ଭୁବନେଶ୍ବର : ଫେରୁଛି ମୌସୁମୀ । ଛତିଶଗଡ଼ର କିଛି ଅଞ୍ଚଳରୁ ମୌସୁମୀ ଅପସାରଣ ହୋଇସାରିଛି । ସେହିପରି ବିହାର ଓ ଝାଡ଼ଖଣ୍ଡର କିଛି ଅଞ୍ଚଳରୁ ଫେରିଛି । କିନ୍ତୁ ଓଡ଼ିଶାରୁ ଏପର୍ଯ୍ୟନ୍ତ ମୌସୁମୀ ବାୟୁ ଅପସାରଣ ହୋଇନାହିଁ। ବାୟୁମଣ୍ଡଳରେ ଜଳୀୟବାଷ୍ପର ପରିମାଣ ଅଧିକ ରହିଛି । ଏହା ସହିତ ବିଭିନ୍ନ ସ୍ଥାନରେ ମଧ୍ୟ ବର୍ଷା ଜାରି ରହିଛି । ତେଣୁ ଏଭଳି ପରିସ୍ଥିତିରେ ଆଗାମୀ ଦୁଇରୁ ତିନି ଦିନ ମଧ୍ୟରେ ଓଡ଼ିଶାରୁ ମୌସୁମୀ ଅପସାରଣ ହେବାର ସମ୍ଭାବନା କମ୍ ରହିଛି । ଦିନରେ ତାତି ଖରାର ପ୍ରକୋପରେ ଅସ୍ତବ୍ୟସ୍ତ ହେଉଛି ଜନଜୀବନ । ରାଜଧାନୀ ଭୁବନେଶ୍ୱରରେ ପାରଦ ୩୫ ଡିଗ୍ରୀରୁ ଅଧିକ ରହୁଛି । ସେପଟେ ଆସନ୍ତା ୩ ଦିନ ଝଡ଼ବର୍ଷା ସହ ବଜ୍ରପାତ ପାଇଁ ୟେଲୋ ୱାର୍ଣ୍ଣିଂ ଜାରି ହୋଇଛି । ଆଜି ପାଇଁ ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁର, କଟକ, ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର, ଦେବଗଡ଼, ବରଗଡ଼, ଅନୁଗୋଳ, ଢେଙ୍କାନାଳ, କେନ୍ଦୁଝର ଓ ମୟୂରଭଞ୍ଜରେ ବର୍ଷା ସମ୍ଭାବନା ରହିଛି । ଆସନ୍ତାକାଲି ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡା, ଜଗତସିଂହପୁର, କଟକ, ସୁନ୍ଦରଗଡ଼,କେଉଁଝର ଓ ମୟୂରଭଞ୍ଜରେ ହାଲୁକାରୁ ମଧ୍ୟମ ଧରଣର ବର୍ଷା ସହ ସ୍ଥାନେ ସ୍ଥାନେ ପ୍ରବଳ ବର୍ଷାର ସମ୍ଭାବନା ରହିଛି ।….
SIRରେ ବାଦ୍ ପଡ଼ିଥିବା ଭୋଟରଙ୍କ ପାଇଁ ଶେଷ ସୁଯୋଗ
ଭୁବନେଶ୍ବର : SIRରେ ବାଦ୍ ପଡ଼ିଥିବା ଯୋଗ୍ୟ ଭୋଟର ଓ ଯୁବ ଭୋଟରଙ୍କୁ ତାଲିକାରେ ସାମିଲ ପାଇଁ ସୁଯୋଗ । ଆଜିଠାରୁ ୩ ଦିନ ବ୍ୟାପୀ ସ୍ବତନ୍ତ୍ର ଅଭିଯାନ । ୧ ଅକ୍ଟୋବର ୨୦୨୬ ସୁଦ୍ଧା ୧୮ ବର୍ଷ ବୟସ ପୂରଣ କରିଥିବା ଯୁବକ-ଯୁବତୀ କରିପାରିବେ ଆବେଦନ । ମୃତ, ସ୍ଥାନାନ୍ତରିତ, ଅନୁପସ୍ଥିତ ଓ ଦୋହରା ଭୋଟରଙ୍କ ତାଲିକା CEO ଓଡ଼ିଶା ଓ ସମ୍ପୃକ୍ତ ଜିଲ୍ଲା ୱେବସାଇଟ ରେ ଉପଲବ୍ଧ ହେବ । ଭୋଟର ତାଲିକାକୁ ଅଧିକ ସଠିକ, ସ୍ୱଚ୍ଛ ଓ ଅଦ୍ୟତନ କରିବା ଉଦ୍ଦେଶ୍ୟରେ ଆଜିଠାରୁ ରାଜ୍ୟରେ ସ୍ୱତନ୍ତ୍ର ଅଭିଯାନ ଆରମ୍ଭ ହେଉଛି । ୭, ୮ ଓ ୯ ତାରିଖ ୩ଦିନ ରାଜ୍ୟବ୍ୟାପି ଚାଲିବ ସ୍ୱତନ୍ତ୍ର ଅଭିଯାନ । SIR ପ୍ରକ୍ରିୟାରେ କୌଣସି କାରଣରୁ ଭୋଟର ତାଲିକାରୁ ବାଦ୍ ପଡ଼ିଥିବା ଯୋଗ୍ୟ ଭୋଟରମାନଙ୍କୁ ପୁନଃ ଭୋଟର ତାଲିକାରେ ସାମିଲ କରିବା ଏବଂ ନୂତନ ଭାବେ ଯୋଗ୍ୟ ହୋଇଥିବା ଯୁବ ଭୋଟରମାନଙ୍କୁ ତାଲିକାରେ ସାମିଲ କରିବା ଉଦ୍ଦେଶ୍ୟରେ ଏହି ଅଭିଯାନ ଆରମ୍ଭ କରାଯାଇଛି। ଯେଉଁ ଯୁବକ-ଯୁବତୀ ଅକ୍ଟୋବର ୧ ସୁଦ୍ଧା ୧୮ ବର୍ଷ ବୟସ ପୂରଣ କରିଛନ୍ତି, ସେମାନେ ଭୋଟର ତାଲିକାରେ ନିଜ ନାମ ସାମିଲ କରିବା ପାଇଁ ଆବେଦନ କରିପାରିବେ । ଯୋଗ୍ୟ ଯୁବ ଭୋଟରମାନେ ଫର୍ମ-୬ ମାଧ୍ୟମରେ ନାମ ପଞ୍ଜୀକରଣ ପାଇଁ ନିଜ ବୁଥ ସ୍ତରୀୟ ଅଧିକାରୀ ଙ୍କ ନିକଟରେ ଆବେଦନ କରିପାରିବେ । ଏହାସହ ଯେଉଁ ଯୋଗ୍ୟ ଭୋଟରମାନଙ୍କ ନାମ କୌଣସି କାରଣରୁ ଚୂଡ଼ାନ୍ତ ଭୋଟର ତାଲିକାରେ ସାମିଲ ହୋଇପାରି ନାହାନ୍ତି, ସେମାନେ ମଧ୍ୟ ଏହି ସ୍ୱତନ୍ତ୍ର ଅଭିଯାନ ସମୟରେ ନିଜ ନାମ ଯୋଡ଼ିବା ପାଇଁ ଆବେଦନ କରିପାରିବେ । ସଂଶୋଧନ ପ୍ରକ୍ରିୟାରେ ଚିହ୍ନଟ ହୋଇଥିବା ମୃତ, ସ୍ଥାନାନ୍ତରିତ, ଅନୁପସ୍ଥିତ ଓ ଦୋହରା ଭୋଟରମାନଙ୍କ ସମ୍ପର୍କିତ ତାଲିକା ସମ୍ପୃକ୍ତ ଜିଲ୍ଲା ଏବଂ CEO ଓଡ଼ିଶାଙ୍କ ୱେବସାଇଟରେ ଉପଲବ୍ଧ କରାଯିବ ।
ରାଜନୈତିକ ଦଳର ପ୍ରତିନିଧିମାନେ ତାଲିକାକୁ ଯାଞ୍ଚ କରି ଆବଶ୍ୟକ ଦାବି ଓ ଆପତ୍ତି ଦାଖଲ କରିପାରିବେ । BLO ମାନଙ୍କୁ ନିଜ ନିଜ ଅଧୀନସ୍ଥ ଅଞ୍ଚଳରେ ଭୋଟର ତାଲିକାରେ ବାଦ୍ ପଡିଥିବା ଯୋଗ୍ୟ ଭୋଟର ନାମ ଓ ନୂତନ ଯୁବ ଭୋଟର ଙ୍କ ନାମ ପଞ୍ଜୀକରଣରେ ଆବଶ୍ୟକ ସହଯୋଗ ଓ ମାର୍ଗଦର୍ଶନ ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି । ନାମ ଯୋଡ଼ିବାକୁ ଇଛୁକ ଯୋଗ୍ୟ ଭୋଟରମାନେ ନିଜ ନିଜ ବୁଥ୍ ସ୍ତରୀୟ ଅଧିକାରୀଙ୍କ ସହ ଯୋଗାଯୋଗ କରି ଆବେଦନ ପ୍ରକ୍ରିୟା ସମ୍ପର୍କରେ ସହାୟତା ନେଇପାରିବେ ।….
ଆଶୁତୋଷ ଦୀକ୍ଷିତ ବାୟୁସେନାର ନୂଆ ଚିଫ୍
ନନ୍ଦିଘୋଷ ବ୍ୟୁରୋ: ଏୟାର ମାର୍ଶାଲ ଆଶୁତୋଷ ଦୀକ୍ଷିତ ଭାରତୀୟ ବାୟୁସେନାର ନୂତନ ମୁଖ୍ୟ ଭାବେ ନିଯୁକ୍ତ ହୋଇଛନ୍ତି। ବିଭିନ୍ନ ପ୍ରକାରର ଯୁଦ୍ଧ ବିମାନ ଓ ବିମାନ ଚଳାଇବାରେ ତାଙ୍କର ବ୍ୟାପକ ଅଭିଜ୍ଞତା ରହିଛି। ସେ ମିରାଜ୍-୨୦୦୦, ମିଗ୍ର ବିଭିନ୍ନ ଭାରିଆଣ୍ଟ, ଏଚ୍ପିଟି-୩୨, ଏଏନ୍-୩୨, ଆଭ୍ରୋ, କିରଣ, ଜାଗୁଆର, ଆଇଏଲ୍-୭୮, ହକ୍ ଏବଂ ତେଜସ୍ ସମେତ ଅନେକ ବିମାନ ଉଡ଼ାଇଛନ୍ତି।
