ନନ୍ଦିଘୋଷବ୍ୟୁରୋ: କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ନୂତନ ଆତ୍ମଜୀବନୀ ‘Belonging: A Journey of Love’ ପ୍ରକାଶ ପାଇବା ପରେ ଭାରତୀୟ ରାଜନୈତିକ ମହଲରେ ବ୍ୟାପକ ଚର୍ଚ୍ଚା ଆରମ୍ଭ ହୋଇଛି। ୫୨୬ ପୃଷ୍ଠାର ଏହି ପୁସ୍ତକରେ ୟୁପିଏ ସରକାର ସମୟର ଅନେକ ଗୁରୁତ୍ୱପୂର୍ଣ୍ଣ ଏବଂ ଅପ୍ରକାଶିତ ପ୍ରସଙ୍ଗ ଉପରୁ ପରଦା ହଟିଛି।
ସୋନିଆ ଗାନ୍ଧୀ ଲେଖିଛନ୍ତି ଯେ ୨୦୧୦ ମସିହାରେ ସେତେବେଳର ଅର୍ଥମନ୍ତ୍ରୀ ପି. ଚିଦାମ୍ବରମଙ୍କ ସହ ପ୍ରଣବ ମୁଖାର୍ଜୀଙ୍କର ମତାନ୍ତର ସୃଷ୍ଟି ହୋଇଥିଲା। ଏକ ବ୍ୟକ୍ତିଗତ ଆଲୋଚନା ସମୟରେ ପ୍ରଣବ ବାବୁ ନିଜର ନିରାଶା ପ୍ରକାଶ କରିବା ସହ ”change at the top” ପାଇଁ ପରାମର୍ଶ ଦେଇଥିଲେ। ସୋନିଆଙ୍କ ଅନୁସାରେ, ଏହା ପ୍ରଣବ ମୁଖାର୍ଜୀଙ୍କର ପ୍ରଧାନମନ୍ତ୍ରୀ ହେବାର ଦୀର୍ଘଦିନର ସ୍ୱପ୍ନ ଆଡ଼କୁ ଏକ ସୂଚନା ଥିଲା। ତେବେ ସୋନିଆ ଚତୁରତାର ସହ ବିଷୟବସ୍ତୁ ବଦଳାଇ ଦେଇଥିଲେ। ପରେ ୨୦୧୨ରେ କଂଗ୍ରେସ ତାଙ୍କୁ ରାଷ୍ଟ୍ରପତି ପ୍ରାର୍ଥୀ ଭାବେ ମନୋନୀତ କରିଥିଲା।
ଏହା ବ୍ୟତୀତ, ୟୁପିଏ ଶାସନ କାଳରେ (୨୦୦୪-୨୦୧୪) ନିଜକୁ ‘ବ୍ୟାକ୍-ସିଟ୍ ଡ୍ରାଇଭର୍’ ବା ପରଦା ପଛରୁ ସରକାର ଚଳାଉଥିବା ନେଇ ଲାଗିଥିବା ଅଭିଯୋଗକୁ ସମ୍ପୂର୍ଣ୍ଣ ଖଣ୍ଡନ କରିଛନ୍ତି । ସେ ସ୍ପଷ୍ଟ କରିଛନ୍ତି ଯେ ଡକ୍ଟର ମନମୋହନ ସିଂହ ହିଁ ପ୍ରକୃତ ପ୍ରଧାନମନ୍ତ୍ରୀ ଥିଲେ ଏବଂ ତାଙ୍କ କାର୍ଯ୍ୟରେ ସେ କେବେ ବି ହସ୍ତକ୍ଷେପ କରିନାହାନ୍ତି। ସରକାର ଓ ଦଳ ମଧ୍ୟରେ ଏକ ସ୍ପଷ୍ଟ ଦାୟିତ୍ୱ ବଣ୍ଟନ ରହିଥିଲା।
ସୋନିଆ ସରକାରୀ ଫାଇଲ୍ ମଗାଉଥିବା ଅଭିଯୋଗକୁ ଭିତ୍ତିହୀନ ବୋଲି ଦର୍ଶାଇଛନ୍ତି। ଡକ୍ଟର ସିଂହଙ୍କ କନ୍ୟା ଉପିନ୍ଦର ସିଂହଙ୍କ ବକ୍ତବ୍ୟକୁ ଉଦ୍ଧାର କରି ସେ ଲେଖିଛନ୍ତି ଯେ ଉଭୟ ନେତାଙ୍କ ମଧ୍ୟରେ ଗଭୀର ପାରସ୍ପରିକ ବିଶ୍ୱାସ ଓ ସମ୍ମାନ ରହିଥିଲା। ସରକାରକୁ ଦୁର୍ବଳ ନକରିବା ଏବଂ ବିରୋଧୀଙ୍କୁ ସୁଯୋଗ ନଦେବା ପାଇଁ ସେ ସଦାସର୍ବଦା ନିୟମ ଓ ପରମ୍ପରାକୁ ସମ୍ମାନ ଦେଇ ଆସିଛନ୍ତି ବୋଲି ସୋନିଆ ନିଜ ବହିରେ ଉଲ୍ଲେଖ କରିଛନ୍ତି।
