କେନ୍ଦ୍ରାପଡା : LPG ଗ୍ୟାସ କଳାବଜାରୀକୁ ନେଇ କେନ୍ଦ୍ରାପଡା ଯୋଗାଣ ବିଭାଗର ବଡ଼ ଧରଣର ଚଢ଼ାଉ। ଗ୍ୟାସଭର୍ତ୍ତି ୬ଟି ସିଲିଣ୍ଡର ସହିତ ୩୩ଟି ଫାଙ୍କା ସିଲିଣ୍ଡର ଜବତ ହୋଇଛି। କେନ୍ଦ୍ରାପଡା ଜିଲ୍ଲା ଚାନ୍ଦୋଳ ବଜାର ଖର୍ଧା ସାହି ଛକରେ ଥିବା ଏକ ଦୋକାନରୁ ଏହି ସବୁ ସିଲିଣ୍ଡର ଜବତ ହୋଇଛି। ଜିଲ୍ଲାପାଳ ଏବଂ ଯୋଗାଣ ବିଭାଗ ଅଧିକାରୀଙ୍କ ନିର୍ଦେଶରେ ଦୁଇ ଜଣ ଅତିରିକ୍ତ ଯୋଗାଣ ଅଧିକାରୀ, ଜଣେ ଯୋଗାଣ ନିରୀକ୍ଷକ ସମେତ ମୋଟ 6 ଜଣିଆ ଟିମ ଏବଂ ଜଣେ ମାଜିଷ୍ଟ୍ରେଟ ଚଢ଼ାଉ କରିଥିଲେ। ଚାନ୍ଦୋଳ ବଜାରରେ ବନ୍ଦ ହୋଇ ରହିଥିବା ଉକ୍ତ ଦୋକାନର ତାଲା ଭାଙ୍ଗି ମୋଟ ୩୯ ଟି ସିଲିଣ୍ଡର ଜବତ ହୋଇଛି। ଉକ୍ତ ଦୋକାନର କେହି ଦାବିଦାର ନ ଥିବା ଜଣାପଡିବା ପରେ ଜବତ ସିଲିଣ୍ଡର ନିଜ ହେପାଜତକୁ ନେଇଛି ଯୋଗାଣ ବିଭାଗ।

ଭଦ୍ରକ : ଗୋ ମାଫିଆଙ୍କ ଘରେ ଭଦ୍ରକ ପୋଲିସର ଜୋରଦାର ଚଢ଼ାଉ। ଭଦ୍ରକ ସହର ଓ ଏହାର ଆଖପାଖ ଅଞ୍ଚଳର ୮ ଟି ସ୍ଥାନରେ ଚାଲିଛି ଚଢ଼ାଉ। ପୁରୁଣା ବଜାର ଓ ଗୁଜି ଦରଡା ଅଞ୍ଚଳରେ ରେଡ୍‌ ଜାରି ରହିଛି। ଚଢ଼ାଉ ସମୟରେ ବିପୁଳ ନଗଦ ଟଙ୍କା , ସୁନାରୂପା ଗହଣା ସହ ସମ୍ପତ୍ତିର ଯାଞ୍ଚ ଚାଲିଛି। ଅନେକଙ୍କ ଘରୁ ବନ୍ଧୁକ, ଭୁଜାଲି ସହ ବହୁ ମାରଣାସ୍ତ୍ର ମଧ୍ୟ ଜବତ କରିଛି ପୋଲିସ। ଭଦ୍ରକ ଏସପି ମନୋଜ ରାଉତଙ୍କ ନିର୍ଦେଶ କ୍ରମେ ଚାଲିଥିବା ଏହି ଚଢ଼ାଉରେ ଜଣେ ଅତିରିକ୍ତ ଏସପି, ୨ ଜଣ ଡ଼ିଏସପି ଙ୍କ ସମେତ ଟାଉନ, ପୁରୁଣା ବଜାର ଆଇଆଇସି, ୬ ପ୍ଲାଟୁନ ପୋଲିସ ଫୋର୍ସ ସାମିଲ ହୋଇଛନ୍ତି। ଏବେ ପର୍ଯ୍ୟନ୍ତ ବିଭିନ୍ନ ସ୍ଥାନରୁ ୨୦ ଲକ୍ଷ ନଗଦ ଟଙ୍କା ଜବତ୍ ହୋଇଥିବା ଭଦ୍ରକ ଏସପି ସୂଚନା ଦେଇଛନ୍ତି। ସେହିପରି ବନ୍ଧୁକ ଓ ମାରଣାସ୍ତ୍ର ମଧ୍ୟ ଅନେକ ସ୍ଥାନରୁ ଠାବ ହୋଇଛି। ୫ ଜଣ ଗୋ ମାଫିଆଙ୍କୁ ଅଟକ ରଖିଛି ପୋଲିସ।