ସେ ଜଣେ Experimental Test Pilot ଏବଂ Qualified Flying Instructor ମଧ୍ୟ ଅଟନ୍ତି। ପ୍ରାୟ ଚାରି ଦଶନ୍ଧି ଧରି ତାଙ୍କର ଅଭିଜ୍ଞତା ଅଛି। ଅପରେସନ୍ ସାଫେଦ ସାଗର, ଅପରେସନ୍ ରକ୍ଷକ, କୋପ୍-ଇଣ୍ଡିଆ ଏବଂ ଅପରେସନ୍ ସିନ୍ଦୂର ଭଳି ଅନେକ ସାମରିକ ଅଭିଯାନରେ ସେ ସାମିଲ ଥିଲେ। ସ୍ୱଦେଶୀ LCA ତେଜସ୍ ଏବଂ ବାୟୁସେନାରେ ଅନ୍ୟାନ୍ୟ ସ୍ୱଦେଶୀ ବିମାନ ପ୍ରକଳ୍ପକୁ ଆଗେଇ ନେବାରେ ଏୟାର ମାର୍ଶାଲ ଦୀକ୍ଷିତଙ୍କର ବିଶେଷ ଭୂମିକା ରହିଛି। ତେଣୁ, ସରକାରଙ୍କ ଆତ୍ମନିର୍ଭର ଭାରତ ପଦକ୍ଷେପକୁ ସେ ଆହୁରି ଆଗକୁ ବଢ଼ାଇବେ ବୋଲି ଆଶା କରାଯାଉଛି।
ଏୟାର ମାର୍ଶାଲ ଆଶୁତୋଷ ଦୀକ୍ଷିତ ୦୬ ଡିସେମ୍ବର ୧୯୮୬ରେ ଭାରତୀୟ ବାୟୁସେନାର ଫାଇଟର୍ ଷ୍ଟ୍ରିମ୍ରେ କମିଶନ୍ ହୋଇଥିଲେ। ସେ ନ୍ୟାସନାଲ୍ ଡିଫେନ୍ସ ଏକାଡେମୀ (NDA), ଡିଫେନ୍ସ ଷ୍ଟାଫ୍ ସର୍ଭିସ୍ କଲେଜ୍ ଏବଂ ନ୍ୟାସନାଲ୍ ଡିଫେନ୍ସ କଲେଜ୍ (NDC) ର ପୂର୍ବତନ ଛାତ୍ର। ୩,୫୦୦ରୁ ଅଧିକ ଘଣ୍ଟାର ଉଡ଼ାଣ ଅଭିଜ୍ଞତା ତାଙ୍କର ରହିଛି।
ପାହାଡ ଉପରେ ଟ୍ରାଫିକ୍ ଜାମ୍ !
ନନ୍ଦିଘୋଷ ବ୍ୟୁରୋ: ସେପ୍ଟେମ୍ବର ଶେଷ ସପ୍ତାହରେ ଉତ୍ତରାଖଣ୍ଡର ଉଚ୍ଚ ହିମାଳୟ ଅଞ୍ଚଳରେ ଆରମ୍ଭ ହୋଇଥିଲା ତୁଷାରପାତ । ଯାହାଫଳରେ ଏବେ ସେଠାକୁ ପର୍ଯ୍ୟଟକଙ୍କ ସଂଖ୍ୟା ଧିରେ ଧିରେ ବଢିବାରେ ଲାଗିଛି । ଲୋକମାନେ ବଦ୍ରିନାଥ, କେଦାରନାଥ, ଗଙ୍ଗୋତ୍ରୀ ଏବଂ ହେମକୁଣ୍ଡ ସାହିବ ବ୍ୟତୀତ ଆଦି କୈଳାଶ, ଓମ୍ ପର୍ବତ ମୁନସ୍ୟାରୀ ସମେତ ଉତ୍ତରାଖଣ୍ଡର ଅନ୍ୟାନ୍ୟ ସ୍ଥାନଗୁଡିକୁ ମଧ୍ୟ ପରିଦର୍ଶନ କରୁଛନ୍ତି । ଆଉ ପର୍ଯ୍ୟଟକଙ୍କ ପ୍ରବଳ ଆଗମନ ଯୋଗୁଁ ଗତ ଶୁକ୍ରବାର, ଶନିବାର ଏବଂ ରବିବାର ପର୍ବତ ଉପରେ ଅନେକ କିଲୋମିଟର ପର୍ଯ୍ୟନ୍ତ ଟ୍ରାଫିକ୍ ଜାମ୍ ଦେଖିବାକୁ ମିଳିଥିଲା । ପ୍ରବଳ ତୁଷାରପାତ ଯୋଗୁଁ ଆଦି କୈଳାଶ ଏବଂ ଓମ୍ ପର୍ବତକୁ ଯାଉଥିବା ରାସ୍ତା ମଧ୍ୟ ଜାମ୍ ହୋଇଯାଇଥିଲା । ଫଳରେ ୧୪,୫୦୦ ଫୁଟ ଉପରେ ତୀର୍ଥଯାତ୍ରୀ ଏବଂ ଯାନବାହନର ବୃଦ୍ଧି ଯୋଗୁଁ ରାସ୍ତାରେ ଲମ୍ବା ଧାଡି ଦେଖିବାକୁ ମିଳିଥିଲା । ଅନେକ ଯାତ୍ରୀ ଘଣ୍ଟା ଘଣ୍ଟା ଧରି ଜାମ୍ ରେ ଫସି ରହିଥିଲେ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଯେଉଁଥିରେ ଭିଡିଓ ନିର୍ମାତା କହୁଛନ୍ତି ଯେ, ଆଦି କୈଳାଶ ଯିବା ରାସ୍ତାର ପ୍ରାୟ ଦେଢରୁ ଦୁଇ କିଲୋମିଟର ପର୍ଯ୍ୟନ୍ତ ଟ୍ରାଫିକ ଜାମ୍ ଦେଖିବାକୁ ମିଳିଥିଲା ।
