କୋରାପୁଟ:କୋରାପୁଟରେ ଅନଲାଇନ ଖେଳରୁ ସୁପାରି କିଲିଂ । 17 ଲକ୍ଷ ଟଙ୍କାରେ ପାରଳାଖେମୁଣ୍ଡିରୁ ଆସିଥିଲେ ସୁପାରି କିଲର । ଶ୍ୱାସ ରୁଦ୍ଧ କରି ଯୁବକଙ୍କୁ କରିଥିଲେ ହତ୍ୟା। ଗତ 3 ତାରିଖରେ ପଟାଙ୍ଗୀ ଗଣେଶ ମନ୍ଦିର ନିକଟରୁ ଗଙ୍ଗା ଚୌଧୁରୀ ନାମକ ଜଣେ ଯୁବକଙ୍କ ମୃତଦେହ ଉଦ୍ଧାର କରାଯାଇଥିଲା । ହତ୍ୟା ଓ ଷଡଯନ୍ତ୍ର ମାମଲାରେ 3 ଜଣକୁ ଗିରଫ କରିଛି ପଟାଙ୍ଗୀ ପୋଲିସ। ଏସଂପର୍କରେ ସୁନାବେଡ଼ା ଏସଡିପିଓ ନିରଞ୍ଜନ ବେହେରା ସୂଚନା ଦେଇଛନ୍ତି । ସୂଚନା ଅନୁସାରେ ଅନଲାଇନ ଗେମରେ ୩ଲକ୍ଷ ଟଙ୍କା ହାରିଯାଇଥିଲେ ସୁନୀଲ ପାଢୀ । ବହୁ କଷ୍ଟରେ ଦେଢ ଲକ୍ଷ ଟଙ୍କା ସୁଝିଥିଲେ । ଏହାପରେ ସୁନିଲଙ୍କ ସାନଭାଇ ଅନୀଲ୍, ଗଙ୍ଗା ଚୌଧୁରୀକୁ ହତ୍ୟା କରିବାକୁ ଷଡଯନ୍ତ୍ର କରିଥିଲା । ଅନୀଲ୍ ପାରଳାଖେମୁଣ୍ଡିରୁ ଦୁଇଜଣ ସୁପାରି କିଲରଙ୍କୁ 17ଲକ୍ଷ ଟଙ୍କାରେ ଡିଲ କରି ପଟାଙ୍ଗୀ ଆଣିଥିଲା । ଆଡଭାନସରେ 40ହଜାର ଟଙ୍କା ଦେଇଥିଲା । ଦୁଇ ସୁପାରି କିଲରଙ୍କୁ ସହଯ଼ୋଗ କରିଥିଲେ ଅନୀଲ ଓ ଅଜିତ ଖିଲୋ । ଆଉ 3ତାରିଖ ଦିନ ହତ୍ୟାକୁ ରୂପ ଦେଇଥିଲେ । ପୋଲିସ ଏହି ଘଟଣାରେ ଜଣେ ସୁପାରି କିଲର ଗଣେଶ ରାଉଳକୁ ଗିରଫ କରିଥିବା ବେଳେ ଆଉ ଜଣେ ଫେରାର ଅଛି । ସେପଟେ ସୁନୀଲର ଭାଇ ଅନୀଲ ଓ ଅଜିତ ଖିଲୋଙ୍କୁ ମଧ୍ୟ ଗିରଫ କରାଯ଼ାଇଛି ।
ପୁରୀରେ ବି ମୋ ନାଁରେ ଜମି କିଣିଛି ଓଟିଭି, ରବୀନ୍ଦ୍ରଙ୍କ ବିସ୍ଫୋରକ ବୟାନ
ଭୁବନେଶ୍ୱର: ସାରୁଅ ଜମି କେଳେଙ୍କାରୀ ମାମଲାରେ ବଡ଼ ବୟାନ । ଓଡ଼ିଶା ଇନଫ୍ରାଟେକ୍ ପାଇଭେଟ୍ ଲିମିଟେଡ୍ କିଭଳି ରବୀନ୍ଦ୍ରଙ୍କ ଅଜାଣତରେ ତାଙ୍କ ନାଁରେ କରିଥିଲା ଜମି କାରବାର । ଏସବୁ ଉପରେ ମୁହଁ ଖୋଲିଛନ୍ତି ସଂସ୍ଥାର ପୂର୍ବତନ କର୍ମଚାରୀ ରବୀନ୍ଦ୍ର ସେଠୀ । କେବଳ ଖୋର୍ଦ୍ଧା ସାରୁଅରେ ନୁହଁ ପୁରୀରେ ମଧ୍ୟ ରବୀନ୍ଦ୍ରଙ୍କୁ ମୋହରା କରି କମ୍ପାନୀ ଜମି କିଣିଛି । ଜଗି ଓ ଜୟ ପଣ୍ଡାଙ୍କ ଓରଟେଲ କମ୍ପାନୀରେ ରବୀନ୍ଦ୍ର ୨୦୦୧ରୁ ଡ୍ରାଇଭର ଭାବେ କାମ କରୁଥିଲେ । ପଣ୍ଡା ପରିବାରର କମ୍ପାନୀ ଗଞ୍ଜାମ ଜିଲ୍ଲାର ରବୀନ୍ଦ୍ରଙ୍କୁ ମୋହରା କରି କିଭଳି କରିଥିଲା ଜମି କାରବାର । ସେସବୁ ବଖାଣିଛନ୍ତି ରବୀନ୍ଦ୍ର ।
ମାସିକ ୮ ହଜାର ଟଙ୍କାରେ ଓରଟେଲରେ ଡ୍ରାଇଭର ଭାବେ କାମ କରୁଥିଲେ ରବୀନ୍ଦ୍ର । କମ୍ ଦରମା ତଳିଆ କର୍ମଚାରୀ ପୁଣି ଦଳିତ ଶ୍ରେଣୀର । ଏସବୁ ଦେଖି ରବୀନ୍ଦ୍ରଙ୍କୁ ଫାଶରେ ପକାଇଥିଲା ଓରଟେଲ୍ । ହରିଜନ ଦଳିତଙ୍କ ଜମି ତାଙ୍କ ନାମରେ କିଣିବାକୁ କର୍ତ୍ତୃପକ୍ଷ କହିଥିଲେ । ରବୀନ୍ଦ୍ର ମନା କରିବାରୁ ତାଙ୍କୁ ଚାକିରି ଛଡ଼ାଇ ନେବାର ଭୟ ଦେଖାଇଥିଲା ଓରଟେଲ୍ । ରବୀନ୍ଦ୍ରଙ୍କ ଅନିଚ୍ଛା ସତ୍ତ୍ୱେ ଅରଟେଲ୍ କର୍ତ୍ତୃପକ୍ଷ ଡରାଇ, ଧମକାଇ ରବୀନ୍ଦ୍ରଙ୍କ ଦସ୍ତଖତ କାଗଜପତ୍ରରେ କରାଇଥିଲେ । ଏନେଇ ରବୀନ୍ଦ୍ର ଖୋର୍ଦ୍ଧା ଜିଲ୍ଲାପାଳଙ୍କୁ ଲିଖିତ ଆକାରରେ ଜଣାଇଛନ୍ତି ।
