ହୋଇଥିଲା। ଏହି ମାମଲାକୁ ନେଇ ଫତେଗଡ଼ JMFC କୋର୍ଟରୁ ଏକ ସମନ୍ ଆସିଥିଲା । ତଦନ୍ତ ସମୟରେ ଏସ୍‌ଡିପିଓ ଖରାପ ଉଦ୍ଦେଶ୍ୟ ରଖି କଥା ହୋଇଥିବା ଓ ଏକ ହୋଟେଲକୁ ଡାକିଥିବା ଅଭିଯୋଗ କରିଛନ୍ତି ପୀଡ଼ିତା। ରାଜି ନ ହେବାରୁ ଅଶ୍ଳୀଳ କଥାବାର୍ତ୍ତା କରିଥିଲେ। ଏହାର ପ୍ରମାଣ ବି ପୀଡ଼ିତାଙ୍କ ପାଖରେ ଅଛି। ତେବେ ଶାରୀରିକ ସମ୍ପର୍କ ନ ରଖିଲେ ମିଥ୍ୟା ମାମଲାରେ ସ୍ବାମୀଙ୍କୁ ଫସାଇ ଦେବାକୁ ଏସଡିପିଓ ଧମକ ଦେଇଥିବା କହିଛନ୍ତି ପୀଡ଼ିତା। କେବଳ ସେତିକି ନୁହେଁ ମିଥ୍ୟା ମାମଲାରେ ପୀଡ଼ିତାଙ୍କୁ ରାତି ସାରା ଥାନାରେ ଅଟକ ରଖି ନିଜ ଉଦ୍ଦେଶ୍ୟ ପୂରଣ କରିବେ ବୋଲି ମଧ୍ୟ ଧମକ ଦେଇଥିବାସେ ଅଭିଯୋଗ କରିଛନ୍ତି। ଏହି ସଂଗୀନ ଅଭିଯୋଗ ନେଇ ଏସଡିପିଓଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରାଯାଇଥିଲା। କିନ୍ତୁ ତାଙ୍କ ଫୋନ୍ ସୁଇଚ୍ ଅଫ୍ ଥିବାରୁ ଯୋଗାଯୋଗ ହୋଇପାରିନାହିଁ।