ଯାଜପୁର : ଯାଜପୁର ଟାଉନ ଥାନା କାଳିମେଘା ନିକଟରେ ଫାୟାରିଂ। ଯୁବକ ମୃତ। ସେ ହେଲେ କୁଆଁସରପୁରର ସୌମ୍ୟ ସାମଲ। ତାଙ୍କୁ ମାତ୍ର ୨୪ ବର୍ଷ ହେଉଥିଲା। ଅଭିଯୋଗ ଅନୁସାରେ ଗତକାଲି ରାତିରେ ଦୁଇ ଜଣ ଯୁବକ ଏକ ବାଇକରେ ଆସି ସୌମ୍ୟଙ୍କୁ ଗୁଳି କରିତିଲେ। ଗୁରୁତର ଅବସ୍ଥାରେ ତାଙ୍କୁ କଟକ SCB ରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ସୌମ୍ୟଙ୍କ ମୃତ୍ୟୁ ହୋଇଛି। ପରିବାର ଲୋକେ ଅଭିଯୋଗ କରିଛନ୍ତି, ଚିିକିତ୍ସା ଅବହେଳାରୁ ପୁଅର ଜୀବନ ଚାଲିଗଲା।

ଫୁଲବାଣୀ : ହତାଶ କଲାଣି ହଳଦୀ ଚାଷ । GI ଟ୍ୟାଗ ମିଳିଥିଲେ ସୁଦ୍ଧା ଚାଷୀଙ୍କୁ ମିଳୁନି ଉଚିତ ପ୍ରାପ୍ୟ । ସବୁଜ କ୍ଷେତରେ ମୁଣ୍ଡ ଝାଳ ତୁଣ୍ଡରେ ମାରି ଚାଷୀ ଫଳାଉଛି ହଳଦୀ । ହେଲେ ବିକ୍ରିବଟା ସୁବିଧା ନଥିବାରୁ କମ୍ ଦରରେ ବିକ୍ରି କରିବାକୁ ବାଧ୍ୟ ହେଉଛି । ଏଭଳି ସମସ୍ୟା ଦେଖାଦେଇଛି ହଳଦୀର ହବ୍ କନ୍ଧମାଳ ଜିଲ୍ଲାରେ । ଜିଲ୍ଲାରେ ପ୍ରତିବର୍ଷ ହଜାର ହଜାର ଚାଷୀ ହଳଦୀ ଚାଷ କରିଥାନ୍ତି । ଏଠାକାର ହଳଦୀ ରାଜ୍ୟ ତଥା ବିଶ୍ଵରେ ପ୍ରସିଦ୍ଧ ଲାଭ କରିଛି । ହେଲେ ସଠିକ ବଜାର ବ୍ୟବସ୍ଥା ସହ ସରକାରୀ ପ୍ରୋତ୍ସାହନ ଅଭାବରୁ ଚାଷୀଙ୍କୁ ମିଳୁନି ଉଚିତ ପ୍ରାପ୍ୟ । ବ୍ୟବସାୟୀଙ୍କୁ କେଜି ପିଛା ଶହେ ଟଙ୍କାରେ ବିକ୍ରି କରି ଅଭାବୀ ବିକ୍ରିର ଶିକାର ହେଉଛନ୍ତି ସ୍ଥାନୀୟ ଚାଷୀ ।