ଯଦି ଦେଖିବା ଗତ ୩ ବର୍ଷ ମଧ୍ୟରେ ଆଦି କୈଳାଶ ଏବଂ ଓମ୍ ପର୍ବତକୁ ଯାଉଥିବା ତୀର୍ଥଯାତ୍ରୀଙ୍କ ସଂଖ୍ୟା ତିନି ଗୁଣା ବଢିଯାଇଛି । ୨୦୨୩ ମସିହାରେ ୧୦,୦୭୯ ପର୍ଯ୍ୟଟକ ଏବଂ ତୀର୍ଥଯାତ୍ରୀ ଆଦି କୈଳାଶ ପରିଦର୍ଶନ କରିଥିଲେ । ସେହିପରି ୨୦୨୪ ମସିହାରେ ୨୯,୪୨୩ ପର୍ଯ୍ୟଟକ ଆଦି କୈଳାଶ ପରିଦର୍ଶନ କରିଥିଲେ ଏବଂ ୨୦୨୫ ମସିହାରେ ୩୧,୫୫୮ ତୀର୍ଥଯାତ୍ରୀ ପରିଦର୍ଶନ କରିଥିଲେ । ଆଉ ୨୦୨୬ରେ ଏପର୍ଯ୍ୟନ୍ତ ୬୧,୯୫୦ ପର୍ଯ୍ୟଟକ ପରିଦର୍ଶନ କରିଛନ୍ତି । ତେବେ ଏଭଳି ସ୍ଥିତିରେ ଭାରି ତୂୁଷାରପାତ ପରିସ୍ଥିତିକୁ ଆହୁରି ଚ୍ୟାଲେଞ୍ଜିଂ କରିଦେଇଛି । ଗୋଟିଏ ଗାଡି ଅଟକି ଯିବାରୁ ପରେ ତା‘ ପଛକୁ ପଛ ଅନ୍ୟ ଗାଡିଗୁଡିକ ବି ଅଟକି ଯାଇଥିଲା । ଫଳରେ ଟ୍ରାଫିକ ଜାମ୍ ର ଭୟଙ୍କର ସ୍ଥିତି ଉପୁଜିଥିଲା । ତେଣୁ ପରିସ୍ଥିତିକୁ ଦେଖି ଯାତ୍ରୀଙ୍କୁ ସତର୍କ ରହିବାକୁ ଏବଂ ପ୍ରଶାସନର ପରାମର୍ଶ ପାଳନ କରିବାକୁ କୁହାଯାଇଛି ।
ଭୁବନେଶ୍ୱରରେ ଫୁଟିଲା କାଶ୍ମୀରର ଲିଲି, ହାଇଡ୍ରୋପୋନିକ୍ ପଦ୍ଧତିରେ ନୂଆ କୃଷି ପରୀକ୍ଷଣ
ନନ୍ଦିଘୋଷ ବ୍ୟୁରୋ: ରାଜଧାନୀରେ ଫୁଟିଛି ବିଦେଶୀ ଫୁଲ । ମନମୋହୁଛି ଜମୁ-କାଶ୍ମୀରର ଏସିଆଟିକ୍ ଲିଲି । ଯେଉଁ ଫୁଲ ୫ ହଜାର ଫୁଟ ଉଚ୍ଚତାର ଶୀତଳ ପରିବେଶରେ ଫୁଟେ । ସେହି ଫୁଲ ଏବେ ରାଜଧାନୀ ଭୁବନେଶ୍ଵରରେ ଫୁଟିଛି । ଶୀତତାପ ନିୟନ୍ତ୍ରିତ କୋଠରୀରେ ହିଁ ଫୁଟିଛି କାଶ୍ମୀରର ଲିଲି ଫୁଲ । ଗୋଟିଏ କି ଦୁଇଟି ନୁହେଁ । ଏକାଥରକେ ଫୁଟିଛି ୬ ରୁ ୭ ପ୍ରକାରର ୨ ଶହ ଫୁଲ ।
ହାଇଡ୍ରୋଫୋନିକ ପଦ୍ଧତି ବା ବିନା ମାଟିରେ ଫୁଲ ଫୁଟାଇଛନ୍ତି ସୁବ୍ରତ । କେଉଁଠି କଢ଼ି ଧରିଛି ତ କେଉଁଠି ଫୁଟିଛି ରଙ୍ଗବେରଙ୍ଗର ଫୁଲ । ପୂରା ଘର ଭରିଯାଇଛି ଲିଲିର ସୌନ୍ଦର୍ଯ୍ୟ ଓ ସୁଗନ୍ଧରେ । ସୁବ୍ରତ ବିଦେଶରୁ ଦାମୀ ଏସିଆଟିକ୍ ଲିଲି ଫୁଲ ମଞ୍ଜି ଆଣି ଘରେ ଫୁଲ ଫୁଟାଇ ଚାଷୀଙ୍କୁ ଦେଖାଇଛନ୍ତି ନୂଆ ରାହା । ପରୀକ୍ଷଣରେ ଅନେକ ଥିଲା ଚ୍ୟାଲେଞ୍ଜିଂ । କାରଣ କାଶ୍ମୀରର ଶୀତଳ ପରିବେଶ ଏବଂ ଓଡ଼ିଶାର ଉଷ୍ମ ଓ ଆର୍ଦ୍ର ପାଣିପାଗ ମଧ୍ୟରେ ରହିଛି ବଡ଼ ତଫାତ । କିନ୍ତୁ ପ୍ରଯୁକ୍ତି ବିଦ୍ୟା ସାହାଯ୍ୟରେ ଅସମ୍ଭବକୁ ସମ୍ଭବ କରି ଦେଖାଇଛନ୍ତି କୃଷି ବିଶେଷଜ୍ଞ । ଯାହା ଭାରତ ବର୍ଷରେ ପ୍ରଥମ ।