କେବଳ ଖୋର୍ଦ୍ଧା ସାରୁଅରେ ପୁରୀରେ ବି ରବୀନ୍ଦ୍ର ମୋହରା କରିଛି ଓରଟେଲ୍ । ପୁରୀରେ କିଣିଥିବା ଜମି କାଗଜପତ୍ର ରବୀନ୍ଦ୍ର ନାଁରେ ରହିଛି । କିନ୍ତୁ, କମ୍ପାନୀ କିଭଳି କେମିତି ତାଙ୍କ ନାଁରେ ଜମି କିଣିଲା ସେ କିଛି ଜାଣିନାହାଁନ୍ତି । ଖୋର୍ଦ୍ଧା, ପୁରୀ ଛଡ଼ା କମ୍ପାନୀ ବିଭିନ୍ନ ସ୍ଥାନରେ ରବୀନ୍ଦ୍ରଙ୍କ ନାଁରେ ଜମି କିଣିଛି । ଏସବୁକୁ ନେଇ ରବୀନ୍ଦ୍ର ଭୟଭୀତ ହୋଇ ପଡ଼ିଥିବା କହିଛନ୍ତି । ରବୀନ୍ଦ୍ରଙ୍କ ନାଁରେ କମ୍ପାନୀ କିଣିଥିବା ଜମିକୁ ସେହି ଲୋକଙ୍କୁ ଫେରାଇ ଦେବାକୁ ସେ ସରକାରଙ୍କୁ ଅନୁରୋଧ କରିଛନ୍ତି ।
ଜଗି ପଣ୍ଡା ଓ ବୈଜୟନ୍ତ ପଣ୍ଡାଙ୍କୁ ରବୀନ୍ଦ୍ର ପ୍ରଶ୍ନ କରିଛନ୍ତି । ପଣ୍ଡା ପରିବାର ରାଜ୍ୟରେ କୋଟି କୋଟି ଟଙ୍କାର ବ୍ୟବସାୟ କରୁଥିବା ବେଳେ ଦଳିତ ପରିବାରର ରବୀନ୍ଦ୍ରଙ୍କୁ କାହିଁକି ଜମି କିଣାବିକାରେ ବ୍ୟବହାର କଲେ ? ମୋ ଜରିଆରେ ଗରିବ, ହରିଜନଙ୍କ ଜମି ହଡ଼ପ କରିଛନ୍ତି । ଚଞ୍ଚକତା କରି ଶାଗ ମାଛ ଦରରେ ଗରିବଙ୍କ ଜମି ବେଆଇନ୍ ଭାବେ କିଣାଯାଇଥିବାରୁ ଜଗି ପଣ୍ଡା ଓ ବୈଜୟନ୍ତ ପଣ୍ଡାଙ୍କୁ ଗିରଫ କରିବାକୁ ରବୀନ୍ଦ୍ର ଦାବି କରିଛନ୍ତି । ଏବେ ସାରୁଅ ଜମି କାରବାରର ତଦନ୍ତ କ୍ରାଇମବ୍ରାଞ୍ଚ କରୁଛି ।
ଭାରତରେ କୋଭିସିଲ୍ଡର ତୃତୀୟ ପର୍ଯ୍ୟାୟ ପରୀକ୍ଷଣ, ସଫଳ ହେଲେ ଜାନୁଆରୀରୁ ମିଳିବ ଭାକ୍ସିନ୍ !
ନୂଆଦିଲ୍ଲୀ: ଖୁବଶୀଘ୍ର ଭାରତରେ ହେବ କରୋନା ଭାକ୍ସିନ କୋଭିସିଲ୍ଡର ତୃତୀୟ ପର୍ଯ୍ୟାୟ କ୍ଲିନିକାଲ ଟ୍ରାଏଲ୍ । ଭାରତରେ ଅକ୍ସଫୋର୍ଡ ଓ ଆଷ୍ଟ୍ରୋଜେନିକା ଭାକ୍ସିନର ଟ୍ରାଏଲ କରୁଥିବା ସିରମ ଇନଷ୍ଟିଚ୍ୟୁଟ୍ କୋଭିଡ୍ ୧୯ ଭାକ୍ସିନର ତୃତୀୟ ପର୍ଯ୍ୟାୟ ଟ୍ରାଏଲ ପାଇଁ ରାସ୍ତା ସଫା ହୋଇଛି । ସିରମ ଇନଷ୍ଟିଚ୍ୟୁଟ୍ ଅଫ ଇଣ୍ଡିଆ ଓ ଆଇସିଏମଆର ଘୋଷଣା କରିଛନ୍ତି ଯେ, ଭାରତରେ କୋଭିସିଲ୍ଡର କ୍ଲିନିକାଲ ଟ୍ରାଏଲ ପାଇଁ ତୃତୀୟ ପର୍ଯ୍ୟାୟ ଏନରୋଲମେଣ୍ଟ ସମ୍ପନ୍ନ ହୋଇଛି ।
କରୋନା ଭାଇରସ୍ ଆତଙ୍କ ଭିତରେ ଏବେ ସମସ୍ତଙ୍କ ନଜର ଏହାର ଟିକା ଉପରେ ରହିଛି । ଏହା ପୂର୍ବରୁ ପୁନେ ସ୍ଥିତ ଦେଶର ବଡ଼ ଔଷଧ ନିର୍ମାତା ସିରମ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର କାର୍ଯ୍ୟକାରୀ ଅଧିକାରୀ ଆଦର ପୁନାଓ୍ୱାଲା କହିଥିଲେ ଯେ, ଜାନୁୟାରୀ ୨୦୨୧ ସୁଦ୍ଧା ଭାରତରେ କରୋନା ଭାକ୍ସିନ ଉପଲବ୍ଧ ହେବ ।
