ରାୟଗଡ଼ା ଜିଲ୍ଲା ମାଓବାଦୀମୁକ୍ତ। ଆଜିଠାରୁ ଏହି ଜିଲ୍ଲାରୁ ନକ୍ସଲମୁକ୍ତ ଘୋଷଣା କରିଛନ୍ତି ଏଡିଜି ସଂଜୀବ ପଣ୍ତା। ଲାଲ ହିଂସାରୁ ରାୟଗଡ଼ା ଜିଲ୍ଲା ମୁକ୍ତ ହେଲା ବୋଲି ସେ କହିଛନ୍ତି। ଏହା ଆଗରୁ କୋରାପୁଟ ଜିଲ୍ଲାକୁ ମଧ୍ୟ ପୋଲିସ ନକ୍ସଲମୁକ୍ତ ବୋଲି ଘୋଷଣା କରିଥିଲା। ଆଜି ପୋଲିସ ପାଖରେ ଆତ୍ମସମର୍ପଣ କରିଛନ୍ତି ୧୫ ଦୁର୍ଦ୍ଦାନ୍ତ ନକ୍ସଲ। ସେମାନଙ୍କ ମଧ୍ୟରେ ଅଛନ୍ତି, ବାସଧାରା ଘୁମୁସର ନାଗାବଳି ଡିଭିଜନର ଦୁଇ ହାଡକୋର ମାଓବାଦୀ ନିଖିଳ ଓ ଇନ୍ଦୁ। ଏହି ଦୁଇ ମାଓ ଦମ୍ପତିଙ୍କ ନାଁରେ କୋଟିଏ ଦଶ ଲକ୍ଷ ଟଙ୍କାର ପୁରସ୍କାର ଥିଲା। ସେମାନେ କହିଛନ୍ତି ଆଗକୁ ଜଳ, ଜମି ଓ ଜଙ୍ଗଲ ସୁରକ୍ଷା ପାଇଁ କାମ କରିବେ। ପୋଲିସକୁ ସେମାନେ ହସ୍ତାନ୍ତର କରିଛନ୍ତି ୨ଟି AK47 ରାଇଫଲ, ଏସଏଲଆର୍ ୫ଟି, ଷ୍ଟେନଗନ୍ ଗୋଟିଏ, ଇନସାସ୍ ରାଇଫଲ ଗୋଟିଏ ଓ ବହୁ ଅଫୁଟା ଗୁଳି।
ଜଗତସିଂହପୁର ଜିଲ୍ଲାରେ ବିକାଶ ଠପ୍: ଗାଁ ଗହଳିରେ ହେଉନାହିଁ ବିକାଶମୂଳକ କାମ
ଜଗତସିଂହପୁର ଜିଲ୍ଲାରେ ବିକାଶ ଠପ୍ । ଦୀର୍ଘ ମାସ ହେଲା ଗାଁ ଗହଳିରେ ହେଉନାହିଁ ବିକାଶମୂଳକ କାମ । ଯାହାକୁ ନେଇ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି । ଜଗତସିଂହପୁର ପଞ୍ଚାୟତ ସମିତି ଅଧ୍ୟକ୍ଷା କନକ ପ୍ରଭା ଲେଙ୍କା ଓ ନାଉଗାଁ ପଞ୍ଚାୟତ ସିମିତି ଅଧ୍ୟକ୍ଷା ତୃଷ୍ଣା ଲେଙ୍କା ଓ ପଞ୍ଚାୟତ ପ୍ରତିନିଧି ମାନେ ଜିଲ୍ଲାପାଳଙ୍କୁ ଭେଟି ନିଜ ନିଜ ଅଞ୍ଚଳରେ କୌଣସି ଉନ୍ନୟନମୂଳକ କାମ ହେଉନଥିବା ଅଭିଯୋଗ କରିଛନ୍ତି । ଉନ୍ନୟନମୂଳକ କାମ ହେଉନଥିବାରୁ ସାଧାରଣ ଲୋକେ ବହୁ ହଇରାଣ ହେଉଛନ୍ତି । ହେଲେ ସ୍ଥାନୀୟ ବିଡ଼ିଓ ଦୃଷ୍ଟି ଦେଉନାହାନ୍ତି । ସମସ୍ୟା ସଂପର୍କରେ ଜିଲ୍ଲାପାଳ ଗୁରୁତ୍ଵ ନଦେଲେ ଆଗାମୀ ଦିନିରେ ବିଜେଡି ଜୋରଦାର ଆନ୍ଦୋଳନ କରିବ ବୋଲି ଚେତାବନୀ ଦେଇଛି ।
ରଙ୍ଗାରଙ୍ଗ କାର୍ଯ୍ୟକ୍ରମ ସହ ସ୍ପେକ୍ଟ୍ରା ୨୦୨୬ ଉଦଯାପିତ