ପାର୍କିଂ ଅଭାବରୁ ମେନ୍ ରୋଡ୍ରେ ଟ୍ରାଫିକ ଜାମ, ଜବରଦଖଲ ବଢ଼ାଉଛି ସମସ୍ୟା
ରାଉରକେଲା: ରାଉରକେଲାର ଜନଗହଳିପୂର୍ଣ୍ଣ ମେନ ରୋଡ ଅଞ୍ଚଳରେ ନାହିଁ ଆବଶ୍ୟକୀୟ ପାର୍କିଂ ବ୍ୟବସ୍ଥା । ରାସ୍ତାର ଉଭୟ ପାର୍ଶ୍ଵରେ ଗାଡ଼ି ରଖୁଛନ୍ତି ଲୋକେ । ଉପୁଜୁଛି ଟ୍ରାଫିକ ସମସ୍ୟା। ବିଶ୍ରା ଛକରୁ ପାଓ୍ଵାର ହାଉସ ପର୍ଯ୍ୟନ୍ତ ରାସ୍ତା ଅଧିକାଂଶ ସମୟରେ ଜାମ ରହୁଛି । ଘଣ୍ଟାଘଣ୍ଟା ଧରି ଭିଡ଼ରେ ଫସି ରହୁଛନ୍ତି ଯାତ୍ରୀ । ରାସ୍ତାର ଦୁଇ କଡ଼ରେ ବାଇକ ଓ କାର ପାର୍କିଂ ହେଉଥିବାରୁ ସମସ୍ୟା ଉପୁଜୁଥିବା ଅଭିଯୋଗ ହୋଇଛି । ମେନ ରୋଡ ଅଞ୍ଚଳରେ ଆବଶ୍ୟକୀୟ ପାର୍କିଂ ବ୍ୟବସ୍ଥା ନଥିବାରୁ ଲୋକେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି ।
ଖାଲି ସେତିକି ନୁହେଁ ପାଦଚଲା ରାସ୍ତାକୁ ବ୍ୟବସାୟୀ ମାନେ ଜବରଦଖଲ କରି ନେଇଛନ୍ତି । ଯାହା ସମସ୍ୟାକୁ ଦ୍ଵିଗୁଣିତ କରୁଛି । ବାରମ୍ବାର ଦାବି ସତ୍ତ୍ଵେ ମେନ ରୋଡରେ ଆବଶ୍ୟକ ପାର୍କିଂ ବ୍ୟବସ୍ଥା କରାଯାଉନାହିଁ । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ଶୀଘ୍ର ପାଦଚଲା ରାସ୍ତା ଉପରୁ ଜବରଦଖଲ ଉଚ୍ଛେଦ କରିବା ସହ ମେନ ରୋଡ ଅଞ୍ଚଳରେ ଅଧିକ ପାର୍କିଂ ବ୍ୟବସ୍ଥା କରିବାକୁ ଦାବି ହୋଇଛି ।
ପ୍ରେମ ପ୍ରତାରଣାରେ ବଢୁଛି ମାମଲା, ୭ ମାସରେ ୧୦୩ କେସ୍
ବାରଙ୍ଗ: ୪ ଜୁନ ୨୦୨୬ । ବାରଙ୍ଗ ଥାନା କାଠଯୋଡ଼ି ନଦୀ ପଠାରୁ ମିଳିଥିଲା ଡାକ୍ତରୀ ଛାତ୍ରୀ ଚନ୍ଦ୍ରିକା ହେମ୍ବ୍ରମଙ୍କ ମୃତଦେହ । ମାମଲା ଖୋଳତାଡ଼ ପରେ ସାମ୍ନାକୁ ଆସିଥିଲା ପ୍ରେମ ପ୍ରତାରଣାର ପ୍ରମାଣ । ଓଏଏସ ଅଫିସର ଭୀମସେନ ଟୁଡୁ ଦୀର୍ଘଦିନ ଧରି ଚନ୍ଦ୍ରିକାଙ୍କୁ ପ୍ରେମ କରୁଥିବା ବେଳେ ଧୋକା ଯୋଗୁଁ ପ୍ରାଣ ହାରିଥିଲେ ଯୁବତୀ । ୨୦୨୬ ଏପ୍ରିଲ ୨୭ ତାରିଖ । ପ୍ରେମ ଓ ପରେ ପ୍ରତାରଣା କେସରେ ଗିରଫ ହୋଇଥିଲେ ଦେବରାଜ ବିଶୋୟୀ । ସେହିପରି ୨୦୨୬ ଅଗଷ୍ଟ ୨ । ଲଭ ସେକ୍ସ ଧୋକା ମାମଲାରେ ଲିଙ୍ଗରାଜ ଥାନା ପୋଲିସ ଭବତୋଷ ମହାନ୍ତିଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ୧୨ ଜୁଲାଇ, ୨୦୨୬ରେ ଶାରୀରିକ ସଂପର୍କ ପରେ ଧୋକା ଅଭିଯୋଗରେ କନ୍ଧମାଳ ଜିଲା ଟିକାବାଲିର ଦେବାଶିଷ ପ୍ରଧାନଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ନୟାପଲ୍ଲୀ ଥାନା ପୋଲିସ । ବିଧାନସଭାରୁ ମିଳିଥିବା ତଥ୍ୟ ମୁତାବକ ଗତ ୭ ମାସ ମଧ୍ୟରେ ଭୁବନେଶ୍ୱରର ବିଭିନ୍ନ ଥାନାରେ ୧୦୩ ମାମଲା ରୁଜୁ ହୋଇଥିବା ବେଳେ ୩୪ଟି ମାମଲାରେ ଆପୋଷ ବୁଝାମଣା ହୋଇଛି । ୬୩ ଜଣ ପୁରୁଷ ଗିରଫ ହୋଇ ଜେଲ ଯାଇଛନ୍ତି।
୨୦୨୫ ମସିହା ମେ’ ୧୨ ରେ ଘଟିଥିଲା ଆଉ ଏକ ଚର୍ଚ୍ଚିତ ଘଟଣା । ବେଦୀ ଉପରେ ପହଁଚି ବାହାଘର ଭାଙ୍ଗିଥିଲା ପୁରୁଣା ପ୍ରେମିକ । ରାଜଧାନୀର ଧଉଳି ଥାନା ଅଞ୍ଚଳରେ ଦେଖିବାକୁ ମିଳିଥିଲା ଏ ଘଟଣା । ଖାଲି ଭୁବନେଶ୍ବର ନୁହେଁ ସାରା ରାଜ୍ୟରେ ଏଭଳି ମାମଲା ବଢିବାରେ ଲାଗିଛି । ଧୋକାଦାରୀ କେସରେ ଦ୍ଵିତୀୟ ସ୍ଥାନରେ ରହିଛି ଗଞ୍ଜାମ ଜିଲ୍ଲା । ଯେଉଁଠି ୫୩ଟି ମାମଲା ରୁଜୁ କରିଛି ପୋଲିସ । ସେହିଭଳି ମୟୂରଭଞ୍ଜ ପୋଲିସ ୩୯ଟି ମାମଲା ରୁଜୁ କରିବା ସହ ୨୪ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି । କେନ୍ଦୁଝର ଜିଲ୍ଲା ପୋଲିସ ୩୩ଟି ମାମଲା ରୁଜୁ କରିବା ସହ ତଳକୁ ରହିଛି ।
ପିତାମାତାଙ୍କ ସହ ଏକାଠି ରହିବାକୁ ବାଧ୍ୟ ନୁହେଁ ଝିଅ !
ନନ୍ଦିଘୋଷ ବ୍ୟୁରୋ: ପିତାମାତାଙ୍କ ସହ ଏକାଠି ରହିବାକୁ ଆଉ ଝିଅମାନଙ୍କୁ ବାଧ୍ୟ କରାଯାଇ ପାରିବ ନାହିଁ । ନିଜର ପ୍ରାପ୍ତବୟସ୍କ ଝିଅଙ୍କୁ ସେମାନଙ୍କ ଇଚ୍ଛା ବିରୁଦ୍ଧରେ ସାଙ୍ଗରେ ରହିବାକୁ ବାପା ମାଆ ବାଧ୍ୟ କରିପାରିବେ ନାହିଁ । ଏଭଳି ଏକ ବଡ ନିଷ୍ପତ୍ତି ଏବେ ଶୁଣାଇଛନ୍ତି କୋର୍ଟ । ଆହ୍ଲାବାଦ ହାଇକୋର୍ଟ ଏକ ହେବିୟସ୍ କର୍ପସ ଆବେଦନକୁ ଖାରଜ କରି ଏଭଳି ରାୟ ଦେଇଛନ୍ତି । ଏକ ଆଦେଶରେ ଜଷ୍ଟିସ ସନ୍ଦିପ ଜୈନ କହିଛନ୍ତି ଯେ, ଜଣେ ସାବାଳକଙ୍କୁ ସେମାନଙ୍କ ଇଚ୍ଛା ବିରୁଦ୍ଧରେ କୌଣସି ଖାସ୍ ବ୍ୟକ୍ତିଙ୍କ ସହ ରହିବାକୁ ଏଥିପାଇଁ ବାଧ୍ୟ କରାଯାଇପାରିବ ନାହିଁ କି ସେମାନେ ତାଙ୍କ ପିତାମାତା । ଏହାସହ ପିତାମାତା ତାଙ୍କ ପ୍ରାପ୍ତବୟସ୍କ ଝିଅକୁ ସେମାନଙ୍କ ଇଚ୍ଛା ବିରୁଦ୍ଧରେ ତାଙ୍କ ସହ ରହିବାକୁ ଏଭଳି ଆବେଦନ ଦାଖଲ କରିପାରିବେ ନାହିଁ ବୋଲି କୋର୍ଟ ଶୁଣାଇଦେଇଛନ୍ତି ।
