ଭାରତ ବିପକ୍ଷରେ ଆଇସିସି ପୁରୁଷ ଟି-୨୦ ବିଶ୍ବକପ ୨୦୨୬ର ଗ୍ରୁପ ମ୍ୟାଚକୁ ବହିଷ୍କାର କରି ପାକିସ୍ତାନ କ୍ରିକେଟ ଜଗତରେ ଏକ ନୂଆ ବିବାଦ ସୃଷ୍ଟି କରିଛି । ଫେବୃଆରୀ ୧୫ରେ କଲମ୍ବୋରେ ହେବାକୁ ଥିବା ଏହି ହାଇଭୋଲଟେଜ୍ ମୁକାବିଲାରୁ ପଛକୁ ହଟିବାର ନିଷ୍ପତ୍ତି ଏବେ କେବଳ ରାଜନୈତିକ ପଦକ୍ଷେପ ନୁହେଁ, ବରଂ ଆଇସିସି ବିପକ୍ଷରେ ସିଧାସଳଖ ଚ୍ୟାଲେଞ୍ଜ ବୋଲି ଗ୍ରହଣ କରାଯାଉଛି । ଏହି କାରଣରୁ ଏବେ ପ୍ରଶ୍ନ ଉଠୁଛି, ପାକିସ୍ତାନର ଅବସ୍ଥା ବାଂଲାଦେଶ ପରି ହୋଇଯିବନି ତ ?
କିଛିଦିନ ପୂର୍ବରୁ ସୁରକ୍ଷା କାରଣ ଦର୍ଶାଇ ବାଂଲାଦେଶ ଭାରତରେ ଟି-୨୦ ବିଶ୍ବକପର ମ୍ୟାଚ ଖେଳିବନି ବୋଲି ମନା କରିଦେଇଥିଲା । ଏହାପରେ ଆଇସିସି ବାଂଲାଦେଶକୁ ଟୁର୍ଣ୍ଣାମେଣ୍ଟରୁ ବାହାର କରିଦେଇଥିଲା ଓ ତା’ ସ୍ଥାନରେ ସ୍କଟଲାଣ୍ଡକୁ ସାମିଲ କରିଥିଲା । ଏବେ ପାକିସ୍ତାନ ମଧ୍ୟ ଭାରତରେ ମ୍ୟାଚ ଖେଳିବାକୁ ମନା କରି ସମାନ ରାସ୍ତା ଆପଣାଇଛି । ତେଣୁ ବାଂଲାଦେଶ ପରି ଦଶା ପାକିସ୍ତାନ ଭୋଗିପାରେ ବୋଲି ଆଶଙ୍କା କରାଯାଉଛି ।
ଆଇସିସି ସ୍ପଷ୍ଟ କରିଛି ଯେ, ଏହା ଚୟନାତ୍ମ ଭାଗିଦାରୀ (Selective Participation) ନିୟମର ବିରୋଧ । ଏହା କରିବା ପାକିସ୍ତାନ ଟିମକୁ ଭାରି ପଡ଼ିପାରେ । ଯଦି ପାକିସ୍ତାନ ଭାରତରେ ଖେଳିବାକୁ ଆସିବନି, ତେବେ ସେ ସିଧାସଳଖ ୨ ଅଙ୍କ ହରାଇବ । ନେଟ ରନରେଟ ଉପରେ ମଧ୍ୟ ପ୍ରଭାବ ପଡ଼ିବ । ଗ୍ରୁପ ଷ୍ଟେଜରୁ ମଧ୍ୟ ପାକିସ୍ତାନ ବାହାର ହେବାର ଆଶଙ୍କା ଦେଖାଦବେ । ମାତ୍ର ଅସଲି ସଙ୍କଟ ମୈଦାନ ବାହାରେ ଦେଖିବାକୁ ମିଳିଛି । ସୂତ୍ର ମୁତାବକ, ଆଇସିସି ପାକିସ୍ତାନ ଉପରେ କିଛି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିପାରେ । ମଙ୍ଗାଳବାର କିମ୍ବା ବୁଧବାର ଦିନ ଆଇସିସି ବୋର୍ଡର ମିଟିଂ ବସିବ, ଯେଉଁଥିରେ ଏହି ପ୍ରସଙ୍ଗରେ ଚର୍ଚ୍ଚା ହେବ । ଆଇସିସି ପାକିସ୍ତାନକୁ ଟି-୨୦ ବିଶ୍ବକପରୁ ବାହାର ରାସ୍ତା ଦେଖାଇପାରେ, ଯାହାକି ବାଂଲାଦେଶ ସହ ହୋଇଥିଲା । ବାଂଲାଦେଶ ନିଜର ଜିଦରେ ଅଟଳ ରହିଥିଲା, ଯେଉଁ କାରଣରୁ କି ଆଇସିସି ଉକ୍ତ ରାସ୍ତା ଆପଣାଇଥିଲା । ଏବେ ପାକିସ୍ତାନ ମଧ୍ୟ ସମାନ ଜିଦରେ ରହିଛି, ତେଣୁ ତା’ର ମଧ୍ୟ ବିଶ୍ବକପରୁ ଛୁଟି ହୋଇପାରେ । ଯଦି ପାକିସ୍ତାନ ପରେ ବ୍ୟାନ ଲଗାଯାଏ, ତେବେ ୟୁଗାଣ୍ଡାର ଟି୨୦ ବିଶ୍ବକପରେ ଏଣ୍ଟ୍ରି ହୋଇଯିବ । ପିସିବି ଅଧ୍ୟକ୍ଷଙ୍କ ମୋହାସିନ ନକଭୀଙ୍କ ନିରବତା ଏହି ପୂରା ମାମଲାକୁ ସନ୍ଦେହ ଭିତରକୁ ଟାଣୁଛି ।