ରଙ୍ଗାରଙ୍ଗ କାର୍ଯ୍ୟକ୍ରମ ସହ ସ୍ପେକ୍ଟ୍ରା ୨୦୨୬ ଉଦଯାପିତ । ଶେଷ ସନ୍ଧ୍ୟାର ମୁଖ୍ୟ ଆକର୍ଷଣ ସାଜିଲେ ବଲିଉଡ କଣ୍ଠଶିଳ୍ପୀ ନିକିତା ଗାନ୍ଧି । ବଲିଉଡର ବହୁ ହିଟ୍ ଗୀତ ଗାଇ ଛାତ୍ରଛାତ୍ରୀଙ୍କ ଭିତରେ ଭରିଲେ ଜୋସ୍ । ଭୁବନେଶ୍ବର ବିର୍ଲା ଗ୍ଲୋବାଲ ୟୁନିଭର୍ସିଟିର ସାଂସ୍କୃତିକ କମିଟି ଦ୍ଵାରା ଆୟୋଜିତ ହୋଇଥିଲା କାର୍ଯ୍ୟକ୍ରମ ସ୍ପେକ୍ଟ୍ରା ୨୦୨୬ । ୩ ଦିନିଆ କାର୍ଯ୍ୟକ୍ରମରେ BGU ସହ ଅନ୍ୟାନ୍ୟ କଲେଜର ପ୍ରାୟ ୧୫ ଶହରୁ ଅଧିକ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ । ଶୀତୁଆ ସନ୍ଧ୍ୟାରେ ଛାତ୍ରଛାତ୍ରୀଙ୍କ ଦ୍ଵାରା ଆୟୋଜିତ ହୋଇଥିଲା ଓଡ଼ିଶୀ, ଫ୍ୟାସନ ସୋ ଓ ଡିଜେ ନାଇଟ ଓ ଷ୍ଟାର୍ ନାଇଟ । ଓଡ଼ିଶାର କଳା ସଂସ୍କୃତିକୁ ପ୍ରଦର୍ଶନ ସହ ୩ ଦିନ ଧରି ବିଭିନ୍ନ କାର୍ଯ୍ଯକ୍ରମରେ ଝୁମିଥିଲେ ଛାତ୍ରଛାତ୍ରୀ ଓ ଶିକ୍ଷକ, ଶିକ୍ଷୟିତ୍ରୀ ।
ସ୍ପେକ୍ଟ୍ରା ବିଶ୍ୱବିଦ୍ୟାଳୟକୁ ପ୍ରତିନିଧିତ୍ୱ କରୁଥିବା ବିବିଧ ସଂସ୍କୃତି, କଳାକୁ ପ୍ରଦର୍ଶନ କରିବାର ଏକ ମାଧ୍ୟମ । ଛାତ୍ରଛାତ୍ରୀମାନଙ୍କୁ ସେମାନଙ୍କର ଦକ୍ଷତା ଏବଂ ପରସ୍ପରଠାରୁ ଶିଖିବା ପାଇଁ ଏକ ପ୍ଲାଟଫର୍ମ ପ୍ରଦାନ କରୁଛି । କାର୍ଯ୍ୟକ୍ରମରେ ସୁସଜ୍ଜିତ ବ୍ୟବସ୍ଥା, ସଂଚରିତ ପ୍ରବେଶ ପ୍ରୋଟକଲ, ସୁରକ୍ଷା ଓ ଶୃଙ୍ଖଳାକୁ ଅଧିକ ଗୁରୁତ୍ଵ ଦିଆଯାଇଥିଲା । ଅନ୍ତିମ ସନ୍ଧ୍ୟାରେ ସ୍ପେକ୍ଟ୍ରା ଦ୍ଵାରା ଆୟୋଜିତ ବିଭିନ୍ନ ପ୍ରତିଯୋଗିତାରେ ଭାଗ ନେଇଥିବା ଛାତ୍ରଛାତ୍ରୀ ଓ ସହଯୋଗୀଙ୍କୁ ପୁରସ୍କୃତ କରାଯାଇଥିଲା । ସମାଜରେ ଶିକ୍ଷା କ୍ଷେତ୍ରରେ ଛାତ୍ରଛାତ୍ରୀଙ୍କୁ ମାନସିକ ଚାପରୁ ମୁକ୍ତ କରିବା ସହ ସେମାନଙ୍କ ଅନ୍ତର୍ନିହିତ ସାଂସ୍କୃତିକ ଉର୍ଜାକୁ ପ୍ରସ୍ଫୁଟିତ କରିବା ଉଦ୍ଦେଶ୍ୟରେ ବିର୍ଲା ଗ୍ଲୋବାଲ ୟୁନିଭର୍ସିଟି ପକ୍ଷରୁ ଆୟୋଜିତ ହୋଇଛି ସ୍ପେକ୍ଟ୍ରା ୨୦୨୬ । ଯାହା ଛାତ୍ରଛାତ୍ରୀଙ୍କୁ ଅଧିକ ଉତ୍ସାହିତ କରିଛି ।
ଧରାପୃଷ୍ଠରେ ବିଜେ ଋତୁରାଜ ବସନ୍ତ: ପ୍ରକୃତିର ସୌନ୍ଦର୍ଯ୍ୟକୁ ଦ୍ଵିଗୁଣିତ କରୁଛି ଆମ୍ବବଉଳ
ବର୍ଷକ ବାର ମାସ ଛଅ ଋତୁ । ଆଉ ଋତୁ ଚକ୍ର ପରିବର୍ତ୍ତନରେ ଏବେ ଧରାପୃଷ୍ଠରେ ବିଜେ ଋତୁରାଜ ବସନ୍ତ l ଆଉ ଏହି ବସନ୍ତରେ ବଦଳି ଯାଇଛି ପ୍ରକୃତି l ପ୍ରକୃତିର ସୌନ୍ଦର୍ଯ୍ୟକୁ ଦ୍ଵିଗୁଣିତ କରୁଛି ଆମ୍ବବଉଳ । କବି ପ୍ରାଣରେ ଭରିଦେଉଛି ଉନ୍ମାଦନା । ଏଥିସହିତ ସଂପୂର୍ଣ୍ଣ ପରିବେଶକୁ ମହକାଉଛି ବଉଳର ବହଳିଆ ବାସ୍ନା । ଏ ଦୃଶ୍ୟ ଯେତିକି ମନୋରମ ସେତିକି ହୃଦୟସ୍ପର୍ଶି । ବଉଳକୁ ଦେଖି କବିଙ୍କ ମୁହଁରୁ ଝରିପଡୁଛି କବିର କବିତା ।
ରାସ୍ତାରେ ଯାଉଥିବା ପଥିକ କ୍ଲାନ୍ତ ଦୂର କରିବା ପାଇଁ ଯେତେବେଳେ ଆମ୍ବ ଗଛ ମୂଳରେ ବସିପଡନ୍ତି ସେତେବେଳେ ବଉଳର ବାସ୍ନା ଆଣିଦିଏ ଅସୁମାରି ତୃପ୍ତି । ଆମ୍ବ ବଉଳ ମଧ୍ୟରୁ ଭାସି ଆସୁଥିବା କୋଇଲିର କୁହୁକୁହୁ ସ୍ବର ବାଟୋଇର ମନକୁ ଅଧିକ ରୋମାଞ୍ଚିତ କରିଦିଏ । ପିଲା ଦିନର ଅନେକ ସ୍ମୃତୀକୁ ମନେ ପକାଇବା ସହ କ୍ଷଣିକ ପାଇଁ ହେଉ ପଛେ ଜୀବନର ସମସ୍ତ ଦୁଖ କଷ୍ଟକୁ ଭୁଲିଯାଆନ୍ତି ପଥିକ । ଆମ୍ବ ବଉଳ ବସନ୍ତକୁ ସ୍ବାଗତ କରିବା ସହିତ ଧରାପୃଷ୍ଟରେ ସୃଷ୍ଟି କରିଥାଏ ନିଜର ସ୍ବତନ୍ତ୍ର ପରିଚୟ ।
କାହା ପାଇଁ ଆବାସ ଯୋଜନା ? ପ୍ରକୃତ ହିତାଧିକାରୀଙ୍କୁ ମିଳୁନି ଘର
କାହା ପାଇଁ ଆବାସ ଯୋଜନା ? ପ୍ରକୃତ ହିତାଧିକାରୀଙ୍କୁ ମିଳୁନି ଘର । ଖାଲି ମିଳୁଛି ଫମ୍ପା ପ୍ରତିଶୃତି । ହେଲେ ଗରିବଙ୍କ କଥା ଶୁଣୁଛି କିଏ ? ଆମେ ଆପଣଙ୍କୁ କହୁଛୁ କେନ୍ଦ୍ରାପଡ଼ା ଜିଲ୍ଲା ଗରଦପୁର ବ୍ଲକ ବିନ୍ଧା ଗାଁର ଶିବପ୍ରସାଦ ନାୟକଙ୍କ କଥା । ଶିବ ଘର ଖଣ୍ଡେ ପାଇଁ ବିଭିନ୍ନ ଅଫିସକୁ ଧାଇଁ ନିରାଶ ହେବା ପରେ ବହୁ କଷ୍ଟରେ ଘର ଖଣ୍ଡେ ତିଆରି କରିଥିଲେ । ହେଲେ ତାହା ପ୍ଲାଷ୍ଟର କରିପାରିନଥିଲେ । ଫଳରେ ଘରର କାନ୍ଥ ଫାଟି ଆଁ କଲାଣି । ଭଙ୍ଗା କାନ୍ଥକୁ ସାହାରା ଦେଇଛି ବାଉଁଶ ଢେରା । ଆଉ ତାହାରି ଭିତରେ ଶିବପ୍ରସାଦ ନିଜର ମାଆ, ସ୍ତ୍ରୀ ଓ ଦିବ୍ୟାଙ୍ଗ ପୁଅକୁ ଧରି ବିପଦଶଙ୍କୁଳ ଅବସ୍ଥାରେ ଜୀବନ ବିତାଉଛନ୍ତି ।