ଏହି ମାମଲାରେ କଳାବତୀ ଦେବୀ ନାମକ ଜଣେ ମହିଳା କୋର୍ଟରେ ହେବିୟସ୍ କର୍ପସ ଆବେଦନ ଦାୟର କରିଥିଲେ । ଯାହାକୁ ଜର୍ଜ ଖାରଜ କରିଦେଇଛନ୍ତି । ଏହି ଆବେଦନରେ ତାଙ୍କ ୨୫ ବର୍ଷୀୟ ଝିଅଙ୍କୁ କୋର୍ଟରେ ହାଜର ହେବାକୁ ଅନୁରୋଧ କରାଯାଇଥିଲା । ଯାହାପରେ ୧୭ ଅଗଷ୍ଟ ୨୦୨୬ରେ କୋର୍ଟ ତାଙ୍କ ଝିଅକୁ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦେଇଥିଲେ । ଏହି ନିର୍ଦ୍ଦେଶ ପରେ କୋର୍ଟରେ ଝିଅକୁ ହାଜର କରାଯାଇଥିଲା । ଆଉ କୋର୍ଟଙ୍କ ସହିତ କଥାବାର୍ତ୍ତା ସମୟରେ ମହିଳାଙ୍କ ଝିଅ ପୂଜା କହିଥିଲେ ଯେ, ସେ ନିଜ ଇଚ୍ଛାରେ ଦିଲ୍ଲୀରେ ସ୍ବାଧୀନ ଭାବରେ ରହୁଛନ୍ତି ଏବଂ କୌଣସି ବେଆଇନ୍ ଓ ଅବୈଧ ଭାବରେ ଅଟକ ନାହାନ୍ତି । ଏହାସହ ସେ ସଫା ସଫା କହିଦେଇଥିଲେ ଯେ ସେ ତାଙ୍କ ମା’ଙ୍କ ସହ ରହିବାକୁ ଚାହୁଁ ନାହାନ୍ତି । ସେ ଅଭିଯୋଗ କରିଥିଲେ ଯେ ତାଙ୍କ ମାଆ ତାଙ୍କୁ ଭଲ ବ୍ୟବହାର ଦେଖାନ୍ତି ନାହିଁ ଏବଂ ତାଙ୍କ ନିଜ ବାପଘରେ ତାଙ୍କୁ ଖରାପ ବ୍ୟବହାର ସହ ନିର୍ଯ୍ୟାତନା ଦିଆଯାଉଥିଲା । ଅନ୍ୟପଟେ ତାଙ୍କ ମା‘, ଝିଅର ଏଭଳି ଅଭିଯୋଗ ଅସ୍ବୀକାର କରିବା ସହ ଝିଅ ତାଙ୍କ ସହ ନିଜ ବାପଘରେ ରହୁ ବୋଲି ଚାହୁଁଥିଲେ । ହେଲେ କୋର୍ଟ ଝିଅର ବୟାନକୁ ବିଚାର କରି କହିଥିଲେ ଯେ, ଝିଅ ସାବାଳକ ଏବଂ ସକ୍ଷମ । ତେଣୁ ସେ ନିଜ ପସନ୍ଦର ବ୍ୟକ୍ତିଙ୍କ ସହ ନିଜ ଇଚ୍ଛା ମୁତାବକ ଜାଗାରେ ରହିବାକୁ ସମ୍ପୂର୍ଣ୍ଣ ରୂପେ ସ୍ବାଧୀନ । ଏହା କହି କୋର୍ଟ ଏହି ଆବେଦନକୁ ଖାରଜ କରିଦେଇଥିଲେ ।
ଫିଜିକ୍ସରେ ବୈଜ୍ଞାନିକ ଫ୍ରାନ୍ସିସ୍ ହାଲଜେନଙ୍କୁ ନୋବେଲ ସମ୍ମାନ
ନନ୍ଦିଘୋଷ ବ୍ୟୁରୋ: ପଦାର୍ଥ ବିଜ୍ଞାନ ପାଇଁ ନୋବେଲ ଘୋଷଣା । ରୟାଲ ସ୍ବଡ଼ିସ୍ ଏକାଡ଼େମୀ ଅଫ୍ ସାଇନ୍ସ ପକ୍ଷରୁ ପଦାର୍ଥ ବିଜ୍ଞାନରେ ବୈଜ୍ଞାନିକ ଫ୍ରାନ୍ସିସ୍ ହାଲଜେନଙ୍କୁ ନୋବେଲ ସମ୍ମାନ ନେଇ ମନୋନୀତ କରାଯାଇଛି ।
ରୟାଲ ସ୍ବଡ଼ିସ୍ ଏକାଡ଼େମୀ ଅଫ ସାଇନ୍ସେସ୍ ପକ୍ଷରୁ ତାଙ୍କୁ ଆଇସକ୍ୟୁବ ନ୍ୟୁଟ୍ରିନୋ ଅବଜରଭେଟୋରିରେ ଗୁରୁତ୍ବପୂର୍ଣ୍ଣ ଅବଦାନ ଓ ମହାକାଶରୁ ପୃଥିବୀକୁ ଆସୁଥିବା ଅତ୍ୟଧିକ ଶକ୍ତିଶାଳୀ ନ୍ୟୁଟ୍ରିନୋ କଣିକାର ଆବିଷ୍କାର ପାଇଁ ତାଙ୍କୁ ନୋବଲେ ସମ୍ମାନ ପାଇଁ ଚୟନ କରାଯାଇଛି। ବୈଜ୍ଞାନିକ ଫ୍ରାନ୍ସିସ୍ ହାଲଜେନ୍ ଦକ୍ଷିଣ ମେରୁର ବରଫ ଚାଦର ବ୍ୟବହାର କରି ନ୍ୟୁଟ୍ରିନୋ ନାମକ ରହସ୍ୟମୟ କଣିକାଗୁଡ଼ିକ ଟ୍ରାକ କରିବା ପାଇଁ ଏକ କୌଶଳର ଉଦ୍ଦଭାବନ କରିଛନ୍ତି । ଯାହା ଜ୍ୟୋର୍ତିବିଜ୍ଞାନର ଏକ ସମୂର୍ଣ୍ଣ ନୂତନ ଶାଖାର ମୂଳଦୁଆ ସ୍ଥାପନ କରିଛି ।
