ନନ୍ଦିଘୋଷ ବ୍ୟରୋ: ବହୁ ଆଡମ୍ବରରେ ଲଘୁକ୍ରିୟା । ଭେଳିକି ସାଜିଛି ଭିବି ଜି ରାମ ଜି ଯୋଜନା ! ବଢୁଛି ଦାଦନ ଦୁଃଖ । ଗୋଲାମୁଣ୍ଡାରେ ଲୋକଙ୍କୁ ମିଳୁନି କାମ । ପେଟପାଟଣା ପାଇଁ ଦାଦନ ଖଟିବାକୁ ଚାଲି ଯାଉଛନ୍ତି ଲୋକେ । ହେଲେ କିଛି ଶବ ହୋଇ ଫେରୁଛନ୍ତି ତ ଆଉ କିଛି ସବୁଦିନ ପାଇଁ ପର ରାଇଜରେ ପେଟ ପାଇଁ ହଜିଯାଉଛନ୍ତି । କଳାହାଣ୍ଡି ଜିଲ୍ଲାର ଗୋଲାମୁଣ୍ଡା ବ୍ଲକ ଭାତ ହାଣ୍ଡିରୁ ଗୋଟିଏ ନମୁନା ମାତ୍ର । ଗୋଲାମୁଣ୍ଡା ଏକ ଦାଦନ ପ୍ରବଣ ଅଞ୍ଚଳ । ଏଠାକାର ଯୁବକଯୁବତୀ କାମ ଧନ୍ଦା ନପାଇ ଚାଲିଯାଆନ୍ତି ସୂଦୂର ପଡୋଶୀ ରାଜ୍ୟମାନଙ୍କୁ । ସରକାରୀ ତଥ୍ୟ ମୁତାବକ, ବ୍ଲକରେ ୨୯ ହଜାର ୬୦୬ ଜଣ ଜବକାର୍ଡ ଧାରୀ ଥିବା ବେଳେ ୫୭ ହଜାର ୪୧୩ ଜଣ ଶ୍ରମିକ ଅଛନ୍ତି । ମାତ୍ର ଯୋଜନା ଅଧୀନରେ ୧୬୭ ଜଣ ୧୨୫ ଦିନର କାମ କରିଛନ୍ତି ।
ଗୋଟେ ପଟେ ଭିବି ଜି ରାମ ଜି ଯୋଜନା ଅଧୀନରେ ଗରିବ ହିତାଧିକାରୀଙ୍କୁ ୧୨୫ ଦିନର କାମ ଯୋଗାଉଥିବା ନେଇ କେନ୍ଦ୍ର ସରକାର ବାହାବା ନେଉଛନ୍ତି । ହେଲେ ବାସ୍ତବ ଚିତ୍ର ସଂପୂର୍ଣ୍ଣ ଭିନ୍ନ । କାମ ଅଭାବରୁ କିଏ ବେଙ୍ଗାଳୁରୁ ତ ଆଉ କିଏ ତାମିଲନାଡୁ ପଳାଉଛନ୍ତି । ସେହିପରି କିଏ ଇଟା ଭାଟି ଓ କଳାକାରଖାନାରେ କାମ କରି ମୃତ୍ୟୁବରଣ କରୁଛନ୍ତି । ଯୋଜନାରେ ମାତ୍ର ୧୨୫ ଦିନର କାମ ମିଳୁଛି । ବାକି ଅନ୍ୟ ଦିନ ମାନଙ୍କରେ ଲୋକ କଣ କରିବେ ଭାବି କିଛି ଉପାୟ ନପାଇ କାମ ସନ୍ଧାନରେ ଦାଦନ ଯାଉଥିବା ନେଇ ବ୍ଲକ ଅଧ୍ୟକ୍ଷ କହିଛନ୍ତି । ଆଉ ସେଥିପାଇଁ ବହୁ ଆଡମ୍ବରରେ ଆରମ୍ଭ ହୋଇଥିବା ଭିବି ଜି ରାମ ଜି ଯୋଜନାକୁ ନେଇ ଏବେ ସୃଷ୍ଟି ହୋଇଛି ବଡ଼ ପ୍ରଶ୍ନବାଚୀ ।