ଶିବ ମୂଲ ଲାଗି ପରିବାର ପ୍ରତିପୋଷଣ କରିବା ସହ ଦିବ୍ୟାଙ୍ଗ ପୁଅର ଔଷଧ ଖର୍ଚ୍ଚ କରିଥାନ୍ତି । ଏଭଳି ସ୍ଥିତିରେ ସେ ଘର ସଜାଡି ପାରୁନାହାନ୍ତି । ତେଣୁ ତାଙ୍କୁ ଆବାସ ଯୋଜନାରେ ଘର ଖଣ୍ଡେ ଯୋଗାଇଦେବାକୁ ସରକାରଙ୍କ ନିକଟରେ ନିବେଦନ କରିଛନ୍ତି ଗ୍ରାମବାସୀ । ଅନ୍ୟପଟେ ତଦନ୍ତ ପରେ ଘର ଯୋଗାଇ ଦିଆଯିବ ବୋଲି କହିଛନ୍ତି କେନ୍ଦ୍ରାପଡ଼ା ଜିଲ୍ଲାପାଳ । ଜିଲ୍ଲାପାଳଙ୍କ ପ୍ରତିଶୃତି କାର୍ଯ୍ୟକାରୀ ହେଉଛି ନା ତାହା ପାଣିର ଗାର ପାଲଟୁଛି ତାକୁ ହିଁ ଅପେକ୍ଷା ।
କେବେ ସୁଧୁରିବ ମଣ୍ଡି ସମସ୍ୟା ? ଏଯାଏଁ ସରୁନି ଖରିଫ ଧାନ କିଣା
କେବେ ସୁଧୁରିବ ମଣ୍ଡି ସମସ୍ୟା ? ମାଘ ଯାଇ ଫାଲଗୁନ ହେଲାଣି ଏଯାଏଁ ସରୁନି ଖରିଫ ଧାନ କିଣା । ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକର ବିଭିନ୍ନ ମଣ୍ଡିରେ ଲାଗି ରହିଛି ଅଚଳାବସ୍ଥା । ବିଭିନ୍ନ ପାକ୍ସରେ ଖୋଲା ଆକାଶ ତଳେ ଗଦା ହୋଇ ରହିଛି କୁଇଣ୍ଟାଲ କୁଇଣ୍ଟାଲ ଧାନ ବସ୍ତା । ମିଲର୍ସ ଆବଶ୍ୟକୀୟ ଗାଡ଼ି ପଠାଉ ନଥିବାରୁ ଧାନ ଉଠିପାରୁନି । କିଛି ମଣ୍ଡିରେ ସିସିଟିଭି ନଥିବାରୁ ଧାନ ଚୋରି ହୋଇଯିବାର ଆଶଙ୍କା ରହୁଛି । ଫଳରେ ଖରା, କାକରରେ ବସି ରହି ଧାନ ଜଗିରହୁଛନ୍ତି ଅନ୍ନଦାତା । ତେବେ କେବେ ମଣ୍ଡିକୁ ଗାଡ଼ି ଆସିବ ? ଚାଷୀ ବର୍ଷକର ଆହାର କେବେ ବିକ୍ରି କରିବେ ? ତାକୁ ନେଇ ଚିନ୍ତାରେ ।
କଣ୍ଟାମାଳ ବ୍ଲକରେ ଧାନ କିଣା ମନ୍ଥର ଗତିରେ ଚାଲିଥିବା ବେଳେ ଚାଷୀଙ୍କୁ ଟୋକନ ଲାପ୍ସର ଚିନ୍ତା ଘାରିଲାଣି । ଖାଲି ସେତିକି ନୁହେଁ ହାତ ଉଧାରି କରି ଚାଷ କରି ଚାଷୀ କିପରି ଋଣ ସୁଝିବେ ତାକୁ ନେଇ ମୁଣ୍ଡରେ ହାତ ଦେଇ ବସିଛନ୍ତି । ସରକାର ସଠିକ ଭାବେ ମଣ୍ଡି