ଭାରତ ଓ ୟୁନାଇଟେଡ୍ କିଙ୍ଗ୍ଡମ୍ରେ ପରୀକ୍ଷଣ ସଫଳତା ଓ ରେଗୁଲେଟରୀ ବଡିର ମଞ୍ଜୁରୀକୁ ଅପେକ୍ଷା କରାଯାଇଛି । ଯଦି ଏହା ପ୍ରତିରୋଧକ ଓ ପ୍ରଭବୀ ସାବ୍ୟସ୍ତ ହୁଏ ତେବେ ଆସନ୍ତାବର୍ଷ ସୁଦ୍ଧା ଏହି ଟିକା ଭାରତରେ ଉପଲବ୍ଧ ହେବ ବୋଲି ସେ ଆଶା ପ୍ରକଟ କରିଥିଲେ । ସୂଚନା ଯୋଗ୍ୟ ଯେ, ସିରମ୍ ଇନଷ୍ଟିଚ୍ୟୁଟ୍ ଓ ବ୍ରିଟିଶ ସ୍ୱୀଡିସ୍ ଔଷଧ କମ୍ପାନୀ ଆଷ୍ଟ୍ରୋଜୋନିକା ସହ ମିଶି କୋଭିଡ୍ ୧୯ ଭାକ୍ସିନ୍ ତିଆରି କରିବା କାମରେ ଲାଗିଛନ୍ତି ।
ଅନ୍ୟପଟେ କରୋନା ସଂକଟ ସମୟରେ ନୂଆ ଆଶା ଦେଖାଇଛି ଫାଇଜର ଭାକ୍ସିନ । ତେବେ ଏହା କେବଳ କିଛି ପ୍ରଗତିଶୀଳ ଦେଶରେ ବଣ୍ଟନ ସମ୍ଭବ ବୋଲି କହିଛନ୍ତି ବିଶ୍ୱ ସ୍ୱାସ୍ଥ୍ୟ ସଂଗଠନ ଅଧିକାରୀ । କାରଣ ଏହାର ଷ୍ଟୋରେଜ୍ ନେଇ ରହିଛି ଅନେକ ଅସୁବିଧା । ମାଇନସ୍ ୭୦ ଡିଗ୍ରୀ ସେଣ୍ଟିଗ୍ରେଡ୍ରେ ଏହାର ଷ୍ଟୋରେଜ୍ ସମ୍ଭବ ବୋଲି କୁହାଯାଉଥିବାରୁ କିଛି ଦେଶରେ ଏହାକୁ ରଖିବା ସମ୍ଭବ ନୁହେଁ ବୋଲି କୁହାଯାଉଛି । ଏମ୍ସ ନିର୍ଦ୍ଦେଶକ ଡାକ୍ତର ରଣଦୀପ ଗୁଲେରିଆ ମଧ୍ୟ ସମାନ ଆଶଙ୍କା ବ୍ୟକ୍ତ କରିଛନ୍ତି । ଭାରତ ପରି ବିକଶିତ ଦେଶରେ ଏହାକୁ ନେଇ ଯୋଜନା ପ୍ରସ୍ତୁତ ହୋଇଥିଲେ ସୁଦ୍ଧା ଗ୍ରାମାଞ୍ଚଳ କ୍ଷେତ୍ରରେ ଏହାର ବଣ୍ଟନ କାର୍ଯ୍ୟ, ଚ୍ୟାଲେଞ୍ଜ ସୃଷ୍ଟି କରିପାରେ ବୋଲି କହିଛନ୍ତି ଗୁଲେରିଆ । ଫାଇଜର ଭାକ୍ସିନ କରୋନା ଉପରେ ୯୦ ପ୍ରତିଶତ ପ୍ରଭାବଶାଳୀ ବୋଲି ଦାବି କରିଥିଲେ ଫାଇଜରର ସିଇଓ ଡାକ୍ତର ଆଲବର୍ଟ ।
ହାର୍ ପରେ କାରଣ ଖୋଜୁଛି ଦଳ; ରାବ୍ରି ଦେବୀଙ୍କ ବାସଭବନରେ ବୈଠକ, ତେଜସ୍ୱୀ ଅନୁପସ୍ଥିତ…
ପାଟଣା: ୨୦୧୫ର ୧୭୮ଆସନ, ୨୦୨୦ରେ ଆସି ୧୧୦ରେ ଅଟକିଲା । ନୀତିଶ ବିରୋଧୀ ହାୱା ଓ ତେଜସ୍ୱୀଙ୍କ ଅଦ୍ଭୁଦପୂର୍ବ ପ୍ରଚାରପ୍ରସାର ସତ୍ତ୍ୱେ ମଧ୍ୟ ଆରଜେଡି ଯୁକ୍ତ ମହାଗଠବନ୍ଧନ ସରକାର ଗଠନ କରିବାରେ ସକ୍ଷମ ହେଲାନି । ବିହାର ନିର୍ବାଚନ ଫଳ ଏଭଳି ଏକ ସ୍ଥିତିରେ ଆସି ଅଟକିଲା ଯାହା କେବଳ ଏକଜିଟ୍ ପୋଲକୁ ଭୁଲ୍ ପ୍ରମାଣିତ କଲା ବୋଲି ନୁହେଁ ବରଂ ନୀତିଶ ବିରୋଧୀ ରାଜନୈତିକ ଗୋଷ୍ଠୀଙ୍କ ମୁହଁ ମଧ୍ୟ ବନ୍ଦ କଲା ।
ତେବେ ନିର୍ବାଚନରେ ପରାଜୟ ପରେ ଆରଜେଡି ଏବେ ମାନସମନ୍ଥନ କରିଛି । କେଉଁ କେଉଁ ଯୋଗୁଁ ନୀତିଶଙ୍କ ଅପରାଜୟ ରଥକୁ ଅଟକାଇବାକୁ ଆରଜେଡି ଅସମର୍ଥ ହେଲେ ସେନେଇ ଦଳ ବିଚାର ବିମର୍ଷ କରିବାକୁ ଏକାଠି ହୋଇଛି । ଲାଲୁଙ୍କ ଧର୍ମପତ୍ନୀ ରାବ୍ରି ଦେବୀଙ୍କ ବାସ ଭବନରେ ଆରଜେଡିର ପ୍ରାୟ ସମସ୍ତ ତୁଙ୍ଗ ନେତା ଏକତ୍ରିତ ହୋଇଛନ୍ତି । ତେଜସ୍ୱୀ ଦଳର ପ୍ରଦର୍ଶନକୁ ନେଇ ସନ୍ତୁଷ୍ଟ ଥିବା କଥା ଗଣମାଧ୍ୟମକୁ କହିଥିଲେ ମଧ୍ୟ ବାସ୍ତବରେ ସେ କେତେ ହତାଶ ହୋଇଛନ୍ତି ତାହା ତାଙ୍କର ପ୍ରତିକ୍ରିୟା ବୟାନ କରିଛି । ଆରଜେଡି ବିହାରରେ ସଂଖ୍ୟା ଗରିଷ୍ଠ ଦଳ ହୋଇଥିଲେ ମଧ୍ୟ ବିଭିନ୍ନ କାରଣ ରହିଛି, ଯାହା ମହାଗଠବନ୍ଧନକୁ ସରକାର କରିବାକୁ ଦେଲା ନାହିଁ । ଆଜିର ବୈଠକରେ ତେଜସ୍ୱୀଙ୍କୁ ଦେଖିବାକୁ ମିଳିନଥିଲା । ତେବେ ବିଧାନସଭା ଓ ବିଧାନ ପରିଷଦର ପ୍ରାୟ ସମସ୍ତ ସଦସ୍ୟ ଉପସ୍ଥିତି ଥିବା ବେଳେ ରାଜ୍ୟସଭା ସଦସ୍ୟମାନେ ବୈଠକରେ ନଥିଲେ । ଦଳର ପ୍ରାୟ ସମସ୍ତ ଗୁରୁତ୍ୱପୂର୍ଣ୍ଣ ନେତା ବୈଠକରେ ଥିବା ବେଳେ ତେଜସ୍ୱୀ କାହିଁକି ଅନୁପସ୍ଥିତ ରହିଲେ ସେନେଇ ସୂଚନା ନାହିଁ ।
