ନନ୍ଦିଘୋଷବ୍ୟୁର: ପୁଣି ଇରାନକୁ ଆକ୍ରମଣ ଧମକ ଦେଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଇରାନର ଆଣବିକ ଅସ୍ତ୍ର ନିର୍ମାଣ କ୍ଷମତା ୮୫ ପ୍ରତିଶତ ହ୍ରାସ ପାଇଥିବା ଦାବି କରିଛନ୍ତି ଟ୍ରମ୍ପ। ତେବେ ଏହା ସତ୍ତ୍ୱେ ଆବଶ୍ୟକ ପଡ଼ିଲେ ଇରାନ ଉପରେ ପୁଣି ଆକ୍ରମଣ କରିବାକୁ ଆମେରିକା ପ୍ରସ୍ତୁତ ଥିବା ସେ ସ୍ପଷ୍ଟ କରିଛନ୍ତି। ଆକ୍ରମଣ ପାଇଁ ଆମେରିକା ସେନା ପୂରା ପ୍ରସ୍ତୁତ ଥିବା ମଧ୍ୟ କହିଛନ୍ତି।
ଅନ୍ୟପଟେ ଆମେରିକା ଓ ଇରାନ ମଧ୍ୟରେ ଚାଲିଥିବା ବିବାଦର କୂଟନୈତିକ ସମାଧାନର ସମ୍ଭାବନା ରହିଛି। ମାତ୍ର ଯୁଦ୍ଧ ଆଶଙ୍କାକୁ ସମ୍ପୂର୍ଣ୍ଣ ଏଡ଼ାଇ ଦିଆଯାଇନପାରେ ବୋଲି ଟ୍ରମ୍ପ କହିଛନ୍ତି। କତାର, ସାଉଦି ଆରବ, ୟୁଏଇ, ବାହାରିନ ଓ କୁଏତ ଏହି ଅଞ୍ଚଳରେ ସ୍ଥିତାବସ୍ଥା ବଜାୟ ରଖିବାକୁ ଚାହୁଁଥାଇପାରନ୍ତି। କିନ୍ତୁ ସେମାନଙ୍କ ଇଚ୍ଛା ଅନୁସାରେ ସବୁକିଛି ହେବ ବୋଲି ଆଶା କରିବା ଠିକ୍ ନୁହେଁ ବୋଲି ସେ ମତ ଦେଇଛନ୍ତି।
ସେପଟେ ପାକିସ୍ତାନରେ ରୁଷିଆ, ଚୀନ୍ ଓ ୟୁଏଇର କିଛି ସାମରିକ ସାମଗ୍ରୀ ପରିବହନକାରୀ ବିମାନ ଅବତରଣ କରିବା ଘଟଣାକୁ ନେଇ ଅନ୍ତର୍ଜାତୀୟ ସ୍ତରରେ ଚର୍ଚ୍ଚା ଜୋର ଧରିଛି। ଆମେରିକା-ଇରାନ ମଧ୍ୟରେ ଉତ୍ତେଜନା ବଢ଼ୁଥିବା ସମୟରେ ଏହି ବିମାନଗୁଡ଼ିକର ପାକିସ୍ତାନ ଆଗମନ ଅନେକ ପ୍ରଶ୍ନ ସୃଷ୍ଟି କରିଛି। ଏହା ସହ ଏହି ପୂରା ଘଟଣାରେ ଇସଲାମାବାଦର ଭୂମିକାକୁ ନେଇ ମଧ୍ୟ ସନ୍ଦେହ ପ୍ରକାଶ ପାଇଛି।
ସୂଚନା ଅନୁସାରେ, ରୁଷିଆର IL-76MD ଓ AN-124 ସମେତ ୟୁଏଇର IL-76 ପରିବହନ ବିମାନ ପାକିସ୍ତାନରେ ଅବତରଣ କରିଛି। ଏହି ବିମାନଗୁଡ଼ିକ ଜରିଆରେ ସାମରିକ ସାମଗ୍ରୀ ପରିବହନ ହୋଇଥିବା ଚର୍ଚ୍ଚା ହେଉଛି। ସେହିପରି AN-124 ବିମାନଟି ଚିଟାଗଙ୍ଗରୁ କରାଚୀ ଆସିଥିବା ଜଣାପଡ଼ିଛି। ତେବେ ଏହି ବିମାନଗୁଡ଼ିକ କେଉଁ ଉଦ୍ଦେଶ୍ୟରେ ପାକିସ୍ତାନରେ ପହଞ୍ଚିଛନ୍ତି, ତାହା ଏଯାଏଁ ସ୍ପଷ୍ଟ ହୋଇନାହିଁ।
ଏହି ସବୁ ଘଟଣା ମଧ୍ୟରେ ଆମେରିକା-ଇରାନ ବିବାଦରେ ପାକିସ୍ତାନର ଗୁରୁତ୍ୱ ବଢ଼ୁଥିବା ଚର୍ଚ୍ଚା ହେଉଛି। ଅନ୍ୟପଟେ ପାକିସ୍ତାନର ନୁର ଖାଁ ଏୟାରବେସ୍କୁ ବ୍ୟବହାର କରି ଆମେରିକା ଇରାନ ଉପରେ ଆକ୍ରମଣ କରିପାରେ ବୋଲି ରୁଷିଆକୁ ସତର୍କ କରାଇଛି ଚୀନ୍। ଏହି ଚେତାବନୀ ପରେ ପାକିସ୍ତାନର ଭୂମିକାକୁ ନେଇ ଆହୁରି ଚର୍ଚ୍ଚା ଆରମ୍ଭ ହୋଇଛି। ଆଗକୁ ଏହି ବିବାଦ କେଉଁ ମୋଡ଼ ନେବ, ତାହା ଉପରେ ଏବେ ସମସ୍ତଙ୍କ ନଜର।