ପରିଚାଳନା କରିବା ସହ ମଣ୍ଡିରୁ ଧାନ ଉଠାଇବାକୁ ଦାବି ହୋଇଛି । ଅନ୍ୟପଟେ ବୌଦ୍ଧ ଜିଲ୍ଲାରୁ ଚଳିତ ବର୍ଷ ୧୯ ଲକ୍ଷ ୨୬ ହଜାର କୁଇଣ୍ଟାଲ ଧାନ କ୍ରୟ ପାଇଁ ଟାର୍ଗେଟ ଆସିଛି । ବର୍ତ୍ତମାନ ସୁଦ୍ଧା ୧୪ ଲକ୍ଷ ୩୯ ହଜାର କୁଇଣ୍ଟାଲ ଧାନ କିଣା ସରିଲାଣି । ଏଯାଏଁ କୌଣସି ଅଭିଯୋଗ ଆସିନାହିଁ ବୋଲି ସଫେଇ ଦେଇଛନ୍ତି ଜିଲ୍ଲା ଯୋଗାଣ ଅଧିକାରୀ l
ପ୍ରଧାନମନ୍ତ୍ରୀ ମୋଦିଙ୍କ ଘୋଷଣା, ମାଲେସିଆରେ ଚାଲିବ ଭାରତର UPI
ପ୍ରଧାନମନ୍ତ୍ରୀ ମୋଦିଙ୍କ ଘୋଷଣା, ମାଲେସିଆରେ ଚାଲିବ ଭାରତର UPI
ନନ୍ଦିଘୋଷ ବ୍ୟୁରୋ: କ୍ବାଲାଲମ୍ପୁରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବଡ଼ ଘୋଷଣା । ଶୀଘ୍ର ମାଲେସିଆରେ ଶୀଘ୍ର ଭାରତର UPIରେ ନେଣଦେଣ ନେଇ ଘୋଷଣା କଲେ ପ୍ରଧାନମନ୍ତ୍ରୀ । ମାଲେସିଆ ପ୍ରଧାନମନ୍ତ୍ରୀ ଅନଓ୍ବର ଇବ୍ରାହିମଙ୍କ ସହ ଆଜି କ୍ବାଲାଲମ୍ବୁରରେ ଭାରତୀୟ ସମୁଦାୟଙ୍କୁ ସମ୍ବୋଧିତ କରିବା ବେଳେ ମୋଦି ଏହି ଘୋଷଣା କରିଛନ୍ତି । ଏହାସହ ନୂଆ କନସ୍ୟୁଲେଟ୍ ଖୋଲିବା ନେଇ ମଧ୍ୟ ଘୋଷଣା କରିଛନ୍ତି । ଏହା ଭାରତ ଓ ମାଲେସିଆ ମଧ୍ୟରେ ସମ୍ପର୍କକୁ ଆହୁରି ଦୃଢ଼ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି । ସେ କହିଛନ୍ତି, ମାଲେସିଆରେ ବିଶ୍ବର ଦ୍ବିତୀୟ ସର୍ବାଧିକ ଭାରତୀୟ ବଂଶୋଦ୍ଭବ ରହୁଛନ୍ତି । ଏମିତି ବହୁତ କିଛି ଅଛି ଯାହା ଭାରତୀୟ ଓ ମାଲେସିଆବାସୀଙ୍କୁ ଯୋଡ଼ି ରଖିଛି ।
ଭାରତୀୟ ବଂଶୋଦ୍ଭବଙ୍କୁ ସମ୍ବେଧିତ କରି ପ୍ରଧାନମନ୍ତ୍ରୀ କହିଛନ୍ତି, ଆପଣମାନେ ନୁଇ ଦେଶକୁ ଯୋଡ଼ି ରଖିଛନ୍ତି । ଆପଣମାନେ ରୁଟି କୋନାଇକୁ ମାଲାବାର ପରାଟା ସହ ଯୋଡ଼ିଛନ୍ତି । ନଡିଆ ଓ ମସଲାର ସ୍ବାଦ ସେ କ୍ବାଲାଲମ୍ପୁର ହେଉ କି କୋଚି ବହୁତ ଚିହ୍ନା ଚିହ୍ନା ଲାଗୁଛି । ଆମେ ପରସ୍ପରକୁ ବହୁତ ଭଲ ଭାବେ ବୁଝିଥାନ୍ତି । କାରଣ ଆମ ଭାଷାରେ ବହୁତ ସମାନତା ରହିଛି । ମୁଁ ଶୁଣିଛିଳ ମାଲେସିଆରେ ଭାରତୀୟ ସିନେମା ଓ ଗୀତର ଲୋକପ୍ରିୟତା ରହିଛି । ଆପଣମାନେ ଜାଣିଛନ୍ତି ପ୍ରଧାନମନ୍ତ୍ରୀ ଅନଓ୍ବର ଇବ୍ରାହିମ ବହୁତ ଭଲ ଗୀତ ଗାଇଥାନ୍ତି । ହେଲେ ଭାରତରେ ବହୁତ ଲୋକ ଏହା ଜାଣିନଥିଲେ । ଗତ ଗସ୍ତ ସମୟରେ ସେ ବହୁତ ଖୁସି ଥିଲେ । ଭାରତରେ ତାଙ୍କର ଏକ ପୁରୁଣା ହିନ୍ଦି ଗୀତ ଭାଇରାଲ ହେଉଛି । ଏହା ବି ଭଲ କଥା ତାଙ୍କୁ ଲିଜେଣ୍ଡ୍ରି ଏମଜିଆରଙ୍କ ତାମିଲ ଗୀତ ବହୁତ ପସନ୍ଦ ।
ଭାରତୀୟଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ରହିଛି
ପ୍ରଧାନମନ୍ତ୍ରୀ କହିଛନ୍ତି, ମୁଁ ଜାଣିଛି ଭାରତୀୟଙ୍କ ପାଇଁ ଆପଣଙ୍କ ହୃଦୟରେ ସ୍ବତନ୍ତ୍ର ସ୍ଥାନ ରହିଛି । ୨୦୦୧ର ଏକ ଘଟଣା ମୋର ମନେ ଅଛି । ଗୁଜରାଟରେ ଭୂକମ୍ପ ହୋଇଥିଲା । ଆପଣମାନଙ୍କ ମଧ୍ୟରୁ ବହୁତ ଲୋକ ସହାୟତା ପାଇଁ ଆଗେଇ ଆସିଥିଲେ । ଏଥିପାଇଁ ଆପଣମାନଙ୍କୁ ଧନ୍ୟବାଦ ।
ନେତାଜୀଙ୍କୁ ମନେ ପକାଇଲେ ପ୍ରଧାନମନ୍ତ୍ରୀ
ଏହାପୂର୍ବରୁ ଭାରତକୁ ସ୍ବାଧୀନତା ଦେବା ପାଇଁ ଆପଣଙ୍କ ହଜାର ହଜାର ପୂର୍ବଜ ଜୀବନ ଦେଇଚନ୍ତି । ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଇଣ୍ଡିଆନ ନ୍ୟାଶନାଲ ଆର୍ମୀରେ ସାମିଲ ହୋଇଥିବା ପ୍ରଥମ ଲୋକ ଆମର ଏହି ପଡୋଶୀ ଥିଲେ । ଆଜିର ଦିନରେ ମୁଁ ମାଲେସିଆରେ ନେତାଜୀ ସର୍ଭିସ ସେଣ୍ଟର ଓ ନେତାଜୀ ଓ୍ବେଲଫେୟାର ଫାଉଣ୍ଡେସନଙ୍କ ପ୍ରୟାସକୁ ସଲାମ କରୁଛି ।
ଆମେ ଏବେ ନିବେଶ ଓ ଟ୍ରେଡ ହବ୍
ପ୍ରଧାନମନ୍ତ୍ରୀ ଆଗକୁ କହିଛନ୍ତି, ଆଗରୁ ଭାରତକୁ ବହୁତ ବଡ଼ ବଜାର ଭାବେ ବିବେଚନା କରାଯାଉଥିଲା । ଏବେ ଆମେ ନିବେଶ ଓ ଟ୍ରେଡ ହବ୍ ପାଲଟି ଗଲୁଣି । ସେ ୟୁକେ ହେଉ କି ୟୁଏଇ, ଅଷ୍ଟ୍ରେଲିଆ ହେଉ କି ନ୍ୟୁଜିଲାଣ୍ଡ, ଓମାନ ହେଉ କି ୟୁଏସଏ ବିକାଶ ପାଇଁ ଭାରତକୁ ଏକ ବିଶ୍ବସ୍ତ ବନ୍ଧୁ ଭାବେ ଦେଖୁଛନ୍ତି । ଏମାନଙ୍କ ସହ ଆଜି ଭାରତର ଟ୍ରେଡ ଡିଲ ହୋଇଛି ।