କଂଗ୍ରେସକୁ ମାତ୍ରାଧିକ ଆସନରେ ନିର୍ବାଚନ ଲଢିବାର ସୁଯୋଗ ଦେବା, ଅତ୍ୟଧିକ ନୂଆ ଚେହେରା ଉପରେ ଭରସା କରିବା, ସୀମାନ୍ତ ଅଞ୍ଚଳରେ ଏଆଇଏମଆଇଏମ ଭଳି ଛୋଟ ଛୋଟ ରାଜନୈତିକ ଦଳ ସହ ବୁଝାମଣାର ଅଭାବ ଭଳି ଅନେକ ପ୍ରସଙ୍ଗ ଯାହା ଉପରେ ଦଳ ମାନସମନ୍ଥନ କରିଛି ।
ପରାଜୟ ପରେ ମାଡାମ୍ଙ୍କ ବାସଭବନରେ ମାନସମନ୍ଥନ, କେମିତି ହାରିଲା ଦଳ ?
ପଟନା: ବିହାରରେ ଏବେ ନୂଆ ସରକାର ନେଇ ଆରମ୍ଭ ହୋଇଯାଇଛି କସରତ । ଏନଡିଏ ସଂଖ୍ୟା ଗରିଷ୍ଠତା ହାସଲ କରିବା ପରେ ଦଳରେ ପ୍ରବଳ ଉତ୍ସାହ ପ୍ରକାଶ ପାଇଛି । ତେବେ ହାଓ୍ୱା ଓ ଏକଜିଟ୍ ପୋଲର ଆକଳନ ସତ୍ତ୍ୱେ ପରାଜୟର ମୁହଁ ଦେଖିଛି ରାଷ୍ଟ୍ରୀୟ ଜନତା ଦଳ । ଆରଜେଡି ମତ ଗଣନାକୁ ନେଇ ସନ୍ତୁଷ୍ଟ ନଥିବା କହୁଥିବା ବେଳେ ଏବେ ଆରମ୍ଭ ହୋଇଯାଇଛି ଦଳର ମାନସମନ୍ଥନ । ଏହି ପରାଜୟର ସମୀକ୍ଷା କରିବାକୁ ପୂର୍ବତନ ମୁଖ୍ୟମନ୍ତ୍ରୀ ତଥା ମାଡାମ୍ ରାବିଡୀ ଦେବୀଙ୍କ ବାସଭବନରେ ଏକାଠି ହୋଇଛନ୍ତି ଦଳର ବହୁ ତୁଙ୍ଗ ନେତା ।
ମହାଗଠବନ୍ଧନକୁ ୨୦୧୫ରେ ୧୭୮ ସିଟ୍ ମିଳିଥିବାବେଳେ ଚଳିତ ନିର୍ବାଚନରେ ୧୧୦ ସିଟ୍ରେ ସୀମିତ ରହିଛି ଦଳ । ଦଳର ୭୫ ବିଧାୟକଙ୍କ ମଧ୍ୟରୁ ୩୦ ନୂଆ ଚେହେରା ଥିଲେ । ତେବେ ପରାଜୟ ସତ୍ତ୍ୱେ ଦଳ ଏଥର ଭଲ ପ୍ରଦର୍ଶନ କରିଛି ବୋଲି କହିଛନ୍ତି ଆରଜେଡି ନେତା ତେଜସ୍ୱୀ ଯାଦବ । ୨୦୨୦ରେ ଆରଜେଡି ବଡ଼ ପାର୍ଟି ଭାବେ ଉଭା ହୋଇଛି । ନିର୍ବାଚନ ଫଳାଫଳକୁ ନେଇ ଦଳର ସୁପ୍ରିମୋ ଲାଲୁ ପ୍ରସାଦ ଯାଦବ ଦୁଃଖୀ ଥିବା କୁହାଯାଉଛି ।
ସେପଟେ ନଭେମ୍ବର ୧୬ରେ ଶପଥ ନେଇ ପାରନ୍ତି ସୁଶାସନ ବାବୁ ନୀତିଶ କୁମାର । ସପ୍ତମ ଥର ପାଇଁ ପୁଣି ବିହାର ମୁଖ୍ୟମନ୍ତ୍ରୀ ଭାବେ ଶପଥ ନେବେ ନୀତୀଶ । ଏକଜିଟ୍ ପୋଲକୁ ଭୁଲ ପ୍ରମାଣିତର କରି ଚଳିତ ନିର୍ବାଚନରେ ୧୨୫ ଆସନ ପାଇ ସ୍ପଷ୍ଟ ବହୁମତ ହାସଲ କରିଛି ଏନଡିଏ । ମେଣ୍ଟରେ ବିଜେପିକୁ ଅଧକ ସଂଖ୍ୟକ ଭୋଟ ମିଳିଥିଲେ ସୁଦ୍ଧା ନୀତୀଶଙ୍କ ନେତୃତ୍ୱରେ ଶାସନ କରିବ ଦଳ । ଏନେଇ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଏକପ୍ରକାର ସ୍ଥିର ହୋଇସାରିଛି ।
