ଅମାନିଆ ଇସ୍କନ: ଅଦିନିଆ ରଥଯାତ୍ରା ବନ୍ଦ କରିବାକୁ ଗଜପତି ମହାରାଜାଙ୍କ ଚିଠିକୁ କଲା ପ୍ରତ୍ୟାଖାନ
ନନ୍ଦିଘୋଷ ବ୍ୟୁରୋ: ଅମାନିଆ ଇସ୍କନ । ଭଗବାନଙ୍କ ସହ ଖେଳୁଛି ଖେଳ । ଭକ୍ତଙ୍କ ଭାବନାକୁ କରୁଛି ବାରମ୍ବାର କୁଠାରଘାତ । ଅଦିନିଆ ରଥଯାତ୍ରା କରି ଜଗତର ନାଥ ଜଗନ୍ନାଥଙ୍କ ଧର୍ମୀକ ପରମ୍ପରାକୁ ଭାଙ୍ଗି ଚାଲିଛି । ସ୍ଥିତି ଏମିତି ହୋଇଛି ଯେ, କାହାରିଙ୍କୁ ଖାତିର କରିବାକୁ ବି ନାରାଜ ଇସ୍କନ । ଏପରିକି ମହାପ୍ରଭୁଙ୍କ ପ୍ରଥମ ସେବ ଗଜପତି ମହାରାଜାଙ୍କ ଅପିଲକୁ ବି କରୁନି ଖାତିର ।
ଅଦିନିଆ ରଥଯାତ୍ରା ବନ୍ଦ କରିବା ସହ ନୀତି ନିୟମ ଅନୁସାରେ ନିର୍ଦ୍ଦିଷ୍ଟ ତିଥିରେ ହିଁ ରଥଯାତ୍ରା କରିବାକୁ ଗଜପତି ମହାରାଜା ଲେଖିଥିବା ଚିଠିକୁ ଇସ୍କନ କର୍ତ୍ତୃପକ୍ଷ ପ୍ରତ୍ୟାଖାନ କରିଦେଇଛି । ଇସ୍କନର ଅଧ୍ୟକ୍ଷ ମଧୁସେବିତ ଦାସ ଏ ନେଇ ମେଲ ଲେଖିଛନ୍ତି । ଏଥିରେ ସେ ଉଲ୍ଲେଖ କରିଛନ୍ତି, ଏହି ପ୍ରସଙ୍ଗରେ ଆଉ ଆଲୋଚନା କରିବାର କିଛି ନାହିଁ । ସମ୍ମାନର ସହିତ ଆମେ କହୁଛୁ ଯେ, ଏହାକୁ ନେଇ ଆଉ କୌଣସି ଆଲୋଚନା କରାଯିବନି । ଇସ୍କନର ଏହି ଉତ୍ତର ପରେ ଜଗନ୍ନାଥ ପ୍ରେମୀଙ୍କ ମନରେ ଆହୁରି ଆଘାତ ଲାଗିଛି । ଆଗରୁ ତ କିଛି ନୀତି ନିୟମ ନ ମାନି ଅଦିନିଆ ରଥଯାତ୍ରା କରୁଥିଲା । ଏବେ ବି ଗଜପତି ମହାରାଜା ଚିଠି ଲେଖିବା ପରେ ବି ସୁଧଉରିବାକୁ ନାରାଜ ଇସ୍କନ ।
ସୂଚନାଯୋଗ୍ୟ, କାନାଡ଼ା, ଆମେରିକା, ଇଉରୋପ, ଇଂଲଣ୍ଡ, ଆଫ୍ରିକା, ଏସିଆ ଓ ଅଷ୍ଟ୍ରେଲିଆର ୧୧ଟି ସ୍ଥାନରେ ଇସ୍କନ ଅଦିନିଆ ରଥଯାତ୍ରା କରିଥିଲା । ଏହି ପ୍ରସଙ୍ଗକୁ ନେଇ ଗଜପତି ମହାରାଜା ଆଗରୁ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କୁ ଚିଠି ଲେଖି ହସ୍ତକ୍ଷେପ କରିବାକୁ ଅନୁରୋଧ କରିଥିଲେ । ହେଲେ ଏମିତି ଲାଗୁଛି ଇସ୍କନ କାହାରିଙ୍କ କଥା ମାନିବାକୁ ନାରାଜ ।
ଜଗନ୍ନାଥ ସଂସ୍କୃତିକୁ ଚରମ ଆଘାତ
ଅଦିନିଆ ରଥଯାତ୍ରା ସଂପର୍କରେ ଗଜପତି ମହାରାଜଙ୍କ ଚିଠିକୁ ଅବଜ୍ଞା କରିବା ନେଇ ଇସ୍କନକୁ ତୀବ୍ର ବିରୋଧ କରିଛି ଓଡ଼ିଆ ଅସ୍ମିତା ପରିଷଦ । ଏହା କେବଳ ଗଜପତିଙ୍କୁ ଅପମାନ ନୁହେଁ, ଓଡ଼ିଆ ଜାତିର ଅସ୍ମିତା ଓ ଜଗନ୍ନାଥ ସଂସ୍କୃତିକୁ ଚରମ ଆଘାତ । ଇସ୍କନର ଏହି ବେଖାତିର ମନୋଭାବ ଓ ବ୍ୟବସାୟିକ ପଦକ୍ଷେପ ଅଗଣିତ ଜଗନ୍ନାଥ ପ୍ରେମୀଙ୍କୁ ମାନସିକ ଆଘାତ ଦେଇଛି । ଶାସ୍ତ୍ରୀୟ ମତକୁ ଅଣଦେଖା କରି ଇସ୍କନ ବାରମ୍ବାର ଜଗନ୍ନାଥ ସଂସ୍କୃତିକୁ ଅପମାନିତ କରିଚାଲିଛି । ଏପରି ମନମାନି ପାଇଁ ଓଡ଼ିଶା ସରକାର ଇସ୍କନକୁ ବ୍ୟାନ କରିବାକୁ ଓଡିଆ ଅସ୍ମିତା ପରିଷଦ ଚିଠି ମାଧ୍ୟମରେ ଦାବି କରିଛି । ରାଜ୍ୟ ସରକାର ଏକ ସର୍ବଦଳୀୟ ବୈଠକ କରି ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ହସ୍ତକ୍ଷେପ ଲାଗି ପରିଷଦ ଦାବି କରିଛନ୍ତି ପରିଷଦର ଆବାହକ ରବି ବେହେରା ।