ପ୍ରତିଶ୍ରୁତି ଦେଇଥିଲି, ଆସିଲି
ଶେଷରେ ସେ କହିଛନ୍ତି, ଗତବର୍ଷ ମୁଁ ASEAN ସମିଟ ସମୟରେ ମାଲେସିଆ ଆସି ପାରି ନଥିଲି । ହେଲେ ମୁଁ ଶୀଘ୍ର ଆସିବି ବୋଲି ମୋର ବନ୍ଧୁଙ୍କୁ ପ୍ରତିଶ୍ରୁତି ଦେଇଥିଲି । ଆଜି ମୁଁ ମୋ ପ୍ରତିଶ୍ରୁତି ରଖି ଆପଣ ମାନଙ୍କ ପାଖରେ ପହଞ୍ଚିଛି ।
ଚାଲୁ ଚାଲୁ ରାଜ ରାସ୍ତାରେ ଜଳିଗଲା ହାଇୱା
ଚାଲୁ ଚାଲୁ ଜଳିଗଲା ହାଇୱା l କଳାହାଣ୍ଡି ଜିଲ୍ଲା ଜୟପାଟଣା ନିକଟ ବୀଜ ମାରା ରାଜ ରାସ୍ତାରେ ଜଳିଗଲା ହାଇୱା । ଅଳ୍ପକେ ବର୍ତ୍ତିଲେ ଡ୍ରାଇଭର ଓ ହେଲ ଫର l ଜଳି ଯାଇଥିବା ଗାଡ଼ିଟି ଜୟପାଟଣାର ସୁଦର୍ଶନ ମୁଣ୍ଡ ନାମକ ଠିକାଦାରଙ୍କ ହୋଇଥିବା ବେଳେ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି l
ବିଜେପି କର୍ପୋରେଟର ରୀତୁ ତାବଡ଼େ ହେବେ ମୁମ୍ବାଇ ମେୟର
ରୀତୁ ତାବଡ଼େ ହେବେ ମୁମ୍ବାଇ ମେୟର। ବିଜେପି କର୍ପୋରେଟର ରୀତୁ ପିନ୍ଧିବେ ମୁମ୍ବାଇ ମୁକୁଟ। ଏନେଇ ଦଳ ପକ୍ଷରୁ କରାଯାଇଛି ଘୋଷଣା। ଏସିଆର ସର୍ବବୃହତ ଧନୀ ପୌର ନିଗମରେ ମେୟର ହେବେ ରୀତୁ। ସେପଟେ ଶିବସେନା କର୍ପୋରେଟର ସଞ୍ଜୟ ଗାଦି ହେବେ ଡେପୁଟୀ ମେୟର ହେବ। ଗତ ମୁମ୍ବାଇ ମହାନଗର ନିଗମ ନିର୍ବାଚନରେ ବିଜେପି-ଶିବସେନା ମେଣ୍ଟ ବହୁଳ ବିଜୟ ହୋଇଥିଲା। ଆସନ୍ତା ୧୧ ତାରିଖରେ ହେବେ ମେୟର ନିର୍ବାଚନ। ବୃହନ ମୁମ୍ବାଇ ମହାନଗର ନିଗମର ବିଜେପି କର୍ପୋରେଟରମାନଙ୍କ ବୈଠକରେ ରୀତୁଙ୍କ ନାଁରେ ମୋହର ଲାଗିଥିଲା। ମୁମ୍ବାଇର ମେୟର ପଦବୀ ସାଧାରଣ ବର୍ଗରୁ ମହିଳା ବର୍ଗ ଲାଗି ସଂରକ୍ଷିତ ଥିଲା। ଘାତୋକପୁର ୱାର୍ଡରୁ ୩ ଥର କର୍ପୋରେଟର ଭାବେ ବିଜୟୀ ହୋଇଛନ୍ତି ରୀତୁ। ସେ ବିଏମସିର ଶିକ୍ଷା କମିଟିର ଅଧ୍ୟକ୍ଷା ଭାବେ କାର୍ଯ୍ୟ କରିଛନ୍ତି।