ନୀତୀଶଙ୍କ ଜୀବନରେ ୭ ଅଙ୍କ ତାଙ୍କ ପାଇଁ ସୌଭାଗ୍ୟ ଆଣିଛି ବୋଲି କହିଛନ୍ତି । ତେଣୁ ସପ୍ତମ ଥର ପାଇଁ ରାଜ୍ୟରେ ମୁଖ୍ୟମନ୍ତ୍ରୀ କାର୍ଯ୍ୟଭାର ନେବାକୁ ଯାଉଛନ୍ତି ସେ । ଏଥିପାଇଁ ମନ୍ତ୍ରୀମଣ୍ଡଳରେ କାହାକୁ ସ୍ଥାନ ଦିଆଯିବ ସେନେଇ ଆରମ୍ଭ ହୋଇଯାଇଛି ମାନସ ମନ୍ଥନ । ତେବେ ବିହାରରେ ଏଥର ଡବଲ ଇଞ୍ଜିନ ସରକାର ହେବ ବୋଲି କୁହାଯାଉଛି । ପ୍ରଥମେ ୨୦୦୦ରେ ବିହାରର ମୁଖ୍ୟମନ୍ତ୍ରୀ ହୋଇଥିଲେ ନୀତୀଶ । ଏହାପରେ ୨୦୦୫, ୨୦୧୦, ୨୦୧୫, ୨୦୧୫, ୨୦୧୭ରେ ମୁଖ୍ୟମନ୍ତ୍ରୀ ହୋଇଥିଲେ । ଏବେ ପୁଣି ଜନତା ତାଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହିଁଛି ବୋଲି କହିଛନ୍ତି ୭୦ ବର୍ଷୀୟ ନୀତୀଶ କୁମାର । ୧ ମାର୍ଚ୍ଚ ୧୯୫୧ରେ ନୀତୀଶଙ୍କ ଜନ୍ମ ।
ଉପ-ନିର୍ବାଚନରେ ବିପୁଳ ବିଜୟ ପରେ ସମ୍ୱୋଧିତ କରିବେ ମୁଖ୍ୟମନ୍ତ୍ରୀ
ଭୁବନେଶ୍ୱର: ଉପ-ନିର୍ବାଚନରେ ବିଜୟ ପରେ ସମ୍ୱୋଧିତ କରିବେ ବିଜୁ ଜନତା ଦଳ (ବିଜେଡି) ସଭାପତି ନବୀନ ପଟ୍ଟନାୟକ । ସଂନ୍ଧ୍ୟା ୬ ଟାରେ ଭିଡିଓ କନଫରେନ୍ସିଂ ମାଧ୍ୟମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମ୍ବୋଧିତ କରିବେ । ଭିଡିଓ କନ୍ଫରେନ୍ସିଂ ଜରିଆରେ ଉପ-ନିର୍ବାଚନ ଦାୟିତ୍ୱରେ ଥିବା ନେତା, କର୍ମୀଙ୍କୁ ଉତ୍ସାହିତ କରିବା ଉଦ୍ଦେଶ୍ୟରେ ସମ୍ୱୋଧିତ କରିବେ ଦଳୀୟ ସଭାପତି । ସଦ୍ୟ ସମାପ୍ତ ଉପ-ନିର୍ବାଚନରେ ବିଜେଡି ବାଜିମାତ୍ କରିବା ପରେ ଆଜି ଉଭୟ ବିଧାନସଭାର ଭୋଟରମାନଙ୍କୁ ମଧ୍ୟ ସମ୍ୱୋଧିତ କରିବେ ।
ଉଭୟ ବାଲେଶ୍ୱର ସଦର ଓ ତିର୍ତ୍ତୋଲ ନିର୍ବାଚନ ମଣ୍ଡଳୀରେ ବିଜେଡି ବାଜିମାତ କରିଛି । ତାହା ବି ପୁଣି ଭଲ ଭୋଟ ବ୍ୟବଧାନରେ । ଏନେଇ ମୁଖ୍ୟମନ୍ତ୍ରୀ ଦଳୀୟ କର୍ମୀଙ୍କ ଉପରେ ସନ୍ତୋଷ ପ୍ରକାଶ କରିଛନ୍ତି । ଦଳୀୟ କର୍ମୀମାନଙ୍କ ନିରନ୍ତର ଉଦ୍ୟମ, ସେବାମନୋବୃତ୍ତି ପାଇଁ ଦଳ ପୁଣିଥରେ ନିଜର ତାକତ ଦେଖାଇ ପାରିଛି ବୋଲି ବିଜେଡି ନେତା ପ୍ରକାଶ କରିଛନ୍ତି । ଦଳୀୟ କର୍ମୀଙ୍କ ମନୋବଳ ବୃଦ୍ଧି ଓ ଉତ୍ସାହିତ କରିବାକୁ ଏଭଳି କାର୍ଯ୍ୟକ୍ରମର ଆୟୋଜନ କରାଯାଇଥିବା ସୂଚନା ମିଳିଛି ।
ନିର୍ମଳା ସୀତାରମଣଙ୍କ ବଡ଼ ଘୋଷଣା; PF ଅଂଶୀଦାରଙ୍କୁ ମିଳିବ ବଡ଼ ଫାଇଦା
ନୂଆଦିଲ୍ଲୀ: ଅର୍ଥନୀତିକୁ ସୁଧାରିବା ଲାଗି ଅର୍ଥମନ୍ତ୍ରୀଙ୍କ ପ୍ରୟାସ । ଆତ୍ମନିର୍ଭୟ ଭାରତ ରୋଜଗାର ଯୋଜନା ଅନୁଯାୟୀ ସରକାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି । ସରକାର ଏଥିରେ ଯୋଡ଼ିହୋଇଥିବା କର୍ମଚାରୀଙ୍କୁ ଇପିଏଫ୍ ସହ ଯୋଡ଼ିବେ । ଏଭଳି କର୍ମଚାରୀ ଯେଉଁମାନେ ପୂର୍ବରୁ EPF ସହ ଯୋଡ଼ି ହୋଇନଥିଲେ ଏବଂ ଯାହାଙ୍କ ଦରମା ୧୫ ହଜାରରୁ କମ୍ ରହିଛି ସେମାନଙ୍କୁ ଏହି ଯୋଜନାର ଲାଭ ମିଳିବ । ଏଥିସହିତ ଯେଉଁମାନେ ଅଗଷ୍ଟ ଠାରୁ ସେପ୍ଟେମ୍ୱର ଯାଏଁ ଚାକିରିରେ ନଥିଲେ କିନ୍ତୁ ପରେ ପିଏଫ୍ ସହ ଯୋଡ଼ି ହୋଇଥିଲେ ସେମାନଙ୍କୁ ମଧ୍ୟ ଲାଭ ମିଳିବ । ଏହି ଯୋଜନା ୩୦ ଜୁନ୍ ୨୦୨୧ ଯାଏ ଲାଗୁ ।