ନ୍ୟୁଟ୍ରିନୋ ଅତ୍ୟନ୍ତ କ୍ଷୁନ୍ଦ୍ର କଣିକା ଅଟେ । ଏସବୁ ସୂର୍ଯ୍ୟ, ତାରା ଓ ମହାକାଶରେ ଘଟୁଥିବା ଶକ୍ତିଶାଳୀ ଘଟଣାରୁ ଉତ୍ପନ ହୁଅନ୍ତି । ପ୍ରତି ସେକେଣ୍ତରେ କୋଟି କୋଟି ନ୍ୟୁଟ୍ରିନୋ ପୃଥିବୀ ଓ ଆମ ଶରୀର ଦେଇ ଅତିକ୍ରମ କରୁଥିଲେ ମଧ୍ୟ ଏହାର ପ୍ରଭାବ ଆମେ ଅନୁଭବ କରିପାରୁନାହୁଁ । ଏହି କ୍ଷୁନ୍ଦ୍ର କଣିକା ଗୁଡ଼ିକ ପଦାର୍ଥ ମଧ୍ୟ ଦେଇ ବିନା ଧକ୍କାରେ ଅତିକ୍ରମ କରିଥାଆନ୍ତି । ତେବେ ଏହି ସମସ୍ୟାର ସମାଧାନ ନେଇ ହାଲଜେନ୍ ସଫଳ ହୋଇଛନ୍ତି । ତେବେ ଆସନ୍ତା ଡ଼ିସେମ୍ବର ମାସରେ ସ୍ବିଡ଼େନର ରାଜଧାନୀ ଷ୍ଟକହୋମରେ ତାଙ୍କୁ ନୋବେଲରେ ସମ୍ମାନିତ କରାଯିବ । ୨୦୨୬ ବର୍ଷ ପାଇଁ ନୋବେଲ ପୁରସ୍କାର ରାଶି ୧୨ ନିୟୁତ ସ୍ୱିଡିସ୍ କ୍ରୋନର (ଭାରତୀୟ ମୁଦ୍ରାରେ ପ୍ରାୟ ୧୧.୫ ରୁ ୧୨ କୋଟି) ବୋଲି ସ୍ଥିର କରାଯାଇଛି ।
ମା’ ମଙ୍ଗଳାଙ୍କ ପୀଠରେ ନିଶା ମଙ୍ଗଳବାର ପୂଜା
ପୁରୀ : ପୁରୀ ଜିଲ୍ଲା କାକଟପୁର ଅଧିଷ୍ଠାତ୍ରୀ ମା ମଙ୍ଗଳାଙ୍କ ପୀଠରେ ଚାଲିଛି ଷୋଡ଼ଶ ଉପଚାର ପୂଜା । ଏହି ଦିନରେ ୧୬ ପ୍ରକାର ବେଶ ଧାରଣ କରନ୍ତି ମା। ଷୋଡଶ ଉପଚାରରେ ପୂଜା ହେଉଥିବାବେଳେ ଷୋଡଶ ଭୋଗ ଲାଗି ହୋଇଥାଏ। ପ୍ରତିଦିନ ମା’ଙ୍କ ଅପୂର୍ବ ସୁନାବେଶ ଦର୍ଶନ ପାଇଁ ହଜାର ହଜାର ଭକ୍ତଙ୍କ ଭିଡ ଜମିଛୁ। ଏହି ୧୬ ଦିନ ଭିତରେ ପଡୁଥିବା ମଙ୍ଗଳବାରକୁ ନିଶା ମଙ୍ଗଳବାର ଭାବେ ପାଳନ କରାଯାଏ । ଆଶ୍ୱିନର ଏହି ନିଶା ମଙ୍ଗଳବାର ପୂଜା ରାତି ୧୨ଟା ପରେ ନିଶା ନିସ୍ତବ୍ଧତାରେ ହୋଇଥାଏ। ରାତିରେ ନିଷ୍ଠାର ସହ ଆଠକେରା ଦୂବ, ଆଠଖିଅ ସୂତାରେ ମା’ଙ୍କୁ ପୂଜା କଲେ ମନସ୍କାମନା ପୂରଣ ହୁଏ ବୋଲି ବିଶ୍ବାସ ରହିଛି। ବିଶେଷ କରି ପୁଅର ମଙ୍ଗଳ ପାଇଁ ମା’ମାନେ ଏହି ବ୍ରତକୁ ଅତ୍ୟନ୍ତ ନିଷ୍ଠାର ସହ ପାଳନ କରୁଛନ୍ତି।
କୁହାଯାଏ ନିଷ୍ଠାର ସହ ନିଶା ମଙ୍ଗଳବାର ଓଷା କରି ସାଧବାଣୀ ନିଜ ସାତ ପୁଅର ଜୀବନ ଫେରିପାଇଥିଲା। ନିଶା ମଙ୍ଗଳବାରରେ ମା “ଜାଗ୍ରତ ଥାନ୍ତି ଓ ଦର୍ଶନ ଦିଅନ୍ତି ବୋଲି ବିଶ୍ବାସ ରହିଛି। ସେବେଠାରୁ ମାନସିକଧାରୀ ମାମାନେ ରାତି ଅନିଦ୍ରା ରହି ପୁଅର ମଙ୍ଗଳ ପାଇଁ ମା’ଙ୍କୁ ପୂଜା କରିବା ସହିତ ଉପାସ ରହି ନିଷ୍ଠାର ସହିତ ଏହି ବ୍ରତ ପାଳନ କରିଆସୁଛନ୍ତି।