ଆସନ୍ତା ଫେବ୍ରୁଆରୀ ୧୧ ନିର୍ବାଚନରେ ଯଦି ରୀତୁ ବିଜୟୀ ହୁଅନ୍ତି ତେବେ ସେ ହେବ ବିଜେପିର ଦ୍ବିତୀୟ ମେୟର। ପୂର୍ବରୁ ୧୯୮୨ରୁ ୧୯୮୩ ବିଜେପିର ପ୍ରଭାକର ପାଇ ହୋଇଥିଲେ ଦଳର ପ୍ରଥମ ମେୟର। ସେପଟେ ଦହିସରରୁ କର୍ପୋରେଟରେ ଭାବେ ବିଜୟୀ ହୋଇଥିବା ଶିବସେନାର ସଞ୍ଜୟ ଗାଦି ଡେପୁଟୀମେୟର ହେବେ। ଦଳର ୪ କର୍ପୋରେଟରଙ୍କୁ ୫ ବର୍ଷ ଭିତରେ ଡେପୁଟୀ ମେୟର ପଦରେ ଅଧିଷ୍ଠିତ କରିବା ଲାଗି ଶିବସେନା କରିଛି ନୂଆ ଫର୍ମୁଲା। ଏହି ଫର୍ମୁଲା ଅନୁସାରେ ପ୍ରତି ଡେପୁଟୀ ମେୟରଙ୍କ କାର୍ଯ୍ୟକାଳ ବର୍ଷେ ତିନିମାସ ରହିବ। ୨୨୭ ସଦସ୍ଯ ବିଶିଷ୍ଟ ବିଏମସିରେ ବିଜେପିର ୮୯ କର୍ପୋରେଟର ଥିବାବେଳେ ଶିବସେନାର ରହିଛନ୍ତି ୨୯ ସଦସ୍ୟ। ଶିବସେନା ୟୁବିଟି ୬୫ ଆସନ ପାଇଥିବାବେଳେ କଂଗ୍ରେସକୁ ୨୪, ଏଆଇଏମଆଇଏମକୁ ୮, ଏମଏନଏସକୁ ୬ ଆସନ ମିଳିଛି।
ଖୋଲିଲା ଗଞ୍ଜାମ ଜିଲ୍ଲାର ଅଧିଷ୍ଠାତ୍ରୀ ଦେବୀ ମା’ ତାରାତାରିଣୀ ମନ୍ଦିର ହୁଣ୍ଡି
ଖୋଲିଲା ଗଞ୍ଜାମ ଜିଲ୍ଲାର ଅଧିଷ୍ଠାତ୍ରୀ ଦେବୀ ମା’ ତାରାତାରିଣୀ ମନ୍ଦିର ହୁଣ୍ଡି । ହୁଣ୍ଡିକୁ ଆଜି ମନ୍ଦିର ପରିଚାଳନା କମିଟି, ଜିଲ୍ଲା ପ୍ରଶାସନ ପୋଲିସ ଓ ସେବାୟତଙ୍କ ଉପସ୍ଥିତ ରେ ଖୋଲା ଯାଇଛି । ସମସ୍ତଙ୍କ ଉପସ୍ଥିତିରେ ଆଜି ସକାଳୁ ହୁଣ୍ଡିକୁ ଖୋଲାଯାଇଛି । ଚାରି ମାସ ପରେ ମନ୍ଦିରର ହୁଣ୍ଡି ଖୋଲାଯାଇଥିବା ବେଳେ ମନ୍ଦିର ଦାୟିତ୍ୱରେ ଥିବା ପୁରୁଷୋତ୍ତମପୁର ତହସିଲଦାର ବିନୋଦ କୁମାର ବେହେରା ଦାୟିତ୍ୱ ନେବା ପରେ ଏହି ହୁଣ୍ଡିକୁ ଖୋଲାଯାଇଛି । ହୁଣ୍ଡିରୁ ଟଙ୍କା, ସୁନା , ରୂପା ଓ ବିଦେଶୀ ଟଙ୍କା ମଧ୍ୟ ବାହାରିଛି । ହୁଣ୍ଡିରୁ କାନାଡ଼ା ଡଲାର କିଛି ମିଳିଥିବା ବେଳେ ମା’ ତାରାତାରିଣୀଙ୍କ ଉଦ୍ଦେଶ୍ୟରେ ଏକ ଛୋଟ ବାଳକର ଚିଠି ମଧ୍ୟ ମିଳିଥିବା ଦେଖିବାକୁ ମିଳିଛି । ଚିଠିରେ ବାଳକ ଜଣଙ୍କ ନିଜକୁ ସଦବୁଦ୍ଧି ଦିଅ ବୋଲି ଲେଖିବା ସହ ନିଜ ଭାଇ, ମା ଓ ବାପାଙ୍କୁ ଭଲରେ ରଖିବା ନେହୁରା ହୋଇଛନ୍ତି । ହୁଣ୍ଡିରୁ ବାହାରିଥିବା ଟଙ୍କା ପୁରୁଷୋତ୍ତମପୁର ତହସିଲ କାର୍ଯ୍ୟାଳୟର କର୍ମଚାରୀଙ୍କ ଦ୍ୱାରା ଗଣତି ଜାରି ରହିଛି ।