ସରକାର ୨ ବର୍ଷ ଯାଏଁ ୧୦୦୦ରୁ କମ୍ ସଂଖ୍ୟା ବିଶିଷ୍ଟ କର୍ମଚାରୀ କାମ କରୁଥିବା ସଂସ୍ଥାକୁ ନୂଆ ଭର୍ତ୍ତି ହୋଇଥିବା କର୍ମଚାରୀଙ୍କ ବାବଦକୁ ପିଏଫ୍ର ପୂରା ୨୪ ପ୍ରତିଶତ ଅଂଶ ସବସିଡି ରୂପରେ ଦିଆଯିବ । ଏହା ୧ ଅକ୍ଟୋବର ୨୦୨୦ ଠାରୁ ଲାଗୁ ହେବ । ୧୦୦୦ରୁ ଅଧିକ କର୍ମଚାରୀ ଥିବା ସଂସ୍ଥାରେ ନୂଆ କର୍ମଚାରୀଙ୍କ ୧୨ ପ୍ରତିଶତ ଯୋଗଦାନ ନେଇ ୨ ବର୍ଷ ଯାଏଁ ସବସିଡି ଦେବେ । ଏଥିରେ ପାଖାପାଖି ୯୫% ସଂସ୍ଥା ଆସିବ । ଏବଂ ପାଖାପାଖି କୋଟିଏ କର୍ମଚାରୀଙ୍କୁ ଫାଇଦା ମିଳିବ ।
ସମ୍ପୂର୍ଣ୍ଣ ଭାରତରେ କରୋନା ଟିକା ସଂରକ୍ଷଣ କଷ୍ଟକର, ଜାଣନ୍ତୁ କାହିଁକି..?
ନୂଆଦିଲ୍ଲୀ: କରୋନା ସଂକଟ ସମୟରେ ନୂଆ ଆଶା ଦେଖାଇଛି ଫାଇଜର ଭେକ୍ସିନ । କିନ୍ତୁ ଭାରତ ପାଇଁ ହୁଏ ତ ଏହା ପ୍ରଭାବ ଶାଳୀ ନ ହୋଇପାରେ । ୧୨ ଲକ୍ଷ ଲୋକଙ୍କ ଜୀବନ ନେବା ପରେ ଲୋକଙ୍କ ମନରେ ଆଶା ସଞ୍ଚାର କରିଛି କରୋନା ଟିକା । ତେବେ ଏହା କେବଳ କିଛି ପ୍ରଗତିଶୀଳ ଦେଶରେ ବଣ୍ଟନ ସମ୍ଭବ ବୋଲି କହିଛନ୍ତି ବିMdb ସ୍ୱାସ୍ଥ୍ୟ ସଂଗଠନ ଅଧିକାରୀ । କାରଣ ଏହାର ଷ୍ଟୋରେଜ ନେଇ ରହିଛି ଅନେକ ଅସୁବିଧା । 
ମାଇନସ ୭୦ ଡିଗ୍ରୀ ସେଣ୍ଟିଗ୍ରେଟରେ ଏହାର ଷ୍ଟୋରେଜ୍ ସମ୍ଭବ ବୋଲି କୁହାଯାଉଥିବାରୁ କିଛି ଦେଶରେ ଏହାକୁ ରଖିବା ସମ୍ଭବ ନୁହେଁ ବୋଲି କୁହାଯାଉଛି । ଏମ୍ସ ନିର୍ଦ୍ଦେଶକ ଡାକ୍ତର ରଣଦୀପ ଗୁଲେରିଆ ମଧ୍ୟ ସମାନ ଆଶଂକା ବ୍ୟକ୍ତ କରିଛନ୍ତି ।
ଭାରତ ପରି ବିକାଶିତ ଦେଶରେ ଏହାକୁ ନେଇ ଯୋଜନା ପ୍ରସ୍ତୁତ ହୋଇଥିଲେ ସୁଦ୍ଧା ଗ୍ରାମାଞ୍ଚଳ କ୍ଷେତ୍ରରେ ଏହାର ବଣ୍ଟନ ଚ୍ୟାଲେଞ୍ଜ ସୃଷ୍ଟି କରିପାରେ ବୋଲି କହିଛନ୍ତି ଗୁଲେରିଆ । ଫାଇଜର ଭେକ୍ସିନ କରୋନା ଉପରେ ୯୦ ପ୍ରତିଶତ ପ୍ରଭାବଶାଳୀ ବୋଲି ଦାବି କରିଥିଲେ ଭାଇଜରର ସିଇଓ ଡାକ୍ତର ଆଲବର୍ଟ ।
ଆତ୍ମନିର୍ଭର ଭାରତ ୩.୦: ଅର୍ଥନୀତିକୁ ଆଉ ଏକ ବୁଷ୍ଟର,ଘୋଷଣା କଲେ ଅର୍ଥମନ୍ତ୍ରୀ
କରୋନା ସଙ୍କଟରେ ଅର୍ଥନୀତିକୁ ସୁଦୃଢ କରିବାକୁ ମୋଦି ସରକାର ଆଉ ଏକ ଆର୍ଥିକ ପ୍ୟାକେଜ ଘୋଷଣା କରିଛନ୍ତି। ସାମ୍ବାଦିକ ସମ୍ମିଳନୀରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଏନେଇ ସୂଚନା ଦେଇଛନ୍ତି । ଧିରେ ଧିରେ ଅର୍ଥ ବ୍ୟବସ୍ଥାରେ ସୁଧାର ଆସୁଥିବା ନେଇ କହିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ଏହାସହ ଅର୍ଥବ୍ୟବସ୍ଥା ଆହୁରି ସୁଦୃଢ ହେବ ବୋଲି ସେ କହିଛନ୍ତି । ଆସନ୍ତୁ ଜାଣିବା ଆର୍ଥିକ ପ୍ୟାକେଜରେ କଣ ସବୁ ରହିଛି ।
କଣ ଘୋଷଣା କରିଛନ୍ତି ଅର୍ଥମନ୍ତ୍ରୀ
ଆତ୍ମନିର୍ଭର ଭାରତର ରୋଜଗାର ଯୋଜନା ଅନୁସରେ ୧.୫୯ଲକ୍ଷ ସଂସ୍ଥାକୁ ୮୩୦୦କୋଟି ଟଙ୍କାର ଋଣ ଦିଆଯାଇଥିଲା । ଏବଂ ଏଥିରେ ୧ କୋଟି ୨୧ଲକ୍ଷ ଲୋକ ଉପକୃତ ହୋଇଛନ୍ତି ।