ଚଳିତ ବର୍ଷ ଜିଲ୍ଲାରେ ହଳଦୀ ଭଲ ଅମଳ ହୋଇଛି । କସମ ପକ୍ଷରୁ କିଛି ଚାଷୀଙ୍କୁ ପ୍ରୋତ୍ସାହନ ଦେବା ସହ ସେମାନଙ୍କ ଠାରୁ ଉତ୍ତମ ଦରରେ ହଳଦୀ କିଣି ପ୍ରୋସେସିଂ କରି ବଜାରରେ ବିକ୍ରି କରୁଛନ୍ତି । ହେଲେ ବଜାର ବ୍ୟବସ୍ଥା ନଥିବାରୁ ଅନେକ ଚାଷୀ ବେପାରୀଙ୍କୁ କମ ଦରରେ ହଳଦୀ ବିକ୍ରି କରିବାକୁ ବାଧ୍ୟ ହେଉଛନ୍ତି । ଅନ୍ୟପଟେ ଶୀଘ୍ର ବିକ୍ରିବଟା ବ୍ୟବସ୍ଥା କରାଯିବ ବୋଲି କହିଛନ୍ତି ଜିଲ୍ଲାପାଳ । କେବେ ଚାଷୀଙ୍କ ସମସ୍ୟାର ହେଉଛି ସମାଧାନ ? କେବେ ଚାଷୀ ଉଚିତ ପ୍ରାପ୍ୟ ପାଉଛନ୍ତି ? ତାହା ସମୟ କହିବ ।

ଭୁବନେଶ୍ବର : ଉଚ୍ଚଶିକ୍ଷା ବିଭାଗ ସମ୍ପୂର୍ଣ୍ଣ ପଙ୍ଗୁ ଓ ବିପନ୍ନ ହୋଇଯାଇଛି । ରାଜ୍ୟର ୧୭ ବିଶ୍ୱବିଦ୍ୟାଳୟରୁ ୧୪ଟିରେ କୁଳପତି ନାହାନ୍ତି । ଗତ ୧୦ ମାସ ତଳେ ବିଜ୍ଞପ୍ତି ପ୍ରକାଶ ପାଇଥିଲା । ୯ ମାସ ହେବ ଆବେଦନ ସରିଲାଣି । ହେଲେ ବିଜେପି ସରକାର ଏ ନେଇ ଦାୟିତ୍ୱବାନ ନାହାନ୍ତି ବୋଲି କହି ଗର୍ଜିଛି ବିଜେଡି । ୧୪ଶହ ଅଧ୍ୟାପକ ପଦ ଖାଲି ପଡିଛି । କୁଳପତି ନିଯୁକ୍ତି ନ ହେବାରୁ ଅଧ୍ୟାପକ ନିଯୁକ୍ତି ବି ପ୍ରଭାବିତ ହୋଇଛି । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦୂରଦୃଷ୍ଟି ରଖି କାମ କରୁଥିଲେ । ସେ ସମୟର ଉଚ୍ଚଶିକ୍ଷା ମନ୍ତ୍ରୀ ବିଶ୍ଵବିଦ୍ୟାଳୟ ସଂଶୋଧନ ଆଇନ ୧୯୮୯ ପରିବର୍ତ୍ତନ କରିବାକୁ ପ୍ରସ୍ତାବ ଦେଇଥିଲେ । ଯାହାକୁ ନବୀନ ପଟ୍ଟନାୟକ ଅନୁମୋଦନ ଦେଇଥିଲେ । ବିନା ଦ୍ୱନ୍ଦ୍ୱରେ OPSC ଅଧ୍ୟାପକ ନିଯୁକ୍ତି ହେଉଥିଲା । କୁଳପତିଙ୍କ କାର୍ଯ୍ୟକାଳ ସରିବାର ୬ ମାସ ଆଗରୁ ନୂଆ କୁଳପତି ନିଯୁକ୍ତି ପ୍ରକ୍ରିୟା ଆରମ୍ଭ ହେଉଥିଲା । ମୁଖ୍ୟମନ୍ତ୍ରୀ ଯଦି କାମଚଳା ନୁହଁନ୍ତି, ବିଶ୍ୱବିଦ୍ୟାଳୟର କୁଳପତି କାହିଁକି କାମଚଳା ହେବେ ବୋଲି ପ୍ରଶ୍ନ କରିଛି ବିଜେଡି । ଗେରୁଆ ଓ ସଂଘୀୟ ଜ୍ୟାକେଟ ଖୋଜୁଛନ୍ତି ସରକାର ବୋଲି ଅଭିଯୋଗ କରିଛି ବିଜେପି । କାମଚଳା କୁଳପତି ଅଧ୍ୟାପକ ନିଯୁକ୍ତି କରି ପାରିବେ ନାହିଁ । ଏଥିଯୋଗୁଁ ରିସର୍ଚ୍ଚ କାମ ବନ୍ଦ । ପରୀକ୍ଷା ଠିକ ସମୟରେ ହେଉନି କି ଫଳ ଠିକ ସମୟରେ ପ୍ରକାଶ ପାଉନି ।