-ଜରୁରୀକାଳିନ କ୍ରେଡିଟ୍ ଲାଇନ୍ ସ୍କିମ୍ (ECGLS) ଅଧୀନରେ ୬୧ ଲକ୍ଷ ଋଣ ନେଇଥିବା ବ୍ୟକ୍ତିଙ୍କୁ ୨ ଲକ୍ଷ କୋଟିରୁ ଅଧିକ ଋଣ ଆବଣ୍ଟନ କରାଯାଇଛି । ଏଥିମଧ୍ୟରୁ ୧.୫୨ ଲକ୍ଷ କୋଟି ଟଙ୍କା ଦିଆ ସରିଛି ।
– ନିର୍ମଳା ସୀତାରମଣ କହିଛନ୍ତି ଯେ ବ୍ୟାଙ୍କଗୁଡିକ ୧୫୭.୪୪ ଲକ୍ଷ ଚାଷୀଙ୍କୁ କିସାନ କ୍ରେଡିଟ କାର୍ଡ ପ୍ରଦାନ କରିଛନ୍ତି । ଏଥି ସହିତ ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଅଧୀନରେ ୧୬୮୧ କୋଟି ଟଙ୍କା ଆବଣ୍ଟନ କରିଛନ୍ତି । ନାବାର୍ଡ ମାଧ୍ୟମରେ ୨୫ ହଜାର କୋଟିର ଟଙ୍କାର ଆବଣ୍ଟନ କରାଯାଇଛି ।
– ୨୮ ଟି ରାଜ୍ୟ ଏବଂ କେନ୍ଦ୍ର ଅଞ୍ଚଳରେ ୱାନ ନେସନ, ୱାନ ରେସନ କାର୍ଡ ଯୋଜନାରେ ଯୋଡ଼ି ହେବା କାରଣରୁ ପ୍ରବାସୀ ଶ୍ରମିକ ଉପକୃତ ହେଉଛନ୍ତି । ପ୍ରଧାନମନ୍ତ୍ରୀ ସ୍ୱନିଧି ଯୋଜନା ଅଧୀନରେ ୧୩୭୩.୩୩ କୋଟି ଟଙ୍କା ମୂଲ୍ୟର ଋଣ ଆବଣ୍ଟନ କରାଯାଇଛି ।
– ନିର୍ମଳା ସୀତାରମଣ କହିଛନ୍ତି ଯେ, ତୃତୀୟ ତ୍ରୟମାସରେ ଅର୍ଥନୀତିର ସକରାତ୍ମକ ଅଭିବୃଦ୍ଧି ପାଇଁ ଆରବିଆଇ ପୂର୍ବାନୁମାନ କରିଛି । ଷ୍ଟକ୍ ମାର୍କେଟର ଅଭିବୃଦ୍ଧି ଏବଂ ବଜାର କ୍ୟାପ୍ ବୃଦ୍ଧି ହେଉଛି ଆମ ପ୍ରୟାସର ଫଳାଫଳ ।
– ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ ଅତୀତରେ ନିଆଯାଇଥିବା ନିଷ୍ପତ୍ତି ଯୋଗୁଁ ଜିଏସଟି ସଂଗ୍ରହ ବୃଦ୍ଧି ପାଇଛି । ବାର୍ଷିକ ଏହା ୧୦ପ୍ରତିଶତ ବୃଦ୍ଧି ପାଇଛି । ଏଥି ସହିତ ବ୍ୟାଙ୍କ କ୍ରେଡ଼ିଟ ୨୩ ଅକ୍ଟୋବର ପର୍ଯ୍ୟନ୍ତ ୫.୧ ପ୍ରତିଶତ ବୃଦ୍ଧି ପାଇଛି । ଯେତେବେଳେ କି ବୈଦେଶିକ ମୁଦ୍ରା ଭଣ୍ଡାର ରେକର୍ଡ ସ୍ତରରେ ପହଞ୍ଚିଛି ।
– ସୂଚନାଯୋଗ୍ୟ ଯେ, ବୁଧବାର ନିଜେ ସରକାର ୧୦ଟି ସେକ୍ଟରର ଉତ୍ପାଦନକାରୀଙ୍କ ପାଇଁ ପ୍ରାୟ ୨ ଲକ୍ଷ କୋଟି ଟଙ୍କାର ପ୍ରଡକ୍ସନ ଲିଙ୍କ୍ ଇନସେଣ୍ଟିଭ୍ (PLI) ବା ପ୍ରୋତ୍ସାହନ ଘୋଷଣା କରିଛନ୍ତି । ଏହାପୂର୍ବରୁ ମେ ମାସରେ ସରକାର ଆତ୍ମନିର୍ଭରଶୀଳ ଅଭିଯାନ ଅଧୀନରେ ପ୍ରାୟ ୨୧ ଲକ୍ଷ କୋଟି ଟଙ୍କା ଆର୍ଥିକ ପ୍ୟାକେଜ ଘୋଷଣା କରିଥିଲେ।
ରିଜର୍ଭ ବ୍ୟାଙ୍କ ଅନୁଯାୟୀ ଚଳିତ ଆର୍ଥିକ ବର୍ଷର ଦ୍ୱିତୀୟ ତ୍ରୟମାସିକ (ଜୁଲାଇ-ସେପ୍ଟେମ୍ବର) ରେ ଦେଶର ମୋଟ ଘରୋଇ ଉତ୍ପାଦ (ଜିଡିପି) ପୂର୍ବ ବର୍ଷ ତୁଳନାରେ ୮.୬ ପ୍ରତିଶତ ହ୍ରାସ ହୋଇପାରେ । ଏହିପରି ଭାବରେ କ୍ରମାଗତ ଦୁଇ ତ୍ରୟମାସରେ ଜିଡିପି ହ୍ରାସ ହେବା ସହିତ ଦେଶ ପ୍ରଥମ ଥର ପାଇଁ ଆର୍ଥିକ ମାନ୍ଦାବସ୍ଥାର ସମ୍ମୁଖୀନ ହୋଇଛି । କୋଭିଡ୍ -19 ମହାମାରୀ ଏବଂ ଲକଡାଉନର ପ୍ରଭାବ ପ୍ରଥମ ତ୍ରୟମାସରେ ୨୩.୯ ପ୍ରତିଶତ ହ୍ରାସ ପାଇଥିଲା । ଚଳିତ ଆର୍ଥିକ ବର୍ଷରେ ଜିଡିପିରେ ୯.୬ ପ୍ରତିଶତ ହ୍ରାସ ହୋଇପାରେ ବୋଲି ଆରବିଆଇ ଆକଳନ କରିଛି ।
ଦୁଇ ମାସ ଧରି କୋମାରେ ଥିଲେ ଯୁବକ, ‘ଚିକେନ’ ନାମ ଶୁଣିବା ମାତ୍ରେ ଆସିଲା ହୋସ୍
ତାଇପେଇ(ତାଇୱାନ): ନିଜ ମନପସନ୍ଦ ଖାଦ୍ୟର ନାଆ ଶୁଣିବା ମାତ୍ରେ ବା ତାକୁ ସାମ୍ନାରେ ଦେଖିବା ମାତ୍ରେ ମନରେ ଲୋଭ ଆସିଥାଏ ତାକୁ ଖାଇବା ପାଇଁ । କିନ୍ତୁ ତାଇୱାନରେ ଖାଦ୍ୟକୁ ନେଇ ଏପରି ଏକ ମାମଲା ସାମ୍ନାକୁ ଆସିଛି ଯାହାକୁ ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ । ସୂଚନା ଅନୁଯାୟୀ ତାଇୱାନର ଜଣେ ୧୮ ବର୍ଷିୟ ଯୁବକ ଦୀର୍ଘ ୨ ମାସ ଧରି କୋମାରେ ଥିଲେ । କିନ୍ତୁ ଆଶ୍ଚର୍ଯ୍ୟ କଥା ହେଉଛି ନିଜ ମନପସନ୍ଦକ ଖାଦ୍ୟ ଚିକେନର ନାମ ଶୁଣିବା ମାତ୍ରେ ସେ କୋମାରୁ ଫେରିଆସିଥିବା କୁହାଯାଉଛି । ସୂଚନା ଅନୁଯାୟୀ ତାଇୱାନର ୧୮ ବର୍ଷର ଯୁବକ ଚିୟୁକୁ ଚିକେନ ଖୁବ ପସନ୍ଦ ଥିଲା । ଦୀର୍ଘ ୨ ମାସ ହେବ କୋମାରେ ଥିବା ସମୟରେ କେହି ଜଣେ ତାଙ୍କ ସାମ୍ନାରେ ଚିକେନ ଫିଲେଟର ନାମ ଧରିଥିଲେ । ଚିକେନର ନାଁ ଶୁଣିବା ମାତ୍ରେ ଚିୟୁ କୋମାରୁ ଫେରିଆସିଥିବା କୁହାଯାଉଛି । ଏହି ଘଟଣା ଦେଖି ପରିବାର ଲୋକଙ୍କ ସମେତ ଡାକ୍ତର ମାନେ ମଧ୍ୟ ଆଶ୍ଚର୍ଯ୍ୟ ହୋଇପଡ଼ିଥିଲେ ।
18-year-old miraculously awakens from 62-day coma after hearing his favorite dish: 'chicken fillet' https://t.co/ZZU0LE2qFb pic.twitter.com/UvWU0euqp4
— Taiwan News (@TaiwanNewsEN) November 5, 2020
ତାଇୱାନ ନ୍ୟୁଜ ରିପୋର୍ଟ ମୁତାବକ, ତାଇୱାନରେ ରହୁଥିବା ଚିୟୁର କିଛି ଦିନ ପୂର୍ବରୁ ଆକ୍ସିଡେଣ୍ଟ ହୋଇଥିଲା । ଦୁର୍ଘଟଣା ଖୁବ ଭୟଙ୍କର ଥିଲା, ତାଙ୍କୁ ମୁଣ୍ଡରେ ଗଭୀର ଆଘାତ ଲାଗିଥିଲା । ଚିୟୁକୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଚିକିତ୍ସା ସମୟରେ ଚିୟୁର ଜୀବନ ତ ବଞ୍ଚିଯାଇଥିଲା କିନ୍ତୁ ସେ କୋମାକୁ ଚାଲିଯାଇଥିଲେ । ପାଖାପାଖି ୨ ମାସ ଧରି ଚିୟୁ କୋମାରେ ରହିଥିଲେ । ପରିବାରର ସମସ୍ତ ସଦସ୍ୟ ଚିୟୁର ସ୍ୱାସ୍ଥ୍ୟରେ ସୁଧାର ପାଇଁ ପ୍ରାର୍ଥନା କରୁଥିଲେ ।
ରିପୋର୍ଟ ମୁତାବକ ଚିୟୁର ପରିବାର ଲୋକ ସେତେବେଳେ ଆଶ୍ଚର୍ଯ୍ୟ ହୋଇଗଲେ ଯେତେବଳେ ଚିୟୁର ବଡ଼ ଭାଇ ତାଙ୍କୁ ଦେଖାକରିବାକୁ ଡାକ୍ତରଖାନା ଆସିଥିଲେ ଆଉ ମଜା ମଜାରେ କହିଥିଲା ଯେ, ସେ ତାଙ୍କ ମନ ପସନ୍ଦର ଚିକେନ ଫିଲେଟ ଖାଇବାକୁ ଯାଉଛନ୍ତି । ଏହା ପରେ ସେଠିକାର ମହୋଲ ହିଁ ବଦଳିଯାଇଥିଲା । କୋମାରେ ରହିବା ସତ୍ତ୍ୱେ ମଧ୍ୟ ତା ହୃଦସ୍ପନ୍ଦନ ଗତି ବଢ଼ିବାକୁ ଲାଗିଲା ଏବଂ ଚିୟୁଙ୍କୁ ହୋସ୍ ଆସିଥିଲା । ଚିୟୁ ବର୍ତ୍ତମାନ ସଂପୂର୍ଣ୍ଣ ସୁସ୍ଥ ହୋଇ ଡାକ୍ତରଖାନାରୁ ଫେରିଛନ୍ତି ।