ହଷ୍ଟେଲରେ ଅବ୍ୟବସ୍ଥା । ଦୟନୀୟ ଅବସ୍ଥାକୁ ଗଲାଣି ଉଚ୍ଚଶିକ୍ଷା ବିଭାଗ । ହାଇକୋର୍ଟ ବି ଭର୍ତ୍ସନା କଲେଣି । ସରକାରଙ୍କ ଅପାରଗତା ଯୋଗୁଁ ଆଜି ରାଜ୍ୟପାଳ ବି କାଠଗଡା଼ରେ ଠିଆ ହୋଇଛନ୍ତି । ବିଶ୍ଵବିଦ୍ୟାଳୟ ଆଇନ ୧୯୮୯ରେ କୁଳାଧିପତିଙ୍କ ଅଖଣ୍ଡ କ୍ଷମତା ଅଛି । ତାହାର ସେ ବ୍ୟବହାର କରନ୍ତୁ । ଏପ୍ରିଲ ଶେଷ ସୁଦ୍ଧା ଯଦି ପଦ ପୂରଣ ନ ହୁଏ, ଛାତ୍ର ଓ ଯୁବ ବିଜେଡି ରାଜରାସ୍ତାରେ ଆନ୍ଦୋଳନ କରିବ ବୋଲି ବିଜେଡି ଚେତାଇ ଦେଇଛି । ତେଣୁ ଉଚ୍ଚଶିକ୍ଷା ମନ୍ତ୍ରୀ ଆଈମାଆ କାହାଣୀ ନ କୁହନ୍ତୁ । ଓଡ଼ିଶାରେ ଏକ ମାତ୍ର ମହିଳା ବିଶ୍ଵବିଦ୍ୟାଳୟରେ କୁଳପତି ନାହାନ୍ତି । ବିଶ୍ଵବିଦ୍ୟାଳୟର ସ୍ୱତନ୍ତ୍ରତା ନଷ୍ଟ ହେଲାଣି । ବେକାରୀ ସମସ୍ୟା ବୃଦ୍ଧି କରି ପିଲାଙ୍କୁ ବିଜେପି ରାଲିରେ ପଠାଇବାକୁ ଏହା ସରକାରଙ୍କ ଚାଲ । କ୍ୟାମ୍ପସରେ ଏବିଭିପି ପୂରାଇବାକୁ ଏହା ଷଡଯନ୍ତ୍ର । ଏପ୍ରିଲ ଶେଷ ସୁଦ୍ଧା ପ୍ରକ୍ରିୟା ନ ସାରିଲେ, ପ୍ରତି କ୍ୟାମ୍ପସ ଆଗରେ ହେବ ଶିକ୍ଷା ବଞ୍ଚାଓ ଆନ୍ଦୋଳନ । ରାଲି କରି ଭୁବନେଶ୍ୱର ଆସିବେ ଛାତ୍ରଛାତ୍ରୀ ବୋଲି ବିଜେଡି ଚେତାଇ ଦେଇଛି ।

ଭୁବନେଶ୍ବର : ଓଡ଼ିଶାରେ ବାହାର ରାଜ୍ୟର ୧୦ ବର୍ଷରୁ ଅଧିକ ପୁରୁଣା ବାଣିଜ୍ୟିକ ଗାଡ଼ି ଉପରେ କଟକଣା। ଏଣିକି ନୂତନ ପରମିଟ୍ ପ୍ରଦାନ କରାଯିବ ନାହିଁ। ମାଲିକାନା ହସ୍ତାନ୍ତର କିମ୍ବା କୌଣସି କର ଗ୍ରହଣ ଉପରେ ମଧ୍ୟ ଅଙ୍କୁଶ ଲଗାଯାଇଛି। ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନାଙ୍କ ନିର୍ଦ୍ଦେଶକ୍ରମେ ରାଜ୍ୟର ପରିବହନ ବ୍ୟବସ୍ଥାକୁ ଉନ୍ନତ ଏବଂ ଯାତ୍ରୀମାନଙ୍କ ନିରାପତ୍ତାକୁ ସୁଦୃଢ଼ କରିବା ଉଦ୍ଦେଶ୍ୟରେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରାଯାଇଛି। ୧୯ ଜୁଲାଇ ୨୦୨୩ରେ ରାଜ୍ୟ ପରିବହନ ପ୍ରାଧିକରଣର ୩୦୧ତମ ବୈଠକରେ ନିଆଯାଇଥିବା ନିଷ୍ପତ୍ତି କାର୍ଯ୍ୟକାରୀ କରିବାକୁ ସମସ୍ତ ଆରଟିଓଙ୍କୁ ନିର୍ଦ୍ଦେଶ ଜାରି କରାଯାଇଛି। ଏହି ନିର୍ଦ୍ଦେଶନାମା ଅନୁଯାୟୀ, ଅନ୍ୟ ରାଜ୍ୟରେ ପଞ୍ଜିକୃତ ହୋଇଥିବା ୧୦ ବର୍ଷରୁ ଅଧିକ ପୁରୁଣା ବାଣିଜ୍ୟିକ ଗାଡ଼ି ଗୁଡ଼ିକର ଓଡ଼ିଶା ମଧ୍ୟକୁ ପ୍ରବେଶ ଓ ପରିଚାଳନା ଉପରେ କଟକଣା ଲାଗୁ କରାଯାଇଛି। ନିର୍ଦ୍ଧାରିତ ସମୟସୀମା ଅତିକ୍ରମ କରିଥିବା ବାହାର ରାଜ୍ୟର କୌଣସି ବି ବାଣିଜ୍ୟିକ ଗାଡ଼ିକୁ ଓଡ଼ିଶାରେ ଚଳାଚଳ ପାଇଁ ନୂତନ ପରମିଟ୍ ପ୍ରଦାନ କରାଯିବ ନାହିଁ। ଏଥିସହିତ ରାଜ୍ୟର ସମସ୍ତ ଆଞ୍ଚଳିକ ପରିବହନ ଅଧିକାରୀ RTOମାନଙ୍କୁ ନିର୍ଦ୍ଦେଶ ଦିଆଯାଇଛି ଯେ, ଏହିପରି ପୁରୁଣା ଗାଡ଼ିଗୁଡ଼ିକର ଠିକଣା ପରିବର୍ତ୍ତନ, ମାଲିକାନା ହସ୍ତାନ୍ତର କିମ୍ବା କୌଣସି ପ୍ରକାରର ପରିବହନ କର ଗ୍ରହଣ କରାଯାଇପାରିବ ନାହିଁ। ସମସ୍ତ RTO ଓ ARTO ମାନଙ୍କୁ ଏହି ସଂସ୍କାରମୂଳକ ନିଷ୍ପତ୍ତିକୁ କଡ଼ାକଡ଼ି କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ପଦକ୍ଷେପ ଦ୍ୱାରା ରାଜ୍ୟରେ ସଡ଼କ ସୁରକ୍ଷା ମାନଦଣ୍ଡରେ ଉନ୍ନତି ଆସିବ, ସଡ଼କରେ ଅନୁପଯୁକ୍ତ ଗାଡ଼ି ହ୍ରାସ ପାଇବ ଏବଂ ପୁରୁଣା ଗାଡ଼ି ଜନିତ ପ୍ରଦୂଷଣ ମଧ୍ୟ ହ୍ରାସ ହେବ ବୋଲି ବିଭାଗ ଲକ୍ଷ୍ୟ ରଖିଛି।